¿Nda̱chun ndataxiyó miíyó ndaʼa̱ Jehová?

“Tá ñuú, Ndióxi̱ ta̱ ndásakáʼnui̱ chi̱ndaʼára iin ángel ña̱ ki̱xira nu̱úi̱.” (HECH. 27:23)

1. a) ¿Ndáaña xíniñúʼu keʼé iin na̱ yiví ña̱ va̱ʼa xa̱a̱na ndakuchina? b) ¿Ndáa pregunta ndakuiinyó?

 “¿Á XA̱A̱ ndi̱ko-iniún xa̱ʼa̱ ku̱a̱chiún, ta táxiún ña̱ tákún ndaʼa̱ Jehová ta kándíxaún ña̱ mií ta̱ Jesucristo kúú ta̱ nda̱kaxin Ndióxi̱ ña̱ saka̱kura miíyó?” Ña̱yóʼo kúú iin pregunta ña̱ ndáka̱tu̱ʼunna na̱ ndákuchi. ¿Nda̱chun xíniñúʼu ndataxi na̱ cristiano miína ndaʼa̱ Jehová? ¿Ndáaña va̱ʼa ndakiʼinna tá ná keʼénaña? ¿Nda̱chun xíniñúʼu ndataxina miína ndaʼa̱ Ndióxi̱ ña̱ va̱ʼa ndakiʼinra ña̱ táxina ndaʼa̱ra? Ña̱ va̱ʼa ndakuiinyó pregunta yóʼo, siʼna xíniñúʼu kunda̱a̱-iniyó nda̱chun xíniñúʼu ndataxiyó miíyó ndaʼa̱ Ndióxi̱.

2. ¿Ndáaña xíniñúʼu keʼéyó ña̱ va̱ʼa ndataxiyó miíyó ndaʼa̱ Jehová?

² ¿Ndáaña kúni̱ kachi ña̱ ndataxiyó miíyó ndaʼa̱ Ndióxi̱? Iin ña̱ chindeétáʼan xíʼinyó kúú ña̱ ni̱ka̱ʼa̱n ta̱ apóstol Pablo tá ku̱a̱ʼa̱nra sa̱tá tú barco tú xa̱a̱ ku̱nu̱mí sa̱ʼvi xíʼin ti̱kui̱í. Ta̱ apóstol yóʼo ni̱ka̱ʼa̱nra xíʼin Jehová “Ndióxi̱ ta̱ ndásakáʼnui̱”, ta xíʼin ña̱yóʼo ni̱na̱ʼa̱ra ndáana xi̱ndasakáʼnura (kaʼvi Hechos 27:22-24). Ñuyǐví yóʼo ndíkaa̱ñA ndaʼa̱ ta̱ Ndi̱va̱ʼa, soo miíyó na̱ cristiano Jehová kúú ta̱ ndásakáʼnuyó (1 Juan 5:19). Ta ¿Ndáa ki̱ʼva keʼéyó ña̱yóʼo? Ña̱ ndataxiyó miíyó ndaʼa̱ Jehová, ña̱yóʼo kúni̱ kachiña ña̱ keʼéyó iin voto nu̱ura, á káʼa̱nyó xíʼinra ña̱ ndataxiyó miíyó ndaʼara tasaá, ndakuchiyó.

3.¿Ndáaña xi̱kuni kachi ña̱ nda̱kuchi ta̱ Jesús, ta ndáa ki̱ʼva ndíku̱n na̱ cristiano yichi̱ra?

