He Koʼē ʼe Tonu Ke Tou Foaki Totatou Maʼuli Kiā Sehova?
He Koʼē ʼe Tonu Ke Tou Foaki Totatou Maʼuli Kiā Sehova?
“ ʼI te pōʼuli neʼe tuʼu ovi mai ʼi ʼoku tafa ia te ʼāselo ʼa te ʼAtua ʼaē ʼe au pipiki ki ai.”—GĀUE 27:23.
1. Ko te ʼu faʼahi fea neʼe kua fai e nātou ʼaē ʼe natou teuteu papitema, pea ko te ʼu fehuʼi fea ʼaē ʼe malaga ai?
“ ʼAKI te sākilifisio ʼa Sesu Kilisito, kua kotou fakahemala koa ki takotou ʼu agahala pea mo kotou foaki tokotou maʼuli kiā Sehova ʼo fai ia tona finegalo?” ʼE ko te fehuʼi ʼaia ʼi te u fehuʼi e lua ʼaē ʼe tali kiai ia nātou ʼaē ʼe papitema, ʼi te fakaʼosi ʼo te akonaki ʼo te papitema. He koʼē koa ʼe ʼaoga ke foaki e te kau Kilisitiano ia tonatou maʼuli kiā Sehova? ʼE fua lelei feafeaʼi kiā tātou te foaki o kita ki te ʼAtua? He koʼē e mole feala ke tali e te ʼAtua ia te tauhi ʼa he tahi mo kapau ʼe mole ina foaki ia tona maʼuli kiā te ia? Ke tou ʼiloʼi ia tona ʼu tali kiai, tou vakaʼi age muʼa peʼe koteā te fakaʼuhiga o te foaki ʼo tokita maʼuli.
2. Koteā te fakaʼuhiga ʼo te foaki ʼo kita kiā Sehova?
2 Koteā te fakaʼuhiga ʼo te foaki ʼo kita ki te ʼAtua? Kotou fakatokagaʼi pe koteā ʼaē neʼe ʼui e te ʼapositolo ko Paulo ʼo ʼuhiga mo tana ʼu felōgoi ʼaē mo te ʼAtua. ʼI muʼa ʼo te ʼu tagata tokolahi ʼaē neʼe natou ʼi te vaka neʼe mou, neʼe ina ʼui ko Sehova ʼe ko “te ʼAtua ʼaē ʼe au pipiki ki ai.” (Lau ia Gāue 27:22-24.) Ko te kau Kilisitiano moʼoni fuli ʼe natou fakalogo kiā Sehova. Kae ko te mālamanei kātoa ʼe “takoto ia ʼi te mālohi ʼo te agakovi.” (1 Soa. 5:19) ʼE hoki liliu te kau Kilisitiano ko te hahaʼi ʼa Sehova, ʼi te temi ʼaē ʼe natou foaki ai tonatou maʼuli kiā te ia, i te faikole pea mo ina tali lelei. ʼE ko hanatou fakapapau ʼe natou fai kiā te ia, pea hoa mai leva kiai ia te papitema ʼi te vai.
3. Koteā ʼaē neʼe fakatā e te papitema ʼo Sesu, pea neʼe muliʼi feafeaʼi e tana ʼu tisipulo ia tana faʼifaʼitaki?
3 Neʼe tuku mai e Sesu ia te faʼifaʼitaki ʼi te temi ʼaē neʼe ina filifili ai ke ina fai ia te finegalo ʼo te ʼAtua. Mai tona ʼaluʼaga ʼaē neʼe tupu ake ia ʼi te puleʼaga ʼo Iselaele ʼaē neʼe kua foaki ki te ʼAtua, neʼe kua foaki ia ki te ʼAtua. Kae ʼi tana papitema neʼe ina fai te meʼa ʼe lahi age ʼi te fakatuʼutuʼu ʼa te Lao. ʼE fakahā ʼi te Folafola ʼa te ʼAtua, neʼe ina ʼui fēnei: “Koʼenī ʼe au haʼu . . . moʼo fai tou finegalo, Ê ʼAtua.” (Hep. 10:7; Luka 3:21) Koia ko te papitema ʼo Sesu, neʼe ina fakatā tana momoli ʼo ia ki te ʼAtua moʼo fai ia te finegalo ʼo tana Tamai. Ko tana ʼu tisipulo ʼe natou muliʼi tana faʼifaʼitaki ʼi te temi ʼaē ʼe natou momoli ai ia nātou totonu ʼi te papitema. Kae ʼo ʼuhiga mo tanatou papitema ʼaē ʼi te vai, ʼe ko hanatou fakahā ʼi muʼa ʼo te kaugamālie ia tanatou kua foaki ia tonatou maʼuli ki te ʼAtua, ʼi te faikole.
