Paam n lebg a Zeova rẽnd yaa zu-no-kãsenga
Paam n lebg a Zeova rẽnd yaa zu-no-kãsenga
‘Tõnd yaa a Zeova rẽnda.’—ROM 14:8.
1, 2. a) Bõe la kiris-nebã paamẽ tɩ yaa zu-zẽkr bũmbu? b) Sogs-bʋs la d na n leoke?
ISRAƐLL buudã ra paama zu-zẽkr tɛkẽ! Bala a Zeova ra yeel-b-la woto: “Yãmb na n lebga mam neb buudã fãa sʋka.” (Yik. 19:5) Rũndã-rũndã, kiris-neb hakɩkã me paama zu-zẽkr tɛkẽ, bala bãmb me yaa a Zeova rẽnda. (1 Pɩɛ. 2:9; Wil. 7:9, 14, 15) Woto yaa zu-noog sẽn tõe n naf-d wakat fãa yĩnga.
2 Yaa sɩd tɩ paam n lebg a Zeova rẽnd yaa zu-zẽkre, la a baooda modgre. Neb kẽer tõe n sokda b mens woto: ‘Rẽ yĩnga m na n tõog n maana bũmb nins a Zeova sẽn dat tɩ m maanã sɩda? La m sã n wa maan yel-wẽnde, a kõn yiis-m a nin-buiidã sʋka? Rẽ yĩnga mam sã n lebg a Zeova rẽnda, m na n le tõog n maana m yam bɩ?’ Segdame tɩ d bao n leok sogs-kãensã. La sokr a to la d segd n deng n leoke: F sã n paam n lebg a Zeova rẽnda, nafa bʋs la f paamda?
F sã n lebg a Zeova rẽnda, wata ne sũ-noogo
3. A Rahaab sẽn yãk yam n lebg a Zeova rẽndã, nafa bʋs la a paam-yã?
3 Rẽ yĩnga neb nins sẽn lebg a Zeova rẽndã rɩta rẽ yõod bɩ? Tẽeg-y pĩnd wẽndẽ Zeriko pʋg-yoodr a Rahaab yelle. Yaa vẽeneg t’a ra tũuda Kanaã wẽnnaam dãmbã wa a roagdbã, n da tʋmd b tũudmã tʋʋm-beed toor-toorã. La a sẽn wa n wʋm a Zeova sẽn fãag Israɛll nebã b bɛɛbã nusẽ to-to wã, a bãngame tɩ yaa a Zeova la Wẽnnaam sɩd-sɩdã. Rẽ kɩtame t’a sak n gẽneg a yõor n kogl Wẽnnaam nebã n wilg t’a teeg-b lame tɩ b fãag-a. Biiblã yeta woto: “A ka woto me tɩ pʋg-yoodr a Rahaab zems a tʋʋmã yĩnga, yẽ sẽn sik tẽn-gũusdbã n tʋm bãmb tɩ b tũ sor a to wã bɩ?” (Zak 2:25) Tẽeg-y bark nins a sẽn paamã. A wa n paam n naaga nin-buiid sẽn tũud Wẽnnaam wa a sẽn dat to-to wã. Nin-buiid Wẽnnaam sẽn zãmsd a tõodã, tɩ kɩt tɩ nonglem la tɩrlem be b sʋka. Vẽenega, a sũur tog n da nooma hal wʋsgo, a sẽn bas a pĩnd vɩ-yookã! A wa n kẽe kãadem ne Israɛll ned n dog a Boaaz sẽn yɩ wẽn-tũud hakɩkã.—Zoz. 6:25; Rut 2:4-12; Mat. 1:5, 6.
