Ukuba Aba Kwa Yehova—Lishuko Icine Cine

“Tuli ba kwa Yehova.”—ROM. 14:8.

1, 2. (a) Lishuko nshi twakwata? (b) Mepusho nshi twalatontonkanyapo?

WE SHUKO ubukalamba abena Israele bakwete ilyo Yehova abebele ukuti: “Mukaba nge cipe candi ica mutengo pa bantu na bantu bonse.” (Ukufu. 19:5) Pali lelo ababa mu cilonganino ca Bena Kristu nabo balikwata ishuko lya kuba aba kwa Yehova. (1 Pet. 2:9; Ukus. 7:9, 14, 15) Ukuba aba kwa Yehova lishuko ilyo tukanonkelamo umuyayaya.

² Ukuba aba kwa Yehova lishuko sana, lelo tukabila ukulacita ifyo afwaya pa kuba abantu bakwe. Bamo kuti baipusha abati: ‘Bushe nkalacita fyonse ifyo Yehova afwaya ndecita? Bushe akankaana nga nabembuka? Bushe ukuba uwa kwa Yehova kukalenga nkaleke ukucita ifyo natemwa?’ Cisuma ukutontonkanyapo pali ifi fintu. Lelo kuli icipusho na cimbi ico tufwile ukuipusha: Busuma nshi bwaba mu kuba aba kwa Yehova?

Ukuba Aba kwa Yehova Kulaleta Insansa

3. Busuma nshi Rahabu asangile mu kubombela Yehova?

³ Bushe abantu balamwenamo mu kuba aba kwa Yehova? Tontonkanyeni pali Rahabu, cilende uwaleikala mu Yeriko wa pa kale. Afwile akuliile mu lupwa umo balepepa tulesa wa bufi utwa bena Kanaani. Lelo ilyo aumfwile ifyo Yehova ayafwile abena Israele ukucimfya, alikutulwike ukuti Yehova e Lesa wa cine. E ico aibikile mu kapoosa mweo pa kuti acingilile  abantu ba kwa Lesa abasalwa. Ico acitile ifi ni co alicetekele ukuti na bo bakamupususha ku ntanshi. Baibolo itila: “Bushe te fyo na Rahabu cilende alungamikilwe ku milimo yakwe iisuma, ilyo apokelele inkombe no kushifumisha ku nshila imbi?” (Yako. 2:25) Moneni ifyo apaalilwe ilyo atendeke ukupepa Lesa pamo na bantu bakwe abasanguluka, abasambilishiwe ukutemwa no mulinganya mu Mafunde ya kwa Lesa. Ukuleka imisango yakwe iya kale kufwile kwalimuletele sana insansa! Aupilwe ku mwina Israele no kukwata umwana mwaume, Boasi, uwaishileba umuntu wa kwa Lesa uwakosa mu kupepa.—Yosh. 6:25; Ruti 2:4-12; Mat. 1:5, 6.

4. Busuma nshi Ruti asangile ilyo asalile ukubombela Yehova?

⁴ Ruti umwina Moabu na o asalilepo ukubombela Yehova. Ilyo ali umukashana, napamo alepepa Kemoshe na balesa bambi aba bena Moabu, lelo aishileishiba Lesa wa cine, Yehova no kupwa ku mwina Israele uwaile mu kulebela mu calo aleikalamo. (Belengeni Ruti 1:1-6.) Pa numa ilyo Ruti na cufi munankwe Orpa baimine ukuya ku Betelehemu na nafyalebo Naomi, nafyalebo abebele ukubwelela ku mwabo. Atile tabakayeikala bwino ku Israele. Orpa alibwelele “ku bantu bakwe na kuli tulesa twakwe,” lelo Ruti alikeene ukubwelelamo. Icitetekelo cakwe calengele afwaye ukuba uwa kwa Yehova. Aebele Naomi ati: “Mwimpatikisha ukumusha, no kubwelelamo ukuti ndeke ukumukonka; pantu uko mwakulaya e ko nakulaya, no ko mwakulasendama e ko nakulasendama. Abantu benu bakaba e bantu bandi, na Lesa wenu e Lesa wandi.” (Ruti 1:15, 16) Ilyo Ruti asalile ukubombela Yehova, alinonkelemo mu Mafunde ya kwa Lesa ayatile abantu balingile ukusakamana bamukamfwilwa na bapiina na bashakwete impanga. Ukuuba muli Yehova kwalengele aba ne nsansa, acingililwa, no kwikala mu mutelelwe.

