¿Tiquʼn kxel qqʼamaʼn te Jehová tuʼn qajbʼen te?

«Tuj qonikʼan mayʼ ma ten jun anjel wukʼile, saj samaʼn tuʼn Dios aju Dios atine tuj tkwent» (HECH. 27:23).

1. a)¿Tiʼ kbʼantel tuʼn jun xjal tuʼn tbautisarin? b)¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

 «¿O PE tzʼajtz tiʼj tanmiya, o txi tqʼamaʼna te Jehová qa taja tuʼn tbʼant tajbʼil tuʼna ex o tzʼok qeʼ tkʼuʼja tiʼj qa a Jesucristo o tzaj tqʼoʼn Dios tuʼn qklet?». Atzun jun kyxol qe kabʼe xjel in xi qanin kye qeju che bautisaril aj tkubʼaj chikʼbʼabʼil. ¿Tiquʼn nim toklen tuʼn t-xi tqʼamaʼn jun xjal tuʼn tajbʼen te Jehová? ¿Tiʼ tbʼanel in tzaj te qa ma bʼant jlu tuʼn? ¿Tiquʼn nim toklen tuʼn tbʼant jlu tuʼn tuʼntzun ttzalaj Dios tiʼj? Tuʼn tel qnikʼ kyiʼj xjel lu, tnejel nim toklen tuʼn tel qnikʼ tiʼj tiʼ t-xilen tuʼn t-xi qqʼamaʼn te Dios tuʼn qajbʼen te.

2. ¿Tiʼ t-xilen tuʼn t-xi qqʼamaʼn te Jehová tuʼn qajbʼen te?

² ¿Tiʼ t-xilen tuʼn t-xi qqʼamaʼn te Jehová tuʼn qajbʼen te? Jun tiʼ jaku tzʼonin qiʼj tuʼn tel qnikʼ tiʼj tzaqʼwebʼil lu, aju tqʼama Pablo tej chʼixtoq t-xi mulqʼaj bark toj aʼ. Tqʼama jlu tiʼj Jehová: «Aju Dios atine tuj tkwent», tuʼn jlu kubʼ tyekʼin qa otoq tzʼok te tetzbʼil Jehová (kjawil uʼjit Hechos 27:22-24). O che ok qe axix tok okslal te tetzbʼil Jehová, atzun kye xjal mintiʼ in che ajbʼen te ateʼ «tjaqʼ tipumal tajaw il» (1 Juan 5:19). ¿Tiʼ o bʼant kyuʼn tuʼntzun kyok te tetzbʼil Jehová? O txi kytziyen te toj jun naʼj Dios tuʼn kyajbʼen te ex o che bautisarin.

3. ¿Tiʼ kubʼ techlaʼn tbautismo Jesús ex tzeʼn in nel kykanoʼn axix tok okslal tiʼj?

³ Kyaj tqʼoʼn Jesús jun tbʼanel techel qwitz toj qʼij tej tbautisarin ex tej tkubʼ tyekʼin qa tajtoq tuʼn tbʼant tajbʼil Jehová tuʼn. Tuʼnju atz ul itzʼj Jesús toj tnam Israel, jun tnam etzan tuʼn Dios, ya mintiʼtoq tuʼn t-xi tqʼamaʼn juntl maj te Jehová tuʼn tajbʼen te. Mintiʼ bʼant jlu tuʼn noq tuʼnju in tzaj qʼamaʼn toj Ley, sino in tzaj tqʼamaʼn Tyol Dios qa xi tqʼamaʼn jlu te Jehová: «Lu qine lu Dios, ma chin ule bʼinchalte ju tajbʼila» (Heb. 10:7; Luc. 3:21). Tej tbautisarin Jesús kubʼ tyekʼin qa taj tuʼn tbʼant tajbʼil ttat tuʼn. Toj ambʼil jaʼlo, in che ok lepeʼ okslal axix tok tiʼj techel kyaj tqʼoʼn Jesús aj kybautisarin. Noqtzun tuʼnj, in kubʼ kyyekʼin kywitz txqantl qa o txi kyqʼamaʼn te Jehová toj jun naʼj Dios tuʼn kyajbʼen te.

Qe kʼiwlabʼil in che tzaj qkʼamoʼn qa ma txi qqʼamaʼn te Jehová tuʼn qajbʼen te

4. ¿Tiʼ xnaqʼtzbʼil in nel qiʼn tiʼj tbʼanel tamiwbʼil David ex Jonatán?

