Ekuma Ofwete Kiyekolwela kwa Yave?

“Kadi o fuku wau vatelamene ova ngina o mbasi a Nzambi, ona umpwidi.”​—⁠MAV. 27:⁠23.

1. Adieyi divavwanga kw’awana bazolele vubwa? Nkia yuvu divaikisanga?

“MUNA kuma kia lukwikilu lwaku muna kimenga kia Yesu Kristu, nga vilukidi o ntima muna masumu maku yo kiyekola kwa Yave mu vanga luzolo lwandi?” Ekiaki kimosi muna yuvu yole beyuvulwanga awana bevubwa kuna mfoko elongi dia luvubu. Ekuma Akristu bafwete kiyekolwela kwa Yave? Kiyekola kwa Nzambi nkia nluta dilenda kututwasila? Ekuma dinina vo muntu kalendi tambulwa ko kwa Nzambi avo kakiyekwele ko kwa yandi? Muna van’e mvutu za yuvu yayi, entete tufwete zaya e nsas’a kiyekola.

2. Kiyekola kwa Yave aweyi disongele?

² Kiyekola kwa Nzambi, aweyi disongele? Tala una Paulu wa ntumwa kayikila ngwizani andi yo Nzambi. Vava kavovanga kw’awana bakala yandi muna nzaza yakala mu vonza, Paulu wayikila Yave vo “Nzambi, ona umpwidi.” (Tanga Mavangu 27:​22-24.) Akristu awonso akieleka Yave ubavwidi. Kansi avo i nza yawonso, ‘muna wisa kia ndiona wambi ilele.’ (1 Yoa. 5:​19) Akristu bekitukanga se vwa dia Yave vava bekiyekolanga kwa yandi muna sambu. Kiyekola i nsilu una kesianga o muntu kwa Nzambi. I bosi, kevubwa muna maza.

3. O luvubu lwa Yesu adieyi lwasonga? Alandi andi aweyi balenda tanginina mbandu andi?

³ Yesu watusisila mbandu ambote vava kasola edi dia vanga luzolo lwa Nzambi. Wau vo mu zula kia Isaele kawutukila, eki kiakiyekola kwa Nzambi, Yesu wakiyekola kala. Kansi, vava kavubwa diambu diakaka kavanga dina ke diavavwanga ko muna Nsiku. Diambu dia Nzambi disonganga dina kavova o Yesu, oku vo: “Ndweke kwame . . . yavanga luzolo luaku, e Nzambi.” (Ayib. 10:7; Luka 3:​21) Muna kuma kiaki, luvubu lwa Yesu lwasonga vo wakisunzula kwa Nzambi mu vanga luzolo lwa Se diandi. Alongoki andi mbandu andi belandanga vava bekivananga muna  luvubu. Kansi, kuna kwa yau, vava bevubwanga muna maza, bekuyisonganga vana meso ma nkangu vo bayiyekola kwa Nzambi muna sambu.

Kiyekola Nkia Nluta Dilenda Kututwasila?

4. E kikundi kia Davidi yo Yonatane adieyi kisonganga mu kuma kia kwikizi?

⁴ Kiyekola kwa Nzambi nze Nkristu ke diambu diakete ko. Ke mpasi nsilu ko. Kansi, nkia nluta tulenda baka muna kiyekola kwa Nzambi? Muna bong’e nona, yambula twabadika e nluta tulenda baka avo tuvangidi kikundi ye muntu. Muna vwa nluta mia kikundi, ofwete tambulwila e mbebe itwasanga kikundi. Ediadi divavanga vo watambulwila e mbebe ya sadisanga nkundi aku. Muna yikundi yambote iyikwanga mu Nkand’a Nzambi, kimosi i kia Davidi yo Yonatane. Bakanga nkutu ekangu dia kikundi. (Tanga 1 Samuele 17:57; 18:​1, 3.) Kana una vo dia tutu mu mona kikundi kia mpila yayi, yikundi yayingi isikilanga vava wantu besonganga kwikizi kwa muntu yo nkw’andi.​—⁠Nga. 17:17; 18:⁠24.

5. Adieyi diavavwanga kwa ntaudi mu kwamanana sadila mfumu andi?

⁵ E Nsiku kavan’o Nzambi kwa Isaele misonganga e ngwizani yatwasanga nluta kwa wantu avo basongazianini kwikizi. Kele vo ntaudi kazolele yambula sadila mfumu andi ko, kafwete kanga yandi ekangu dianzingi. O Nsiku wavovanga vo: ‘Ovo o ntaudi ovov’e mpenza vo, nzolele mfumu ame, yo nkaz’ame yo wana; kivaika mvevoki ko: o mfumu andi okumfinamesa kwa Nzambi, kamfinamesa mpe kuna kielo, yovo tungwa kia mwelo; o mfumu kantobol’o kutu muna nsoma; kansadila yakwele mvu.’​—⁠Luv. 21:​5, 6. 

