Muloñadi Chimwatela Kudihanina Kudi Yehova?

‘Wufuku wowenawunu kañelu kaNzambi yami, wanheta inakalakelaña nawa, wemana kunidami.’—YIL. 27:23.

1. Yumanyi yelawu antu anadihani kulonda kupapatishewa, nawa chumichi chaleñelaña kwihula malwihwinyi?

 “KUSHINDAMENA hamulambu waYesu Kristu, munabalumuki munyichima nakuleka nshidi yenu nakudihana enu aweni kudi Yehova kulonda mwili nkeñelu yindi?” Ilu dilwihu lumu hamalwihu ayedi achipapatishu lwaakulañawu kudi antu anakuya nakupapatishewa hakukunkulula kwampanji yachipapatishu. Muloñadi akwaKristu chatela kudihaninawu kudi Yehova? Indi kudihana kudi Nzambi kwatuheteshaña ñahi? Muloñadi muntu chinateli kubulilayi kudifukula kudi Nzambi chikupu neyi hanadihani kudi yenaku? Hakwila nawu twiluki ñakwilu, tusambilenu kwiluka chalumbuluka kudihana.

2. Indi kudihana kudi Yehova chalumbulukadi?

² Indi kudihana kudi Nzambi chalumbulukadi? Talenu kapostolu Pawulu chalumbulwiliyi hawubwambu windi naNzambi. Henohu antu amavulu kanda akandami mumbopolu yadiña nakukala, Pawulu wamuteneni Yehova nindi ‘Nzambi wanheta.’ (Tañenu Yililu 27:22-24.) AkwaKristu alala ejima ayiheta kudi Yehova. Kwambukaku, ituña dejima ‘dashakama mudi owu watama.’ (1 Yow. 5:19) AkwaKristu ayihetaña kudi Yehova neyi kudihana kwawu akwiteja mukulomba kudi Yehova. Kudihana kwamuchidiwu kwekala hikukana kwamuntu halwindi. Neyi muntu nadihani dehi, kuhiñahu wapapatishewaña mumenji.

3. Indi chipapatishu chaYesu chamwekeshelidi, nawa atumbanji twindi anateli kwimbujola ñahi chakutalilahu chindi?

³ Yesu watwimikilili chakutalilahu hampinji yafuukwiluhu kwila yuma yakeñañayi Nzambi. Chineli wavwalikililili mumunza waIsarela wadihanini kudi Nzambi, dikwila nawu wadihanini dehi kudi Nzambi. Hela chochu, hachipapatishu chindi wakoñeli chuma chabadika kulema hayuma yakeñekeleña muNshimbi. Izu daNzambi damwekeshaña nawu wahosheli nindi: “Tala, ami nenzi dehi nakwila muchima weyi, eyi Nzambi.” (Heb. 10:7; Luka 3:21) Dichi, chipapatishu chaYesu chamwekesheli kudihana kwindi kudi Nzambi kulonda kwila yuma yakeñañayi  Tata yindi. Atumbanji twindi embujolaña chakutalilahu chindi neyi adihana kuhitila mukupapatishewa. Hela chochu, kudi wena, kupapatishewa mumenji kwayimwekeshaña hatooka nawu anadihani kudi Nzambi mukulomba.

Kudihana Chikwatuheteshaña

4. Indi wubwambu wadiña hakachi kaDavidi naJonatani watudizishañadi kutalisha hakudihana?

⁴ Kudihana kwawakwaKristu kwalema chikupu. Kwabadika hakudihana hohu. Hanu dinu, kudihana kwatuheteshaña ñahi? Hakwila nawu twesekeji chumichi, tushinshikenu hankisu jafumaña mukudihana kwawubwambu wawantu. Wubwambu hichuma chimu chakutalilahu. Hakwila nawu mudiluñishi nenu mudi nebwambu denu, mwatela kwiluka chuma chakeñekaña hakwikala ibwambu. Chabombelamu kudihana nikufwila kwakamena ibwambu denu. Wubwambu waDavidi naJonatani hiwubwambu wumu wekala hawubwambu wawuwahi wasonekawu muBayibolu. Adikanini wumu namukwawu hawubwambu wawu. (Tañenu 1 Samweli 17:57; 18:1, 3.) Hela chakwila wubwambu wamuchidiwu hiwavulaku, wubwambu wawuvulu wakolaña neyi antu adihana, hela kufwila kudakamena wumu namukwawu.—Yish. 17:17; 18:24.