⁴ Aj t-xi qqʼamaʼn te Jehová qa qaj tuʼn qajbʼen te, bʼaʼn tuʼn ttzaj qnaʼn qa nya jun saqchbʼil jlu tuʼnju nim toklen. ¿Pero alkyeqe kʼiwlabʼil in che tzaj qkʼamoʼn? Tuʼn tel qnikʼ tiʼj jlu, qo ximen tiʼj jun tziybʼil in kyaj bʼant tiʼj tuʼn jun xjal tukʼil juntl. Tnejel qo yolin tiʼj tamiwbʼil jun xjal. Tuʼn kyten qamiw, il tiʼj tuʼn qok te jun tbʼanel amiw, nim toklen tuʼn tjapun twi qyol ex tuʼn qxqʼuqin tiʼj juntl xjal. In tzaj tqʼamaʼn Tyol Dios qa ten jun tbʼanel tamiwbʼil David ex Jonatán tuʼnju bʼaj kyonin kyibʼ ex kyaj bʼant tiʼj jun kyyol (kjawil uʼjit 1 Samuel 17:57 ex 18:1, 3). Toj ambʼil jaʼlo, mintiʼ in ten jun tbʼanel kyamiwbʼil xjal ik tzeʼn jlu. Noqtzun tuʼnj, kukx in nok tilil kyuʼn tbʼanel amiw tuʼn tjapun twi kyyol ex tuʼn tbʼaj kyonin kyibʼ (Pro. 17:17; 18:24).

5. ¿Tiʼtoq tuʼn tbʼant tuʼn jun majen tuʼn kukx tten toj tkwent jun tbʼanel patrón?

⁵ Toj ojtxe tnam Israel iltoq tiʼj tuʼn tjapun twi tyol jun majen xi ttziyen te tpatrón. Tqʼama Ley jlu: «Qatzun ma tma majen kyjaʼ: At nkʼujlalile tiʼj npatrone, tiʼj nxuʼjile ex kyiʼj qe nkʼwaʼle, mlay chin exe qa chi, kxeʼltzun qʼiʼn majen tuʼn tpatrón kywitz jwes, ex kpol tiʼn ttzi tlamel tja ex qa tiʼj tqan tja. Atzun kʼelex tqʼoʼn toyʼ t-ẍkyin majen tuʼn jun tal kʼuxbʼil tzʼuʼp twiʼ, ex kʼokeltzun te tmajen te jumajx» (Éxo. 21:5, 6). In tzaj tyekʼin texto lu, qa matoq kyaj bʼant tiʼj jun tyol majen tukʼil patrón, jakutoq tzʼajbʼen te te jumajx.

6, 7. a)¿Tiʼ tbʼanel in tzaj qe qa ma japun twi qyol? b)¿Tiʼ jaku txi qqʼamaʼn tiʼj qamiwbʼil tukʼil Jehová ex tiʼjju qyol in xi qtziyen te?

⁶ Ax ikx il tiʼj tuʼn tjapun twi kyyol kabʼe xjal o che kubʼ mojeʼ. Tej tkyaj bʼant tiʼj jun kyyol, atz kyaj bʼant tiʼj tukʼil tchmil moqa tukʼil t-xuʼjil ex nya noq oʼkx twitz jun uʼj. Qa mintiʼ ma kubʼ mojeʼ jun xjal, mlay bʼant tuʼn t-xqʼuqin tiʼj tukʼil ex kyiʼj tkʼwal ik tzeʼn in bʼant kyuʼn qeju o che kubʼ mojeʼ. Ax ikx, mlay tzʼok tilil kyuʼn tuʼn tjapun kyoklen ex tuʼn t-xi kybʼinchaʼn kyiʼj nya bʼaʼn tukʼil kʼujlabʼil, ik tzeʼn in bʼant kyuʼn qeju o che kubʼ mojeʼ (Mat. 19:5, 6; 1 Cor. 13:7, 8; Heb. 13:4).

