¿Baʼaxten unaj u kʼubik u kuxtal máak tiʼ Jéeoba?
¿Baʼaxten unaj u kʼubik u kuxtal máak tiʼ Jéeoba?
«Oʼneakeʼ waʼalaj tin wiknal juntúul u ángel Dios, le Dios tiʼ máax in kʼubminba yéetel kin meyajtikoʼ» (HECH. 27:23).
1. 1) ¿Baʼax unaj u beetik máak utiaʼal ka páajchajak u yokjaʼ? 2) ¿Baʼax kʼáatchiʼiloʼob ken k-il u núukil teʼ xookaʼ?
LE YÁAX kʼáatchiʼ ku beetaʼal tiʼ le máaxoʼob kun okjaʼob le ken tsʼoʼokok u máansaʼal le tsoltʼaanoʼ, ku yaʼalik: «Tu yoʼolal u kʼiʼikʼel Cristo tu wekajoʼ, ¿tsʼoʼok wa a pʼatik le baʼaloʼob maʼ maʼalobtak ka beetik kaʼachoʼ yéetel tsʼoʼok wa a kʼubik a kuxtal tiʼ Jéeoba utiaʼal a beetik baʼax u kʼáat?». Baʼaleʼ ¿baʼaxten kʼaʼabéet u kʼubik u kuxtal máak tiʼ Jéeoba? ¿Baʼax utsiloʼob ku kʼamik le máaxoʼob beetkoʼ? ¿Baʼaxten unaj u kʼubik u kuxtal máak tiʼ Dios utiaʼal ka kʼaʼamak le meyaj ku beetkoʼ? Utiaʼal k-ilik u núukil le kʼáatchiʼobaʼ táanileʼ koʼoneʼex ilik baʼax u kʼáat u yaʼal u kʼubik u kuxtal máak tiʼ Dios.
2. ¿Baʼax u kʼáat u yaʼal u kʼubik u kuxtal máak tiʼ Dios?
2 ¿Baʼax u kʼáat u yaʼal u kʼubik u kuxtal máak tiʼ Dios? Le baʼax tu yaʼalaj apóstol Pablo le tiaʼan ichil upʼéel barco taʼaytak u búululoʼ jeʼel u yáantkoʼon k-naʼateʼ. Letiʼeʼ tu yaʼalaj yoʼolal Jéeoba: «Le Dios tiʼ máax in kʼubminbaoʼ». Lelaʼ ku yeʼeskeʼ letiʼeʼ ku yuʼubik tiaʼalintaʼan tumen Jéeoba (xokaʼak Hechos 27:22-24). Kex le yóokʼol kaab tiaʼan yáanal «u páajtalil le Kʼaasil baʼaloʼ», toʼoneʼ u tiaʼaloʼon Jéeoba (1 Juan 5:19). ¿Bix úuchik u tiaʼalintkoʼon? Letiʼe ka t-aʼalaj ich payalchiʼ táan k-kʼubik k-kuxtal tiʼ utiaʼal k-meyajtik yéetel le ka okjaʼanajoʼonoʼ.
3. ¿Baʼax u kʼáat u yaʼal le úuchik u yokjaʼ Jesusoʼ, yéetel bix u beetaʼal tumen le máaxoʼob meyajtik Dios bejlaʼaʼ?