5. Indi nduñu wadiluñishileña ñahi chahaya nyaka hakwikala nankaka yindi wamuwahi?

⁵ Nshimbi yayinkeluwu aIsarela kudi Nzambi yahosha cheñi hawubwambu wukwawu wadiluñishiluwu antu kuhitila mukudihana. Neyi nduñu nakukeña nindi amwakamenaña chachiwahi kudi nkaka yindi wamuwahi, wateleleli kukasa chitiyañenu chahaya nyaka nankaka yindi. Nshimbi yahosha nawu: ‘Neyi owu nduñu wakahosha chalumbuluka chikupu, nindi, Ami namukeña nkaka yami, niñodami nianyanami; kufuma muwuduñu kwonti kwami; nkaka yindi akamuleti kudi Nzambi, akamutwali kuchenzelu hela chipamba chakuchisu; nkaka yindi akalokoli kwitu dindi namukumbu; wakamukalakeli nyaka yejima.’—Kwid. 21:5, 6.

6, 7. (a) Indi kudihana kwaheteshaña ñahi antu? (b) Indi kudihana kwamuchidiwu kwatudizishañadi hawubwambu wetu naYehova?

⁶ Maluwi hiwubwambu wakeñekaña kutiyañana chikupu. Kutiyañana kweniku bayi neyi kwakusoneka hachipapiluku, ilaña kwakutiyañana namuntu. Antu ayedi ashakamaña hamu ilaña hiyadisumbulaku hiyanateli kukiñewa hamu nianyanawu chikupuku. Ilaña adisumbula adakamenaña wumu namukwawu adi mumaluwi akalemesha, neyi kunamwekani kukala, azatishaña Nsona hakufwila kumanisha kukala munjila yayiwahi.—Mat. 19:5, 6; 1 Kor. 13:7, 8; Heb. 13:4.

⁷ Mumpinji yakunyima, antu adiña nakuhetelamu kuhitila mukusoneka hachipapilu yuma yinatiyañanuwu munsañu jakulanda nakulandulula ninyidimu. (Mat. 20:1, 2, 8) Chumichi chazatikaña nimakonu. Chakutalilahu, twahetelañamu kuhitila mukusoneka yuma yitunatiyañani henohu kanda tutachiki kulanda nakulandulula hela kuzata hakampani. Neyi kutiyañana kwakoleshaña yuma yidi neyi wubwambu, maluwi nimudimu, dikwila nawu kudihana kwakufuma hamuchima kunateli kukolesha wubwambu wenu naYehova chikupu. Ichi dinu tushinshikenu hanochu antu akunyima chiyahetelelumu hakudihana kudi Yehova Nzambi nawa chumichi chichabadikilili hakudihana hohu.

Kudihana Kudi Nzambi Chikwahetesheli aIsarela

8. Indi kudihana kudi Nzambi kwalumbulukilidi kudi aIsarela?

⁸ Munza waIsarela wejima wadihanini kudi Yehova hampinji yamukaninuwu Nzambi. Yehova wayipompesheli kukamwihi nampidi yaSinayi, nawa wayilejeli nindi: “Neyi chalala mukwovwahilaña izu dami, neyi mukuhembaña chitiyañenu chami, mukwikala chuma chalema, chamami aweni chakwambula munyuza yejima yawantu; muloña iseki dejima damami.” Antu aakwilili hamu, nawu: “Mwejima mwanahoshiyi Yehova tukwilamu.” (Kwid. 19:4-8) Kudihana kwabombelelumu yuma yayivulu kudi aIsarela kubadika hakutiyañana hohu kwila chuma. Kwalumbulukili nawu ayiheteli kudi Yehova, nawa Yehova wayakameneneña neyi ‘chuma chindi chalema.’

