Etke Kwoj Aikwij Wujleplok Mour eo Am ñõn Jeova?

“Bwe ilo boñ e jutõk na iba juõn enjel in Anij, Eo ña An, im Eo ij jerbal ñõn E.”​—JERB. 27:23.

1. Ta buñten ne ko ro repojõk in baptais rar bõki, im ta kajitõk ko men in ej bõkmantak?

 “KIN am tõmak ilo katok eo an Jisõs Kraist, emwij ke am ukwelok jen jerawiwi ko am im wujleplok mour eo am ñõn Jeova ñõn kõmõnmõn ankilan?” Eñin ej juõn ian kajitõk ko ruo me ro rej pojõk in baptais rej uaki ilo jemlokõn katak eo ñõn ro rej baptais. Etke jabrewõt eo ekõnan erom juõn ian Dri Kennan ro an Jeova ej aikwij wujleplok e mõke ñõn Jeova? Ewi wãwen jej bõk tokjen jen ar wujleplok kij mõke ñõn Jeova? Etke juõn ejjab maroñ korijer ñõn Anij ilo juõn wãwen Ej buñburuen kake elañe ear jab wujleplok e mõke ñõn E? Bwe jen maroñ melele kin uak ko ñõn kajitõk kein, jej aikwij mokta etale ta in wujleplok.

2. Ta melelen ñe juõn ej wujleplok mour eo an ñõn Jeova?

² Ta melelen ñe juõn ej wujleplok e mõke ñõn Anij? Jen lale wãwen eo dri jilik Paul ear kwalok kin kõtan eo an iben Anij. Ke ear jutõk iman elõñ ro jet me rar ber ion tima eo epojõk in jorran, ear ãñiñin Jeova einwõt Anij ‘Eo ña An.’ (Riit Jerbal 27:22-​24.) Aolep dri Kristian ro remol rej armij ro an Jeova. Ilo okõtõn men in, aolepen lõl ej “berwõt ilo dri nana eo.” (1 Jon 5:​19) Dri Kristian ro rej erom armij ro an Anij ñe rej wujleplok ir mõke ñõn e ikijen jar. Wujleplok in ej juõn kalimur me armij eo mõke ej kõmõne, im ej kalikare ikijen an baptais ilo dren.

3. Ta eo baptais eo an Jisõs ear kõkkar kake, im ewi wãwen ro rej lor e remaroñ kajeoñwe joñok eo an?

³ Jisõs ear likit juõn joñok emõn ñõn kij ke ear mõke kãlet ñõn an kõmõnmõn ankilan Anij. Kinke Jisõs ear lotaktok im mõtõn ailiñ in Israel eo me kar aje ñõn Jeova, men in ear melelen bwe ererelok an kar wujleplok e ñõn Anij. Meñe eindrein, ilo ien baptais eo an, ear kõmõne juõn men me ilo Kien eo, ear jab aikwij in kõmõne. Nan eo an Anij ej kwalok ta eo ear ba: “Lo emwij Aõ itok . . . bwe In kõmõnmõn ankil Am, O Anij.” (Hib. 10:7; Luk 3:​21) Inem baptais eo an Jisõs ear kõkkar kin an lelok e  mõke ñõn Anij ñõn an kõmõnmõn ankilan Jemen. Ro rej lor e rej kajeoñwe joñok in an ñe rej lelok ir mõke ilo air baptais. Bõtab, ikijen ir, baptais ilo dren ej wãwen eo rej kalikar ñõn aolep bwe emwij air wujleplok mour eo air ñõn Anij ilo jar.