5. Ukulingana ne fyo mwamona, bushe abantu ababombela Yehova mu busumino baba shani?

⁵ Nalimo mwalishibako abantu bamo ababombela Yehova pa myaka iingi mu cishinka pa numa ya kuipeela kuli ena. Bepusheni ifisuma ifyo basanga mu kubombela Lesa. Nangu ca kutila bonse balakwata amafya, ifingi ifyacitika kuli bena filalanga bwino bwino ukuti ya cine amashiwi ya kwa kemba wa malumbo ayatila: “Abapaalwa bantu abo Yehova e Lesa wabo!”—Amalu 144:15.

Ifyo Yehova Afwaya Tulecita Tafyacilamo

6. Mulandu nshi tushifwile ukutiinina ukuti tukafilwa ukucite ifyo Yehova afwaya tulecita?

⁶ Napamo mumona kwati nalimo kuti mwafilwa ukulacita ifyo Yehova afwaya. Ilingi line abantu balomfwa umwenso nga batontonkanya pa kuba ababomfi wa kwa Lesa, no kulakonka amafunde yakwe e lyo no kulalandila mwi shina lyakwe. Ku ca kumwenako, ilyo Lesa atumine Mose ukuyalanda na bena Israele e lyo ne mfumu ya ku Egupti, Mose atile camukulila. Lelo Lesa tale-eba Mose ukucita ifyo  ashingakumanisha. Yehova ‘alimusambilishe ifya kucita.’ (Belengeni Ukufuma 3:11; 4:1, 10, 13-15.) Apo Mose alisumine ukwafwiwa, alicitile ico Lesa alefwaya kabili ici calimuletele insansa. Ifyo Yehova atweba ukucita na pali lelo fintu twingacita. Alishiba ukuti tatwapwililika, kabili alafwaya ukutwafwa. (Amalu. 103:14) Ukubombela Yehova ngo musambi wa kwa Yesu kulaleta insansa, takutiinya pantu ukucite fyo kulaafwa abantu bambi kabili kulalenga umutima wa kwa Yehova ukusekelela. Yesu atile: “Iseni kuli ine, . . . na ine nalamusansamusha. Sendeni ikoli lyandi no kusambilila kuli ine, pantu nalifuuka kabili nali-icefya.”—Mat. 11:28, 29.

7. Cinshi cingalenga mwacetekela ukuti Yehova akamwafwa ukucita ifyo afwaya mulecita?

⁷ Yehova akulatukosha lyonse kulila fye twashintilila pali ena. Ku ca kumwenako, mu cifyalilwa fye Yeremia tali uwashipa mu kulanda. E ico ilyo Yehova amusontele ukuba kasesema, Yeremia atile: “Iye, mwe Shikulu Mulopwe Yehova! Moneni ine nshaishiba ukulanda, pantu ndi mwaice.” Pa numa asosele no kuti: “Nshakasosele na kabili mwi shina lyakwe.” (Yer. 1:6; 20:9) Lelo ilyo Yehova amukoseleshe, Yeremia alishimikile ubukombe pa myaka 40 nangu line abantu tababutemenwe. Yehova abikilepo fye ukumukoselesha ati: “Ndi na iwe, pa kuti nkupusushe kabili pa kuti nkupokolole.”—Yer. 1:8, 19; 15:20.

