Kwikala Bonka Ba Yehova—I Buntu
Kwikala Bonka Ba Yehova—I Buntu
‘Tudi bonka ba Yehova.’—LOMA 14:8.
1, 2. (a) Le i dyese’ka dyotudi nadyo? (b) Le i bipangujo’ka byotusa kubandaula?
DYĀDI dyese dikatampe dyāpelwe muzo wa Isalela pēbanene Yehova amba: “Mukangikadila kileme kyami amiwa mwine mubukata mwa bantu bonsololo.” (Div. 19:5) Dyalelo, boba badi mu kipwilo kya Bwine Kidishitu nabo badi na dyese dya kwikala bā Yehova. (1 Pet. 2:9; Kus. 7:9, 14, 15) Dino i dyese dyotukokeja kumwena’mo nyeke.
2 Nansha kwikala ba Yehova byodidi dyese, kadi i kiselwa. Bamo bakokeja kwiipangula amba: ‘Lelo nsa kubwanya kulonga binsakila Yehova? Le shi nalonga bubi, abulwepo kundekelela? Lelo kwikala wa Yehova kukambudija bwana-pabo?’ Ke bibipo kulanga uno muswelo. Ino dibajinji, kudi kipangujo kikwabo kifwaninwe kuta’ko mutyima bininge: Lelo i tumweno’ka tudi mu kwikala ba Yehova?
Kwikala ba Yehova Kutwala ku Nsangaji
3. Lelo Lehaba wāmwenine namani mu butyibi bwandi bwa kwingidila Yehova?
3 Lelo bantu ba Yehova bamwenanga mu ngikadilo yabo? Tala kimfwa kya Lehaba, wabwitwa wādi mu Yediko wa kala. Ne kutatana kwine mpika wātamijibwe mu mutōtelo mukobakane wa baleza ba mu Kenani. Ino paāivwene amba Yehova washindila Bene Isalela, wāitabije’mba Yehova i Leza wa bine. O mwanda wātūdile būmi bwandi mu kyaka pa kukinga batongwe ba Leza ne kutūla būmi bwandi bwa kumeso mu makasa abo. Bible unena’mba: “Lelo Lehaba, wabwitwa, nandi kabingilepo pa mīngilo ya pa kusepelela yoya mikendi pēbakonkolwele ku dishinda dikwabo’ni?” (Yak. 2:25) Langa’po byabuyabuya byaāmwene kitatyi kyaādi katelwa mu bantu ba Leza bakubulwa disubi, bantu bafundijibwe na Mukanda wa Bijila bya Leza mu mashinda a buswe ne boloke. Bine, i uno wāsangele’po kasha pa kuleka būmi bwandi bwa kala! Wāsongelwe na Mwine Isalela ne kulela mwanandi, Boaza, wāikala ke muntu mutumbe wa Leza.—Yos. 6:25; Luta 2:4-12; Mat. 1:5, 6.
4. Lelo Luta wamwenine namani mu butyibi bwa kwingidila Yehova?
4 Luta mwine Moabu nandi wākwete butyibi bwa kwingidila Yehova. Mobimwekela, pa bwanuke wadi utōta Kemoshi ne baleza bakwabo ba Moabu, inoko wāyukile Leza wa bine, Yehova, ne kusongwa wāsongwa na Mwine Isalela wāendele kukashikata mu yabo ntanda. (Tanga Luta 1:1-6.) Kupwa, pātalukile Luta ne mukao nandi Olepa, kebenda na inabo-muko Naomi ku Betelema, Naomi wānena bano bansongwakaji bakalubuke. Ke kyādipo kipēla kobadi kwikala mu Isalela. Aye Olepa wādi ke “mujoke wenda ku bantu bandi ne ku kilezaleza kyandi,” ino Luta kakajokelepo. Wālongele mungya lwitabijo lwandi kadi wādi uyukile mwine waādi usaka kutelelwa. Wāsapwidile Naomi amba: “Kokinsashilapo kukuleka ne kwaluka kwa kukulonda; mwanda koenda abe, nami e ko nkenda; kadi kolāla abe, nami e ko nkalāla; bobe bantu bakekalanga bami bantu, ne obe Leza ye wami Leza.” (Luta 1:15, 16) Pa mwanda wa butongi bwaātongele kwingidila Yehova, Luta wāmwenine mu Mukanda wa Bijila wa Leza, wādi mutūle’ko mpango itala bakaji ba kishala, balanda ne boba bampikwa ntanda. Wātene nsangaji, kukingwa ne mutyima-ntenke mu mapapa a Yehova.
