Ki Kabakalañi ha mu Swanela ku Ineela ku Jehova?

“Lingeloi la Mulimu, Yena ye ni li wa hae, . . . li itahisize ku na busihu bona bo.”—LIK. 27:23.

1. Ki mihato mañi ye se baa ngile kale batu ba ba itahisa kwa kolobezo, mi ku eza cwalo ku tahisa lipuzo mañi?

“FA MUTOMO wa sitabelo sa Jesu Kreste, kana se mu bakezi libi za mina ni ku ineela ku Jehova kuli mu eze tato ya hae?” Puzo ye, ki ye ñwi ya lipuzo ze peli ze alabiwanga ki linumwana za kolobezo kwa mafelelezo a ngambolo ya kolobezo. Ki kabakalañi Bakreste ha ba tokwa ku ineela ku Jehova? Ku ineela ku Mulimu ku lu tusa cwañi? Ki kabakalañi mutu ha sa koni ku lapela Mulimu ka nzila ye swanela haiba haa si ka ineela ku yena? Kuli lu utwisise likalabo kwa lipuzo zeo, pili lu tokwa ku nyakisisa se ku talusa ku ineela.

2. Ku ineela ku Jehova ku talusañi?

² Ku ineela ku Mulimu ku talusañi? Mu lemuhe mo muapositola Paulusi naa taluselize bulikani bwa hae ni Mulimu. Fapilaa batu ba bañwi ba bañata ba naa li ni bona mwa sisepe se ne si li mwa lubeta, naa bizize Jehova kuli: “Mulimu, Yena ye ni li wa hae.” (Mu bale Likezo 27:22-24.) Bakreste ba niti kaufela ki ba Jehova. Kono lifasi kamukana, lona li “lapalezi mwatasaa ya maswe.” (1 Joa. 5:19) Bakreste ba fitanga fa ku ba ba Jehova, ha ba eza buineelo bwa amuhela ka ku lapela ku yena. Buineelo bo bu cwalo ki buitamo bwa ka butu. Mi se si latelelanga ki kolobezo ya mwa mezi.

3. Kolobezo ya Jesu ne i swanisezañi, mi balateleli ba hae ba kona ku likanyisa cwañi mutala wa hae?

³ Jesu naa lu tomezi mutala ha naa iketezi ku eza tato ya Mulimu. Ka ku ba kuli naa pepezwi mwa sicaba sa Isilaele se ne si ineezi, naa ineezi kale ku Mulimu. Niteñi, ka nako ya naa kolobezwa, Jesu naa ezize nto ye nee fita ze ne tokwahala feela mwa Mulao. Linzwi la Mulimu li bulela kuli Jesu naa ize: “Ki na yo, na ta . . . ni too eza se si latwa ki Wena, Mulimu.” (Maheb. 10:7; Luka 3:21) Kacwalo, kolobezo ya Jesu ne i swaniseza ku itahisa kwa hae ku Mulimu ku to eza tato ya Ndatahe. Balateleli ba hae ba likanyisa mutala wa hae ha ba itahisa kwa kolobezo. Kono balateleli ba hae bona ha ba kolobezwa  mwa mezi, ba bonisa nyangela kuli ba ineezi ku Mulimu ka tapelo.

Mo lu Tusezwa ki Buineelo

4. Bulikani bwa Davida ni Jonatani bu lu lutañi ka za buitamo?

⁴ Buineelo bwa Sikreste ki nto ya butokwa hahulu. Haki buitamo feela. Kono ku ineela ku lu tusa cwañi? Ka ku bapanya buineelo kwa litamo ze ba ezanga batu, ha lu nyakisiseñi mo litamo zeo li ba tusezanga. Mutala o muñwi ki wa bulikani. Kuli mu ikole tohonolo ya ku ba ni mulikani, mu swanela ku amuhela buikalabelo bwa ku ba mulikani. Buikalabelo bo, bu talusa kuli mu na ni buitamo—mu ikutwa kuli mu tamehile ku babalela mulikanaa mina. Mutala o muñwi wa bulikani bo butuna bo bu talusizwe mwa Bibele ki wa bulikani bwa Davida ni Jonatani. Mane ne ba ezize tumelelano ya bulikani. (Mu bale 1 Samuele 17:57; 18:1, 3.) Nihaike kuli bulikani bwa tamo ya mufuta wo ha bu ipona-ponelwi, bulikani bo buñata bwa tiyanga haiba balikani ba ikutwa ku ba ni tamo mwahalaa bona.—Liprov. 17:17; 18:24.

