Ngbanga ti nyen ti mû tere ti mo na Jéhovah?

“Na bï so, mbeni ange ti Nzapa so mbi yeke zo ti lo . . . aluti na tere ti mbi.”​—KUS. 27:23.

1. Nyen la azo so ague ti mû batême asara kozoni awe? Ahundango tënë wa abâ gigi?

 “NA LEGE ti sandaga ti Jésus Christ, ala ke siokpari ti ala awe na ala mû tere ti ala na Jéhovah ti sara ye so bê ti lo aye?” So ayeke mbeni oko ti ahundango tënë use so azo ti mungo batême ayeke kiri tënë na ni na hunzingo ti diskur ti batême. Ngbanga ti nyen a lingbi aChrétien amû tere ti ala na Jéhovah? Tongana nyen mungo tere na Nzapa aga na e aye ti nzoni? Ngbanga ti nyen zo alingbi pëpe ti voro Jéhovah tongana ti so bê ti Lo aye sân ti mû tere ti lo na Lo? Ti gbu nda ti akiringo tënë ni, a lingbi e bâ kozoni kue ye so ayeke mungo tere na Nzapa.

2. Mungo tere na Jéhovah aye ti tene nyen?

² Mungo tere na Nzapa aye ti tene nyen? Bâ tongana nyen bazengele Paul asara tënë ti songo ti lo na Nzapa. Na gbele ti gbâ ti azo so lo na ala ayeke na yâ ti mangboko so ague ti lï ngu, lo tene Jéhovah ayeke “Nzapa so [ni] yeke zo ti lo”. (Diko Kusala 27:22-24.) Atâ Chrétien kue ayeke ti Jéhovah. Me, dunia kue ayeke “na gbe ti Zo ti sioni.” (1 Jean 5:19). A-Chrétien aga azo ti Jéhovah na ngoi so ala mû tere ti ala na lo na yâ ti sambela na lo yeda na ala. Mara ti mungo tere tongaso na Jéhovah ayeke mbeni zendo so abâ gi zo oko oko. Gi na pekoni si zo ayeke wara batême ti ngu.

3. Batême ti Jésus aye ti fa nyen? Adisciple ti lo alingbi ti mû tapande ti lo tongana nyen?

³ Jésus azia na e mbeni tapande na ngoi so lo wani lo soro ti sara ye so Nzapa aye. Teti so a dü lo na yâ ti mara ti Israël so amû tere ti lo na Nzapa, lo yeke zo so amû tere ti lo na Nzapa awe. Me, na ngoi ti batême ti lo, lo sara mbeni ye so ayeke kota ahon ti so Ndia ahunda. Mbeti ti Nzapa afa so lo tene: “Ô Nzapa, bâ, mbi ga ti sara ye so bê ti mo aye.” (aHéb. 10:7; Luc 3:21). Tongaso, batême ti Jésus aye ti fa so lo ga ti fa tere ti lo na Nzapa ti sara ye so Babâ ti lo aye. Adisciple ti lo amû tapande ti lo na ngoi so ala ga ti mû batême. Ye oko, ti ti ala, batême ti ngu afa na lê ti azo polele so ala mû tere ti ala kozoni awe na Nzapa na yâ ti sambela.

 Lege so mungo tere na Nzapa aga na aye ti nzoni na e

4. Ye wa songo ti David na Jonathan afa na e na ndo ti mango tere?

⁴ Mungo tere ti aChrétien na Nzapa ayeke kota tënë mingi. A hon senge mango tere. Tongaso, tongana nyen mungo tere ti e na Nzapa aga na aye ti nzoni na e? Na lege ti hakango ye, zia e bâ tongana nyen azo awara aye ti nzoni na peko ti mungo yanga so ala mû na popo ti ala. Mbeni tapande ni oko ayeke ti songo ti kamarade. Ti wara ye ti nzoni na sarango kamarade na mbeni zo, a lingbi mo sara ye tongana tâ kamarade na mbage ti zo ni. Ye so ahunda mango tere: mo bâ so a lingbi mo bibe na kamarade ti mo. Mbeni oko ti apendere songo ti kamarade so Bible asara tënë ni ayeke ti David na Jonathan. Ala te même mbele ti kamarade na popo ti ala. (Diko 1 Samuel 17:57; 18:1, 3.) Atâa so warango mara ti akamarade so amä tere tongaso ayeke ngangu, mingi ti asongo ti kamarade ayeke tambela nzoni tongana akamarade ni amä tere.​—aProv. 17:17; 18:24.