3 Le ka okjaʼanaj Jesuseʼ tu yeʼesaj tu táan yaʼabach máakoʼob u kʼáat u beet baʼax ku yaʼalik u Taata, yéetel tu yeʼesaj baʼax unaj u beetik xan u disipuloʼob. Letiʼeʼ síij tu kaajil Israel, upʼéel kaaj u kʼubmuba tiʼ Jéeoba, le oʼolal Jesuseʼ maʼ kʼaʼabéetchaj u kaʼa kʼubik u kuxtaliʼ. Baʼaleʼ maʼ okjaʼanaj chéen utiaʼal u tsʼoʼokbesik baʼax ku yaʼalik le Leyoʼ. Baʼaxeʼ yaan uláakʼ baʼax oʼolal tu beetaj. Letiʼeʼ tu yaʼalaj tiʼ Jéeoba: «¡Ilawile! Teneʼ tsʼoʼok in taal, tsʼoʼok in taal utiaʼal ka in beet baʼax a kʼáat, in Dios» (Heb. 10:7; Luc. 3:21). Bey túunoʼ, le úuchik u yokjaʼoʼ tu yeʼesaj nukaʼaj u beet baʼax ku yaʼalik u Taata. Bejlaʼeʼ le máaxoʼob meyajtik Diosoʼ ku yokjaʼob xan utiaʼal u yeʼeskoʼob tiʼ u maasil tsʼoʼok u kʼubik u kuxtaloʼob tiʼ Jéeoba ich payalchiʼ.
U yutsiloʼob u kʼubik u kuxtal máak tiʼ Dios
4. ¿Baʼax k-kanik tiʼ le bix úuchik u biskuba David yéetel Jonatanoʼ?
4 U kʼubik u kuxtal máak tiʼ Dioseʼ maʼ chéen báaxliʼ. Maʼ chéen jeʼex k-aʼalik tiʼ wa máax jeʼel k-beetik baʼax ku yaʼalikeʼ. Baʼaleʼ ¿baʼax utsiloʼob ku taasik? Upʼéel baʼax jeʼel u yáantkoʼon k-naʼat baʼax utsiloʼob ku taasikeʼ, letiʼe utsiloʼob ku yilaʼal ken beetaʼak upʼéel compromiso tumen kaʼatúul máakoʼ. Yáaxeʼ tuukulnakoʼon tiʼ bix u biskuba le amigotsiloʼoboʼ. Utiaʼal u yantal u amigoʼob máakeʼ, táanileʼ kʼaʼabéet u beetkuba amigoi. Tsʼoʼoleʼ unaj u yantal upʼéel compromiso ichiloʼob. Le Bibliaoʼ ku yaʼalikeʼ David yéetel Jonataneʼ jach jatsʼuts bix úuchik u biskubaʼob, letiʼobeʼ tu yaʼaloʼob maʼ kun xuʼulul u biskubaʼob (xokaʼak 1 Samuel 17:57 yéetel 18:1, 3). Bejlaʼeʼ óoliʼ mix máak ku biskuba jeʼex úuchik u biskubaʼoboʼ. Baʼaleʼ jeʼex úuchjeakileʼ, le máaxoʼob ku biskubaʼob tu beeloʼ láayliʼ ku yilik u paklan áantkubaʼobeʼ (Pro. 17:17; 18:24).
5. ¿Baʼax jeʼel u páajtal u beetik utúul palitsil utiaʼal maʼ u pʼatik u tsʼuulileʼ?
5 Tu kaajil Israel úuchjeakileʼ le palitsiloʼ ku páajtal u beetik upʼéel compromiso utiaʼal u pʼáatal yiknal u tsʼuulil. U Ley Dioseʼ ku yaʼalik: «Wa le esclavo ku sen aʼalik: ‹In tsʼuul, teneʼ in yaabiltmech, in yaabiltmaj in watan bey xan in paalal. Maʼ in kʼáat pʼáatal libreiliʼ›. Le tsʼuul túunoʼ yaan u nakkúuntik le esclavo teʼ joonaj wa tu marcoil le joonajoʼ yéetel yaan u póotlomtik u xikin yéetel junpʼéel punzón. Dioseʼ yaan u beetik u testigoil tiʼ le baʼax kun úuchloʼ. Le esclavo túunoʼ yaan u meyajtik u tsʼuulil tuláakal u kʼiiniloʼob u kuxtal» (Éxo. 21:5, 6). Jeʼex túun k-ilkoʼ wa utúul palitsil u kʼáat pʼáatal mantatsʼ yiknal u tsʼuulileʼ unaj u beetik upʼéel núuptʼaan tu yéetel.
