Sambu na Inki Kudipesa na Yehowa?

“Wanzio mosi kwisaka kumonika na mono na kati ya mpimpa. Yandi vandaka wanzio ya Nzambi yina kele mfumu na mono.”​—BIS. 27:23.

1. Inki bitambi bantu yina kevandaka ya kuyilama na kubaka mbotika kesalaka na ntwala, mpi inki bangyufula yo kebasisa?

“NA NSADISA ya kimenga ya Yezu Kristu, keti nge mebalula ntima na masumu na nge mpi nge mekudipesa na Yehowa sambu na kusala luzolo na yandi?” Yai kele mosi na kati ya bangyufula zole yina bakandida ya mbotika kepesaka mvutu na nsuka ya diskure ya mbotika. Sambu na nki Bakristu fwete kudipesa na Yehowa? Inki mutindu kudipesa na Yehowa kenatilaka beto mambote? Sambu na nki Nzambi lenda ndima ve lusambu ya muntu yina mekudipesaka ve na yandi? Sambu na kubakisa mvutu, beto fwete tadila ntete ntendula ya kudipesa.

2. Kudipesa na Yehowa ketendula inki?

² Kudipesa na Nzambi ketendula inki? Tala mutindu ntumwa Polo kutubilaka bangwisana na yandi ti Nzambi. Na ntwala ya bantu mingi yina kuvandaka na kati ya maswa yina vandaka na kigonsa, yandi bingaka Yehowa “Nzambi yina kele mfumu na mono.” (Tanga Bisalu 27:22-24.) Bakristu yonso ya kyeleka kele bantu ya Yehowa. Kansi nsi-ntoto ya mvimba kele “na maboko ya Muntu ya Mbi.” (1 Yoa. 5:19) Bakristu kekumaka bantu ya Yehowa ntangu bo kekudipesaka na yandi na mutindu ya mbote na kisambu. Kudipesa ya mutindu yina kele lusilu ya muntu yandi mosi kesalaka. Na nima yandi kebakaka mbotika ya masa.

3. Mbotika ya Yezu vandaka kumonisa inki, mpi nki mutindu balongoki na yandi lenda landa mbandu na yandi?

³ Yezu kupesaka beto mbandu ntangu yandi solaka yandi mosi na kusala luzolo ya Nzambi. Sambu yandi butukaka na kikanda ya Izraele yina kudipesaka na Nzambi, Yezu vandaka dezia ya kudipesa na Nzambi. Ata mpidina, ntangu yandi bakaka mbotika yandi salaka kima mosi ya kuluta mambu yina nsiku vandaka kulomba. Ndinga ya Nzambi kemonisa nde yandi tubaka nde: “Tala! Mono kekwisa . . . sambu na kusala luzolo na nge, O Nzambi.” (Baeb. 10:7; Luka 3:21, NW) Yo yina mbotika ya Yezu vandaka kumonisa kudipesa na yandi na Nzambi sambu na kusala luzolo ya Tata na yandi. Balongoki na yandi kelandaka mbandu na yandi ntangu bo kekudipesaka sambu na mbotika. Kansi sambu na bo, mbotika ya masa kele mutindu ya kumonisa na meso ya  bantu yonso nde bo mekudipesaka na Nzambi na kisambu.

Mambote Yina Kudipesa na Nzambi Kenatilaka Beto

4. Kinduku ya Davidi ti Yonatani ketela beto inki na yina metala lusilu?

⁴ Kudipesa na Nzambi kele dyambu mosi ya mfunu mpenza. Yo meluta mpenza kusala kaka lusilu. Kansi, inki mutindu kudipesa kenatilaka beto mambote? Sambu na kufwanikisa, bika beto tala mutindu kusala lusilu na bangwisana ya bantu kenataka mambote. Beto baka mbandu ya kinduku. Sambu na kusepela na dibaku ya kuvanda ti nduku, nge fwete ndima mikumba yina kuvanda nduku kenataka. Yo kelombaka lusilu​—nge fwete kudiwa nde nge kele ti mukumba ya kudibanza sambu na nduku na nge. Mosi na kati ya binduku ya kuluta ngolo yina Biblia ketubilaka kele kinduku ya Davidi ti Yonatani. Bo salaka nkutu lusilu ya kinduku na kati na bo zole. (Tanga 1 Samuele 17:57; 18:1, 3.) Ata kinduku ya kuluta ngolo ya mutindu yai kemonanaka ve mingi, binduku mingi kekumaka nkutu ngolo mpenza ntangu banduku yango kekudipesaka, to ntangu konso muntu kewaka nde yandi kele na mukumba sambu na nduku na yandi.​—Bing. 17:17; 18:24.

