A Uchul Me Kede Tuib a Rengud el Mo er a Jehovah

“Ele kesus e a tal anghel ra Dios el kbereked er ngii a mle dechor er bita er ngak.”​—RELLIR 27:⁠23.

1. Ngera el tekoi a kirel a chad el remuul er a uchei er a bo lenguu a techolb, e tia el omeruul ngmo uchul a ngera el ker?

 “NGOEAK sel tengetengel a Jesus Kristus e ke mla obult er a kngtim e tongetengii a klengar er kau el mo meruul a soal a Jehovah?” Tiang a ta er aike el eru el ker el loker er ngii el mo er a chad el mochu metecholb er a ulebengelel sel cheldecheduch er a techolb. Ngera uchul me a Rekristiano a kirir el tuib a klengar er tir el mo er a Jehovah? Ngmo uchul a ngera el klungiaol sel detengetengii a klengar er kid el mo er a Dios? Ngera uchul me a Dios a diak el sebechel el kongei er a omengull er a chad el dirkak el tibir a klengar er ngii el mo er Ngii? Ngkired el omuchel el mo medengelii a belkul a telbilel a reng me bo el sebeched el mo medengei a nger er aika el ker.

2. Ngera belkul e a chad a meruul er a telbilel a reng er ngii el mo er a Jehovah?

² Ngera belkul e a chad a meruul er a telbilel a reng er ngii el mo er a Dios? Ka momtab a tekingel a apostol el Paulus er a losaod er a deleuill er ngii me a Dios. Ngar er a mederir a rokui el chad er a chelsel sel metemellung el diall, e ngulemekedong er a Jehovah el kmo, “Dios el kbereked er ngii.” (Monguiu er a Rellir 27:​22-24.) A rokui el mera el Kristiano a chederedellel a Jehovah. Engdi a beluulechad el rokir a “chederdall er ngikel mekngit.” (1 Johanes 5:​19) A Rekristiano a mo chederedall er a Jehovah, a loeak a nglunguuch e leruul a telbilel a reng el mo er ngii el lekengei. Chouatia el telbilel a reng a ileakl el telbilel a ta el chad el bedul a Dios, e a uriul e ngochotii a telbilel a rengul el oeak a techolb.

3. Ngera belkul a techolb el lengiluu a Jesus, e tirke el oltirakl er ngii te mekerang a loukerebai er ngii?

³ A Jesus a ulechotii a kerebai er sera letibir a rengul el mo meruul a soal a Dios. Ngii a mlechell el chedal a telbiil el renged er a Israel, me a klengar er ngii a di mla moterekokl el mo er a Dios. Engdi sera bo lemetecholb, e ngrirellii a lmuut el klou a ultutelel el tekoi er a di luleltirakl er a Llach. A Tekingel a Dios a olecholt er a ledillii el kmo: “Dios, mesang, ak mermang el me meruul a uldesuel a rengum.” (Hebru 10:7; Lukas 3:​21) Me a sera bo lenguu a techolb a Jesus, e ngulechotii el kmo ngmla tongetengii a klengar er ngii el mo er a Dios, el mo meruul a soal a Demal. Me tirke el oltirakl er ngii a oukerebai er ngii sel lebo lemetecholb. Me nguaisei, engdi ngoeak a techolb er tir, e te ochotii el mo er a buai el kmo te  mla tonget a klengar er tir el mo er a Dios el oeak a nglunguuch.

Ngmekerang a Techolb e Mo Uchul a Klungiaol

4. Sel klausechelei er a David me a Jonathan ngochotii a ngerang el kirel a telbiil?

⁴ A telbilel a reng er kid el mo er a Dios a kmal klou a ultutelel el tekoi, el diak di lebeot el telbiil. Me a leuaisei, e ngmekerang e sebechel el mo uchul a klungioled? Ngsebeched el omekesiu er tiang sel dolatk er a rolel e a rechad a meruul a deleuill er tir el mo uchul a klungiolir, el ua lomak a klausechelei er tir. Ngkirem el mo kongei aike el ngerechelem me bo mungil el sechelei, me bo el sebechel el mo er ngii a ungil el sechelim. Tiang a belkul a kmo, ngkirem el meruul a telbiil e le ke melechesuar el kmo ngngar er ngii a ngerechelem el mo er a sechelim. A ta er a kot el merael a chisel el klausechelei el losaod er ngii a Biblia a sel ungil el klausechelei er a David me a Jonathan. Te mirruul er a telbiil el omak er a ungil el klausechelei er tir. (Monguiu er a 1 Samuel 17:57; 18:​1, 3.) Me alta e a chouaisei el klausechelei a meringel el debetik er ngii, engdi a betok el klausechelei a mo mesisiich a lsekum a rechad a di dul melechesuar a telbiil er a delongelir.​—Osisechakl 17:17; 18:⁠24.