5. Tongana nyen mbeni ngbâa alingbi ti bâ nzoni na dutingo lakue na gbe ti wa ti lo so ayeke nzoni?

⁵ Ndia so Nzapa amû lani na azo ti Israël asara tënë ti mbeni songo so na yâ ni azo awara aye ti nzoni dä tongana ala mä tere. Tongana mbeni ngbâa abâ so a yeke nzoni teti lo ti duti lakue na gbe ti wa ti lo so ayeke nzoni, lo lingbi ti mä tere na wa ti lo teti lakue. Ndia ni atene: “Tongana ngbâa ni atene biani, Mbi ndoye mveni ti mbi, na wali ti mbi, na amolenge ti mbi, mbi ye ti sigigi senge pëpe; tongaso fade mveni ti lo aga na lo na gbele Nzapa, na lo ga na lo na yanga ti da, na fade mveni ti lo akpo mê ti lo na nge [wala suä] na tere ti cadre ti yanga ti da; na fade ngbâa so asara kusala teti mveni ti lo lakue.”​—Ex. 21:5, 6.

6, 7. (a) Tongana nyen azo abâ nzoni na lege ti mango tere? (b) Ye so afa nyen na ndo ti songo ti e na Jéhovah?

⁶ Mariage ayeke mbeni songo so ahunda ti tene zo oko oko asara ye alingbi na yanga so lo mû. A yeke gi mango tere ti lê ti mbeti pëpe, me a yeke ti sara aye so a lingbi mo sara na mbage ti mba ti mo. Azo use so amû tere sân ti sara mariage alingbi ti wara tâ nzoni duti pëpe, même amolenge ti ala kue. Me ti akoli na awali so amû zendo na lege ti mariage so amû gonda na Nzapa, a yeke ngbanga ti ala ti sara ye alingbi na Mbeti ti Nzapa, ti sara kue ti leke akpale ti ala na lege ti ndoye.​—Mat. 19:5, 6; 1 aCor. 13:7, 8; aHéb. 13:4.

⁷ Na ngoi so a sû na Bible, azo abâ nzoni na lege ti mango tere na ndo ti dengo buze nga na mungo zo na kua (Mat. 20:1, 2, 8). Ye so ayeke nga tâ tënë laso. Na tapande, a yeke nzoni ti sû mbeti ti mango tere kozoni si e dë buze na mbeni zo wala e sara kua na yâ ti mbeni ndokua. Mango tere ayeke kpengba aye tongana songo ti kamarade, kamba ti mariage na tënë ti mungo zo na kua, legeoko nga mungo tere ti mo kue na Jéhovah ayeke ga na mo aye ti nzoni mingi na yâ ti songo ti mo na lo. Zia e bâ fadeso tongana nyen azo ti giriri abâ nzoni na peko ti mungo tere ti ala na Jéhovah Nzapa nga tongana nyen mungo tere so ayeke ngangu ahon gi senge mango tere.

Lege so azo ti Israël abâ nzoni na mungo tere ti ala na Nzapa

8. Ti azo ti Israël, mungo tere na Nzapa aye ti tene nyen?

⁸ Mara ti Israël kue aga azo so amû tere ti ala na Jéhovah na ngoi so ala mû zendo na lo. Jéhovah abungbi ala nduru na Hoto ti Sinaï, na lo tene na ala: “Tongana i ye ti mä yanga ti Mbi biani, na i bata tënë ti mbele ti Mbi, tongaso fade i ga ye ti Mbi mveni na popo ti amara kue.” Azo kue akiri tënë legeoko, ala tene: “Fade e sara ye kue so L’Éternel atene.” (Ex. 19:4-8). Ti azo ti Israël, mungo tere na Nzapa ayeke kota ye mingi ahon gi mango tere ti sara mbeni ye. A ye ti tene so ala ga ti Jéhovah awe, na fadeso Jéhovah ayeke sara ye na ala tongana “ye ti [lo] mveni”.