5. Lelo i bika byojingulwile pa mwanda utala bantu bengidila Yehova na kikōkeji?
5 Padi uyukile bantu bamo pa kupwa kwipāna kudi Yehova bamwingidilanga na kikōkeji pano ke padi makumi a myaka. Wibepangule i byabuyabuya ka byobamwenine mu kumwingidila. Nansha bonso byokebabulwangapo makambakano, bukamoni bubingija na bukomo binenwa bya mulembi wa mitōto bya amba: “I binebine, kebo ba nsangaji yabo, shabo, boba bantu ba Leza wabo i Yehova.”—Mit. 144:15.
Bujalale bwa Yehova mu Byasaka Kotudi
6. Le mwanda waka ketufwaninwepo kwakamwa amba ketubwanyapo kulonga bitusakila Yehova kulonga?
6 Padi kodi mwiipangule shi ukakokeja kulonga bikusakila Yehova. I kipēla kulanga’mba kwingidila Yehova, kulonda bijila byandi, ne kwisamba mu dyandi dijina i kiselwa kilēma. Kimfwa, Mosesa pa kutumwa na Yehova, wēmwene’mba kabwanyapo kwisamba kumeso a Bene Isalela ne na mulopwe wa Edipito. Ino Leza kābudilwepo bujalale mu byaādi usaka Mosesa kulonga. Yehova ‘wāmulombwele kya kulonga.’ (Tanga Divilu 3:11; 4:1, 10, 13-15.) Mosesa byaāitabije bukwashi bwāmupelwe, wāmwenine nsangaji idi mu kulonga kiswa-mutyima kya Leza. Yehova udi na bujalale ne mu byaetusakila kulonga. Uyukile kubulwa kubwaninina kwetu, ne usakanga kwitukwasha. (Mit. 103:14) Kwingidila Leza bu mulondi wa Yesu kwitutūjanga pa kyaba kya kwitulēmena, mwanda bakwabo bamwenanga mu būmi bwa uno muswelo kadi busangajanga mutyima wa Yehova. Yesu wānene amba: “Iyai kwami . . . nabya nami nkemutukija’byo biyampe. Twela mu lupungu lwami lwa bu-umpika, muboīle manwa kudi ami, ke-ne-muntu amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe.”—Mat. 11:28, 29.
7. Mwanda waka ukokeja kukulupila’mba Yehova ukakukwasha ulonge byobya byasaka?
7 Yehova uketupa nyeke bukankamane botusakilwa, kitatyi kyonso kyotumukulupila mwanda wa kwitukomeja. Kimfwa, Yelemiya kādipo muneni wampikwa moyo tamba kibutwila. O mwanda, Yehova pa kumutuma ekale ke mupolofeto wandi, Yelemia wānene amba: “A Mfumwetu Leza! Talapo bidi, nkikōkejapo kwisamba: mwanda ne mwanuke.” Kadi, wānene ne kunena’mba: ‘Nkikesambepo monka mu dijina dyandi.’ (Yel. 1:6; 20:9) Ino, na bukankamane bwa Yehova, Yelemia wābwenye kusapula mu myaka 40 musapu wādi upelwa na bantu. Yehova wāmukulupije misunsa mivule amba: “Ami ngidi nobe kukupandija ne kukunyongolola.”—Yel. 1:8, 19; 15:20.
