Ноға чуртасты Иеговаа пирібізерге кирек?

«Мин Худай кізізібін, мин Ағаа пазырчам» (ИЛҶ. 27:23).

1. Кіреске тӱзерге итчеткеннер хайдағ алтымнар иткеннер паза ол алтымнарнаң палғалыстығ хайдағ сурығлар сыхчалар?

 «ИИСУС Христос пирген тайыға тӧстеніп, иткен чазыхтарыңда пыросынғазың ма паза Иеговаа аның кӧңнін толдырар ӱчӱн, позыңны пирін салғазың ма?» Кіреске тӱзерінеңер чоох соонда, кіреске тӱзерге итчеткеннерге ікі сурығ турғысчалар. Пу сурығ — ол ікі сурығның пірсі. Ноға христианнар Иеговаа пирін салған кізілер поларға киректер? Худайға пирін салғанының тузазы хайдағ? Ноға, ағаа пирінмин, аның кӧңніне кірер иде пазыр полбас? Пу сурығларға нандырар алнында, пирінгені нимедір ол піліп алаалар.

2. Иеговаа пирінгені нимедір ол?

² Худайға пирінгені нимедір ол? Павел Худайнаң палғалызынаңар ниме теенін кӧр кӧреелер. Саайға кір парған керіптегі кізілерге ол позын Худайның кізізібін теен. (Илҷілернің 27:22—24 хығырыбыс.) Прай сын христианнар — Иегованың кізілері. Пу чир-чалбахтағылар, тізең, «чабал кӱзі алтындалар» (1 Иоан. 5:19). Кізі, пазырыста чуртазын пирін салза, Иегованың кізізі пол парча. Худайға пирінгені — ол Худайға сӧс пиргені. Аның соонда кізі кіреске тӱсче.

3. Иисустың кіреске тӱскені нимені таныхтаан паза аның ӱгренҷілері ағаа хайди кӧӧк поларлар?

³ Худайның кӧңнін толдырарға пӧгін алып, Иисус піске кӧзідім артыс салған. Ол, тӧрееннең ала, Израиль чонының, Иеговаа пирін салған чонның, кізізі полған. Аннаңар ол позы даа Худайға пирін салған полған. Иисус Худайға пирінчем тіп кіреске тӱспеен. Ол теен: «Мин мынабын... Худай, Мин Синің кӧңніңні толдырарға парирбын» (Евр. 10:7; Лука 3:21). Андағ оңдайнаң ол, кіреске тӱзіп, пабазының, Иегованың кӧңнін толдырарға тимде полчатханын кӧзіт пирген. Кіреске тӱзіп, аның ӱгренҷілері ағаа кӧӧкчелер. Че оларның кіреске тӱскені пазырыста Худайға чуртастарын пирібіскеннерін чонға кӧзітче.

Худайға пирінгенінің тузазы хайдағ

4. Давидтің паза Ионафанның нанҷыласханнарын кӧрзе, нандырығ тударынаңар ниме тирге чарир?

⁴ Христианиннің Худайға пирінгені — уғаа аарлығ алтым. Худайға пирінгені — сӧс пиргенінең хай-хай артых ниме. Худайға пирінгені піске хайдағ туза ағылча? Анзын піліп алар ӱчӱн, нанҷыларның аразындағы палғалысты кӧр кӧреелер. Нанҷыласчатхан кізі нанҷызының алнында нандырығ тутча. Нанҷылар удур-тӧдір хабасчалар. Библияда уғаа чағын нанҷыласхан кізілердеңер чоохталча — Давиднең Ионафаннаңар. Олар удур-тӧдір, киртістіг поларға сӧс пиріп, чӧптезіг турғыс салғаннар. (1 Самуила 17:57; 18:1, 3 хығырыбыс.) Андағ пик палғалыс удаа учурабинча. Че нанҷылар удур-тӧдір нандырығ тутчатханнарын пілінчетселер, оларның палғалыстары тыыпча (Прит. 17:17; 18:24).

5. Чахсы ээзіне чуртазын пирібіскені хулға хайдағ туза ағылған?

⁵ Худай Израиль чонына пирген чахығда удур-тӧдір нандырығлығ полчатханының тузазын кӧзітчеткен кӧзідімнер пар. Хул полчатхан кізі чахсы ээзіне чуртазын пирібізерге хынчатса, ағаа ээзінең чӧптезіг турғыс саларға чарадылған. Ол чӧптезігні сайбирға чарабас полған. Чахығда чоохталча: «Че хул піди тізе: „Мин ээзіме, ипчіме паза оолларыма хынчам, аннаңар пос чуртастығ поларға хынминчам“, ээзі аны сын Худайның алнында турғыс саларға кирек. Анаң ээзі аны ізіксер алай ізік наағынзар ағылып, хулағын піснең ӱтебізер, ол тустаң сығара, ол, чуртас тооза, аның хулы полар» (Исх. 21:5, 6).