5. Mutanga naa kona ku tusiwa cwañi ki ku zwelapili ku ba mutangaa mulenaa hae yo munde?

⁵ Mulao wa naa file Maisilaele Mulimu u talusa bulikani bo buñwi hape bo ne bu tusa batu ka ku ezanga buitamo. Haiba mutanga naa bata silelezo ya ku zwelapili ku ba mutangaa mulenaa hae yo munde, naa tokwa ku eza ni yena tumelelano ya ku inelela ni yena. Mulao u li: “Mutanga haa tiisa, a li: Na, ni lata muñaa ka, ni lata musalaa ka ni bana ba ka, ha ni lati ku lukuluha. Fo, muñaa hae u ka mu atumeza fapilaa Mulimu, a mu yemise fapilaa sikwalo kamba fapilaa musumo, mi muñaa hae u ka mu punya zebe ka limao. Ku zwa fo, u ka naa mu sebeleza ku ya ku ile.”—Ex. 21:5, 6.

6, 7. (a) Buitamo bu tusanga cwañi batu? (b) Mi seo si bonisañi ka za bulikani bwa luna ni Jehova?

⁶ Linyalo ki bulikani bo bu tokwa buitamo bo butuna. Haki buitamo bwa tumelelano feela, kono ki buitamo bwa ku itama ni mutu. Batu ba babeli ba ba pila feela hamoho ba si ka nyalana ha ba koni ku ba mwa silelezo, hamohocwalo ni bana ba bona. Kono batu ba babeli ba ba itamile mwa linyalo le li kutekeha ba na ni libaka le li tomile fa Mañolo le li ba susueza ku tatulula matata a bona ka lilato muta ku ba ni matata.—Mat. 19:5, 6; 1 Makor. 13:7, 8; Maheb. 13:4.

⁷ Mwa linako za Bibele, batu ne ba tusiwa ki ku ezanga litumelelano za lipisinisi ni za mibeleko. (Mat. 20:1, 2, 8) Ni kacenu, ku eza litumelelano kwa tusa. Ka mutala, lu tusiwanga ki ku eza tumelelano ye ñozwi lu si ka kalisa kale ku eza pisinisi ni mutu yo muñwi kamba ku beleka mwa kampani ye ñwi. Kacwalo, haiba buitamo bu tiisa bulikani bwa mina ni ba bañwi, swalisano ya mina ya mwa linyalo, ni ya kwa mubeleko, ku ineela ku Mulimu ka ku tala ku ka mi tusa hahulu mwa bulikani bwa mina ni Jehova! Cwale ha lu nyakisiseñi mo batu ba kwaikale ne ba tuselizwe ki ku ineela ku Jehova Mulimu ni mo ku eza buineelo ne ku fitela kwahule ku eza feela buitamo.

Mo Buineelo ku Mulimu ne bu Tuselize Isilaele

8. Ku ineela ku Mulimu ne ku talusañi kwa Maisilaele?

⁸ Sicaba sa Isilaele ne si fitile fa ku ineela ku Jehova ha ne si ezize buitamo ku Mulimu. Jehova naa kopanyize Maisilaele bukaufi ni Lilundu la Sinai, mi a li ku bona: “Haiba mu ka utwa Linzwi la ka luli, mwa mamela bulikani bwa ka, mu ka ba buswa bwa ka tota mwahalaa macaba a mañwi kaufela.” Mi batu ba alaba hamoho ba li: “Zaa bulezi kaufela Muñaa Bupilo lu ka li eza.” (Ex. 19:4-8) Ku ineela ne ku na ni taluso ye tuna kwa Maisilaele ye nee fita ku itama feela ku eza nto ye ñwi. Ne ku talusa kuli nee li ba Jehova, mi Jehova naa baa nga sina “buswa” bwa hae.