³ Ta̱ Jesús chi̱núura yichi̱ nu̱úyó ki̱vi̱ tá ndakuchira, ta ke̱ʼéraña nu̱ú ku̱a̱ʼá na̱ yiví ña̱ va̱ʼa keʼéra chiñu nu̱ú yivára. Xa̱ʼa̱ ña̱ ka̱ku ta̱ Jesús chí ñuu Israel, ñuu kán xi̱ndataxivana miína ndaʼa̱ Ndióxi̱, ta va̱ása xíniñúʼu ndikó tukura ndataxira miíra ndaʼa̱ Ndióxi̱. Ta kǒo iin ley níxi̱yo ña̱ saá xíniñúʼu ndikó tukura keʼéra. Ke̱ʼéra iin ña̱ ndáyáʼviní. Biblia káʼa̱nña, ña̱yóʼo kúú ña̱ ni̱ka̱ʼa̱nra xíʼin Jehová: “ki̱xai̱ ña̱ va̱ʼa keʼíi̱ ña̱ kúni̱ún Ndióxi̱ miíi̱” (Heb. 10:7; Luc. 3:21). Ña̱ nda̱kuchira ni̱na̱ʼa̱ra nu̱ú yivára ña̱ keʼéra ña̱ kúnira. Tiempo vitin, miíyó na̱ cristiano ndíku̱nyó yichi̱ra tá xa̱a̱ ndákuchiyó, soo ña̱ kéʼé miíyó tiempo vitin siʼna ndátaxiyó miíyó ndaʼa̱ra, nu̱ú káʼa̱nyó xíʼinra ti̱xin ña̱ oración ta saá ndákuchiyó.

Ña̱ va̱ʼa ndákiʼinyó ta xa̱a̱ ndataxiyó miíyó ndaʼa̱ Ndióxi̱

4. ¿Ndáaña sákuaʼayó xa̱ʼa̱ ña̱ va̱ʼaní xi̱kitáʼan ta̱ David xíʼin ta̱ Jonatán?

⁴ Ña̱ ndataxiyó miíyó ndaʼa̱ Ndióxi̱ iin ña̱ ndáyáʼviní kúú ña̱yóʼo. Ña̱kán, ¿ndáaña va̱ʼa ndakiʼinyó? Iin ña̱ chindeétáʼan xíʼinyó ña̱ kundaa-iniyó xa̱ʼa̱ ña̱yóʼo, kúú ña̱ kéʼé na̱ yiví ña̱ va̱ʼa kutáʼanna xíʼin inkana. Ná ka̱ʼa̱nyó xa̱ʼa̱ ña̱ va̱ʼa xa̱a̱na koona migona. Ña̱ va̱ʼa xa̱a̱na koona migo, siʼna xíniñúʼu kunitáʼanna. Ta ña̱ va̱ʼa xa̱a̱na koona migo xíniñúʼu kiʼinna kuenta xíʼin na̱ yiví kán, kundaanana ña̱ kǒo nda̱a̱ ni iin ña̱ʼa kundoʼo na̱ migona. Iin na̱ va̱ʼaní xi̱kitáʼan kúú na̱ kaʼan Biblia xa̱ʼa̱, ta̱ David xíʼin ta̱ Jonatán, ta xa̱ʼa̱ ña̱ va̱ʼaní xi̱kitáʼan na̱yóʼo nda̱a̱ ke̱ʼéna iin trato xíʼin táʼanna (kaʼvi 1 Samuel 17:57 xíʼin 18:1, 3). Tiempo vitin loʼoníva kúú na̱ yiví na̱ va̱ʼaní kítáʼan táki̱ʼva ke̱ʼé na̱yóʼo. Soo, na̱ va̱ʼaní kitáʼan, kúsi̱í-inina xíʼin táʼanna ta chíkaa̱na ndee̱ xíʼin táʼanna (Pro. 17:17; 18:24).

5.¿Ndáaña xíniñúʼu ke̱ʼé iin na̱ káchíñu ndáʼvi ña̱ va̱ʼa kachíñukana nu̱ú na̱ xáʼnda chiñu nu̱úna?

