Ñande ningo Jehová mbaʼe haʼe imbaʼeporãguinte

‘Ñande ningo Jehová mbaʼe voi.’ (ROM. 14:8.)

1, 2. a) Mbaʼérepa tuichaite mbaʼe jaiko Jehová mbaʼéramo? b) Mbaʼe mbaʼépa ñahesaʼỹijóta?

 JEHOVÁ opromete umi isrraelítape: “Peẽta che retã tee opa tetã apytépe” (Éxo. 19:5). Ajépa tuichaite mbaʼe upéva! Koʼág̃a avei Jehová mbaʼe hína umi isiervokuéra oĩva kongregasiónpe (1 Ped. 2:9; Rev. 7:​9, 14, 15). Upéicha rupi ikatu jahupyty heta mbaʼe porã ndopamoʼãiva arakaʼeve.

² Upéva tuicha rresponsavilida hína ñandéve g̃uarã. Upévare ikatu oĩ oñeporandúva: “Ajapopánepa Jehová ojeruréva chéve? Chemboykénepa tuicha ajavy mbaʼéramo peteĩ árape? Chépa ahasa asýta aiméramo ipoguýpe?”. Koʼã mbaʼe ningo iñimportanteterei ñahesaʼỹijomi. Péro ñepyrũrã iporã ñambohovái ko porandu: Mbaʼe mbaʼépa jahupyty ñande Jehová mbaʼéramo?

Ñande javyʼáta Jehová mbaʼéramo

3. Mbaʼépa ohupyty Rahab oservi rupi Jehovápe?

³ Anetehápe piko ñande heta mbaʼe porã jahupytýta Jehová mbaʼéramo? Katuete ningo heta mbaʼe jahupytýta. Ñapensamíntena Rahab rembiasakuére, haʼe ningo peteĩ kuña rekovai oikovaʼekue táva Jericópe. Ha  oiméne okakuaarakaʼe umi hénte rekovai apytépe ha omombaʼéva umi ñandejára guaʼu Canaanguápe. Upéicharamo jepe haʼe ohechakuaa umi Israelgua ogana hague heta ñorairõ Jehová oipytyvõ rupi chupekuéra. Ha ohechakuaa avei Jehová haʼeha pe Ñandejára añetetéva. Upévare, ndokyhyjeivaʼekue oipytyvõ hag̃ua umi Israelguápe ha oñemoĩ Jehová poguýpe oñangareko hag̃ua hese. Ha la Bíbliape heʼi voi: ‘Rahab, pe kuña rekovaípe ojehecha hekoporãvaramo, omog̃uahẽ rupi hógape umi Israel rembijokuáipe ha upéi omondo chupekuéra ambue tape rupi’ (Sant. 2:25). Mombyry ningo haʼe ogana ojeheʼa rupi umi Israelgua rehe. Upe tetã ningo ipotĩ, Ñandejára ohekomboʼégui chupekuéra iléi rupive ojoayhu ha hekojoja hag̃ua. Ha oiménepa ovyʼaite Rahab oheja haguére pe hekokyʼa! Upéi haʼe omenda peteĩ isrraelíta rehe ha imemby hína Boaz, peteĩ kuimbaʼe iñeʼẽrenduvaʼekue Ñandejárape (Jos. 6:25; Rut 2:​4-12; Mat. 1:​5, 6).

4. Mbaʼépa ohupyty Rut oñemoĩ haguére Jehová poguýpe?

⁴ Peteĩ kuña moabita hérava Rut oservivaʼekue avei Jehovápe. Imitãme haʼe oiméne oservirakaʼe Kemóspe ha ambue ñandejaraguaʼu Moabguápe. Upéi ou oikuaa Ñandejára añeteguápe ha omenda peteĩ Israelgua oikóvare Moábpe (jaleemína Rut 1:​1-6). Upe rire Rut ha hovaja Orpá iviúda ha oho hikuái isuégra Noemí ndive Belénpe. Ha tapére Noemí heʼi chupekuéra ijetuʼutaha oiko hag̃ua Israélpe. Upévare heʼi Orpá ha Rútpe ojevy jeýnte hag̃ua hetãme. Ha Orpá ojapo Noemi heʼíva ha “ojevy hetãme ha ijarakuérape”. Rut katu ojerovia Jehováre ha ohechauka voi oñemoĩseha ipoguýpe. Upévare heʼi Noemípe: ‘Anivéna rejerure chéve roheja hag̃ua. Nde rehohápe che aháta, nde reikohápe che aikóta. Ne retã che retãrã, nde Jára che Jararã’ (Rut 1:​15, 16). Ojapo haguére upéicha, oñepytyvõ chupe pe Ñandejára léipe heʼiháicha. Upépe heʼi voi oñepytyvõ hag̃ua umi viúdape, umi imboriahu ha umi ndaijyvýivape. Upéicharõ Jehová poguýpe, oñeñangareko Rut rehe, ovyʼa ha oiko porã.