4. A Rut sẽn yãk yam n lebg a Zeova rẽndã, nafa bʋs la a paam-yã?
4 A Rut sẽn yit Moaabã me wa n yãka yam n tũ a Zeova. A pʋg-sademdẽ, wõnda a tũu Moaab wẽnnaam a Kemos la b wẽnnaam dãmb a taaba. La a wa n bãnga Wẽnnaam sɩd-sɩd a Zeova. A kẽe kãadem ne Israɛll ned a ye sẽn da tɩ vɩ b tẽngẽ wã. (Karm-y Rut 1:1-6.) Kaoosg zugẽ, a Rut ne a Orpa sẽn da wa n tũud b sɩdbã ma a Naomi n lebd Betlehɛmmã, a sagl-b lame tɩ ned kam fãa leb a ba yiri. Bala Israɛll zĩndg ra pa na n tɩ yɩ nana ne-b ye. A Orpa sakame n lebg n ‘kul a nebẽ la a wẽnnaam dãmbã nengẽ,’ la a Rut tõdgame. A wilgame t’a tara tẽebo, la t’a mii sẽn yaa Wẽnnaam ning la a rat n tũ wã. A yeela a Naomi woto: “Da pẽdg maam tɩ m lebg n bas foom ye. Tɩ bõe, zĩig ninga fo sẽn na n kẽngã, ma-me na n kẽnga be, la zĩig ninga fo sẽn na n sigã, ma-me na n siga be, la fo nebã na n yɩɩ mam neba, la fo Wẽnnaamã me na n yɩɩ mam Wẽnnaam.” (Rut 1:15, 16) A Rut sẽn yãk yam n na n tũ a Zeova wã, a paam n dɩɩ Wẽnnaam tõogã noy yõodo. Bala tõogã ra tara noy sẽn sõngd pʋg-kõapã, naong rãmbã la sẽn da pa tar-b pʋtã. A Rut sẽn lebg a Zeova rẽndã, a sɩd paama sũ-noogo, koglgo, la bãane.
5. Y sã n ges neb nins sẽn sɩng n tũud a Zeova hal sẽn kaoosã, bõe la y tõe n yeele?
5 Tõe tɩ y mii neb sẽn dɩk b mens n kõ a Zeova n maand a raabã hal sẽn na maan yʋʋm wʋsgo. Sok-y-b n ges nafa nins b sẽn paame. Yaa sɩd tɩ ned kae n pa tar zu-loees ye. La nafa nins Wẽnnaam nin-buiidã sẽn paamdã wilgdame tɩ yɩɩl-gʋlsdã sẽn yeel bũmb ningã sɩd yaa sɩda. A yeela a Zeova woto: “Neb nins fãa yãmb sẽn lilldã tara sũ-noogo.”—Yɩɩl 5:12.
A Zeova sẽn datã pa yɩɩd tõnd pãng ye
6. Bõe yĩng tɩ d pa segd n yɛɛs tɩ d pa na n tõog n maan a Zeova sẽn datã?
6 Tõe tɩ y yɛɛsda y na n wa pa tõog n maan bũmb nins a Zeova sẽn datã. Sɩd me, f sã n tags tɩ f sã n lebg a Zeova rẽnda, f segd n tũuda a noyã la f moond a koɛɛgã, f tõe n wa tẽedame tɩ f pa na n tõog ye. Wala makre, Wẽnnaam sẽn da wa n tʋm a Moiiz t’a tɩ taas a koees Israɛll nebã la Ezipt rĩmã, a tagsame tɩ tʋʋmdã yɩɩda yẽ nugu. La Wẽnnaam sẽn bobl-a tʋʋmd ningã yaool n da pa yɩɩd a pãng ye. A Zeova sõng-a lame, n ‘wilg-a a sẽn tog n maanega.’ (Karm-y Yikr 3:11; 4:1, 10, 13-15.) A Moiiz saka Wẽnnaam sõngrã, tɩ kɩt t’a paam sũ-noog wʋsg a raabã maaneg pʋgẽ. Rũndã-rũndã, a Zeova sẽn dat tɩ tõnd me maan bũmb ninsã pa yɩɩd d pãng ye. A miime tɩ tõnd yaa koangdba, n tʋll n sõng-do. (Yɩɩl 103:14) Ned sã n lebg a Zezi karen-biiga, pa bũmb sẽn weoog-da ye. A pʋd n paamda yolsgo, bala a soab vɩɩmã noogda a Zeova sũuri, la nafd neb a taabã. A Zezi yeela woto: “Bɩ y wa mam nengẽ, . . . la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana”—Mat. 11:28, 29.
