Cifukwa Wuli Mukwenera Kujipatulira kwa Yehova?
Cifukwa Wuli Mukwenera Kujipatulira kwa Yehova?
“Usiku uno, pafupi nane pangwimilira mungelo wa Ciuta uyo nili wake.”—MIL. 27:23.
1. Kasi ni vinthu wuli ivyo awo ŵakukhumba kubapatizika ŵakuŵa kuti ŵacita kale, ndipo ni mafumbo wuli agho tingajifumba?
LIMOZA mwa mafumbo agho ŵanthu awo ŵakukhumba kubapatizika ŵakuzgora ku umaliro wa nkhani ya ubapatizo ndakuti: “Pa lufura lwa sembe ya Yesu Khristu, kasi mwapera ku zakwananga zinu na kujipatulira kwa Yehova kuti mucitenge khumbo lake?” Cifukwa wuli Ŵakhristu ŵakwenera kujipatulira kwa Yehova? Kasi tikusanga candulo wuli cifukwa ca kujipatulira kwa Iyo? Cifukwa wuli munthu wangasopa Ciuta yayi mwakuzomerezgeka usange wandajipatulire kwa iyo? Kuti timanye mazgoro gha mafumbo agha, tiyeni tiwone dankha ico kujipatulira kukung’anamura.
2. Kasi kujipatulira kwa Yehova kukung’anamuraci?
2 Kasi kujipatulira kwa Ciuta kukung’anamuraci? Wonani umo mpositole Paulosi wakalongosolera ubwezi wake na Ciuta. Wakaphalira ŵanthu awo wakaŵa nawo mu ngalaŵa iyo yikaŵa pafupi kusweka kuti iyo ‘ngwa Ciuta,’ uyo zina lake ni Yehova. (Ŵazgani Milimo 27:22-24.) Ŵakhristu ŵaunenesko wose mba Yehova. Kweni caru cose “cikugona mu nkhongono za muheni.” (1 Yoh. 5:19) Ŵakhristu ŵakuŵa ŵa Yehova para ŵajipatulira kwa iyo mu lurombo. Kujipatulira uku nchilapo ico munthu wakucita pa iyo yekha. Pamasinda wakubapatizika.
3. Kasi kubapatizika kwa Yesu kukaŵa cilongolero ca vici, ndipo ŵalondezgi ŵake ŵangatolera wuli ciyezgelero cake?
3 Yesu wali kutipa ciyelezgero ciwemi comene apo wakasankha kuti wacitenge khumbo la Ciuta. Cifukwa cakuti wakababikira mu mtundu wa Israyeli, uwo ukaŵa wakujipatulira kwa Ciuta, iyo wakaŵa wakujipatulira kale. Kweni pa ubapatizo wake, wakacita cinthu cinyake cakuzirwa comene kuluska ico wakakhumbikwiranga kucita mwakuyana na Dango. Mazgu gha Ciuta ghakulongora kuti wakayowoya kuti: “Wonani! Niza kuzakacita khumbo linu, mwe Ciuta.” (Heb. 10:7; Luka 3:21) Ntheura, kubapatizika kwa Yesu kukaŵa cilongolero cakuti wajipeleka kwa Ŵawiske kuti wacitenge khumbo lawo. Para ŵalondezgi ŵake ŵakujipeleka kuti ŵabapatizike, ŵakuŵa kuti ŵakutolera ciyezgelero cake. Kweni kwa iwo, kubapatizika nchilongolero cakuti ŵali kujipatulira kwa Ciuta mu lurombo.
Umo Tikwandulira Cifukwa ca Kujipatulira
4. Kasi ubwezi wa Davide na Jonatani ukutiphaliraci pa nkhani ya kujipeleka?
4 Kujipatulira kwa Ciuta nchinthu camaseŵera yayi. Ni phangano waka yayi. Kasi tikusanga candulo wuli cifukwa ca kujipatulira kwa Ciuta? Tiyeni tiwone vyandulo ivyo ŵanthu ŵakusanga para ŵacita phangano. Mwaciyelezgero ŵanthu awo ŵali paubwezi. Kuti musange candulo na ubwezi winu, mukwenera kucita ivyo mubwezi wakwenera kucita. Kuti mucitenge ivyo mubwezi wakwenera kucita, mukwenera kujipeleka, kujipulika kuti muli na mulimo wa kupwelelera mubwezi winu. Baibolo likukonkhoska za Davide na Jonatani awo ubwezi wawo ukaŵa wapadera comene. Nakuti ŵakacita phangano lakukhwaskana na ubwezi wawo. (Ŵazgani 1 Samuel 17:57; 18:1, 3.) Nangauli ni nyengo zose yayi apo ŵanthu ŵakuŵa paubwezi wa nga ni wa Davide na Jonatani, kweni kanandi ubwezi ukuŵa wakukhora comene usange awo ŵali paubwezi ŵakupwelelerana.—Zinth. 17:17; 18:24.
