Sooq Jehovamut tunniulluinnassaagut?

‘Unnuaq inngili Guutimit uannik piginnittumit pisoq saanni qeqarpoq.’ — APUSTILIT SULIAAT 27:23.

1. Kuisinniarlutik sassartut suut iliuuserereersimasarpaat, suullu apeqqutaalerpat?

“JIISUSIP Kristusip pilliutaa tunngavigalugu ajortuliatit peqqissimissutigaagit, Jehovamullu tunniulluinnarsimavit taassuma piumasaatut iliorumallutit?” Tassa apeqqutini marluusuni kuisittussanut oqalugiaatip naanerani kuisittussanit akineqartartuni siulleq. Sooq Jehovamut nalunaajaasuujumasoq Jehovamut tunniulluinnartariaqarpa? Tunniulluinnarsimanini qanoq iluaqutigissavaa? Sooq tunniulluinnarsimanani Guuti taassuma akuerisaatut pallorfigineqarsinnaanngila? Apeqqutit taakku akissutissarsiumallugit tunniulluinnarneq qanoq paasisariaqarnersoq misissoqqaartariaqarparput.

2. Jehovamut tunniulluinnarneq qanoq paasisariaqarpa?

² Jehovamut tunniulluinnarneq qanoq paasisariaqarpa? Maluginiaruk apustilip Paulusip Guutimut attaveqarnini qanoq allaatigineraa. Umiarsuarmi umiulersumi ilaasut allarpassuit takkuanni Jehova ‘Guutimik imminik piginnittumik’ taavaa. (Atuakkit Apustilit Suliaat 27:22-24). Kristumiut ilumoortut tamarmik Jehovamit pigineqarput. Silarsuarli ataatsimut isigalugu ‘Ajortumut naalatsigitippoq’. (1 Johannesi 5:19) Kristumiut Jehovamit pigineqalertarput taassumunnga qinunikkut akuerineqarsinnaasumik tunniulluinnaraangamik. Taamatut tunniulluinnarneq inuttut nammineq neriorsuineruvoq. Taava kingorna imermi kuisittoqartarpoq.

3. Jiisusip kuisinnera sumut assersuutaava, ajoqersugaasalu taassuma maligassiaa qanoq malissinnaavaat?

³ Jiisusi uagutsinnut maligassaalluarpoq nammineq aalajangerami Guutip piumasaatut iliorniarluni. Inuiaqatigiinnut tunniulluinnarsimasunut ilaalluni inunngorami Guutimit pigineqareerpoq. Taamaattumik Jehovamut tunniulluinnarnissaq Jiisusip kuisikkumaneranut pissutaanngilaq. Taanna Guutip oqaasiani ima oqarnerarneqarpoq: “Takuat, tikiuppunga . . . piumasat malillugu iliorumallunga, Guuti.” (Hebræerit 10:7; Lukasi 3:21) Tassa Jiisusip kuisinnera Ataatami piumasaatut iliorniarluni taassumunnga sassarneranut assersuutaavoq. Kristumiut ilumoortut kuisikkaangamik Jiisusip maligassiaa malittarpaat. Taakkuali imermi kuisinnerat tassaavoq Guutimut qinunikkut nammineq tunniulluinnarsimanerminnik tamanut nalunaarutiginninnerat.

 Tunniulluinnarnerput qanoq iluaqutigigipput

4. Pisussaaffeqarneq pillugu Daavip Jonatanillu ikinngutigiinnerannit sumik paasisaqarpugut?

⁴ Guutimut tunniulluinnarneq pimoorussassaavoq. Pisussaaffiuinnanngilaq. Inuup allamut pisussaaffigisinnaasaasa pimoorussassaanerpaartaraat. Tunniulluinnarnerpulli qanoq iluaqutigaarput? Tamanna inuit imminnut attaveqatigiinnerannut tunngatillugu imminut pisussaaffilernerup iluaqutissartaanut assersuussinnaavarput. Ikinngutigiinneq assersuutigeriartigu. Illit ikinnguteqarneq iluaqutigiumallugu ikinngutaanerup akisussaaffittaa akuerisariaqarpat. Tassa imminut pisussaaffilertariaqarputit — misigisariaqarputit ikinngutivit isumassornissaa akisussaaffigalugu. Ikinngutigiit Biibilimi eqqartorneqartut maluginiarnarnerit ilaat tassaapput Daavi Jonatanilu. Taakku allaat ikinngutigiittuarumallutik uppernarsaavigeqatigiipput. (Atuakkit 1 Samueli 17:57; 18:1-3). Taamatut ikinngutigiittoqartarnera qaqutigooraluartoq ikinngutigiit amerlanersaat ikinngutigiittut ataqatigiillualertarput ikinngutigiit tamarmik immikkut imminnut pisussaaffeqartutut misigigaangata. — Ussatit 17:17; 18:24.