5. Mbaʼépa jahechakuaa umi ermáno oservívare Jehovápe ipyʼaite guive?

⁵ Oiméne jaikuaa umi ermáno heta áñoma oservíva Jehovápe ipyʼaite guive. Ñaporandumína chupekuéra mbaʼe mbaʼépa ohupyty oñemeʼẽha ára guive Jehovápe. Ha ohasáramo jepe hikuái heta provléma, jahechakuaáta añeteha pe salmísta heʼivaʼekue: ‘Ovyʼaite pe tetã oikóva Jehová poguýpe’ (Sal. 144:​15, ÑÑB).

Jehová ndojeruréi mbaʼeve ndaikatumoʼãiva jajapo

6. Mbaʼérepa ndovaléi ñapensa ndaikatumoʼãiha jajapopa Jehová ojeruréva ñandéve?

⁶ Ikatu oĩ oñeporandúva: “Ajapopánepa Jehová ojeruréva chéve? Ikatu ningo jakyhyje ñapensávo jaservivaʼerãha Jehovápe, jajapo iléi heʼíva ha ñañeʼẽvaʼerãha hérape. Yma  ningo Moisés rehe oikovaʼekue upéicha, haʼe oimoʼã ndaikatumoʼãiha omombeʼu Jehová marandu umi Israelguápe ha pe rréi de Egiptope. Péro Jehová ndojeruremoʼãi asy chupe peteĩ mbaʼe ndaikatumoʼãiva ojapo. Opromete voi katu chupe: ‘Che romboʼéta erevaʼerã’ (jaleemína Éxodo 3:11 ha 4:​1, 10, 13-15). Moisés oheja Ñandejára oipytyvõ chupe ha ovyʼa ojapo haguére Jehová rembipota. Koʼág̃a peve ningo Jehová imbaʼerechakuaa ñanendive. Haʼe oikuaa ñaneimperfektoha ha ñanepytyvõse (Sal. 103:14). Ndaijetuʼúi ningo jaiko hag̃ua Jesús remimboʼéramo, javyʼaiterei katu ikatu haguére ñambovyʼa chupe ha jahechauka jahayhuha ñande rapichakuérape. Jahecha oñekumpliha Jesús heʼivaʼekue: ‘Peju che rendápe, ha che pomombytuʼúta. Peñemoĩ che júgo guýpe ha peaprende chehegui. Peikuaáta chepyʼaporã ha cheumildeha’ (Mat. 11:​28, 29).

7. Mbaʼérepa ikatu jajerovia Jehová ñanepytyvõtaha jajapo hag̃ua umi mbaʼe ojeruréva ñandéve?

⁷ Ñañemboʼéramo Ñandejárape, haʼe ñanemombaretéta ha ñanemokyreʼỹta. Upéicha oikovaʼekue Jeremías rehe. Haʼe ningo naikũjereivaʼekue Jehová oiporavórõ guare chupe iprofetarã. Upévare heʼi: ‘Anína Jehová che Jára! Che niko nañeʼẽkuaái che mitãiterei gueteri’. Ha tiémpo rire heʼi: “Nañeʼẽmoʼãvéima hérape” (Jer. 1:6; 20:9). Upéicharõ jepe haʼe omombeʼuvaʼekue Ñandejára marandu cuarenta áño pukukue. Mbaʼéichapa ojapo upéva? Jehová omokyreʼỹ rupi chupe. Ha Jehová heʼi jey voi chupe: ‘Che aime nendive añangareko porã hag̃ua nderehe ha ani hag̃ua ojehu ndéve mbaʼeve ivaíva’ (Jer. 1:​8, 19; 15:20).