Wãwen Jej Bõk Tokjen jen Ar Wujleplok Ar Mour

4. Ta eo jimjera eo an Devid im Jonetan ej katakin kij kake kin jimjera ko?

⁴ Wujleplok eo ar ñõn Anij einwõt dri Kristian ro ej juõn men elukkun aurõk im elaplok jen baj juõn kalimur. Ak ewi wãwen jej bõk tokjen jen ar wujleplok mour eo ar? Jen keiri im lale ewi wãwen juõn kalimur ikõtan armij ro emaroñ bõktok tokjen ko. Juõn wanjoñok ej ikijen jimjera eo ikõtan ruo armij. Bwe en or juõn mõtõm, kwoj aikwij mõnõnõ in bõk erro ko me juõn jeran ej aikwij kõmõni ñõn eo mõtõn, im men in ej kitibuj am kwalok am kea kake e. Juõn ian jimjera ko remõntata me Baibel eo ej kwalok kake ej jimjera eo ikõtan Devid im Jonetan. Joñõn airro kar ebake dron, rar kõmõn juõn bujen jimjera ikõtan dron. (Riit 1 Samuel 17:57; 18:​1, 3.) Meñe ejeja an or jimjera rõt in, enañin aolep jimjera ko rej kajurlok ñe ro rej mõtaik dron rej bõk erro eo ñõn kea kake dron.​—Ken. 17:17; 18:24.

5. Ewi wãwen juõn dri korijer emaroñ bõk tokjen ilo an berwõt iben karo eo an emõn?

⁵ Ilo Kien eo me Anij ear lelok ñõn Israel ej kwalok kin bar juõn kõtan me armij ro rej bõk tokjen jene ikijen air kõmõn juõn kalimur. Elañe juõn dri korijer ear kõnan berwõt iomin pein karo eo an emõn, emaroñ kõmõn juõn karõk iben ñõn berwõt im jerbal ñõn e. Kien eo ej ba: “Elañe korijer eo ej ba alikar, Ij yokwe karo eo aõ, im lio beliõ, im ro neijiõ; I jamin drioijlok anemkwojaõ: inem karo eo an e naj ãñinlok e ñõn Anij, im e naj ãñinlok e ñõn aur ak ñõn jurõn aur eo; im karo eo an e naj ili lojiliñin kin juõn ken wie; im e naj korijer ñõn e in drio.”​—Ex. 21:​5, 6.

6, 7. (a) Ewi wãwen armij rej bõk tokjen jen air kõmõn juõn kalimur ak karõk? (b) Ta eo men in ej kalikar kin kõtan eo ar iben Jeova?

⁶ Mour in mare ej juõn kõtan elukkun aurõk me ej aikwij an ruo armij kõmõn juõn kalimur ñõn dron. Ej juõn kalimur kwoj kõmõne ñõn juõn armij, im jab juõn kalimur ñõn kajejit erro ko ilo juõn kon. Ñe ruo armij rej jokwe iben dron ak rejañin mare, irro im ajiri ro nejiir rejamin lo ainemõn im jokõne. Ak ro rej lukluk iben dron ilo juõn mour in mare ekwojarjar, eor juõn un ej berber ion Baibel eo ñõn air kate ir kamarmire abañ ko air ilo yokwe.​—Matu 19:​5, 6; 1 Kor. 13:​7, 8; Hib. 13:4.

⁷ Ilo ien ko an Baibel, armij ro rar bõk tokjen jen karõk ko rar kõmõni ilo business ko ak ilo jikin jerbal ko air. (Matu 20:​1, 2, 8) Ej eindreinlok wõt ilo ran kein. Ñõn wanjoñok, jenaj bõk tokjen ko ñe emwij ar kõmõn juõn kon ilo ar signi juõn peba mokta jen ar jino juõn business ak jerbal. Kin men in, elañe kalimur ak karõk ko rej kakajurlok kõtan ko einwõt jimjera ko, mour in belele, im ilo jikin jerbal ko, ejelok berre enaj laplok tokjen ko kwoj bõki ñe kwoj wujleplok mour eo am ñõn Jeova! Jen lale kiõ ewi wãwen armij ro ilo ien ko etto rar bõk tokjen jen air wujleplok air mour ñõn Jeova Anij im ewi wãwen men in ear jab baj juõn kalimur wõt.

Wãwen an Kar Dri Israel ro Bõk Tokjen jen Air Wujleplok Ir ñõn Anij

8. Wujleplok eo an dri Israel ro ñõn Anij ear melelen ta ñõn ir?

⁸ Ailiñ in Israel ear erom juõn ailiñ emwij ajeloke ñõn Jeova ke rar kõmõn juõn kalimur ak kon iben Anij. Jeova ear kokweloktok ir iturin Tol Sainai, im ear ba ñõn ir: “Elañe komij eoroñ ainikiõ im kejbãrok bujen eo Aõ, inem kom naj Aõ mweiuk e aurõk, jen ailiñ ko otemjej.” Im aolep armij ro rar uak im ba: “Men otemjej Jeova e ar konono, kim naj kõmõni.” (Ex. 19:​4-8) Ñõn dri Israel ro, wujleplok ear laplok melelen jen baj juõn kalimur ñõn kõmõne juõn men. Ear melelen bwe rar erom armij  ro an Jeova, im Jeova ear watõk ir einwõt ‘mweiuk eo an eaurõk.’