8. Tulanga shani ukuti twalicetekela Yehova?

⁸ Nga filya fine Yehova akoseshe Mose na Yeremia, na ifwe kuti atwafwa ukulacita ifyo afwaya Abena Kristu balecita. Icifwaikwa fye kushintilila pali Lesa. Baibolo itila: “Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.” (Amapi. 3:5, 6) Tulalanga ukuti twalicetekela Yehova nga tulepokelela ukwafwa atupeela ukupitila mu Cebo cakwe na mu cilonganino. Nga twaleka Yehova ukulatutungulula mu fyo tucita, tapali icikatulesha ukuba aba cishinka kuli ena.

Yehova Alasakamana Abantu Bakwe ngo Muntu Umo Umo

9, 10. Bushe mu Amalumbo 91 Lesa alaya ukucingilila abantu bakwe kuli finshi?

⁹ Bamo ilyo baletontonkanya pa kuipeela kuli Yehova, balasakamikwa ukuti napamo kuti babembuka na Yehova abasuula no kubakaana abakaana. Ubusuma bwa kutila, Yehova alatupeela fyonse ififwaikwa pa kuti tucingilile bucibusa bwesu na ena. Natumone ifyo ici calondololwa mu Amalumbo 91.

¹⁰Amalumbo 91 yatendeka ati: “Onse uwikala umwa kufisama umwa Wapulamo ninshi asanga umwa kutubilisha mu cintelelwe ca Wa Maka Yonse. Nkasosa kuli Yehova nati: ‘Ni mwe cubo candi kabili uwa kuncingilila, Ni mwe Lesa wandi, uo natetekela.’ Pantu akakupokolola mu lukose lwa wikata ifyuni.” (Amalu. 91:1-3) Moneni ukuti Lesa alaya ukucingilila bonse abamutemwa no kumucetekela. (Belengeni Amalumbo 91:9, 14.) Kucingilila nshi alelandapo? Yehova alicingilile ababomfi bakwe bamo aba ku kale pa kuti beipaiwa. Limo alebacingilila pa kuti asungilile ulupwa umo Mesia ali no kwisafyalilwa. Lelo abantu bambi aba busumino balibakakile, no kubacusha, kabili bamo balebepaya ku bantu ba kwa Satana abankalwe abalefwaya ukubafumya kuli Lesa. (Heb. 11:34-39) Balikwete amaka ya kushipikisha pantu Yehova alibacingilile ku fingalenga baleka ukuba aba cishinka kuli ena. Kanshi Amalumbo 91 yalanda pa fyo Yehova acingilila abantu ku fingonaula bucibusa bwabo na ena.

11. Bushe “umwa kufisama umwa Wapulamo” ni mwi, kabili ni bani Lesa acingilila muli ici cifulo?

¹¹ Kanshi “umwa kufisama umwa Wapulamo,” umo uyu kemba wa malumbo alelandapo, cifulo ca mampalanya umo abantu ba kwa Lesa bacingililwa ku fingonaula bucibusa bwabo na ena. Umu e mo abooba muli Lesa bacingililwa ku cili conse na ku muntu uuli  onse uwingafwaya ukupwisha icitetekelo cabo no kutemwa batemwa Lesa. (Amalu. 15:1, 2; 121:5) Ici, cifulo cafisama pantu abashatetekela tabacishiba. Muli ici cifulo emo Yehova acingilila abantu bakwe abalanda amashiwi yapala aya kuti: ‘Ni mwe Lesa wandi, uo natetekela.’ Nga twatwalilila ukuuba muli ici cifulo, tatufwile ukusakamikwa ukuti tukekatwa mu fiteyo fya kwa Satana “uwikata ifyuni,” na Lesa akatukaane.