5. Inki mutindu mpika mosi lendaka kubaka mambote ya kuvanda muntu ya mfumu mosi ya mbote?

⁵ Bansiku yina Nzambi kupesaka bantu ya Izraele ketubila ngwisana yankaka yina bantu kebakilaka mambote kana bo mesala lusilu. Kana mpika mosi kezola kubikala kimakulu muntu ya mfumu mosi ya mbote, yandi lendaka kusala lusilu yina kevukisa yandi kimakulu ti mfumu yango. Nsiku vandaka kutuba nde: “Kana mpika yina kutuba nde: ‘Mono ke zolaka mfumu na mono, mono ke zolaka mpi nkento na mono ti bana na mono, mono ke zola katuka na kimpika ve’, mpidina mfumu na yandi fweti kwenda na yandi na kielo ya nzo ti kutobula yandi dikutu na meso na mono Nzambi. Ntangu yai yandi ta vandaka kaka mpika na yandi tii lufwa na yandi.”​—Kub. 21:5, 6.

6, 7. (a) Inki mutindu lusilu kenatilaka bantu mambote? (b) Yo kemonisa inki na yina metala bangwisana na beto ti Yehowa?

⁶ Makwela kele ngwisana mosi yina kelombaka lusilu mosi ya ngolo mpenza. Yo kele ve lusilu yina bo kesalaka sambu na kuzitisa kontra mosi, kansi lusilu yina bo kesalaka na muntu. Bantu zole yina kezinga kumosi kukonda kukwelana, bo ti bana na bo lenda vanda ve ata fyoti na lutaninu ya kyeleka. Kansi nkento ti bakala yina mevukanaka na makwela ya lukumu kele ti bikuma ya Masonuku ya fwete pusa bo na kusala ngolo sambu na kuyidika na zola yonso mambu ya mpasi ya bo kekutana ti yo na luzingu na bo.​—Mat. 19:5, 6; 1 Kor. 13:7, 8; Baeb. 13:4.

⁷ Na ntangu ya ntama, bantu vandaka kubaka mambote na kuvanda ti kontra ya kewakanisa bo na mambu ya mumbongo mpi ya kisalu. (Mat. 20:1, 2, 8) Yo kele mutindu mosi bubu yai. Mu mbandu, beto kebakaka mambote kana beto mesala ngwisana to kontra ya kusonama, na ntwala ya kubanda mumbongo to ya kuyantika kisalu na kompani mosi. Yo yina, kana ngwisana to lusilu kekumisaka ngolo mambu bonso kinduku, makwela, mpi kisalu, kudipesa ya mvimba tanata mambote mingi mpenza na bangwisana na nge ti Yehowa! Bika beto tadila mutindu bantu ya ntangu ya ntama kubakaka mambote sambu bo kudipesaka na Yehowa Nzambi mpi mutindu dyambu yina kuvandaka mfunu mingi kuluta lusilu ya mpamba.

Mutindu Kudipesa na Nzambi Kunatilaka Bantu ya Izraele Mambote

8. Kudipesa na Nzambi kutendulaka inki sambu na bantu ya Izraele?

⁸ Dikanda ya Izraele ya mvimba kudipesaka na Yehowa ntangu bo salaka lusilu na Nzambi. Yehowa kuvukisaka bo penepene na Ngumba ya Sinai, mpi yandi zabisaka bo nde: “Kana beno wila mono ti kulanda bansiku ya kuwakana ya mono wakanaka na beno, beno ta vanda bantu na mono mosi mpenza.” Bantu yonso kuvutulaka mbala mosi nde: “Beto ta sala mambu yonso mutindu Mfumu Nzambi me tuba.” (Kub. 19:4-8) Kudipesa na bo na Nzambi kutendulaka mambu mingi kuluta kusila na kusala kima mosi. Yo tendulaka nde bo vandaka bantu ya Yehowa, mpi Yehowa vandaka kubaka bo bonso ‘bantu na yandi mpenza.’

