Bõe yĩng tɩ y segd n dɩk y meng n kõ a Zeova?

“Wẽnnaam sẽn so maamã, mam sẽn sakd a soabã malɛk waa mam nengẽ yʋngã.”—TƲƲ. 27:23.

1. Neb sã n wa rat n deeg lisgu, rẽ tɩ b zoe n maana bõe, la woto wata ne sogs-bʋse?

LISG sõsg sã n wa kolgd saabo, b kɩtdame tɩ sẽn dat n deeg-b lisgã zẽk b koees n leok sogsg a yiibu. Sogs-kãens a ye la woto: “Rẽ yĩnga yãmb tika a Zezi Kirist maoongã zug n tek yam n kos y yel-wẽnã sugri, la y rɩk y meng n kõ a Zeova n na n maan a raabã bɩ?” La bõe yĩng tɩ ned sẽn dat n yɩ kiris-ned pʋd n segd n dɩk a meng n kõ a Zeova? D sã n dɩk d meng n kõ Wẽnnaam, nafa bʋs la d paamda? Bõe yĩng tɩ ned sẽn pa rɩk a meng n kõ Wẽnnaam pa tõe n yeel t’a tũud-a-la wa a sẽn datã? Sẽn na yɩl n leok sogs-kãensã, rẽndame tɩ d reng n bãng rɩk-m-meng n kõ wã sẽn dat n yɛɛlga.

2. Rɩk f meng n kõ a Zeova wã rat n yeelame tɩ bõe?

² Rɩk f meng n kõ Wẽnnaamã rat n yeelame tɩ bõe? Daar a yembre, tʋm-tʋmd a Poll sẽn da wa n be ne neb wʋsg batayo pʋgẽ tɩ batayo wã rat n bõre, a yeela bũmb sẽn tõe n sõng-d tɩ d wʋm dẽ võore. A goma a Zeova yell n bool-a tɩ Wẽnnaam ning sẽn so yẽ wã. (Karm-y Tʋʋm 27:22-24.) Dũniyã fãa “bee wẽng soaba nugẽ.” (1 Zã 5:19) La yaa a Zeova n so kiris-neb hakɩkã fãa. Yaa ned sã n pʋʋs a Zeova n yeel-a t’a rɩka a meng n kõ-a, tɩ sɩd zems ne a raabã, la a soab lebgd a rẽnda. La yaa ned kam fãa n dɩkd a meng n kõ Wẽnnaam. Rẽ poore, a wat n deega lisgu.

3. Bõe yĩng t’a Zezi reeg lisgu, la wãn to la neb nins sẽn dat n tũ-a wã rɩkd a togs-n-taare?

³ A Zezi sẽn wa n dat n sɩng a tʋʋmdã, a yãka yam n deeg lisgu, n kõ tõnd mak-sõngo. A sẽn dog Israɛll buudã pʋgẽ, tɩ Israɛll nebã yaool n da yaa buud Wẽnnaamã sẽn so wã yĩnga, a ra zoe n yaa Wẽnnaam dẽnda. La ne rẽ fãa, a maaname tɩ zʋʋg Tõogã sẽn da baood tɩ Israɛll ned fãa maan bũmb ning rẽ wɛɛngẽ wã. A reega lisgu. A sẽn deeg lisgã, yaa wa a sẽn yeel woto: “Wẽnnaam, mam waame n na n maan yãmb daabo.” (Heb. 10:7; Luk 3:21) Dẽnd a Zezi reega lisgã n na n wilg a Ba a Wẽnnaam t’a na n maana bũmb ning a sẽn  tʋm-a t’a wa maanã. Sẽn dat n tũ-b Kiristã rɩkda a togs-n-taare, n deegd lisgu. La bãmb nengẽ wã, yaa sẽn na n wilg zãma wã tɩ b yãka yam n dɩk b mens n kõ Wẽnnaam, n na n maan a raabã.