6, 7. 1) ¿Baʼax utsiloʼob ku taasik u beetik máak upʼéel compromiso? 2) ¿Baʼaxten u biskuba máak yéetel Jéeobaeʼ maas nojoch tiʼ u beetaʼal upʼéel compromiso?
6 Le máaxoʼob ku tsʼoʼokol u beeloʼoboʼ ku beetkoʼob xan upʼéel compromiso. Le compromisoaʼ ku beetaʼal yéetel utúul máak, maʼ chéen yéetel le juʼun ku firmartaʼaloʼ. Le máaxoʼob chéen múul kajakbaloʼoboʼ maʼatech u yilkoʼob bey upʼéel compromiso u yáantik u núup mix u paalal, jeʼex u yilik le máaxoʼob tsʼokaʼan u beeloʼoboʼ. Tsʼoʼoleʼ maʼatech u yilkoʼob u kʼaʼabéetil u beetkoʼob le baʼaxoʼob ku kʼáataʼal tiʼ le máaxoʼob tsʼokaʼan u beeloʼoboʼ mix tech u yilik u yutskíintkoʼob le talmil ku yantaltiʼoboʼ (Mat. 19:5, 6; 1 Cor. 13:7, 8; Heb. 13:4).
7 Beoraaʼ koʼoneʼex tuukul tiʼ le compromiso ku yantal tiʼ le máaxoʼob ku meyajoʼob tiʼ utúul patronoʼ. Tak úuchjeakileʼ suuk u beetaʼal upʼéel contrato yéetel máax kun beetik upʼéel meyaj (Mat. 20:1, 2, 8). Ken káajsaʼak upʼéel negocio wa ken káajak u meyaj máak yéetel wa máaxeʼ unaj u firmartkoʼob upʼéel contrato utiaʼal maʼ u yantal talmiltiʼob. Jeʼex tsʼoʼok k-ilkoʼ, le amigotsiloʼoboʼ, le máaxoʼob tsʼokaʼan u beeloʼob yéetel le máaxoʼob ku múul meyajoʼoboʼ ku yantaltiʼob upʼéel compromiso utiaʼal u paklan áantkubaʼob. Baʼaleʼ le bix k-bisikba yéetel Jéeobaoʼ maas jatsʼuts, tumen k-kʼubik k-kuxtal tiʼ utiaʼal k-beetik baʼax utstutʼaan. Beoraaʼ yaan k-tʼaan tiʼ le utsiloʼob tu kʼamaj u kaajil Israel úuchik u kʼubikuba u meyajt Jéeobaoʼ, lelaʼ yaan u yáantkoʼon k-ileʼ le baʼax tu beetoʼoboʼ maas nojoch tiʼ upʼéel compromiso.
Le utsiloʼob tu kʼamaj u kaajil Israel úuchik u kʼubikuba tiʼ Jéeobaoʼ
8. ¿Baʼax u kʼáat u yaʼal le úuchik u kʼubikuba u kaajil Israel tiʼ Jéeobaoʼ?
8 Le israelitaʼob úuchjeakiloʼ tu kʼububaʼob u meyajtoʼob Jéeoba le ka tu beetoʼob upʼéel núuptʼaan tu yéeteloʼ. Jéeobaeʼ tu yaʼalajtiʼob ka muchʼlakoʼob aktáan tiʼ u witsil Sinaí, ka tu yaʼalajtiʼob: «Teʼexeʼ yaan a kʼuchul a beetabaʼex junpʼéel kaaj especial tin táan. Chéen baʼaleʼ utiaʼal lelaʼ kʼaʼabéet a beetkeʼex tuláakal baʼax kin waʼalikteʼex yéetel a tsʼoʼokbeskeʼex le baʼax ku yaʼalik le pacto kin beetik ta wéeteleʼexaʼ». Letiʼob túuneʼ tu yaʼaloʼob: «Tuláakal le baʼax tsʼoʼok u yaʼalik Jéeobaoʼ yaan k-beetik» (Éxo. 19:4-8). Le baʼax tu beetoʼobaʼ maas nojoch tiʼ upʼéel compromiso. Tumen lelaʼ ku yeʼesik tsʼoʼok u kʼubikubaʼob tiʼ Jéeoba, le oʼolal letiʼeʼ tu yaʼaleʼ yaan u kʼuchul u beetubaʼob u «kaaj especial».
