¿Imanirtaq Jehoväta kawënintsikta qoykushwan?

“Canan pagasmi paypa car servingä Dios Yayapita shamug juc angel lädüman yuripascama[shga].” (HECH. 27:23, NTCN.)

1. a) ¿Imakunatataq huk nuna ruranan manaraq bautizakurnin? b) ¿Ima tapukïkunapa respuestantataq yachakushun?

‘JESUCRISTU noqantsikpaq wanushqa këkaptinqa, ¿hutsëkipita wanakurqunkiku y Jehoväpa munëninta ruranëkipaq mañakïnikichö awnikurqunkinaku?’ Këmi bautizakoqkunapaq discurso ushariptin huk kaq tapukï. ¿Imanirtaq alläpa preciso kawëninkunata Jehoväta qoykuyänan? ¿Ima allikunatataq tariyan? ¿Imanirtaq kë rurëqa alläpa preciso sirvenqanta Jehová chaskinampaq? Kë tapukïkunapa respuestanta tarinapaqqa, puntataqa musyanantsikmi Jehoväpa makinman kawënintsikta churë ima kanqantapis.

2. ¿Imapaqtaq Diosta kawënintsikta qoykuntsik?

² ¿Imapaqtaq Diosta kawënintsikta qoykuntsik? Këta musyanapaqqa yanapamäshun undinëkaq barcochö këkar Pablu ninqanmi. Tsëchömi Pablu Jehovällapana kanqanta rikätsikur kënö nirqan: ‘Paypa car servingä Dios Yaya’ (lei Hechos 27:22-24, NTCN). Kë mundoqa “diablupa muneninchomi” këkan, pero noqantsikqa Jehoväpam kantsik (1 Juan 5:19). ¿Imanöpataq Diospana kantsik? Mañakïnintsikchö Jehoväta kawënintsikta qoshqa karmi, tsë ninanqa, shonqupita patsë Pëllatana servinapaq awnikurquntsik, y tsëpitanam bautizakurquntsik.

3. ¿Imapaqtaq Jesus bautizakurqan y imanötaq cristiänokuna qatintsik?

³ Bautizakunqan hunaqmi Jesus yachatsikurqan Teytampa munëninllatana ruranampaq kaqta. Jesusqa Israel nacionchö yurishqa karmi Diosllapana karqan, tsëmi precisarqannatsu qamllapaqnam kashaq nishpa Diosman mañakunan. Y bautizakurninqa manam Ley ninqantatsu cumplikarqan, tsëpa rantinqa huk más precisaqtam rurëkarqan. Biblia willakunqannöpis kënömi Jehoväta nirqan: “Quechomi quecä Diosllä. Palabrequi nenqanmanno noqacho munanqequita rurequï” (Heb. 10:7; Luc. 3:21). Awmi, bautizakorqa Teytampa munëninta ruranampaq  kaqtam rikätserqan. Kanan cristiänokunapis Jesus ruranqannömi bautizakuntsik, pero noqantsikqa rikätsikunantsikraqmi Diosllapaqna kawashaq nishpa awnikunqantsikta.

¿Imakunatataq tarintsik Jehovällapaqna kawarqa?

4. ¿Imatataq yachatsimantsik Davidwan Jonatán amigo kayanqan?

⁴ Jehoväta, qamllapaqnam kawashaq nishpa awninqantsikqa manam lluta awnikïllatsu. Tsëtaqa ruranantsik alli pensëkur-raqmi. ¿Ima allikunatataq tarishun? Këta alli musyanapaqqa yanapamäshun nunakuna alli amigo kayänampaq imapis yanapanqanta musyëmi. Amigo këpaq parlarishun. Amïgoyoq këta munarqa, kikinmi amigo këta tïranan. Awnikonqantam cumplinan, y imëkachöpis yanapananmi. Unë tiempochö alli amigo kayanqampitaqa Bibliachö tarintsik Davidpitawan Jonatampitam, pëkunaqa alläpa kuyanakurmi imëpis mana haqinakuyänampaq awninakuyarqan (lei 1 Samuel 17:57 y 18:1, 3). Tsënö amïgokunataqa kanan manam alläpatsu rikantsik. Pero puntatanöllam rasumpa amïgokunaqa imëkachöpis yanapanakuyan y awninakuyanqannö rurayan (Pro. 17:17; 18:24).

5. ¿Imatataq ruranan karqan huk esclavo kuyakoq patronninwan quedakunampaq?