9. Inki mutindu bantu ya Izraele kubakaka mambote sambu bo kudipesaka na Nzambi?

⁹ Bantu ya Izraele kubakaka mambote sambu bo vandaka bantu ya Yehowa. Yandi vandaka ya kwikama mpi kukebaka bo mutindu tata ya zola  kekebaka mwana na yandi. Nzambi kuzabisaka bantu ya Izraele nde: “Keti mama lenda vila mwana ya yandi ke nwisa mabele? Keti yandi lenda wa mawa ve sambu na mwana yina me basika na divumu na yandi? Ata mama kuvila mwana na yandi, kansi mono, ta vila beno ve ata fioti!” (Yez. 49:15) Yehowa kupesaka bo lutwadisu na nsadisa ya Nsiku, kikesa na nzila ya baprofete, mpi kutaninaka bo na nzila ya bawanzyo. Muyimbi-bankunga mosi kusonikaka nde: “Yandi ke songaka mambu na yandi na Yakobi, yandi ke pesaka malongi ti bansiku na yandi na Israele. Kansi na bantu ya bansi ya nkaka, . . . yandi me salaka mpidina ata fioti ve.” (Nk. 147:19, 20; tanga Nkunga 34:7, 19; 48:14.) Kaka mutindu Yehowa kukebaka dikanda na yandi ya ntangu ya ntama, mutindu mosi yandi takeba bantu yina kekudipesa na yandi bubu yai.

Sambu na Nki Beto Fwete Kudipesa na Nzambi

10, 11. Keti beto kebutukaka na dibuta ya Nzambi ya luyalanganu ya mvimba? Tendula.

¹⁰ Na ntangu bo keyindula kana bo fwete kudipesa na Nzambi mpi kubaka mbotika, bankaka lenda kudiyula nde, ‘Sambu na nki ve mono lenda sambila Nzambi kukonda kudipesa na yandi?’ Mvutu kemonana pwelele na ntangu beto ketadila pozisio na beto na meso ya Nzambi. Yibuka nde, sambu na disumu ya Adami, beto yonso kebutukaka na nganda ya dibuta ya Nzambi. (Roma 3:23; 5:12) Kudipesa na Nzambi kele dyambu mosi ya mfunu ya beto fwete lungisa sambu Nzambi kundima beto na dibuta na yandi ya luyalanganu ya mvimba. Bika beto tala sambu na inki.

¹¹ Muntu mosi ve na kati na beto kele na tata yina lendaka kupesa yandi luzingu ya kukuka, mutindu Nzambi kukanaka. (1 Tim. 6:19) Beto butukaka ve bonso bana ya Nzambi sambu ntangu bankwelani ya ntete kusalaka masumu, bantu kukabwanaka na Tata mpi Ngangi na bo ya zola. (Fwanisa ti Kulonga 32:5.) Banda na ntangu yina, bantu yonso kezingaka na nganda ya dibuta ya Yehowa ya luyalanganu ya mvimba, bo kele ya kukabwana na Nzambi.

12. (a) Inki mutindu bantu ya kukonda kukuka lenda kuma bantu ya dibuta ya Nzambi? (b) Inki bitambi beto fwete sala na ntwala ya kubaka mbotika?

¹² Ata mpidina, konso muntu na kati na beto lenda lomba nde Nzambi kundima yandi na kati ya dibuta ya bansadi na yandi ya mendimamaka. * Inki mutindu yo lenda salama sambu na bansumuki bonso beto? Ntumwa Polo kusonikaka nde: “Beto vandaka ntete bambeni ya Nzambi, kansi beto me wakana ti yandi sambu na lufwa ya Mwana na yandi.” (Roma 5:10) Na mbotika beto kelombaka Nzambi na kupesa beto kansansa ya mbote sambu yandi kundima beto. (1 Pie. 3:21) Kansi, na ntwala ya kubaka mbotika, kele ti bitambi yina beto fwete sala. Beto fwete zaba Nzambi, kulonguka na kutudila yandi ntima, kubalula ntima, mpi kusoba luzingu na beto. (Yoa. 17:3; Bis. 3:19; Baeb. 11:6) Mpi kele dyaka ti dyambu mosi ya beto fwete sala na ntwala nde Nzambi kundima beto na dibuta na yandi. Inki kele dyambu yango?

