Mwanda Waka Ufwaninwe Kwipāna Kudi Yehova?

“Naimaninwa buno bufuku ne mwikeulu wa Leza byo ndi wandi.”—BIL. 27:23.

1. I matabula’ka atabulanga bidi boba bāya kubatyijibwa, ne kino kilengeja twiipangule bipangujo’ka?

 “KUPITYILA ku kitapwa kya Yesu Kidishitu, lelo wi mwisāse bubi bobe ne kwipāna kudi Yehova mwanda wa kulonga kiswa-mutyima kyandi?” Kino i kimo kya mu bipangujo bibidi bilondololwanga na ba kubatyijibwa ku mfulo kwa dishikulu dya lubatyijo. Mwanda waka Bene Kidishitu bafwaninwe kwipāna kudi Yehova? I kamweno’ka kotukamwena mu kwipāna kudi Leza? Mwanda waka muntu kakokejapo kutōta ne kwitabijibwa na Leza pakubulwa kwipāna kwadi? Dibajinji, i biyampe tuyuke kwipāna i bika pa kwimvwanija malondololo.

2. Lelo kwipāna kudi Yehova kushintulula bika?

² Lelo kwipāna kudi Leza kushintulula bika? Tala muswelo wālombwele mutumibwa Polo kipwano kyandi na Leza. Kumeso kwa bakwabo bavule kukanda mu bwato buleta kyaka, wētelēle Yehova “Leza [amba] ndi wandi.” (Tanga Bilongwa 27:22-24.) Bene Kidishitu bonso ba bine i ba Yehova. Inoko, pano pa ntanda ponso “palēle mudi yewa umbi.” (1 Yoa. 5:19) Bene Kidishitu bekalanga ke ba Yehova kitatyi kyobepāna kwadi mu milombelo mu muswelo waitabije. Kuno kwipāna i mpiko ya muntu mwine. Kupwa ke kubatyijibwa mu mema.

3. Lelo lubatyijo lwa Yesu lwādi lulombola bika, ne balondi bandi bakeula kimfwa kyandi namani?

³ Yesu wētushidile kimfwa kitatyi kyaātongele aye mwine kulonga kiswa-mutyima kya Leza. Byaābutwidilwe mu muzo mwipāne wa Isalela, wādi kala mwipāne kudi Leza. Inoko, aye pa kubatyijibwa wālongele kintu kitabukile pa byādi bilombelwe mu Mukanda wa Bijila. Kinenwa kya Leza kilombola byaānene amba: “Amiwa uno ngiyanga . . . kulonga kiswa-mutyima obe, abe Leza.” (Bah. 10:7; Luka 3:21) Nanshi lubatyijo lwa Yesu lwālombwele amba wepāna mwanda wa kulonga kiswa-mutyima kya Leza Shandi. Balondi bandi beulanga kimfwa kyandi pobepāna na kubatyijibwa. Ino abo pobabatyijibwanga mu mema, balombolanga patōkelela amba i bepāne kala kudi Leza mu milombelo.

 Kamweno Kotumwena mu Kwipāna

4. Lelo bulunda bwa ba Davida ne Yonafane bwitulombola bika bitala pa kumvwañana?

⁴ Kwipāna kwa Bwine Kidishitu i mwanda musumininwe. I mupite kumvwañana bitupu. Penepa, i kamweno’ka kotumwena mu kwipāna? Pa kudingakanya uno mwanda, tutalei kamweno kadi mu kumvwañana kwikalanga mu bantu. Kimfwa kimo bidi i kya bulunda. Pa kusaka kupwana bulunda, ufwaninwe kwitabija kiselwa kya bu mulunda. Kino kilomba kumvwañana—ukamona’mba ufwaninwe kuta mulunda nobe mutyima. Bulunda bumo butendelwa bulombwelwe mu Bible i bwa ba Davida ne Yonafane. Bāsambile kipwano. (Tanga 1 Samwele 17:57; 18:1, 3.) Nansha bulunda bwa uno muswelo byo busakene, bulunda bwa bantu bavule butyitanga shi i beivwanike, nansha kwikōkela abo bene.—Nk. 17:17; 18:24.

5. Lelo umpika wādi ukokeja kulonga bika pa kumwena nyeke mu kwikala wa mfumwandi muyampe?

⁵ Mukanda wa Bijila wāpelwe Bene Isalela na Leza ulombola kipwano kikwabo kyādi kimwena’mo bantu po bādi bomvwañana. Shi mupika usaka kwikala talala nyeke na mfumwandi muyampe, wādi ukokeja kwiimvwanika nandi bya lonso. Bijila binena’mba: “Shi umpika unena’mba nsanshilwe mfumwami, ne mukajami ne bāna bami bene, nkitambepo bu-mwanapabo. Nankyo mfumwandi ukamuleta kudi bamfumu, kabidi ukamuleta ku kinjilo nansha ku lunji; ebiya mfumwandi ukamusaba kutwi ne mutubulo ke wapikipikitya, ino ukamwingidila nyeke ne nyeke.”—Div. 21:5, 6.