6, 7. а) Удур-тӧдір нандырығлығ полғаны кізілерге хайдағ туза ағылча? б) Иегованаң палғалыс анзына хайди теелче?

⁶ Кізі, хоных хонза, позына нандырығ алча. Кізі паспорттағы штамптың нимес, че кізінің алнында нандырығ тутча. Ікі кізі, хоных хонмин, чуртапчатса, олар постары паза оларның палалары даа арачыланыс чох халчалар. Закон хоостыра хоных хонған ирепчілерге ікізіне дее нандырығ тударға кирек. Библия хоостыра, оларға сидіктерні хада пӧгерге кирек (Матф. 19:5, 6; 1 Кор. 13:7, 8; Евр. 13:4).

⁷ Библейскай тустарда кізілер ахчанаң палғалыстығ сурығларда паза чалланчатсалар, чӧптезіг турғысчаңнар (Матф. 20:1, 2, 8). Пӱӱн дее іди тудынарға кирек. Кӧзідімге, хада бизнес асчатса, алай пірее чирзер тоғысха кірчетсе, чӧптезіг пас саларға алай контрактта хол сал саларға кирек. Нандырығлығ полғаны нанҷыларның аразындағы, хоныхтағы паза тоғыстағы палғалысты тыытча. Чуртасты Иеговаа пиргені аннаң палғалысты ідӧк тыыдар! Ам мының алнында кізілернің Иеговаа пирінгені оларға хайди туза полғанын кӧр кӧреелер паза ол палғалыс пирген сӧсті тутханынаң хай-хай кӧп полчатханын ӱзӱрібізеелер.

Худайға пирін салғаны Израильге нименең туза полған

8. Худайға пирін салған чон полғаны израильтяннарға ниме таныхтаан?

⁸ Израильтяннар, Иеговаа сӧс пирген соонда, Иегованың чоны пол парғаннар. Иегова оларны Синай тағ хыринда чыып алып теен: «Сірер, минің чооғым иссер паза миннең турғысхан чӧптезігні толдырзар, прай чоннарның аразында минің чоным пол парарзар, прай чир мини нооза. Анаң прай чон нандырған: „Иегова чоохтаан нимелерні прай толдырарбыс“. Моисей пу сӧстерні сах андох Иеговаа читір пирген» (Исх. 19:4—8). Израильтяннарға Худайға пирін салғаны нимеде ле идерге сӧс пиргені полбаан. Олар Иегованың чоны пол парғаннар, Иегова оларнаң, позының ниме-нооларынаң чіли, тудынған.

9. Иеговаа пирін салғаны Израильге хайдағ туза полған?

⁹ Израиль чонына Иеговаа пирін салған чон полғаны туза ағылған. Ол киртістіг полған паза, хынчатхан іҷе-пабалары хайди палаларын чахсы кӧрчелер, ол оларны ідӧк чахсы кӧрген. Худай Израильге чоохтаан: «Іҷе имҷектепчеткен палазын ундут салар ба? Тапхан палазына айабас па? Ундут салза даа, мин сині хаҷан даа ундутпаспын!» (Ис. 49:15). Иегова оларға чахығлар хоостыра устағлар пирген, ухаанҷылар хоостыра кӧңнілерін кӧдірген, ангеллер пастыра арачылаан. Псалмопевец пасхан: «Ол Иаковха позының сӧзін искірче, устағларын паза чарғыларын — Израильге. Андағ нимені ол пір дее пасха чонға итпеен. Аның чахығларынаңар олар пір дее ниме пілбинчелер. Иегованы махтаңар!» (Пс. 147:19, 20; Псалом 34:7, 19; 48:14 хығырыбыс). Иегова пурунғыда чонын чахсы кӧрген, ағаа чуртастарын пирібіскеннерні ол ідӧк чахсы кӧрер.

Ноға піске Худайға пирінерге кирек

10, 11. Піс Худайның пір чӧптіг сӧбірезінде тӧріпчебіс пе? Чарыда чоохтап пиріңер.