9. Ewi wãwen dri Israel ro rar bõk tokjen jen air kar ajelok ir mõke ñõn Anij?

⁹ Dri Israel ro rar bõk tokjen ko jen air erom armij ro an Jeova. Ear tiljek ñõn ir im kejbãrok ir einwõt juõn jemen me ej kejbãrok ajiri eo nejin. Anij ear ba ñõn dri Israel ro: “Juõn kõra e maroñ meloklok niñniñ eo an bwe en jab tiriamo kake ladrik e nejin lojen ke? Aet rein re maroñ in meloklok, a I jamin meloklok yuk.” (Ais. 49:15) Jeova ear lelok ñõn ir Kien eo bwe en tel ir, nan in rejañ ko jen dri kanan ro, im enjel ro bwe ren kejbãrok ir. Juõn dri jeje sam ear je: “Ej kwalok An in nan ñõn Jekõb, kien ko An im ekajet ko An ñõn Israel. E ar jab kõmõn einwõt ñõn jabrewõt ailiñ.” (Sam 147:19, 20; riit Sam Ko 34:​7, 19; 48:14.) Einwõt an kar Jeova kejbãrok armij ro an ilo ien ko etto, eindrein enaj kejbãrok ro me rej wujleplok ir mõke ñõn e ranin.

Etke Jej Aikwij Wujleplok Kij Mõke ñõn Anij

10, 11. Jar ke lotaktok im uan baamle eo an Anij ilõñ im ilõl? Kemelele.

¹⁰ Ñe rej kalomõnlokjen kin elañe renaj wujleplok air mour im baptais, jet remaroñ lemnok, ‘Etke ijjab maroñ kabuñ ñõn Anij ilo juõn wãwen ej buñburuen kake elañe ijjab wujleplok aõ mour ñõn e?’ Un eo ej jino alikarlok ñe jej etale ia eo jej jutõk ie iman mejen Anij kiõ. Kememej, kin jerawiwi eo an Adam, kij aolep jar jab lotaktok im uan baamle eo an Anij. (Rom 3:​23; 5:12) Ar wujleplok kij mõke ñõn Anij ej juõn menin aikwij elukkun aurõk ñõn ar maroñ erom ro uan baamle eo an ilõñ im ilõl. Jen lale etke.

¹¹ Ejelok juõn jemen emaroñ letok ñõn kij juõn mour ewãppen, einwõt Anij ear karõk kake. (1 Tim. 6:​19) Jar jab lotaktok einwõt ro nejin Anij kinke ke armij ro ruo moktata rar jerawiwi, armij otemjej rar jenolok jen Jemeir eo elap an yokwe im ej dri Kõmõnmõn eo. (Keiri Duteronomi 32:5.) Jen ien eo mantak, armij ro ion lõl rar jab uan baamle eo an Jeova kinke rar jenolok jen E.

12. (a) Ewi wãwen armij ro rejjab wãppen remaroñ erom uan baamle eo an Anij? (b) Ta buñten ne ko jej aikwij kõmõni mokta jen ar baptais?

¹² Meñe eindrein, kij kajjojo jemaroñ kajitõk iben Anij ñõn an bõk kij bwe jen uan baamle in dri korijer ro an me ej buñburuen kake ir. * Ak ewi wãwen emaroñ eindrein ke jej armij dri jerawiwi? Dri jilik Paul ear je: “Ke j’ar dri kijirãt, mij an Nejin e ar kilajrõk ñõn kij im Anij.” (Rom 5:​10) Ilo ien ar baptais jej kajitõk iben Anij kin juõn bõklikõt emõn bwe en maroñ buñburuen kake kij. (1 Pit. 3:​21) Bõtab, mokta jen ar baptais, eor buñten ne ko jej aikwij kõmõni. Jej aikwij jela kajen Anij, katak ñõn liki e, ukwelok, im kõmõn oktõk ko ilo wãwen mour eo ar. (Jon 17:3; Jerb. 3:​19; Hib. 11:6) Im eor bar juõn men jej aikwij kõmõne mokta jen ar maroñ uan baamle eo an Anij. Ta in?

