Omokonda Yatyi Wesukisila Okulipakula Ku Jeova?

“Mokonda otyinthiki tyino, oandyu ya Huku yange yeile ponthele yange.” —ATOS 27:23.

1. Vana velipakula pala okumbatisalwa, vatetekela okulinga tyi? Otyo tyikatula omapulo patyi?

 “MOTYILIKUTILA tya Jesus Kristu, okuti welivela umue ononkhali mbove olipakula ku Jeova opo ulinge ehando liae?” Eli o limwe po mapulo evali vokumbatisalwa vena okukumbulula po kumanuhuka kuelongomona liombatisimu. Omokonda yatyi Ovakristau vesukisila okulipakula ku Jeova? Oñgeni okulipakula ku Huku tyituetela ouwa? Omokonda yatyi omunthu kapondola okufenda Huku monkhalelo yapandwa, inkha kelipakula kwe? Opo tuvase omakumbululo, tete tuesukisa okunoñgonoka oityi okulipakula.

2. Okulipakula ku Jeova tyihangununa tyi?

² Okulipakula ku Huku tyihangununa tyi? Tala oñgeni apostolu Paulu apopia konthele youpanga wae na Huku. Kolupala lua vakuavo ovanyingi mowato ankho ukahi motyiponga, oe waihana Jeova okuti “o Huku yange.” (Tanga Atos 27:22-​24.) Ovakristau aveho votyotyili, ova Jeova. Anthi, ouye auho, “ukahi pomaoko ondingavivi.” (1 João 5:​19) Ovakristau vakala va Jeova tyina valinga elipakulo liavo kwe melikuambelo. Ngotyo elipakulo olio, omunthu waana. Iya pahe konyima ambatisalwa momeva.

3. Oityi ombatisimu ya Jesus ankho ilekesa? Oñgeni ovalanduli vae vemuhetekela?

³ Jesus wetuavela ongeleka etyi aholovona okulinga ehando lia Huku. Mokonda oe ankho watyitilua melongo lio Isilayeli lielipakulale, oe ankho wapakuluale ku Huku. No ngotyo, pombatisimu yae oe walingile otyipuka tyimwe tyilamba puetyi ankho tyiitwa Movitumino. Ondaka ya Huku ilekesa etyi apopia okuti: “Tala! Huku yange, ame neya . . . opo ndyilinge ehando liove.” (Hebreus 10:7; Lucas 3:​21) Ngotyo, ombatisimu ya Jesus elekeso liokuti welipakula oe muene ku Huku, opo alinge ehando lia Tate yae. Ovalanduli vae vemuhetekela tyina velipakula ovo muene pala okumbatisalwa. Anthi, kuvo okumbatisalwa momeva,  okulekesa kounyingi okuti valinga elipakulo liavo ku Huku melikuambelo.

Oñgeni Okulipakula Tyituetela Ouwa

4. Oupanga wa David na Jonatan utulongesa tyi konthele yokulinga omulao?

⁴ Elipakulo lio Vakristau ku Huku otyipuka tyimwe tyakolela unene. Tyapona vali okuliava. Oñgeni okulipakula ku Huku tyituetela ouwa? Mongeleka, tutalei oñgeni okulinga oupanga nomunthu mukuetu tyituetela ouwa. Opo ukale nouwa utundilila kokukala nepanga, una okutavela okulinga oupanga. Otyo tyakutikinya omphango—ove ulitehelela okuti una okulinga nawa epanga liove. Oupanga wapama wapopiwa mo Mbimbiliya, umwe o wa David na Jonatan. Valingile omphango youpanga kese umwe na mukuavo. (Tanga 1 Samuel 17:57; 18:​1, 3.) Namphila oupanga wokulinga omphango ngoyo kawakakele, mahi omaupanga apama etei ku kese umwe tyina asukalala nokufuisapo otyilinga tyae.—Provérbios 17:17; 18:24.

5. Oñgeni omupika apondola okutualako okupola ouwa wokukala apeho nomuhona omuwa?

⁵ Ovitumino Huku aavelele ova Isilayeli, vipopia oupanga omukuavo wetela ovanthu ouwa omunene, inkha valinga omphango. Inkha omupika uhanda okukala apeho womuhona wae ondalawa, ankho una okutavela okulinga omphango nae. Ovitumino viati: “Inkha omupika atualako okupopia okuti: ‘Ame hihande okuenda, mokonda tyotyili ndyihole omuhona wange, nomukai wange novana vange.’ Moluotyo, omuhona wae una okumutuala ponthele ya Huku yo tyotyili, emufwenaika pepito ine opotyikulilo. Iya omuhona wae emutiula notyitungo kokutwi, akala omupika wae apeho.”—Êxodo 21:5, 6.

