Ke ka Baka La’ng o Swanetše go Ineela go Jehofa?

“Bošegong bjo morongwa wa Modimo o ile a ema kgaufsi le nna, e lego Modimo yo ke lego wa gagwe.”—DIT. 27:23.

1. Ke megato efe yeo bao ba yago kolobetšong ba šetšego ba e gatile, gona se se rotoša dipotšišo dife?

“MOTHEONG wa sehlabelo sa Jesu Kriste, na o sokologile dibeng tša gago gomme wa ineela go Jehofa gore o dire thato ya gagwe?” Ye ke e nngwe ya dipotšišo tše pedi tšeo di botšišwago bao ba yago kolobetšong mafelelong a polelo ya kolobetšo. Ke ka baka la’ng Bakriste ba swanetše go ineela go Jehofa? Go ineela go Modimo go re hola bjang? Ke ka baka la’ng motho a ka se rapele Modimo ka tsela yeo a e amogelago ge a se a ineela go yena? Re swanetše go thoma ka go ahla-ahla seo boineelo e lego sona gore re kwešiše dikarabo.

2. Go ineela go Jehofa go bolela’ng?

² Go ineela ga motho go Modimo go bolela’ng? Ela hloko kamoo Paulo a hlalositšego tswalano ya gagwe le Modimo. Ge a be a bolela le ba bangwe ba bantši bao ba bego ba nametše lesela-watle leo le bego le le kgaufsi le go nwelela, o ile a bitša Jehofa gore ke “Modimo yo [a] lego wa gagwe.” (Bala Ditiro 27:22-24.) Bakriste ba therešo ka moka ke ba Jehofa. Ka mo go fapanego, lefase ka kakaretšo “le rapaletše matleng a yo kgopo.” (1 Joh. 5:19) Bakriste e ba ba Jehofa ge ba ba ineela go yena ka tsela e amogelegago ka thapelo. Boineelo bjo bjalo ke keno ya motho ka noši. E latelwa ke go kolobetšwa meetseng.

3. Kolobetšo ya Jesu e be e swantšhetša’ng, gona balatedi ba gagwe ba ka ekiša mohlala wa gagwe bjang?

³ Jesu o re beetše mohlala ge a be a dira phetho ya go dira thato ya Modimo. Ka ge a belegetšwe setšhabeng seo se ineetšego sa Isiraele, o be a šetše a ineetše go Modimo. Lega go le bjalo, ka go kolobetšwa o dirile selo se bohlokwa go feta seo se bego se nyakwa ke Molao. Lentšu la Modimo le bontšha gore o itše: “Bona! Ke tlile . . . go dira thato ya gago, wena Modimo.” (Baheb. 10:7; Luka 3:21) Ka gona, kolobetšo ya Jesu e be e swantšhetša go itliša ga gagwe go Modimo e le gore a dire thato ya Tatagwe. Balatedi ba gagwe ba ekiša mohlala wa gagwe ge ba itliša gore ba kolobetšwe. Lega go le bjalo, tabeng ya bona go kolobetšwa  meetseng ke pontšho ya phatlalatša ya go bontšha gore ba ineetše go Modimo ka thapelo.

Kamoo go Ineela go re Holago ka Gona

4. Segwera sa Dafida le Jonathane se re ruta’ng mabapi le go itlama?

⁴ Boineelo bja Bokriste ke selo sa bohlokwa, go feta go fo itlama. Ka gona, go ineela go re hola bjang? Ka mohlala, a re ahla-ahle kamoo go itlama go holago ka gona ditswalanong tša batho. Mohlala o mongwe ke wa segwera. E le gore o thabele tokelo ya go ba le mogwera, o swanetše go rwala boikarabelo bjo bo tlišwago ke go ba mogwera. Seo se akaretša go itlama—go ikwa o e-na le boikarabelo bja go hlokomela mogwera wa gago. Batho ba bangwe bao ba ilego ba ba le segwera se sebotse kudu ka Beibeleng ke Dafida le Jonathane. Ba ile ba ba ba dira kgwerano ya segwera. (Bala 1 Samuele 17:57; 18:1, 3.) Gaešita le ge segwera seo se nago le tlemo e bjalo se hwetšwa ka sewelo, gantši segwera se a tia ge bagwera ba e-na le tlemo e itšego seng sa bona.—Die. 17:17; 18:24.

