Jeova Ej Kwalok An Joij ilo An Kõtlok bwe Jen Erom Armij ro An
Jeova Ej Kwalok An Joij ilo An Kõtlok bwe Jen Erom Armij ro An
“Kij dron Iroij.”—ROM 14:8.
1, 2. (a) Ta jerammõn eo eor iber? (b) Ta kajitõk ko jenaj etali?
JEOVA ear lelok ñõn ailiñ in Israel juõn jerammõn elap ke ear jiroñ ir: “Kom naj Aõ mweiuk e aurõk, jen ailiñ ko otemjej.” (Ex. 19:5) Ranin, ro rej uan congregation in Kristian rej bareinwõt bõk jerammõn eo ñõn erom armij ro an Jeova. (1 Pit. 2:9; Rev. 7:9, 14, 15) Ej juõn jerammõn me jemaroñ bõk tokjen jene ñõn indrio.
2 Ijellokin an juõn jerammõn ñõn uan armij ro an Jeova, men in ej bareinwõt juõn erro. Jet remaroñ lemnok: ‘Inaj ke maroñ kõmõne men eo Jeova ej kõtõmene jen iõ? Enaj ke ilok jen iõ ñe inaj jerawiwi? Ñe inaj erom juõn ian armij ro an Jeova, men in enaj ke kõmõn bwe in luji aõ anemkwoj?’ Eaurõk bwe jen etale kain lemnok rõt kein. Ak mokta, eor bar juõn kajitõk me eaurõk ñõn ar etale: Ta tokjen ko jej bõki ilo ar erom armij ro an Jeova?
Ar Erom Armij ro an Jeova Ej Tellok ñõn Mõnõnõ
3. Ewi wãwen Rehab ear bõk tokjen jen jokãlet eo an ñõn korijer ñõn Jeova?
3 Armij ro me rej erom ro dron Jeova, rej ke bõk tokjen jen wãwen eo rej iione? Lemnok kin Rehab, juõn kõra ekijoñ me ear jokwe ilo Jeriko. Ejelok berre, ke ear ridtolok, ear bõk kwonan ilo wãwen kabuñ ko retton an anij ko rewan ilo Kenean. Bõtab, ke ear roñ kin wãwen an kar Jeova jibõñ dri Israel ro ñõn bõk anjo ion dri kijirãte ro air, ear kile bwe Jeova ej Anij eo emol. Inem ear likit mour eo an ilo kauwatata bwe en maroñ kejbãrok armij ro an Jeova, kin men in ilju im jeklaj eo an ear ber ilo peir. Baibel eo ej ba: “Rehab, kõra ekijoñ eo, jab bareinwõt kowãnik e kin jerbal ko, ke e ar bõk ro dri jilik im jilkinlok ir ilo bar juõn ial ke?” (Jem. 2:25) Lemnok kin tokjen ko ear bõki ke ear uan armij ro an Anij me rar kabuñ ilo erreo, ro im rar katak jen Kien eo an Anij kin wãwen ko ñõn kwalok yokwe im ekajet jime. Emaroñ kar lukkun mõnõnõ bwe ear ilok jen wãwen mour eo an mokta! Ear belek juõn eman in Israel im ear katakin ladrik eo nejiiro, etan Boaz, ñõn erom juõn dri korijer emõn an Anij.—Josh. 6:25; Rut 2:4-12; Matu 1:5, 6.
4. Ewi wãwen Rut ear bõk tokjen jen jokãlet eo an ñõn korijer ñõn Jeova?
4 Kõra in Moab eo etan Rut ear bareinwõt kãlet ñõn an korijer ñõn Jeova. Ke ear drik, emaroñ kar kabuñ ñõn Kimosh im anij ko jet an Moab, bõtab tokelik ear katak kin Anij eo emol, Jeova, im ear belek juõn eman jen Israel, eo ear emakõt ñõn ailiñ eo an ñõn an bukot kejbãrok jen juõn ñitta elap ilo Israel. (Riit Rut 1:1-6.) Tokelik, ke Rut im Opra rar jino etal iben Neomai, jinen lõmaro beleir, ñõn Betleem, Neomai ear jiroñ irro bwe ren jeblak ñõn mweo imwiiro kinke enaj kar bin ñõn airro mour ilo Israel. Inem Opra ear “jeblak ñõn dri ailiñ ro an, im ñõn anij eo an,” ak Rut ear jab. Ear jerbale tõmak eo an im ear kõnan bwe en juõn ian armij ro an Anij. Ear jiroñ Neomai: “Kwon jab akwelap ñõn iõ bwe in illok jen yuk, ak jeblak jen aõ lor yuk; bwe ijo kwoj ilok ielok, I naj ilok ielok; im ijo kwoj jiboñõn, I naj jiboñõn, dri ailiñ ro am, re naj aõ dri ailiñ, im am Anij aõ Anij.” (Rut 1:15, 16) Kinke ear kãlet ñõn an korijer ñõn Jeova, Rut ear bõk tokjen jen Kien eo an Anij, me ear kõmõn juõn karõk ejejuan ñõn limaro ejelok beleir, ro rejeramel im ro ejelok air wãto. Iomin kejbãrok eo an Jeova, ear lo mõnõnõ im jokõne.