⁵ Israel markachöpis esclavo patronninta awninqannö ruranampaqmi Ley mandakoq, y awnikunqannömi imëpis ruranan karqan. Leychömi kënö nin: “‘Patronnïta, warmïta y wambräkunatapis pasëpam kuyä; manam libre ëwakïta munätsu’ nishpa esclavo rogakuptinqa, tsëqa patronninmi Dios rikarëkaptin punkupa marconman esclävota shëkatsir punzonwan rinrinta uchkurapunan, y tsëqa patronninllatanam wanunqanyaq servinan” (Éxo. 21:5, 6). Rikanqantsiknömi, huk esclävoqa libre ëwakunampa rantin, huk conträtota rurarir kuyakoq patronninwan quedakoq, tsëchö kar más alli y mana yarpachakushpa kawakunampaq.

6, 7. a) ¿Imakunachötaq yanapakun contrato ruranqantsik? b) Y Jehovällapaqna kawanapaq awninqantsik, ¿imanötaq yanapamantsik?

⁶ Hina awninakurnin preciso cumpliyänampaq kaqtaqa rikantsikmi casado kawakïchopis. Këchö awninakuyanqantaqa manam papel-llamantsu churayan, sinöqa kikin nunatam awniyan. Mana casakushpa kawakoqkunapaqa manam majam ni wambrankunapis casado cristiänokunapachönötsu alli kawayanqa. Hina mana casädokunaqa, manam familiapaq rurayänampaq kaqta alleqtsu rurayanqa y problëmakuna kaptimpis kuyakïwan altsayanqatsu (Mat. 19:5, 6; 1 Cor. 13:7, 8; Heb. 13:4).

⁷ Kananqa rikärishun trabäjopaq conträtota rurar awninakuyanqanta. Unëpitam contrato rurëqa alläpa alli kashqa (Mat. 20:1, 2, 8). Tsëmi, negociota rurar o ima trabäjota rurarpis awninakuyanqanta firmayan, ima problëmakuna kaptimpis ishkankuna shumaq altsayänampaq. Rikanqantsiknöpis, casakïchö alli pasayänampaq, negociochö alli kayänampaq o alli amigo kayänampaqpis ishkan acuerdo kayanqampitaraqmi. Pero Jehoväwan alli kanapaqqa mastam ruranantsik; Pëllapaqna kawanapaq awnirmi imatapis mana shuyarashpa kawënintsikta qoykuntsik. Qateqninchömi rikäshun Diosllapaqna kanapaq kawënintsikta qoykunqantsikqa, alläpa alli kanqanta, hina rikäshunmi lluta conträtonölla mana kanqanta.

Diosllapaqna kayanqanqa alläpa allim karqan israelïtakunapaq

8. ¿Imapaqtaq israelïtakuna Diosta awniyarqan?

⁸ Israelïtakunaqa llapanmi Jehoväpaq kayänampaq awnikuyarqan, llapan niyämanqëkitam rurayäshaq nirnin. Jehovämi Sinaí hirka hawanchö llapanta ëlluratsir kënö nirqan: “Si qamkunakush llapan ninqäta mana pantashpa wiyakuyanki y awninakunqantsikta respetayanki, tsëqa, llapan  markakunapitapis, noqallapanam kuyanqä marka kayanki”. Tsënam llapan israelïtakuna kënö awnikuyarqan: “Jehová llapan parlamunqanta wiyakuyänäpaqmi listo këkäyä” (Éxo. 19:4-8). Kënö niyanqanqa manam lluta awnikïllatsu karqan. Sinöqa, Jehoväna dueñon kanampaqmi awnikïkäyarqan, tsëmi Jehová awnirqan kuyarnin rikänampaq.

9. ¿Imanötaq israelïtakuna kayarqan Diosllapaqna kawakuyänampaq awnikuyanqampita patsë?

⁹ Jehoväpana karninqa, israelïtakuna atska bendicionkunatam chaskiyarqan. Jehoväqa manam haqirqantsu, kuyarqanmi y wambrantanömi rikarqan. Tsëmi kënö nirqan: “Huk warmi, ¿manaraq wasqinqan llullunta qonqëkunmantsuraq? Y ¿qeshpikunqan llullunta manatsuraq llakipanman? Kë warmikunaqa qonqariyanmanmi; pero noqaqa manam qamta qonqashqëkitsu” (Isa. 49:15). Diosqa leyninkunawanmi markanta yachatsirqan, profëtankunawanmi sinchi kayänampaq yanaparqan y angelninkunawanmi imëka mana allikunapita tsaparqan. Tsëmi salmista kënö nirqan: “Palabrantam [Jehoväqa] Jacobta willëkan, leyninkunata y alli juzgakïnintam Israelta willëkan. Manam tsënöqa huk markakunata rurashqatsu” (Sal. 147:19, 20; lei Salmo 34:7, 19 y 48:14). Israel markanta cuidanqannömi, kanampis pëllapaqna kawaq cristiänokunata rikan.