9. Tongana nyen azo ti Israël abâ nzoni na peko ti so ala mû tere ti ala na Jéhovah?

 ⁹ Azo ti Israël abâ nzoni na peko ti so ala ga ti Jéhovah. Lo yeke be-ta-zo na zendo so lo mû na lo bata ala tongana ti so mbeni babâ wala mama ti ndoye abata molenge ti lo. Nzapa atene na azo ti Israël: “Wali alingbi girisa molenge ti lo so anyon me ti lo? si lo sara be-nzoni pëpe na molenge ti yâ ti lo. Oui, ala lingbi girisa, me fade Mbi girisa mo lâ oko pëpe.” (És. 49:15). Jéhovah amû na ala Ndia ti fa lege na ala, lo tokua aprophète ti wa ala, nga lo bata ala na lege ti a-ange. Mbeni wasungo psaume atene: “Lo fa tënë ti Lo na Jacob, na Lo fa kpengba-ndia ti Lo na kpengba-tene ti Lo na Israël. Lo sara tongaso na mbeni mara oko pëpe.” (Ps. 147:19, 20; diko Psaume 34:8, 20; 48:15.) Tongana ti so Jéhovah abâ lege ti mara so ayeke ti lo giriri, legeoko nga fade lo yeke bâ lege ti azo so laso amû tere ti ala na lo.

Ndani so a lingbi e mû tere ti e na Nzapa

10, 11. A dü e na yâ ti sewa ti Nzapa? Fa nda ni.

¹⁰ Na ngoi so ambeni zo ayeke gbu li ti ala na ndo ti mungo tere na Nzapa na lege ti batême ti aChrétien, ambeni alingbi ti hunda tere ti ala: ‘Ngbanga ti nyen mbi lingbi pëpe ti voro Nzapa sân ti mû tere ti mbi na lo?’ E yeke hinga ndani polele tongana e bâ tâ mbilimbili dutingo ti e laso na gbele Nzapa. Dabe ti mo so, ndali ti siokpari ti Adam, a dü e kue na gigi ti sewa ti Nzapa (aRom. 3:23; 5:12). Mungo tere ti e na Nzapa ayeke mbeni kpengba ye so a hunda ti sara kozo si Nzapa ayeda ti mû e na yâ ti sewa ti lo ti dunia kue. Zia e bâ ndani.

¹¹ Zo oko na popo ti e ayeke pëpe na mbeni babâ so alingbi ti dü lo na fini tongana ti so Jéhovah aye lani: fini ti lakue lakue (1 Tim. 6:19). A dü e pëpe tongana amolenge ti Nzapa, teti so ngbene ye so kozo koli na kozo wali asara siokpari, azo kue akangbi na Babâ ti ala ti ndoye so ayeke nga Wasarango ala. (Bâ Deutéronome 32:5.) Ngbene ye na ngoi ni so, azo ti dunia kue ayeke na yâ ti sewa ti Jéhovah pëpe.

12. (a) Na lege wa awasiokpari alingbi ti ga amembre ti sewa ti Nzapa? (b) A lingbi e sara aye wa kozoni si e wara batême?

¹² Ye oko, e oko oko kue e lingbi ti hunda na Nzapa ti mû e na yâ ti sewa ti lo so awakua ti lo so lo yeda na ala ayeke na yâ ni. * Ye so alingbi ti si tongana nyen teti so e yeke awasiokpari so? Bazengele Paul asû na mbeti atene: “Na ngoi so e yeke lani awato, e ga azo so akiri asara songo na Nzapa na lege ti kuâ ti Molenge ti lo.” (aRom. 5:10). Na ngoi ti batême ti e, e hunda na Nzapa ti wara mbeni nzoni yingo-ti-hinga tongaso si lo bâ e na nzoni lê (1 Pi. 3:21). Me kozoni na batême, a lingbi e sara ambeni ye. A lingbi e gi ti hinga Nzapa, e manda ti zia bê ti e kue na lo, e changé bê ti e, na e changé lege ti e (Jean 17:3; Kus. 3:19; aHéb. 11:6). Me mbeni ye angbâ ti tene e sara kozoni si e duti na yâ ti sewa ti Nzapa. Ye ni ayeke nyen?