9. Indi aIsarela ahetelelumu ñahi hakudihana kudi Nzambi?

 ⁹ A Isarela ahetelelumu hakuyiheta kudi Yehova. Yehova wadiña washinshika nawa wayakameneneña neyi nvwali wukweti kukeña chakamenañayi mwanindi. Nzambi wahosheli kudi aIsarela nindi: ‘Mumbanda alalameni mwanindi wuchidi kwamwa? Abuli kutiyila mwanindi wakudivwela wushona? Eña, awa kwiji akukulalamena, hakwila ami hinakakulalamenaku.’ (Isa. 49:15) Yehova wayilombweleña kuhitila muNshimbi, wayikolesheleña kuhitila mudi atuprofwetu nikuyikiña kuhitila mudi añelu. Ñimbi yamasamu wasonekeli nindi: “Wamwekeshelaña Yakoba izu dindi, wamwekeshelaña Isarela yidika yindi nawuñaji windi. Haneli chochina namuza wacheñuku.” (Mas. 147:19, 20; tañenu Masamu 34:7, 19; 48:14.) Yehova wakamenaña antu adihanaña kudi yena makonu neyi chakameneneñayi munza waheteliyi kunyima.

Muloña Wutwatela Kudihanina Kudi Nzambi

10, 11. Komana twavwalikila muchisaka chaNzambi chayileñaleña yejima? Lumbululenu.

¹⁰ Hampinji yinakutoñojokawu hakudihana nikupapatishewa, amakwawu anateli kudihula nawu, ‘Komana kwila nidifukula kudi Nzambi chakadi kudihana kudi yena nehi?’ Tunateli kwakula chachiwahi lwihu lwenilu neyi twiluka ñimenu yetu naYehova. Anukenu nenu, hamuloña wanshidi yaAdama, wejima wetu hitwavwalikila muchisaka chaNzambuku. (Rom. 3:23; 5:12) Kudihana kudi Nzambi hichuma chalema chakeñekaña hakwila nawu atwiteji kwikala muchisaka chindi chayileñaleña yejima. Tushinshikenu chuma chaleñelaña.

¹¹ Kwosi muntu wukweti nvwali weyala wunateli kutwinka wumi wahaya nyaka, neyi chakeñeleñayi Nzambi. (1 Tim. 6:19) Hitwavwalika neyi anyana kaNzambuku, muloña chelili antu ayedi akusambila avulumuni, muchidi wamuntu awambwili kufuma kudi Tata yawu wukweti kukeña nawa Nleñi yawu. (Esekejenu Kuhituluka 32:5.) Kufuma hayina mpinji, antu ejima mukaayi hiyekala muchisaka chaYehova chayileñaleña yejimaku, ayambula kufuma kudi Nzambi.

12. (a) Indi antu abula kuwanina anateli kwikala ñahi muchisaka chaNzambi? (b) Yumanyi yitwatela kwila henohu kanda tupapatishewi?

¹² Hela chochu, tunateli kulomba kudi Nzambi hamuntu hamuntu kulonda kutwiteja kwikala muchisaka chindi chawambuñindi etejewa. * Hanu dinu tunatweshi kwila ñahi mwenimu etu akwanshidi? Kapostolu Pawulu wasonekeli nindi: ‘Hitwadiñi ayilumbu, atukundamishili kudi Nzambi hakufwa kwaMwanindi.’ (Rom. 5:10) Hachipapatishu twalombaña kudi Nzambi netu yatwinki chinleji chamuchima chitooka kulonda yatwiteji. (1 Pet. 3:21) Hela chochu, kudi yuma yitwatela kwila henohu kanda tupapatishewi. Twatela kumwiluka Nzambi, kumukuhwelela, kubalumuka mumuchima nikuhimpa yililu yetu. (Yow. 17:3; Yil. 3:19; Heb. 11:6) Nawa kudi chuma chikwawu chitwatela kwila henohu kanda atwiteji kwikala muchisaka chaNzambi. Chumanyi chenichi?