ʼE Fua Lelei Feafeaʼi Kiā Tātou Te Foaki ʼo Tokita Maʼuli
4. Koteā ʼaē ʼe tou mahino ʼo ʼuhiga mo te fakapapau ʼaki te kaumeʼa ʼa Tavite mo Sonatane?
4 Ko te foaki ʼaē e he Kilisitiano ia tona maʼuli, ʼe ko he fakapapau maʼuhiga. Kae ʼe lava fua lelei feafeaʼi kiā tātou ia tatatou foaki ʼaia ʼo totatou maʼuli? Ke tou mahino ki te faʼahi ʼaia, tou vakaʼi age muʼa ia te ʼu fua lelei ʼaē ʼe maʼu mai te fuakava ʼaē ʼe fai e te tagata. Ohagē lā ko te fakakaumeʼa mo he tahi. Ke kotou fiafia ʼi takotou kaumeʼa lelei mo he tahi, e tonu ke kotou tali ia te ʼu meʼa fuli ʼaē ʼe tonu ke kotou fai ke kotou liliu ai ko hona kaumeʼa. ʼE fakamaʼua kiai ke kotou tokaga lelei ki tokotou kaumeʼa. ʼI te ʼu kaumeʼa lelei ʼaupitō ʼaē ʼe fakamatala ʼi te Tohi-Tapu, ʼe tou maʼu te kaumeʼa ʼa Tavite mo Sonatane. Neʼe nā fai te fuakava ʼo tanā kaumeʼa. (Lau ia 1 Samuele 17:57; 18:1, 3.) Logolā ʼe tahitahiga ia te taʼi fakakaumeʼa ʼaē ʼe fai ai he fakapapau, kae tokolahi te ʼu kaumeʼa ʼe mālohi mokā ʼe natou feʼofaʼaki.—Taag. 17:17; 18:24.
5. Neʼe lava feafeaʼi ki he kaugana hana nofo ʼosi mo hona pule ʼe agalelei?
5 Ko te Lao ʼaē neʼe foaki e te ʼAtua ki Iselaele, ʼe fakahā ai ia te tahi felōgoi neʼe fua lelei ki te hahaʼi ʼi tanatou fai he fuakava. Kapau neʼe fia maʼu e he kaugana te fīmālie ʼo nofo ʼosi mo hona pule ʼe agalelei, pea neʼe feala ke ina fai mo ia he fakamoʼoni ʼo talu ai. Neʼe ʼui fēnei ʼi te Lao: “Kapau ʼe haga ʼui pē e te tagata kaugana: ‘ ʼE au ʼofa ki toku pule, mo toku ʼohoana pea mo toku ʼu foha, ʼe mole au fia ʼāteaina,’ pea ʼe tonu anai ke fakaovi e tona pule ia ia ki te ʼAtua moʼoni pea ʼe tonu anai ke ina fakaovi ki te muʼa matapā peʼe ko te ʼu kaumatapā, pea ʼe tonu anai ki tona pule ke ina puhi tona taliga ʼaki he hui, pea ʼe tonu anai ke liliu ko hana kaugana ʼo aʼu ki he ʼu temi ʼe mole ʼiloʼi hona gataʼaga.”—Eke. 21:5, 6.
6, 7. (a) ʼE fua lelei feafeaʼi ki te hahaʼi ia te fakapapau? (b) ʼE fakaʼuhiga feafeaʼi te ʼaluʼaga ʼaia ki tatatou ʼu felōgoi ʼaē mo Sehova?