5. Kasi muzga wakasanganga candulo wuli cifukwa ca kusankha kulutilira kukhala na sekuru wake muwemi?
5 Dango ilo Ciuta wakapa Ŵaisrayeli likulongosora za kukolerana kunyake uko ŵanthu ŵakasanganga nako candulo usange ŵacita phangano. Usange muzga wakukhumba kulutilira kukhala na sekuru wake mwakuti walutilire kuvikilirika, wakacitanga phangano na sekuru wake lakuti wakhalenge nayo umoyo wake wose. Dango ili likuti: “Usange muteŵeti [muzga] uyu wati waneneske kuti, Nkhutemwa sekuru wane, muwoli wane na ŵana ŵane; ntha tindifume mwanangwa, penepapo sekuru wake wizenge nayo kwa Ciuta, wafike naye pa muryango, panji pa mphanjizgo ya muryango; ndipo sekuru wake wamudolore khutu lake na cikatimo; ndipo wamuteŵetere mpaka nyifwa.”—Ex. 21:5, 6.
6, 7. (a) Kasi ŵanthu ŵakusanga candulo wuli para ŵacita phangano na ŵanyawo? (b) Kasi ici cikulongoraci za ubwezi withu na Yehova?
6 Nthengwa mbubwezi uwo ukukhumba kuti munthu wajipelekenge comene. Munthu wakujipeleka ku phangano yayi kweni kwa uyo watoranenge nayo. Mwanalume na mwanakazi awo ŵandatorane ndipo ŵakukhalira lumoza nga ni nthengwa ŵakuŵavya civikiliro canadi nesi ŵana ŵawo. Kweni awo ŵali kutorana mwakuyana na dango ŵali na vifukwa vya mu Malemba vyakumazgira masuzgo ghawo mwacitemwa.—Mat. 19:5, 6; 1 Kor. 13:7, 8; Heb. 13:4.
7 Mu nyengo yakale ŵanthu ŵakasanganga candulo para ŵalemberana maphangano ghakukhwaskana na malonda ndiposo nchito. (Mat. 20:1, 2, 8) Ndimo vikuŵiraso mazuŵa ghano. Mwaciyelezgero, pambere tindambe bizinesi panji kugwira nchito pa kamupani, tikwandula comene usange talemberana ivyo tapangana. Usange kucita phangano kukukhozga ubwezi, nthengwa, na nchito, ipo musangenge candulo cikuru comene para mwajipatulira kwa Yehova. Tiyeni sono tiwone umo ŵanthu ŵakale ŵakanduliranga cifukwa ca kujipatulira kwa Yehova Ciuta, ndiposo umo kujipatulira kukaŵira kwakuzirwa kuluska kucita waka phangano.
Umo Ŵaisrayeli Ŵakasangira Candulo Cifukwa ca Kujipatulira
8. Ku Ŵaisrayeli, kasi kujipatulira kwa Ciuta kukang’anamurangaci?
8 Mtundu wa Israyeli ukajipatulira kwa Yehova wati walapa cilapo kwa iyo. Yehova wakaŵawunganiska kufupi na Lupiri lwa Sinayi na kuŵaphalira kuti: “Usange timupulikire mazgu ghane nadi na kusunga phangano lane, apo timuŵenge usambazi wane wa padera pacanya pa ŵanthu wose.” Ndipo ŵanthu ŵakazgora pamoza ŵakati: “Vyose ivyo Yehova wayowoya titicitenge.” (Ex. 19:4-8) Ku Ŵaisrayeli, kujipatulira kwa Ciuta kukang’anamuranga vinandi padera pa kuzomera waka kuti ŵacitenge cinthu cinyake. Kukang’anamuranga kuti iwo mba Yehova ndipo Yehova wakaŵawonanga kuŵa ‘usambazi wake wapadera.’