8. Mbaʼéichapa jahechauka jajeroviaha Ñandejárare?

⁸ Yma ojapo haguéicha Moisés ha Jeremías rehe, koʼág̃a rupi Jehová ñanemombarete ha ñanemokyreʼỹ jajapo hag̃ua hembipota. Upearã tekotevẽ jajapo Ñandejára Ñeʼẽ heʼíva: ‘Ejerovia Ñandejárare nde pyʼaite guive, ha ani ndejehénte. Nemanduʼáke hese opaite nde rapére ha haʼe omyesakãta ndéve nde raperã’ (Pro. 3:​5, 6). Mbaʼéichapa jahechauka jajeroviaha Ñandejárare? Jahejávo Jehovápe ñanesãmbyhy Iñeʼẽ ha ikongregasión rupive. Upéicha jajapóramo mbaʼevete nañandejokomoʼãi ñaneñeʼẽrendu hag̃ua chupe.

Jehová oñangareko káda únore

9, 10. Mbaʼéichapa Jehová opromete oñangarekotaha ñanderehe?

⁹ Oĩ ningo okyhyjéva oñemeʼẽ hag̃ua Ñandejárape. Mbaʼérepa? Tuichaiterei ojavýrõ g̃uarã upe rire, ipochy hendive Ñandejára ha noperdonavéi chupe. Péro okyhyje rei upévagui, Ñandejára ningo omoĩ ñandéve opa mbaʼe ñaikotevẽva akóinte ñaime porã hag̃ua hendive. Jahechamína mbaʼéichapa omyesakã upéva Salmo 91.

¹⁰ ‘Upe oikóva Ñandejára Yvatetegua ãme ha oñemoĩva upe Ipuʼakapáva poguýpe, heʼi Ñandejárape: “Jehová, nde hína upe chemoʼãva, nderehe che ajerovia”. Ha haʼe ndohejaichéne peichaguápe hoʼa pe aña ñuhãme.’ (Sal. 91:​1-3.) Péicha jahecha Ñandejára oñangarekotaha umi ohayhu ha ojeroviávare hese (jaleemína Salmo 91:​9, 14). Péro heʼisépa upéva oñangarekotaha ñanderehe ani hag̃ua ojehu ñandéve mbaʼeve? Jaikuaa ningo yma heta vése oñangareko hague upéicha isiervokuérare ou peve pe Mesías. Péro hetápe avei oheja ojegueraha préso, oñembohasa asy térã ojejuka umi Satanás rembiguái poguýpe (Heb. 11:​34-39). Upéicharõ jepe omombarete chupekuéra ikatu hag̃uáicha oaguanta ha iñeʼẽrendu chupe. Upévare jaʼekuaa pe Salmo 91-pe Jehová oprometeha oñangarekotaha ñanderehe akóinte jajerovia mbarete hag̃ua hese.

11. Mbaʼépa heʼise ‘jaiko Ñandejára Yvatetegua ãme’ ha mávapa oiko upépe?

¹¹ Mbaʼépa heʼise ‘jaiko Ñandejára Yvatetegua ãme’? Heʼise Ñandejára oñangarekotaha ñanderehe akóinte jajerovia hag̃ua hese  ha ndohejaimoʼãiha mbaʼeve ni avave omokangy ñande jerovia ha ñanemomombyry chugui (Sal. 15:​1, 2; 121:5). Péro umi ndoikuaáiva Jehovápe ndaikatúi oiko ‘Ñandejára Yvatetegua ãme’. Mbaʼérepa? Pórke Jehová oheja oiko hiʼãme umi heʼíva añoite: ‘Jehová, nde hína che Jára, nderehe che ajerovia’. Upévare umi oikóva guive ‘Ñandejára Yvatetegua ãme’ ndojepyʼapyivaʼerã hoʼárõ g̃uarã Satanás ñuhãme ha oñemomombyry Jehovágui.