6, 7. (a) Oñgeni okuhoneka tyina tulinga omphango tyietela ovanthu ouwa? (b) Oityi tyapopia konthele youpanga wetu na Jeova?

⁶ Okulinepa ewaneko limwe lihanda okulinga omphango onene. Omphango oyo ilingwa nomunthu, ha popapelo vala. Tyina omulume nomukai vakala kumwe tyahalingile okasamendo, vetupu epamo lio tyotyili, novana vavo vetupu. Mahi, vana valinga omphango kese umwe na mukuavo, mokasamendo kahumbwa, valinga ononkhono mbokuundapesa Ovihonekwa, pala okutetulula ovitateka viavo nohole.—Mateus 19:5, 6; 1 Coríntios 13:7, 8; Hebreus 13:4.

⁷ Kohale okulinga omphango konthele yovitanda no yovilinga, ankho tyietela ovanthu ouwa. (Mateus 20:1, 2, 8) Na hono tyieta ouwa. Inkha tulinga omphango yahonekwa tyina tuhimbika otyitanda na mukuetu, ine tuhimbika okuundapela omuhona, matyituetela ouwa. Inkha Omphango ipameka oupanga, notyinepo, novilinga, okulipakula nomutima auho ku Huku, tyipameka vali unene oupanga wove na Jeova! Tutalei oñgeni okulipakula ku Jeova Huku tyaetelele ovanthu ouwa kohale, no ñgeni otyo ankho tyapona okulinga vala omphango.

Oñgeni Okulipakula ku Huku Tyaetelele Ouwa ova Isilayeli

8. Okulipakula ku Huku ankho tyihangununa tyi ko va Isilayeli?

⁸ Elongo aliho lio Isilayeli ankho velipakula ku Jeova puetyi valinga omulao ku Huku. Jeova watumine veliongiye ponthele Yomphunda Sinai, iya evepopila okuti: “Inkha mutavela ondaka yange, nokuendela nawa-nawa momphango yange, mamukala ovanthu vange ovaholovonwa pokati komalongo omakuavo aeho.” Iya aveho avakumbulula okuti: “Atyiho Jeova apopia matutyilingi.” (Êxodo 19:4-8) Elipakulo ova Isilayeli valingile, ankho liavilapo vali tyipona omulao wokulinga otyipuka tyimwe. Ankho tyilekesa okuti ovanthu va Jeova, iya Jeova ankho uvetekula ‘ngovanthu vae vakolela vali.’

9. Oñgeni okulipakula ku Huku tyaetelele ouwa o Isilayeli?

⁹ Okukala ovanthu va Jeova tyaetelele ouwa ova Isilayeli. Oe ankho omukuatyili  navo, evetekula ngatyina he wokuna oluembia atekula omona wae. Huku wapopilile o Isilayeli okuti: “Omukai upondola okulimbwa olukembe luae, ahakala nokankhenda nomona watunda meimo liae? Namphila ovakai ovo vapondola okulimbwako, mahi, ame ove himekulimbwa.” (Isaías 49:15) Jeova ankho uveavela ehongolelo Novitumino, ankho uvepameka novauli, nokuveamena no noandyu. Omuhoneki wo no salmu wati: “Popila Jako ondaka yae. Popila Isilayeli ovitumino viae nomatokolo ae ekoyeso. Oe kalingile ngotyo nelongo nalike ekuavo.” (Salmo 147:19, 20; Tanga Salmo 34:7, 19; 48:14.) Ngetyi Jeova atekulile elongo liae kohale, tupu utekula vana velipakula kwe hono.

Omokonda Yatyi Okulipakula ku Huku Tyesukisila

10, 11. Okuti onthue tuatyitilwa mokati kombunga ya Huku? Tyihangununa.