9. Kasi Ŵaisrayeli ŵakasanga candulo wuli cifukwa ca kujipatulira kwa Ciuta?
9 Ŵaisrayeli ŵakasanga candulo cifukwa ca kuŵa ŵa Yehova. Yehova wakaŵa wakugomezgeka kwa iwo ndipo wakaŵapweleleranga nga umo wakucitira mupapi wacitemwa. Wakati ku Ŵaisrayeli: “Kasi mwanakazi wangamanya kuluwa mwana wake wakonkha, kuti waleke kuŵa naye na cisungusungu mwana wa nthumbo yake? Enya, wangaluwa nadi, kweni Ine ntha ndikuluwenge.” (Yes. 49:15) Yehova wakaŵapa Dango kuti liŵalongozgenge, nchimi kuti ziŵakhozgenge kweniso ŵangelo kuti ŵaŵavikilirenge. Wamasalmo wakalemba kuti: ‘Wakwandulira Jacob mazgu ghake, na Israyeli malanguro ghake na vyeruzgo vyake. Walije kucitira ntheura mtundu unyake cara.’ (Sal. 147:19, 20; ŵazgani Salmo 34:7, 19; 48:14.) Pakuti Yehova wakapwelelera mtundu uwo ukaŵa wake kumasinda, wacitengeso ntheura ku awo ŵakujipatulira kwa iyo mazuŵa ghano.
Cifukwa Wuli Tikwenera Kujipatulira kwa Ciuta?
10, 11. Kasi tikubabikira mukati mwa mbumba ya Ciuta? Longosorani.
10 Pakughanaghanira za kujipatulira kwa Ciuta ndiposo kubapatizika, ŵanji ŵangajifumba kuti, ‘Cifukwa wuli ningasopa yayi Ciuta kwambura kujipatulira kwa iyo?’ Cifukwa cikumanyikwa makora para tikughanaghanira za ubwezi withu na Ciuta pasono. Kumbukani kuti cifukwa cakuti Adamu wakananga, tose tikubabikira kuwaro kwa mbumba ya Ciuta. (Rom. 3:23; 5:12) Ntheura kujipatulira kwa Ciuta nkhwakukhumbikwa comene kuti watipokelere mu mbumba yake. Tiyeni tiwone cifukwa cake.
11 Palije munthu uyo wali na ŵadada ŵakumubaba awo ŵangamupa umoyo wamuyirayira nga umo vikeneranga kuŵira. (1 Tim. 6:19) Cifukwa cakuti ŵapapi ŵithu ŵakwamba ŵakananga, ŵanthu ŵakaŵaso paubwezi na Ciuta yayi, ŵakaŵa nayo kutali comene. Ntheura, tikababika kuŵa ŵana ŵa Ciuta yayi. (Yaniskani na Duteronome 32:5.) Kufuma pa nyengo iyo mpaka sono, ŵanthu ŵakukhala kuwaro kwa mbumba ya Yehova, ŵali nayo kutali.
12. (a) Kasi ŵanthu ŵambura kufikapo ŵangacita wuli kuti Ciuta waŵazomerezge mu mbumba yake? (b) Kasi munthu wakwenera kucitaci pambere wandabapatizike?
12 Nangauli vili nthena, waliyose payekha wangalomba Ciuta kuti wamuzomerezge kunjira mu mbumba yake ya ŵateŵeti ŵakuzomerezgeka. * Kasi vingacitika nadi kuti watipokelere ise taŵakwananga? Mpositole Paulosi wakalemba kuti: “Apo tikaŵa ŵalwani, tikaphemaniskika kwa Ciuta kwizira mu nyifwa ya Mwana wake.” (Rom. 5:10) Pa nyengo ya ubapatizo tikulomba Ciuta kuti watipe njuŵi yiwemi, mwakuti tiŵe ŵakuzomerezgeka na iyo. (1 Pet. 3:21) Kweni pali vinyake ivyo tikwenera kucita pambere tindabapatizike. Tikwenera kumumanya Ciuta, kwamba kumugomezga, kupera ndiposo kusintha mendero ghithu. (Yoh. 17:3; Mil. 3:19; Heb. 11:6) Kweni paliso cinyake ico tikwenera kucita pambere Ciuta wandatizomerezge kunjira mu mbumba yake. Kasi nchivici?