9. Isilaele naa tusizwe cwañi ki ku ineela ku Mulimu?

⁹ Maisilaele ne ba tusizwe ki ku ba ba Jehova. Jehova naa sepahala ku bona mi naa ba babalela  sina mushemi ya lilato mwa babalelela mwana. Mulimu naa ize ku Isilaele: “Kana musali a ka libala mwanaa hae ya anya? kuli mane a si ke a shwela mwana ya zwa mwa mba ya hae makeke? E, ba ka libala bona, kono Na, ha ni na ku ku libala.” (Isa. 49:15) Jehova naa ba etelezi ka Mulao, ka susuezo ye zwelela kwa bapolofita, ni ka silelezo ya mangeloi. Walisamu yo muñwi naa ñozi kuli: “U patululezi Jakobo linzwi la hae, mi u file Isilaele milao ni likatulo za hae. Haa si ka eza macaba a mañwi cwalo” (Samu 147:19, 20; mu bale Samu 34:7, 19; 48:14.) Jehova u ka babalela batu ba ba ineela ku yena kacenu sina feela mwa naa babalelezi sicaba sa hae sa kwaikale.

Libaka ha lu Swanela ku Ineela ku Mulimu

10, 11. Kana lu pepezwi mwa lubasituna lwa Mulimu? Mu taluse.

¹⁰ Ha ba nahanisisa buineelo ni kolobezo ya Sikreste, ba bañwi ba kana ba li: ‘Ki kabakalañi ha ni sa koni ku lapela Mulimu ni si ka ineela ku yena?’ Lu kona ku utwisisa libaka ha lu nyakisisa mayemo a luna ni Mulimu ka nako ya cwale. Mu hupule kuli, kabakala sibi sa Adama, kaufela luna lu pepezwi kwande a lubasi lwa Mulimu. (Maro. 3:23; 5:12) Ku ineela ku Mulimu ki kwa butokwa hahulu kuli lu fite fa ku amuhelwa mwa lubasituna lwa hae. Ha lu boneñi libaka.

¹¹ Ha ku na ku luna ya na ni ndate ya kona ku mu fa bupilo bwa naa lu lelezi Mulimu—bona bupilo bo bu petehile. (1 Tim. 6:19) Ha lu si ka pepiwa sina bana ba Mulimu kakuli batu ba pili ha ne ba ezize sibi, batu ne ba kauhanyizwe ku Mubupi ni Ndataa bona ya lilato. (Mu bapanye Deuteronoma 32:5.) Ku zwa feela ka nako yeo, lifasi la batu ha li si ka ba kalulo ya lubasituna lwa Jehova, mi li kauhani ku Mulimu.

12. (a) Batu ba ba si ka petahala ba kona cwañi ku ba lilama za lubasi lwa Mulimu? (b) Ki mihato mañi ye lu swanela kuu nga lu si ka kolobezwa kale?

¹² Nihakulicwalo, lwa kona ku kupa Mulimu ka butu kuli a lu amuhele mwa lubasi lwa hae lwa batanga ba hae. * Kono seo si konahala cwañi kwa baezalibi ba ba swana sina luna? Muapositola Paulusi naa ñozi kuli: “Lu sa li lila, lwa kutisezwa ku Mulimu ka lifu la Mwanaa hae.” (Maro. 5:10) Ha lu kolobezwa, lu kupanga Mulimu kuli a lu tuse ku ba ni lizwalo le linde ilikuli lu be ba ba amuheleha ku yena. (1 Pit. 3:21) Kono ku na ni mihato ye lu swanela kuu nga lu si ka kolobezwa kale. Lu swanela ku fita fa ku ziba Mulimu, ku ituta ku mu sepa, ku baka, ni ku cinca mupilelo wa luna. (Joa. 17:3; Lik. 3:19; Maheb. 11:6) Mi ku na ni nto ye ñwi hape ye lu swanela ku eza pili lu si ka amuhelwa kale mwa lubasi lwa Mulimu. Ki nto mañi yona yeo?

