Fu san ede yu musu gi yusrefi abra na Yehovah?

„A neti disi wan engel fu a Gado di mi e dini . . . kon tanapu na mi sei.”—TORI. 27:23.

1. San den sma di o teki dopu du kaba, èn sortu aksi e opo kon te a abi fu du nanga a tori dati?

„YU ABI berow fu yu sondu fu di yu poti bribi na ini a srakti-ofrandi fu Yesus Krestes, èn yu gi yusrefi abra na Yehovah fu du a wani fu en?” Disi na wán fu den tu aksi di den sma di o teki dopu musu piki, na a kaba fu a dopu lezing. Fu san ede Kresten musu gi densrefi abra na Yehovah? Sortu wini wi e kisi te wi gi wisrefi abra na Gado? Fu san ede wan sma musu gi ensrefi abra na Gado, efu a wani taki Gado feni na anbegi fu en bun? Fu man frustan den piki tapu den aksi disi, dan wi musu luku fosi san a wani taki te wan sma gi ensrefi abra na Gado.

2. San a wani taki te wan sma gi ensrefi abra na Yehovah?

² San a wani taki te wan sma gi ensrefi abra na Gado? Luku san na apostel Paulus ben taki fu a matifasi di a ben abi nanga Gado. Di a ben de makandra nanga furu tra sma na ini wan sipi di ben de fu sungu, dan na fesi ala den sma dati a kari Yehovah „a Gado di mi e dini”. (Leisi Tori fu den Apostel 27:22-24.) Ala tru Kresten e dini Yehovah, noso den de fu Yehovah. Ma heri grontapu „de na ini a makti fu na ogriwan” (1 Yoh. 5:19). Kresten e kon de fu Yehovah te den e gi densrefi abra na Yehovah na ini begi, èn den musu du dati na wan fasi di Yehovah feni bun. A sma disi e pramisi Gado taki a sa du a wani fu En. Baka dati, a sma e teki dopu.

3. San a dopu fu Yesus ben e prenki, èn fa den bakaman fu en kan teki na eksempre fu en?

³ Yesus de wan eksempre gi wi, fu di a bosroiti fu du a wani fu Gado. Fu di Yesus ben gebore leki wan memre fu a pipel Israel di ben gi densrefi abra na Gado, meki a ben gi ensrefi abra kaba na Gado. Ma di a teki dopu, a du moro leki san a Wet ben taki. Soleki fa Gado Wortu e sori, dan a ben taki: „Luku! Mi kon . . . fu du yu wani, o Gado” (Hebr. 10:7; Luk. 3:21). Sobun, a dopu fu Yesus ben e prenki a gi di a ben gi ensrefi abra na Gado fu du a wani fu en Papa. Den bakaman fu en e teki na eksempre fu en te den e gi densrefi abra na Gado èn e teki dopu. Ma te den e teki dopu na ini watra,  dan den e sori ala sma taki den gi densrefi abra na Gado na ini begi.

Sortu wini wi e kisi te wi e gi wisrefi abra na Gado?

4. San wi e leri fu a matifasi fu David nanga Yonatan?

⁴ Te wan sma e gi ensrefi abra na Gado, dan dati na wan seryusu tori. A no de so nomo taki a sma disi pramisi Gado wan sani, ma fu taki en leti, a meki wan sweri nanga Gado. Ma sortu wini wi e kisi te wi e gi wisrefi abra na Gado? Fu kon sabi dati, wi sa luku sortu wini wi e kisi te wi e hori wisrefi na den difrenti sortu kruderi di wi leki libisma e meki nanga makandra. Meki wi luku fa a de nanga mati. Efu yu wani abi wan mati, dan yusrefi musu de wan mati gi a sma. Dati wani taki dati yu musu sori a sma taki yu lobi en. Wan fu den moro moi matifasi na ini Bijbel, na a di fu David nanga Yonatan. Den ben meki wan frubontu srefi taki den ben o tan mati fu makandra. (Leisi 1 Samuel 17:57; 18:1, 3.) Aladi furu sma no abi a sortu matifasi dati, toku furu sma e tan bun mati te den e tan sori lobi gi makandra.—Odo 17:17; 18:24.

5. San wan srafu ben musu du efu a ben wani tan na wan bun basi fu ala ten?

⁵ A Wet di Gado ben gi den Israelsma e taki fu wan tra situwâsi pe sma meki kruderi nanga makandra. Te den Israelsma ben e hori densrefi na a kruderi dati, dan den ben kisi wini tu. Te wan srafu ben wani tan na wan bun basi fu ala ten, dan a ben kan meki wan kruderi nanga a basi taki a ben o dini en, en heri libi langa. A Wet e taki: „Efu a srafu e taki nomonomo: ’Mi lobi mi basi, mi wefi, nanga den manpikin fu mi trutru. Mi no wani kon fri’, dan en basi musu tyari en na fesi a tru Gado. A musu tyari en go na wan doro noso wan doropostu, pe a musu boro a yesi fu a srafu nanga wan prin. En heri libi langa a sa de wan srafu fu en basi.”—Ex. 21:5, 6.