12. Mbaʼe mbaʼépa ikatu ñanemomombyry Ñandejáragui?

¹² Mbaʼe mbaʼépa ikatu ñanemomombyry Ñandejáragui? Umíva apytépe oĩ umi oñembojojáva ‘mbaʼasy vai rehe’ ha umi ‘oporohundívare’ (Sal. 91:​5, 6). Koʼág̃a rupi ningo Satanás omoñuhã heta héntepe. Pór ehémplo oiko hag̃ua iñakãre ha opensa hag̃ua ijehénte (2 Cor. 11:3). Oĩ avei itaryrýiva, oñemombaʼeguasu ha imbaʼeretaséva. Hetápe avei Satanás omoinge iñakãme omombaʼeterei hag̃ua hetã, oguerovia hag̃ua rrelihión japu omboʼéva ha yvypóra ouha kaʼígui (evolusión) (Col. 2:8). Ha hetápe avei oity tekovaípe. Koʼã ‘mbaʼasy’ rupive Satanás omomombyry la héntepe Ñandejáragui ha ndohayhuvéi hikuái Chupe (jaleemína Salmo 91:​7-10; Mat. 24:12).

Mbaʼépa jajapovaʼerã akóinte jahayhu hag̃ua Jehovápe

13. Mbaʼéichapa Jehová oñangareko ñanderehe ani hag̃ua jaʼa umi ñuhãme?

¹³ Mbaʼéichapa Jehová oñangareko ñanderehe ani hag̃ua jaʼa umi ñuhãme? Pe salmísta heʼi: ‘Ñandejára heʼíta hiʼanhelkuérape oñangareko hag̃ua nderehe mamo reikoha rupi’ (Sal. 91:11). Añetehápe ningo umi ánhel oñangareko ñanderehe ha ñanepytyvõ ñamombeʼu hag̃ua pe marandu porã (Rev. 14:6). Ñandejára oñangareko avei ñanderehe ansianokuéra rupive. Haʼekuéra ningo omboʼe kongregasiónpe Ñandejára Ñeʼẽme oĩvante ha upéicha ñanepytyvõ ani hag̃ua Satanás ñanembotavy. Ñanepytyvõ avei ani hag̃ua ñandegueraha vai ko múndo reko (Tito 1:9; 1 Ped. 5:2). Jehová ningo ‘pe tembiguái jeroviaha ha iñarandúva’ rupive ñanerekomboʼe ha ñanepytyvõ avei ani hag̃ua jaʼa Satanás ñuhãme: ani hag̃ua ñande rekovai, ñane mbaʼeretase, jaguerovia yvypóra ouha kaʼígui ha ambue mbaʼe ikatúva ñandegueraha vai (Mat. 24:45). Iporã ñañeporandumi: “Mbaʼe mbaʼépa chepytyvõ ani hag̃ua haʼa koʼãichagua ñuhãme?”.

14. Mbaʼépa jajapovaʼerã Ñandejára oñangareko hag̃ua ñanderehe?

¹⁴ Mbaʼépa jajapovaʼerã Ñandejára oñangareko hag̃ua ñanderehe? Upearã ñande voi ñañeñangarekovaʼerã. Pór ehémplo, ñande ningo ñañeñangareko ani hag̃ua ñanderasy, ñañeaksidenta térã jajeasalta. Upéicha avei ani hag̃ua jaʼa Satanás ñuhãme tekotevẽ ñañeñangareko ha jajapo Jehová heʼíva ñandéve rreunionhápe, aty guasuhápe ha puvlikasionkuéra rupive. Jajerurevaʼerã avei ansianokuérape  ñanepytyvõ hag̃ua ha jajeheʼa umi ermáno heko marangatúvare. Tuichaite ningo pe kongregasión ñanepytyvõ jajapo hag̃ua hekoitépe opa mbaʼe! (Pro. 13:20; jaleemína 1 Pedro 4:10.)

15. Mbaʼérepa jajerovia Jehová oñangarekotaha ñanderehe?

¹⁵ Jehová ningo oñangarekóta ñanderehe ani hag̃ua mbaʼeve ñanemomombyry chugui (Rom. 8:​38, 39). Hetáma ningo umi polítiko ha rrelihión japu oñemoĩ Jehová rembiguaikuérare. Ha haʼekuéra ningo ndahaʼéi ñandejukasénteva, ñanemomombyryse katu Ñandejáragui. Péro Jehová oñangareko ñanderehe ha upéicha okumpli iñeʼẽ: ‘Mbaʼeveichagua opuʼãva nderehe nosẽporãmoʼãi’ (Isa. 54:17).

Máva poguýpepa jaiko porãve?