9. ¿Baʼax utsiloʼob tu kʼamaj le israelitaʼob úuchik u kʼubik u kuxtaloʼob tiʼ Diosoʼ?
9 Le úuchik u kʼubikuba le israelitaʼob tiʼ Jéeobaoʼ yaʼab utsil tu taasajtiʼob. Letiʼeʼ jach chúukpaj u yóol u yáantoʼob, jach tu yaabiltoʼob yéetel tu yilaj bey u paalaloʼobeʼ. Letiʼeʼ tu yaʼalaj tiʼ u kaajil Israel: «Juntúul koʼoleleʼ, ¿jeʼel wa u tuʼubsik u chaambaleʼ? ¿Jeʼel wa u pʼáatal maʼ u chʼaʼik óotsilil tiʼ u chan hijo yanchajtiʼoʼ? Kex wa juntúul koʼolel jeʼel u tuʼubsik u chaambaleʼ, teneʼ junpuliʼ maʼ ken in tuʼubsech» (Isa. 49:15). Dioseʼ tu tsʼáaj u Ley utiaʼal u nuʼuktik u kaajal, tu túuxtaj profetaʼob utiaʼal áantkoʼob yéetel tu túuxtaj u angeloʼob utiaʼal kanáantkoʼob. Le salmistaoʼ tu yaʼalaj: «Ku yaʼalik tiʼ Jacob baʼax uts tu tʼaan ka u beete, ku tsʼáaik leyoʼob tiʼ u kaajil Israel, ku yaʼalik baʼax u kʼáat ka u tsʼoʼokbesoʼob. Maʼ u beet bey yéetel uláakʼ kaajoʼoboʼ» (Sal. 147:19, 20; xokaʼak Salmo 34:7, 19 yéetel 48:14). Jeʼex úuchik u kanáantik u kaajil Israel, le u «kaaj especialoʼ», bejlaʼeʼ bey xan u kanáantik tuláakal le máaxoʼob u kʼubmaj u kuxtaloʼob tiʼoʼ.
¿Baʼaxten unaj k-kʼubik k-kuxtal tiʼ Dios?
10, 11. ¿Baʼaxten mix máak ku síijil ichil u familia Jéeoba?
10 Yaan máaxeʼ ku tuklik: «¿Baʼaxten unaj in kʼubik in kuxtal tiʼ Jéeoba yéetel in wokjaʼ utiaʼal in meyajtik?». K-kʼaʼajsik bix yaniloʼon tu táaneʼ jeʼel u yáantkoʼon k-naʼat baʼax oʼolaleʼ. Yoʼolal le kʼeban tu máansajtoʼon Adanoʼ, maʼ tu páajtal k-táakpajal ichil u familia Dios (Rom. 3:23; 5:12). Le oʼolal utiaʼal u kʼamikoʼon ichil u familiaeʼ kʼaʼabéet k-kʼubik k-kuxtal tiʼ. Koʼoneʼex ilik baʼaxten.
11 Mix utúul taatatsil páajchajak u yantal u paalal minaʼan u kʼeeban (1 Tim. 6:19). Tumen kʼebanchaj Adán yéetel Evaeʼ mix utúul tiʼ u paalaloʼob ku síijil ichil u familia Dios (ket yéetel Deuteronomio 32:5). Desde teʼ kʼiinoʼob jeʼeloʼ tuláakal máak ku síijleʼ náach yanil tiʼ Jéeoba.