Rɩk-m-meng n kõ wã sẽn nafd ned to-to

4. A Davɩɩd ne a Zonatã zoodã wilgda tõnd tɩ pʋleng yõod yaa bõe zood pʋgẽ?

⁴ Rɩk f meng n kõ Wẽnnaam n pʋlm-a tɩ f na n maana a raabã pa reem bũmb ye. A pa pʋleng woto bal ye. La nafa bʋs la ned pʋd n paamdẽ, a sã n dɩk a meng n kõ Wẽnnaam? D reng n ges pʋlems kẽer ãdem-biisã sẽn maand ne taaba, la rẽ sẽn nafd-b to-to wã, tɩ na n sõng-d lame tɩ d leok sok-kãngã. Pipi, d rɩk makr ne zoodo. Zood pʋgẽ, ned kam fãa segd n maoome n maan zoodã sẽn baood t’a maan bũmb ninsã fãa. Dẽnd zood yõkr sasa, yaa wa d sẽn pʋlem tɩ d na n sɩd maana woto. Kibay wʋsg n be Biiblã pʋgẽ n gomd neb sẽn yõg zood hakɩk yelle. Wala makre, a Davɩɩd ne a Zonatã. B pʋd n wẽena ne taab b zoodã yĩnga. (Karm-y 1 Sãmwɛll 17:57; 18:1, 3; 20:8.) Yaa sɩd tɩ zo-rãmb wʋsg pa wae n wẽend ne taab ye. La naoor wʋsgo, zood pʋgẽ, ned kam fãa sã n getẽ tɩ yaa tɩlae ne-a t’a sõng a to wã, tɩ yaa wa pʋleng a sẽn segd n pidsi, zoodã tallda pãnga.—Yel. 17:17; 18:24.

5. Yamb sã n da rat n pa ne a zu-soab wakat fãa, a sẽn zãad-a sõma yĩnga, bõe la a ra segd n maane?

⁵ A Moiiz Tõogã pʋgẽ, b gomda kaool bɩ pʋleng buud a to ned sẽn tõe n pʋlem tɩ naf-a yelle. B wilgame tɩ yamb sã n da rat n kell n pa ne a zu-soaba, a sẽn tagsd t’a zãad-a-la sõma yĩnga, a tõe n zemsa ne a zusoabã, n pʋlem t’a na n paa ne-a wakat fãa. Tõogã yeta woto: “Yambã sã n yeel t’a nonga a zu-soabã ne a pagã la a kambã la a ka rat n yi, bɩ a zu-soaba tall-a n wa Wẽnnaam taoor n kɩt t’a kolg kʋɩlenga walla lugr sɛɛgẽ t’a zu-soabã vʋdg a tʋbrã ne pĩim. La yẽ na n kell n yɩɩ a zu-soaba yamb a yõor tɛka.”—Yikri 21:5, 6.

6, 7. a) Yel-bʋs wɛɛngẽ la nebã maand pʋlems tɩ nafd-ba? b) La bõe la rẽ wilgd tõnd ne a Zeova zoodã wɛɛngẽ?

⁶ Neb sã n yãk yam n na n kẽ kãadem, yaa tɩlae tɩ b pʋlem taaba. Pʋlem-kãngã tara pãng wʋsgo, bala b wẽenda neb sʋka. Pag ne rao sã n vɩ ne taab n yaool n pa maan woto, baa b paam kamba, bãmb ne b kambã fãa pa tõe n paam koglg ning kãadem hakɩk sẽn kõtã ye. La b sã n tũ Wẽnnaam Gomdã sẽn yetã n kẽ b kãadmã tɩ zemse, na n kɩtame tɩ b sã n wa segd zu-loees me bɩ b mao n tũ Biiblã sagls n welg-b ne nonglem.—Mat. 19:5, 6; 1 Kor. 13:7, 8; Heb. 13:4.