5. Inussiap naalakkamit pitsaasumit pigineqarnini qanoq iluaqutigiuarsinnaavaa?

⁵ Inatsisini Guutip Israelikkunnut tunniussaani eqqartorneqarpoq inuit attaveqatigiinnerannut tunngasoq alla inuit ilaasa pisussaaffeqarnermik iluaqutiginniffigisaat. Inussiap naalakkamit pitsaasumit pigineqartuarluni toqqissisimanissani kissaatigiguniuk naalakkani unioqqutinneqartussaanngitsumik isumaqatigiissuteqarfigisinnaavaa. Inatsit imaappoq: “[Inussiaq] taanna oqarpat: ‘Naalagara nuliaralu qitornakkalu asagakkit inussiaajunnaarsitaarusunngilanga,’ taava piginnittaata Guutimut sassartissavaa, matumullu matserfimmulluunniit iigartillugu siutaata nuua puttummik putussavaa; taavalu inussiaatigiuassavaa.” — 2 Mosesi 21:5, 6.

6, 7. (a) Pisussaaffeqarneq qanoq iluaqutaasarpa? (b) Jehovamut pisussaaffeqarnerput taassumunnga attaveqarnitsinnut qanoq iluaqutaasarpa?

⁶ Aappariinneq pisussaaffittaqangaatsiarpoq. Tassaaginnanngilaq isumaqatigiissummut pisussaaffik, tassaavorli inummut pisussaaffik. Angut arnarlu katissimanatik inooqatigiittut aappariittut katissimasutulli piviusumik toqqissisimalersinnaanngisaannarput; aamma meeraat. Inuilli marluk ataqqinartumik aappariillutik imminnut pisussaaffeqartut ajornartorsiutiminnik Biibili tunngavigalugu asannittumik aaqqiiniarsarinissamut pissutissaqarluarput. — Matthæusi 19:5, 6; 1 Korinthimiut 13:7, 8; Hebræerit 13:4.

⁷ Biibilip nalaani suliffimmut niuernermullu tunngatillugu isumaqatigiissusiat unioqqutinneqartussaanngitsut iluaqutigineqartarput. (Matthæusi 20:1, 2, 8) Ullumikkut aamma taamaappoq. Assersuutigalugu niuernikkut ingerlataqalinnginnitsinni suliffeqarfimmiluunniit sulilinnginnitsinni allaganngorlugu isumaqatigiissusiaq unioqqutinneqartussaanngitsoq iluaqutigisarparput. Pisussaaffeqarneq inuit imminnut attaveqarnerannut — soorlu ikinngutigiinnerannut, aappariinnerannut atorfinitsitsinerannullu — tunngatillugu nakussatsitsissutaappat, taava illit nangaassuteqarnak tunniulluinnarnerit Jehovamut attaveqarninni iluaqutiginerungaassavat! Qanga inuit Jehovamut tunniulluinnarsimanertik qanoq iluaqutigisarneraat aamma sooq tamanna pisussaaffiuinnannginnersoq misissoriartigu.

Israelikkut Guutimut tunniulluinnarsimanertik qanoq iluaqutigigaat

8. Israelikkut Guutimut tunniulluinnarmata qanoq kinguneqarpa?

⁸ Inuiaqatigiit Israelikkut Jehovamut tunniulluinnarput taassumunnga neriorsuigamik. Jehovap Israelikkut Qaqqap Sinajip eqqaani katersortippai, imalu oqarfigai: “Naalakkussinga angeruseralu aalajangiullugu inuiaqatigiinnit tamanit immikkoortillusi pigisassarsiariumaarpassi.” Israelikkut isumaqatigiillutik ima akipput: “[Jehovap] oqaasii tamaasa malillugit iliorumavugut.” (2 Mosesi 19:4-8) Israelikkut Guutimut tunniulluinnarsimanerat tassaaginnanngilaq Jehovap iliuusereqqusaatut iliornissamut pisussaaneq. Tunniulluinnaramik Jehovamit pigineqalerput, Jehovallu taakku erligisamisut pisarpai.