5. Ta eo kwar kile kin ro rej korijer ñõn Jeova ilo tiljek?
5 Kwomaroñ jela kajen ro me emwij air wujleplok mour ko air ñõn Jeova im iomin elõñ yiõ ko rej korijer wõt ñõn e ilo tiljek. Kajitõk ibeir kin ewi wãwen rar bõk tokjen jen air korijer ñõn e. Meñe rar iion abañ ko, rein rar kwalok bwe elap an mol nan kein an dri jeje sam ke ear je: “Emõnõnõ ro dri ailiñ ñe air Anij Jeova.”—Sam 144:15.
Jeova Ejjab Watõk jen Kij Men ko Jejjab Maroñ Kõmõni
6. Etke jejjab aikwij mijõk ñe jejjab maroñ kõmõne men eo Jeova ej kõtõmene jen kij?
6 Bwelen kwar lemnok bwe kwojjab maroñ kõmõne men eo Jeova ej kõtõmene jen yuk. Ñe kwoj lemnok kin am uan dri korijer ro an Anij, am aikwij mour ekkar ñõn kien ko an, im am konono ilo etan, men kein remaroñ lukkun kainebataik yuk. Ñõn wanjoñok, Moses ear lemnok bwe ear ejelok maroñ iben ke Jeova ear jilkinlok e bwe en konono ñõn dri Israel ro im kiñ eo an dri Ijipt ro. Ak Anij ear lemnok kin joñõn maroñ eo an Moses. Inem Jeova ear ‘katakin e ta eo en kõmõne.’ (Riit Exodus 3:11; 4:1, 10, 13-15.) Kinke Moses ear mõnõnõ in bõk jibõñ jen Jeova, ear lo lõñliñ ilo an kõtõbrõk ankilan Anij. Ilo ejja wãwen in wõt, ejjab le jen joñõn men eo Jeova ej kõtõmene jen kij. Jeova emelele bwe jejjab wãppen, im ekõnan jibõñ kij. (Sam 103:14) Ar jerbal ñõn Anij einwõt juõn dri kaloran Jisõs ej menin kaemololo im ejjab kabwerer kinke wãwen mour rõt in ej bõktok tokjen ko ñõn ro jet im ej bareinwõt kamõnõnõik buruen Jeova. Jisõs ear ba: “Itok ñõn iba, . . . im I naj kakijeik kom. Komin bõk Aõ ine im likite i aerami, im katak iba; bwe Ij inemõn im etã buruõ.”—Matu 11:28, 29.
7. Etke kwomaroñ liki bwe Jeova enaj jibõñ yuk ñõn kõmõne men eo ej kõtõmene jen kwe?
7 Ien otemjej Jeova enaj letok ñõn kij rejañ eo jej aikwiji, elañe jej atartar wõt ion bwe en kakajur kij. Ñõn wanjoñok, Jeremaia ear jab juõn eo eberan in konono. Eñin unin, ke Jeova ear kãlet e bwe en dri kanan eo An, Jeremaia ear ba: “O Iroij Anij, ijaje ta eo in ba, kinke ña ij ajiri wõt.” Tokelik, ear bareinwõt ba: ‘Iban bar konono ilo etan.’ (Jerm. 1:6; 20:9, UBS) Bõtab, kin rejañ eo jen Jeova, Jeremaia ear maroñ kwalok kin ennan eo me ro jet rar jab kõnan roñjake iomin 40 yiõ ko. Elõñ alen Jeova ear kainemõn e kin nan kein: “Inaj bed ibbam im kejbarok yuk.”—Jerm. 1:8, 19; 15:20, UBS.
