¿Imaraykutaq Jehovaman qukunanchik tiyan?

“Kunan chʼisi rikhuriwarqa Diospa angelnin. Noqaqa chay Diospata kani.” (HECH. 27:23.)

1. a) ¿Imatataq bautizakuyta munaqkuna ruwananku tiyan? b) ¿Ima tapuykunamantaq kay yachaqanapi kutichisunchik?

BAUTIZAKUQKUNAPAQ umallirichiy tukukuchkaptin, iskay tapuykuna ruwakun, jukninqa jinata nin: “Jesús ñuqanchikrayku wañusqanta yachaspa, ¿juchasniykimanta kutirikunkichu, chantapis Jehovaman qukunkichu, paypa munayninta ruwanaykipaq?”, nispa. ¿Imaraykutaq cristianos Jehovaman qukunanku tiyan? ¿Ima bendicionestataq chayta ruwaqkuna rikunku? Dios yupaychayninchikta allinpaq qhawananpaq, ¿imaraykutaq payman qukunanchik tiyan? Kay tapuykunaman kutichinapaqqa, ñawpaqta imachus Diosman qukuy kasqanta yachananchik tiyan.

2. Diosman qukuy, ¿ima niyta munan?

² Diosman qukuy, ¿ima niyta munan? Kay tapuyman kutichinapaqqa, Pablo, mama quchaman chinkaykuchkaq barcopi kachkaspa, imatachus nisqanta yuyarina. Payqa, ‘Jehová Diospata kani’ nirqa (Hechos 27:22-24, ñawiriy). Kay saqra pachaqa, “Kuraj Supaypa atiynimpi” kachkan, chaywanpis cristianosqa, Jehová Diospata kanchik (1 Juan 5:19). ¿Imaraykutaq? Ñawpaqtaqa, payman qukusqanchikrayku, nisunman juk mañakuypi paypata kayta munasqanchikta nisqanchikrayku, chantataq bautizakusqanchikrayku.

3. ¿Imatataq Jesús bautizakusqanwan rikuchirqa, chantá cristianos, imaynatá pay kikin ruwanchik?

³ Jesusqa, Tatanpa munayninta ruwayta munasqanta rikuchinanpaq bautizakurqa. Chaytaq, ñuqanchikpis kikinta ruwananchikta rikuchiwanchik. Jesusqa, Diospaq tʼaqasqa llaqtapiña paqarikusqanrayku, manaña payman qukunanchu karqa. Nitaq ima kamachiypis chayta ruwananpaq karqachu. Biblia nisqanmanjina Jesusqa, bautizakuchkaspa Jehovaman ajinata nichkarqa: “Diosníy, munayniykita ruwaj jamuni”, nispa (Heb. 10:7; Luc. 3:21). Arí, bautizakuspaqa, Tatanpa munayninta juntʼayta munasqanta rikuchichkarqa. Kay tiempomanta cristianosqa, Jesusjina  bautizakullanchiktaq, chaywanpis bautizakuchkaspaqa, juk mañakuypi Diosman qukusqanchiktaña rikuchichkanchik.

Diosman qukuyqa bendicionesta quwanchik

4. Davidwan Jonatanwan sumaq amigos kasqankumanta, ¿imatataq yachakusunman?

⁴ Diosman qukuytaqa, jatunpaq qhawananchik tiyan. Chaywanpis, ¿ima bendicionestataq Diosman qukuspa rikusunchik? Chayta entiendenapaqqa, imaynatachus runasta, parlasqankuta juntʼay kawsayninkupi yanapasqanta qhawarina. Qallarinapaqqa, amigos kaymanta parlarina. Piwanpis amigos kanapaqqa, chay runap allinninta maskʼananchik tiyan. Ñawpa tiempopiqa, Davidwan Jonatanwan sumaq amigos karqanku, chayraykutaq juk tratota ruwarqanku (1 Samuel 17:57, 18:1, 3, ñawiriy). Kay pʼunchaykunapiqa, chayjina sumaq amigos, mana anchata rikukunchu. Rikunchikjina sumaq amigosqa, mana wasanchanakunkuchu, amigonpa allinnintataq maskʼanku (Pro. 17:17; 18:24).

5. Kacharisqa kayta qhisachaq kamachi, ¿imatataq patronninmanta suyaq?

⁵ Moisesman Ley qusqapiqa, imapichus parlasqankuta juntʼanankumanta parlallantaq. Sutʼincharinapaq, juk kamachiqa, patronninwan juk tratota ruwayta atiq paywan qhipakunanpaq. Kay Éxodo 21:5, 6 pʼitikunapi, ajinata nin: “Sichus chay kamachi mana munanchu sapallan ripuyta, warminta, wawasninta, patronnintawan munakusqanrayku chayqa, patronnin payta pusanqa Diospa ñawpaqenman. Chaypi punkuman, chayri punku sayantasman kʼaskachispa, ninrinta juskʼonqa. Ajinamanta chay kamacheqa chay runajta kamachin kanqa wiñaypaj”, nispa. Rikunchikjina, juk kamachiqa, khuyakuq patronninpa jarkʼaynillanpipuni kayta munaspa, kacharisqa kayta qhisachayta atiq.