13. Ki kabakalañi ha ku swanela kuli mutu a eze buitamo ka ku ineela ku Mulimu ilikuli a kone ku amuhelwa mwa lubasi lwa Mulimu lwa balapeli ba hae?

¹³ Mutu ya si yo mwa bulikani ni Mulimu a si ka ba kale silama sa lubasi lwa batanga ba Mulimu, pili u swanela ku itama ka luci ku Jehova. Kuli mu utwisise libaka, muu nge mutala wa ndate ya kutekeha ili ya bonisa sishemo ku mukulwani ya li ndiala, mi u lela ku mu añula sina silama sa lubasi lwa hae. Ndate yo u zibahala ku ba muuna yo munde. Kono pili a si ka amuhela kale mukulwani yo sina mwanaa hae, muuna yo u bata kuli mushimani yo a sepise nto ye ñwi. Kacwalo muuna yo u li: “Ni si ka ku amuhela kale sina mwanaa ka, ni tokwa ku ziba kamba u ka ni lata ni ku ni kuteka sina ndataho.” Muuna yo u kona feela ku amuhela mukulwani yo mwa lubasi lwa hae haiba mukulwani yo a itatela ku eza buitamo bo. Kana haki ko ku swanela ku eza cwalo? Ka ku swana, batu baa amuhela Jehova mwa lubasi lwa hae, ki bao feela ba ba tabela ku eza  buitamo ka ku ineela ku yena. Bibele i li: “Mu mu beele mibili ya mina, ibe sitabelo se si pila, se si kenile, se si kateleha ku Mulimu.”—Maro. 12:1.

Ku Ineela ku Bonisa Lilato ni Tumelo

14. Mutu u bonisa cwañi lilato ka ku ineela?

¹⁴ Ku itama ku Mulimu ka ku ineela ku yena ku bonisa lilato la luna ku Jehova le li zwelela kwa pilu. Ka linzila ze ñwi ku swana sina buitamo bo bu ezwanga fa sinawenga. Munyali ya li Mukreste u bonisanga lilato la hae ka ku itama kuli u ka sepahala ku munyaliwa ku taheñi kamba ñi. Yeo i banga sepiso ya ku itama ku mutu isiñi ya ku sepisa feela ku eza nto ye ñwi. Munyali ya li Mukreste wa ziba kuli haa koni ku ba ni tohonolo ya ku pila ni munyaliwa wa hae haiba a sa ezi buitamo bwa linyalo. Ka nzila ye swana, ha lu koni ku ikola limbuyoti za ku ba silama sa lubasi lwa Jehova haiba lu sa ezi buitamo ka ku ineela ku yena. Kacwalo, lu ineela ku Mulimu bakeñisa kuli ku si na taba ni ku sa petahala kwa luna, lu tabela ku ba ba hae mi lu ikatulezi ku sepahala ku yena, ku tahe ñi kamba ñi.—Mat. 22:37.

15. Buineelo bu bonisa cwañi kuli mutu u na ni tumelo?

¹⁵ Ha lu ineela ku Mulimu, lu bonisa tumelo. Ki kabakalañi ha ku li cwalo? Tumelo ya luna ku Jehova i lu fa buikolwiso bwa kuli ku sutelela ku Mulimu kwa lu tusa. (Samu 73:28) Lwa ziba kuli ha ku na ku lu belanga bunolo nako kaufela ku zamaya ni Mulimu ha lu nze lu pila mwahalaa “lusika lo lu si ka luka, lo lu maswe,” kono lu sepile sepiso ya Mulimu ya kuli u ka fuyaula buikatazo bwa luna. (Mafil. 2:15; 4:13) Lwa ziba kuli ha lu si ka petahala, kono lu na ni buikolwiso bwa kuli Jehova u ka lu utwela butuku niha lu eza mafosisa. (Mu bale Samu 103:13, 14; Maroma 7:21-25.) Lu na ni tumelo ya kuli Jehova u ka lu fa mupuzo kabakala kuli lu ikatulezi ku sepahala ku yena.—Jobo 27:5.