13. Cifukwa wuli nchakwenelera kuti munthu walape cilapo ca kujipatulira kwa Ciuta mwakuti waŵe yumoza wa ŵamumbumba ya Ciuta ya ŵasopi ŵake ŵakuzomerezgeka?
13 Pambere munthu uyo wali kutali na Ciuta wandaŵe yumoza wa mbumba ya ŵateŵeti ŵa Ciuta ŵakuzomerezgeka, wakwenera kulapa cilapo kwa Yehova. Kuti tipulikiske cifukwa cake, ghanaghanirani za dada uyo wakulongora lusungu kwa muwukirano uyo ni mulanda, ndipo wakukhumba kuti wamulere nga ni yumoza wa ŵamumbumba yake. Dada uyu wakumanyikwa kuti ni munthu muwemi comene. Kweni pambere wandamutore muwukirano uyu kuŵa mwana wake, wakukhumba kuti mwana uyu walape cilapo. Ntheura dada uyu wakumuphalira kuti: “Pambere nindakutore kuŵa mwana wane, nkhukhumba kuti nimanye usange uzamunitemwa na kunicindika.” Usange wangazomera kulapa cilapo, mbwenu dada uyu wamutorenge kuŵa yumoza wa ŵamumbumba yake. Kasi nchakupulikikwa yayi kucita nthena? Mwakuyana waka, Yehova nayo wakupokelera ŵekha awo mbakukhumbisiska kulapa cilapo ca kujipatulira kwa iyo kuŵa ŵamoza ŵamumbumba yake. Baibolo likuti: ‘Jipelekani mwaŵene kwa iyo, kuŵa sembe yamoyo, ŵakujipatulira na kuŵa ŵakuzomerezgeka na iyo.’—Rom. 12:1.
Nchilongolero ca Citemwa na Cipulikano
14. Kasi kujipatulira kwa Ciuta nchilongolero ca citemwa mu nthowa wuli?
14 Kulapa cilapo ca kujipatulira kwa Ciuta, nchilongolero cakuti tikutemwa Yehova na mtima withu wose. Vikuyanako waka na cilapo ca nthengwa. Mwanalume wakulongora citemwa cake mwa kulapa kuti waŵenge wakugomezgeka kwa mwali wake visuzge viti wuli. Ni phangano ilo wakucita na munthu, wakulayizga waka kuti wacitenge cinthu cinyake yayi. Mwanalume uyo ni Mkhristu wakumanya kuti mwali uyu wangaŵa muwoli wake yayi usange wandalape cilapo ca nthengwa. Mwakuyana waka, nase tingaŵa na mwaŵi yayi wa kuŵa mu mbumba ya Yehova usange tindalape cilapo ca kujipatulira kwa iyo. Ntheura, tikujipatulira kwa iyo cifukwa cakuti tikukhumba kuti tiŵe ŵake ndipo tikuŵa kuti tadumura mu mtima withu kuti tiŵenge ŵakugomezgeka kwa iyo visuzge viti wuli, nangauli tikumanya kuti ndise ŵambura kufikapo.—Mat. 22:37.
15. Cifukwa wuli kujipatulira kwa Ciuta nchilongolero ca cipulikano?
15 Tikulongora kuti tili na cipulikano para tajipatulira kwa Ciuta. Cifukwa wuli? Para tili na cipulikano mwa Yehova tikugomezga kuti nchiwemi kusendelera kwa iyo. (Sal. 73:28) Tikumanya kuti ciŵenge cipusu yayi kwenda na Ciuta nyengo zose peneapo tili pakati pa “muwiro uwu wakubendera na wakunyongoloka.” Kweni tili na cigomezgo mu layizgo la Ciuta lakuti watovwirenge. (Fil. 2:15; 4:13) Tikumanya kuti tili ŵambura kufikapo, kweni tili na cigomezgo kuti Yehova wacitenge nase mwalusungu para tikubudiska. (Ŵazgani Salmo 103:13, 14; Ŵaroma 7:21-25.) Tili na cipulikano kuti Yehova watitumbikenge cifukwa ca kugomezgeka kwithu.—Job 27:5.