5. Lekgoba le be le ka holwa bjang sa ruri ke go ineela go mong wa lona yo a lokilego?

⁵ Molao woo Modimo a o neilego Baisiraele o hlalosa tswalano e nngwe yeo e bego e hola batho ge ba be ba itlama. Ge e ba lekgoba le be le nyaka go dula le šireletšegile ka go dula le mong wa lona yo a lokilego, le be le swanetše go dira tumelelano ya sa ruri yeo e le tlemaganyago le mong wa lona. Molao o re: “Xe mohlanka eo a ka bolêla a re: Mong wa-ka ke a mo rata, le mosadi wa-ka le bana ba-ka ke a ba rata, xa ke rate xo hunoloxa ka tloxa, e mobyalo mong wa xaxwe a mo lebanyê le Modimo, a mo emiše mojakong le xe e le sejakwaneng, ’me mong wa xaxwe a mo thulê tsêbê ka thšwana, ’me a bê mohlanka wa xaxwe wa ka mehla.”—Ek. 21:5, 6.

6, 7. (a) Go itlama go hola batho bjang? (b) Seo se bontšha’ng mabapi le tswalano ya rena le Jehofa?

⁶ Lenyalo ke tswalano yeo e nyakago boitlamo bjo bo feletšego. Ke go ineela go motho, e sego go tumelelano e ngwadilwego fase. Batho ba babedi bao ba fo dulago gotee ba se ba nyalana le ka mohla ba ka se be le tšhireletšego ya kgonthe gomme le bana ba bona ba ka se be le yona. Eupša balekane bao ba ineetšego lenyalong leo le hlomphegago ba tutuetšwa ke Mangwalo gore ba katanele go rarolla ka lerato mathata ao a ka tšwelelago.—Mat. 19:5, 6; 1 Bakor. 13:7, 8; Baheb. 13:4.

⁷ Mehleng ya Beibele, batho ba be ba holwa ke go ngwala fase tumelelano ya tša kgwebo le mošomo. (Mat. 20:1, 2, 8) Le lehono go sa dutše go le bjalo. Ka mohlala, pele re thoma kgwebo goba re šomela khampani e itšego, re holwa ke go ngwala tumelelano fase. Ka gona, ge e ba go itlama go tiiša segwera, lenyalo le mošomo, ruri boineelo bjo bo feletšego bo tla go hola kudu tswalanong ya gago le Jehofa! Anke ga bjale re ahla-ahleng kamoo batho ba bogologolo ba hotšwego ke go ineela go Jehofa Modimo le kamoo se se bego se feta go fo itlama.

Kamoo go Ineela go Modimo go Hotšego Baisiraele

8. Go ineela go Modimo go be go bolela’ng go Baisiraele?

⁸ Setšhaba sa Isiraele ka moka se be se ineetše go Jehofa ge se be se dira keno go Modimo. Jehofa o ile a se kgobokanya kgaufsi le Thaba ya Sinai, gomme a re go sona: “Xe Le tlo theetša ruri se ke se bolêlaxo, la hlôkômêla kxwêranô ya-ka, ké mo Le tl’o xo ba baruiwa ba-ka mo dithšabeng ka moka.” Setšhaba ka moka se ile sa araba ka go dumelelana sa re: “Tšohle tše Morêna a di boletšexo re tlo di dira.” (Ek. 19:4-8) Go ineela go be go bolela mo gontši go Baisiraele go feta go fo itlama go dira selo se sengwe. Go be go bolela gore ke ba Jehofa, gomme Jehofa o ile a ba swara bjalo ka “baruiwa” ba gagwe.

9. Baisiraele ba ile ba holwa bjang ke go ineela go Modimo?

⁹ Baisiraele ba ile ba holwa ke go ba ba Jehofa. O be a ba botegela e bile o ile a ba hlokomela bjalo ka ge mma yo lerato a hlokomela  ngwana wa gagwe. Ge a be a bolela le Baisiraele, Modimo o itše: “A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?—Le xe yêna a ka lebala, Nna nka se Xo lebale.” (Jes. 49:15) Jehofa o be a ba hlahla ka Molao, a ba kgothatša ka baporofeta le go ba šireletša ka barongwa. Mopsalme o ngwadile gore: “’Me Lentšu la xaxwe ó le anexetše ba-Jakobo; Ba-Isiraele ó ba anexetše melaô ya xaxwe le mekxwa ya xaxwe. Mo xo ba-ntlê bohle xa a ešo a bá a di dira.” (Ps. 147:19, 20; bala Psalme 34:7, 19; 48:14.) Bjalo ka ge Jehofa a ile a hlokomela setšhaba sa gagwe mehleng e fetilego, le lehono o tla hlokomela bao ba ineetšego go yena.

Lebaka Leo ka Lona re Swanetšego go Ineela go Modimo

10, 11. Na re belegetšwe ka lapeng la Modimo la legohle? Hlalosa.