6 Ko te ʼohoana ʼe ko he fakatahi ʼe fakamaʼua kiai he ʼu fakapapau maʼuhiga. ʼE ko he fakapapau ʼe fai ki he tahi, kae ʼe mole ko he kotala. Ko he toko lua ʼe māʼuʼuli fakatahi kae mole heʼeki nā ʼohoana, ʼe mole feala ke nā māʼuʼuli fīmālie moʼoni, ʼo fēia mo tanā fānau. Kae ko he tama mo he taʼahine ʼe nā ʼohoana, ʼe nā maʼu ai he tafitoʼaga Fakatohi-tapu ke nā fakatokatoka tonā ʼu fihifihia ʼaki te ʼofa.—Mat. 19:5, 6; 1 Ko. 13:7, 8; Hep. 13:4.
7 ʼI te temi muʼa, neʼe ʼaoga ki te hahaʼi ke natou fai he ʼu kotala ʼo ʼuhiga mo te ʼu gāue. (Mat. 20:1, 2, 8) ʼI te temi nei, ʼe kei ʼaoga pē ia te taʼi fai ʼaia. Ohagē lā, ʼe ʼi ai te ʼu fua lelei mokā tou tohi he pepa fakamoʼoni, peʼe ko he kotala, ʼi muʼa ʼo hatatou faʼu he matani gāue peʼe ko hatatou kamata gāue maʼa he foʼi fale gāue. Koia, kapau ko he fakapapau ʼe ina fakamālohiʼi he ʼu felōgoi ohagē ko he ʼu kaumeʼa, ko he ʼohoana pea mo he gāue, pea ʼe feafeaʼi age anai ia te ʼu lelei ʼaē kā kotou maʼu ʼi takotou ʼu felōgoi ʼaē mo Sehova ʼi takotou foaki tokotou maʼuli ʼaē kiā te ia! Tou vakaʼi age muʼa, pe neʼe fua lelei feafeaʼi ki te hahaʼi ʼo te temi muʼa ia tanatou foaki tonatou maʼuli kiā Sehova ʼAtua pea neʼe feafeaʼi tona maʼuhiga age ʼi he fakapapau pē.
Neʼe Fua Lelei Feafeaʼi Ki Te Kau Iselaele Ia Tanatou Foaki ʼAē Ia Tonatou Maʼuli Ki Te ʼAtua?
8. Neʼe fakaʼuhiga feafeaʼi ki te kau Iselaele ia tanatou foaki ʼaē ia tonatou maʼuli ki te ʼAtua?
8 Ko te hahaʼi kātoa ʼo te puleʼaga ʼo Iselaele neʼe foaki tonatou maʼuli kiā Sehova, ʼi te temi ʼaē neʼe natou fai ai ia te fuakava mo te ʼAtua. Neʼe fakatahiʼi nātou e Sehova ʼi te vaʼe Moʼuga ʼo Sinai, pea neʼe ina ʼui fēnei age kiā nātou: “Kapau ʼe kotou fakalogo lelei ki toku leʼo pea mo kotou taupau fakalelei taku fuakava, pea ʼe kotou liliu moʼoni anai ko toku koloa makehe ʼi te lotolotoiga ʼo te ʼu hahaʼi fuli.” Pea neʼe tali fuli fēnei ia te hahaʼi: “Ko meʼa fuli ʼaē kua folafola kiai ia Sehova, ʼe matou lotolelei ke matou fai.” (Eke. 19:4-8) Maʼa Iselaele, ko tanatou foaki ʼaia ki te ʼAtua, neʼe mole ko hanatou fakapapau pē ke natou fai he meʼa. Maʼa nātou, neʼe kua natou liliu ko te hahaʼi ʼa Sehova, pea maʼa Sehova kua natou liliu ko tona “koloa makehe.”
