Re Ma Jọ Idibo Jihova Yọ Uvẹ-ọghọ
Re Ma Jọ Idibo Jihova Yọ Uvẹ-ọghọ
“Mai erọ Ọnowo na.”—ROM 14:8.
1, 2. (a) Uvẹ-ọghọ vẹ ma wo? (b) Enọ vẹ ma te ta ẹme kpahe?
UVẸ-ỌGHỌ nọ Jihova ọ rọ kẹ emọ Izrẹl o ro kẹhẹ nọ ọ ta kẹ ae nnọ: “Wha rẹ te jọ efe-agheghọ rọ kẹ omẹ eva udevie erẹwho na kpobi.” (Ọny. 19:5) Enọ e rrọ ukoko Ileleikristi nẹnẹ a wo uvẹ-ọghọ nọ a rẹ rọ jọ idibo Jihova re. (1 Pita 2:9; Evia. 7:9, 14, 15) Oyena yọ uvẹ-ọghọ nọ o rẹ kẹ omai erere bẹdẹ bẹdẹ.
2 Re a jọ odibo Jihova orọnikọ yọ uvẹ-ọghọ ọvo ho rekọ u wo owha-iruo nọ u lele i rie. Ahwo jọ a sai roro nọ: ‘Kọ mẹ sai ti ru oware nọ Jihova ọ gwọlọ mi omẹ? Kọ mẹ tẹ raha uzi, ọ te se omẹ? Kọ mẹ tẹ rrọ odibo Jihova yọ mẹ rehọ ifi gba oma mẹ no?’ U fo re ma ta ẹme kpahe enọ yena. Rekọ taure ma te ti ru ere, joma ta ẹme kpahe onọ ofa jọ: Irere vẹ i re noi ze nọ ohwo ọ tẹ rrọ odibo Jihova?
Re Ma Jọ Idibo Jihova O rẹ Wha Evawere Ze
3. Didi irere i te Rehab nọ ọ jiroro nọ ọ rẹ gọ Jihova?
3 Kọ re ohwo ọ jọ odibo Jihova o rẹ wha erere ze? Rehọ oriruo Rehab, ogberẹ jọ nọ ọ jẹ rria Jẹriko. Ababọ avro, aye nana ọ gọ edhọ ahwo Kenan no emaha ze. Ghele na, nọ o yo epanọ Jihova o ro fi obọ họ kẹ Izrẹl fi erẹwho efa kparobọ, o te vuhumu nnọ Jihova họ Ọghẹnẹ uzẹme na. Ọ tẹ rọ enẹ fi uzuazọ riẹ họ awa rọ thọ ahwo Ọghẹnẹ. Ebaibol e ta nnọ: “Kọ ogbẹrọnọ epọvo na Rehab ogberẹ na ọ rọ rehọ fiki iruo wo unuzou, okenọ o dede [enọ a vi uwou] na rehọ, ọ jẹ rehọ edhere ọfa vi ai kpo?” (Jem. 2:25) Dai roro irere nọ i te rie nọ o zihe ruọ omọvo ahwo Ọghẹnẹ nọ e rọ fuafo. Ẹvẹ eva e were riẹ te nọ ọ nya siọ ekpehre uzuazọ nọ o je yeri ba! Ọzae jọ evaọ Izrẹl ọ tẹ rehọ iẹe, a te yẹ Boaz, ọnọ ọ jọ uvi ọg’Ọghẹnẹ.—Jos. 6:25; Rut 2:4-12; Mat. 1:5, 6.