13. Sambu na nki yo mefwana nde muntu kusala lusilu ya kudipesa na Nzambi sambu na kukuma muntu ya dibuta na yandi ya bansambidi ya mendimamaka?

¹³ Na ntwala nde muntu mosi yina mekabwanaka na Nzambi kukuma muntu ya dibuta ya bansadi na yandi ya mendimamaka, yandi fwete sala ntete lusilu ya masonga na Yehowa. Sambu na kubakisa dyambu yai, beto baka mbandu ya tata mosi ya mbote yina kemonisila mwana-nsyona mosi dikebi ya masonga mpi kezola kukumisa yandi muntu ya dibuta na yandi. Tata yango mezabanaka nde yandi kele muntu ya mbote. Kansi, na ntwala ya kundima leke yango bonso mwana na yandi, tata yina kezola nde mwana-bakala yango kusala lusilu. Ebuna, tata yango ketuba nde, “Na ntwala nde mono ndima nge bonso mwana na mono, mono kezola kuzaba nde nge tazola mono mpi tazitisa mono bonso tata na nge.” Tata yina tandima yandi na dibuta na yandi kaka kana leke yina kundima na kusala lusilu mosi ya masonga. Keti mutindu yai ya kusala mambu mefwana ve? Mutindu mosi, Yehowa kendimaka na dibuta na yandi kaka bantu yina kele na luzolo ya kusala lusilu ya kudipesa na yandi. Biblia ketuba nde: “Mono ke lomba beno na kudipesa beno mosi na Nzambi bonso makabu ya menga,  makabu ya kufwa ve kansi ya moyo, sambu na kusadila yandi ti kupesa yandi kiese.”​—Roma 12:1.

Dyambu Mosi ya Kemonisa Zola mpi Lukwikilu

14. Na nki mutindu kudipesa kele mutindu mosi ya kumonisa zola?

¹⁴ Kusala lusilu ya kudipesa na Nzambi kele mutindu mosi ya kumonisa zola na beto ya masonga sambu na Yehowa. Na mambu yankaka yo mefwanana ti lusilu ya makwela. Bakala ya Mukristu yina kezola kukwela kemonisaka zola na yandi na kusalaka lusilu ya kuvanda ya kwikama na nkento na yandi, ata bo kutana ti konso mambu yina. Yo kele lusilu ya nge kesala na muntu mosi kansi ve kaka lusilu ya kusala kima mosi. Bakala ya Mukristu yina kezola kukwela kebakisaka nde yandi lenda vanda ve ti dibaku ya mbote ya kuzinga ti nkento na yandi kana yandi sala ve lusilu ya makwela. Na mutindu mosi, beto lenda baka mpenza ve mambote yonso ya kuvanda bantu ya dibuta ya Yehowa kukonda kusala lusilu ya kudipesa. Yo yina beto kekudipesaka na Nzambi sambu, ata beto kele bantu ya kukonda kukuka, beto kevandaka na mpusa ya kuvanda bantu na yandi mpi kebakaka lukanu ya kuvanda ya kwikama, ata beto kutana ti konso mambu yina.​—Mat. 22:37.

15. Inki mutindu kudipesa kele dyambu ya kemonisaka lukwikilu?

¹⁵ Ntangu beto kekudipesaka na Nzambi, beto kesalaka dyambu mosi ya kemonisaka lukwikilu. Sambu na nki yo kele mpidina? Lukwikilu na beto na Yehowa kendimisaka beto nde kupusana penepene ya Nzambi kele mbote sambu na beto. (Nk. 73:28) Beto kezabaka nde yo tavanda ve pete ntangu yonso na kutambula ti Nzambi na ntangu beto kezinga na kati ya “bantu ya luvunu ti ya mbi,” kansi beto ketulaka ntima na lusilu ya Nzambi ya kusadisa beto na ntangu beto kesala bikesa. (Filp. 2:15; 4:13) Beto kezabaka nde beto kele bantu ya kukonda kukuka, kansi beto ketulaka ntima nde Yehowa tasadila beto mambu na mawa ata ntangu beto kesala bifu. (Tanga Nkunga 103:13, 14; Roma 7:21-25.) Beto kendimaka nde Yehowa tapesa beto lufutu sambu na lukanu na beto ya kubikala ya kwikama.​—Yobi 27:5, NW.