12. 1) ¿Baʼax unaj u beetik máak utiaʼal u yokol ichil u familia Dios? 2) ¿Baʼaxoʼob unaj u beetik máak táanil tiʼ u yokjaʼ?
12 Kex beyoʼ, cada utúul tiʼ toʼoneʼ jeʼel u páajtal k-kʼáatik tiʼ Jéeoba ka u chaʼa k-okol ichil u familiaeʼ. * Baʼaleʼ ¿bix jeʼel u kʼamikoʼon Jéeoba wa láayliʼ kʼebanoʼoneʼ? Pabloeʼ ku yaʼalik: «U enemigoʼon Dios kaʼach, pero béeychaj k-kaʼa bisikba tu yéetel úuchik u kíimil u Paaloʼ› (Rom. 5:10). Le oʼolal utiaʼal u kʼamkoʼoneʼ unaj k-kʼáatiktiʼ «junpʼéel maʼalob conciencia», lelaʼ ku yantaltoʼon ken okjaʼanakoʼon (1 Ped. 3:21). Baʼaleʼ yaan baʼaxoʼob unaj k-beetik táanil. Yáaxeʼ unaj k-kʼaj óoltik Jéeoba tubeel yéetel k-kʼubik k-óol tiʼ mantatsʼ; tsʼoʼoleʼ kʼaʼabéet k-arrepentir yéetel k-xulik beetik baʼax maʼ maʼalobiʼ (Juan 17:3; Hech. 3:19; Heb. 11:6). ¿Baʼax uláakʼ unaj k-beetik ken tsʼoʼokok?
13. ¿Baʼax unaj u beetik máak utiaʼal ka kʼaʼamak ichil u familia Dios?
13 Utiaʼal k-okol ichil u familia Dioseʼ unaj k-beetik upʼéel núuptʼaan tu yéetel. ¿Baʼaxten? Koʼoneʼex ketik beyaʼ. Utúul taatatsil jach utseʼ ku kʼaj óoltik utúul xiʼipal kimen u taataʼob, letiʼeʼ ku joʼopʼol u biskuba tu yéetel, le oʼolaleʼ ku chʼaʼatuklik u máatik. Baʼaleʼ ku yaʼaliktiʼ: «In kʼáat ka wilen bey a taataeʼ, ka yaabilten yéetel ka weʼesten tsiikil mantatsʼ». Wa le xiʼipal maʼ tu yóotik u beet le baʼax ku yaʼalik le taatatsilaʼ, maʼ kun máatbil. ¿Máasaʼ maʼ talam le baʼax ku kʼáatik tiʼoʼ? Jéeoba xaneʼ chéen ku kʼamik ichil u familia le máaxoʼob ku yaʼalik u beetkoʼob baʼax utstutʼaan yéetel ku yóotik u kʼub u kuxtaloʼob tiʼoʼ. Le Bibliaoʼ ku yaʼalik: «Kʼub a wíinklileʼex yéetel a kuxtaleʼex tiʼ Dios, kʼubeʼex bey junpʼéel sacrificio santo yéetel kʼambeʼen tu táaneʼ» (Rom. 12:1).
Ku yeʼesik u yaabilaj máak yéetel u fe
14. ¿Baʼaxten u kʼubik u kuxtal máak tiʼ Dioseʼ upʼéel bix u yeʼesik u yaabilaj tiʼ?