13. Etke ej juõn men ejejit im ekkar ñõn an juõn wujleplok e mõke ñõn Anij bwe en maroñ erom juõn dri korijeran me ej buñburuen kake?

¹³ Mokta jen an juõn armij maroñ erom uan baamle in dri korijer ro an Anij, ej aikwij mokta kõmõn juõn kalimur jen buruen ñõn Jeova. Ñõn melele etke jej aikwij kõmõne men in, lemnok kin juõn jemen me armij ro rej koutiej e, eo ej kwalok an itoklimo kin juõn ajiri atajinemjen im ekõnan kakajiririik e einwõt juõn uan baamle eo an. Meñe elõñ rej watõk e einwõt juõn eman emõn, ak mokta jen an kakajiririik jodrikdrik eo einwõt nejin, eman eo enaj kõnan bwe ladrik eo en kõmõn juõn kalimur. Inem eman eo ej ba, “Mokta jen aõ bõk kwe einwõt juõn nejiõ, ij aikwij jela elañe kwonaj yokwe im koutiej iõ einwõt juõn jemõm.” Elañe jodrikdrik eo ej mõnõnõ in kõmõne kalimur in, eman eo enaj kadreloñ e ilo baamle eo an. Men in ejjab ke juõn men ejejit im ekkar  ñõn an kõmõne? Eindrein, ro wõt im Jeova ej mõnõnõ in bõk ir bwe ren uan baamle eo an, ej ro im rekõnan wujleplok ir mõke ñõn e. Baibel eo ej ba: “Komin lelok enbwinemi men in jurtak emour, ekwojarjar, men in kabuñburuen Anij.”​—Rom 12:1.

Wujleplok Ej Juõn Wãwen ñõn Kwalok Yokwe im Tõmak

14. Ilo wãwen it eo wujleplok ej juõn wãwen jej kwalok yokwe?

¹⁴ Ar wujleplok kij mõke ñõn Anij ej wãwen eo jej kwalok yokwe eo ar emol ñõn Jeova. Ilo jet wãwen ko men in ej einlok wõt kalimur eo me ruo armij rej kõmõne ñe rej mare. Juõn Kristian leo me ej pojõk in mare ej kwalok an yokwe lio ilo an kalimur bwe enaj tiljek wõt ñõn e, jekron ta eo enaj walok. Ejjab baj juõn kalimur ñõn kõmõne juõn men ak ej juõn kalimur ñõn juõn armij. Leo me epojõk in mare ejela bwe ejjab maroñ bõk jerammõn eo ñõn kiki iben lio ej iten mareiki mae ien ej ba nan in kalimur ko ilo ien eo rej mare. Ilo ejja wãwen in wõt, jejjab maroñ lõñliñ kin jerammõn ko rej itok jen ar uan baamle eo an Jeova elañe jejjab wujleplok kij mõke ñõn e. Inem meñe jejjab wãppen, jej wujleplok kij mõke ñõn Jeova kinke jekõnan erom armij ro an im jej beek ilo buruer ñõn tiljek wõt ñõn e jekron ta eo enaj walok.​—Matu 22:37.

15. Ewi wãwen wujleplok ej juõn wãwen jej kwalok ar tõmak?

¹⁵ Wujleplok kij mõke ñõn Anij, ej juõn wãwen jej kwalok ar tõmak. Etke ej eindrein? Kinke tõmak eo ar ilo Jeova ej kõmõn ar liki bwe ar druaklok ñõn Anij ej juõn men emõn ñõn kij. (Sam 73:28) Jejela bwe ejjab aolep ien enaj biruru ñõn ar etetal iben Anij ilo ar mour ibwiljin juõn ‘ebeben e ankeke im bõt,’ bõtab jej liki kalimur eo an Anij bwe enaj rejetake kij ilo jibarbar ko ar. (Pil. 2:​15; 4:​13) Meñe jejela bwe jejjab wãppen, jej liki bwe Jeova enaj jerbal iber ilo juõn wãwen ej kwalok an tiriamokake kij ñe jej kõmõn bwir ko. (Riit Sam 103:13, 14; Dri Rom 7:​21-​25.) Eor ar tõmak bwe Jeova enaj kejerammõn bebe eo ar ñõn drebij wõt ar tiljek.​—Job 27:5.