13. Muloñadi muntu chatelelayi kukana kuhitila mukudihana kudi Nzambi kulonda kwikala mbadi yachisaka Chindi chawakwakudifukula etejewa?

¹³ Henohu muntu wabula kwikala muchisaka chaNzambi kanda yekali mbadi yachisaka chindi chawambuñindi etejewa, chatachi, watela kumukana Yehova chakufuma hamuchima. Hakwila nawu twiluki chikupu chumichi, fwikijenu nvwali wunamukeñi chikupu mwana kanshona nawa nakukeña yekali mwanindi. Tata yawantu yeniwu amwiluka nawu wekala chiwahi. Hela chochu, henohu kanda yamwiteji kansi yeniwu kwikala mwanindi, iwu nvwali nakukeña kansi weyala yeniwu yamukani. Dichi, nvwali yeniwu wukumuleja nindi, “Henohu kanda nikwiteji kwikala mwanami, nakukeña kwiluka nami wukutwalekahu kunkeña nawa wukunlemeshaña neyi, yami tata yeyi.” Nvwali yeniwu wukumwiteja kansi yeniwu kwikala mwanindi neyi yamukana chakufuma hamuchima. Komana hidimuku? Chochimu, Yehova wetejaña hohu antu kwikala muchisaka chindi chiña neyi  amukana kuhitila mukudihana. Bayibolu yahosha nawu: ‘Lambulenu nyijimba yenu yili mulambu wamumi, wajila [wakudihana], wakutiyisha nachu Nzambi kuwaha.’—Rom. 12:1.

Kudihana Kwamwekeshaña Nawu Tukweti Kukeña niChikuhwelelu

14. Munjilanyi kudihana mukwamwekeshelaña nawu tukweti kukeña?

¹⁴ Kumukana Nzambi kuhitila mukudihana, kwamwekeshaña nawu twamukeña Yehova namuchima wejima. Chumichi chidi neyi kukana kwamumaluwi. Nsumbuli mukwaKristu wamwekeshaña kukeña kuhitila mukukana nindi wakekala washinshika kudi nsumbuki yindi, hichidi namuloña nakukala kudi kwejimaku. Ichi hichitiyañenu namuntu, bayi neyi kukana hohu kwila chumaku. Nsumbuli mukwaKristu welukaña nindi neyi wabulili kumukana nsumbuki mumaluwi, hadi kutwesha kushakama ninduku. Munjila yoyimu, hitunateli kudiluñisha chikupu nkisu jakwikala mbadi yachisaka chaYehova chakadi kukana kuhitila mukudihanaku. Hela chakwila hitwawaninaku, twadihanaña kudi Nzambi muloña twakeñaña kwikala antu jindi nikufuukulahu kwikala ashinshika kudi yena, hichidi namuloña nakukala kudi kwejimaku.—Mat. 22:37.

15. Indi kudihana kwamwekeshaña ñahi nawu tukweti chikuhwelelu?

¹⁵ Kudihana kudi Nzambi kwamwekeshaña nawu tukweti chikuhwelelu. Muloñadi? Kumukuhwelela Yehova kwatuleñelaña kukuhwelela netu kuswila kwakwihi naNzambi hichuma chachiwahi kudi etu. (Mas. 73:28) Tweluka netu hichapela kwenda naNzambuku, chineli twekala hakachi “kawantu amakonu aheña achinchika,” dichi twakuhwelela mukukana kwaNzambi kwakutukwasha. (Fwi. 2:15; 4:13) Tweluka netu hitwawaninaku, ilaña tweluka chikupu netu Yehova nateli kutwitiyila luwi neyi tunaluwañeshi. (Tañenu Masamu 103:13, 14; Aroma 7:21-25.) Tunakuhweleli netu Yehova wakatwinka wuloku neyi tutwalekahu kwikala ashinshika.—Yoba 27:5.

