No te aha e pûpû ai ia oe ia Iehova?
No te aha e pûpû ai ia oe ia Iehova?
“I na rui . . . i tia mai ai i pihai iho ia ˈu te hoê melahi a te Atua, no ˈna vau.”—OHI. 27:23.
1. Eaha ta te feia e bapetizohia i rave ê na, e eaha te mau uiraa e hiti mai?
“MAOTI te tusia o Iesu Mesia, ua tatarahapa anei outou i ta outou mau hara e ua pûpû anei outou ia outou iho ia Iehova no te rave i to ˈna hinaaro?” Teie hoê o na uiraa e piti e pahonohia e te feia e bapetizohia i te hopea o te oreroraa parau bapetizoraa. No te aha te mau Kerisetiano e pûpû ai ia ratou ia Iehova? Eaha te maitai ia na reira? No te aha Iehova e ore ai e farii i te haamoriraa a te hoê taata tei ore i pûpû ia ˈna? No te taa i te pahonoraa, e hiˈopoa anaˈe eaha te pûpûraa.
2. Eaha te auraa e pûpû ia ˈna ia Iehova?
2 Eaha te auraa e pûpû ia ˈna i te Atua? A tapao na i ta te aposetolo Paulo faataaraa i to ˈna taairaa e te Atua. I mua i te taata atoa i nia i te hoê pahi tei fatata i te tomo, ua faahiti oia ia Iehova, ‘te Atua no ˈna vau.’ (A taio i te Ohipa 27:22-24.) No Iehova te mau Kerisetiano mau atoa. “Te vai noa nei” râ to te ao atoa “i raro aˈe i t[e] varua ino.” (Ioa. 1, 5:19) Ia pûpû te mau Kerisetiano ia ratou ia Iehova ma te fariihia na roto i te pure e riro ai ratou no ˈna. Na ratou taitahi e euhe e i muri iho ratou e bapetizohia ˈi i roto i te pape.
3. Eaha ta te bapetizoraa o Iesu i faataipe, e e nafea ta ˈna mau pǐpǐ e pee ai i to ˈna hiˈoraa?
3 Ua horoa mai Iesu i te hiˈoraa i to ˈna faaotiraa e rave i te hinaaro o te Atua. No te mea ua fanauhia oia i roto i te nunaa Iseraela pûpûhia, ua pûpû-ê-na-hia ïa oia i te Atua. I to ˈna râ bapetizoraa, ua hau atu ta ˈna i rave i tei titauhia e te Ture. Ia au i te Parau a te Atua, ua na ô oia: “Teie au, e tau Atua, te haere nei au e faatia i to oe hinaaro.” (Heb. 10:7; Luka 3:21) Ua faataipe ïa to Iesu bapetizoraa i to ˈna faaiteraa ia ˈna i to ˈna Metua no te rave i to ˈNa hinaaro. Te pee ra ta ˈna mau pǐpǐ i to ˈna hiˈoraa ia pûpû ratou ia ratou no te bapetizoraa. No ratou râ, e faaiteraa to ratou bapetizoraa i roto i te pape i mua i te taatoaraa e ua pûpû ratou ia ratou i te Atua na roto i te pure.
Te maitai ia pûpû ia tatou
4. Eaha ta te auhoaraa o Davida raua Ionatana e faaite maira no nia i te parau fafau?
4 Mea faufaa roa te pûpûraa Kerisetiano. E ere i te hoê noa parau fafau. Eaha râ te maitai ia pûpû ia tatou i te Atua? A hiˈo na i te maitai o te hoê parau fafau i rotopu i te mau hoa. E titau te fanaˈoraa i te hoê hoa i te hopoia e riro ei hoa e e aupuru ia ˈna. Te faataa ra te Bibilia ia Davida raua Ionatana ei hoa rahi. Ua fafau raua i te hoê faufaa niuhia i nia i to raua auhoaraa. (A taio i te Samuela 1, 17:57; 18:1, 3.) Mea varavara roa teie huru auhoaraa, e piri atu â râ te mau hoa ia fafau ratou e aupuru te tahi i te tahi.—Mas. 17:17; 18:24.
5. E nafea te hoê tavini e faaea maitai noa ˈi i pihai iho i te hoê fatu maitai?
5 Te faataa ra te Ture a te Atua no Iseraela i te tahi atu huru taairaa e maitai ai te taata i te hoê parau fafau. Ia hinaaro te hoê tavini e faaea hau noa i pihai iho i te hoê fatu maitai, e faatupu raua i te hoê parau faaau o te taai maoro ia raua. Te na ô ra te Ture: “Ia parau hua mai . . . taua tavini ra, E aroha vau i tau fatu, e i tau vahine, e tau mau tamarii, e ore au e haere noa; ei reira to ˈna fatu e aratai ai ia ˈna . . . i te uputa fare, e aore ra, i te pou o taua uputa ra, e na to ˈna fatu e tui i to ˈna tariˈa e puta ˈtu i te hoê tui; a tavini tamau atu ai oia i ǒ na ra.”—Exo. 21:5, 6.