¹⁰ Tyina vasoka kokulipakula nokumbatisalwa, vamwe velipula okuti, ‘Omokonda yatyi hipondolela okufenda Huku tyehelipakulile kwe?’ Ehunga liyandyuluka nawa tyina tunoñgonoka okuti okukala konthele ya Huku hono tyakolela. Hinangela okuti, mokonda yonkhali ya Andau, atuho tuatyitilwa kondye yombunga ya Huku. (Romanos 3:23; 5:12) Okulipakula ku Huku tyakolela pala tutavelwe okunyingila mombunga yae. Tutalei omokonda yatyi.

¹¹ Na umwe puonthue una he upondola okumuavela omuenyo wahapu, ngetyi Huku ahandele. (1 Timóteo 6:19) Etyi tuatyitwa katuvana va Huku, mokonda etyi omulume nomukai wotete valinga onkhali, vayapula ovanthu aveho pano pohi ku Tate woluembia, Omupakeko wavo. (Tyieleka na Deuteronômio 32:5) Tunde opo, ovanthu vekahi kondye yombunga ya Jeova, tyayapuka ku Huku.

12. (a) Oñgeni ovanthu ovakuankhali vapondola okunyingila mombunga ya Huku? (b) Oityi tuna okulinga tete tyina nkhele tuhenembatisalwe?

¹² Anthi, kese umwe puonthue upondola okuita ku Huku emutavele okunyingila mombunga yovaumbili vae vapandwa. a Oñgeni onthue ovanthu ovakuankhali matutyivili? Apostolu Paulu wahoneka okuti: “Etyi ankho tunondyale, tuapakwa vali kumwe na Huku mokonda yononkhia mbo Mona wae.” (Romanos 5:10) Pombatisimu tuita ku Huku omutima omuwa, opo oe etutavele. (1 Pedro 3:​21) Anthi, tyina nkhele tuhenembatisalwe, kuna ovipuka tuna okulinga. Tuna okuiwa Huku, nokulilonga okumuyumba onthumbi, nokulivela, nokupilulula ononkhalelo mbomuenyo wetu. (João 17:3; Atos 3:19; Hebreus 11:6) Kuna vali otyipuka otyikuavo tuna okulinga tyina tuhenembatisalwe. Otyipuka patyi?

13. Omokonda yatyi tyaviuka okuti omunthu una okulinga omphango ku Huku opo anyingile mombunga yovafendi Vae vapandwa?

¹³ Putyina omunthu wokuli kokule na Huku ehenetavelwe mombunga yovaumbili vapandwa va Huku, tete una okulinga omulao ku Jeova. Pala okunoñgonoka omokonda yatyi, nkhele soka ku he umwe ondalawa, una okankhenda nomona umwe onthyiwe, uhanda omona oo akale wombunga yae. Omulume oo wiiwe okuti ondalawa. Mahi, tyina nkhele ehenetavele omona oo akale omona wae, oe uhanda omona oo alinge omulao. Moluotyo, omulume upopia okuti, “Putyina nkhele nehenetavele ukale omona wange, nesukisa okuiwa okuti ove mokala nohole nehumbilo naame nga tyina ndyi tate yove.” Inkha omona oo utavela okulinga omphango oyo, opo vala omulume oo memutavela akale omona wae mombunga. Okuti otyo, katyaviukile? Na Jeova utavela vala mombunga yae vana vahanda okulinga omphango yokulipakula kwe. Ombimbiliya yati: “Liavei  kwe ngoviavelwa vina omuenyo ngo nosandu nokuapandwa.”​—Romanos 12:1, Tradução Interconfessional

Okulipakula Tyituka Kohole Nekolelo

14. Omokonda yatyi okulipakula tyilekesa okuti tuna ohole?

¹⁴ Okulinga elipakulo ku Huku, elekeso liokuti tuhole Jeova nomutima wetu auho. Mononkhalelo mbumwe tyelifwa nomphango yokasamendo. Omukristau manepe ulekesa ohole yae na una manepe nae, mokukala omukuatyili movipuka aviho. Otyo omulao alinga nomunthu, upona omulao vala wokulinga otyipuka tyimwe. Omukristau oo utyii okuti manepe omphunga yae, mokonda walinga omphango yotyinepo. Tupu, nonthue katupondola okukala nouwa wokunyingila mombunga ya Jeova, inkha katulingi elipakulo lietu. Moluotyo, tulipakula onthue muene ku Huku, mokonda namphila tuvakuankhali, tuhanda okukala ovanthu vae, nokuatokola okukala ovakuatyili movipuka aviho.—Mateus 22:37.