⁷ Te mankbʼil, qo yolin tiʼj aj t-xi ttziyen tyol jun xjal tiʼj jun aqʼuntl. Atxix toj ambʼil ojtxe, o kubʼ kyfirmarin xjal qe uʼj at kyoklen kyukʼil aqʼuntl (Mat. 20:1, 2, 8). Ax ikx toj ambʼil jaʼlo, in nonin qiʼj aj tkubʼ qfirmarin jun uʼj naʼmxtoq t-xi tzyet tuʼn qaqʼunan tukʼil jun xjal moqa naʼmxtoq t-xi tzyet tuʼn tten jun qnegocio. Ik tzeʼn ma tzʼel qnikʼ tiʼj, aj tkyaj bʼant tiʼj kyyol kabʼe xjal, in nonin tiʼj kyamiwbʼil, tiʼj kymejebʼleʼn ex kyiʼj tiʼchaq at toklen kyukʼil kʼaẍjel. Ax ikx, ktel jun tbʼanel qamiwbʼil tukʼil Jehová ex tzul qkʼamoʼn nim kʼiwlabʼil qa ma txi qtziyen tuʼn qajbʼen te te jumajx. Tuʼntzunju, qo xnaqʼtzan kyiʼj junjun kʼiwlabʼil tzaj kykʼamoʼn qeju xi kytziyen tuʼn kyajbʼen te Jehová toj ambʼil ojtxe ex kʼelel qnikʼ tiʼj tiquʼn mas nim toklen jlu twitz alkyexku tziybʼil.

Tzaj kykʼamoʼn aj Israel kʼiwlabʼil tej t-xi kytziyen tuʼn kyajbʼen te Jehová

8. ¿Tiʼ t-xilen tziybʼil xi kyqʼamaʼn aj Israel te Jehová?

⁸ Ok kychmon kyibʼ aj Israel tej t-xi kytziyen jun kyyol te Jehová. E ok tchmoʼn Jehová twi witz Sinaí ex xi tqʼamaʼn jlu kye: «Qa ma chinx kynimane tuj tkyaqil, ex qa ma japun kyuʼne aju yol kyaj bʼant tiʼj wuʼne kyukʼile, che okeltzune te jun kʼloj xjal etzan wuʼne kyxol kykyaqil nasyon». Xitzun kytzaqʼweʼn kykyaqil xjal junx: «Tkyaqilju ma tma Qman kbʼantel quʼne» (Éxo. 19:4-8) Aju yol xi kytziyen, mas nim toklen twitz jun compromis. ¿Tiquʼn? Tuʼnju ok jlu te jun techel qa otoq txi kyqʼoʼn kychwinqlal te Jehová. Tuʼntzunju, tqʼama Jehová jlu kye: «Che okeltzune te jun kʼloj xjal etzan wu’ne».

9. ¿Alkyeqe kʼiwlabʼil xi kykʼamoʼn aj Israel tuʼnju xi kytziyen tuʼn kyajbʼen te Jehová?

⁹ Tzaj kykʼamoʼn aj Israel nim kʼiwlabʼil tej t-xi kytziyen tuʼn kyajbʼen te. Ten Jehová tzʼaqli kyukʼil, kubʼ tyekʼin tkʼujlabʼil kyiʼj ex e ok ik tzeʼn qe tkʼwal. Axpe ikx xi tqʼamaʼn jlu kye: «¿Jakupe tzikʼ tnaʼl tuʼn jun txuybʼaj tuʼn miʼn tkʼujlante tal? Bʼalo jaku tzikʼ tnaʼl tuʼn, atzun weye, mlay tzikʼ kynaʼle wuʼne» (Isa. 49:15). Xi tyekʼin Jehová kybʼe tmajen tej t-xi tqʼoʼn Ley kye, xi tqʼuqbʼaʼn kykʼuʼj tej kyajbʼen profeta tuʼn ex e ok t-xqʼuqin kyukʼil anjel. Tqʼama salmista jlu tiʼj Jehová: «Xi tchikʼbʼaʼn tyol kye tiyjil Jacob, aqeju aj Israel, kyukʼix qe tley ex qe t-xnaqʼtzbʼil. Mintiʼ tbʼincha ikju kyiʼj txqantl nasyon» (Sal. 147:19, 20; kjawil uʼjit Salmo 34:7, 19 ex 48:14). Ik tzeʼn bʼant tuʼn Jehová toj ojtxe tnam Israel, ax ikx toj ambʼil jaʼlo in xqʼuqin kyiʼj tmajen o txi kytziyen tuʼn kyajbʼen te.

¿Tiquʼn nim toklen tuʼn t-xi qqʼamaʼn te Dios tuʼn qajbʼen te?