9. Israelikkut Guutimut tunniulluinnarsimanertik qanoq iluaqutigaat?

⁹ Israelikkut Jehovamit pigineqarnertik iluaqutigaat.  Taanna ilumoorfiginnippoq angajoqqaallu asannittup meeqqaminik isumassuisarneratut taakku isumassorlugit. Guutip Israelikkut ima oqarfigai: “Arnap puigortarnerpaa qitornani milutsitani? Anaanap puigortarnerpaa erniarisani? Taakkuami puigussagaluarpataluunniit uanga illit puigussanngilakkit.” (Esaja 49:15) Jehovap taakku Inatsisit aqqutigalugit siunnersorpai pruffiitillu aqqutigalugit qiimmassarlugit, aamma inngilini aqqutigalugit illersorpai. Tussiaasiortut ilaat ima allappoq: “Oqaatsini nalunaarutigai Jaakumut, inatsisini inassutinilu Israelimut. Inuiaat allat taamaaliorfiginngilai.” (Tussiaat 147:19, 20; Atuakkit Tussiaat 34:8, 20; 48:15). Jehovap inuiaqatigiinnik itsaq pigisaminik isumassuisimanermisut ullumikkut imminut tunniulluinnartut isumassorumaarpai.

Sooq Guutimut tunniulluinnartariaqartugut

10, 11. Guutip qilammi nunamilu ilaqutariissortaanut ilaalluta inunngorpugut? Akissutit tunngavilersoruk.

¹⁰ Tunniulluinnarnissaminnik kuisinnissaminnillu eqqarsaatiginnittut immaqa ima eqqarsarput: ‘Sooq Guutimut tunniulluinnarnanga taassuminnga pallorfiginnissinnaanngilanga?’ Tamatumunnga pissutaasoq paasineqartarpoq inuit Guutimut sanilliullugit maanna inissisimaffiat eqqarsaatigigaanni. Eqqaamasariaqarparput tamatta Adamip ajortuliornera pissutigalugu Guutip ilaqutariissortaanut ilaanata inunngoratta. (Romamiut 3:23; 5:12) Guutip qilammi nunamilu ilaqutariissortaanut ilaalerumagutta taassumunnga tunniulluinnarnissarput piumasaqaataavoq pingaarutilik. Sooq taamaannersoq misissoriartigu.

¹¹ Arlaannarpulluunniit ataataqanngilaq aallaqqaammulli siunertaasutut inuulersitsisinnaasumik — naammalluinnartunngortitsisinnaasumik. (1 Timotheusi 6:19) Uagut inunngunngilagut Guutimut ernerulluta, inuimmi aappariit siulliit ajortuliormata inuiaat Ataataminnit Pinngortitsisiminnillu asannittumit avissaarput. (Naleqqiuguk 5 Mosesi 32:5). Taamanimiilli inuiaat silarsuaat Jehovap qilammi nunamilu ilaqutariissortaanit avissaaqqallutik inuulersimapput, Guutimut takornartaallutik.

12. (a) Inuit naammalluinnanngitsut qanoq ilillutik Guutip ilaqutariissortaanut ilaalersinnaappat? (b) Kuisinnginnermi suut iliuuserineqartariaqarpat?

¹² Inuttulli ataasiakkaatut Guuti qinnuigisinnaavarput ilaqutariissortaanut kiffatut akuerisaasunut ilaaleqqulluta. * Ajortiliulluta taakkununnga qanoq ilaalersinnaagatta? Apustili Paulusi ima allappoq: “Guutimut akeraatilluta ernerata toquagut saammaannartitaavugut.” (Romamiut 5:10) Kuisinnermi Guuti ilerasuuteqannginnissamik qinnuigisarparput taassumannga akuerisaasinnaaniassagatta. (1 Petrusi 3:21) Kuisinnginnitsinnili iliuuserisassaqarpugut. Guuti ilisarisimalertariaqarparput tunaarisariaqarlugulu, allamik isumataartariaqarpugut Guutimullu saattariaqarluta. (Johannesi 17:3; Apustilit Suliaat 3:19; Hebræerit 11:6) Guutilli ilaqutariissortaanut ilaanissamut akuerisaasinnaajumalluta aamma allamik iliuuserisassaqarpugut. Sumik?

