Pagkahimong Iya ni Jehova—Usa ka Dili-Takos nga Kalulot

“Kita iya ni Jehova.”—ROMA 14:8.

1, 2. (a) Unsay atong pribilehiyo? (b) Unsang mga pangutana ang hatagan natog pagtagad?

USA gayod ka bililhong pribilehiyo ang gihatag ni Jehova sa nasod sa Israel sa dihang siya miingon kanila: “Kamo tinong mahimong akong linaing katigayonan gikan sa tanang ubang mga katawhan.” (Ex. 19:5) Karong adlawa, ang mga membro sa Kristohanong kongregasyon nakapribilehiyo usab nga mahimong iya ni Jehova. (1 Ped. 2:9; Pin. 7:9, 14, 15) Usa kini ka pribilehiyo nga makahatag kanatog dumalayon nga kaayohan.

² Gawas nga usa ka pribilehiyo ang pagkahimong iya ni Jehova, usa usab kini ka responsibilidad. Tingali ang pipila mangutana: ‘Makahimo kaha ko sa pagbuhat sa gidahom ni Jehova kanako? Kon ako makasala, isalikway ba ko niya? Mawad-an ba kog kagawasan kon ako mahimong iya ni Jehova?’ Ang maong mga pangutana angayng hatagag pagtagad. Apan, adunay laing pangutana nga angay una natong konsiderahon: Unsang mga kaayohan ang mabatonan sa pagkahimong iya ni Jehova?

Ang Pagkahimong Iya ni Jehova Makahatag ug Kalipay

3. Sa unsang paagi ang desisyon ni Rahab nga moalagad kang Jehova nakahatag kaniyag kaayohan?

³ Makabaton bag kaayohan kadtong iya ni Jehova? Tagda pananglitan ang kahimtang ni Rahab, usa ka pampam nga nagpuyo sa karaang Jerico. Sa walay duhaduha siya namatuto sa mahugaw nga pagsimba sa mga diyos sa Canaan. Apan sa dihang siya nakadungog bahin sa mga kadaogan nga gihatag ni Jehova sa Israel, iyang naamgohan nga si  Jehova mao ang matuod nga Diyos. Busa iyang gipameligro ang iyang kinabuhi aron protektahan ang piniling katawhan sa Diyos ug sa ingon nagsalig sa iyang kaugmaon kanila. Ang Bibliya nag-ingon: “Dili ba usab si Rahab nga pampam gipahayag nga matarong pinaagi sa binuhatan, human nga maabiabihon niyang gidawat ang mga mensahero ug gipalakaw sila sa laing agianan?” (Sant. 2:25) Hunahunaa lang ang mga kaayohan nga iyang nabatonan sa dihang nahimo siyang bahin sa hinlong katawhan sa Diyos, usa ka katawhan nga natudloan sa Balaod sa Diyos sa pagpakitag gugma ug hustisya. Seguradong nalipay gayod siya nga gibiyaan niya ang iyang kanhing paagi sa kinabuhi! Siya naminyo sa usa ka Israelinhon ug nagmatuto sa iyang anak, si Boaz, nga mahimong talagsaong tawo sa Diyos.—Jos. 6:25; Ruth 2:4-12; Mat. 1:5, 6.

4. Sa unsang paagi si Ruth nakabatog kaayohan sa iyang desisyon nga moalagad kang Jehova?

⁴ Si Ruth nga Moabihanon midesisyon usab sa pag-alagad kang Jehova. Samtang bata pa, lagmit nagsimba siya kang Kemos ug sa ubang mga diyos sa Moab. Apan, iyang nailhan ang matuod nga Diyos, si Jehova, ug siya naminyo sa usa ka Israelinhon nga midangop sa ilang dapit. (Basaha ang Ruth 1:1-6.) Sa ulahi, sa dihang si Ruth ug ang iyang bilas nga si Orpa miuban sa ilang ugangan nga si Noemi paingon sa Betlehem, giawhag sila ni Noemi sa pagpauli kay dili sayon nga magpuyo sila sa Israel. Tuod man si Orpa ‘mipauli sa iyang katawhan ug sa iyang mga diyos,’ apan si Ruth wala mopauli. Siya milihok sumala sa iyang pagtuo ug nahibalo kon kinsay angay niyang simbahon. Siya miingon kang Noemi: “Ayaw ako paghangyoa nga motalikod kanimo, nga mobiya sa pag-uban kanimo; kay kon asa ikaw moadto, ako moadto, ug kon asa ikaw magpalabay sa kagabhion ako magpalabay sa kagabhion. Ang imong katawhan mahimong akong katawhan, ug ang imong Diyos akong Diyos.” (Ruth 1:15, 16) Tungod kay gipili ni Ruth nga alagaron si Jehova, siya nakabatog kaayohan ilalom sa Balaod sa Diyos, nga adunay linaing tagana alang sa mga balo, kabos, ug niadtong walay gipanag-iyang yuta. Ubos sa pag-amoma ni Jehova, siya nakabatog kalipay, proteksiyon, ug kasegurohan.