10, 11. ¿Tiquʼn mintiʼ qoklen kyxol toj tja Jehová aj qul itzʼj?

¹⁰ Ateʼ junjun in kyqʼamaʼn: «¿Tiquʼn il tiʼj tuʼn t-xi nqʼamaʼne te Jehová tuʼn wajbʼene te ex tuʼn nbautisarine?». Kʼelel qnikʼ tiʼj tiquʼn nim toklen tuʼn tbʼant quʼn qa ma tzaj qnaʼn tzeʼn atoʼ twitz Jehová toj ambʼil jaʼlo. Tuʼnju kubʼ tbʼinchaʼn Adán il, nya atoʼ kyxol toj tja Jehová (Rom. 3:23; 5:12). Tuʼntzunju, tuʼn qten kyxol toj tja, nim toklen tuʼn t-xi qqʼamaʼn te tuʼn qajbʼen te. Qo xnaqʼtzan tiʼj tiquʼn.

¹¹ Ni jun mambʼaj jaku tzaj qʼonte qchwinqlal tzʼaqli (1 Tim. 6:19). Tuʼnju kubʼ kybʼinchaʼn tnejel qtat il, in qo ul itzʼj najchaq tiʼj tbʼanel Qtat aju Bʼinchal qe, ex tuʼn jlu mlay qo ok qʼoʼn ik tzeʼn qe tkʼwal (mojbʼankuya tukʼil Deuteronomio 32:5). Atxix toj ambʼil aju, mintiʼ kyoklen xjal kyxol toj tja Jehová ex najchaq ateʼ tiʼj.

12. a)¿Tzeʼn jaku qo ten kyxol toj tja Jehová maske aj il qoʼ? b)¿Tiʼ il tiʼj tuʼn tbʼant quʼn naʼmxtoq qbautisarin?

¹² Maske ikju, teyele junjun qe jaku txi tqanin te Jehová tuʼn ttzaj tqʼoʼn ambʼil qe tuʼn qten kyxol toj tja. * Tuʼnju aj il xjal qoʼ, ¿tzeʼn jaku tzaj tqʼoʼn ambʼil qe tuʼn qten kyxol toj tja? Tqʼama apóstol Pablo jlu: «Ma bʼant qten tukʼil Dios tuʼnju tkyimlen Tkʼwaʼl tej aj qʼojtoq qoʼ tiʼj» (Rom. 5:10). Noqtzun tuʼnj, tuʼn qxi tkʼamoʼn Jehová, nim toklen tuʼn qanqʼin toj tumelxix, ex jaku bʼant jlu quʼn qa ma qo bautisarin (1 Ped. 3:21). Ax ikx, il tiʼj tuʼn tbʼant junjuntl tiʼchaq quʼn naʼmxtoq qbautisarin. Nim toklen tuʼn tok qojtzqiʼn Jehová, tuʼn tok qeʼ qkʼuʼj tiʼj, tuʼn tajtz tiʼj qanmi ex tuʼn tbʼaj qchʼexpuʼn qanqʼibʼil (Juan 17:3; Hech. 3:19; Heb. 11:6). ¿Ti kbʼantel quʼn yajxitl?

13. ¿Tiquʼn nim toklen tuʼn t-xi qtziyen te Jehová tuʼn qajbʼen te tuʼntzun qten kyxol toj tja?

¹³ Tuʼn qten kyxol toj tja Jehová, nim toklen tuʼn t-xi qtziyen jun qyol te. ¿Tiquʼn? Qqʼonku jun techel. Qo ximen tiʼj jun tbʼanel tatbʼaj aju in nok qʼoʼn toklen kyuʼn xjal ex ojtzqiʼn jun qʼa tuʼn aju mintiʼ ttat, in nok tkʼujlaʼn ex in kubʼ t-ximen tuʼn tok ik tzeʼn Tkʼwal. Pero in xi tqʼamaʼn tatbʼaj tuʼn tbʼant jun tiʼ tuʼn qʼa: «Waje tuʼn wok tqʼoʼna ik tzeʼn tmana, tuʼn tok tkʼujlaʼna qine ex tuʼn tok tqʼoʼna woklene te jumajx». Qa mintiʼ ma txi ttziyen qʼa tuʼn tbʼant jlu tuʼn, mlay txi tkʼamoʼn ik tzeʼn tkʼwal. Ax jlu in bʼaj tukʼil Jehová, oʼkx qeju in xi kytziyen tuʼn kyajbʼen te, jaku che ten kyxol toj tja. Atzun jlu in tzaj tqʼamaʼn Biblia: «Kyjaʼtzun chin kubʼsale kywitze tuʼn t-xi kyqʼoʼne kyximlale te Dios ik tzaʼn jun oyaj itzʼ, tekuxix Dios ex bʼaʼn nneʼla tuj twitz, atzun kykʼulbʼile axix tok twitz Dios» (Rom. 12:1).