9. Koteā te ʼu fua lelei neʼe maʼu e te kau Iselaele ʼi tanatou foaki tonatou maʼuli ki te ʼAtua?
9 Neʼe fua lelei ki te kau Iselaele ia tanatou liliu ko te hahaʼi ʼa Sehova. Neʼe agatonu ia pea mo tokaga kiā nātou ohagē ko he tamai ʼofa ki hana fānau. Neʼe ʼui fēnei e te ʼAtua ki Iselaele: “ ʼE feala koa ki he fafine ke ina galoʼi hana toe meamea pea ke tupu ʼaki hana mole ʼofa mamahi ki te tama ʼo tona fatu? ʼE feala pē ki te ʼu fafine ke natou galoʼi, kae kiā au ia ʼe mole au galoʼi anai koe.” (Isa. 49:15) Neʼe foaki age e Sehova ia te Lao moʼo takitaki ʼo nātou, mo te fakalotomālohiʼi ʼa te kau polofetā, pea mo te puipui ʼa te kau ʼāselo. Neʼe tohi fēnei e te tagata fai pesalemo: “Neʼe ina fakahā tana folafola kiā Sakopo, tana ʼu fakatuʼutuʼu pea mo tana ʼu tonu faifakamāu kiā Iselaele. Neʼe mole ina fai fēia ki he tahi fenua.” (Pes. 147:19, 20; lau ia Pesalemo 34:7, 19; 48:14.) Ohagē pē ko te tokaga ʼaē ʼa Sehova ʼi te temi muʼa ki te puleʼaga ʼaē ʼa ia, ʼe toe fēia pē anai mo tana tokaga iā ʼaho nei kiā nātou ʼaē ʼe natou foaki tonatou maʼuli kiā te ia.
He Koʼē Koa ʼe Tonu Ke Tou Foaki Totatou Maʼuli Ki Te ʼAtua?
10, 11. Neʼe tou tutupu ake koa ʼi te fāmili ʼo te ʼAtua? Kotou fakamahino.
10 Ko ʼihi ʼi tanatou fakakaukauʼi ʼaē peʼe tonu ke natou foaki ia tonatou maʼuli pea mo natou papitema, ʼe natou feʼekeʼaki fēnei: ‘He koʼē koa ʼi taku tauhi ʼaē ki te ʼAtua ʼe tonu ke au foaki toku maʼuli?’ ʼE tou mahino lelei anai ki tona tupuʼaga, mokā ʼe tou fakatokagaʼi totatou ʼuhiga moʼoni ʼaē ʼi te temi ʼaenī, iā muʼa ʼo te ʼAtua. Kotou manatuʼi, ʼuhi ko te agahala ʼa Atama, neʼe tou tutupu fuli ake ʼi tuʼa ʼo te fāmili ʼo te ʼAtua. (Loma 3:23; 5:12) Ko te foaki ʼo kita ki te ʼAtua ʼe ko he maʼua maʼuhiga ke tali kita ʼi tona fāmili ʼaē ʼi te ʼatulaulau. Tou vakaʼi age muʼa te faʼahi ʼaia.
11 ʼE mole he tahi iā tātou neʼe ina maʼu mai tana tamai ia te maʼuli haohaoa, ohagē ko tona fakatuʼutuʼu ʼaē e te ʼAtua ʼi te kamata. (1 Tim. 6:19) Neʼe mole tou tutupu ake ohagē ko he fānau ʼa te ʼAtua, he neʼe agahala ia te ʼuluaki taumātuʼa, pea ko te mālamanei kātoa kua mamaʼo mai te Tamai ʼofa pea mo Tupuʼaga. (Vakaʼi ia Teutalonome 32:5.) Talu mai te temi ʼaia, kua maʼuli te mālamanei ʼi tuʼa ʼo te fāmili ʼo te ʼatulaulau ʼa Sehova, ʼo mamaʼo mai te ʼAtua.
12. (a) ʼE feafeaʼi ki ni hahaʼi agahala hanatou kau ki te fāmili ʼo te ʼAtua? (b) Ko te ʼu faʼahi fea ʼaē ʼe tonu ke fai ʼi muʼa ʼo totatou papitema?