5. Unsay imong namatikdan niadtong matinumanong nag-alagad kang Jehova?

⁵ Tingali may nailhan kang mga igsoon kinsa human sa ilang pagpahinungod kang Jehova nagmatinumanon sa pag-alagad kaniya sulod sa daghang katuigan. Pangutan-a sila kon sa unsang paagi sila nakabatog kaayohan sa pag-alagad kaniya. Bisan tuod ang matag usa may mga problema, adunay daghan kaayong ebidensiya nga tinuod ang giingon sa salmista: “Malipayon ang katawhan kansang Diyos mao si Jehova!”—Sal. 144:15.

Makataronganon ang Gidahom ni Jehova Kanato

6. Nganong dili kita angayng mahadlok nga dili nato mahimo ang gidahom ni Jehova kanato?

⁶ Tingali nagduhaduha ka kon imo bang mahimo ang gidahom ni Jehova kanimo. Dali rang mobati nga lisod tumanon ang obligasyon sa pagkahimong alagad sa Diyos, pagsunod sa iyang balaod, ug pagmantala pinaagi sa iyang ngalan. Pananglitan, si Moises mibati nga siya dili-takos sa dihang gisugo siya sa pagpakigsulti sa mga Israelinhon ug sa hari sa Ehipto. Apan ang Diyos makataronganon  sa iyang gidahom kang Moises. Si Jehova ‘nagtudlo kaniya kon unsay iyang buhaton.’ (Basaha ang Exodo 3:11; 4:1, 10, 13-15.) Tungod kay gidawat ni Moises ang tabang nga gihatag kaniya, iyang nasinati ang kalipay sa pagtuman sa kabubut-on sa Diyos. Sa susama, si Jehova makataronganon usab sa iyang gidahom kanato. Siya nahibalo nga kita dili hingpit, ug siya buot motabang kanato. (Sal. 103:14) Ang pag-alagad sa Diyos ingong sumusunod ni Jesus dili lisod kondili makapahayahay sanglit makahatag kanag kaayohan sa uban ug makapalipay sa kasingkasing ni Jehova. Si Jesus miingon: “Umari kanako, . . . ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing.”—Mat. 11:28, 29.

7. Nganong makasalig ka nga si Jehova motabang kanimo sa pagbuhat sa iyang gidahom kanimo?

⁷ Si Jehova kanunayng magtagana sa pagdasig nga atong gikinahanglan, basta mosalig kita kaniya alang sa kusog. Pananglitan, si Jeremias dayag nga walay kaisog sa pagpanulti. Busa, sa dihang gitudlo siya ni Jehova nga mahimong Iyang manalagna, si Jeremias miingon: “Intawon, Oh Soberanong Ginoong Jehova! Ania, ako gayod dili mahibalo nga mosulti, kay ako usa ka bata lamang.” Sa ulahi, siya miingon: “Dili na ako mosulti diha sa iyang ngalan.” (Jer. 1:6; 20:9) Hinunoa, tungod sa pagdasig ni Jehova, si Jeremias nakahimo sa pagsangyaw sulod sa 40 ka tuig bisan tuod daghan ang wala mamati kaniya. Si Jehova sublisubling nagpasalig kaniya pinaagi niining mga pulonga: ‘Ako magauban kanimo sa pagluwas kanimo.’—Jer. 1:8, 19; 15:20.