5. Ngmekerang e sebechel a mesiou el melemolem el ngmai a klungiolel sel bo lechederedall er a ungil el mastang?

⁵ A Llach el Dios a milsterir a rechad er a Israel a mesaod a klungiaol el sebechir a rechad el ngmai el oeak sel loruul a telbiil. A lsekum a mesiou a soal el melemolem el chederedall er a ungil el mastang, e ngkirel el rullii a mesisiich el telbiil el obengkel. A Llach a kmo: “E ngdi lsekum a sibai a kmo, ‘Ng betik a renguk er a merrederek, ma bechik, ma re ngelekek, me ng diak ktobed el mo diak ksibai,’ e seikid e a merrederel a nguu el mor medal a Dios, el mor a chesimer ma lechub e ng chelseklel a tuangel e misebsii a dingal. Isei e ng mocha sibil el mor a kodellel.”​—Exodus 21:​5, 6.

6, 7. (a) Ngmekerang a uleketmokl el telbiil e mo uchul a klungiolir a rechad? (b) Tia ngngera ngolecholt er ngii el kirel a deleuill er kid me a Jehovah?

⁶ A tekoi er a chebechiil a meketmokl el okiu a klou a ultutelel el telbiil. Tia el telbiil a diak el belkul a kmo ngtekoi el di llechukl er a babier, e ngbai telbiil er a delongelir a reteru el chad. A reteru el chad el dmak el kiei el diak el bechiil, a diak el sebechir el mo melechesuar a mera el ulekerreu, tir me a rengelekir. Engdi a reteru el chad el mla mekur a chebechiielir el oltirakl er a Bades, a ngar er ngii a ungil el uchul e te melemolem el melasem el mesmechokl a chetituokel el tekoi er a delongelir, el oba bltikerreng sel lebo er ngii a mondai.​—Matteus 19:​5, 6; 1 Korinth 13:​7, 8; Hebru 13:⁠4.

⁷ Ngar er sel taem er a omelechesel a Biblia, e a rechad a mirruul a telbiil el kirel a siobai me a ureor el mlo uchul a klungiolir. (Matteus 20:​1, 2, 8) E tiang a klemerang er a chelecha el taem. El ua tiang, a uchei er a domuchel a siobai me a lechub e ngsoad el mo oureor er a kombalii, e ngungil a deluches a uleketmokl el telbiil el ngar er a babier. Me a lsekum a telbiled a sebechel el smisiich a klausechelei me a chebechiil me a ureor, e ngulterekokl el sebechel el mo uchul a betok el klungiaol sel derellii a telbiled el okesengii a deleuill er kid me a Jehovah! Me bo domes el kmo te mlekerang a rechad er a ngar er a mong el taem e ngilai a klungiolir, e le tir el mirruul a telbilir el mo er a Jehovah el Dios. E mekerang e aike el telbilir a kuk mle klou a ultutelel er a di uleketmokl el telbiil.

Ngmekerang a Telbilir a Rechad er a Israel el Mo er a Dios e Mlo Uchul a Klungiolir

8. A telbiil el mo er a Dios ngngera mle belkul el kirel a Israel?

⁸ A renged er a Israel el rokir a tilenget a klengar er tir el mo er a Jehovah er sera lerellii a telbiil el obengkel a Dios. A Jehovah a childelterir er a bita er a Rois el Sinai e dilu er tir el kmo: “A lsekum kom mo olengesenges er ngak e olab a telbilek, e kom mo meral chedak.” A rokui el chad a ulenger el kmo: “Aki mor a ikel rokui el bla ledu RUBAK.” (Exodus 19:​4-8) A telbiil el lurruul a rechad er a Israel a mle klou a belkul er a di lekengei el mo meruul a tekoi el mloterekokl er tir. Tiang a belkul a kmo te mle chedal a Jehovah, me ngulemes er tir el ileakl el kloklel.