⁵ Ley ña̱ ta̱xi Ndióxi̱ ndaʼa̱ na̱ ñuu Israel káʼa̱nña xa̱ʼa̱ inka ña̱ va̱ʼa ndakiʼin na̱ yiví tá vií ná kutáʼanna xíʼin inkana, ña̱ xi̱kaʼa̱n xa̱ʼa̱ iin na̱ xi̱kachíñu ndáʼvi nu̱ú na̱ xi̱xaʼnda chiñu nu̱úna. Ley yóʼo xi̱kaʼa̱nña: “Soo tá ta̱ esclavo ku̱a̱ʼá yichi̱ káʼa̱nra ‘Va̱ása kúnii̱ ku̱ʼi̱n, saáchi kúni̱níi̱ xínii̱ ta̱ káchíñui̱ nu̱ú, saátu ñá síʼíi̱ xíʼin se̱ʼi̱’, ta̱ káchíñura nu̱ú ku̱ʼu̱nra xíʼinra nu̱ú Ndióxi̱ ta̱ nda̱a̱. Ta kanindichirara sa̱tá yéʼé ta kaanra so̱ʼora xíʼin iin ka̱a. Ta saá koora esclavo ta̱yóʼo ndiʼi tiempo” (Éxo. 21:5,6). Nda̱a̱ táki̱ʼva ku̱ndaa̱-iniyó, na̱ káchíñu ndáʼvi yóʼo kivikava kachíñuna nu̱ú na̱ xáʼnda chiñu nu̱úna tá ki̱ndoona iin trato xíʼin na̱yóʼo ta keʼéna ña̱ káʼa̱n na̱ xáʼnda chiñu nu̱úna.

6, 7. a) ¿Ndáa ki̱ʼva chíndeétáʼan ña̱ ki̱ndooyó keʼéyó iin ña̱ʼa xíʼinyó? b) ¿Ndáaña kivi ka̱ʼa̱nyó xa̱ʼa̱ ña̱ va̱ʼaní kítáʼanyó xíʼin Jehová xíʼin ña̱ ki̱ndooyó keʼéyó iin ña̱ʼa?

⁶ Inka ña̱ xíniñúʼu keʼéna ña̱ vií kutáʼanna kúú: tá xa̱a̱ tíndaʼa̱na. Ndáyáʼviní vií kutáʼan u̱vi̱ saána, su̱ví xa̱ʼa̱ ña̱ tindaʼa̱ kuitína. U̱vi̱ na̱ yiví na̱ inkáchi íyo ta ta̱ʼán tindaʼa̱na va̱ása kivi vií kiʼinna kuenta xíʼin na̱ ti̱ndaʼa̱ xíʼinna ta saátu xíʼin na̱ se̱ʼena nda̱a̱ táki̱ʼva kéʼé na̱ xa̱a̱ tindaʼa̱ na̱ ndásakáʼnu Ndióxi̱. Ta ni va̱ása vií saxínuna chiñuna ni ña̱ chikaa̱na ndee̱ ña̱ ndasaviína ku̱a̱chi tá íyo tu̱ndóʼo nu̱úna (Mat. 19:5, 6; 1 Cor. 13:7, 8; Heb. 13:4).

⁷ Vitin ná ka̱ʼa̱nyó xa̱ʼa̱ chiñu. Nda̱a̱ tiempo xi̱naʼá, contrato ña̱ xi̱keʼéna ña̱ va̱ʼa kachíñuna va̱ʼaní xi̱chindeétáʼanña xíʼinna (Mat. 20:1, 2, 8). Xa̱ʼa̱ ña̱kán, ña̱ va̱ʼa kixaa̱na keʼéna iin negocio á ña̱ kixaa̱na kachíñuna xíʼin iinna, ña̱ xi̱ ixaa firmana nu̱ú iin tutu kúú ña̱ xi̱chindeétáʼan xíʼinna. Ña̱kán, ña̱ va̱ʼa kitáʼan na̱ yiví na̱ kúú migo, na̱ xa̱a̱ ti̱ndaʼa̱ á xa̱ʼa̱ iin chiñu, ña̱ chindeétáʼan xíʼinna kúú ña̱ vií kutáʼanna á keʼéna ña̱ ki̱ndoona. Ta ña̱ vií kutáʼan miíyó xíʼin Jehová íyo iin ña̱ ndáyáʼviní keʼéyó: ña̱ ndataxiyó miíyó ndaʼa̱ra á ña̱ ndataxiyó ña̱ tákuyó ndaʼara. Yóʼo ka̱ʼa̱nyó xa̱ʼa̱ ña̱ va̱ʼa ña̱ ndakiʼin na̱ ni̱xi̱yo tiempo xi̱naʼá tá ndataxina miína ndaʼa̱ Ndióxi̱, ta saátu kotoyó ña̱ va̱ása níkeʼé kuitínaña xa̱ʼa̱ ña̱ ki̱ndoona keʼénaña.