⁷ Biiblã pʋgẽ, kibay n be n wilgd neb sẽn maan kaool bɩ pʋlems ne taab tʋʋm wall koosem yĩng hal tɩ naf-ba. (Mat. 20:1, 2, 8) Rũndã-rũndã me, nebã ket n maanda a buudu. Wala makre, b sã n dat n dɩk ned tʋʋm ãnterpiriiz pʋgẽ, wall ned sã n dat n kẽes a ligd ned a to tʋʋmd pʋgẽ, b rengd n gãnega b kaoola, n gʋls sebr zug tɩ yaa vẽenega. Woto fãa wilgdame tɩ zoodo, kãadem wall tʋʋm wɛɛngẽ, pʋleng paasda kaool pãnga. Dẽnd yaa vẽeneg tɩ d sã n dɩk d meng n kõ a Zeova, n pʋlem tɩ d na n maana a raabã, na n naf-d lame n yɩɩge. Bɩ d ges neb sẽn dɩk b mens n kõ a Zeova pĩnd wẽndẽ makre, la rẽ sẽn naf-b to-to, la d ges bũmb ning sẽn wilgd tɩ rɩk f meng n kõ a Zeova wã yaa pʋleng pãng sẽn yɩɩd pʋleng buud fãa.

Israɛll nebã sẽn dɩk b meng n kõ Wẽnnaamã sẽn naf-b to-to

8. Israɛll nebã sẽn dɩk b mens n kõ Wẽnnaamã rat n yeelame tɩ bõe?

⁸ Yaa wakat ning Israɛll nebã sẽn pʋlem tɩ b na n saka Wẽnnaam a Zeova wã tɛk la b lebg buud a sẽn so. A Zeova kɩtame tɩ b tigim taab Sinayi tãngẽ wã, t’a yeel-b woto: “Yãmb sã n sak mam koɛɛgã la y sak mam kãabgã, yãmb na n lebga mam neb buudã fãa sʋka.” La nebã fãa lagma taab n yeele: “Bũmb nins fãa Zusoabã sẽn yeelã, tõnd na n maaname.” (Yikri 19:4-8) B sẽn yeel woto wã,  b pʋlmame, la b pʋlengã võor tagmame. Bala rat n yeelame tɩ rẽ tɛka, lebga a Zeova n so-ba, t’a na n get-b wa a “neb buudã fãa sʋka.”

9. Israɛll nebã sẽn dɩk b mens n kõ Wẽnnaamã, nafa bʋs la b paam-yã?

⁹ Israɛll nebã sẽn lebg a Zeova rẽndã, naf-b lame. A gesa b yell wakat fãa wa ba sẽn get a kamb yelle. Wẽnnaam yeela Israɛll woto: “Pag tõe n yĩma biig ninga yẽ sẽn yẽsemdã yell bɩ? A tõeeme n ka zoe biig ninga yẽ sẽn doga nimbãaneg bɩ? Baa yẽ sã n yĩm, mam ka na n tol n yĩm fo yell ye.” (Ezai 49:15) A Zeova kõ-b-la a Tõogã sẽn na yɩl tɩ b bãng n vɩɩmde, n kɩt tɩ no-rɛɛsdb keng b raoodo, la a tʋm malɛgs tɩ b kogl-ba. Yɩɩl-gʋlsd a yembr yeela woto: “Bãmb wilgda a Zakoob yagens b goama. Bãmb wilgda Israɛll nebã b raabã ne b tõodã. Bãmb ka maan woto buud a taabã fãa yĩng ye.” (Yɩɩl 147:19, 20; Karm-y Yɩɩl Sõamyã 34:8, 20; 48:15.) Rũndã-rũndã, a Zeova na n gesa neb nins sẽn dɩk b mens n kõ-a wã yell wa a sẽn ges Israɛll nebã yellã.

D sẽn segd n dɩk d mens n kõ Wẽnnaamã võore

10, 11. Ãdem-biig fãa rogmẽ, Wẽnnaam geelgd-a-la wa a zakã ned bɩ? Wilg-y-yã a võore.