8. Ewi wãwen ar kwalok bwe jej liki Jeova?
8 Einwõt an kar Jeova kakajur Moses im Jeremaia, emaroñ jibõñ kij ñõn kõmõni men ko ej kõtõmene jen dri Kristian ro ranin. Men eo eaurõk ej bwe jen atartar ion Anij. Baibel eo ej ba: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am.” (Ken. 3:5, 6) Jej kwalok ar liki Jeova ñe jej kortokjen jibõñ eo ej letok ñõn kij ikijen Nan eo an im congregation eo. Elañe jej kõtlok bwe Jeova en tel kij ilo mour eo ar, ejelok juõn men enaj bõprae kij jen ar tiljek ñõn e.
Jeova Ej Kea kin Armij ro An Kajjojo
9, 10. Kain rõt kejbãrok eo Sam 91 ej kalimur kake?
9 Ke rej kalomõnlokjen kin bebe eo air ñõn wujleplok ir mõke ñõn Jeova, bwelen jet remaroñ uõta elañe renaj jerawiwi, an naj ejelok tokjeir, im an Jeova naj ilok jen ir. Ej juõn men ekamõnõnõ ñõn jela bwe Jeova ej letok ñõn kij aolep men ko jej aikwiji ñõn kejbãrok kõtan eo ar aurõk iben. Jen lale ewi wãwen Sam 91 ej kwalok kin men in.
10 Nan ko jinoin ilo sam in ej ba: “Eo ej jokwe ilo jikin etino an Eo eutiejtata, e naj berwõt iomin lurin Eo dri kajur otem kajur. I naj ba kin Jeova e aõ likepijñõk im aõ me; aõ Anij, I naj liki E. Bwe E naj kõtlok yuk jen aluk an dri ane.” (Sam 91:1-3) Alikar, Anij ej kalimur bwe enaj kejbãrok ro rej yokwe im liki e. (Riit Sam 91:9, 14.) Kain kejbãrok rõt eo ear konono kake? Ilo ien ko etto, Jeova ear kejbãrok mour eo an jet ian dri korijer ro an, im juõn ian un ko ear kõmõne men in ej ñõn kejbãrok menmenbwij eo me Messaia eo enaj kar waloktok jene. Bõtab, elõñ ian dri korijer ro retiljek an Anij rar ber ilo kalbuj, rar iion matõrtõr, im kar mõn ir kinke dri kijirãt ro air rar kõnan kabwer ir jen air tiljek wõt ñõn Anij. (Hib. 11:34-39) Ear or air beran ñõn kijenmij kinke Jeova ear kejbãrok ir ilo jitõb bwe ren maroñ drebij wõt air tiljek ñõn e. Kin men in, jemaroñ bõk melele eo bwe kalimur eo me Sam 91 ej konono kake ej kin kejbãrok eo ilo jitõb.
11. Ta “jikin etino an Eo eutiejtata,” im wõn ro Anij ej kejbãrok ir ilo jikin in?
11 Kin men in, “jikin etino an Eo eutiejtata,” me dri jeje sam ear konono kake, ej kõkkar kin jikin eo jej bõk kejbãrok ilo jitõb. Ilo jikin in, ro rej ber iben Anij rej bõk kejbãrok jen jabrewõt men ak armij me ej kajeoñ in kokkure tõmak im yokwe eo air ñõn Anij. (Sam Ko 15:1, 2; 121:5) Ej juõn jikin etino kinke ro rejjab tõmak rejjab maroñ kile. Ilo ijin, Jeova ej kejbãrok ro me ej einwõt ñe rej ba: ‘Kwe aõ Anij eo inaj liki.’ Elañe jej berwõt ilo jikin kone in, jejjab aikwij lukkun inebata kin ar naj luji buñburu eo an Anij ñe jenaj bo ilo aujir eo an Setan, “dri ane” eo.