Ña̱ nda̱taxi na̱ ñuu Israel miína ndaʼa̱ Ndióxi̱ ku̱a̱ʼání ña̱ va̱ʼa nda̱kiʼinna

8. ¿Ndáaña xi̱kuni kachi ña̱ nda̱taxi na̱ ñuu Israel miína ndaʼa̱ Ndióxi̱?

⁸ Na̱ ñuu Israel inkáchi nda̱taxina miína ndaʼa̱ Jehová tá ni̱ka̱ʼa̱nna keʼéna ña̱ kuni̱ra. Ta̱yóʼo sa̱ndátakara miína chí yuku̱ Sinaí ta ni̱ka̱ʼa̱nra xíʼinna: “Ta tá kándíxandó ndiʼi ña̱ káʼi̱n xíʼinndó ta sáxi̱nundó trato ña̱ chi̱kai̱ xíʼinndó, xa̱a̱ndó koondó ñuu miíi̱ ta kundayáʼviníkandó nu̱ú inkaka na̱ ñuu”. Tándi̱ʼi ku̱u ña̱yóʼo, ndiʼi saá na̱ ñuu nda̱kuiinna ta ka̱china: “Keʼévandi̱ ndiʼi ña̱ ni̱ka̱ʼa̱n Jehová” (Éxo. 19:4-8). Ndáyáʼviní ña̱ ki̱ndoona keʼéna. Ña̱yóʼo ni̱na̱ʼa̱ña ña̱ kuenta Jehová kúúna, ta ni̱ka̱ʼa̱nra xíʼinna ña̱ kundayáʼviníkana nu̱ura.

9. ¿Ndáaña va̱ʼa ndakiʼin na̱ ñuu Israel xa̱ʼa̱ ña̱ nda̱taxina miína ndaʼa̱ Ndióxi̱?

⁹ Ña̱ xi̱kuu na̱ ñuu Israel ñuu Jehová ku̱a̱ʼání ña̱ va̱ʼa nda̱kiʼinna. Nda̱kú ni̱xi̱yo inira xíʼinna ta ni̱xi̱yona nu̱ura nda̱a̱ táki̱ʼva íyo na̱ se̱ʼera. Jehová ni̱ka̱ʼa̱nra xíʼinna: “¿Á kivi nandósó iin ñá ñaʼá xa̱ʼa̱ se̱ʼe loʼoñá, á va̱ása kundáʼvi-iniñá kuniñá se̱ʼeñá ña̱ xi̱ndika̱a̱ ti̱xinñá? Ni ná nandósó ná ñaʼá yóʼo xa̱ʼa̱ se̱ʼená, soo yi̱ʼi̱ va̱ása nandósó-inii̱ xa̱ʼún” (Isa. 49:15). Ndióxi̱ ta̱xira iin Ley ndaʼa̱ na̱ ñuura ña̱ va̱ʼa kuniʼiña yichi̱ nu̱úna, ta saátu xi̱niñúʼura na̱ profeta ña̱ va̱ʼa nda̱sandakúra inina ta na̱ ángel xi̱ndaa miína. Iin ta̱ ka̱ʼyi tutu ña̱ salmo ka̱chira: “[Jehová] ni̱ka̱ʼa̱nra tu̱ʼunra xíʼin ta̱ Jacob, ley ña̱ kúúmiíra xíʼin ki̱ʼva ña̱ kéʼéra xíʼin na̱ ñuu Israel. Ta iinlá xíʼin ñuu kán ke̱ʼéra saá” (Sal. 147:19, 20; kaʼvi Salmo 34:7, 19 y 48:14). Nda̱a̱ táki̱ʼva xi̱ndaara na̱ ñuu Israel, na̱ xi̱kuu kuenta miíra, saátu ndáara na̱ cristiano na̱ nda̱taxi mií ndaʼara.