6, 7. (a) Te sma e hori densrefi na a pramisi fu den, dan sortu wini dati e tyari kon gi den? (b) San dati e leri wi te a abi fu du nanga a matifasi di wi abi nanga Yehovah?

⁶ Na ini a trowlibi a de tumusi prenspari taki trowpatna e tan sori lobi gi makandra. A no de so nomo taki den musu hori densrefi na wan kontrakti, ma den musu tan sori lobi gi makandra soleki fa den pramisi. Te tu sma e libi nanga makandra sondro fu trow, dan den noiti no sa abi a dyaranti taki den sa tan na makandra. Den pikin fu den no sa abi a dyaranti dati tu. Ma te trowpatna abi trutru lobi gi makandra, dan den e du ala san den man fu lusu problema na wan lobi-ati fasi, fu di den wani hori densrefi na san Bijbel e taki.—Mat. 19:5, 6; 1 Kor. 13:7, 8; Hebr. 13:4.

⁷ Na ini Bijbel ten, sma ben e kisi wini te den ben e meki bisnis kontrakti nanga wroko kontrakti (Mat. 20:1, 2, 8). Na so a de tu na ini a ten disi. Fu eksempre, wi e kisi wini te wi e meki wan kontrakti fosi wi e bigin wan bisnis, noso fosi wi e bigin wroko gi wan basi. Iya, a de so trutru taki wi e kisi wini te wi e hori wisrefi na den difrenti sortu kruderi di wi e meki nanga wi mati, wi trowpatna, èn nanga a basi fu wi. Sobun, wi sa kisi moro wini te wi e hori wisrefi na a sweri di wi meki nanga Yehovah! Meki wi go luku fa sma na ini owruten kisi wini fu di den ben gi densrefi abra na Yehovah Gado. Wi sa luku tu fu san ede den no ben si a sani disi leki wan pramisi nomo di den ben meki na Gado.

Sortu wini den Israelsma ben kisi?

8. San a gi di den Israelsma ben gi densrefi abra na Gado, ben wani taki?

⁸ Di a pipel Israel ben meki wan sweri na Yehovah, dan na so fasi den gi densrefi abra na en. Yehovah ben meki den kon makandra na Sinai-bergi, èn a taigi den: „Efu unu e du finifini san mi taigi unu èn unu e hori mi frubontu, dan unu sa tron wan spesrutu gudu gi mi na mindri ala tra pipel.” A heri pipel ben piki: „Wi o du ala san Yehovah taki” (Ex. 19:4-8). A gi di den Israelsma ben gi densrefi abra na Gado, no ben wani taki nomo dati den ben musu du san den ben pramisi Gado. Ma a wani taki dati den ben de fu Yehovah, èn fu dati ede Yehovah ben si den leki en „spesrutu gudu”.

9. Sortu wini den Israelsma ben kisi fu di den ben gi densrefi abra na Gado?

 ⁹ Den Israelsma ben kisi wini fu di den ben de a pipel fu Yehovah. Den ben kan frutrow na en tapu, èn a ben e sorgu gi den neleki fa wan lobi-ati papa e sorgu gi en pikin. Gado ben taigi den Israelsma: „Wan mama sa frigiti en pikin di de na bobi ete? A no o abi sari-ati gi en pikin di a meki? Kande wan mama sa frigiti en pikin, ma noiti mi sa frigiti yu” (Yes. 49:15). Yehovah ben e tiri den nanga yepi fu a Wet, a ben e gi den deki-ati nanga yepi fu den profeiti, èn a ben e kibri den nanga yepi fu den engel. Wan psalm skrifiman ben skrifi: „A e fruteri Yakob san a musu du. A e gi Israel den markitiki nanga den wet fu en. A no du disi gi nowan tra pipel” (Ps. 147:19, 20; leisi Psalm 34:8, 20; 48:15, Da Bijbel na ini Sranantongo.) Neleki fa Yehovah ben e sorgu gi a pipel fu en na ini owruten, na so a sa sorgu gi den wan di e gi densrefi abra na en na ini a ten disi.

Fu san ede wi musu gi wisrefi abra na Gado?

10, 11. A de so taki wi gebore leki memre fu Gado en osofamiri? Fruklari dati.