12. Ta men ko rekauwatata remaroñ kokkure kõtan eo ar iben Anij?
12 Ta men ko rekauwatata me remaroñ kokkure kõtan eo ar eaurõk iben Anij? Dri jeje sam ear kwalok kin jet iair, einwõt “mij eo ej etetal ilo marok . . . [im] kokkure ej jerbal ke e loliñ al.” (Sam 91:5, 6) Elõñ armij ro rar bo ilo aujir eo an “dri ane” eo kin kõnan eo ekibbon kin anemkwoj. (2 Kor. 11:3) Ej kabo jet ilo an kowõnmanlok jitõbõn kibbon, utiej buru, im arõk mweiuk. Im ej kejebwãbweik ro jet ikijen lemnok ko ñõn koutiej ailiñ ko air, kin tõmak eo bwe armij rar waloktok jen menin mour ko (evolution), im ikijen kabuñ wan. (Kol. 2:8) Im elõñ rar bo ilo aujir eo kin mour in lũñ. Men kein me rekauwatata ñõn mour in jitõb eo ar rar kõmõn bwe elõñ million armij ro ren luji yokwe eo air ñõn Jeova.—Riit Sam 91:7-10; Matu 24:12.
Kejbãrok Yokwe eo Am ñõn Anij
13. Ewi wãwen Jeova ej kejbãrok kij jen men ko rekauwatata me remaroñ kokkure mour in jitõb eo ar?
13 Ewi wãwen Jeova ej kejbãrok armij ro an jen men ko rekauwatata ñõn mour in jitõb eo air? Sam eo ej ba: “E naj jiroñ enjel ro An kin kwe, bwe ren kejbãrok yuk ilo ial ko am otemjej.” (Sam 91:11) Enjel ro ilõñ rej tel im kejbãrok kij bwe jen maroñ kwalok kin nuuj eo emõn. (Rev. 14:6) Ijellokin enjel ro, ilo an Kristian elder ro kajerbal Baibel eo ñe rej katakin kij, men in enaj jibõñ ñõn kejbãrok kij jen lemnok ak katak ko rewan. Remaroñ lelok jibõñ ñõn jabrewõt eo ej kate e ñõn anjo ion lemnok im mõm ko an lõl. (Tait. 1:9; 1 Pit. 5:2) Bareinwõt, “dri korijer e tiljek im meletlet” ej letok ekan ko ilo jitõb ñõn kejbãrok kij jen katak eo bwe armij rar waloktok jen menin mour ko, jen mõm ko an kõniek, jen jibarbar ko ñõn mweie im buñbuñ, im jen mõm im kilan ko jet rekauwatata. (Matu 24:45) Ta eo ear jibõñ yuk ñõn jumae men kein rekauwatata?
14. Ewi wãwen jemaroñ kortokjen menin kejbãrok eo Anij ej letok ñõn kij?
14 Ta eo jej aikwij kõmõne ñõn berwõt ilo ‘jikin eo etino’ an Anij ñõn bõk kejbãrok? Einwõt ar aikwij kejbãrok kij ien otemjej jen men ko rekauwatata, einwõt lanwõtwõt ko, dri nana ro, ak nañinmij ko, eindrein jej aikwij wõnmanlok wõt im kejbãrok kij jen men ko rekauwatata ñõn mour in jitõb eo ar. Kin men in, jej aikwij keini ar kortokjen tel eo an Jeova me ej letok ñõn kij ikijen buk ko im ilo kwelok ko an congregation im kwelok ko relap, im jen nan in kakabilek ko jej bõki jen elder ro. Jej bareinwõt bõk tokjen jen elõñ kain karkar ko me dri Kristian ro jeer im jãter rej kwaloki. Emol, ar kõmao iben congregation eo ej jibõñ kij bwe jen lolokjen.—Ken. 13:20; riit 1 Piter 4:10.
15. Etke kwomaroñ liki bwe Jeova emaroñ kejbãrok yuk jen jabrewõt men ko me remaroñ kõmõn am luji buñburu eo an?
15 Ejelok unin ar berre bwe Jeova emaroñ kejbãrok kij jen jabrewõt men ko me remaroñ kõmõn ar luji buñburu eo an. (Rom 8:38, 39) Ear kejbãrok congregation eo jen dri kijirãt ro jen kabuñ ko relap im kien ko me mejenkajik eo air, ejjab ñõn mõn kij, ak ej ñõn kijbil kij jen Anij eo ar ekwojarjar. Ear mol kalimur in an Jeova bwe: “Jabrewõt ken tõrinae emwij nawãwen nae yuk, e jamin jerammõn.”—Ais. 54:17.
Wõn eo Ej Kanemkwoj Kij?