6, 7. (a) O silana nsilu aweyi ditwasilanga nluta kwa wantu? (b) Ediadi aweyi disonganga mu kuma kia ngwizani eto yo Yave?

⁶ Longo i ngwizani ivavanga vo yakala yo nkento basilana nsilu. O nsilu wau ke ufwete kala wa mu nkanda kaka ko, kansi kwa nkaz’andi. Yakala yo nkento ana bezinganga kumosi lembi kazala, ke balendi kala ye kiese kiasikila ko, ngatu wan’au. Kansi, akazi ana basilana nsilu vava bakazala, bena ye kuma kiasikila mu singika mambu mampasi mebwanga muna longo lwau muna zola kwawonso.​—⁠Mat. 19:​5, 6; 1 Kor. 13:​7, 8; Ayib. 13:⁠4.

⁷ Kuna nz’ankulu, wantu nluta babakanga vava basonekanga muna nkanda e nsilu mia kinkita yovo mia salu bawizana. (Mat. 20:​1, 2, 8) O vanga wo diamfunu, kana nkutu o unu. Kasikil’owu, tulenda baka nluta avo tusonekene mu nkanda mana tuwizanene, una katuyantikidi ko e kinkita yovo yantika sadila muntu akaka. Muna kuma kiaki, avo nsilu ulenda siamisa kikundi, longo yovo mambu ma salu, adieyi tuvova mu kuma kia nluta milenda twasa kiyekola kwaku muna ngwizani aku yo Yave? Owau, yambula twatala una wantu kuna nz’ankulu babakila nluta muna kiyekola kwa Yave wa Nzambi ye dina disonganga vo diadi ke diakala mpasi nsilu ko.

Kiyekola Aweyi Kwatwasila Nluta kwa Isaele

8. O kuyiyekola kwa Isaele kwa Nzambi, adieyi kwasonganga?

⁸ E zula kia Isaele bayiyekola kwa Yave vava basia nsilu kwa Nzambi. Yave wabakutakesa vana ndambu a Mongo a Sinai yo kubavovesa vo: ‘Ovo wila nuwila nding’ame nwalund’ekangu diame, ozevo nukala kwa mono se lusalu luame luakivwila muna nkangu miawonso.’ O nkangu uvutwidi kumosi, oku vo: “Mawonso mana kavovele o Yave i tuvanga.” (Luv. 19:​4-8) Kiyekola kwa Isaele mayingi kwasonganga ke vanga kaka dina dialombwanga ko. Kiyekola kwau kwasonganga vo Yave ubavwidi ye okubalunga-lunga nze ‘lusalu lwandi lwakivwila.’

9. Nkia nluta babaka Aneyisaele muna kiyekola kwa Nzambi?

 ⁹ Wau vo Aneyisaele bakituka se vwa kwa Yave, nluta miayingi batambula. Wabasong’e kwikizi yo kubalunga-lunga nze una ese dianzodi kelunga-lunganga mwan’andi. Nzambi wavovesa Isaele vo: ‘O nkento ng’ovilakanwa ngyemo andi, kafwila mwan’a vumu kiandi nkenda ko? Elo, awana vilakanwa kwau, vo i mono kikuvilakana ko.’ (Yes. 49:​15) Yave wabavana Nsiku mu kubaludika, angunza mu kubakasakesa ye mbasi mu kubatanina. Ntozi a nkunga wasoneka vo: “Osongese diambu diandi kwa Yakobo, e mîna miandi ye nzengo kwa Isaele. Kavangidi wau kwa konso zula ko.” (Nku. 147:​19, 20; tanga Nkunga 34:​7, 19; 48:14.) Nze una Yave kalunga-lunganga nkangu andi akuvwila kuna nz’ankulu, olunga-lunga mpe awana bekuyiyekolanga kwa yandi o unu.

Ekuma Tufwete Kiyekolwela kwa Nzambi?

10, 11. Nga mu buka kia wan’a Nzambi tuwutukilanga? Sasila.

¹⁰ Vava beyindulanga edi dia kiyekola kwa Nzambi yo vubwa, akaka balenda kiyuvula: ‘Ekuma kilendi sambila Nzambi ko lembi kiyekola kwa yandi?’ Tulenda bakula e kuma, avo tubadikidi e nkal’eto vana meso ma Nzambi. Sungamena vo, muna kuma ki’esumu dia Adami, yeto awonso twavambuka yo Nzambi. (Roma 3:23; 5:​12) Kiyekola kwa Nzambi mfunu kwina muna kala mosi muna nkangu a Nzambi. Yambula twazaya e kuma.