15. Oñgeni elipakulo lielikuata nekolelo?

¹⁵ Tyina onthue muene tulipakula ku Huku, tyilekesa okuti tuna ekolelo. Omokonda yatyi? Ekolelo lietu mu Jeova lituavela onthumbi yokuti okufuena ku Huku, otyo otyipuka otyiwa pala onthue. (Salmo 73:28) Onthue tutyii okuti okueenda na Huku hapeho tyapepuka , mokonda tukahi ‘pokati kombuto yovanthu onondingavivi nokuahaviukile.’ Anthi, tuna onthumbi yokuti Huku metukuatesako ngetyi alaa. (Filipenses 2:15; 4:13) Onthue tutyii okuti tuvakuankhali, mahi tuna onthumbi yokuti Jeova metutekula nokankhenda, alo umwe tyina tuamalingi oviponyo. (Tanga Salmo 103:13, 14; Romanos 7:21-25.) Tuna ekolelo liokuti Jeova meketuyamba, mokonda yetokolo lietu liokutualako nekoleleyo.—Jó 27:5.

Okulipakula ku Huku Tyituala Kehambu

16, 17. Omokonda yatyi okulipakula ku Jeova tyituala kehambu?

¹⁶ Okulipakula ku Jeova tyieta ehambu, mokonda tyakutikinya okuliava onthue muene. Jesus wapopia otyili etyi ati: “Okuava tyieta vali ehambu tyipona okupewa.” (Atos 20:35) Jesus tyotyili wakalele nehambu liokuava mokueenda kuovilinga viae viokuivisa pano pohi. Pamwe ankho utupu omuvo wokupululukuapo, wokulia, nomuenyo omuwa, opo avatele vakuavo okuvasa ondyila yomuenyo. (João 4:34) Jesus wahambukilue unene okuhambukiswa omutima wa Tate yae. Jesus wati: “Ame apeho ndyilinga ovipuka vimuhambukiswa.”—João 8:29; Provérbios 27:11.

¹⁷ Ngotyo, Jesus walekesa ovalanduli vae ondyila yomuenyo wehambu etyi ati: “Inkha omunthu umue ahanda okulandula muame, ayekepo okulipanda oe muene.” (Mateus  16:24) Okuti kuna omunthu omukuavo oku tupondola okulipakula metutekula vali noluembia?

18. Omokonda yatyi okutyinda omuenyo welikuata nelipakulo lietu ku Jeova, tyihambukiswa vali, tyipona okulipakula kotyipuka ine okomunthu umwe vali?

¹⁸ Okulipakula ku Jeova nokutyinda omuenyo welikuata nelipakulo olio, mokulinga ehando liae, tyieta ehambu enene, tyipona okulipakula kotyipuka ine okomunthu umwe vali. Ovanthu ovanyingi vapakula omienyo viavo mokuovola omalumono, mahi kavavasi ehambu lio tyotyili. Anthi, vana velipakula ku Jeova vavasa ehambu lihapu. (Mateus 6:24) Elao liokukakala ‘ovaundapi kumwe na Huku,’ livekalesa nehambu, tyetyi kavelipakulile kovilinga, anthi, velipakula ku Huku yetu wolupandu. (1 Coríntios 3:9) Na umwe vali upandula unene ngotyo ononkhono valinga, tyipona Huku. Oe alo umwe makakondola koukuendye ovaumbili vae vekolelo, opo vapole ouwa keteku liae apeho.—Jó 33:25; Tanga Hebreus 6:10.

19. Vana velipakula ku Jeova vena elao patyi?

¹⁹ Okupakula omuenyo wove ku Jeova, tyikukalesa noupanga omunene nae. Ombimbiliya yati: “Fuenei ku Huku, nae opo afuene kuonwe.” (Tiago 4:8; Salmo 25:14) Monthele mailandulako, matukelilongesa omokonda yatyi tupondola okukala nonthumbi konthele yokuholovona okukala ovanthu va Jeova.

[Onondaka Poutoi]

Oñgeni Ove Mokumbulula?

• Okulipakula ku Huku Tyihangununa tyi?

• Oñgeni okulipakula ku Huku tyituetela ouwa?

• Omokonda yatyi Ovakristau vesukisila okulipakula ku Jeova?

[Omapuko Elongeso]

[Ehangununo liolutalatu pefo 12]

Okuendela melipakulo lietu tyituala kombembwa yahapu