8. Sa unsang paagi nato ipakita nga kita nagasalig kang Jehova?

⁸ Maingon nga si Jehova nagpalig-on kang Moises ug Jeremias, siya makatabang usab kanato sa pagbuhat sa iyang gidahom sa mga Kristohanon karon. Ang pangunang gikinahanglan mao ang pagsalig sa Diyos. Ang Bibliya nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Prov. 3:5, 6) Kita nagpakitag pagsalig kang Jehova sa dihang atong pahimuslan ang tabang nga iyang gitagana pinaagi sa iyang Pulong ug sa kongregasyon. Kon atong tugotan si Jehova nga mogiya sa atong kinabuhi, walay makapugong kanato sa pagpabiling matinumanon kaniya.

Si Jehova Nag-amoma sa Matag Usa sa Iyang mga Alagad

9, 10. Unsang matanga sa proteksiyon ang gisaad sa Salmo 91?

⁹ Samtang naghunahuna bahin sa pagpahinungod kang Jehova, ang pipila tingali mabalaka basig sila makasala, mahimong dili takos, ug isalikway ni Jehova. Ikalipay, si Jehova nagtagana kanato sa tanang proteksiyon nga atong gikinahanglan aron mapanalipdan ang atong bililhong relasyon kaniya. Atong tan-awon kon sa unsang paagi kana gipahayag sa Salmo 91.

¹⁰ Nagsugod kana niining mga pulonga: “Si bisan kinsa nga nagapuyo sa natago nga dapit sa Labing Hataas makabaton ug kapahulayan ilalom sa landong sa Usa nga Labing Gamhanan. Magaingon ako kang Jehova: ‘Ikaw mao ang akong dalangpanan ug akong salipdanan, akong Diyos, kang kinsa mosalig ako.’ Kay siya magaluwas kanimo gikan sa bitik sa tiglit-ag ug langgam.” (Sal. 91:1-3) Matikdi nga ang Diyos nagsaad nga iyang protektahan kadtong nahigugma ug nagsalig kaniya. (Basaha ang Salmo 91:9, 14.) Unsang matanga sa proteksiyon ang iyang gipasabot? Tinuod, si Jehova nagtaganag pisikal nga proteksiyon sa pipila niya ka alagad sa karaang panahon—sa pipila ka kahimtang aron mapreserbar ang linya sa kaliwat nga magpatungha sa gisaad nga Mesiyas. Apan, daghan sa matinumanong mga alagad ang gibilanggo, gipaantos, ug gipatay sa paningkamot sa Yawa nga motalikod sila sa Diyos. (Heb. 11:34-39) Ilang nabatonan ang gikinahanglang kaisog sa paglahutay tungod kay giprotektahan sila ni Jehova batok sa kapeligrohan nga magbungkag sa ilang integridad. Busa, ang Salmo 91 mahimong isipon nga usa ka saad sa espirituwal nga proteksiyon.

11. Unsa ang “natago nga dapit sa Labing Hataas,” ug kinsay panalipdan sa Diyos sulod niana?

¹¹ Busa, ang “natago nga dapit sa Labing Hataas” nga gihisgotan sa salmista maoy mahulagwayong dapit sa espirituwal nga proteksiyon. Kadtong nagpuyo diha niana ingong dinapit sa Diyos  luwas sa bisan unsa ug kang bisan kinsa nga magpameligro sa ilang pagtuo ug gugma sa Diyos. (Sal. 15:1, 2; 121:5) Kana maoy natago nga dapit tungod kay ang mga dili-magtutuo wala mahibalo niana. Diha niana, protektahan ni Jehova ang katawhan nga, sa diwa, nag-ingon: ‘Ikaw ang akong Diyos kang kinsa mosalig ako.’ Kon kita magpabilin niana nga dalangpanan, kita dili angayng mabalaka pag-ayo nga basig mawad-an sa pag-uyon sa Diyos kay nabitik ni Satanas, ang “tiglit-ag ug langgam.”