Kudipesa na Nzambi Kenataka Kyese

16, 17. Sambu na inki kudipesa na Yehowa kenataka kyese?

¹⁶ Kudipesa na Yehowa kenataka kyese sambu yo kelombaka nde beto pesa luzingu na beto mosi. Yezu kumonisaka kyeleka mosi ya mfunu ntangu yandi tubaka nde: “Kiese ke vandaka mingi na kupesa, kansi na kubaka kiese ke vandaka fioti.” (Bis. 20:35) Na ntangu yandi vandaka kusala kisalu na yandi na ntoto, Yezu kumonaka mpenza kyese ya kekatukaka na kupesa. Ntangu yo vandaka mfunu, yandi vandaka kubuya kupema, kudya, mpi mambu yankaka ya mbote sambu na kusadisa bantu na kuzwa nzila ya luzingu. (Yoa. 4:34) Yezu vandaka kubaka kyese na kusepedisa ntima ya Tata na yandi. Yandi tubaka nde: “Ntangu yonso mono ke salaka mambu yina ke pesaka yandi kiese.”​—Yoa. 8:29; Bing. 27:11.

¹⁷ Yo yina, Yezu kusongaka balongoki na yandi mutindu ya mbote ya kuzinga ntangu yandi tubaka nde: “Kana muntu zola kwisa kulanda mono, yandi lenda yindula diaka ve luzingu na yandi mosi.” (Mat. 16:24) Kusala mutindu yina  kepusaka beto penepene ya Yehowa. Keti beto lenda kuditula na nsi ya maboko ya muntu yankaka yina lenda keba beto ti zola ya mingi?

18. Sambu na nki kuzinga na kuwakana ti kudipesa na beto na Yehowa kenataka kyese kuluta kudipesa na konso kima to muntu yankaka?

¹⁸ Kudipesa na Yehowa mpi na nima kuzinga na kuwakana ti kudipesa yina na kusalaka luzolo na yandi kenataka kyese mingi kuluta kudipesa na konso kima to muntu yankaka. Mu mbandu, bantu mingi kelutisaka luzingu na bo ya mvimba na kusosa kimvwama ya kinsuni kansi bo kezwaka ve kyese ya kyeleka. Kansi, bantu yina kekudipesaka na Yehowa kezwaka mambote ya kezingaka mingi. (Mat. 6:24) Lukumu ya kuvanda “banduku ya kisalu ya Nzambi” kepesaka bo kyese; ata mpidina bo kekudipesaka ve na kisalu mosi buna kansi na Nzambi na beto ya ntonda. (1 Kor. 3:9, NW) Ata muntu mosi ve lenda monisa ntonda sambu na kuditambika na bo kuluta yandi. Nkutu yandi tavutula bansadi na yandi ya kwikama batoko na mpila nde bo baka mambote ya dikebi na yandi mvula na mvula.​—Yobi 33:25; tanga Baebreo 6:10.

19. Inki dibaku ya mbote bantu yina mekudipesaka na Yehowa kevandaka na yo?

¹⁹ Kupesa luzingu na nge na Yehowa kesalaka nde nge kuma na bangwisana ya ngolo ti yandi. Biblia ketuba nde: “Beno kwenda penepene na Nzambi, ebuna yandi ta kwisa penepene na beno.” (Yak. 4:8; Nk. 25:14) Na disolo ya kelanda, beto tatadila sambu na nki beto lenda tula ntima na nsola ya beto mesalaka ya kuvanda bantu ya Yehowa.

[Noti na Nsi ya Lutiti]

Inki Mvutu Nge Tapesa?

• Kudipesa na Nzambi ketendula inki?

• Inki mutindu kuvanda bantu ya mekudipesaka na Nzambi kenatilaka beto mambote?

• Sambu na nki Bakristu fwete kudipesa na Yehowa?

[Bangyufula ya Disolo ya Kulonguka]

[Kifwanisu ya kele na lutiti 12]

Kuzinga na kuwakana ti kudipesa na beto kenatilaka beto kyese ya kezingaka mingi