¹⁰ Neb kẽer sã n wa tagsd b sẽn segd n dɩk b mens n kõ Wẽnnaam n lebg kiris-nebã yelle, b sokda b mens woto: “Bõe yĩng tɩ yaa tɩlae tɩ m dɩk m meng n kõ Wẽnnaam? M pa tõe n tũud-a woto bal la?” D sã n tẽeg d yaab a Ãdem yel-wẽndã sẽn kɩt tɩ tõnd lebg bũmb ningã, d bãngda leoorã. Tẽeg-y t’a Ãdem yel-wẽndã kɩtame tɩ Wẽnnaam pa geelgd-d wa a zakã ned d rogmẽ wã ye. (Rom 3:23; 5:12) F sã n dat t’a geelg-f wa a neda, yaa tɩlae tɩ f reng n dɩk f meng n kõ-a. Bɩ d bao n bãng rẽ võore.

¹¹ Tõnd sʋkã ned kae n tar ba sẽn da tõe n dog-a t’a vɩɩmd wakat sẽn pa sat ye. (1 Tɩm. 6:19) D pa rogd n yaa Wẽnnaam kamb ye. Bala a Ãdem ne a Hawa sẽn kɩɩs b Naand la b ba wã, b yiisa b mens a nin-buiidã sʋka, n kɩt tɩ kamb nins b sẽn na n dogã me pa Wẽnnaam zakã neb ye. (Ges-y Tõod 32:5, NW.) Rẽ tɛka, ãdem-biisã fãa pa le yaa a Zeova zakã neb ye. B zãaga b mens ne-a.

12. a) Ninsaalbã sẽn yaa koangdbã, wãn to la b tõe n paam n lebg Wẽnnaam zakã neba? b) Bõe la ned segd n deng n maan n yaool n deeg lisgu?

¹² La tõnd ned kam fãa tõe n kosa Wẽnnaam t’a sak n deeg-a t’a lebg a zakã neda, n paam n maand a raabã. * La d sẽn yaa koangdbã, wãn to la d tõe n maan rẽ? Tʋm-tʋmd a Poll yeela woto: “Tõnd sẽn da yaa bɛɛbã wakate, Wẽnnaam Biigã kũum yiisa yell ninga sẽn da be tõnd ne Wẽnnaam sʋkã, tɩ yellã sɛ tõnd ne Wẽnnaam sʋka.” (Rom 5:10) D sã n deeg lisgu, d kosa Wẽnnaam t’a kõ-d sũur kaset sẽn pa ye ningd-d taale, sẽn na yɩl tɩ d lebg ned sẽn tat a yam. (1 Pɩɛ. 3:21) La nand tɩ d reeg lisgu, yɛl a taab n be d sẽn segd n deng n maane. D segd n deng n bao n bãnga Wẽnnaam la d tẽ-a, n tek yam n kos sugr la d toeem d vɩɩmã. (Zã 17:3; Tʋʋ. 3:19; Heb. 11:6) La woto fãa poore, bũmb a to n ket d sẽn segd n maan n yaool n tõog n lebg Wẽnnaam zakã neda. Bõn-kãng la bʋgo?

13. Bõe yĩng tɩ segd tɩ ned pʋlem Wẽnnaam n dɩk a meng n kõ-a n yaool n tõog n naag a nin-buiidã?

¹³ Nand tɩ ned sẽn zãr ne Wẽnnaam a Zeova paam n naag neb nins sẽn maand a raabã, a segd n deng n pʋlma a Zeova t’a na n maana a raabã. D rɩk makr n wilg rẽ võore. Tags-y n ges-y wala rao sẽn na n dat n deeg kɩɩb n maan a biiga. Nebã miime tɩ raoã zãada a kambã sõma. La a ratame tɩ biigã pʋlm-a bũmb t’a yaool n sak n deeg-a. A yeela biigã woto: “Nand tɩ fo lebg mam biiga, m dat n bãnga fo-me sã n na n nonga maam la f waoogd-m wa f ba.” Yaa biigã sã n sak n pʋlem daoã bũmb ning a sẽn datã bal la a na n deeg-a a zakẽ wã. Rẽ yĩnga raoã sẽn kos woto wã pa zems sɩda? Dẽnd yaa neb nins me  sẽn na n sak n pʋlem a Zeova tɩ b na n maana a raabã la a reegd a nin-buiidã sʋka. Biiblã yeta woto: “Kõ y yĩnsã tɩ yɩ maan-vɩɩs sẽn yaa sõma la sẽn zems Wẽnnaam yam.”—Rom 12:1.