¿Nda̱chun xíniñúʼu ndataxiyó miíyó ndaʼa̱ Ndióxi̱?

10, 11. ¿Nda̱chun va̱ása kúúyó na̱ veʼe Jehová?

¹⁰ Íyo sava na̱ ndákanixi̱ní ña̱yóʼo: “¿Nda̱chun xíniñúʼu ndataxii̱ miíi̱ ndaʼa̱ Ndióxi̱ ta ndakuchi ña̱ va̱ʼa kachíñui̱ nu̱ura?”. Sana kunda̱a̱va-iniyó xa̱ʼa̱ ña̱yóʼo tá ná ndakanixi̱níyó ndáaña kúú ña̱ keʼéyó nu̱ura. Xa̱ʼa̱ ña̱ ni̱ki̱ʼvi ta̱ Adán kuachi, ndiʼiyó ka̱kuyó xíʼin kuachi ta va̱ása íyoyó táki̱ʼva íyo na̱ veʼe Ndióxi̱ na̱ íyo chí ndiví (Rom. 3:23; 5:12). Ta ña̱ va̱ʼa ixakáʼnu ini Ndióxi̱ xa̱ʼa̱yó xíniñúʼu ndataxiyó miíyó ndaʼa̱ra. Ná kotoyó nda̱chun.

¹¹ Nda̱a̱ ni iinyó va̱ása kúúmiíyó iin yivá ta̱ sakútaʼa ndiʼi kuachi ña̱ kíʼviyó nda̱a̱ táki̱ʼva kúni Ndióxi̱ (1 Tim. 6:19). Xa̱ʼa̱ ña̱ ni̱ki̱ʼvi na̱ yiví na̱ nu̱ú kuachi, nda̱a̱ miíyó ni̱ki̱ʼvi kuachi nu̱ú Yiváyó ta̱ ixava̱ʼa ndiʼi ña̱ʼa, xa̱ʼa̱ ña̱kán kúú ña̱ va̱ása níkivika kooyó se̱ʼera (chitáʼan ña̱yóʼo xíʼin Deuteronomio 32:5). Xa̱ʼa̱ ña̱kán, va̱ása níkivika kooyó na̱ veʼe Jehová ta ku̱xíkáyó nu̱ura.

12. (a) ¿Ndáa ki̱ʼva xa̱a̱ na̱ yiví ku̱a̱chi koona na̱ veʼe Ndióxi̱? (b) ¿Ndáaña siʼna xíniñúʼuna keʼéna ña̱ va̱ʼa ndakuchina?

¹² Iin tá iinyó, kiviva ka̱ʼa̱nyó xíʼin Jehová ña̱ kivi kooyó na̱ veʼera. a Soo ¿ndáa ki̱ʼva ixakáʼnu inira xa̱ʼa̱yó ni kúúyó na̱ yiví kuachi? Ta̱ apóstol Pablo ni̱ka̱ʼa̱nra ña̱yóʼo: “Soo xa̱ʼa̱ ña̱ ni̱xi̱ʼi̱ se̱ʼera xa̱ʼa̱yó ni̱xa̱a̱yó nda̱kutáʼan viíyó xíʼinra” (Rom. 5:10). Ña̱ va̱ʼa ndakiʼinra miíyó ña̱ xa̱a̱yó kooyó na̱ veʼera, xíniñúʼu ka̱ʼa̱nyó xíʼinra ña̱ vií xíniñúʼu koo ña̱ xínitúni̱yó, ta saátu ná ndakuchiyó (1 Ped. 3:21). Soo, íyo ña̱ siʼna xíniñúʼu keʼéyó tá kúma̱ní xa̱a̱yó ndakuchiyó. Siʼna ná kuxini̱ va̱ʼayó xa̱ʼa̱ Jehová ta kandíxayóra; ta saá ndikó iniyó xa̱ʼa̱ ña̱ va̱ása va̱ʼa kéʼéyó ta nasamayó ña̱ kéʼéyó (Juan 17:3; Hech. 3:19; Heb. 11:6). ¿Ndáaña keʼéyó tá xa̱a̱ na̱samayó ña̱ kéʼéyó?