¿Imanirtaq Diosta kawënintsikta qoykushwan?

10, 11. ¿Imanirtaq Diospita y familiampita rakikashqa yurirquntsik?

¹⁰ Wakinqa niyanmi: “¿Imanirtaq Jehoväta kawënïta qoyküman y bautizaküman?”. Këtaqa alli tanteashun Diospa rikënimpaq imanö këkanqantsiktapis musyarmi. Adan hutsata ruranqampitam, Diospa wambrankunanönatsu yurirquntsik (Rom. 3:23; 5:12). Y wambrantanö rikämänapaqqa, pëta servinallapaqnam kawënintsikta qoykurquntsik. ¿Imanirtaq kë rurëqa precisan?

¹¹ Teytantsikkuna hutsayoqlla kayaptinmi, llapantsikpis hutsayoqllana yurintsik (1 Tim. 6:19). Punta teytantsikkuna hutsata rurayanqampitam kuyakoq y kamamaqnintsik Diospita rakikashqa yurirquntsik, y manam legítimo wambrankunanatsu kantsik (igualaratsi Deuteronomio 32:5). Hutsata ruranqampita patsëmi kikin Diospita y familiampita rakikashqa kawarquntsik.

12. a) ¿Imanötaq hutsasapa nunakuna Diospa familian këman chäyanman? b) ¿Imakunatataq manaraq bautizakurnin ruranantsik?

¹² Tsënö kaptimpis, Jehoväta mañakushwanmi wakin sirveqninkunatawan chaskimänapaq. * ¿Pero imanöraq chaskimashwan hutsasapa këkashqaqa? Pablu ninqannö: “Contran quecashqapis tsurin Jesucristu wanonqanrecurmi Dioswan amishtarqontsic” (Rom. 5:10). Hinamampis Pë chaskimänapaqqa, concienciantsik alli kanampaqmi mañakunantsik, y tsëtaqa rurantsik bautizakurninmi (1 Ped. 3:21). Pero tsëta ruranapaqqa, puntatam Jehoväta reqinantsik y pëman markäkïta o yärakuyta yachakunantsik. Tsëpitanam hutsantsikkunapita wanakunantsik y Dios munanqannö kawar qallanantsik (Juan 17:3; Hech. 3:19; Heb. 11:6). ¿Y tsëpitaqa imakunatataq ruranantsik?

13. Diosnintsik familiantanö rikämänapaq, ¿imanirtaq kawënintsik pëllapaqna kanampaq awninantsik?

¹³ Diosta adoraq familiapita kanapaqqa, alli pensëkurmi shonqupita patsë awnikunantsik. ¿Imanirtaq tsëtaraq ruranantsik? Maslla tantearinapaq këta rikärishun. Huk respetashqa nuna, teytannaq mamannaq ollqu wambrata reqirinman, y yachanëpaq kaptinna wambran kananta munar partïdata apellïdonchö ruraratsita munanman. Pero wambrata këtaraq ninman: “Teytëkitanö rikämänëkipaq, respetamänëkipaq  y imëpis kuyamänëkipaq awnimänëkitam munä”. Tsëta mana awnirqa, manachi wambran këman chanmantsu. Kë nuna tsënö rurarqa manam alläpatatsu mañëkan. Tsënömi Jehoväpis, familian kayänampaq chaskin kawëninta qoq kaqkunallatam. Bibliachö ninqannö: “Dios allapa ancupäyäshonqequirecurmi mañecuyaq qamcunapis llapan shonqiquicunawan pellatana cäsucur, munashqanta rurar cawacuyänequipaq” (Rom. 12:1).

Kuyakïnintsikta y markäkïnintsiktam rikätsikun

14. Diosllapaq kawanapaq awnikunqantsikqa, ¿imanirtaq kuyanqantsikta rikätsikun?

¹⁴ Diosllapaqna kawanapaq awnirqa, kuyanqantsiktam rikätsikuntsik. Këqa kanman casakuyanqan hunaq awninakuyanqannömi. Casakunqan hunaqmi huk cristiano novianta kuyanqanta rikätsin, allichö y mana allichöpis këkänanta awnirnin. Manam casakunanllapaqtsu awnikan, sinöqa imëpis pëllatana kuyanampaqmi. Hinamampis, musyanmi mana tsënö awnikurqa junto kawëta mana puëdeyanqanta. Tsënömi, Jehovällapaqna kawanapaq manaraq awnirqa wambran këman chëta puëdentsiktsu. Rikanqantsiknöpis, Dios munanqannö kawanapaq awnikuntsik, pëllapaqna kawëta munar y hutsasapa karpis Pëllata kuyëta munarmi (Mat. 22:37).