Rɩk f meng n kõ a Zeova wã wilgdame tɩ f nong-a lame la f tẽed-a

14. Bõe yĩng tɩ d tõe n yeel tɩ rɩk-m-meng n kõ wã yaa nonglem wilgri?

¹⁴ D sã n pʋlem a Zeova tɩ d na n maana a raabã, wilgdame tɩ d nong-a-la ne d sũur fãa. D tõe n maka pʋlen-kãng ne pʋleng ning neb sẽn pʋlemd taab b kãadem kõomẽ wã. Rao sẽn yaa kiris-ned kãadem sasa, a pʋlemdame tɩ noom tɩ toɛya, a na n kell n zĩnda ne a pagã, tɩ wilgdẽ t’a nong-a lame. Pʋleng a woto yɩɩda f sẽn na n sak bal tɩ f na n maana bũmbu. Bala yaa wẽenego. Rao sẽn yaa kiris-ned miime t’a sã n pa maan pʋleng a woto, a pa tõe n paam tɩ pʋg-sadã lebg a pag ye. Bɩ d bãng tɩ tõnd me pa tõe n paam n lebg a Zeova zakã neda, tɩ d pa reng n pʋlem tɩ d na n maana a raabã ye. Dẽnd baa d sẽn yaa koangdbã, d sẽn dat n lebg Wẽnnaam neb n sakd-a ne d sũy fãa wã yĩnga, d rɩkda d mens n kõ-a, n pʋlem tɩ noom tɩ toɛya d na n sak-a lame.—Mat. 22:37.

15. Bõe yĩng tɩ d tõe n yeel tɩ rɩk-m-meng n kõ wã wilgdame tɩ d tara tẽebo?

¹⁵ D sã n dɩk d meng n kõ Wẽnnaam, d wilgame tɩ d tẽed-a lame. Bõe yĩng tɩ d yet woto? D sẽn tar tẽeb ne a Zeova wã kɩtame tɩ d kɩs sɩd tɩ d sã n kolg-a n bao a zoodo, yaa sõma ne-do. (Yɩɩl 73:28) D miime tɩ d sẽn vɩ ‘kɩɩsdb ne nin-wẽns sʋkã,’ pa wakat fãa la a Zeova sakr na n yɩ nana ne-d ye. La d kɩsa sɩd tɩ Wẽnnaam na n teel-d-la d modgrã pʋgẽ wa a sẽn pʋlmã. (Fil. 2:15; 4:13, NW ) D miime tɩ d yaa koangdba, la d kɩsa sɩd tɩ d sã n wa konge, a Zeova na n maand-d-la nimbãan-zoeere. (Karm-y Yɩɩl Sõamyã 103:13, 14; Rom dãmb 7:21-25.) D tẽeda ne d sũy fãa t’a Zeova na n wa keoa tõnd d wẽn-sakrã yĩng me.—Zoob 27:5.

Rɩk-m-meng n kõ wã wata ne sũ-noogo

16, 17. Bõe yĩng tɩ ned sã n dɩk a meng n kõ a Zeova bɩ a soab na n paam sũ-noogo?