¹⁰ Wan sma di e prakseri fu gi ensrefi abra na Gado èn fu teki dopu fu tron wan Kresten, ben kan aksi ensrefi: ’Fu san ede mi musu gi misrefi abra na Gado, fu man de wan anbegiman fu en?’ Fu man kisi piki tapu na aksi dati, dan wi musu frustan fa Gado e si wi now. Hori na prakseri taki na fu di Adam ben sondu, meki wi alamala gebore leki sma di no de memre fu Gado en osofamiri (Rom. 3:23; 5:12). Efu wi wani tron memre fu Gado en osofamiri di de na hemel èn na grontapu, dan a de tumusi prenspari taki wi e gi wisrefi abra na en. Meki wi go luku fu san ede wi musu du dati.

¹¹ Nowan fu wi abi wan papa di gi wi a têgo libi di Gado ben wani gi wi (1 Tim. 6:19). Wi no gebore leki manpikin fu Gado, bika di den fosi tu sma sondu, dan dati tyari wan prati kon na mindri libisma nanga wi lobi-ati Tata nanga Mekiman (Luku Deuteronomium 32:5). Sensi a ten dati, libisma no de memre moro fu Yehovah en osofamiri di de na hemel èn na grontapu.

12. (a) Fa sondu libisma kan tron memre fu Gado en osofamiri? (b) Sortu sani wi musu du bifo wi e teki dopu?

¹² Ma toku ibriwan fu wi kan aksi Gado fu teki wi leki wan memre fu en osofamiri. * Fa wi leki sondu sma kan tron futuboi fu Gado? Na apostel Paulus ben skrifi: „A dede fu en Manpikin meki taki wi kon bun baka nanga Gado aladi wi ben de feanti” (Rom. 5:10). Te wi e teki dopu, dan wi e aksi Gado fu gi wi wan bun konsensi so taki a kan feni wi bun (1 Petr. 3:21). Ma fosi wi teki dopu, wi musu du wan tu sani. Wi musu kon sabi Gado, wi musu leri fu frutrow na en tapu, wi musu sori berow, èn wi musu kenki den fasi fu wi (Yoh. 17:3; Tori. 3:19; Hebr. 11:6). Ma wi musu du ete wan sani, efu wi wani tron memre fu Gado en osofamiri. San na dati?

13. Fu san ede a fiti taki wan sma di wani tron wan memre fu Gado en osofamiri, musu gi ensrefi abra na Gado?

¹³ Efu wan sma wani tron wan futuboi fu Gado, dan a musu pramisi en wan seryusu sani fosi. Meki wi luku wan eksempre di sa yepi wi fu frustan fu san ede wan sma musu du dati. Kon meki wi taki dati wan lespeki papa e broko en ede nanga wan yonguwan di lasi en papa nanga mama na ini dede. A papa disi wani teki a boi disi leki en eigi pikin. Sma sabi a papa leki wan bun man. Ma fosi a e teki a boi disi leki en eigi pikin, dan a wani taki a boi pramisi en wan sani. Dati meki a man e taki: „Fosi mi e teki yu leki mi manpikin, dan mi wani sabi efu yu sa lobi mi èn efu yu sa lespeki mi leki yu papa.” Na soso te a yonguwan disi de klariklari fu pramisi a man a seryusu sani dati, dan a man sa teki en leki wan memre fu en  osofamiri. A man no abi leti fu du dati? Na so a de tu taki den wan-enkri sma di Yehovah e teki leki memre fu en osofamiri, na den wan di de klariklari fu gi densrefi abra na en. Bijbel e taki: „Gi un skin na Gado leki wan srakti-ofrandi di e libi, di de santa èn di Gado feni bun.”—Rom. 12:1.

Gi yusrefi abra na Gado fu di yu lobi en, èn fu di yu abi bribi

14. Fu san ede wi kan taki dati sma di gi densrefi abra na Gado, e sori taki den lobi en?

¹⁴ Te wan sma e gi ensrefi abra na Gado, dan dati e sori taki a lobi Yehovah nanga en heri ati. Yu kan agersi en nanga a pramisi di trowpatna e meki na a trowdei fu den. Wan Kresten trowmasra e pramisi en trowpatna taki a sa tan sori lobi gi en awinsi san a e pasa. A no de so nomo taki den trowpatna e pramisi fu hori densrefi na wan kruderi, ma den e pramisi fu sori lobi gi makandra fu ala ten. Wan Kresten trowmasra e frustan taki a no ben o abi a grani fu libi makandra nanga en wefi, efu a no ben pramisi en taki a ben o tan lobi en awinsi san e pasa. Na so a de tu, taki wi no kan kisi a grani fu de memre fu Yehovah en osofamiri, efu wi no gi wisrefi abra na en. Sobun, wi e gi wisrefi abra na Gado, fu di wi leki sondusma abi na angri fu de futuboi fu en, èn fu di wi abi a fasti bosroiti fu tan gi yesi na en awinsi san e pasa.—Mat. 22:37.