¹⁰ Ba bangwe ge ba dutše ba nagana ka boineelo le kolobetšo ya Bokriste, ba ka ipotšiša gore: ‘Ke ka baka la’ng ke sa fo rapela Modimo ntle le gore ke ineele go yena?’ Lebaka e ba le le kwagalago ge re hlahloba boemo bja rena e le ka kgonthe pele ga Modimo. Gopola gore ka lebaka la sebe sa Adama, ka moka ga rena re belegetšwe ka ntle ga lapa la Modimo. (Baroma 3:23; 5:12) Go ineela go Modimo ke senyakwa sa bohlokwa e le gore re amogelwe ka lapeng la gagwe la legohle. A re boneng lebaka.

¹¹ Ga go le o tee wa rena yoo a nago le tate yo a ka re neago bophelo bjo bo phethagetšego, go etša ge Modimo a be a rerile. (1 Tim. 6:19) Ga se ra belegwa re le barwa ba Modimo ka gobane ge batho ba pele ba babedi ba be ba dira sebe, moloko wa batho ka moka o ile wa aroganywa le Tatago wona yo lerato yoo e lego Mmopi. (Bapiša le Doiteronomio 32:5.) Go tloga ka nako yeo go ya pele, moloko wa batho o ile wa phela ka ntle ga lapa la Jehofa la legohle, o arogantšwe le Modimo.

12. (a) Ke bjang batho ba sa phethagalago ba ka bago karolo ya lapa la Modimo? (b) Ke megato efe yeo re swanetšego go e gata pele re kolobetšwa?

¹² Lega go le bjalo, re le motho ka o tee ka o tee re ka kgopela Modimo gore a re amogele ka lapeng la gagwe la bahlanka ba amogelegago. * Seo se ka kgonega bjang ka ge re le badiradibe? Moapostola Paulo o ngwadile gore: “Ge re be re le manaba, re ile ra boelanywa le Modimo ka lehu la Morwa wa gagwe.” (Baroma 5:10) Ge re kolobetšwa re kgopela Modimo gore a re nee letswalo le lebotse e le gore re amogelege go yena. (1 Pet. 3:21) Lega go le bjalo, pele re kolobetšwa go na le megato yeo re swanetšego go e gata. Re swanetše go tseba Modimo, re ithute go mmota, re itshole gomme re fetoše ditsela tša rena. (Joh. 17:3; Dit. 3:19; Baheb. 11:6) Le gona, go na le selo se sengwe seo re swanetšego go se dira pele re ka amogelwa ka lapeng la Modimo. Selo seo ke’ng?

13. Ke ka baka la’ng e le mo go swanetšego gore motho a dire keno ya go ineela go Modimo e le gore a be karolo ya lapa la Gagwe la bahlanka ba amogelegago?

¹³ Pele motho yo a aroganego le Modimo a ka ba karolo ya lapa la Modimo la bahlanka ba amogelegago, o swanetše go ikana go Jehofa. Gore o kwešiše lebaka, nagana ka tate yo a hlomphegago yo a bontšhago botho go mofsa yo a se nago batswadi gomme a nyaka go mo dira setho sa lapa la gagwe. Tate yo o tsebja e le monna wa go loka. Lega go le bjalo, pele a tšea mofsa yoo gore e be morwa wa gagwe, monna yoo o nyaka gore mošemane yo a dire keno. Ka gona, monna yo o re: “Pele ke go amogela o le morwa wa-ka, ke nyaka go tseba gore o tla nthata le go ntlhompha bjalo ka tatago.” Monna yo o tla amogela mofsa yo ka lapeng la gagwe ge feela a ikemišeditše go ikana. Na se ga se kwagale? Ka tsela e swanago, Jehofa o amogela feela bao ba ikemišeditšego go dira keno ya go ineela go yena gore e be ditho tša lapa la gagwe. Beibele e re: “Itlišeng go  yena: le le sehlabelo se phelago, le ineetše e bile le swanelega gore a le amogele.”—Baroma 12:1, The New English Bible.

Pontšho ya Lerato le Tumelo

14. Ke ka tsela efe go ineela e lego pontšho ya lerato?

¹⁴ Go dira keno ya go ineela go Modimo ke pontšho ya lerato la rena le le tseneletšego go Jehofa. Ka ditsela tše itšego go swana le go dira keno ya lenyalo. Monna wa Mokriste o bontšha lerato la gagwe ka go dira keno ya gore o tla botegela mosadi wa gagwe, go sa šetšwe seo se ka diregago. Seo ke go dira tlemo go motho go e na le go fo holofetša go dira selo se itšego. Monna wa Mokriste o kwešiša gore a ka se be le tokelo ya go dula le mosadi wa gagwe ge e ba a sa dire keno ya lenyalo. Ka tsela e swanago, re ka se thabele ka botlalo mehola ya go ba karolo ya lapa la Jehofa ntle le gore re dire keno ya go ineela. Ka gona, go sa šetšwe go se phethagale ga rena, re ineetše go Modimo ka gobane re nyaka go ba ba gagwe gomme re ikemišeditše go mmotegela go sa šetšwe seo se ka diregago.—Mat. 22:37.