¹⁶ D sã n dɩk d meng n kõ a Zeova, wata ne sũ-noogo. Bala d kõ-a-la bũmbu, rat n yeel tɩ d mensã. A Zezi sẽn yeel tɩ “sẽn kõt-a sũ-noog yɩɩda sẽn deegd-a” wã, a sɩd bee bʋʋm. (Tʋʋ. 20:35, Sebr Sõngo) A sẽn da wa n be tẽngã zug n moond koɛɛgã, a sɩd paama sũ-noog ning kũun sẽn kõt nedã hal wʋsgo. A ra mi n sak n basa vʋʋsgo, rɩɩbo, la a mengã yell gesgo, sẽn na yɩl n sõng nebã tɩ b yã vɩɩm sẽn pa satã sore. (Zã 4:34) A Zezi ra noogda a Ba wã sũur tɩ kõt yẽ me sũ-noogo. A meng yeela woto: “Mam sẽn maand bũmb ninsã tata bãmb yam daar fãa.”—Zã 8:29; Yel. 27:11.

¹⁷ Rẽnd a Zezi sẽn yeel a karen-biisã tɩ ‘ned sã n dat n tũ yẽ, bɩ a kɩɩs a meng raab n dɩk a kũum da-luk n tũ yẽ’ wã, a wilga bũmb ning  sẽn kɩtd tɩ ned tall sũ-noog a vɩɩmã pʋgẽ wã. (Mat. 16:24) Bala rẽ maaneg kɩtdame tɩ d lebg a Zeova zoa. Hakɩka, ned kae d sẽn tõe n dɩk d meng n kõ t’a ges d yell sõma n yɩɩg a Zeova ye.

18. Bõe yĩng tɩ d sã n sɩd maand a Zeova raabã bɩ d sũ-noogã yɩɩd d sẽn na n dɩk d vɩɩmã n kẽes bũmb maaneg wall ned raab maaneg pʋgẽ?

¹⁸ D sã n dɩk d mens n kõo a Zeova n sɩd maand a raabã wa d sẽn pʋlmã, d paamda sũ-noog n yɩɩd d sẽn na n dɩk d vɩɩmã n kẽes bũmb maaneg wall ned raab maaneg pʋgẽ. Wala makre, neb wʋsg rɩkda b vɩɩmã tõr n baood laogo, la b pa paamd sũ-noog hakɩkã ye. La neb nins sẽn dɩk b mens n kõ a Zeova wã paamda sũ-noog sẽn pa sate. (Mat. 6:24) Yaa sɩd tɩ yaa a Zeova sẽn yaa mi-beoog soabã la b rɩk b mens n kõ la pa a tʋʋmdã ye. La b sẽn paam n yaa a ‘tʋmd-n-taasã’ kõt-b-la sũ-noogo. (1 Kor. 3:9) Ned baa a ye pa tõe n bãng n pẽg modgr ning b sẽn maandã n ta-a ye. A na n wa kɩtame meng tɩ b fãa lebs n paam yĩns keelem sẽn yaa sõma wa b bi-bɩɩlmã wakatã, n paam n ges b yell wakat sẽn kõn sa yĩnga.—Zoob 33:25; Karm-y Hebre rãmb 6:10.

19. Nafa bʋg la neb nins sẽn dɩk b mens n kõ a Zeova wã paamda?

¹⁹ Y sã n dɩk y meng n kõ a Zeova, y lebgda a zoa. Biiblã yeta woto: “Bɩ y kolg Wẽnnaam, la bãmb na kolg yãmba.” (Zak 4:8; Yɩɩl 25:14) Sõsg ning sẽn pʋgdã pʋgẽ, d na n yãa bũmb ning sẽn kɩt tɩ d segd n dɩk d mens n kõ a Zeova n da zoe rabeemã.

[Tẽngr note]

Y na n leokame tɩ bõe?

• Rɩk f meng n kõ Wẽnnaamã rat n yeelame tɩ bõe?

• D sã n dɩk d mens n kõ Wẽnnaam, nafa bʋs la d paamda?

• Bõe yĩng tɩ ned sẽn dat n lebg kiris-ned segd n dɩk a meng n kõ a Zeova?

[Zãmsgã sogsgã]

[Foto, seb-neng 12]

D sã n maand a Zeova raabã wa d sẽn pʋlm-a wã d na n wa paama sũ-noog sẽn ka saabo