12. Unsang mga butanga ang magpameligro sa atong relasyon sa Diyos?

¹² Unsang mga butanga ang magpameligro sa atong bililhong relasyon sa Diyos? Ang salmista naghisgot ug pipila ka kapeligrohan, nga naglakip “sa kamatay nga nagalakaw sa kangiob, . . . [ug] sa kalaglagan nga nagalaglag panahon sa kaudtohon.” (Sal. 91:5, 6) Daghan ang nabitik sa “tiglit-ag ug langgam” pinaagig hakog nga tinguha nga mahimong independente. (2 Cor. 11:3) Nabitik niya ang uban pinaagi sa paghaylo kanila nga mahimong hakog, garboso, ug materyalistiko. Nalimbongan usab niya ang uban pinaagig mga pilosopiya sama sa patriotismo, ebolusyon, ug bakak nga relihiyon. (Col. 2:8) Ug daghan usab ang nalit-agan pinaagig gidiling seksuwal nga mga relasyon. Tungod sa maong mga lit-ag, minilyon ang nawad-an sa ilang gugma sa Diyos.—Basaha ang Salmo 91:7-10; Mat. 24:12.

Panalipdi ang Imong Gugma sa Diyos

13. Sa unsang paagi si Jehova nanalipod kanato batok sa espirituwal nga mga kapeligrohan?

¹³ Sa unsang paagi si Jehova nanalipod sa iyang katawhan batok niining espirituwal nga mga kapeligrohan? Ang salmo nag-ingon: “Sugoon niya ang iyang mga manulonda maylabot kanimo, sa pagbantay kanimo sa tanan mong mga dalan.” (Sal. 91:11) Ang mga manulonda naggiya ug nanalipod kanato aron kita makasangyaw sa maayong balita. (Pin. 14:6) Gawas pa sa mga manulonda, ang mga ansiyano, pinaagi sa ilang hugot nga pagsunod sa Kasulatan diha sa ilang pagpanudlo, nanalipod kanato aron dili kita malimbongan sa bakak nga pangatarongan. Sila makataganag tabang sa matag indibiduwal nga nakigbisog sa pagbuntog sa kalibotanong mga tinamdan. (Tito 1:9; 1 Ped. 5:2) Dugang pa, “ang matinumanon ug maalamong ulipon” nagtaganag espirituwal nga pagkaon aron mapanalipdan kita batok sa pagtulon-an sa ebolusyon, imoral nga mga tinguha, pagpangagpas ug bahandi ug pagkainila, ug sa uban pang makadaot nga mga tinguha ug impluwensiya. (Mat. 24:45) Unsay nakatabang kanimo sa pagsukol sa pipila niini nga mga kapeligrohan?

14. Sa unsang paagi mapahimuslan nato ang proteksiyon nga gitagana sa Diyos?

¹⁴ Unsay angay natong buhaton aron makapabilin diha sa “natago nga dapit” sa Diyos nga nagtaganag proteksiyon? Maingon nga kanunay natong panalipdan ang atong kaugalingon batok sa pisikal nga mga kapeligrohan, sama sa mga aksidente, kriminal, o sakit, kinahanglan usab nga padayon natong panalipdan ang atong kaugalingon batok sa espirituwal nga mga kapeligrohan. Busa, angay nga regular natong pahimuslan ang giya nga gitagana ni Jehova pinaagi sa atong mga publikasyon ug sa mga tigom sa kongregasyon ug asembliya. Kita makapangayog tambag sa mga ansiyano. Ug dili ba nakatabang man usab kanato  ang lainlaing hiyas nga gipakita sa atong mga igsoon? Sa pagkatinuod, ang atong pagpakig-uban sa kongregasyon nagtabang kanato nga mahimong maalamon.—Prov. 13:20; basaha ang 1 Pedro 4:10.

15. Nganong makasalig ka nga si Jehova makapanalipod kanimo batok sa bisan unsang butang nga makapawala sa iyang pag-uyon?

¹⁵ Kita makasalig gayod nga si Jehova makapanalipod kanato batok sa bisan unsang butang nga makapawala sa iyang pag-uyon. (Roma 8:38, 39) Iyang gipanalipdan ang kongregasyon batok sa gamhanang relihiyoso ug politikal nga mga kaaway nga sagad ang tumong, dili ang pagpatay kanato, kondili ang pagpahilayo kanato gikan sa atong balaang Diyos. Tinuod gayod ang saad ni Jehova: “Bisan unsa nga hinagiban nga buhaton batok kanimo dili magmalamposon.”—Isa. 54:17.

Kinsay Mohatag Kanatog Kagawasan?