¹¹ Mase meto ke balendi kutuvana moyo a mvu ya mvu ko nze una Nzambi kakana. (1 Tim. 6:​19) Ke tuwutukanga nze wan’a Nzambi ko. E kuma kadi, vava yakala yo nkento antete basumuka, o wantu bavambana y’Ese diau dianzodi una vo i Mvangi au. (Tezanesa ye Nsiku 32:⁠5.) Tuka muna ntangwa yayina, wantu awonso ova nza bavambuka muna buka kia wan’a Nzambi mu nsema wawonso.

12. (a) O wantu alembi lunga aweyi balenda kitukila wan’a Nzambi? (b) Nkia mambu tufwete vanga una ka tuvubilu ko?

¹² Kana una vo i wau, konso muntu mu yeto lenda lomba kwa Nzambi kimana kantambula diaka muna buka kia selo yandi yakwikizi. * Ediadi aweyi dilenda vangamena wau vo tu asumuki? Paulu wa ntumwa wasoneka vo: “Wau twakal’atantu, twabakaniswa kwa Nzambi muna mfw’a Mwan’andi.” (Roma 5:​10) Vava tuvubwanga, ntona zambote tulombanga kwa Nzambi kimana twatambuka kwa yandi. (1 Pet. 3:​21) Kansi, una ka tuvubilu ko, vena ye mambu tufwete vanga. Tufwete zaya Nzambi, longoka kumbund’e vuvu, vilukw’o ntima yo soba zingu kieto. (Yoa. 17:3; Mav. 3:19; Ayib. 11:⁠6) Vena ye diambu diakaka tufwete vanga muna tambulwa kwa Nzambi. Nkia diambu?

13. Ekuma dinina diansongi vo muntu kasia nsilu wa kiyekola kwa Nzambi muna kala mosi muna asambidi andi?

¹³ O muntu ona wavambana yo Nzambi, muna tambulwa kwa Nzambi nze mosi muna selo yandi, entete kafwete sia nsilu kwa Yave. Muna bakula e kuma, yindula nona kia se dizolele sansa mwan’ansona mu kunkitula mosi muna wan’andi. Ese diadi otomene zayakana vo muntu ambote. Kana una vo i wau, muna kuntonda kakala nze mwan’andi, eyakala diadi ozola vo mwana ndioyo kasia nsilu. O se okumvovesa vo: “Muna kutambula se mwan’ame, nzolele wanzayisa kana vo okunzola yo kunzitisa nze i se diaku.” Yavana mwana ndioyo kesia o nsilu muna luzolo lwa yandi kibeni, i bosi eyakala diadi kekuntonda. Ediadi nga ke  diansongi ko? Diau adimosi mpe, awana kaka bekalanga ye luzolo lwa sia nsilu wa kiyekola kwa yandi, i ketondang’o Yave bakituka amosi muna wan’andi. Muna Nkand’a Nzambi tutanganga vo: ‘Nuatambika to yeno se kimenga kiamoyo, kiavauka, kialuyangalalu kuna kwa Nzambi.’​—⁠Roma 12:⁠1.

Vangu dia Zola ye Lukwikilu

14. Kiyekola ekuma kwinina se sinsu kia zola?

¹⁴ O nsilu tusianga wa kiyekola kwa Nzambi i sinsu kisonganga vo Yave kikilu tuzolanga. O nsilu wau ufwananene ye nsilu a longo. Etoko diansompi una vo Nkristu, osonganga e nzol’andi vava kesianga nsilu wa kwamanana zola nzitikil’andi, kana nkutu nkia diambu dilenda kubabwila. O wau ke mpasi nsilu ko wa vanga diambu, kansi ndofi ina kedianga mu kuma kia muntu. Etoko diansompi una vo Nkristu, ozeye wo vo kalendi zinga vamosi ye nzitikil’andi ko, kele vo kasidi nsilu a longo ko. Diau adimosi, ka tulendi kala asambidi a Yave ko kele vo ka tusidi nsilu wa kiyekola ko kwa yandi. Muna kuma kiaki, kana una vo tu asumuki, tulenda kiyekola kwa Nzambi, kadi tuzolele vuwa kwa yandi yo zindalala songa kwikizi kwa yandi, kana nkutu nkia diambu dilenda bwa.​—⁠Mat. 22:⁠37.