8. Le tulombolanga namani amba tukulupile mudi Yehova?
8 Dyalelo Yehova ukokeja kwitukwasha tulonge byobya byasakila Bene Kidishitu kulonga, enka na mwaākomejeje ba Mosesa ne Yelemia. Kintu kya mvubu i kukulupila mudi Leza. Bible unena’mba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine; mu mashinda obe onso muyuke, kadi aye ukōlolanga tushinda tobe.” (Nk. 3:5, 6) Tulombolanga’mba tukulupile mudi Yehova kitatyi kyotwitabija bukwashi bwaetupa kupityila ku Kinenwa kyandi ne ku kipwilo. Shi tuleke Yehova aludike matabula a būmi bwetu, i kutupu kintu kiketukankaja kumukōkela.
Yehova Utele Mutyima Bantu Bandi Umo ne Umo
9, 10. Le i kukingwa kwa muswelo’ka kulailwe mu Mutōto 91?
9 Potulangulukila pa butyibi bwetu bwa kwipāna kudi Yehova, padi bamo balangalañanga pa kyaka kya kujilula, kwikala ke babitupu, ne kupelwa na Yehova. Twi ba dyese, mwanda Yehova witupanga byonso bya kwitukinga byotusakilwa mwa kulamina kipwano kyetu kikatampe kyotupwene nandi. Tutalei mokilombwedilwe mu Mutōto wa 91.
10 Uno mutōto ushilula namino: “Wikalanga pafīta pa Mwinemukatakatamwine, ukēkalanga mu mujiñinya wa Mwinebukomobonso. Nkemunenena Yehova na’mba aye i mpakala yami, i munsakwa mwami; wami Leza mo nkulupile. Ke-muntu ukakunyongolola ku kidiba kya utele’kyo.” (Mit. 91:1-3) Ubamone amba Leza i mulae kukinga boba bamuswile ne bamukululpile. (Tanga Mitōto 91:9, 14.) Le i kukingwa kwa muswelo’ka? Eyo, Yehova wākingile ku ngitu bengidi bandi bamo ba pa kala—kyaba kimo i mwanda wa kulama musuku kwādi kwa kutamba Meshiasa wālailwe. Inoko, bantu bavule bakwabo ba kikōkeji bākutyilwe mu bifungo, bamweshibwa malwa, ne kwipaibwa kulengejibwa na Dyabola mwanda wa kwibabombola baleke kukōkela Leza. (Bah. 11:34-39) Bāmwene bukankamane bobādi basakilwa pa kūminina ke-pantu Yehova wēbakingile ku mushipiditu kutyina bakajimija bululame bwabo. Nanshi, Mutōto wa 91 ukokeja kwivwanwa bu mulao wa kukingwa ku mushipiditu.
11. Le “pafīta pa Mwinemukatakatamwine” pashintulula bika, ne i bāni bakiñwanga’mo na Leza?
11 Nanshi “pafīta pa Mwinemukatakatamwine,” patelelwe na mulembi wa mitōto, pelekeja kukingwa ku mushipiditu. Pano pantu, boba bekele ne Leza bu bapempudi bandi bakiñwanga ku kintu kyo kyonso nansha muntu ye-yense usaka kona lwitabijo lwabo ne buswe bobaswele Leza. (Mit. 15:1, 2; 121:5) I pafīta mwanda bantu bampikwa kwitabija kebabwanyapo kwipajingulula. Pano, Yehova ukiñanga bantu banena’mba: ‘Wi wami Leza mo nkulupile.’ Shi twikale nyeke pa kino kinyemeno, ketudipo kyotulangila bininge amba tukabulwa kwitabijibwa na Leza potuponena mu kidiba kya Satana, mwine “utele’kyo.”