Ku Ineela ku Mulimu ku Tahisa Tabo

16, 17. Ki kabakalañi ku ineela ku Jehova ha ku tahisa tabo?

¹⁶ Ku ineela ku Jehova ku tahisa tabo bakeñisa kuli ku ama ku ifana ku yena. Jesu naa talusize taba ya niti ha naa bulezi kuli: “Ku na ni mbuyoti mwa ku fana, ye fita ye mwa ku fiwa.” (Lik. 20:35) Jesu naa fumani tabo ye tahiswa ki ku fana ka nako ya naa eza bukombwa bwa hae bwa fa lifasi. Fokuñwi naa sa pumulangi, ku ca lico, kamba ku pila ka mbombolelwa ka ku bata ku tusa batu ba bañwi ku fumana nzila ye isa kwa bupilo. (Joa. 4:34) Jesu naa fumana tabo ka ku tabisa pilu ya Ndatahe. Jesu naa ize: “Kamita ni eza ze mu tabisa.”—Joa. 8:29; Liprov. 27:11.

¹⁷ Kacwalo, Jesu naa bonisize balateleli ba hae nzila ye fumanisa bupilo bwa tabo ha naa bulezi kuli: “Mutu haa lata ku ni latelela, u na ni ku itoboha.” (Mat. 16:24) Ku eza cwalo ku lu suteleza ku Jehova. Kana ku na ni mutu yo  muñwi u sili ye lu kona ku sepa kuli u ka lu babalela ka lilato?

18. Ki kabakalañi ku pila ka ku lumelelana ni buineelo bwa luna ku Jehova ha ku tahisa tabo ye tuna ku fita ku ineela kwa nto ye ñwi kamba ku mutu yo muñwi?

¹⁸ Ku ineela ku Jehova ni ku pila ka ku lumelelana ni buineelo bo ka ku eza tato ya hae ku tahisa tabo ye tuna ku fita ku ineela kwa nto ye ñwi kamba ku mutu ufi kamba ufi. Ka mutala, batu ba bañata ba neela bupilo bwa bona kwa ku ndongwama sifumu kono inge ba sa fumani tabo ya niti ni mwangalwa. Kono batu ba ba ineela ku Jehova ba fumana tabo ye inelela. (Mat. 6:24) Tohonolo ya ku “sebeza ni Mulimu” i ba bisa ba ba tabile, nihaike kuli ha ba si ka ineela kwa musebezi kono ba ineezi ku Mulimu wa luna ya na ni buitebuho. (1 Makor. 3:9) Ha ku na mutu ya itebuha hahulu buitomboli bwa bona ku fita Mulimu. Mane Mulimu u ka kutiseza ba ba sepahala ba hae kwa bunca ilikuli a ba babalele ku ya ku ile.—Jobo 33:25; mu bale Maheberu 6:10.

19. Ki tohonolo mañi ye ba ikola batu ba ba ineezi ku Jehova?

¹⁹ Ku neela bupilo bwa mina ku Jehova ku mi suteleza bukaufi hahulu ni yena. Bibele ili: “Mu sutelele ku Mulimu mi u ka sutelela ku mina.” (Jak. 4:8; Samu 25:14) Mwa taba ye tatama, lu ka nyakisisa libaka ha lu kona ku eza keto ya ku ba ba Jehova inze lu na ni buikolwiso.

[Litaluso za kwatasi]

Mu Kona ku Alaba Cwañi?

• Ku ineela ku Mulimu ku talusañi?

• Ku ineela ku Mulimu ku lu tusa cwañi?

• Ki kabakalañi Bakreste ha ba tokwa ku ineela ku Jehova?

[Lipuzo za Tuto]

[Siswaniso se si fa likepe 6]

Ku pila ka ku lumelelana ni buineelo bwa luna ku tahisa tabo ye inelela