12 Kae takitokotahi, ʼe tou lava kole ki te ʼAtua ke kita kau ki te fāmili ʼo tana ʼu kaugana ʼaē kua ina tali. * ʼE lava hoko feafeaʼi ia te faʼahi ʼaia ki ni hahaʼi agahala ohagē ko tātou? Neʼe tohi fēnei e te ʼapositolo ko Paulo: “ ʼI te temi ʼaē neʼe tou nonofo ai ko tona ʼu fili, neʼe tou fakatokatoka mo te ʼAtua ʼaki te mate ʼo tona ʼAlo.” (Loma 5:10) ʼI te temi ʼaē ʼe tou papitema ai, ʼe tou kole ki te ʼAtua ke ina foaki mai ia he leʼo ʼo loto ʼe lelei ke feala ai hana tali ia tātou. (1 Pet. 3:21) Kae ʼi muʼa ʼo totatou papitema, ʼe ʼi ai te ʼu faʼahi ʼe tonu ke tou fai. ʼE tonu ke tou ako ke tou ʼiloʼi te ʼAtua pea mo falala kiā te ia, pea ke tou fakahemala, pea mo fetogi totatou maʼuli. (Soa. 17:3; Gāue 3:19; Hep. 11:6) ʼE ʼi ai mo te tahi age meʼa ʼe tonu ke tou fai, ʼi muʼa ʼo te lava tali ʼo tātou ʼi te fāmili ʼo te ʼAtua. Koteā te meʼa ʼaia?
13. He koʼē ʼe ʼaoga ke foaki e he tahi tona maʼuli ki te ʼAtua ke feala ai hana kau ki te fāmili ʼo Tana kau ʼatolasio ʼaē kua ina tali?
13 ʼI muʼa ʼo he kau ʼa he tahi ʼe mamaʼo mai te ʼAtua ki te fāmili ʼo te ʼu kaugana ʼa te ʼAtua, ʼe tonu ke ina fai te fakapapau kiā Sehova. Ke tou mahino ki tona tupuʼaga, tou toʼo he faʼifaʼitaki: ko he tamai e fakaʼapaʼapaʼi pea ʼe tokaga ki he tūpulaga ʼe hala mo tamai pea mo faʼē, pea ʼe loto ke ina vaheʼi te tama ʼaia ke kau ki tona fāmili. ʼE ʼiloa te tamai ko he tagata ʼe agalelei. Kae ʼi muʼa ʼo tana tali te tūpulaga ko hona foha, ʼe loto muʼa ia ke fai e te tama hana fakapapau. Koia ʼe ʼui fēnei age e te tagata: “ ʼI muʼa ʼo haku toʼo koe ko hoku foha, ʼe au fia ʼiloʼi peʼe ke ʼofa anai kiā au pea mo fakaʼapaʼapa kiā au ohagē ko hau tamai.” Kapau ʼe tali e te tama ke ina fai te fakapapau ʼaia, pea hoki feala ai leva ki te tagata ke ina toʼo te tūpulaga ki tona fāmili. ʼE mole ko he fakatuʼutuʼu fakapotopoto koa lā ʼaia? ʼO toe fēia, ʼe hoki tali e Sehova ʼi tona fāmili ia nātou pē ʼaē ʼe natou fakapapau ke natou foaki age ia tonatou maʼuli kiā te ia. ʼE ʼui fēnei ʼi te Tohi-Tapu: “Ke kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi tapu ʼaki tokotou ʼatamai.”—Loma 12:1.
ʼE Tou Fakahā Ai Totatou ʼOfa Pea Mo Tatatou Tui
14. Koteā ʼaē ʼe ʼui ai ko te foaki ʼo totatou maʼuli ki te ʼAtua ʼe ko te fakahā ʼaia ʼo tokita ʼofa?
14 Ko te foaki ʼo kita ki te ʼAtua, ʼe ko he fakahā ʼaia ʼo totatou ʼofa ʼaki he loto kātoa kiā Sehova. ʼE tatau tona tahi ʼu agaaga mo te fakapapau ʼohoana. Ko he Kilisitiano ʼe teuteu ʼohoana ʼe ina fakahā ia tona ʼofa ʼaki tana fakapapau ʼaē ʼe nofo agatonu ki te taʼahine ʼaē kā ʼohoana mo ia, logolā pe koteā he meʼa ʼe feala ke hoko. ʼE ko he fuakava ʼe ina fai mo he tahi, kae mole ko he fakapapau pē ʼe ina fai ki he fakatuʼutuʼu. Ko te Kilisitiano ʼaē ʼe teuteu ʼohoana, ʼe ina ʼiloʼi ʼe mole feala ke maʼuli fakatahi mo te taʼahine, mo kapau ʼe mole heʼeki nā ʼohoana. ʼO toe fēia, ʼe hoki tou maʼu ia te ʼu fua lelei ʼo te kau ki te fāmili ʼo Sehova mokā kua tou foaki totatou maʼuli kiā te ia. Koia logolā totatou ʼuhiga agahala kae ʼe tou foaki totatou maʼuli ki te ʼAtua, heʼe tou fia kau ki tana hahaʼi, pea kua tou fakatotonu ke tou nofo agatonu kiā te ia, logolā ia te ʼu meʼa ʼaē ʼe feala ke hoko.—Mat. 22:37.