16. Mbaʼérepa arakaʼeve ndajaikoporãmoʼãi ko múndope?

¹⁶ Jaiko asýtapa ñañemeʼẽramo Jehovápe? Nahániri. Péro jaikóramo ko múndo añáme ojeikoháicha la jaiko asýta. Ko múndo ningo oñemomombyry Jehovágui ha oĩ Satanás poguýpe, haʼéngo iñaña ha ipyʼahatãiterei (Juan 14:30). Mbaʼépa Satanás oiporu omoĩ hag̃ua la héntepe ipoguýpe? Upearã haʼe ojevale la hénte remikotevẽre (embojojami Revelación 13:​16, 17 rehe). Ojevale avei umi mbaʼe jajapose térã jaipotávare ñaneimperfékto rupi (Juan 8:34; Heb. 3:13). Upévare, arakaʼeve ndajaikoporãmoʼãi ko múndo Satanás poguýpe oĩvape. Avavépe voi ningo nomokyreʼỹi oiko hag̃ua Jehová heʼiháicha. Ha umi oikóva ko múndope ojeikoháicha oĩ pekádo poguýpe ha ivai vaivéva ojapo (Rom. 1:​24-32).

17. Mbaʼéguipa ñandepeʼáta Jehová?

¹⁷ Ñañemeʼẽramo Jehovápe katu haʼe ñandepeʼáta umi mbaʼe ikatúvagui ñanembohasa asy. Peteĩ doktór ikatupyrýva ningo ikatu ñanemonguera ñanderasyetéramo. Upéicha avei Jehová ikatu ñanemonguera pe mbaʼasy ivaietévagui: pe pekádo ombohasavaʼekue ñandéve ñande sy ha ñande ru ypykue. Péro jajei hag̃ua pe pekádo poguýgui ha jaikove hag̃ua opa ára g̃uarã tekotevẽ ñañemeʼẽ Jehovápe jajerovia rupi Jesús sakrifísiore (Juan 3:36). Ñande ningo jajeroviave peteĩ doktór rehe jaikuaa porãramo chupe. Upéicha avei jaikuaa porãvévo Jehovápe jajeroviavéta hese. Upévare jastudiavaʼerã la Biblia jaikuaa porã ha jahayhu hag̃ua Ñandejárape. Upéva ñanepytyvõta avei pono jakyhyje ñañemoĩ hag̃ua ipoguýpe (1 Juan 4:18).

18. Mbaʼépa ohupytýta umi oñemeʼẽva Jehovápe?

¹⁸ Jehová ningo oipota ñandete jadesidi mbaʼépa jajapóta. Upévare voi heʼi ñandéve Iñeʼẽme: ‘Peiporavóke jeikove rape, nde, nde raʼy ha neñemoñarekuéra peikove hag̃ua. Ha pehayhu Ñandejárape’ (Deu. 30:​19, 20). Jehová ningo oipota ñandete jadesidi jaservi chupe ha upéicha jahechauka jahayhuha chupe. Upéicharõ ñañemeʼẽvo Jehovápe ndajaikoʼasymoʼãi arakaʼeve ha javyʼáta opa árare.

19. Mbaʼérepa nañamereséi jaiko Ñandejára mbaʼéramo?

¹⁹ Ñaneimperfékto rupi nañamereséi jaiko Ñandejára mbaʼéramo, haʼe niko perfékto. Ha Jehová imbaʼeporã rupínte ningo ikatu jaiko imbaʼéramo (2 Tim. 1:9). Apóstol Pablo ohai: “Jaikovéramo, jaikove Ñandejárape g̃uarã, ha ñamanóramo, Ñandejárape g̃uarã ñamano. Ha upéicha, jaikovérõ ha ñamanórõ, Ñandejára mbaʼe ñande” (Rom. 14:8). Ñande arakaʼeve nañambyasyichéne ñañemeʼẽ hague Jehovápe.

Ñambohovaimína koʼã porandu

• Mbaʼe mbaʼépa jahupyty ñañemeʼẽramo Jehovápe?

• Mbaʼérepa ikatu jajapopa Jehová ojeruréva ñandéve?

• Mbaʼéichapa Jehová oñangareko hembiguaikuérare?

[Porandu ñahesaʼỹijóva]

[Nóta oĩva taʼanga ndive páhina 8]

Eporandumína ambue ermánope mbaʼémapa ohupyty oñemeʼẽ haguére Jehovápe

[Nóta oĩva taʼanga ndive páhina 10]

Mbaʼéichapa Jehová oñangareko ñanderehe?