16. Etke lõl ejjab maroñ letok ñõn kij anemkwoj?
16 Ar erom ro dron Jeova, enaj ke kõmõn bwe jen luji ar anemkwoj? Ilo mol, ar erom mõtõn lõl enaj kõmõn bwe jen luji ar anemkwoj. Lõl in ejenolok jen Jeova im ej ber iomin kajur eo an juõn anij elej, eo ej kamakokoik armij ro. (Jon 14:30) Ñõn wanjoñok, jukjuk im ber in an Setan ej kajerbal abañ ak ijjibed ko ikijen mõnni ñõn kõmõn bwe armij ren luji air anemkwoj. (Keiri Reveles̃õn 13:16, 17.) Bareinwõt, jerawiwi emaroñ etaouk armij ro ñõn kamakokoik ir. (Jon 8:34; Hib. 3:13) Inem meñe ro ejelok air tõmak remaroñ kalimur bwe kwonaj anemkwoj, ñe rej kareelel kin juõn wãwen mour me ej nae katak ko an Jeova, jabrewõt eo ej lor ir, enaj mõkõj an kile bwe ej dri kamakoko ñõn juõn wãwen mour ejerawiwi im nana.—Rom 1:24-32.
17. Ta anemkwoj eo Jeova ej letok ñõn kij?
17 Ijo turãjet, Jeova enaj kanemkwoj kij jen aolep men ko rekauwatata elañe jej lelok kij mõke ñõn e. Einwõt ñõn wanjoñok, wãwen eo iber ej einlok wõt ñe juõn armij ej likit mour eo an ilo pein juõn taktõ in mijmij ekabel, eo emaroñ jolok ak kanemkwoj e jen nañinmij eo an ekauwatata. Kij aolep jej ber ilo juõn wãwen ekauwatata kinke jej jolit jerawiwi. Wãwen eo wõt emaroñ or ar kejatrikrik ñõn anemkwoj jen tokjen ko rej walok jen jerawiwi im ñõn bõk mour indrio, ej ikijen ar lelok kij mõke ñõn Jeova, ion berberin katok in binmour eo an Kraist. (Jon 3:36) Einwõt an naj laplok ar liki juõn taktõ in mijmij ñe jejela kajen im wãwen an jerbal, eindrein liki eo ar ilo Jeova enaj laplok ñe jej wõnmanlok im katak kin e. Kin men in, jej wõnmanlok im lukkun katak kin Nan eo an Anij kinke men in enaj jibõñ kij ñõn yokwe e ilo juõn wãwen me enaj jolok mijõk eo ñõn erom ro dron.—1 Jon 4:18.
18. Ta tokjen eo enaj walok ñõn ro rej uan armij ro an Jeova?
18 Jeova ej lelok ñõn aolep armij ro anemkwoj in kãlet. Nan eo An ej ba: “Kwon kãlet mour bwe kwon mour wõt, kwe im ro ineõm; bwe kwon yokwe Jeova am Anij.” (Dut. 30:19, 20) Jeova ekõnan bwe jen kwalok bwe jej yokwe e ilo ar mõke kãlet ñõn korijer ñõn e. Ijellokin ar luji ar anemkwoj, ñe jej erom ro dron Anij eo jej yokwe, emol men in enaj kõmõn bwe jen mõnõnõ wõt.
19. Etke Jeova ej kwalok an joij ilo an kõtlok bwe jen erom armij ro an?
19 Kinke kij armij dri jerawiwi, ejjab tellokid ñõn ar uan ro dron Anij eo ewãppen. Ak joij eo an Anij ej kõtlok bwe men in en maroñ walok. (2 Tim. 1:9) Kin men in, Paul ear je: “Elañe je mour, jej mour ñõn Iroij; ak elañe je mij, ñõn Iroij jej mij: inem elañe jej mour ak mij, kij dron Iroij.” (Rom 14:8) Alikar, jejamin ajlok kin jokãlet eo ar ñõn erom armij ro an Jeova.
Ewi Wãwen Kwonaj Uak?
• Ta tokjen ko rej itok jen ar uan armij ro an Jeova?
• Etke jemaroñ kõmõni men ko me Jeova ej kõtõmene jen kij?
• Ewi wãwen Jeova ej lelok kejbãrok ñõn dri korijer ro an?
[Kajitõk ko ñan katak]
[Kamelele in juõn pija ilo peij 8]
Kajitõk iben ro jet kin ewi wãwen rar bõk tokjen jen air erom armij ro an Jeova
[Kamelele in juõn pija ilo peij 10]
Ta jet ian menin kejbãrok ko Jeova ej litok ñõn kij?