6, 7. a) ¿Imaynatá runasta, nisqankuta juntʼasqanku yanapan? b) ¿Imaynatá nisqanchikta juntʼay, Jehovaman astawan jukchawanchik?

⁶ Qhariwarmi kawsaypipis, khuska kawsakunankupaq parlasqankuta juntʼanallankutaq tiyan. Qhariwarmiqa, mana juk documentop nisqallantachu juntʼanku, manaqa juk runawan juntʼanankuta ninku. Chantá, ¿imaynatá chay ruwasqanku paykunata yanapan? Paykuna, wawasninku ima, tʼaqanakunankumanta mana manchachikuspa kawsanku, mana casarasqa kaqkunarí, mana jinata kawsayta atinkumanchu. Qhariwarmi cristianos kanku chaytaq, Bibliap nisqanmanjina ruwanasninkuta juntʼanqanku, chʼampaykunasninkutataq munakuywan atipanqanku (Mat. 19:5, 6; 1 Cor. 13:7, 8; Heb. 13:4).

⁷ Tukuchanapaqqa, llamkʼaymanta parlarina. Ñawpa tiempomantapacha, ima llamkʼayllapaqpis tratota ruwasqankuqa, may allin (Mat. 20:1, 2, 8). Ajinamanta, juk negociota qallarinapaq chayri wakpaq llamkʼayta qallarinapaq juk documentota ruwasqankuqa, iskayninkuta yanapan. Rikunchikjina runasqa, —amigos kaypi, qhariwarmi kawsaypi chayri negociospipis— imatachus nisqankuta juntʼaspa astawan jukchasqas kanku. Chaywanpis, ¿imataq ñuqanchikta Jehovaman jukchawanchik? Payman qukusqanchik, nisunman juk mañakuypi mana imata suyaspalla, payman kawsayninchikta qusqanchikta nisqanchik. Kunanqa, ñawpa tiempopi Israel llaqta, Diosman qukusqankurayku ima bendicionestachus japʼisqanta qhawarisunchik, chay ruwasqanku, imaraykuchus mana ima ruwayjinallachu kasqantapis.

Israel llaqtaqa Diosman qukuspa bendicionesta japʼirqa

8. ¿Imaynatá israelitas Jehovaman qukurqanku?

⁸ Israelitasqa, Sinaí urqup chimpanpi, Jehovaman kawsayninkuta qusqankuta nirqanku. Payqa, chaypi paykunata tantaykuspa, jinata nirqa: “Kunanqa sichus tratoymanta nisqasniyta uyarinkichej, kasunkichejtaj chayqa, noqapaj uj sumaj ayllu kankichej, tukuy ayllusmanta aswan sumaj”, nispa. Chaymantataq, israelitasqa juk kunkalla jinata kutichirqanku:  “Tata Diospa nisqasnintaqa kasusqayku, nispa” (Éxo. 19:4-8). Chay qukuyqa, mana imatapis parlarpariyjinallachu karqa. Imaraykuchus, Jehová Diospata kasqankuta nichkarqanku, paytaq ‘juk sumaq aylluntajina’ qhawarqa.

9. ¿Ima bendicionestataq israelitas, Diosman qukusqankurayku japʼirqanku?

⁹ Israelitasqa, Jehovaman qukusqankurayku, achkha bendicionesta japʼirqanku. Jehovaqa, israelitasta munakurqa, wawasnintajina qhawarqa, manataq saqirparqachu. Chayrayku, jinata nirqa: “Uj warmeqa wawitanta qonqarparinmanchu? Wijsanmanta llojsej wawanta manachu munakunman? Pay qonqapunman chaypis, noqaqa ni jaykʼaj qonqasqaykichu”, nispa (Isa. 49:15). Diosqa, israelitasman Leyta qurqa, profetasniqta kallpacharqa, angelesninwantaq jarkʼarqa. Salmista nirqa: “Kamachisqasninta, yachachiykunantapis Israelman sutʼincharqa. Mana ajinataqa ruwarqachu mayqen nacionwampis”, nispa (Sal. 147:19, 20; Salmo 34:7, 19; 48:14, ñawiriy). Jehovaqa, imaynatachus ñawpa tiempopi Israel llaqtata qhawarqa, kikillantataq kay tiempopi payman qukuqkunata qhawan.