4. Didi erere Rut o wo fikinọ ọ jiroro inọ Jihova ọ rẹ gọ?
4 Rut ohwo Moab yọ omọfa nọ ọ jiroro nọ ọ rẹ gọ Jihova. Ẹsejọhọ ẹdhọ ahwo Moab nọ a re se Kẹmosh ọ gọ no emaha ze, rekọ ọ tẹ te riẹ Ọghẹnẹ uzẹme na, Jihova, kẹsena ọzae obọ Izrẹl jọ nọ ọ rehọ ẹwho rai ziọ ukane ọ tẹ rehọ iẹe. (Se Rut 1:1-6.) Uwhremu na, nọ Rut avọ Ọpa a je lele Naomi oni-orọo rai kpobọ Bẹtlẹhẹm, Naomi ọ tẹ jẹ lẹ uvovo-eyae ivẹ na inọ a zihe kpobọ ẹwho rai. O te jọ bẹbẹ kẹ ai re a rria obọ Izrẹl. Ọpa o te gine “kpo bru ahwo riẹ gbe eghẹnẹ riẹ,” rekọ Rut o zihe he. O ru lele ẹrọwọ riẹ, ọ tẹ jẹ riẹ Ọghẹnẹ nọ ọ gwọlọ gọ. Ọ ta kẹ Naomi nọ: “Whọ tẹzẹ omẹ re mẹ nya se owhẹ ba ha hayo re mẹ se owhẹ ba elele he. Keme obonọ whọ nya mẹ rẹ nya, gbe oria nọ whọ kpahe mẹ rẹ kpahe. Ahwo ra a rẹ te jọ ahwo mẹ, gbe Ọghẹnẹ ra họ Ọghẹnẹ mẹ.” (Rut 1:15, 16) Fikinọ Rut ọ salọ nọ ọ rẹ gọ Jihova, o wo erere no uzi Ọghẹnẹ ze nọ u wo ọruẹrẹfihotọ kẹ eyae-uku, iyogbere, gbe enọ i wo idhu hu. Evaọ otọ ẹruọsa Jihova, Rut o duku evawere, uketha, gbe omofọwẹ.
5. Eme who muẹrohọ no evaọ oma enọ e gọ Jihova ziezi no evaọ ikpe buobu?
5 Ẹsejọhọ whọ riẹ ahwo jọ nọ e roma rai mudhe kẹ Jihova no, enọ e gọ riẹ ikpe buobu no. Whọ rẹ sae nọ inievo nana re a vuẹ owhẹ irere nọ a wo no. Dede nọ ohwo kpobi o wo ẹbẹbẹ, inievo nana a ruẹ orugba eme ọ ọso-ilezi na no: “Oghọghọ u te ahwo nọ ỌNOWO ọ rọ Ọghẹnẹ rai!”—Ol. 144:15.
Izi Jihova E Ga Hrọ Họ
6. Fikieme ma gbẹ rọ dhozọ họ inọ ma te sai ru oware nọ Jihova ọ gwọlọ mi omai hi?
6 Ẹsejọhọ who roro no sọ whọ te sai ru oware nọ Jihova ọ gwọlọ mi owhẹ. Ozọ o rẹ sai mu ohwo nọ o te roro epanọ uzuazọ riẹ o te jọ nọ ọ tẹ rrọ odibo Ọghẹnẹ, re o koko izi riẹ, jẹ ta kẹ amọfa kpahe odẹ riẹ. Wọhọ oriruo, Mosis o rri oma riẹ inọ o te he okenọ Ọghẹnẹ o vi ei bru emọ Izrẹl gbe ovie Ijipti. Rekọ uwou nọ Ọghẹnẹ o vi Mosis na o ga hrọ họ. Jihova o ‘wuhrẹ i rie onọ o re ruẹ.’ (Se Ọnyano 3:11; 4:1, 10, 13-15.) Fikinọ Mosis ọ jẹ obufihọ Ọghẹnẹ rehọ, ọ ghọghọ evaọ eruo oreva Ọghẹnẹ. Epọvo na re nẹnẹ, izi nọ Jihova ọ kẹ omai e ga hrọ họ. Ọ riẹ inọ ma gba ha, yọ ọ gwọlọ fi obọ họ kẹ omai. (Ol. 103:14) Re ma jọ olele Jesu o rẹ wha omosasọ ze orọnikọ ozodhẹ hẹ, keme oghẹrẹ uzuazọ utioye na o rẹ wha erere se amọfa je ru Jihova eva were. Jesu ọ ta nọ: “Wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ [mi] omẹ, keme me re wowolẹ jegbọ eva i ro kpotọ.”—Mat. 11:28, 29.
7. Eme ọ rẹ sae k’owhẹ imuẹro inọ Jihova o ti fi obọ họ k’owhẹ ru oreva riẹ?
7 Jihova ọ te kẹ omai uduotahawọ nọ ma gwọlọ otẹrọnọ ma be lẹ sei re ọ kẹ omai ẹgba. Wọhọ oriruo, Jerimaya ọ jọ ohwo unutẹmeta n’otọ ze he. Fikiere okenọ Jihova ọ rehọ iẹe mu ọruẹaro, Jerimaya ọ ta nọ: “A, Ọnowo ỌGHẸNẸ! Ri, mẹ riẹ ẹme ẹta ha, keme mẹ ọmaha.” Uwhremu na, ọ tubẹ ta nọ: “Mẹ [rẹ gbẹ] ta ẹme te odẹ riẹ vievie he.” (Jeri. 1:6; 20:9) Ghele na, avọ uduotahawọ Jihova, Jerimaya o whowho ovuẹ nọ ahwo a gwọlọ yo ho ikpe 40. Unuẹse buobu Jihova ọ ta udu họ iẹe nọ: “Mẹ avọ owhẹ a gbẹ rọ, re me siwi owhẹ jẹ thọ owhẹ.”—Jeri. 1:8, 19; 15:20.