6, 7. (a) E nafea te taata e maitai ai i te parau fafau e te parau faaau? (b) Eaha ta te reira e faaite ra no nia i to tatou taairaa e o Iehova?
6 E taairaa te faaipoiporaa o te titau i te hoê parau fafau papu. E parau fafau i rotopu e piti taata, e ere noa râ i te hoê api parau tarimahia. Mai te peu e eita raua e faaipoipo, eita roa raua e ora hau e ta raua atoa mau tamarii. Area na hoa tei fafau te tahi i te tahi e faaipoipo ma te tura, e turai ïa te Bibilia ia raua ia faaafaro ma te here i te mau fifi e tupu mai.—Mat. 19:5, 6; Kor. 1, 13:7, 8; Heb. 13:4.
7 I tahito ra, ua maitai te taata i te faatupuraa i te mau parau faaau no te tapihooraa e te ohipa. (Mat. 20:1, 2, 8) Oia atoa i teie mahana. E maitai tatou i te parau faaau tarimahia hou e haamata ˈi i te hoê tapihooraa aore ra i te ohiparaa i roto i te hoê taiete. E haapapu te hoê parau fafau i te mau taairaa mai te auhoaraa e te faaipoiporaa e te hoê parau faaau, i te ohipa ïa. E maitai atu â to oe taairaa e o Iehova ia pûpû taatoa oe ia oe ia ˈna! E hiˈo mai tatou i teie nei mea nafea te taata i tahito ra i maitai ai i te pûpûraa ia ratou i te Atua ra o Iehova e mea nafea te reira i hau atu ai i te hoê noa parau fafau.
Te maitai i to Iseraela pûpûraa ia ratou i te Atua
8. Eaha no Iseraela te pûpûraa ia ratou i te Atua?
8 Ua pûpû te nunaa Iseraela taatoa ia ratou ia Iehova i to ratou euheraa ia ˈna. Ua haaputuputu Iehova ia ratou i pihai iho i te mouˈa Sinai e ua na ô oia: “Ia faaroo mau mai outou i tau reo, e ia haapao maite i ta ˈu ra faufaa, e riro ïa outou ei taoˈa here rahi na ˈu i te mau taata atoa.” Ua pahono te nunaa taatoa: “Te mau parau atoa ta Iehova i parau, e rave ïa matou.” (Exo. 19:4-8) No Iseraela, e ere noa te pûpûraa ia ratou i te fafauraa e rave i te tahi mea. Oia atoa râ te riroraa ei nunaa no Iehova. E ua faariro Iehova ia ratou ei “taoˈa here rahi” na ˈna.
9. Mea nafea Iseraela i maitai ai i te pûpûraa ia ratou i te Atua?
9 Ua maitai Iseraela i te riroraa ei nunaa no Iehova. Ua haapao maitai e ua aupuru oia ia ratou mai te hoê metua î i te here i ta ˈna tamarii. Ua parau te Atua ia ratou: “E moe anei te aiû i te metua vahine mau iho; e aitâ ˈtura e ite i te aroha i te tamaiti no to ˈna iho opu? e, e moe â ïa ia ˈna; eita râ oe e moe ia ˈu.” (Isa. 49:15) Ua horoa Iehova i te Ture no te aratai, te mau peropheta no te faaitoito, e te mau melahi no te paruru ia ratou. Ua papai te hoê fatu salamo: “Ua faaite oia i ta ˈna parau ia Iakoba; i ta ˈna mau ture e ta ˈna mau faaauraa parau, ia Iseraela. Aore oia i na reira i te mau fenua atoa.” (Sal. 147:19, 20; a taio i te Salamo 34:7, 19; 48:14.) Ua aupuru Iehova i to ˈna nunaa i tahito ra, e aupuru atoa ïa oia i te feia e pûpû ia ratou ia ˈna i teie mahana.
Te tumu e pûpû ai ia tatou i te Atua
10, 11. Ua fanauhia anei tatou i roto i te utuafare taatoa o te Atua? A faataa.
10 A feruri ai vetahi i te pûpûraa Kerisetiano e te bapetizoraa, e ui paha ratou, ‘No te aha hoi e pûpû ai ia ˈu i te Atua no te haamori ia ˈna?’ Mea maramarama maitai te reira ia taa ia tatou to tatou tiaraa i mua i te Atua. No to Adamu hoi hararaa, ua fanauhia tatou i rapaeau i te utuafare o te Atua. (Roma 3:23; 5:12) Mea faufaa roa ia pûpû ia tatou i te Atua ia fariihia tatou i roto i to ˈna utuafare taatoa. E hiˈo mai tatou no te aha.