12. Lelo i byaka’ka bisaka kona kipwano kyetu na Leza?
12 Lelo i byaka’ka bisaka kona kipwano kyetu kikatampe kyotupwene na Leza? Mulembi wa mitōto utela byaka palapala, mubadilwa ne “lupupo lunanga mu fukutu . . . [ne] konakanya koneka dyuba umitwe.” (Mit. 91:5, 6) Yewa “utele’kyo” ke mukwate bavule mu kidiba kya kwisakila kwikala mu bwanapabo. (2 Kod. 11:3) Ukwatanga bakwabo na kwibatonwena ku makomwa-meso, ditatu, ne kusanswa bintu bya ku ngitu. Bakwabo nabo wibongolanga na milangwe mifwe pamo bwa ya kufwila ntanda, lufundijo lwa kwialamuna, ne mutōtelo wa bubela. (Kol. 2:8) Kadi bangi nabo i bakwatwe mu kidiba kya busekese bwa munyanji. Bino bipupo byonakanya ku mushipiditu i bilengeje bantu bavule bajimije buswe bobadi baswele Leza.—Tanga Mitōto 91:7-10; Mat. 24:12.
Lama Buswe Boswele Leza
13. Lelo Yehova witukiñanga namani ku byaka bikokeja kona būmi bwetu bwa ku mushipiditu?
13 Lelo Yehova ukiñanga namani bantu bandi ku bino byaka bya ku mushipiditu? Mutōto unena’mba: “Aye ukalaījanga bamwikeulu bandi padi abe, bakukulela mu mashinda obe onso.” (Mit. 91:11) Bamwikeulu betuludikanga ne kwitukinga mwa kusapwila myanda miyampe. (Kus. 14:6) Kutentekela pa bamwikeulu, bakulumpe Bene Kidishitu pa kwimanina pa Bisonekwa mu bufundiji bwabo, betukiñanga kutyina twakongolwa na milangwe ya bubela. Bakokeja kupāna bukwashi bwa pa fula ku muntu ye-yense ulonga bukomo bwa kunekenya ngikadilo ya bwine ntanda. (Tet. 1:9; 1 Pet. 5:2) Kadi “umpika wa binebine, udi na manwa” uletanga bidibwa bya ku mushipiditu mwanda wa kwitukinga ku lufundijo lwa kwialamuna, ku bongojani bwa bilokoloko bya busekese, kulondalonda bya bupeta ne ntumbo, ne ku bilokoloko ne bibidiji bibi kebibadika. (Mat. 24:45) Lelo i kika kyakukweshe ukomene’ko byaka bimo bimo mu bino’bi?
14. Lelo tukalonga namani pa kumwena mu bulami bwa Leza?
14 Le i bika byotufwaninwe kulonga mwa kwikadila nyeke “pafīta” pa Leza mwine ukinga? Enka na motufwaninwe kwikingila nyeke ku byaka bya ku ngitu, pamo bwa akishida, butapani, nansha kukwatwa na misongo, tufwaninwe kwendelela na kwikinga ku byaka bya ku mushipiditu. Nanshi, tufwaninwe kumwena nyeke mu buludiki bwitupa Yehova mu mabuku, ku kupwila ne ku bitango. Tukimbanga madingi a bakulumpe. Mwene tumwenanga ne mu ngikadila palapala ilombola banabetu Bene Kidishitu? Bine, kulamata ku kipwilo kwitukwashanga twikale bañeni.—Nk. 13:20; tanga 1 Petelo 4:10.
15. Mwanda waka ukokeja kukulupila’mba Yehova ubwanya kukukinga ku kintu kyo-kyonso kikokeja kukubudija kwitabijibwa na aye?
15 Ketudipo na bubinga bwa kutatena shi Yehova ubwanya kwitukinga ku kintu kyo-kyonso kikokeja kwitubudija kwitabijibwa na aye. (Loma 8:38, 39) I mukinge kipwilo ku balwana ba bipwilo ne ba kipolitike bankomokomo, kitungo kyabo ke kwitwipayapo, mhm, ino i kwitupalula kudi Leza wetu ujila. Mulao wa Leza i wa bine wa amba: “Nansha kipungwa, shi kyepi, shi kyepi, kyabundwa kibundilwa abe padi abe kekikafikapo biyampe.”—Is. 54:17.
Le I Ani Witupa Bwanapabo?