Tikuŵa Ŵakukondwa Para Tajipatulira kwa Ciuta
16, 17. Cifukwa wuli tikuŵa ŵakukondwa para tajipatulira kwa Yehova?
16 Tikuŵa ŵakukondwa para tajipatulira kwa Ciuta, cifukwa kujipatulira kukung’anamura kuti tajipeleka kwa iyo. Yesu wakayowoya fundo iyi apo wakati: “Muli kukondwa kukuru mu kupeleka kuluska mu kupokera.” (Mil. 20:35) Apo wakaŵa pa caru capasi Yesu wakawona kuti munthu wakuŵa wakukondwa cifukwa ca kupeleka. Nyengo zinyake wakatondekanga kupumura na kurya mwakuti wawovwire ŵanthu kusanga nthowa yakuyira ku umoyo. (Yoh. 4:34) Yesu wakatemwanga comene kukondweska mtima wa Ŵawiske. Iyo wakati: “Nyengo zose nkhucita vinthu vyakukondweska kwa iyo.”—Yoh. 8:29; Zinth. 27:11.
17 Ntheura Yesu wakaphalira ŵalondezgi ŵake cinthu ico cingaŵawovwira kuŵa ŵakukondwa apo wakati: “Usange yunji wakukhumba kwiza pamanyuma pane, wajipate.” (Mat. 16:24) Ntheura tikuŵa paubwezi na Yehova cifukwa ca kucita nthena. Kasi tingajipeleka kwa munthu waliyose kuti watipwelelere mwacitemwa padera pa Yehova?
18. Cifukwa wuli tikuŵa ŵakukondwa comene para tajipatulira kwa Yehova kuluska kujipeleka kwa munthu panji cinthu?
18 Tikuŵa ŵakukondwa para tajipatulira kwa Yehova na kuŵa na umoyo wakuyana na kujipatulira kwithu, kuluska kujipeleka ku munthu panji cinthu. Mwaciyelezgero, ŵanthu ŵanandi ŵakutangwanika na kupenja vinthu vyakuthupi, kweni ŵakuŵa ŵakukondwa yayi nesi ŵakukhorwa. Ndipouli, awo ŵajipatulira kwa Yehova ŵakuŵa ŵakukondwa nyengo zose. (Mat. 6:24) Ŵakuŵa ŵakukondwa cifukwa ca kuŵa “ŵanchito ŵanyake na Ciuta,” kuti cifukwa ca kujipeleka ku nchito yayi, kweni kwa Ciuta. (1 Kor. 3:9) Palije munthu uyo wangaŵawonga cifukwa ca kujipeleka kwawo kuluska Yehova. Nakuti ŵanthu ŵakugomezgeka wazamuŵawezgeraso ku unyamata na kuŵapwelelera kwamuyirayira.—Job 33:25; ŵazgani Ŵahebere 6:10.
19. Kasi awo ŵali kujipatulira kwa Yehova ŵali na mwaŵi wuli?
19 Mukuŵa paubwezi na Yehova para mwajipatulira kwa iyo. Baibolo likuti: “Sendelerani kwa Ciuta, ndipo iyo wasendelerenge kwa imwe.” (Yak. 4:8; Sal. 25:14) Mu nkhani yakulondezgapo, tizamusambira cifukwa ico tingasankhira na mtima wose kuti tiŵe ŵa Yehova.
[Mazgu ghamusi]
^ ndime 12 “Mberere zinyake” za Yesu zizamuŵa ŵana ŵa Ciuta para vilimika cikwi vyamara. Ndipouli, pakuti ŵajipatulira kwa Ciuta, ŵangacema Ciuta kuti “Ŵadada” ndipo nawo ŵangaŵa mu mbumba ya ŵasopi ŵa Yehova.—Yoh. 10:16; Yes. 64:8; Mat. 6:9; Uvu. 20:5.
Kasi Mungazgora Wuli?
• Kasi kujipatulira kwa Ciuta kukung’anamuraci?
• Kasi tikusanga candulo wuli cifukwa ca kujipatulira kwa Ciuta?
• Cifukwa wuli Ŵakhristu ŵakwenera kujipatulira kwa Yehova?
[Mafumbo]
[Cithuzithuzi pa peji 6]
Tikuŵa Ŵakukondwa para tili na umoyo wakukolerana na kujipatulira kwithu