11 Aita e metua tane mau te nehenehe e horoa mai i te ora mure ore mai te Atua. (Tim. 1, 6:19) Aita tatou i fanauhia ei tamaiti na te Atua no te mea ua hara na metua matamua e ua atea te huitaata i to ratou Metua e Atua Poiete î i te here. (A hiˈo i te Deuteronomi 32:5.) Mai reira mai, ua ora te huitaata i rapaeau i te utuafare taatoa o Iehova e ua atea ê roa ia ˈna.
12. (a) E nafea te taata tia ore e ô ai i roto i te utuafare o te Atua? (b) Eaha te mau taahiraa e rave hou te bapetizoraa?
12 E nehenehe râ tatou taitahi e ani i te Atua ia farii ia tatou i roto i to ˈna utuafare o te mau tavini fariihia. * E nafea ïa, e taata hara hoi tatou? Ua papai te aposetolo Paulo: “I faafaitehia . . . tatou i te Atua i to tatou vai-enemi-raa ra i te pohe o ta ˈna Tamaiti.” (Roma 5:10) I te bapetizoraa, e ani tatou i te hoê manaˈo haava maitai i te Atua, ia fariihia tatou e ana. (Pet. 1, 3:21) Hou râ te bapetizoraa, te vai ra te mau taahiraa. Ia ite tatou i te Atua, ia haapii i te tiaturi ia ˈna, ia tatarahapa, e ia taui i to tatou haerea. (Ioa. 17:3; Ohi. 3:19; Heb. 11:6) Hou râ tatou e fariihia ˈi i roto i te utuafare o te Atua, te vai ra ˈtu â. Eaha ïa?
13. No te aha e tano ai ia euhe te hoê taata i te Atua ia ô oia i roto i to ˈNa utuafare o te mau tavini fariihia?
13 Hou te hoê taata tei atea ê i te Atua e ô ai i roto i to te Atua utuafare o te mau tavini fariihia, ia euhe oia ia Iehova. A hiˈo na i te hoê metua tane tura o te anaanatae i te hoê otare e o te hinaaro e faaamu ia ˈna. E taata maitai teie. Na mua ˈˈe râ e farii ai ia ˈna ei tamaiti na ˈna, e hinaaro oia ia fafau teie tamaiti. E na ô ïa teie taata, “Hou vau e farii ai ia oe ei tamaiti, e hinaaro vau e ite e e here e e faatura anei oe ia ˈu ei metua tane.” E farii teie taata ia ˈna i roto i to ˈna utuafare ia ineine teie tamaiti i te fafau. Mea tano anei? E farii atoa Iehova i roto i to ˈna utuafare i te feia noa tei ineine i te euhe e pûpû ia ratou ia ˈna. Te na ô ra te Bibilia: “Ia pûpû atu outou i to outou mau tino ei tusia ora, e te moˈa, e te au hoi i te Atua.”—Roma 12:1.
Faaiteraa i te here e te faaroo
14. E nafea ia faataa e e faaiteraa i te here te pûpûraa?
14 E faaiteraa i to tatou here mau ia Iehova te euheraa e pûpû ia tatou ia ˈna. Hoê â huru e te euheraa i te faaipoiporaa. E faaite te hoê tane Kerisetiano i to ˈna here i te vahine ta ˈna e faaipoipo ia euhe oia e haapao maitai ia ˈna, noa ˈtu eaha te tupu mai. E horeo teie i te hoê taata, e ere noa râ i te hoê parau fafau e rave i te tahi mea. Ua taa i teie tane Kerisetiano e eita e tia ia ˈna ia fanaˈo i te oraraa e te vahine ta ˈna e faaipoipo, ia ore oia e euhe. Eita atoa ïa tatou e fanaˈo i te mau haamaitairaa e ô i roto i to Iehova utuafare ma te ore e euhe e pûpû ia tatou ia ˈna. No te hinaaro ïa e riro ei taata no ˈna e pûpû ai tatou ia tatou i te Atua, noa ˈtu to tatou huru tia ore. E ua faaoti papu tatou e tapea i to tatou taiva ore ia ˈna, noa ˈtu eaha te tupu mai.—Mat. 22:37.