6, 7. (a) Lelo bantu bamwenanga namani mu kumvwañana? (b) Lelo kino kilombola bika pa kipwano kyotupwene na Yehova?

⁶ Busongi i kipwano kilomba kumvwañana kukatampe. Ke kumvwañanapo kwa pa mingilo, ino i kwa na muntu. Bantu babidi bashikete pamo kwisonga mpika, kebabwanyapo kwikala na mutyima-ntenke wa bine; nansha ke babo bana bene. Ino bantu beimvwanikile ne kwisonga mobyendele badi na bubinga buyampe bwa mu Bisonekwa bwa kulongela buninge bwa kupwija bikoleja byabo na buswe shi abatanwa na makambakano.—Mat. 19:5, 6; 1 Kod. 13:7, 8; Bah. 13:4.

⁷ Mu bitatyi byāsonekelwe Bible, bantu bāmwenine mu kumvwañana mwanda wa busunga ne twaji. (Mat. 20:1, 2, 8) Uno mwanda i wa bine ne dyalelo. Kimfwa, tumwenanga mu kusoneka byotwiimvwanika, kumeso kwa kushilula myanda ya busunga nansha kwingidila mu sosiete kabidye. Penepo, shi kumvwañana kutyityijanga kipwano mu bulunda, mu busongi, ne mu twaji, mwene kwipāna pampikwa kwikaka kudi Yehova ko kwine kwa kamweno kutabuka mu bulunda bopwene nandi! Shi ke pano, tubandaulei muswelo wāmwenine bantu ba pa kala mu kwipāna kudi Yehova Leza ne kino mo kyādi kipityile kumvwañana bitupu.

Kamweno Kāmwenine Isalela mu Kwipāna Kudi Leza

8. Lelo kwipāna kudi Leza kwādi na nshintulwilo’ka ku Bene Isalela?

⁸ Muzo wa Isalela mu kikonge wāikele kwipāna kudi Yehova Leza pobāpikile mpiko kwadi. Yehova wēbabungakenye ku Lūlu lwa Shinai, ne kwibanena amba: “Shi mukōkele dyami diwi binebine ne kulama kipwano kyami, nankyo mukangikadila kileme kyami amiwa mwine mubukata mwa bantu bonsololo.” Bantu bālondolola kiundaunda amba: “Kyonso kyanena Yehova tukalonga’kyo.” (Div. 19:4-8) Kwipāna kwādi na nshintulwilo mivule ku Bene Isalela ke’nkapo kwiimvwana kwa kulonga kintu kampanda. Kwādi kushintulula amba ke bantu ba Yehova, ne Yehova nandi wēbamwene bu “kileme” kyandi.

9. Lelo Isalela wāmwenine namani mu kwipāna kwabo kudi Leza?

⁹ Bene Isalela bāmwenine mu kwikala ba bene ba Yehova. Nandi kēbalekelepo, kadi wēbalelele pamo bwa mbutwile wa buswe ulela  mwanandi. Leza wānene Bene Isalela amba: “Lelo mwana-mukaji i namani avulaminwe wandi mwana wāmusha amba: Nkikasokolapo lusa pa kipa kya nda yami, a? eyo, bene bano’ba padi bakavulaminwa, nanshi ami nkikavulaminwapo abe, ehe.” (Is. 49:15) Yehova wēbaludikile na Mukanda wa Bijila, wēbakankamikile na bapolofeto ne kwibakinga na bamwikeulu. Mulembi umo wa Mitōto wālembele amba: “Ulombolanga mwanda wandi kudi Yakoba, ne bijila byandi ne kutyiba-mambo kwandi kudi Isalela. Kalongelepo namino ku muzo mukwabo, mhm.” (Mit. 147:19, 20; tanga Mitōto 34:7, 19; 48:14.) Yehova byaādi utele mutyima muzo wandi wa pa kala, nanshi ukata mutyima ne boba bepāna kwadi dyalelo.

Kine Kyotufwaninwe Kwipānina Kudi Leza

10, 11. Lelo tubutwilwanga mu kisaka kya Leza kya ntanda yonso? Shintulula.