14 Ken k-kʼub k-kuxtal tiʼ Dioseʼ k-eʼesik jach k-yaabiltmaj. Lelaʼ óoliʼ bey jeʼex ken tsʼoʼokok u beel máakeʼ. Tu kʼiinil le tsʼoʼokol beeloʼ, le noviotsiloʼ ku yeʼesik u yaabiltmaj u novia ken u yaʼaltiʼ yaan u máansik u kuxtal tu yéetel kex jeʼel baʼaxak ka úuchkeʼ. Maʼ chéen táan u yaʼalik u tsʼoʼokol u beel tu yéeteliʼ, baʼaxeʼ táan u yaʼalik u yaabiltik chéen letiʼ. Tsʼoʼoleʼ u yojleʼ utiaʼal ka páajchajak u tsʼoʼokol u beel tu yéeteleʼ unaj u yaʼaliktiʼ yaan u múul máansik u kuxtal tu yéetel. Utiaʼal xan u béeytal u yokol máak ichil u familia Jéeobaeʼ unaj u kʼubik u kuxtal tiʼ. Jeʼex túun k-ilkoʼ, toʼoneʼ k-kʼubik k-kuxtal tiʼ Dios tumen k-kʼáat ka u tiaʼalintoʼon, yéetel tumen kex kʼebanoʼoneʼ, k-kʼáat tsʼoʼokbes tuláakal baʼax ku yaʼalik kex jeʼel baʼaxak ka úuchkeʼ (Mat. 22:37).
15. ¿Baʼaxten u kʼubik u kuxtal máak tiʼ Dioseʼ upʼéel bix u yeʼesik u fe tiʼ?
15 Ken k-kʼub k-kuxtal tiʼ Dioseʼ k-eʼesik yaan k-fe tiʼ letiʼ. Tsʼoʼoleʼ k-eʼesik k-creertik baʼax ku yaʼalik yéetel k-bisikba tu yéeteleʼ k-ojel letiʼe baʼax maas jeʼel u taasiktoʼon utsiloʼ (Sal. 73:28). K-ojel yaan kʼiineʼ maʼ chéen chʼaʼabil ken k-beet baʼax ku yaʼalikiʼ, tumen kuxaʼanoʼon «ichil junpʼéel kʼasaʼan generación maʼatech u beetik baʼax toj». Baʼaleʼ k-ojel Dioseʼ yaan u yáantkoʼon utiaʼal ka xiʼiktoʼon utsil (Fili. 2:15; 4:13). Toʼoneʼ k-ojel letiʼeʼ yaan u chʼaʼiktoʼon óotsilil ken k-beet baʼax maʼ maʼalob yoʼolal le kʼebanoʼ (xokaʼak Salmo 103:13, 14 yéetel Romanos 7:21-25). Tsʼoʼoleʼ k-ojel letiʼeʼ yaan u tsʼáaiktoʼon yaʼab utsiloʼob wa ku chúukpajal k-óol meyajte (Job 27:5).
U kʼubik u kuxtal máak tiʼ Dioseʼ ku taasik kiʼimak óolal
16, 17. ¿Baʼaxten u kʼubik u kuxtal máak tiʼ Dioseʼ ku taasik kiʼimak óolal?
16 U kʼubik u kuxtal máak tiʼ Dioseʼ ku taasik kiʼimak óolal, Jesuseʼ tu yaʼalaj: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hech. 20:35). Ka taal way Luʼumeʼ bey tu beetiloʼ, le oʼolal jach kiʼimakchaj u yóol. Yaan kʼiineʼ kex kaʼanaʼan, kex wiʼij wa kex yaan uláakʼ baʼax kʼaʼabéet u beetkeʼ, ku pʼatik utiaʼal u kaʼansik tiʼ le máakoʼob baʼax unaj u beetkoʼob utiaʼal u kʼamkoʼob le kuxtal minaʼan u xuuloʼ (Juan 4:34). Letiʼeʼ jach kiʼimakchaj u yóol úuchik u beetik baʼax utstutʼaan u Taata. Le oʼolal tu yaʼalaj: «Mantatsʼ kin beetik baʼax uts tu tʼaan» (Juan 8:29; Pro. 27:11).