¿Imaraykú Diosman qukuna tiyan?

10, 11. ¿Imaraykutaq Jehovap familianmanta karunchasqas paqarikunchik?

¹⁰ Wakinqa ajinata yuyanku: “¿Imaraykutaq Jehovap kamachin kanaypaq, payman qukuspa bautizakunay tiyan?”, nispa. Kay tapuyman kutichinapaqqa, ñawpaqta imaynapichus kachkasqanchikpi tʼukurina. Adán juchallikusqanrayku, tukuyninchik Diosmanta karunchasqas paqarikunchik (Rom. 3:23; 5:12). Llaqtanmanta kananchikpaqtaq, payman qukunanchik tiyan. Kunanqa, imaraykuchus qukunanchikta qhawarina.

¹¹ Juchasapa tatasniyuq kasqanchikrayku, ni pipis wiñaypaq kawsayta atinchikchu (1 Tim. 6:19). Ñawpa tatamamanchik juchallikusqankurayku, janaqpachapi kʼacha Tatanchikmanta karunchasqas paqarikunchik, chayrayku mana wawasnin nisqa kayta atisunmanchu (Deuteronomio 32:5, kikinchay). Chay kutimantapachataq, tukuyninchik Jehovamanta, familianmanta ima, karunchasqas kawsakunchik.

12. a) ¿Imaynamantá juchasapa runas, Diospa familianmanta kayta atinkuman? b) ¿Imastataq niraq bautizakuchkaspa ruwana tiyan?

¹² Jina kaptinpis, Jehová Diospa familianmanta kayta mañakusunman. * Chantá juchasapas kaspapis, ¿imaynamantá paypa ñawpaqinpi allinpaq qhawasqas kasunman? Pablo nirqajina, “contrampi kashasparaj, noqanchejqa Churimpa wañuyninnejta Dioswan allinyachisqa karqanchej” (Rom. 5:10). Chantapis, wawasnintajina japʼikapunawanchikpaqqa, ñawpaqinpi allinpaq qhawasqa kayta mañakunanchik tiyan, chaytataq bautizakuspa ruwanchik (1 Ped. 3:21). Chaywanpis, niraq bautizakuchkaspa, kaykunataraq ruwananchik tiyan: Ñawpaqtaqa, Jehovata allinta riqsinanchik tiyan, paypitaq atienekunanchik tiyan; chantataq, juchasninchikmanta pesachikuspa, kawsayninchikta tikrananchik tiyan (Juan 17:3; Hech. 3:19, 20; Heb. 11:6). Chantá, ¿imatawan ruwananchik tiyan?

13. Diospa familianmanta kanapaq, ¿imaraykutaq payman qukunanchik tiyan?

¹³ Diospa familianmanta kanapaqqa, payllapaqña kananchikta juk mañakuypi ninanchik tiyan. ¿Imarayku? Juk kikinchaywan sutʼinchana. Juk llaqtapi may allinpaq qhawasqa tata, mana piniyuq waynuchituta riqsin, payta mayta munakuyta qallarisqanraykutaq, wawan kananpaq japʼikapuyta munan. Chaywanpis, tatantajina qhawananta, munakunanta, allinpaq qhawananta ima, mañan. Chay waynuchituqa, tata mañasqanta  juntʼananta niptillan, wawan kayta atinqa. Chay tataqa, maychus kaqllata chay waynuchumanta mañachkan, ¿icharí? Jehovapis, payman qukuqkunallata familianmanta kanankupaq japʼikapun. Bibliaqa, chayta jinata sutʼinchan: “Cuerpoykichejta Diosman jaywa[ychik] kausashaj jaywanata jina Diospaj tʼaqasqata, Diosta kusichejta ima”, nispa (Rom. 12:1).

Diosman qukuspaqa, munakuyninchikta, iñiyninchikta ima rikuchinchik

14. ¿Imaraykutaq Diosman qukuspa, payta munakusqanchikta rikuchichkasqanchikta nisunman?

¹⁴ Diosman qukuspaqa, payta munakusqanchikta rikuchinchik. Kaytaqa, casarakuqkuna nisqankuwan kikinchasunman. ¿Imaynatá casarakuq qhari, warminta munakusqanta rikuchin? Chay pʼunchayqa, warminta mayta munakusqanrayku, ima chʼampay kaptinpis, paywanpuni khuska kananta nin. Chayta nispaqa, mana qhariwarmijina kawsanankupaq parlasqankuta juntʼanallantachu nichkan, manaqa warminta, ni jaykʼaq payta wasanchananta nichkan. Khuska kawsakunankupaqqa, ñawpaqta chaytaraqpuni ninan tiyan. Ajinallatataq, Jehovap familianmanta kanapaqqa, payman qukunanchikpuni tiyan. Arí, Jehová Diospata kayta munasqanchikrayku payman qukunchik, chantá pantaqkuna kaspapis, payta ni jaykʼaq wasanchananchikta akllanchik (Mat. 22:37).