16. Nganong dili makahatag kanatog kagawasan ang kalibotan?

¹⁶ Mawad-an ba kitag kagawasan kon kita mahimong iya ni Jehova? Dili. Sa kasukwahi, mawad-an kitag kagawasan kon kita mahimong iya sa kalibotan. Ang kalibotan nahimulag kang Jehova ug gimandoan sa usa ka mapintas nga diyos nga nag-ulipon sa katawhan. (Juan 14:30) Pananglitan, ang sistema ni Satanas naggamit sa kapit-os sa ekonomiya aron mawad-ag kagawasan ang mga tawo. (Itandi ang Pinadayag 13:16, 17.) Ang malimbongong gahom sa sala nag-ulipon usab sa katawhan. (Juan 8:34; Heb. 3:13) Busa bisan pag ang mga dili-magtutuo moingon nga dunay kagawasan sa pagkinabuhi nga sukwahi sa mga pagtulon-an ni Jehova, ang si bisan kinsa nga motuo kanila maulipon gayod sa makasasala ug makauulaw nga pagkinabuhi.—Roma 1:24-32.

17. Unsa nga kagawasan ang gitanyag ni Jehova kanato?

¹⁷ Sa laing bahin, si Jehova magpahigawas kanato gikan sa tanang makadaot nga mga butang kon atong isalig ang atong kaugalingon kaniya. Sa pipila ka paagi, ang atong kahimtang maoy susama nianang sa usa ka pasyente nga nagsalig sa iyang kinabuhi sa usa ka hanas nga siruhano kinsa makaluwas kaniya gikan sa peligroso kaayong kahimtang. Kitang tanan anaa usab sa peligroso kaayong kahimtang tungod sa napanunod nga sala. Kon isalig nato ang atong kaugalingon kang Jehova, pinasukad sa halad ni Kristo, kita makalaom nga mapahigawas gikan sa epekto sa sala ug mabuhi sa walay kataposan. (Juan 3:36) Sa dihang atong mahibaloan ang katakos sa usa ka siruhano, modako ang atong pagsalig kaniya. Sa samang paagi, kon kita magpadayon sa pagkat-on bahin kang Jehova, modako usab ang atong pagsalig kaniya. Busa, kita magpadayon sa pagtuon sa Pulong sa Diyos tungod kay motabang kini kanato sa paghigugma kaniya sa paagi nga magwagtang sa kahadlok nga mahimong iya ni Jehova.—1 Juan 4:18.

18. Unsay kahimtang niadtong mahimong iya ni Jehova?

¹⁸ Si Jehova naghatag sa tanang tawo ug kagawasan sa pagpili. Ang iyang Pulong nag-ingon: “Kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat, pinaagi sa paghigugma kang Jehova nga imong Diyos.” (Deut. 30:19, 20) Buot niya nga ipakita nato ang atong gugma kaniya pinaagi sa kinabubut-ong pagpili nga alagaron siya. Inay mawad-an sa atong kagawasan, seguradong magmalipayon kita sa pagkahimong iya sa Diyos nga atong gihigugma.

19. Nganong ang pagkahimong iya ni Jehova usa ka dili-takos nga kalulot?

¹⁹ Kay makasasala, kita dili angayan nga mahimong iya sa usa ka hingpit nga Diyos. Tungod lamang sa dili-takos nga kalulot sa Diyos nga nahimo kanang posible. (2 Tim. 1:9) Busa, si Pablo misulat: “Kon kita mabuhi, kita mabuhi alang kang Jehova, ug kon kita mamatay, kita mamatay alang kang Jehova. Busa kon kita mabuhi ug kon kita mamatay, kita iya ni Jehova.” (Roma 14:8) Dili gayod kita magmahay sa atong pagpili nga mahimong iya ni Jehova.

Unsay Imong Tubag?

• Unsa ang mga kaayohan sa pagkahimong iya ni Jehova?

• Nganong makahimo kita sa pagbuhat sa gidahom ni Jehova kanato?

• Sa unsang paagi si Jehova nanalipod sa iyang mga alagad?

[Mga Pangutana sa Pagtuon]

[Mga hulagway sa panid 8]

Pangutan-a ang uban kon sa unsang paagi sila nakabatog kaayohan sa pagkahimong iya ni Jehova

[Hulagway sa panid 10]

Unsa ang pipila ka paagi nga si Jehova nagtaganag proteksiyon?