15. Ke ka tsela efe boineelo e lego pontšho ya gore re na le tumelo?

¹⁵ Ge re ineela go Modimo, se se bontšha gore re na le tumelo. Ka tsela efe? Tumelo ya rena go Jehofa e re kgodiša gore go batamela kgaufsi le Modimo ke selo seo se re swanetšego. (Ps. 73:28) Re a tseba gore ka mehla go ka se be bonolo gore re sepele le Modimo mola re phela gare ga “moloko o kgopamego le o phetlegilego,” eupša re bota kholofetšo ya Modimo ya gore o tla re thekga maitekong a rena a go dira bjalo. (Bafil. 2:15; 4:13) Re a tseba gore ga se ra phethagala, eupša re kgodišegile gore Jehofa o tla re gaugela ge re dira diphošo. (Bala Psalme 103:13, 14; Baroma 7:21-25.) Re na le tumelo ya gore Jehofa o tla putsa boikemišetšo bja rena bja go dula re botega.—Jobo 27:5, bapiša le NW.

Go Ineela go Modimo go Tliša Lethabo

16, 17. Ke ka baka la’ng go ineela go Jehofa go tliša lethabo?

¹⁶ Go ineela go Jehofa go tliša lethabo ka gobane go akaretša go ikgafa. Jesu o boletše therešo ya bohlokwa ge a be a re: “Go na le lethabo le legolo go neeng go feta go amogeleng.” (Dit. 20:35) Nakong ya bodiredi bja gagwe bja lefaseng, Jesu o ile a hwetša lethabo leo le tlišwago ke go nea. Ge go be go nyakega, o be a sa khutše, a sa je e bile a gafa le boiketlo bja gagwe e le gore a thuše ba bangwe go hwetša tsela e išago bophelong. (Joh. 4:34) Jesu o be a thabišwa ke go dira gore pelo ya Tatagwe e thabe. O itše: “Ka mehla ke dira dilo tše di mo kgahlišago.”—Joh. 8:29; Die. 27:11.

¹⁷ Ka gona, Jesu o ile a bontšha balatedi ba gagwe tsela e kgotsofatšago ya bophelo ge a be a re: “Ge e ba motho le ge e le ofe a nyaka go ntšhala morago, a a itatole.” (Mat. 16:24) Go dira bjalo go re batametša kgaufsi le Jehofa.  Na go na le motho yo mongwe yo a ka re ratago kudu yo re ka ipeago ka diatleng tša gagwe?

18. Ke ka baka la’ng go phela ka go dumelelana le boineelo bja rena go Jehofa go tliša lethabo go feta go ineela go selo se sengwe goba motho yo mongwe?

¹⁸ Ge re ineela go Jehofa gomme ka morago re phela ka go dumelelana le boineelo bjoo ka go dira thato ya gagwe, seo se tliša lethabo le legolo go feta go ineela go selo le ge e le sefe goba motho le ge e le ofe. Ka mohlala, batho ba bantši ba ineela go phegeleleng mahumo le ge a sa ba tlišetše lethabo le kgotsofalo ya kgonthe. Lega go le bjalo, bao ba ineetšego go Jehofa ba hwetša lethabo la sa ruri. (Mat. 6:24) Tokelo ya go ba “badirišani ba Modimo” e dira gore ba thabe, lega go le bjalo ga ba ineele modirong wo, eupša ba ineela go Modimo wa rena yo a nago le tebogo. (1 Bakor. 3:9) Ga go na motho yo a ka lebogago boineelo bja bona go feta kamoo yena a bo lebogago ka gona. E bile o tla dira gore bahlanka ba gagwe ba botegago ba boele bofseng e le gore ba holwe ke lerato la gagwe la ka mo go sa felego.—Jobo 33:25; bala Baheberu 6:10.

19. Ke tokelo efe yeo e thabelwago ke bao ba ineetšego go Jehofa?

¹⁹ Go ineela go Jehofa go dira gore o be le tswalano ya kgaufsi le yena. Beibele e re: “Batamelang Modimo, gomme o tla le batamela.” (Jak. 4:8; Ps. 25:14) Sehlogong se se latelago re tla ahla-ahla lebaka leo ka lona re ka kgodišegago ka kgetho yeo re e dirago ya go ba ba Jehofa.

[Mongwalo wa tlase]

O be o tla Araba Bjang?

• Go ineela go Modimo go bolela’ng?

• Go ineela go Modimo go re hola bjang?

• Ke ka baka la’ng Bakriste ba swanetše go ineela go Jehofa?

[Dipotšišo tša Thuto]

[Seswantšho go letlakala 6]

Go phela ka go dumelelana le boineelo bja rena go tliša lethabo la sa ruri