15. He koʼē ʼe ko te foaki ʼo kita ʼe ko he fakahā ʼaia ʼo takita tui?
15 ʼI te temi ʼaē ʼe tou foaki ai totatou maʼuli ki te ʼAtua, ʼe tou fakahā ai tatatou tui. He koʼē ʼe tonu ke fēia? ʼAki tatatou tui ʼaē kiā Sehova, ʼe tou falala ko tatatou fakaovi ʼaē ki te ʼAtua ʼe ko he meʼa ʼe lelei kiā tātou. (Pes. 73:28) ʼE tou ʼiloʼi ʼe mole faigafua tuʼumaʼu anai tatatou haʼele ʼaē mo te ʼAtua ʼi tatatou māʼuʼuli ʼi te lotolotoiga ʼo “he taʼiake aga fakalialia pea mo fakapikopiko,” kae ʼe tou falala ki te fakapapau ʼa te ʼAtua ʼaē ke tokoni mai ki tatatou ʼu faiga. (Filp. 2:15; 4:13) ʼE tou ʼiloʼi ʼe tou agahala, kae ʼe tou falala ko Sehova ʼe manavaʼofa anai kiā tātou mokā ʼe tou lakahala. (Lau ia Pesalemo 103:13, 14; Loma 7:21-25.) ʼE tou tui ko Sehova ʼe ina fakapale anai tatatou fakatotonu ʼaē ke tou nonofo agatonu.—Sopo 27:5.
Ko Te Foaki ʼo Kita Ki Te ʼAtua ʼe Tou Maʼu Ai Te Fiafia
16, 17. He koʼē koa ko te foaki ʼo totatou maʼuli kiā Sehova ʼe tou maʼu ai ia te fiafia?
16 Ko te foaki ʼo kita kiā Sehova ʼe tou maʼu ai te fiafia, koteʼuhi ʼe kita foaki kātoa ia totatou maʼuli kiā te ia. Neʼe fakahā e Sesu ia te manatu moʼoni ʼe maʼuhiga, ʼi te temi ʼaē neʼe ina ʼui ai: “ ʼE lahi age te fiafia ʼi takita foaki, ʼi takita tali.” (Gāue 20:35)ʼI te temi ʼaē neʼe ina fakahoko ai tana minisitelio, neʼe ʼiloʼi lelei ai e Sesu te fiafia ʼaē ʼe kita maʼu ʼi tata foaki. ʼI ihi temi neʼe mole mālōlō, neʼe mole kai, pea neʼe mole hona nofoʼaga, he neʼe fia tokoni ia ki te hahaʼi ke natou maʼu ia te ala ʼaē ki te maʼuli. (Soa. 4:34) Neʼe fiafia Sesu ʼi te fakafiafiaʼi ʼo te loto ʼo tana Tamai. Neʼe ʼui fēnei e Sesu: “[ʼE] au fai tuʼumaʼu te ʼu meʼa ʼaē ʼe ina leleiʼia.”—Soa. 8:29; Taag. 27:11.
17 Pea neʼe fakahā e Sesu ki tana ʼu tisipulo ia te faʼahiga maʼuli ʼaē ʼe lelei, ʼi tana ʼui fēnei: “Kapau ʼe fia muli mai he tahi iā te au, ke fakafisi ia kiā ia totonu.” (Mat. 16:24) Ko tatatou fai ia te faʼahi ʼaia, ʼe ina fakaovi lahi age tātou kiā Sehova. ʼE feala koa ke tou foaki totatou maʼuli ki he tahi kehe ʼe feala ke lahi age tana tokaga ʼofa ʼaē kiā tātou?