13. ¿Nda̱chun xíniñúʼu keʼéyó voto ña̱ va̱ʼa ndataxiyó miíyó ndaʼa̱ Ndióxi̱ ña̱ va̱ʼa kooyó na̱ veʼera ta ndasakáʼnuyóra?

¹³ Xa̱ʼa̱ ña̱ ndásakáʼnuyó Ndióxi̱ ta kivi xa̱a̱yó kooyó na̱ veʼera, ná kindo̱oyó iin ña̱ʼa xíʼinra ta saxínuyó ndiʼi ña̱yóʼo. ¿Nda̱chun? Ná ka̱ʼa̱n loʼoyó xa̱ʼa̱ ña̱yóʼo. Tá iin ta̱ íyo se̱ʼe íxato̱ʼónína miíra ñuu nu̱ú íyora, xáa̱ra xínitáʼanra xíʼin iin ta̱ loʼo ta̱ kǒo na̱ veʼe, ta ta̱yóʼo ndákiʼinra ta̱ loʼo yóʼo ña̱ koora veʼera. Soo káʼa̱nra iin ña̱ʼa xíʼin ta̱ loʼo yóʼo: “Kúnii̱ ná kotoún miíi̱ nda̱a̱ táki̱ʼva yiváún, ku̱ʼvi-iniún kuniún yi̱ʼi̱ ta ixato̱ʼún miíi̱ ndiʼi tiempo”. Soo tá ta̱ loʼo yóʼo kándíxara keʼéra ña̱ ni̱ka̱ʼa̱nra xíʼinra xa̱ʼa̱ ña̱ kindo̱o va̱ʼa kuitíra, ta̱ ta̱yóʼo va̱ása ndakiʼinra ta̱ loʼo yóʼo ña̱ koora táki̱ʼva se̱ʼera. Va̱ása va̱ʼa koo ña̱ yóʼo saá. Ki̱ʼva saá kúú ña̱ kéʼé Jehová xíʼinyó ndáa ki̱ʼin kuitíra na̱ ndixa kúni̱ ndataxi miína ndaʼa̱ra ña̱ va̱ʼa xa̱a̱na koona na̱ veʼera. Ta ki̱ʼva saá kúú ña̱ káʼa̱n Biblia: “Ndataxindó miíndó ta saátu ña̱ tákundó ndaʼa̱ Ndióxi̱, ta ná kooña nda̱a̱ táki̱ʼva íyo iin ña̱ yi̱i̱ ña̱ ndakiʼinra; chi saá kúú ña̱ kuniñúʼundó ndiʼi ña̱ ndákanixi̱níndó ña̱ ndasakáʼnundó Ndióxi̱” (Rom. 12:​1).

Na̱ʼa̱yó ña̱ kúʼvi̱-iniyó xíniyó Ndióxi̱ xíʼin ña̱ kándíxayóra

14. ¿Ndáa ki̱ʼva náʼa̱yó ña̱ kúʼvi̱-iniyó xíniyó Ndióxi̱ tá ndátaxiyó miíyó ndaʼa̱ra?

¹⁴ Ña̱ ndataxiyó miíyó ndaʼa̱ Ndióxi̱ náʼa̱yó ña̱ kúʼvi̱-iniyó xíniyó miíra. Ta ña̱yóʼo íyoña nda̱a̱ táki̱ʼva kéʼé na̱ tíndaʼa̱. Ki̱vi̱ tá xa̱a̱ tíndaʼa̱na ta̱ cristiano náʼa̱ra ña̱ kúʼvi̱-inira xínira ñá koo xíʼinra ta káʼa̱nra xíʼinñá ña̱ ndiʼi tiempo koora xíʼinñá ni ná ya̱ʼana nu̱ú tu̱ndóʼo. Soo su̱ví tindaʼa̱ kuitína ta xa̱a̱ va̱ʼa; chi na̱ʼa̱na ña̱ nda̱kú koo inina xíʼin táʼanna. Na̱ tíndaʼa̱ kúnda̱a̱-inina tá ná va̱ása keʼéna voto yóʼo va̱ása kivi tindaʼa̱na. Ki̱ʼva saá ndóʼo ndiʼi miíyó va̱ása kivi ndakiʼinyó ndiʼi ña̱ va̱ʼa ña̱ taxi Ndióxi̱ ndaʼa̱yó ni ña̱ kooyó na̱ veʼera tá va̱ása kéʼéyó iin voto ña̱ ndataxiyó miíyó ndaʼa̱ra. Nda̱a̱ táki̱ʼva kúnda̱a̱-iniyó ña̱ ndataxiyó miíyó ndaʼa̱ Ndióxi̱ kúni kachiña ña̱ keʼéyó ña̱ kúni̱ra, ta saátu kúni̱yó nda̱kú koo iniyó xíʼinra ni kúúyó na̱ yiví ku̱a̱chi ni nda̱a̱ ndáaka ña̱ ná kundoʼoyó (Mat. 22:37).