13. Ngbanga ti nyen a yeke na lege ni ti tene mbeni zo amû tere ti lo na Nzapa kozoni si lo ga membre ti sewa ti Nzapa ti awavorongo lo?

¹³ Kozoni si mbeni zo so akangbi na Nzapa aga mbeni membre ti sewa ti lo so na yâ ni a yeke wara awakua ti lo so lo yeda na ala, a lingbi lo mû zendo na Jéhovah. Ti gbu nda ni, e bâ tapande so: mbeni babâ so azo ane lo mingi na nzoni bê aye ti mû mbeni nyindu ti bata lo tongana mbeni molenge ti lo. Azo ahinga babâ so tongana mbeni nzoni zo. Me, kozoni si lo mû nyindu so ti ga molenge ti lo, koli so aye si molenge-koli so amû mbeni zendo. Tongaso, koli so atene: “Kozo si mbi mû mo ti ga molenge ti mbi, mbi ye ti hinga wala mo yeke ye ande mbi na mo yeke kpe mbi tongana babâ ti mo.” Gi tongana molenge ni ayeda ti mû zendo ni si koli so alingbi ti mû lo  na yâ ti sewa ti lo. Ye so ayeke na lege ni pëpe? Legeoko nga, Jéhovah ayeke mû na yâ ti sewa ti lo gi azo so amû tere ti ala na lo na bê ti ala wani. Bible atene: “Ala mû tere ti ala tongana sandaga so ayeke na fini, so ayeke nzoni-kue, so anzere na Nzapa.”​—aRom. 12:1.

Mungo tere na Nzapa afa ndoye na mabe

14. Na lege wa mungo tere na Nzapa ayeke fä ti ndoye?

¹⁴ Ti deba yanga ti mû tere na Nzapa ayeke fä ti ndoye so alondo na bê so zo afa ni na mbage ti Jéhovah. A yeke tongana zendo ti mariage. Koli so ayeke Chrétien so ague ti sara mariage ayeke fa ndoye ti lo na mungo yanga ti ngbâ be-ta-zo na wali ti lo atâa ye wa asi. A yeke mbeni mungo yanga so ane mingi ahon gi senge tënë so zo atene na mbâ ti lo ti sara na lo mbeni ye. Koli so ayeke Chrétien so ague ti sara mariage ahinga so lo lingbi ti duti na pasa ti duti na wali ti lo gi tongana lo deba yanga ti lo na lango ti mariage. Legeoko nga, e lingbi pëpe ti bâ nzoni kue na lege ti dutingo membre ti sewa ti Jéhovah sân ti deba yanga ti e ti mû tere ti e na lo. Tongaso, e mû tere ti e na Nzapa ngbanga ti so, atâa so e yeke awasiokpari, e ye ti ga ti lo na e leke na bê ti e ti ngbâ be-ta-zo na lo, atâa ye wa asi.​—Mat. 22:37.

15. Tongana nyen mungo tere na Nzapa afa so zo ayeke na mabe?

¹⁵ Tongana e mû tere ti e na Nzapa afa so e yeke na mabe. A yeke tongaso ngbanga ti nyen? Mabe so e yeke na ni na Jéhovah asara si e hinga na bê ti e so gango nduru na Nzapa ayeke nzoni ndali ti e (Ps. 73:28). E hinga so ayeke lakue kete ye pëpe ti tambela na Nzapa na ngoi so e yeke na popo ti “azo ti ngoi so, so sarango ye ti ala aba bango na ayeke kirikiri mingi,” me e zia bê ti e kue na zendo ti Nzapa so lo tene lo yeke mû maboko na e na yâ ti angangu so e yeke sara (aPhil. 2:15; 4:13). E hinga so e yeke awasiokpari, me e hinga na bê ti e kue so tongana e sara afaute fade Jéhovah ayeke sara nzoni bê na e. (Diko Psaume 103:13, 14; aRomain 7:21-25.) E yeke na mabe so fade Jéhovah afuta e teti yanga so e mû ti ngbâ be-ta-zo na lo.​—Job 27:5.