12. Finshi fingonaula bucibusa bwesu na Lesa?

¹² Finshi fingonaula bucibusa bwesu na Lesa ubwawamisha? Kemba wa malumbo alumbula ifintu ifingi, pamo nga “icikuko icisalangana mu mfifi, . . . [ne] cinkunka icipaya mu nshita ya kasuba.” (Amalu. 91:5, 6) “Uwikata ifyuni” aliikata abengi mu citeyo ca kukanafwaya ukutungululwa. (2 Kor. 11:3) Bamo abekatila mu fiteyo ifilenga baba abafunushi, aba cilumba, nelyo abatemwa ifyuma. Bambi nabo alabalufya ku mano ya pano calo pamo nga ukutemwisha icalo cabo, ukusumina ukuti ifintu fyasangwike fye, e lyo no kuba mu mipepele ya bufi. (Kol. 2:8) Kabili abengi balikatwa mu citeyo ca bulalelale. Ifinkunka fya musango yu ifyonaula bukapepa bwesu, fyalilenga abengi ukuleka ukutemwa Lesa.—Belengeni Amalumbo 91:7-10; Mat. 24:12.

Cingilileni Ukutemwa Mwatemwa Lesa

13. Bushe Yehova atucingilila shani ku fiteyo ifingonaula bucibusa bwesu na ena?

¹³ Bushe Yehova acingilila shani abantu bakwe ku fingonaula bucibusa bwabo na ena? Amalumbo yatila: “Akakonkomesha bamalaika bakwe ifya kucita pali iwe, ukuti balekucingilila mu nshila shobe shonse.” (Amalu. 91:11) Bamalaika ba mu muulu balatutungulula no kutucingilila pa kuti tuleshimikila imbila nsuma. (Ukus. 14:6) Kabili alabomfya na baeluda abakonka sana ifyo Amalembo yalanda ilyo balesambilisha pa kuti batucingilile ukuti twilufiwa ku milandile ya bucenjeshi iya bantu. Kuti ba-afwa uuli onse uulelwisha sana ukuti aleke imisango yabipa iya muno calo. (Tito1:9; 1 Pet. 5:2) “Umusha wa cishinka kabili uwashilimuka” na o alatupeela ifya kulya fya ku mupashi ifitwafwa ukukanasumina icisambilisho ca kuti ifintu fyasangwike fye, no kutucingilila pa kuti twiwila mu mibele yabipa, kabili twitemwisha ifyuma no busambashi, e lyo na kuli fimbi ifyabipa ifyo imitima yesu ingafwaya. (Mat. 24:45) Cinshi camwafwa ukukaana ifi fiteyo fimo?

14. Finshi tulingile ukulacita pa kuti Lesa aletucingilila?

¹⁴ Cinshi tufwile ukulacita pa kuti tukekalilile “umwa kufisama” umwa kwa Lesa umo tucingililwa? Nga filya fine lyonse tuicingilila ku masanso, ku tupondo, na ku tushiishi tuleta amalwele, e fyo tufwile ukutwalilila ukuicingilila ku fingonaula bucibusa bwesu na Lesa. Kanshi tulingile ukulakonka ubutungulushi bwa kwa Yehova lyonse ubo atupeela ukupitila mu mpapulo na pa kulongana kwa cilonganino no kulongana kukalamba. Tulingile no kulomba baeluda ukulatupandako amano. Bushe  tatumwenamo mu mibele isuma iyalekanalekana iyo bamunyinefwe na bankashi Abena Kristu bakwata? Cine cine ukulongana kulatwafwa ukukwata amano.—Amapi. 13:20; belengeni 1 Petro 4:10.

15. Mulandu nshi mushingatwishikila ukuti Yehova kuti amucingilila kuli conse icingamufumya kuli ena?

¹⁵ Tatufwile no kutwishika ukuti Yehova kuti atucingilila kuli conse icingatufumya kuli ena. (Rom. 8:38, 39) Alicingilila icilonganino ku mipepele ya maka na kuli bakateka abapata abantu bakwe kabili abaiminina pa kutufumya kuli Lesa wesu uwa mushilo, te kutwipaya iyo. Ubulayo bwa kwa Yehova bwa cine ubutila: “Icanso conse ico bakupangila tacakabombe.”—Esa. 54:17.

Nani Atupeela Ubuntungwa?