8. Ẹvẹ ma re ro dhesẹ nọ ma fievahọ Jihova?
8 Wọhọ epanọ Jihova ọ kẹ Mosis gbe Jerimaya ẹgba na, o ti fi obọ họ kẹ owhẹ ru oware nọ ọ gwọlọ mi Ileleikristi nẹnẹ. Oware nọ o gwọlọ kpobi họ ẹruọrọsuọ Ọghẹnẹ. Ebaibol e ta nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Otẹrọnọ ma be jẹ ọkpọvio nọ Jihova ọ be kẹ omai rehọ ẹkwoma Ebaibol gbe ukoko na, yọ ma bi dhesẹ nọ ma fievahọ Jihova. Ma tẹ kuvẹ re Jihova ọ kpọ omai evaọ uzuazọ, oware ovo u ti ru omai kie no aro riẹ hẹ.
Jihova Ọ be Rẹrote Idibo Riẹ Omomọvo
9, 10. Didi oghẹrẹ ọthọwẹ oye Olezi avọ 91 o ta kpahe?
9 Ahwo jọ a te bi roro sọ u fo re a roma mudhe kẹ Jihova, udu u re bru rai sọ a te raha uzi, o vẹ te whae ze nọ Jihova ọ te rọ se ai. Eva e rẹ were omai inọ Jihova ọ kẹ omai uketha nọ ma gwọlọ kpobi re ma sae yọrọ emamọ usu nọ ma wo kugbei. Joma ruẹ epanọ a fi rie họ evaọ Olezi avọ 91.
10 Olezi yena o muhọ nọ: “Ọnọ ọ be ria oria Oride na, ọ rẹ te jọ otọ uwoho Erumeru na, ọ rẹ te ta kẹ ỌNOWO nọ, ‘Whẹ họ oria adhẹzọ gbe uwou ogaga mẹ; Ọghẹnẹ mẹ, ọnọ me re fievahọ.’ Kemena ọye oma riẹ o re ti siwi omẹ no ẹta okpe-emevra.” (Ol. 91:1-3) Muẹrohọ inọ Ọghẹnẹ ọ ya eyaa inọ ọ te thọ enọ i you rie je fievahọ iẹe. (Se Olezi 91:9, 14.) Didi ọthọwẹ o wo họ iroro? Evaọ oke emọ Izrẹl, Jihova ọ thọ idibo riẹ jọ no enwoma—ẹsejọ re ọ ruẹse sẹro uyẹ nọ Mesaya nọ a ya eyaa riẹ na o ti no ze. Rekọ, a fi idibo riẹ buobu họ uwou-odi, a gboja kẹ ae, tube kpe ejọ re a ruẹsi ru ai siọ Ọghẹnẹ ba ẹgọ. (Hib. 11:34-39) A thihakọ keme Jihova ọ thọ rai re a sai kru ẹgbakiete rai. Fikiere, Olezi avọ 91 o ta kpahe ọthọwẹ abọ-ẹzi.
11. Eme họ “oria Oride” na, kọ amono Ọghẹnẹ ọ be jọ eva riẹ thọ?
11 “Oria Oride” nọ ọso-ilezi na ọ fodẹ na o dikihẹ kẹ oria ọthọwẹ abọ-ẹzi. Enọ e be rria oria oride na a re wo ufuoma no obọ ewegrẹ rai, enọ e be gwọlọ raha ẹrọwọ gbe uyoyou nọ a wo kẹ Ọghẹnẹ. (Ol. 15:1, 2; 121:5) Enọ e be gọ Ọghẹnẹ hẹ a riẹ kpahe oria nana ha. Oria nana Jihova ọ be jọ thọ enọ e be jọ udu rai ta nnọ: ‘Whẹ họ Ọghẹnẹ mẹ, ọnọ me re fievahọ.’ Ma tẹ daji oria adhẹzọ nana, ozọ u re gbe mu omai hi inọ ma ti kie no aro Ọghẹnẹ, ma ve ti kie fihọ ẹta Setan, “okpe-emevra” na.