Wujleplok eo Ar ñõn Anij Ej Tellok ñõn Mõnõnõ

16, 17. Etke wujleplok eo ar ñõn Jeova ej tellok ñõn mõnõnõ?

¹⁶ Wujleplok eo ar ñõn Jeova ej tellok ñõn mõnõnõ kinke ej kitibuj ar lelok kij mõke. Jisõs ear kamol men in ke ear ba: “Mõnõnõ in lelok elap jen bõk.” (Jerb. 20:35) Jisõs ear lo mõnõnõ in ke ear kõmõne jerbal in kwalok nan eo an ion lõl. Ear karmijete ien an kakije, mõña, im ear jab inebata kin kõjeãn ilo ien ear juõn menin aikwij, bwe en maroñ jibõñ ro jet lo ial eo ñõn mour. (Jon 4:​34) Jisõs ear lo lõñliñ ilo an kamõnõnõik buruen Jemen. Jisõs ear ba: “Ien otemjej Ij kõmõn men ko rej kabuñburuen.”​—Jon 8:​29; Ken. 27:11.

¹⁷ Inem, Jisõs ear kareilok dri kalor ro an ñõn juõn wãwen mour ekajuburu ke ear ba: “Elañe jabrewõt armij e kõnan lor Iõ, en mõke  karmijete.” (Matu 16:24) Ar kõmõne men in ej karuaklok kij ñõn Jeova. Ebar or ke juõn me emaroñ laplok an kea kake kij elañe jej lelok mour eo ar ñõn e?

18. Etke ar mour ekkar ñõn wujleplok eo ar ñõn Jeova ej bõktok elaplok mõnõnõ jen ar lelok kij mõke ñõn jabrewõt men ak armij?

¹⁸ Ejelok bar juõn men ak armij emaroñ bõktok elaplok mõnõnõ ijellokin ar wujleplok kij mõke ñõn Jeova inem mour ekkar ñõn wujleplok in ilo ar kõmõnmõn ankilan. Ñõn wanjoñok, elõñ armij rej kajerbal aolepen mour eo air ñõn koorlok mweiuk ko ak rejjab lo mõnõnõ im juburu eo emol. Bõtab, ro im rej wujleplok ir mõke ñõn Jeova rej lo mõnõnõ eo ej indrio. (Matu 6:​24) Rej mõnõnõ kinke rej bõk jerammõn eo ñõn air “dri jerbal iben Anij,” ak wujleplok eo air ejjab ñõn juõn jerbal ak ej ñõn Anij, eo elap an kamolol. (1 Kor. 3:9) Ejelok juõn emaroñ laplok an kamolol kin air karmijete ir mõke ijellokin wõt e. Enaj kõmõn bwe dri korijer ro an retiljek ren jeblak ñõn ran ko ke rar inono ak jodrikdrik bwe ren maroñ bõk tokjen jen kejbãrok eo an ñõn indrio.​—Job 33:25; riit Dri Hibru 6:​10.

19. Ta jerammõn eo ro rar wujleplok ir mõke ñõn Jeova rej mõnõnõ kake?

¹⁹ Ilo am wujleplok mour eo am ñõn Jeova, men in ej kõmõn bwe kwon ber ilo juõn kõtan ebak iben. Baibel eo ej ba: “Komin druaklok ñõn Anij, im E naj druakwoj ñõn kom.” (Jem. 4:8; Sam 25:14) Ilo katak eo tok juõn, jenaj etale etke jemaroñ liki jokãlet eo ñõn erom armij ro an Jeova.

[Kamelele eo Itulal]

Ewi Wãwen Kwonaj Uak?

• Ta melelen ñe juõn ej wujleplok e mõke ñõn Anij?

• Ewi wãwen jej bõk tokjen jen ar wujleplok kij mõke ñõn Jeova?

• Etke jabrewõt eo ekõnan erom juõn ian Dri Kennan ro an Jeova ej aikwij wujleplok e mõke ñõn Jeova?

[Kajitõk ko ñan katak]

[Kamelele in juõn pija ilo peij 6]

Ilo ar mour ekkar ñõn wujleplok eo ar, men in ej tellok ñõn mõnõnõ eo ej indrio