Jun yekʼbʼil tiʼj qkʼujlabʼil ex qʼuqbʼil qkʼuʼj

14. ¿Alkye tten in kubʼ qyekʼin qkʼujlabʼil tiʼj Jehová aj t-xi qqʼamaʼn tuʼn qajbʼen te?

¹⁴ Aj t-xi qqʼamaʼn te Jehová tuʼn qajbʼen te, in kubʼ qyekʼin qa kʼujlaʼn quʼn. Chʼixme ik tten jlu ik tzeʼn aj t-xi kytziyen kabʼe xjal kyyol tuʼn kykubʼ mojeʼ. Aj tpon qʼij tuʼn tkubʼ mojeʼ jun okslal, in xi ttziyen ermano te ermana qa ktel tukʼil kyoj tbʼanel ambʼil ex kyoj ambʼil kwest. Nya oʼkx in xi tqʼamaʼn te tuʼn tkubʼ mojeʼ tukʼil, sino in xi ttziyen te qa ktel tukʼil te jumajx. Ax ikx, ojtzqiʼn kyuʼn qa oʼkx jaku che anqʼin junx qa ma che casarin. Chʼixme ik tzeʼn jlu, qa mintiʼ ma txi qtziyen te Jehová tuʼn qajbʼen te, mlay qo tzalaj kyiʼj kykyaqil kʼiwlabʼil in tzaj kykʼamoʼn toj tja. Tuʼntzunju, maske aj il xjal qoʼ, in xi qqʼamaʼn te Jehová tuʼn qajbʼen te tuʼnju qaj tuʼn t-xi qqʼoʼn qchwinqlal te ex tuʼnju qaj tuʼn kukx qten tzʼaqli twitz maske qo okel weʼ twitz nya bʼaʼn (Mat. 22:37).

15. ¿Alkye tten in kubʼ qyekʼin qʼuqbʼil qkʼuʼj tiʼj Jehová aj t-xi qqʼamaʼn tuʼn qajbʼen te?

¹⁵ In kubʼ qyekʼin qʼuqbʼil qkʼuʼj aj t-xi qqʼamaʼn te Jehová tuʼn qajbʼen te. ¿Tiquʼn? Tuʼnju in nonin qʼuqbʼil qkʼuʼj qiʼj tuʼn tel qnikʼ tiʼj qa aju qamiwbʼil tukʼil Jehová atzun mas tbʼanelju (Sal. 73:28). Ojtzqiʼn quʼn qa kwest tuʼn qajbʼen te tuʼnju in qo anqʼin «kyxol qe xjal mya bʼaʼn». Pero qʼuqli qkʼuʼj tiʼj qa qo tzajel tkʼiwlaʼn Jehová qa ma tzʼok tilil quʼn tuʼn qajbʼen te (Fili. 2:15; 4:13, TNM). Ax ikx, bʼaʼn tuʼn ttzaj qnaʼn qa ktzajel qʼaqʼin tkʼuʼj Dios qiʼj aj qel txalpaj tuʼnju aj il qoʼ (kjawil uʼjit Salmo 103:13, 14 ex Romanos 7:21-25). Ex qʼuqli qkʼuʼj tiʼj qa ok qo tzajel tkʼiwlaʼn Jehová qa ma tzʼok tilil quʼn tuʼn qten tzʼaqli twitz (Job 27:5).

Jaku qo tzalaj qa ma txi qqʼamaʼn te Jehová tuʼn qajbʼen te

16, 17. ¿Tiquʼn nimxix in qo tzalaj aj t-xi qqʼamaʼn te Jehová tuʼn qajbʼen te?