16. Mwanda waka ntanda keikokejapo kwitupa bwanapabo?
16 Lelo kwikala ba Yehova kwitubudijanga bwanapabo? Mhm, ino kwikala ba ntanda ko kuketubudija’bo. Ntanda i mipaluke kudi Yehova ne kuludikwa na leza wa kasusu umunine bantu bupika. (Yoa. 14:30) Kimfwa, ngikadilo ya bintu ya Satana ingidijanga makambakano a misokwe mwanda wa kubudija bantu bwanapabo. (Dingakanya Kusokwela 13:16, 17.) Bubi nabo bongolanga ne kumuna bantu bupika. (Yoa. 8:34; Bah. 3:13) Ino, nansha bampikwa kwitabija byo babwanya kulaya bwanapabo na kukankamika būmi bwampikwa kukwatañana na bufundiji bwa Yehova, ense wibevwana kakejepo kuponena mu bupika bwa bubi ne mu būmi bukobakane.—Loma 1:24-32.
17. Lelo Yehova witupanga bwanapabo’ka?
17 Ku mutamba mukwabo, Yehova uketunyongolola ku kintu kyo-kyonso kikokeja kwitulonga bibi shi twipāne kwadi. Kyaba kimo, ngikadila yetu idi bwa ya muntu utūla būmi bwandi mu makasa a dokitele wa bwino ukokeja kumutalula mu ngikadilo ileta kyaka ku būmi bwandi. Batwe bonso tudi mu ngikadilo ileta kyaka ku būmi bwetu—bubi botupyene. Enka shi twipane kudi Yehova, kupityila pa kitapwa kya Kidishitu, nabya tukakulupila kupanda ku byobya bilupuka ku bubi ne kukekala na būmi bwa nyeke. (Yoa. 3:36) Monka motutaminijanga kikulupiji kyetu mudi dokitele pa kuyuka ntumbo yandi, ne kikulupiji mu Yehova nakyo kikatama shi twendelele kwifunda myanda yandi. O mwanda, twendelelei kwifunda Kinenwa kya Leza na katentekeji mwanda kiketukwasha tumusanswe mu muswelo uketutalula moyo onso wa kutyina kwikala bantu bandi.—1 Yoa. 4:18.
18. Lelo boba bekala ke ba Yehova bakemwena bika?
18 Yehova upanga bantu bonso bwanapabo bwa kutonga. Kinenwa kyandi amba: “Tonga bidi bumi amba wikale mumi, abewa ne lukunwa lobe lwine; mu kusanswa Yehova Leza obe.” (Kup. 30:19, 20) Witusakilanga tulombole buswe botumuswele na kutonga kumwingidila na bwanapabo. Pa kyaba kya kwituyata bwanapabo, kwikala ba Leza otusenswe bine kuketupa nsangaji ne kwitukwasha tulame’yo.
19. Mwanda waka kwikala bonka ba Yehova i buntu?
19 Byo tudi babipya-mambo, twi bampikwa kufwaninwa kwikala ba Leza mubwaninine. Bikokejika enka pa buntu bwa Leza. (2 Tem. 1:9) O mwanda, Polo wāsonekele amba: “Wivwane shi twikale bōmi, nabya i kudi [Yehova] ko twikadile bōmi. Shi i lufu nalo kadi, tufwilanga konka kudi [Yehova], penepo kadi, shi twikale bōmi, shi twikale bafwe, nabya tudi bonka bā Mfumwetu.” (Loma 14:8) Bine ketukealakanyapo nansha dimo pa kutonga kwikala ba Yehova.
Usa Kulondolola Namani?
• Lelo i tumweno’ka tudi mu kwikala ba Yehova?
• I kika kinenenwa’mba tukokeja kulonga byobya bitusakila Leza?
• Lelo Yehova ukiñanga bengidi bandi namani?
[Bipangujo bya Kifundwa]
[Bifwatulo pa paje 15]
Ipangula bakwabo muswelo obamwenine mu kwikala ba Yehova
[Kifwatulo pa paje 16]
Lelo Yehova witukiñanga kupityila ku miswelo’ka imoimo?