Mungo tere na Nzapa ague na zo ti wara ngia

16, 17. Ngbanga ti nyen mungo tere na Jéhovah ague na zo ti wara ngia?

¹⁶ Mungo tere na Jéhovah aga na ngia teti so a hunda ti mû ye. Jésus atene mbeni tâ tënë so azo kue ahinga, lo tene: “Ngia ayeke mingi tongana zo amû ye na zo ahon ti wara ye na maboko ti zo.” (Kus. 20:35). Jésus ahinga ngia ti mungo ye na ngoi ti kusala ti lo na sese. Tongana lo bâ so a yeke nzoni ti sara ni, lo gue sân ti wu tere, ti te kobe, na ti mû ambeni ye ti nzoni na tere ti lo tongaso si lo lingbi ti mû maboko na azo ti wara lege ti fini (Jean 4:34). A nzere na Jésus mingi ti zia ngia na bê ti Babâ ti lo. Jésus atene: “Mbi yeke sara lakue aye so anzere na bê ti lo.”​—Jean 8:29; aProv. 27:11.

 ¹⁷ Tongaso, Jésus afa na adisciple ti lo lege ti duti na ngia na yâ ti fini ti ala tongana lo tene: “Tongana mbeni zo aye ti ga na peko ti mbi, zia lo ke tere ti lo wani.” (Mat. 16:24). Sarango tongaso ayeke sara si e ga nduru na Jéhovah. E lingbi ti zia tere ti e na maboko ti mbeni zo so alingbi ti bata e na ndoye mingi?

18. Ngbanga ti nyen ti sara ye ague oko na mungo tere ti e na Jéhovah aga na e ngia mingi ahon ti mû tere ti e na mbeni ye wala mbeni zo nde?

¹⁸ Tongana e mû tere ti e na Jéhovah na pekoni e sara ye ague oko na mungo tere ti e ni na sarango ye so lo ye, fade a yeke ga na e ngia mingi ahon ti mû tere ti e na mbeni ye wala mbeni zo nde. Na tapande, azo mingi amû fini ti ala ti tomba peko ti amosoro sân ti wara tâ ngia. Me, azo so amû tere ti ala na Jéhovah awara ngia teti lakue lakue (Mat. 6:24). Pasa so ala yeke na ni ti “sara kusala maboko na maboko na Nzapa” asara si ala wara ngia; ala mû tere ti ala na kua pëpe me na Nzapa so abâ kusala ti e na nene ni (1 aCor. 3:9). Zo oko so alingbi ti bâ na nene ni kusala ti ala ahon Nzapa ayeke dä pëpe. Fade lo sara si awakua ti lo so ayeke be-ta-zo akiri maseka ti tene lo bâ lege ti ala lakue lakue.​—Job 33:25; diko aHébreu 6:10.

19. Pasa wa azo so amû tere ti ala na Jéhovah ayeke na ni?

¹⁹ Mungo tere na Jéhovah ayeke mû lege na mo ti lï na yâ ti kpengba songo na lo. Bible atene: “Ala ga nduru na Nzapa, na fade lo yeke ga nduru na ala.” (Jacq. 4:8; Ps. 25:14). Na yâ ti article ti peko, e yeke bâ ngbanga ti nyen a lingbi e gi bê ti e pëpe teti so e soro ti ga ti Jéhovah.

[Kete tënë na gbe ni]

Mo yeke kiri tënë tongana nyen?

• Mungo tere na Nzapa aye ti tene nyen?

• Tongana nyen mungo tere na Nzapa aga na e aye ti nzoni?

• A lingbi aChrétien amû tere ti ala na Jéhovah ngbanga ti nyen?

[Ahundango tënë ti manda na ye]

[Foto na lembeti 12]

Ti sara ye ague oko na mungo tere ti e na Jéhovah aga na e ngia teti lakue lakue