¹⁰ Bamo pa kumona kwipāna kwipāna Bene Kidishitu ne kubatyijibwa, bakokeja kwiipangula amba, ‘Mwene nkokeja kutōta Leza pambulwa kwipāna kwadi?’ Bipela kwimvwanija shi tulangulukile pa mwine mwitumwena Leza dyalelo. Vuluka amba pa mwanda wa bubi bwa Adama, batwe bonso tubutulwanga panja pa kisaka kya Leza. (Loma 3:23; 5:12) Kwipāna kotwipēne kudi Leza i kisakibwa kya mvubu pa kwitabijibwa mu kisaka kyandi kya bipangwa bya ñeni bya kikōkeji. Tutalei mwanda waka.

¹¹ I kutupu muntu udi na shandi ubwanya kumupa būmi na botwādi tufwaninwe kwikala nabo—ke būmi bubwaninine kadi. (1 Tem. 6:19) Ketubutwilwepo bu bana ba Leza mwanda bantu babidi babajinji pa kujilula, muzo wa muntu wāpalukile kudi Tata, Umpangi wetu wa buswe. (Dingakanya Kupituluka 32:5.) Tamba papo, bantu badi panja pa kisaka kya Yehova kya ntanda yonso, bapaluke kwadi.

12. (a) Lelo bantu bakubulwa kubwaninina bakokeja kutwela namani mu kisaka kya Leza? (b) I matabula’ka otufwaninwe kutabula kumeso kwa kubatyijibwa?

¹² Nansha nabya, muntu ne muntu ukokeja kulomba Leza amwitabije kutwela mu kisaka kya bengidi bandi. * Lelo kino kibwanika namani kotudi batwe babipya-mambo? Mutumibwa Polo wāsonekele amba: “Po twakidi bakushikwa aye twapwanijibwe na Leza ponka pa lufu lwa Mwana wandi.” (Loma 5:10) Kubatyijibwa ko kulomba kotulomba Leza etupe mutyima wa mundamunda mulumbuluke amba twitabijibwe na aye. (1 Pet. 3:21) Inoko kumeso kwa kubatyijibwa kudi matabula otufwaninwe kutabula. Tufwaninwe kumuyuka Leza, kumukulupila, kwisāsa, ne kushinta būmi bwetu. (Yoa. 17:3; Bil. 3:19; Bah. 11:6) Kudi ne kintu kikwabo kifwaninwe kulongwa kumeso kwa kwitabijibwa mu kisaka kya Leza. Le i kintu’ka?

13. Mwanda waka i kyendele’mo muntu apike mpiko ya kwipāna kudi Leza mwanda wa kubadilwa mu kisaka kya batōtyi bandi betabijibwe?

¹³ Kumeso kwa muntu upalukile kudi Leza kubadilwa mu kisaka kyandi kya bengidi betabijibwe, ufwaninwe bidi kupika mpiko kudi Yehova. Pa kwimvwanija buluji, langa’po bidi shabana wa bulēme waloelelwa kushikata na mwana-nshiye ne kumulela mu kisaka kyandi. Shabana uyukene bu muntu muyampe. Ino, kumeso kwa kwitabija uno mwanuke bu wandi mwana, usaka bidi mwanuke’wa anene patōkelela. Uno muntu wanena’mba, “Kumeso kwa ku kwitabija bu mwana, nsaka ndyuke shi ukansanswa ne kundēmeka bu shobe.” Enka shi uno mwanuke waitabija patōkelela na mutyima umo, ebiya uno muntu kamwitabija mu kisaka kyandi. Mwene bidi na buluji? Mo monka ne Yehova nandi, witabijanga mu kisaka kyandi enka boba bapika mpiko ya  kwipāna kwadi na mutyima tō. Bible unena’mba: “Mwipane ngitu yenu, ke kitapwa kyumi, kikola, kya kuloelelwa Leza.”—Loma 12:1.

I Kilongwa kya Buswe ne Lwitabijo

14. Lelo kwipāna i kilomboji kya buswe mu buluji’ka?

¹⁴ Kupika mpiko kudi Leza i kilomboji kya buswe bwetu botuswele Yehova ne mutyima umo. Ku mutamba umo, kudi bwa mpiko ya pa butundaile. Musoñañani Mwine Kidishitu ulombolanga amba uswele mutundaile na kupika mpiko ya kwikala nandi nansha ke mu bitatyi’ka. I mutyipo waatyipila muntu ke kwitabijapo’tu kwa kulonga kintu kampanda. Musoñañani Mwine Kidishitu uyukile amba kabwanyapo kushikata na mwana-mukaji shi kapikilepo mpiko ya busongi. Mo monka, ketubwanyapo kumwena ne pa mfulo mu kwikala ba mu kisaka kya Yehova shi ketupikilepo mpiko ya kwipāna. Nanshi twipānanga kudi Leza mwanda, nansha byotudi bampikwa kubwaninina, tusakanga kwikala bandi kadi nansha bikale namani, twi basumininwe kumukōkela.—Mat. 22:37.