15. Diosllapaqna kawakunapaq awnikunqantsik, ¿imanirtaq markäkunqantsikta rikätsikun?

¹⁵ Diosllapaqna kawanapaq awnikurqa, markäkinintam o yärakuynintam rikätsin. Awmi, Diosllapaqna kawanapaq awnikuntsik pëman creir y pë más alli amigo kanqanta markäkurmi (Sal. 73:28). “Llutan ruraq” nunakunapa rurinchö kawarnin Diosta servinan sasa o aja kanqanta musyantsikmi. Tsënö karpis musyantsikmi, servinantsikrëkur kallpachakushqaqa Dios yanapamänapaq kaqta (Fili. 2:15; 4:13). Y hutsasapa kanqantsikrëkur imachöpis pantarishqa perdonamänantsikta musyantsikmi (lei Salmo 103:13, 14 y Romanos 7:21-25). Y pëllapaqna kar llapan ruranqantsikpitapis bendecimunanta musyantsikmi (Job 27:5).

Diosllapaqna kawanapaq awnikurqa kushishqam kashun

16, 17. ¿Imanirtaq Diosllapaqna kawakunapaq awnikïqa kushikïpaq?

¹⁶ Diosllapaqna kawakunapaq awnikunqantsikqa kushitsimantsikmi. Llapan kawënintsik Jehovällapaqna kaptinmi, Jesus ninqannöpis, “qaraquimi mas cushiqueqa chasquir cushiquipitapis” nintsik (Hech. 20:35). Kë Patsachö yachatsikur kanqan witsanmi Jesus kë texto ninqannö kawarqan, tsëmi nunakunata yanaparnin kushishqa karqan. Nunakunata Diospita yachatsinanrëkurqa kikimpa munënintapis haqireqmi, y höraqa manam hamaqtsu ni mikoqtsu (Juan 4:34). Teytanta kushitsïnöqa manam imapis kaqtsu. Tsëmi nirqan: “Pe gustanqantam noqaqa imatapis siempri rurä” (Juan 8:29; Pro. 27:11).

¹⁷ Jesusmi qateqninkunata yachatsirqan imata rurar más kushishqa kawayänampaqpis: “Pipis qatirämaqnï queta munarnenqa, quiquinpa muneninta jaqiricur, crus [“qeru”, NM] apaqno noqata qatimätsun”  nirnin (Mat. 16:24). Kikintsikpa munënintsikta haqirqa, kuyakoq Diosmanmi witintsik. ¡Pëpa makinchö kënöqa manam imapis kantsu!

18. Huk nunapaq o munënintsikllapaq kawëpitaqa, ¿imanirtaq alläpa kushikïpaq Diosllapaqna kawakunapaq awnikunqantsik?

¹⁸ Huk nunata sirveqpita, cösaskunata o rïcoyëta asheqkunapitaqa, más kushishqam kayan Jehovällapaqna kawayänampaq awnikoqkuna y pë munanqannö kawaqkunaqa. Y imëkallapis kayäpunqanwanmi kushishqa kawakuyan (Mat. 6:24). Awmi, kushikïninkunaqa ‘Diospa mincancuna’ kar yachatsikuyanqampitam, tsënö karpis manam qonqayantsu kuyayanqan Diosllapaqna kawakuyänampaq awnikuyanqanta (1 Cor. 3:9). Pëqa manam imëpis qonqanqatsu imëkata pasarpis pëllapaq kayanqantaqa. Tsëmi edäyashqakunatapis jövenyätsinqa, tsënöpa pëpa makinchö imëyaqpis kawakuyänampaq (Job 33:25; lei Hebreus 6:10).

19. Jehová munanqannö kawakuyänampaq awnikoqkunaqa, ¿imanötaq kayanqa?

¹⁹ Bibliam kënö nimantsik: “Dios Yayata mas cuyarnin payman witiyay, paypis [...] gamcunaman mas witimunanpag” (Sant. 4:8, NTCN; Sal. 25:14). Jehovällapaqna kawakuyänampaq awnikoqkunaqa, pëwanmi alläpa kuyanakuyanqa. ¿Mantsakushwantsuraq kawënintsikta Jehoväta qoykïta? Tsëtam qateqnin tëmachö yachakushun.

[Päginapa ura kuchunchö willakï]

¿Yachakunqantsikta yarpankiku?

• ¿Ima ninantaq Diosllapaqna këqa?

• ¿Imanötaq yanapamantsik Diosta kawënintsikta qoykunqantsik?

• ¿Imanirtaq cristiänokuna Jehovällapaqna kawayänampaq awnikuyanman?

[Yachakunapaq kaqpa tapukïninkuna]

[13 kaq päginachö dibüju]

Diosta awninqantsikmannö kawakurqa, kushishqam kashun