Kudihana Kudi Nzambi Kwaleñelaña Kwikala Amuzañalu

16, 17. Muloñadi kudihana kudi Yehova chikwaleñelaña kwikala amuzañalu?

¹⁶ Kudihana kudi Yehova kwaleñelaña kwikala amuzañalu muloña kwabombelamu kudihana etu aweni. Yesu washimwini mazu alema hahosheliyi nindi: “Chikweti kukooleka yowu kuhana, kutambula chakuminamu.” (Yil. 20:35) Yesu welukili muzañalu wekala mukuhana hampinji yazatileñayi mudimu windi hanu hamaseki. Hamuloña wakukeña kukwasha antu kuwana njila yaya kuwumi, mpinji jikwawu, Yesu hanookeleña hela kudyaku. (Yow. 4:34) Yesu watiyileña kuwaha hakumuzañalesha Tata yindi. Yesu wahosheli nindi: “Nelaña yuma yamutiyishaña kuwaha mafuku ejima.”—Yow. 8:29; Yish. 27:11.

¹⁷ Dichi, Yesu wayilejeli atumbanji twindi chihandilu chachiwahi hahosheliyi nindi: “Muntu nakeñi kunlondami, adibondi.” (Mat. 16:24) Kwila mwenimu, kwatuleñelaña kuswila  kwakwihi naYehova. Komana kwila tudihana kudi muntu wunateli kutwakamena chiwahi nehi?

18. Muloñadi kwila yuma kwesekeja nakudihana kwetu kudi Yehova chikwaletelaña muzañalu chikupu kubadika kudihana kuchuma chidi chejima hela kudi muntu?

¹⁸ Kudihana kudi Yehova nikwila yuma kwesekeja nakudihana kweniku kuhitila mukwila yuma yakeñañayi Yehova, kwaleñelaña kwikala amuzañalu kubadika kudihana kuchuma chidi chejima hela kudi muntu. Chakutalilahu, antu amavulu adihanaña nakufwila maheta akumujimba chakadi kwikala namuzañalu waweni. Ilaña, antu adihanaña kudi Yehova ekalaña namuzañalu wahaya nyaka. (Mat. 6:24) Hakwikala ‘akwakukalakala ambala aNzambi’ chayileñelaña kuzañalala, hela chochu, kudihana kwawu bayi neyi kwakuzata mudimuku, ilaña adihanaña kudi Nzambi wahamekaña. (1 Kor. 3:9) Kwosi muntu niwumu wunateli kuhameka chikupu kudihana kwawu kubadika chayihamekañayi Nzambi. Nzambi wamba kafuntisha antu indi ashinshika kuwukwenzi kulonda kuyakamena kudi Nzambi haya nyaka.—Yoba 33:25; tañenu Aheberu 6:10.

19. Kukoolekanyi kwadiluñishañawu antu adihana kudi Yehova?

¹⁹ Kuhana wumi wenu kudi Yehova kwayileñelaña kudikunda chikupu nayena. Bayibolu yahosha nawu: “Kundamenu kwakwihi naNzambi, niyena wukukundama kwakwihi nanenu.” (Yak. 4:8; Mas. 25:14) Muchibaaba chinahiñuhu, twakadiza muloña wutwatela kukuhwelela kutalisha hakufuukulahu kwikala antu jaYehova.

[Tumazu twaheshina]

Munateli Kwakula Nenudi?

• Indi kudihana kudi Nzambi chalumbulukadi?

• Indi kudihana kudi Nzambi kwatuheteshaña ñahi?

• Muloñadi akwaKristu chiyatela kudihaninawu kudi Nzambi?

[Malwihu aKuzatisha haKudiza]

[Mwevulu wudi hefu 6]

Kwila yuma kwesekeja nakudihana kwetu kwatuleñelaña kwikala amuzañalu haya nyaka