12. Eware vẹ e be gwọlọ raha usu mai kugbe Ọghẹnẹ?
12 Eware vẹ e be gwọlọ raha usu mai kugbe Ọghẹnẹ? Ọso-ilezi na ọ fodẹ eware buobu, ejọ họ “ẹyao ọgaga nọ o re vo nọ ọ be nya eva aso; [gbe] ẹyao no o re kpe eva udevie uvo.” (Ol. 91:5, 6) “Okpe-emevra” na ọ rehọ ẹzi mẹrẹjọmẹsa su ahwo buobu thọ nọ. (2 Kọr. 11:3) Ọ be jẹ rehọ uvo-uthei, omoya, gbe isiuru-ekwakwa-efe su ahwo thọ. U te no enana no, ọ be rehọ omarọkẹ orẹwho ohwo, eghrorotha, gbe egagọ erue su ahwo thọ re. (Kọl. 2:8) Setan o te je su ahwo buobu kie ruọ ẹta ọfariẹ-ogbe no. Eware iyoma itieye na nọ e wọhọ ẹyao ọgaga nọ o re vo na i gele ima ahwo buobu kie no egagọ Ọghẹnẹ no.—Se Olezi 91:7-10; Mat. 24:12.
Yọrọ Uyoyou Ra kẹ Ọghẹnẹ
13. Ẹvẹ Jihova ọ be rọ thọ omai no eware nọ i re ru omai kie no egagọ riẹ?
13 Oghẹrẹ vẹ Jihova ọ be rọ thọ ahwo riẹ no eware nọ ma jọ obehru fodẹ na? Olezi na o ta nọ: “Ọ rẹ te juzi kẹ ikọ-odhiwu riẹ fiki ra re a sẹro ra eva edhere kpobi.” (Ol. 91:11) Ikọ-odhiwu a be kpọ jẹ thọ omai re ma sai whowho emamọ usi na. (Evia. 14:6) U te no ikọ-odhiwu no, ekpako ukoko a be rọ ẹkwoma iwuhrẹ rai nọ i no Ebaibol ze rọ thọ omai re iwuhrẹ erue e siọ omai ba esu thọ. A re fi obọ họ kẹ enọ e be daoma re a sioma no iruemu akpọ. (Tait. 1:9; 1 Pita 5:2) Ofariẹ, ‘ọrigbo nọ o wo ẹrọwọ avọ areghẹ na’ ọ be k’omai emuore abọ-ẹzi nọ o rẹ thọ omai no iwuhrẹ eghrorotha, isiuru ọfariẹ-ogbe, ilale efe gbe okpodẹ, avọ eware iyoma efa buobu. (Mat. 24:45) Eme o fi obọ họ kẹ owhẹ no whaha eware iyoma nana jọ?
14. Ẹvẹ ma sai ro wo erere no ithubro nọ Jihova ọ be k’omai ze?
14 Eme ma re ru otẹrọnọ ma gwọlọ daji “oria Oride” Ọghẹnẹ na? Wọhọ epanọ ma rẹ gwọlọ thọ oma mai no asidẹnte, ohwo-ugbarugba hayo ẹyao ẹsikpobi na, ere ma rẹ daoma ẹsikpobi re ma thọ oma mai no eware nọ e rẹ raha usu mai kugbe Ọghẹnẹ. Fikiere, ma rẹ rọ oma mai kẹ ithubro nọ Jihova ọ be k’omai ẹkwoma ebe, iwuhrẹ ukoko gbe ikokohọ. Ma rẹ nya bru ekpako na re a k’omai ohrẹ. Kọ ma gbe bi wo erere no oghoghẹrẹ iruemu iwoma nọ inievo mai i bi dhesẹ ze? Evaọ uzẹme, omakugbe inievo ukoko na o rẹ lẹliẹ omai wo areghẹ.—Itẹ 13:20; se 1 Pita 4:10.
15. Eme o kẹ owhẹ imuẹro inọ Jihova ọ rẹ sae thọ owhẹ no oware kpobi nọ o rẹ sae raha ẹgbakiete ra?
15 U mu omai ẹro ziezi inọ Jihova ọ rẹ sae thọ omai no oware kpobi nọ o rẹ sae raha ẹgbakiete mai. (Rom 8:38, 39) Ọ thọ ukoko na no obọ isu egagọ gbe erọ egọmeti no enọ e be gwọlọ hẹriẹ omai no Ọghẹnẹ ọfuafo mai na. Eyaa nọ Jihova ọ yaa na i rugba no inọ: “Ekuakua ẹmo ọvo nọ a gali vi owhai nọ i re wo iruo e [rrọ] họ.”—Aiz. 54:17.
Ono Ọ te Kẹ Omai Ufuoma?