¹⁶ Nimxix in qo tzalaj aj t-xi qqʼamaʼn te Jehová tuʼn qajbʼen tuʼnju in xi qqʼoʼn qchwinqlal te, ex ik tzeʼn tqʼama Jesús: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hech. 20:35). Nimxix tzalaj Jesús tej tpakbʼan tzalu twitz Txʼotxʼ tuʼnju onin kyiʼj txqantl. At maj mintiʼ ojlan Jesús, mintiʼ waʼn ex mintiʼ xi tbʼinchaʼn junjuntl tiʼchaq tgan, sino onin kyiʼj xjal tuʼn tel kynikʼ tiʼj bʼe te chwinqlal (Juan 4:34). Ex kukx ok tilil tuʼn Jesús tuʼn ttzalaj Jehová tuʼn. Tuʼntzunju tqʼama jlu: «Kukx in nbʼinchaʼne aju bʼaʼn nneʼla tuj twitz» (Juan 8:29; Pro. 27:11).

¹⁷ Xi t-xnaqʼtzaʼn Jesús kye t-xnaqʼtzbʼen tzeʼn jakutoq che tzalaj toj kyanqʼibʼil, tej tqʼama jlu: «Qa at jun xjal taj tuʼn tok lpeʼ wiʼje, xkʼayink tibʼ teju tex tajbʼil» (Mat. 16:24). Qa mintiʼ ma txi qbʼinchan qex qajbʼil, in nonin qiʼj tuʼn qok laqʼeʼ mas ttxlaj Jehová, aju Dios at tkʼujlabʼil. ¿Atpe juntl jaku xqʼuqin qiʼj tukʼil kʼujlabʼil?

18. ¿Tiquʼn mas jaku qo tzalaj qa ma txi qqʼamaʼn te Jehová tuʼn qajbʼen te twitzju tuʼn qajbʼen te jun xjal moqa tuʼn qjyoʼn kyiʼj tiʼchaq?

¹⁸ Mintiʼ in che tzalaj xjal tuʼnju in che ajbʼen te juntl ex in nok tilil kyuʼn tuʼn kyjoʼn tiʼj kyqʼinumabʼil. Atzun qe, in qo tzalaj aj t-xi qqʼamaʼn te Jehová tuʼn qajbʼen te ex tuʼn qanqʼin ik tzeʼn taj (Mat. 6:24). Ax tok, in qo tzalaj tuʼnju in qo onin tiʼj Jehová tuʼn tbʼant tajbʼil, pero bʼaʼn tuʼn ttzaj qnaʼn qa o txi qqʼamaʼn te tuʼn qajbʼen te ex nya te jun aqʼuntl (1 Cor. 3:9). Oʼkx Jehová jaku tzʼok qʼonte toklen tkyaqilju aqʼuntl in bʼant quʼn toj qajbʼebʼil te. Ax ikx, che okel juntl maj tmajen te kuʼxun ex kxqʼuqil kyiʼj te jumajx (Job 33:25; kjawil uʼjit Hebreos 6:10).

19. ¿Tiʼ tbʼanel in tzaj kye qeju in xi kyqʼamaʼn te Jehová tuʼn kyajbʼen te?

¹⁹ In tzaj tqʼamaʼn Tyol Dios jlu: «Che laqʼexe ttxlaj Dios, ax ikx te ktzajel laqʼeʼ kyukʼile» (Sant. 4:8; Sal. 25:14). Tuʼntzunju, qa ma txi qqʼamaʼn te Jehová tuʼn qajbʼen te, ktel jun tbʼanelxix qamiwbʼil tukʼil. Toj juntl xnaqʼtzbʼil, kʼelel qnikʼ tiʼj tiquʼn jaku txi qqʼamaʼn te Jehová tuʼn tkyaqil qkʼuʼj tuʼn qajbʼen te tuʼntzun qok te tekuxix.

[Tqanil]

¿Tiʼ teya jaku tzaj ttzaqʼweʼn?

• ¿Tiʼ t-xilen tuʼn t-xi qqʼamaʼn te Jehová tuʼn qajbʼen te?

• ¿Tiʼ kʼiwlabʼil jaku tzaj qkʼamoʼn qa ma txi qqʼamaʼn te Jehová tuʼn qajbʼen te?

• ¿Tiquʼn il tiʼj tuʼn t-xi kyqʼamaʼn axix tok okslal tuʼn kyajbʼen te Jehová?

[A’yeju xjel ti’j xnaq’tzb’il]

[Tilbʼilal]

Axix tok jaku qo tzalaj qa kukx ma qo ajbʼen te Jehová.