9. A rechad er a Israel te mlekerang e ngilai a betok el klungiolir e le tir el mle ileakl el chedal a Dios?

⁹ A rechad er a Israel a ngilai a betok el klungiolir e le tir el mle chedal a Jehovah. E ngii el Jehovah a mle blak a rengul e ulemekerreu er tir el ua betik a rengul el chedam me a lechub e ngchedil el mo er a ngelekel. A Dios a dilu er a rechad er a Israel el kmo: “Isei e a RUBAK onger el kmo, ‘Ng sebechel a redil el  obes er a ngelekel tolechoi e diak le betik a rengul er a ngelekel lulechellii? A lta e a chedil a mo obes er a ngelekel, ngdi ngak a kmal diak kubes er kau.’ ” (Isaia 49:​15) A Jehovah a milsterir a ulekrael el oeak a Llach me a omelisiich el okiu a reprofet me a ulekerreu el okiu a rechanghel. A milluches er a Psalm a kmo: “Ng dilu tekingel el mor a Jakob, a llechul a le dilung er a Israel. Ng dirkak le ua isei a omerellel el mor a bebil er a beluu.” (Psalm 147:​19, 20; monguiu er a Psalm 34:​7, 19; 48:14.) Me ngdi osisiu er a chelecha el taem, a Jehovah a omekerreu er tirke el mla tuib a rengrir el mo chedal, el di ua sel ulekerreuil el mlo er a renged er a Israel, el ngii a mle ileakl el chedal.

A Uchul Me Ngkired el Tonget a Klengar er Kid el Mo er a Dios

10, 11. Kid kede mlechell el ngar er a chelsel a telungalek er a Dios el ngar er a eanged me a chutem? Mosaod.

¹⁰ A rebebil el melatk el kirel a telbilel a reng me a techolb a melekoi el kmo, ‘Ngdiak el sebeched el kuk di mengull er a Dios e lak doruul a telbiled el mo er ngii?’ Ngmo bleketakl a uchul sel bo dolechesuar el kmo kede dechor er a ngerang el kirel a omesiunged el mo er a Dios. Ngdiak dobes el kmo, ngkngtil a Adam a uchul e kede mechell el cheroid er a telungalek er a Dios. (Rom 3:23; 5:​12) Me ngkmal kired el rullii a telbilel a reng er kid el mo er a Dios me bo el sebechel el kongei er kid el mo teloi er sel telungalek er ngii el ngar er a eanged me a chutem. Bo desang el kmo tia el tekoi ngmekerang e mo uaisei.

¹¹ Ngdiak a ta er kid el ngelekel a chedam, el ngii a sebechel el meskid sel cherrungel el klengar, el mle telbilel a Dios er a uchelel. (1 Timoteus 6:​19) Ngdimlak di demechell el ngelekel a Dios, e le sera lerebet er a klengit tirke el mle kot el obekel, e a klechad a mlo cheroid er a betik a rengul el Chedam, el Ulemeob. (Momekesiu er a Duteronomi 32:⁠5.) Seikid el taem el me lmuut er a chelechang, e a klechad a kiei el cheroid er a telungalek er a Jehovah er a eanged me a chutem, e cheroid er a Dios.

12. (a) Ngmekerang e a rediak lemecherrungel el chad e sebechir el mo chedal a telungalek er a Dios? (b) Ngera el tekoi a kired el meruul er a uchei er a bo demetecholb?

¹² Me nguaisei, a derta er kid a sebeched el olengit er a Dios me lekengei er kid el mo soiseb er a telungalek er ngii el mo mesiungel. * Ngmekerang e sebechel el kongei er kid el mekngit el chad? A apostol el Paulus a milluches el kmo: “Ngmlo budech a delongeled kid ma Dios el kodellel a Ngelekel a uchul.” (Rom 5:​10) Ngoeak a techolb e kede olengit er a Dios el kirel a ungil el ukltked, me bo el sebechel el kongei er kid. (1 Petrus 3:​21) Ngdi a uchei er a techolb, e ngngar er ngii a tekoi el kired el meruul. Ngkired el mo medengelii a Dios, e mesuub el mo oumerang er ngii, e obult er a kngtid, e melodech a rolel a klengar er kid. (Johanes 17:3; Rellir 3:19; Hebru 11:⁠6) Ngar er ngii a lmuut el ta er a tekoi el kired el meruul er ngii, me bo el sebechel a Dios el kongei er kid el mo soiseb er a telungalek er ngii. E tiang ngera el tekoi?