16. Fikieme akpọ nana ọ gbẹ sae rọ k’omai ufuoma ha?
16 Kọ ma tẹ rrọ idibo Jihova yọ ma rehọ ifi gba oma mai no? Ijo, ukpoye kọ ohwo nọ ọ rrọ obọ akpọ ọye ọ rọ ifi gba oma riẹ. Akpọ nana o kiuke ku Jihova no, yọ Ẹdhọ, ọnọ ọ rrọ eva gaga na, ọye o bi su ei. (Jọn 14:30) Wọhọ oriruo, akpọ Ẹdhọ ọ be rehọ ekwakwa efe rọ rehọ ifi gba ahwo. (Wawo Eviavia 13:16, 17.) Uzioraha o rẹ sai je fi ohwo họ igbo. (Jọn 8:34; Hib. 3:13) Fikiere o tẹ make rọnọ enọ e riẹ Ọghẹnẹ hẹ a be ta nọ re a yere uzuazọ odode o rẹ lẹliẹ ohwo wo ufuoma, enọ e gaviezọ kẹ ai kpobi a te ruẹ nọ igbo a rrọ na.—Rom 1:24-32.
17. Didi ufuoma Jihova ọ rẹ k’omai?
17 Evaọ abọdekọ riẹ, ma te fievahọ Jihova, ọ te thọ omai no oware kpobi nọ o rẹ sae wha enwoma se omai. Evaọ idhere jọ, uyero mai o wọhọ orọ ohwo nọ o fi uzuazọ riẹ họ obọ emamọ edọkita jọ re o siwi ekpehre ẹyao nọ o be kẹe uye. Ekpehre ẹyao jọ o rrọ omai kpobi oma, koyehọ uzioraha nọ ma reuku riẹ. Ma te fi uzuazọ mai họ obọ Jihova fiki idhe ẹtanigbo Kristi, ẹsiẹe ma sai ro wo ẹruore inọ ma ti wo ufuoma no uzioraha jẹ ria bẹdẹ bẹdẹ. (Jọn 3:36) Wọhọ epanọ ma re fievahọ edọkita nọ ma te bi yo inọ ọ riẹ iruo ziezi na, ere eva nọ ma fihọ Jihova e rẹ ga nọ ma bi wuhrẹ kpahe iẹe na. Fikiere, ma rẹ roma totọ wuhrẹ Ebaibol keme oye u ti fi obọ họ k’omai you rie, ozọ u gbe ti mu omai hi re ma gọe.—1 Jọn 4:18.
18. Irere vẹ enọ e rrọ idibo Jihova a ti wo?
18 Jihova ọ kẹ ahwo kpobi ufuoma nọ a rẹ rọ salọ onọ a gwọlọ ru. Ebaibol e ta nnọ: ‘Wha salọ uzuazọ, re whai avọ emọ rai a ruẹse zọ, wha you ỌNOWO na Ọghẹnẹ rai.’ (Izie. 30:19, 20) Ọ gwọlọ nọ ma rọ udu obọ mai gọe, onọ u re dhesẹ nọ ma gine you rie. Ma tẹ rrọ idibo Jihova yọ ma rọ ifi gba oma mai hi rekọ oghọghọ ọvo ma rẹ jariẹ wo.
19. Fikieme o rọ rrọ aruoriwo inọ mai yọ idibo Jihova?
19 Fikinọ ma gba ha, ma te ahwo nọ e rẹ jọ idibo Ọghẹnẹ ọgbagba na ha. Fiki aruoriwo Ọghẹnẹ onana o sae rọ lọhọ. (2 Tim. 1:9) Fikiere, Pọl o kere nọ: “Ma tẹ rọ uzuazọ, ma rọ uzuazọ kẹ Ọnowo na, ma te whu, ma whu kẹ Ọnowo na; fikiere ma zọ, hayo ma whu, yọ mai erọ Ọnowo na.” (Rom 14:8) Ma te vioja vievie he nọ ma rọ salọ inọ idibo Jihova ma rẹ jọ.
Ẹvẹ Whọ te k’Uyo?
• Irere vẹ i re te ọnọ ọ rrọ odibo Jihova?
• Fikieme ma be sai ro ru oware nọ Ọghẹnẹ ọ gwọlọ mi omai?
• Ẹvẹ Jihova ọ be rọ thọ idibo riẹ?
[Enọ Uwuhrẹ]
[Iwoho nọ e rrọ ẹwẹ-obe avọ 8]
Nọ amọfa kpahe irere nọ a wo no fikinọ a rrọ idibo Jihova
[Uwoho nọ o rrọ ẹwẹ-obe avọ 10]
Idhere jọ vẹ Jihova ọ be rọ thọ omai?