15. ¿Nda̱chun káʼa̱nyó ña̱ ndataxiyó miíyó ndaʼa̱ Ndióxi̱ kítáʼanña xíʼin ña̱ kándíxayóra?

¹⁵ Ña̱ ndataxiyó miíyó ndaʼa̱ Ndióxi̱ náʼa̱yó ña̱ kándíxayóra. Ña̱kán tá xa̱a̱ tá taxiyó miíyó ndaʼa̱ Jehová náʼa̱yó ña̱ kándíxayóra ta saátu kúnda̱a̱-iniyó ña̱ xíʼin iinlá miíra kivi kutáʼanyó (Sal. 73:28). Kúnda̱a̱-iniyó ña̱ sava yichi̱ ixayo̱ʼvi̱ña xíʼinyó ña̱ kachíñuyó nu̱úra saáchi ndóoyó ñuyǐví kini. Soo saátu kándíxayó ña̱ saxínu Ndióxi̱ ndiʼi ña̱ ni̱ka̱ʼa̱nra ta taxira bendición ndaʼa̱yó xa̱ʼa̱ ña̱ chíkaa̱yó ndee̱ (Fili. 2:15; 4:13). Xa̱ʼa̱ ña̱ kúúyó na̱ yiví ku̱a̱chi sava yichi̱ keʼéyó ña̱ va̱ása va̱ʼa, soo Jehová ixakáʼnuva-inira xa̱ʼa̱yó (kaʼvindó Salmo 103:​13, 14 xíʼin Romanos 7:​21-25). Kúnda̱a̱ káxi iniyó ña̱ taxira ña̱ va̱ʼa ndaʼa̱yó xa̱ʼa̱ ña̱ nda̱kú íyo iniyó xíʼinra (Job 27:5).

Ña̱ ndataxiyó miíyó ndaʼa̱ Ndióxi̱ kúú ña̱ sákusi̱í-iniyó

16, 17. ¿Nda̱chun ña̱ ndataxiyó miíyó ndaʼa̱ Ndióxi̱ sákusi̱íña iniyó?

¹⁶ Ña̱ ndataxiyó miíyó ndaʼa̱ Ndióxi̱ sákusi̱íña-iniyó, saáchi ndataxiyó ña̱ tákuyó ndaʼa̱ Jehová, nda̱a̱ táki̱ʼva ni̱ka̱ʼa̱n ta̱ Jesús: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hech. 20:35). Tá ni̱xi̱yo ta̱ Jesús nu̱ú ñuʼú yóʼo ta̱ kúú se̱ʼe Ndióxi̱ ke̱ʼéra ña̱yóʼo ña̱ nda̱taxira miíra ndaʼa̱ yivára ta xa̱ʼa̱ ña̱kán xi̱kusi̱í-inira. Ta tá xi̱kuni̱ra ndakindee̱ra, á kuxura á vií koora ña̱ xi̱keʼéra kúú ña̱ xi̱sanáʼa̱ra na̱ yiví ndáaña xi̱niñúʼu keʼéna ña̱ va̱ʼa kutakuna (Juan 4:34). Ña̱ xi̱keʼéra ña̱ xi̱kuni yivára kúú ña̱ xi̱sakúsi̱íní-inira. Ña̱kán ka̱chira: “Ndiʼi yichi̱ kéʼíi̱ ña̱ kúni̱ra” (Juan 8:29; Pro. 27:11).