18. He koʼē koa ko te fakaʼalutahi ʼo totatou maʼuli pea mo tatatou foaki ʼo kita kiā Sehova ʼe lahi age ai anai tatatou fiafia, ʼi hatatou foaki ʼo totatou maʼuli ki he meʼa peʼe ki he tahi kehe?
18 Koia kapau ʼe tou foaki totatou maʼuli kiā Sehova pea mo tou fakaʼalutahi ia totatou maʼuli mo te faʼahi ʼaia, ʼo tou fai tona finegalo, ʼe lahi age anai tatatou fiafia, ʼi hatatou foaki ia totatou maʼuli ki he meʼa peʼe ki he tahi kehe. Ohagē lā, tokolahi te hahaʼi ʼe natou fakaʼaogaʼi kātoa tonatou maʼuli ki te kumi koloa, ʼo mole natou maʼu pē lā te fiafia moʼoni pea mo te fīmālie moʼoni mai te ʼu meʼa ʼaia. Kae ko nātou ʼaē ʼe natou foaki tonatou maʼuli kiā Sehova, ʼe natou maʼu ia te fiafia ʼe tologa age. (Mat. 6:24) Ko te pilivilēsio ʼaē ke natou liliu ko te ʼu “kaugā gāue ʼa te ʼAtua,” ʼe natou maʼu ai te fiafia, kae ko te fakapapau ʼaē neʼe natou fai, neʼe mole natou fai ki he gāue kae ki te ʼAtua ʼaē ʼe loto fakafetaʼi ki tanatou ʼu gāue. (1 Ko. 3:9) ʼE mole he tahi age, gata pē ki te ʼAtua, ʼe feala ke fakafetaʼi ki te sākilifisio ʼaē ʼe natou fai. ʼE ina toe fakaliliu anai tana ʼu kaugana agatonu ke natou toe tūpulaga, ke feala hanatou maʼu ia te ʼu lelei ʼo tana tokaga ʼofa ʼaē kiā nātou.—Sopo 33:25; lau ia Hepeleo 6:10.
19. Koteā te pilivilēsio ʼe maʼu e nātou ʼaē kua foaki tonatou maʼuli kiā Sehova?
19 Ko takotou foaki tokotou maʼuli kiā Sehova ʼe kotou maʼu ai he felōgoi lelei mo ia. ʼE ʼui fēnei ʼi te Tohi-Tapu: “Kotou fakaovi ki te ʼAtua, pea ʼe fakaovi atu anai kiā koutou.” (Sake 4:8; Pes. 25:14) ʼI te ʼalatike kā hoa mai, ʼe tou vakaʼi ai anai pe koʼē ʼe tou lava falala ki te tonu ʼaē neʼe tou fai ke tou liliu ʼo kau ki te hahaʼi ʼa Sehova.
[Nota]
^ E hoki liliu anai ia te “tahi ʼu ovi” ʼa Sesu ko ni ʼu foha ʼa te ʼAtua, ʼi te fakaʼosi ʼo te ʼu taʼu e afe. Kae mai tona ʼaluʼaga ʼaē kua natou foaki tonatou maʼuli ki te ʼAtua, ʼe feala hanatou pāui ki te ʼAtua “Tamai,” pea ʼe feala ke natou kau ki te fāmili ʼo te kau ʼatolasio ʼa Sehova.—Soa. 10:16; Isa. 64:8; Mat. 6:9; Fakh. 20:5.
ʼE Kotou Tali Feafeaʼi Anai?
• Koteā te fakaʼuhiga ʼo te foaki ʼo kita ki te ʼAtua?
• ʼE fua lelei feafeaʼi kiā tātou te foaki o kita ki te ʼAtua?
• He koʼē koa ʼe ʼaoga ke foaki e te kau Kilisitiano ia tonatou maʼuli kiā Sehova?
[ʼU fehuʼi ʼo te ako]
[Paki ʼo te pasina 12]
Ko te fakaʼalutahi ʼo totatou maʼuli pea mo tatatou fakapapau ʼe tou maʼu ai ia te fiafia e tologa age