¹⁰ Худайға пирінерінеңер паза кіреске тӱзерінеңер сағынза, піреезі мындағ сурығ турғызар, арса: «Ноға Худайға, пирінмин, пазырарға чарабас?» Анзын піліп алар ӱчӱн, Худайның алнында піс кемзібіс сағынып аларға кирек. Адам иткен чазых ӱчӱн піс Худайның сӧбірезінде тӧрібинчебіс (Рим. 3:23; 5:12). Худайға пирінмезебіс, піс аның ынағ сӧбірезіне кір полбаспыс. Ноға?

¹¹ Пір дее паба позының палаларына толдыра, мӧгі чуртас пир полбинча (1 Тим. 6:19). Пастағы кізілер, чазых ит салған соонда, прай чон хынчатхан Пабадаң, Чайаачыдаң оортах пол парғаннар, аннаңар піс, Худайның ооллары полып, тӧрібинчебіс. (Второзаконие 32:5 тиңнестірібіс.) Ол тустаң сығара, чон Худайдаң оонаң чуртапча паза аның пір чӧптіг сӧбірезінің чардығы полбинча.

12. а) Хайди чазыхтығ кізілер Худайның сӧбірезіне кір поларлар? б) Кіреске тӱзер алнында, хайдағ алтымнар идерге кирек?

¹² Андағ даа полза, полған на кізее Худайға киртістіг нымысчыларнаң пӱткен сӧбірезіне кірерге сурынарға чарир a. Чазыхтығ кізілер хайди андар кіріп аларлар? Павел илҷі пасхан: «Піс Худайнаң ыырласхан туста Ол піснең Позының Оолғының ӧлімінең пастыра чарас салған» (Рим. 5:10). Кіреске тӱзіп, піс Худайдаң арығ совесть паза аның кӧңніне кірер кізілер поларға сурынчабыс (1 Пет. 3:21). Кіреске тӱзер алнында, нинҷе-де алтым идерге кирек. Піске Худайны піліп аларға, ағаа ізенерге ӱгреніп аларға, чазыхтарыбыс ӱчӱн пыросынарға паза чолларыбысты тӱзедерге (Иоанн 17:3; Илҷ. 3:19; Евр. 11:6). Че паза пір алтым итпезебіс, піс Худайның сӧбірезіне кір полбаспыс. Хайдағ алтым?

13. Ноға Худайға киртістіг кізілернең пӱткен сӧбірезер кіріп алар ӱчӱн, Иеговаа пирін саларға кирек?

¹³ Худайдаң оонаң чуртапчатхан кізілер, киртістіг кізілернең пӱткен сӧбірезер кірер алнында, Иеговаа сӧс пирерге киректер. Ноға анзын идерге кирек полчатханын піліп алар ӱчӱн, пір кӧзідім кӧр кӧреелер. Кӧріңер, саблығ, улуғластығ кізі ӧкіс оолахты сӧбірезінзер алып аларға хынча. Че анзын идер алнында, ол оолахтың сӧс пирерін киректепче. Аннаңар ол палаа тіпче: «Мин сині оолғым тіп адир алнында, син мині, позыңның пабаңны чіли, хынарыңны паза улуғлирыңны піліп аларға хынчам». Ол оолах андағ сӧс пирерге тимде полза ла, ол аны позының сӧбірезінзер алып алар. Анзы орта нимес пе? Иегова ідӧк позының сӧбірезінзер сӧс пирерге тимде кізілерні ле алча. Библияда чоохталча: «Аннаңар, харындастар, Худай сірерні айаанның ӱчӱн, сірерге алданчам, постарыңны Худайға пир салыңар» (Рим. 12:1).

Хынысты паза киртіністі кӧзітчеткен алтым

14. Ноға Худайға пирінгені хынысты кӧзіткені полча?

¹⁴ Худайға пирініп, ағаа сӧс пиріп, піс Иеговаа прай чӱрекнең хынчатханыбысты кӧзітчебіс. Анзы, хоных хончатса, пирген сӧске тӧӧй. Христианин полчатхан оол хысха: «Ниме дее полчатса, сағаа киртістіг полам», — тіп сӧс пиріп, хынызын кӧзітче. Анзы нимеде ле идерге сӧс пиргені ле нимес, че киртістіг поларында клятва пиргені полча. Христианин пілче, хоных хончатса, клятва пирбин, ол алчатхан хыснаң, ирепчі чіли, чуртап полбас. Ідӧк піс, Иеговаа пирініп, клятва пирбезебіс, аның сӧбірезіне кір полбаспыс. Хайди піліп алдыбыс, піс толдыра кізілер полбазабыс таа, Худайның кізізі поларға паза, ноо даа ниме полза, ағаа киртістіг халарға хынчабыс, аннаңар ағаа пирінчебіс (Матф. 22:37).