15. Le kwipāna i kilongwa kya lwitabijo namani?

¹⁵ Potwipāna kudi Leza, tuloñanga kilongwa kya lwitabijo. Mwanda waka tunena namino? Kwitabija kotwitabije Yehova kwitukulupija amba kufwena kudi Leza i kwitunengelele. (Mit. 73:28) Tuyukile amba ke kipelangapo nyeke kunanga ne Leza “mubukata mwa lukongo luno lukondame, ne lwa kuvutakanya,” ino tukulupile mu mulao wa Leza wa kwitukwatakanya mu bukomo botulonga. (Fid. 2:15; 4:13) Tuyukile amba twi bakubulwa kubwaninina, ino tukulupile amba Yehova uketufwila lusa kitatyi kyotuluba. (Tanga Mitōto 103:13, 14; Loma 7:21-25.) Twitabije amba Yehova uketupala mpalo mwanda wa kusumininwa kotusumininwe kulama bululame bwetu.—Yoba 27:5.

Kwipāna Kudi Leza Kuletanga Nsangaji

16, 17. Mwanda waka kwipāna kudi Yehova kuletanga nsangaji?

¹⁶ Kwipāna kudi Yehova kuletanga nsangaji mwanda kwitulomba twilambule batwe bene. Yesu wātelele bubinebine bukatampe pa kunena’mba: “Dyese dya kupana ditabukile dya kupebwa.” (Bil. 20:35) Yesu wēmwenine ne pa mfulo nsangaji ya kupāna paādi mu mwingilo wandi pano panshi. Kyaba kimo, wādi wibudija kukōkolokwa, kudya, nansha ke bintu bya ku ngitu mwanda wa kukwasha bakwabo basokole dishinda dya būmi. (Yoa. 4:34) Yesu wādi uloelelwe kusangaja mutyima wa Shandi. Wānene amba: “Ami nami noñanga byonka bya kumutōkeja ku mutyima wandi mafuku onso.”—Yoa. 8:29; Nk. 27:11.

¹⁷ Nanshi, Yesu wālombwele balondi bandi mwa kwikadila na būmi bwa nsangaji amba: “Shi muntu usaka kunonda, nankyo ēpele aye mwine.” (Mat. 16:24) Kulonga namino kwitufwenyanga mpata kudi Yehova. Lelo tubwanya  kwitūla mu dikasa dya muntu mukwabo wa kwitulela na buswe kutabuka buno?

18. Mwanda waka kwikala na būmi bukwatañene na kwipāna kwetu kudi Yehova kuletanga nsangaji kutabuka’ko kwipāna ku kintu nansha ku muntu mukwabo?

¹⁸ Kwipāna kudi Yehova ne kwikala na būmi bukwatañene nako na kulonga kiswa mutyima kyandi kuketuletela nsangaji mivule kupita’ko kwipāna ku kintu nansha ku muntu mukwabo. Kimfwa, bantu bavule bapānanga būmi bwabo mu kulondalonda bupeta bwa ku ngitu, ino kutana nsangaji ne kuloelelwa kwa binebine mpika. Inoko, boba bepēne kudi Yehova batananga nsangaji ya nyeke. (Mat. 6:24) Dyese dya kwikala “bakwingila mīngilo pamo na Leza,” dibapanga nsangaji, nansha nabya, kebepēnepo ku mwingilo kampanda, ino i kudi Leza uyukile kufwija’ko. (1 Kod. 3:9) Kekudipo muntu umutabukile kufwija’ko pa kwipāna kwabo. Ukajokejeja ba kikōkeji ku busongwalume bwabo mwanda wa kumwena nyeke mu buledi bwandi.—Yoba 33:25; tanga Bahebelu 6:10.

19. Le i dyese’ka didi na boba bepāna kudi Yehova?

¹⁹ Kupāna būmi bobe kudi Yehova kukakupwanya nandi. Bible unena’mba: “Fwenai kudi Leza, nandi ukemufwena.” (Yak. 4:8; Mit. 25:14) mu kishinte kilonda’ko, tukayuka kine kyotukokeja kukulupidila mu butongi bwa kwikala ba bene ba Yehova.

[Kunshi kwa dyani]

Usa Kulondolola Namani?

• Lelo kwipāna kudi Leza kushintulula bika?

• Lelo tukamwena namani mu kwipāna kudi Leza?

• Mwanda waka Bene Kidishitu bafwaninwe kwipāna kudi Yehova?

[Bipangujo bya Kifundwa]

[Kifwatulo pa paje 12]

Kwikala na būmi bukwatañene na kwipāna kwetu kuletanga nsangaji ya nyeke