15. ¿Imaraykutaq Diosman qukuspa iñiyninchikta rikuchisqanchikta ninchik?

¹⁵ Diosman qukuspaqa, paypi iñisqanchikta rikuchillanchiktaq. Arí, Jehovapi iñisqanchikrayku, amigon kay imamantapis aswan allin kasqanta yachasqanchikrayku ima, payman qukunchik (Sal. 73:28). Chaywanpis, “kay pachapi may sajra juchasapa runaspa chawpimpi” kawsasqanchikrayku, payta yupaychanapaq mayta kallpachakunanchik tiyan. Jina kaptinpis, yanapanawanchikpi atienekunchik (Fili. 2:14, 15; 2 Cor. 4:7). Pantaptinchikpis, khuyakuyninmanta mana iskaychakunchikchu (Salmo 103:13, 14; Romanos 7:21-25, ñawiriy). Arí, payman juntʼa sunqu kanapaq kallpachakusqanchikmanta, achkhata tʼinkawasun (Job 27:5).

Diosman qukuspalla kusiyta tarisun

16, 17. ¿Imaraykutaq Diosman qukuspa kusiyta tarinchik?

¹⁶ Diosman qukuspaqa, kusiyta tarinchik, imaraykuchus kawsayninchikta Jehovaman qunchik, Jesús nirqajinataq, “aswan kusiy wajman qoriy qorichikunamanta nisqaqa” (Hech. 20:35). Jesusqa, Jallpʼapi kachkaspa chay nisqanmanjina kawsarqa, chayraykutaq may kusisqa karqa. Payqa, kawsayman pusaq ñanta runasman riqsichinanrayku, samarikunanta, mikhunanta, wak ruwanasninta ima, saqirqa (Juan 4:34). Tatanpa munayninta ruwaspataq, sunqu juntʼasqa karqa. Chayrayku ajinata nirqa: “Paypa munaynillanta ruwani”, nispa (Juan 8:29; Pro. 27:11).

 ¹⁷ Jesusqa, discipulosninman imayna kawsaychus kusiyta apamusqanmanta, ajinata nirqa: “Pillapis noqawan riyta munajqa pay kikinta qhesachaku[chun]”, nispa (Mat. 16:24). Qhisachakuspaqa, munakuyniyuq Diosman qayllaykunchik, kawsayninchiktataq jaywanchik. ¿Piqpata kaspataq aswan kusisqa kasunmanrí?

18. ¿Imaraykutaq imamanta nisqapis, Diosman qukuy aswan kusiyta quwanchik?

¹⁸ Jehovaman qukuspa munayninta ruwaqkunaqa, may kusisqas kanku, qhapaq kayman qukuq runastaq, mana chay kusiyta tariyta atinkuchu. Cristianostaqrí, chiqamanta sunqu juntʼasqa kawsakunku (Mat. 6:24). Paykunaqa, ‘Diospaq llamkʼasqankurayku’ kusisqas kanku. Chaywanpis, Diosllaman kawsayninkuta qusqankuta, mana qunqankuchu (1 Cor. 3:9). Diosnillanchik, chiqa sunqu kasqanchikta, tukuy ima ruwasqanchikta ima, allinpaq qhawan. Chayrayku munakuyninpi wiñaypaq kanallachikpaqpuni, machuyaptinchikpis watiqmanta waynayachiwasun chayri sipasyachiwasun (Job 33:25; Hebreos 6:10, ñawiriy).

19. Jehovaman qukuqkuna, ¿imatataq ruwayta atinku?

¹⁹ Bibliapiqa, kay waqyariyta tarinchik: “Diosman astawan qayllaykuychej; paypis qayllamusonqachej”, nispa (Sant. 4:8; Sal. 25:14). Arí, Jehovaman qukuqkunaqa, qayllanpi kayta atinku. Qhipan yachaqanapitaq, imaraykuchus Jehovaman mana manchachikuspa qukuyta atisqanchikta rikusun.

[Sutʼinchaynin]

¿Imatá kutichiwaq?

• Diosman qukuy, ¿ima niyta munan?

• ¿Ima bendicionestataq Diosman qukuy apamuwanchik?

• ¿Imaraykutaq cristianos Jehovaman qukunanku tiyan?

[Tapuykuna]

[6 paginapi dibujo/foto]

Diosman qukusqanchikmanjina kawsayqa, mayta kusichiwanchik