16. Mulandu nshi icalo cishingatupeelela ubuntungwa?

¹⁶ Bushe ukuba aba kwa Yehova kulatupoka ubuntungwa? Awe. Ukuba uwa mu calo e kutupoka ubuntungwa. Yehova te utungulula cino calo, lelo citekwa na lesa umunkalwe uwateka abantu ubusha. (Yoh. 14:30) Ku ca kumwenako, ici calo ca kwa Satana cilapoka abantu ubuntungwa pa mulandu wa kubatitikisha mu fya bunonshi bwa calo. (Linganyeniko Ukusokolola 13:16, 17.) Ulubembu lwalikwata amaka ya kuteka abantu ubusha. (Yoh. 8:34; Heb. 3:13) E ico nangu ca kuti abashipepa kuti balaya ukupeela abantu ubuntungwa nga balecita ifyapusana ne fyo Yehova atusambilisha, bonse abakonkelela ifyo balanda, balaba abasha ba lubembu no kuba ne mibele yabipa mu nshita fye iinono.—Rom. 1:24-32.

17. Buntungwa nshi Yehova atulaya?

¹⁷ Lelo Yehova akatulubula kuli fyonse ifingatuletela ubwafya nga ca kutila twaipeela kuli ena. Kuti twaipashanya ku muntu uucetekele dokota uulemulepula ukuti e walalenga abe no bumi pantu e wingapwisha fye ubulwele bwakwe ubwingamwipaya. Na ifwe twalikwata ubulwele ubwingatwipaya, no bu bulwele, lubembu ulo twapyana. Nga ca kutila twaipeela kuli Yehova no kusumina mu cilubula Kristu apeele, e lyo twingalubulwa ku lubembu no kwikala kuli pe na pe. (Yoh. 3:36) Filya fine twingacetekela sana dokota uuletulepula nga ca kutila twalyumfwa ifingi ifyo acita, e fyo twingacetekela sana na Yehova nga twatwalilila ukusambilila pali ena. E ico tulingile ukutwalilila ukusambilila Icebo ca kwa Lesa no kubikako umutima pantu e kukalenga tukamutemwe sana no kuleka ukutiina ukuba abantu bakwe.—1 Yoh. 4:18.

18. Cinshi cikafumamo ku basalapo ukuba aba kwa Yehova?

¹⁸ Yehova alipeela abantu bonse ubuntungwa bwa kuisalila. Icebo cakwe citila: “Saleni umweo pa kuti mube no mweo, imwe na bana benu, pa kulatemwa Yehova Lesa wenu.” (Amala. 30:19, 20) Afwaya twalanga ifyo twamutemwa pa kuisalila fwe bene ukulamubombela. Kanshi ukuba abantu ba kwa Lesa uo twatemwa takutupoka ubuntungwa, lelo e kulenga twaba ne nsansa.

19. Mulandu nshi twingasosela ukuti cikuuku fye ca kwa Yehova icalenga tuleba abantu bakwe?

¹⁹ Nga kukonka fye, fwe babembu tatwalinga no kuba aba kwa Lesa uwapwililika. Cikuuku fye ca kwa Lesa e calenga tuleba abantu bakwe. (2 Tim. 1:9) E ico Paulo alembele ukuti: “Nga tuli no mweo, ni kuli Yehova tubela aba mweo, kabili nga twafwa, ni kuli Yehova tufwila. E ico nga tuli aba mweo kabili nangu nga twafwa, tuli ba kwa Yehova.” (Rom. 14:8) Ukuba aba kwa Yehova cintu icisuma ico tukasekelamo nga twacicita.

Kuti Mwayasuka Shani?

• Busuma nshi bwaba mu kuba aba kwa Yehova?

• Mulandu nshi tushingafililwa ukucita ifyo Lesa afwaya tulecita?

• Bushe Yehova acingilila shani ababomfi bakwe?

[Amepusho]

[Ifikope pe bula 8]

Ipusheniko bamo ubusuma basanga mu kuba aba kwa Yehova

[Icikope pe bula 10]

Ni nshila nshi shimo isho Yehova atucingililamo?