13. Ngera uchul me a chad a kirel el meruul a telbilel el mo er a Dios me bo el sebechel el mo chedal a telungalek el mengull er ngii?

¹³ A chad el cheroid er a Dios a kirel el rullii a telbilel el mo er a Jehovah el kot, er a uchei er a bo lechedal a telungalek er ngii el mesiungel. Ngsebeched el omekesiu er ngii er a chedam el soal el merodel er a ngalek el sechal el mo ngelekel, el chedal a telungalek er ngii. Ngika el chedam a ungil el chad. Engdi a uchei er a lekengei el mo oungalek, e ngsoal ngika el buik a lerellii a telbilel el mo er ngii. Me ngii el chad a melekoi el kmo, “A uchei er a kkengei el mo oungalek er kau, e ngkirem el kongei el mo betik a rengum e mengull er ngak el ua mera el demam.” Me ngdi sel lekengei er tia el telbiil ngika el buik, e ngmo sebechel ngika el chedam el nguu el osisebii er a telungalek er ngii. Tiang ngdiak el sal bleketakl el tekoi? Me ngdi osisiu, a Jehovah a di kongei er tirke el tuib a rengrir el mo mesiou er ngii el mo soiseb er a telungalek er ngii. A Biblia a kmo: “Modars a bedengiu el mo ngar el chedaol tenget, el odeuir a rengul a Dios.”​—Rom 12:⁠1.

A Ochotel a Bltikerreng me a Klaumerang

14. Ngoeak a ngera el rolel e a telbilel a rengud a olechotel a bltikerreng?

¹⁴ A omeruul el telbiil el mo er a Dios a olechotel  a klou el bltkil a rengud el mo er a Jehovah. Ngsebeched el omekesiu er ngii er a telbilel a chebechiil. A Kristiano el sechal el melatk el mo bechiil a ochotii a bltkil a rengul el bedul a redil el lolatk el mo bechil, e oba blakerreng er ngii el bedul ngii er a chelsel a ngii di el blekeradel. Tiang a telbilel el mo er a chad el diak di el tekoi el letibir el mo meruul er ngii. A Kristiano el sechal a medengei el kmo ngdiak a techellel el mo kiei el obengkel a bechil a lsekum ngdiak lomuchel el rullii a telbilel er a chebechiil. Me ngdi osisiu, ngdiak el sebeched el ngmai a mui el klungioled el chedal a telungalek er a Jehovah a lsekum ngdiak derellii a telbiled el mo er ngii. Me a leuaisei, e ngkired el tongetengii a klengar er kid el mo er a Dios. Alta e ngdiak demecherrungel, engdi ngngar er ngii a urunguled el soad el mo chedal el kltmokl el oba blakerreng el bedul ngii er a chelsel a ngii di el blekeradel.​—Matteus 22:⁠37.

15. Ngmekerang a telbilel a rengud e olechotel a klaumerang er kid?

¹⁵ A telbilel a rengud el mo er a Dios a olechotel a klaumerang er kid el mo er ngii. Ngera uchul me nguaisei? A klaumerang er kid el mo er a Jehovah a oterekeklii a rengud el kmo, ngmo uchul a klungioled a dolekeed er kid er Ngii. (Psalm 73:​28) Kede medengei el kmo ngdiak lebeot el dekiei er a chelsel tia el “chebirukel e mekngit el telecheroll” e dolasem el merael el obengkel a Dios, engdi kede otuil a klaumerang er kid er a telbilel el kmo ngolengeseu er kid. (Filipi 2:15; 2 Korinth 4:⁠7) Kede medengei el kmo ngdiak demecherrungel engdi ngulterekokl a rengud el kmo a Jehovah a chubechub el bedul kid el mo lmuut er a taem el doruul a cheleuid el tekoi. (Monguiu er a Psalm 103:​13, 14; Rom 7:​21-25.) Kede oumerang el kmo a Jehovah a mo meskid a omeksaul el kirel a blakerreng er kid.​—Chocholt 2:⁠10.