17 Jesuseʼ tu yaʼalaj tiʼ u disipuloʼob baʼax unaj u beetik máak utiaʼal u yantal kiʼimak óolal tiʼ: «Wa yaan máax u kʼáat taal tin paacheʼ u pʼektuba» (Mat. 16:24). «U pʼektikuba» máakeʼ u kʼáat u yaʼal u xuʼulul u beetik chéen baʼax u kʼáat, le máaxoʼob beetik lelaʼ ku natsʼkubaʼob tiʼ le Dios jach yaan u yaabilajoʼ. ¿Yaan wa uláakʼ máax maas maʼalob jeʼel k-bisikba tu yéeteleʼ?
18. ¿Baʼaxten maas ku taasik kiʼimak óolal u kʼubik u kuxtal máak tiʼ Dios?
18 Le máaxoʼob ku kʼubik u kuxtaloʼob tiʼ Jéeoba yéetel ku beetkoʼob baʼax utstutʼaaneʼ maas kiʼimak u yóoloʼob tiʼ le máaxoʼob meyajtik chéen utúul wíinikoʼ wa tiʼ le máaxoʼob chʼiikloʼob u kaxtoʼob chéen ayikʼaliloʼ. Le máaxoʼob meyajtik Diosoʼ jach kiʼimak u yóoloʼob (Mat. 6:24). Toʼoneʼ jach kiʼimak k-óol tumen «u yéet meyajoʼon Dios», tsʼoʼoleʼ maʼatech u tuʼubultoʼon k-kʼubmaj k-kuxtal tiʼ le Dios jach u yaabiltmoʼonoʼ, maʼ k-kʼubmaj k-kuxtal chéen tiʼ upʼéel meyajiʼ (1 Cor. 3:9). Minaʼan uláakʼ máax ilik jach nojoch le meyaj k-beetik jeʼex u yilik Jéeobaoʼ. Letiʼeʼ yaan u beetik u kaʼa táankelemtal yéetel yaan u kanáantik mantatsʼ le máaxoʼob ku kʼubik u kuxtaloʼob tiʼoʼ (Job 33:25; xokaʼak Hebreos 6:10).
19. ¿Baʼax páajtalil yaan tiʼ le máaxoʼob ku kʼubik u kuxtaloʼob tiʼ Jéeobaoʼ?
19 Le Bibliaoʼ ku yaʼaliktoʼon: «Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex» (Sant. 4:8; Sal. 25:14). Le máaxoʼob ku kʼubik u kuxtaloʼob tiʼ Jéeobaoʼ yaan u béeytal u biskubaʼob tu yéetel. Teʼ tuláakʼ xookoʼ yaan k-ilik baʼaxten maʼ unaj k-sajaktal k-kʼub k-kuxtal tiʼ Jéeoba utiaʼal ka u tiaʼalintoʼoniʼ.
[Tsolajiloʼob]
^ xóot’ol 12 Le «uláakʼ j-tamanoʼob[oʼ]» yaan u yilaʼaloʼob bey u paalaloʼob Dios ken tsʼoʼokok le mil jaʼaboʼob kun reinar Cristooʼ. Baʼaleʼ ken tsʼoʼokok u kʼubik u kuxtaloʼob tiʼ Jéeobaeʼ jeʼel u béeytal u yaʼalikoʼob Taatai tiʼeʼ, tsʼoʼoleʼ ku táakpajloʼob ichil le máaxoʼob meyajtikoʼ, wa ichil u familia (Juan 10:16; Isa. 64:8; Mat. 6:9; Apo. 20:5).
¿Baʼax jeʼel a núukikeʼ?
• ¿Baʼax u kʼáat u yaʼal u kʼubik u kuxtal máak tiʼ Dios?
• ¿Baʼax utsiloʼob ku taasik u kʼubik u kuxtal máak tiʼ Dios?
• ¿Baʼaxten unaj u kʼubik u kuxtal máak tiʼ Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 6]
Le máaxoʼob u kʼubmaj u kuxtaloʼob tiʼ Jéeobaoʼ jach ku kiʼimaktal u yóoloʼob ikil u beetkoʼob baʼax utstutʼaan