13. Sooq Guutip ilaqutariissortaanut pallorfiginnittutut akuerisaasunut ilaasinnaalerumalluta taassumunnga tunniulluinnarnermi neriorsuinissarput naleqquppa?

¹³ Guutimut takornartaasoq Guutip ilaqutariissortaanut kiffatut akuerisaasunut ilaasinnaaleqqulluni Guutimut pingaartorsiorluni neriorsueqqaartariaqarpoq. Tamatuma pingaaruteqassusia paasiumallugu takorlooriaruk ataatap ileqqorissup angut inuusuttoq angajoqqaaqanngitsoq ilaquttaminut ilaalersillugu qitornavissiartaarerusutani soqutigileraa. Ataataasoq asanningaartutut ilisimaneqarpoq. Ataataasulli angutip inuusuttup ernermisut akuerinnginnerani taanna neriorsuisikkusuppaa. Taamaattumik ataataasoq ima oqarpoq: “Ernittut akuerinnginninni ilisimasariaqarpara ataatattut asallungalu ataqqissanerimma.” Angut inuusuttoq taanna aatsaat pingaartorsiorluni neriorsuiumappat angutip taanna ilaquttaminut ilaalersissavaa. Tamanna ingasaassinerunngilaq, ilaa? Taamatuttaaq Jehovap tunniulluinnarnermi neriorsuiumasut kisiisa ilaquttaminut ilaalersittarpai. Biibilimi ima allassimavoq: “Maanna  kajumissaarpassi . . . Guutimut tunniulluinnaqqullusigit timisi pilliutitut uumasutut illernartutullu taassuma iluarisinnaasaatut.” — Romamiut 12:1, Schindler.

Iliuuseq asanninnermit uppernermillu aallaavilik

14. Tunniulluinnarneq qanoq ililluni asanninnermut ersiutaava?

¹⁴ Jehovamut tunniulluinnarnermi neriorsuineq taassuminnga asanningaarnermut ersiutaavoq. Katinnermi neriorsoqatigiinnermut ilaatigut assersuunneqarsinnaavoq. Uissap kristumiup nuliassaminut asanninnini ersersittarpaa qanorluunniit pisoqassagaluarpat taassumunnga aalajaanniarluni neriorsuinermigut. Tamanna inummut neriorsuutaavoq, aappariinnermut aaqqissuussinermut ilaaniarluni neriorsuutaaginnarani. Uissap kristumiup paasivaa nuliassaminik inooqateqarneq immikkut pisinnaatitaaffigisinnaanagu katinnermi neriorsuinngikkuni. Taamatuttaaq uagut Jehovap ilaqutariissortaanut ilaanerup pilluaqqussutissartai tamakkiisumik iluaqutiginavianngilavut tunniulluinnarnermi neriorsuinngikkutta. Taamaattumik Guutimut tunniulluinnarpugut naammalluinnanngitsuugaluarluta taassumannga pigineqarumagatta aamma qanorluunniit pisoqassagaluarpat taassuminnga ilumoorfiginnittuarnissarput aalajangiusimagatsigu. — Matthæusi 22:37.

15. Guutimut tunniulluinnarneq qanoq ililluni uppernikkut iliuusiua?

¹⁵ Guutimut tunniulluinnaraangatta uppernikkut iliuuseqartarpugut. Qanoq? Jehovamut uppernerput pissutigalugu qularutiginngilluinnartarparput taassumunnga qanillinerput iluaqutigigipput. (Tussiaat 73:28) Nalunngilarput “eqqarleriit kukkuluttortut tammarsimasullu akornanni” inuutilluta Guutimik saqeqateqarneq ajornaatsuujuaannarnavianngitsoq, Guutilli ikiuiumaarnerminik neriorsuutaa upperaarput. (Filippimiut 2:15; 4:13) Nalunngilarput naammalluinnanngitsuulluta, qularutiginngilarpulli Jehovap nallittortarumaaraatigut, aamma kukkugaangatta. (Atuakkit Tussiaat 103:13, 14; Romamiut 7:21-25). Qularutiginngilluinnarparput Jehovap assuarnaattuarniarluta aalajangersimanerput pilluaqqujumaaraa.