¹⁷ Ta̱ Jesús ni̱na̱ʼa̱ra nu̱ú na̱ discípulora ndáaña xíniñúʼu keʼéna ña̱ va̱ʼa kusi̱í-inina: “Tá iinna kúni̱na kundiku̱nna yi̱ʼi̱ ná sandákoona keʼéna ña̱ kúni̱ miína” (Mat. 16:24). Tá kǒo kéʼékayó ña̱ kúni̱ miíyó kúyatinkayó nu̱ú Ndióxi̱ ta̱ kúʼvi̱-ini xíni miíyó. Ta ¿Á kivi kiʼinra kuenta xíʼinyó?

18. ¿Nda̱chun kúsi̱íka-iniyó ña̱ ndataxiyó miíyó ndaʼa̱ Ndióxi̱ nu̱úka ña̱ ndataxiyó miíyó ndaʼa̱ na̱ yiví á saxínuyó keʼéyó iin ña̱ kúni̱ miíyó?

¹⁸ Na̱ xa̱a̱ ndátaxi mií ndaʼa̱ Jehová ta kéʼéna ña̱ kúni̱ra si̱íní íyo na̱ yóʼo nu̱úka na̱ yiví na̱ saxínu ña̱ kúni̱ na̱ ñuyǐví yóʼo, á ña̱ saxínuna chiñu miína tá kúú ña̱ nduu kúikána. Soo na̱ ndásakáʼnu Ndióxi̱ si̱íní íyo na̱yóʼo (Mat. 6:24). Ña̱ sákusi̱í-ini na̱yóʼo kúú ña̱ ndásakáʼnuna Ndióxi̱ ta kéʼéna ña̱ kúni̱ra ta va̱ása nándósóna ña̱ nda̱taxina miína ndaʼa̱ra chi su̱ví ña̱ keʼé kuitína chiñu nu̱úra kúúña, ta Ndióxi̱ chíndayáʼviníra ña̱yóʼo (1 Cor. 3:9). Iinlá Ndióxi̱ kúú ta̱ chíndayáʼviní ña̱ nda̱kú íyo inina xíʼinra xa̱ʼa̱ ña̱ xa̱a̱ sa̱ndákoona ke̱ʼéna. Ta taxira ña̱ ndukúa̱an tuku na̱ xa̱a̱ ku̱chée ta miíra kundaana ndiʼi tiempo (Job 33:25; kaʼvi Hebreos 6:10).

19. ¿Ndáaña va̱ʼaní ndákiʼin na̱ xa̱a̱ nda̱taxin mií ndaʼa̱ Jehová?

¹⁹ Biblia káʼa̱nña ña̱yóʼo xíʼinyó: “Kuyatinndó nu̱ú Ndióxi̱ ta ta̱kán kuyatinra nu̱úndó” (Sant. 4:8; Sal. 25:14). Ta na̱ ndátaxi mií ndaʼa̱ Jehová na̱yóʼo kusi̱íní-inina ña̱ kutáʼanna xíʼinra. Nu̱ú inkaka artículo kotoyó nda̱chun ndáyáʼviní chika̱a̱-iniyó ña̱ ndataxiyó miíyó ndaʼa̱ Jehová ta saá xa̱a̱yó kooyó kuentara.

[Nota]

¿Ndáaña ndakuiún?

• ¿Ndáaña xíniñúʼu keʼéyó ña̱ ndataxiyó miíyó ndaʼa̱ Ndióxi̱?

• ¿Ndáaña va̱ʼa ndákiʼinyó tá xa̱a̱ ndátaxiyó miíyó ndaʼa̱ Ndióxi̱?

• Na̱ ndásakáʼnu Jehová ¿nda̱chun xíniñúʼu ndataxina miína ndaʼa̱ra?

[Ña̱ ndákatu̱ʼunyó]

[Na̱ʼná]

Ña̱ ndátaxiyó miíyó ndaʼa̱ Jehová sákusi̱íníña iniyó