15. Ноға Худайға пирінгені киртініс кӧзітчеткен алтым полча?

¹⁵ Худайға пирініп, піс киртінізібісті кӧзітчеткен алтым итчебіс. Ноға іди тирге чарир? Иеговаа киртініс ағаа чағдааны піске чахсы полчатханында ікінҷілебеске полысча (Пс. 73:28). Піс «чоох испес, сайбах тӧлнің аразында» чуртапчабыс, аннаңар піске Худайнаң хада чӧрерге сыбыра оой ла полбинча (Флп. 2:15; 4:13). Че Худай піске хабазарға сӧс пирген. Піс анзында ікінҷілебинчебіс. Піс пілчебіс: піс чазыхтығ кізілербіс, аннаңар, чазых таа ит салзабыс, Иегова пісті хатығ чарғылабас. (Псалом 103:13, 14; Римдегілерге 7:21—25 хығырыбыс.) Пыро чох халарға кӱстенчеткен ӱчӱн Иегова пісті алғастирына киртінчебіс (Иов 27:5).

Худайға пирінгені кізіні часкалығ итче

16, 17. Ноға Иеговаа пирінгені часкаа ағылча?

¹⁶ Иеговаа пирінгені ағаа чуртасты пирерге тимде полчатханын кӧзітче, аннаңар кізіні часкалығ итче. Иисус уғаа аарлығ сынны чоохтаан. Ол теен: «Пирчеткені алчатханынаң часкалығ» (Илҷ. 20:35). Чирде полғанда, пирчеткені нинҷе аарлығ полчатханын ол позы кӧрген. Кирек полза, ол азыранмин даа, узубин даа паза тынанмин даа пасхаларына чуртасха апарчатхан чолны кӧзідерге тимде полған (Иоанн 4:34). Ол, Пабазының чӱреен ӧріндірзе, ӧрініс алҷаң. Иисус теен: «Мин сыбыра прай нимені Аның кӧңнінҷе итчем» (Иоанн 8:29; Прит. 27:11).

¹⁷ Иисус чоохтаан: «Кем Минің соомҷа парарға итче, ол позынаңар ундут салзын» (Матф. 16:24). Пу сӧстерні чоохтап, Иисус ӱгренҷілеріне ӧрініске ағылчатхан чолны ас пирген. Іди тудынзабыс, піс Иеговаа улам чағын поларбыс. Піске аннаң артых піреезі хынча ба, аннаң артых сағыссырапча ба?

18. Ноға Иеговаа пирінгені пасха нимее пирінгенінең артых часка ағылча?

¹⁸ Иеговаа пирініп, аның кӧңнін толдырып чуртазабыс, кемге-де алай нимее-де чуртазыбысты пирінібіскенінең хай-хай часкалығ поларбыс. Кӧп кізі пайирға кӱстенче, че часкалығ пол полбинча. Чуртастарын Иеговаа пирібіскен кізілер сын часкалығ полчалар (Матф. 6:24). Худайнаң хада тоғынғаны оларны часкалығ итче. Олар, тоғысха нимес, алғыстығ Худайға пирін салғаннар (1 Кор. 3:9). Посты пӱкӱлее пирін салған ӱчӱн, пірдеезі аннаң артых алғастап полбас. Ағаа киртістіг кізілер пазох чиит пол парарлар паза аның холында мӧгі тус чуртирлар (Иов 33:25; Еврейлерге 6:10 хығырыбыс).

19. Иеговаа чуртастарын пирібіскеннер хайдағ алғас алчалар?

¹⁹ Иеговаа чуртазыбысты пирініп, піс ағаа улам чағын полчабыс. Библияда чоохталча: «Худайға чағдаңар — сірерге Ол чағдирох» (Иак. 4:8; Пс. 25:14). Мының соондағы статьяда Иеговаа чуртазыбысты пиргені ноға орта пӧгін полғанын ӱзӱрібізербіс.

[Сноска]

 Хайди нандырарҷыхсар?

• Худайға пирінгені нимедір ол?

• Худайға пирінгені хайдағ туза ағылча?

• Ноға христианнарға Иеговаа пирін салған кізілер поларға кирек?

 [Ӱгредіг сурығлары]

[Хоос]

Худайға пирін салған хоостыра чуртас сын часкаа ағылча