Guutimut tunniulluinnarneq pilluarnermik kinguneqartarpoq

16, 17. Sooq Jehovamut tunniulluinnarneq pilluarnermik kinguneqartarpa?

¹⁶ Jehovamut tunniulluinnarsimaneq pilluarnermik kinguneqartarpoq, tassami tunniulluinnarneq allanut iluaqutaasumik iliuuseqarnermut tunngassuteqarpoq. Jiisusip sallusuissut tunngaviusoq tamanna saqqummiuppaa ima oqarami: “Tunisineq pilluarnarneruvoq tigusinermit.” (Apustilit Suliaat 20:35) Jiisusip nunarsuarmi kiffartornermini tunisinerup pilluarnarnera tamakkiisumik misigaa. Pisariaqaraangat qasuersaarsimanani, nerisimanani ilorrisimaarsimananilu aallartarpoq allat inuunerup aqqutaanik nanisinissaannut ikiorniarlugit. (Johannesi 4:34) Ataatami uummataanik nuannaartitsineq nuannaarutigingaartarpaa. Jiisusi ima oqarpoq: ‘Tamatigut iluarisaanik iliortarpunga.’ — Johannesi 8:29; Ussatit 27:11.

¹⁷ Jiisusip ajoqersukkani paasitippai qanoq ililluni nalerisimaarnartumik inuusoqarsinnaasoq  ima oqarami: “Uannik malinnikkumasoq imminut isumakkiissaaq.” (Matthæusi 16:24) Uagut taamaaliorutta Jehovamut qanillissaagut. Inuunerput uagutsinnik isumassuilluarnerusinnaasumut allamut tunniussinnaavarput?

18. Sooq Jehovamut tunniulluinnarnermut naapertuuttumik inuuneq inuunerup sumut imaluunniit kimut allamut tunniulluinnarsimaneranit pilluarnarnerua?

¹⁸ Jehovamut tunniulluinnaraanni tamatumalu kingorna taassuma piumasaatut iliornikkut tunniulluinnarnermut tamatumunnga naapertuuttumik inuugaanni, inuunerup sumut imaluunniit kimut allamut tunniulluinnarneraniit pilluarnarneruvoq. Assersuutigalugu inuppassuit inuunertik pigisatigut pisuunngorniarnermut atortarpaat pilluarneq nalerisimaarnerlu piviusut misiginagit. Jehovamulli tunniulluinnartut ataavartumik pillualertarput. (Matthæusi 6:24) ‘Guutimut suleqataanermik’ ataqqinaateqarnertik pillualissutigisarpaat; Guutimulli imminnik pingaartitsisumut, suliamuunngitsoq, tunniulluinnartarput. (1 Korinthimiut 3:9) Taakkua imminnik pilliutiginerannik allamik pingaartitsinerusoqanngilaq. Taassuma kiffani ilumoorfiginnittut allaat inuusussiteqqissavai isumassuinini naassaanngitsumik iluaqutigisinnaaniassammassuk. — Jobi 33:25; atuaruk Hebræerit 6:10.

19. Jehovamut tunniulluinnarsimasut suna immikkut pisinnaatitaaffigaat?

¹⁹ Jehovamut tunniulluinnaruit taassumunnga qanittumik attaveqalissaatit. Biibilimi ima allassimavoq: “Guuti qaninniarsiuk, taava taanna ilissinnut qanillissaaq.” (Jaaku 4:8; Tussiaat 25:14) Allaaserisami tulliuttumi misissussavarput Jehovamit pigineqarneq sooq toqqissisimanarisinnaaneripput.

[Quppernerup ataani ilanngussaq]

Qanoq akissavit?

• Jehovamut tunniulluinnarneq qanoq paasisariaqarpa?

• Guutimut tunniulluinnarsimanerput qanoq iluaqutigisarparput?

• Sooq Jehovamut nalunaajaasuujumasoq Jehovamut tunniulluinnartariaqarpa?

[Atuaqqissaarnermi apeqqutit]

[Qupp. 12-mi assiliartaq]

Tunniulluinnarnitsinnut naapertuuttumik inuunerput ataavartumik pilluarnermik kinguneqartarpoq