A Telbilel a Reng a Mo Uchul a Deurreng

16, 17. Ngera uchul me a derellii a telbiled el mo er a Jehovah e ngmo uchul a deurreng?

¹⁶ Sel derellii a telbiled el mo er a Jehovah e ngmo uchul a deurreng, e le tia el omeruul a uldimukl er a detengetengii a klengar er kid el mo er ngii. A Jesus a ulechotii a klemerang er tia el tekoi er a ledu el kmo: “A dorous e ngbai ngeltengat ra dolai.” (Rellir 20:​35) Ngmera el mlo melechesuar a deurreng er sel taem er a loruul er a omesiungel er tia el chutem. Ngmlo er ngii a taem e ngmlo diak a techellel el omengur e olengull me bo el sebechel el ngosuterir a rebebil el mo medengelii a rael el mo er a klengar. (Johanes 4:​34) A Jesus a mle semeriar el odeuir a rengul a Demal, me ngdilu el kmo: Ak “kdiblechoel meruul a ikel soal” a Demak.​—Johanes 8:29; Osisechakl 27:⁠11.

¹⁷ A Jesus a ulechotii el mo er a rulebengkel sel kot el ungil el rael el mo er a klengar, er a ledu el kmo: “A le ngarngii a soal lokiuellek, e le chitii a klechad er ngii.” (Matteus 16:​24) A chouaisei el omeruul a okedid er a Jehovah. Omomdasu e ngsebeched el oterekeklid er a ngii di el chad el mo omekerreu er kid el oba bltikerreng el kuk ungil er a Dios?

18. Ngera uchul me a dekiei el oltirakl er a telbiled el mo er a Jehovah e ngmo uchul a deurreng er a bai doltirakl a telbiil el mo er a ngii di el chad me a lechub e ngngii di el ngerang?

¹⁸ Sel detibir a klengar er kid el mo mesiou er a Jehovah e dekiei el oltirakl er a telbiled el meruul a soal, e ngmo uchul a klou el deurreng er kid er a bai dolenget a klengar er kid el mo er a chad me a lechub e ngklalo. El ua tiang, a rebetok el chad el tonget a klengar er tir el osiik a kerruul, a diak el sebechir el metik er a mera el deurreng me a lechub e bo lungilbesul  er a rengrir aike el ngar er ngii er tir. Me nguaisei, engdi tirke el tuib a klengar er tir el mo er a Jehovah a metik er a diak a ulebengelel el deurreng. (Matteus 6:​24) A chetengakl el lenguu el mo “choureor el kldemel a Dios” a mesterir a deurreng, e te omes er a telbilel a rengrir el ua omereng el saul er tir el mo er a Dios, el diak el ua ureor. (1 Korinth 3:⁠9) A Jehovah a kmal diak lobes er a blakerreng er kid el oltirakl a soal. E Ngii a mo oluut a klisichel a bedengir a reblak a rengrir el chedal me bo el sebechir el ngmai a klungiolir er a cheungel a ulekerreuil, el diak a ulebengelel.​—Job 33:25; monguiu er a Hebru 6:⁠10.

19. Ngera el ungil el techall a lobang tirke el mla tuib a rengrir el mo mesiou er a Jehovah?

¹⁹ Sel detib a rengud el mo er a Jehovah e ngmo uchul e kede olekes er a deleuill er kid el obengkel. A Biblia a kmo: “Bo mkeed ra Dios me bo le keed er kemiu.” (Jakobus 4:8; Psalm 25:​14) Ngar er a ongingil el suobel e kede mo mesaod er sel uchul me ngulterekokl a rengud el soad el mo chederedellel a Jehovah.

[Footnote]

Ngmekerang a Omonger?

• Ngera belkul a telbilel a rengul a chad el mo er a Dios?

• Ngmekerang e mo uchul a klungioled sel detibir a rengud el mo er a Dios?

• Ngera uchul me a Rekristiano a kirir el tuib a rengrir el mo er a Jehovah?

[Aike el Ker er a Suobel]

[Siasing el ngar er a 12 el llel]

A dekiei el oltirakl a telbilel a rengud e ngmo uchul a diak a ulebengelel el deurreng er kid