15. E nafea ia faataa e e faaiteraa i te faaroo te pûpûraa?
15 E faaiteraa atoa i te faaroo te pûpûraa ia tatou i te Atua. No te aha hoi? Maoti te faaroo ia Iehova e tiaturi ai tatou e mea maitai ia haafatata ˈtu i te Atua. (Sal. 73:28) E ere iho â i te mea ohie ia haere e te Atua i roto i “teie nei ui piˈo e te mârô.” Te tiaturi nei râ tatou i te parau fafau a te Atua e turu i ta tatou mau tutavaraa. (Phil. 2:15; Sal. 121:2) E taata tia ore iho â tatou, e aroha mai râ Iehova ia hape tatou. (A taio i te Salamo 103:13, 14; Roma 7:21-25.) E haamaitai mau â Iehova i ta tatou faaotiraa e tapea i to tatou hapa ore.—Ioba 27:5.
E oaoa te noaa i te pûpûraa i te Atua
16, 17. No te aha tatou e oaoa ˈi i te pûpûraa ia tatou ia Iehova?
16 E oaoa tatou i te pûpûraa ia tatou ia Iehova no te mea te horoa ra tatou ia tatou ia ˈna. Ua faahiti Iesu i te hoê parau mau faufaa roa: “E mea maitai i te horoa ˈtu i te rave mai.” (Ohi. 20:35) Ua ite roa Iesu i te maitai, aore ra oaoa, o te horoaraa a tavini ai oia i te fenua. Ia titauhia, ua haapae oia i te faafaaea, te maa, e te oraraa fanaˈo no te tauturu ia vetahi ê ia ite i te eˈa o te ora. (Ioa. 4:34) Ua au roa Iesu i te faaoaoaraa i to ˈna Metua. Ua parau oia: “Aore . . . au i faaea i te rave i te mea e mauruuru ai oia.”—Ioa. 8:29; Mas. 27:11.
17 Ua faaite Iesu i ta ˈna mau pǐpǐ i te huru oraraa maitai roa i te na ôraa: “O te taata i hinaaro i te pee mai ia ˈu, e faarue oia ia ˈna iho.” (Mat. 16:24) Ia na reira tatou e piri atu â ˈi tatou ia Iehova. Aita ˈtu e taata te nehenehe e aupuru ia tatou ma te here mai ia Iesu, e ere anei?
18. No te aha tatou e oaoa ˈtu â ˈi i te oraraa ia au i ta tatou pûpûraa ia Iehova, eiaha râ i te tahi mea aore ra taata?
18 E oaoa ˈtu â tatou i te pûpûraa ia tatou ia Iehova e te oraraa ia au i te reira ma te rave i to ˈna hinaaro, eiaha râ i te pûpûraa ia tatou i te tahi mea aore ra taata. Ei hiˈoraa, e rave rahi taata te pûpû i to ratou oraraa no te tapi i te mau faufaa materia ma te ore e oaoa e e mauruuru mau. E oaoa râ te feia o te pûpû ia ratou ia Iehova e a muri noa ˈtu. (Mat. 6:24) Te oaoa ra ratou i te haamaitairaa taa ê ei ‘hoa rave ohipa no te Atua.’ Aita ratou i pûpû ia ratou i te hoê ohipa, ia Iehova râ te hoê Atua î i te mauruuru. (Kor. 1, 3:9) O ˈna anaˈe te mauruuru ra i ta ratou mau haapaeraa. E faahoˈi atoa oia i ta ˈna mau tavini taiva ore i to ratou apîraa, a fanaˈo atu ai ratou i ta ˈna aupuru e a muri noa ˈtu.—Ioba 33:25; a taio i te Hebera 6:10.
19. Eaha ta tei pûpû ia ratou ia Iehova e fanaˈo?
19 Ia pûpû oe i to oe oraraa ia Iehova, e piri roa ïa to oe taairaa e o ˈna. Te na ô ra te Bibilia: “E haafatata ˈtu i te Atua, e na ˈna e haafatata mai ia outou.” (Iak. 4:8; Sal. 25:14) I roto i to muri nei tumu parau, e hiˈopoa tatou no te aha e faaotiraa papu ai te riroraa ei taata no Iehova.
[Nota i raro i te api]
^ Ia hope roa na tausani matahiti e riro ai te mau “mamoe ê atu” a Iesu ei tamarii na te Atua. No te mea râ ua pûpû ratou ia ratou i te Atua, e tano ia pure ratou i te Atua ei “Metua” no ratou e ia ô atoa i roto i to Iehova utuafare o te mau tavini.—Ioa. 10:16; Isa. 64:8; Mat. 6:9; Apo. 20:5.
Eaha ta outou e pahono?
• Eaha te pûpûraa ia ˈna i te Atua?
• Eaha te maitai ia pûpû ia tatou i te Atua?
• No te aha te mau Kerisetiano e pûpû ai ia ratou ia Iehova?
[Uiraa haapiiraa]
[Hohoˈa i te api 12]
E oaoa tatou i te oraraa ia au i ta tatou pûpûraa e a muri noa ˈtu