15. Fu san ede wi kan taki dati wan sma di e gi ensrefi abra na Gado e sori taki a e bribi na ini en?

¹⁵ Te wi e gi wisrefi abra na Gado, dan wi e sori taki wi e bribi na ini en. Fu san ede dati de so? Fu di wi abi bribi na ini Yehovah, meki wi abi na overtoigi taki wi sa kisi wini te wi e kon krosibei na Gado (Ps. 73:28). Wi sabi taki a no sa makriki ala ten fu waka nanga Gado, aladi wi e libi na mindri „den kruktusma fu a ten disi di e du soso ogri”. Ma wi abi a frutrow taki Gado sa tan horibaka gi wi soleki fa a pramisi wi (Fil. 2:15; 4:13). Wi sabi taki wi abi sondu, ma wi de seiker taki Yehovah sa sori sari-ati gi wi te wi e meki fowtu. (Leisi Psalm 103:13, 14; Romesma 7:21-25.) Wi e bribi taki Yehovah sa blesi wi te wi abi a fasti bosroiti fu tan gi yesi na en.—Yob 27:5.

Wi sa de koloku te wi gi wisrefi abra na Gado

16, 17. Fu san ede wan sma di e gi ensrefi abra na Yehovah, sa de koloku?

¹⁶ Te wi gi wisrefi abra na Yehovah, dan wi sa de koloku fu di wi e du sani fu yepi trawan. Yesus ben abi leti di a taki: „Wan sma sa de moro koloku te a e gi sani, leki te a e kisi sani” (Tori. 20:35). Di Yesus ben du en diniwroko na grontapu, dan a ben de koloku trutru fu di a ben e gi sani. Son leisi, a no ben e rostu, a no ben e nyan, èn a ben de klariklari fu nyan pina soso fu man yepi sma fu feni a pasi di ben o tyari den go na têgo libi (Yoh. 4:34). Yesus ben lobi fu meki na ati fu en Papa prisiri. A ben taki: „Ala ten mi e du san e plisi en.”—Yoh. 8:29; Odo 27:11.

 ¹⁷ Yesus ben sori den bakaman fu en fa den kan kon de koloku, fu di a taigi den: „Efu wan sma wani kon na mi baka, dan a no musu teri ensrefi moro” (Mat. 16:24). Te wi e du dati, dan wi e kon moro krosibei na Yehovah. Nowan sma ben o man sorgu gi wi na wan moro bun fasi, a no so?

18. Te wi e du san wi pramisi Yehovah, dan fu san ede wi sa de moro koloku, leki te wi e hori wisrefi na iniwan kruderi di ei meki nanga sma?

¹⁸ Te wi e gi wisrefi abra na Yehovah, èn te wi e du a wani fu en soleki fa wi pramisi en, dan wi sa de moro koloku, leki te wi e hori wisrefi na iniwan kruderi di wi meki nanga sma. Ma den wan di gi densrefi abra na Yehovah sa de koloku ala ten (Mat. 6:24). A grani di den abi fu „wroko makandra nanga Gado”, e meki taki den de koloku. Den no e du a wroko dati fu di den e si en leki wan plekti nomo, ma den e du en fu di den lobi a Gado fu den di abi warderi gi a muiti di den e meki (1 Kor. 3:9). Nowan sma ben kan abi moro warderi gi a muiti di den futuboi disi e meki. Yehovah sa meki den reti-ati sma kon yongu baka so taki den kan kisi wini fu a lobi fu en fu têgo.—Yob 33:25; leisi Hebrewsma 6:10.

19. Sortu grani den sma abi di gi densrefi abra na Yehovah?

¹⁹ Te yu gi yusrefi abra na Yehovah, dan yu kan kon abi wan bun matifasi nanga en. Bijbel e taki: „Kon krosibei na Gado, èn a sa kon krosibei na unu” (Yak. 4:8; Ps. 25:14). Na ini a tra artikel, wi sa luku fu san ede wi no abi fu tweifri fu tron wan futuboi fu Yehovah.

[Futuwortu]

San yu ben sa piki?

• Te wan sma gi ensrefi abra na Gado, dan san dati wani taki?

• Fa wi e kisi wini te wi gi wisrefi abra na Gado?

• Fu san ede Kresten musu de sma di gi densrefi abra na Yehovah?

[Aksi fu a tori disi]

[Prenki na tapu bladzijde 6]

Te wi e du san wi pramisi Yehovah, dan wi sa de koloku ala ten