15. O kukiyekola aweyi kusongelanga lukwikilu?

¹⁵ Vava tukiyekolanga kwa Nzambi, tusonganga lukwikilu lweto muna yandi. Mu nkia mpila? Lukwikilu lweto muna Yave lukutuvanang’e ziku vo o finama Nzambi diambote kwa yeto. (Nku. 73:​28) Tuzeye wo vo diampasi mu zindalala kangala yo Nzambi ekolo tuzingilanga va kati kwa “mbandu a tekomoka yo bendomoka,” kansi tubundang’e vuvu muna nsilu a Nzambi wa kutusadisa avo tuvangidi e ngolo. (Fili. 2:15; 4:​13) Tuzeye wo mpe vo tu wantu alembi lunga, kansi tuna ye vuvu vo Yave okutufwila nkenda kele vo tuvangidi vilwa. (Tanga Nkunga 103:​13, 14; Roma 7:​21-25.) Tukwikilanga vo Yave osinga senda ngolo zeto za sikila ye kwikizi muna yandi.​—⁠Yobi 27:⁠5.

Kiyekola kwa Nzambi Kiese Ditwasanga

16, 17. Kiyekola kwa Yave aweyi kutwasilanga kiese?

¹⁶ Kiyekola kwa Yave kiese ditwasanga, kadi divavanga vo twayivana kwa yandi. Yesu wasong’e ziku kia diambu diadi vava kavova vo: “Edi diviokele e nsambu (yovo kiese), dia vana, ke mu tambula ko.” (Mav. 20:​35) Vava kasalanga salu kiandi ova ntoto, Yesu wamona kiese kina muna vana. Vava diakalanga o mfunu, Yesu wayambulanga vunda, yovo dia kimana kasadisa akaka, basolola e nzil’a moyo. (Yoa. 4:​34) Yesu wazolanga mwesa S’andi e kiese. Wavova vo: “Lumbu yawonso mvangang’oma mekunyangidikanga.”​—⁠Yoa. 8:29; Nga. 27:⁠11.

¹⁷ I bosi, Yesu wasonga alongoki andi e mpila zingu kitwasanga kiese vava kavova  vo: ‘Konso muntu, ovo ozolele o kwiz’andandi, mbula kayivanina nkalu.’ (Mat. 16:​24) O vanga wo, dikutusadisanga mu finama Yave. Nga vena ye muntu akaka tulenda kivana ona lenda kutulunga-lunga ye zola kwawonso?

18. O zingila ngwizani ye kukiyekola kweto kulutidi van’e kiese ke mu kiyekola mu salu ko yovo kwa muntu akaka. Ekuma?

¹⁸ Kiyekola kwa Yave yo zingila ngwizani ye kukiyekola kweto mu vanga luzolo lwandi, kulutidi van’e kiese ke mu kiyekola kwa lekwa ko yovo kwa muntu akaka. Kasikil’owu, wantu ayingi befwasanga zingu kiau mu vava mavwa lembi solola kiese kiasikila. Kansi, awana bekiyekolanga kwa Yave kiese kiayingi bemonanga. (Mat. 6:​24) Elau dia kala ‘asadi kumosi yo Nzambi,’ kiese dikubatwasilanga. Kansi, ke bayiyekola mu salu ko, kwa Nzambi au ona yangalelanga salu kiau. (1 Kor. 3:⁠9) Ke vena muntu ko olutidi yangalela e vangu diadi dia kuyivana, avo ke Yave ko. Kuna sentu, ovutulwisa selo yandi yakwikizi muna nitu za kileke kimana kabalunga-lunga yakwele mvu.​—⁠Yobi 33:25; tanga Ayibere 6:⁠10.

19. Nki’elau bena diau awana bekiyekolanga kwa Yave?

¹⁹ O yekola zingu kiaku kwa Yave dilenda kusadisa mu kala ye ngwizani ambote yo yandi. Muna Nkand’a Nzambi tutanganga vo: “Nufinama Nzambi, oyandi mpe okunufinama.” (Yak. 4:8; Nku. 25:​14) Mun’elongi dilanda, tuzay’e kuma tulenda kadila ye ziku vo o kuyiyekola kwa Yave dilenda kututwasila nsambu.

[Mvovo Vana Yand’a lukaya]

Nkia Mvutu Ovana?

• Kiyekola kwa Nzambi, aweyi disongele?

• Kiyekola kwa Nzambi nkia nluta dilenda kututwasila?

• Ekuma Akristu bafwete kiyekolwela kwa Yave?

[Yuvu ya Longoka]

[Foto ina muna lukaya lwa 6]

O zingila ngwizani ye kukiyekola kweto kiese kiakwele mvu dikututwasila