7. Bõe yĩng tɩ y tõe n kɩs sɩd t’a Zeova na n sõng-y lame tɩ y tõog n maan a raabã?
7 D sã n kell n teeg a Zeova, a na n kõt-d-la pãng la raood sẽn na yɩl n tõog n maan a raabã. Ges-y-yã a Zeremi makrã. A ra yaa ned sẽn pa tõe goama. Rẽ n so t’a Zeova sẽn wa n yãk-a t’a na n yɩ a no-rɛɛsã, a leoka woto: “Zusoab a Wẽnnaam, mam ka mi goam ye, mam nan yaa biig bala.” A wa n pʋd n yeela woto: “M ka na n le togs Zusoabã yelle, wall m gom bãmb yʋʋr” yĩng ye. (Zer. 1:6; 20:9) La a Zeova kõo a Zeremi raoodo, t’a tõog n moon koɛɛg sẽn da pa noom a kɛlgdbã yʋʋm 40 tõre. A Zeova kenga a Zeremi pɛlg naoor wʋsg n yeel-a woto: “Mam bee ne foom n na n fãag foom.”—Zer. 1:8, 19; 15:20.
8. Wãn to la d wilgd tɩ d teega a Zeova?
8 Rũndã-rũndã, a Zeova tõe n sõnga tõnd tɩ d tõog n maan bũmb nins a sẽn baood tɩ kiris-nebã maanã, wa a sẽn sõng a Moiiz ne a Zeremi wã. La sẽn na yɩl t’a sõng-do, d segd n teeg-a lame. Biiblã yeta woto: “Teeg Zusoabã ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoabã yelle, la b na n demsa fo sorã.” (Yel. 3:5, 6) D wilgdame tɩ d teega a Zeova, d sã n sakd sagls la sõngr ning a sẽn kõt-d ne a Gomdã la ne tigingã maasmã. D sã n sak t’a Zeova na n wilgd-d sor wakat fãa, baa fʋɩ pa na n tõog n kɩt tɩ d pa tõog n maan a sẽn datã ye.
A Zeova sõngda a nebã ned kam fãa
9, 10. Yaa kogl-bʋg buud yell la Yɩɩl Sõamyã 91 soabã sẽn gomdã?
9 Tõe tɩ kẽer sẽn wa n dat n dɩk b mens n kõ a Zeova wã, b ra yɛɛsda b na n wa maan yel-wẽnde, t’a yiis-b a nin-buiidã sʋka. La zu-noogo, a Zeova kõt-d-la sagls sẽn na yɩl tɩ d tõog n kogl tõnd ne yẽ zoodã sẽn tar yõod wʋsgã. D ges Yɩɩl Sõamyã 91 soabã sẽn wilgd rẽ to-to.
10 Yɩɩn-kãng sɩngrẽ wã, a gʋlsdã yeela woto: “Ned ninga fãa sẽn zĩ Sẽn-ka-to zĩ-soalgdgã pʋgẽ paada Sẽn-tõe-yã-fãa wã maasmẽ. Mam yeta Zusoabã yaa: ‘Yãmb yaa mam zĩ-lilldga, la mam pãng zĩiga, la mam Wẽnnaam mam sẽn dellda.’ Tɩ bõe, bãmb fãagda foo ne tãoog ned sẽn bẽta.” (Yɩɩl 91:1-3) Dẽnd Wẽnnaam kãabame t’a na n kogla ned ninga fãa sẽn nong yẽ la sẽn teeg-a. (Karm-y Yɩɩl Sõamyã 91:9, 14.) La yaa kogl-bʋg buud yell la a sẽn gomdã? A Zeova kogla a neb kẽer pĩnd wẽndẽ tɩ b põs kũum. Wakat ninga, yɩɩ sẽn na yɩl n kogl Mesi wã yaab rãmbã roog n tãag a waoongo. La b yaool n namsa Wẽnnaam nin-buiidã kẽer sẽn na yɩl tɩ b bas Wẽnnaam sakre, n kẽes sãnda bi-bees rotẽ, hal n kʋ kẽer ne wẽnem b sẽn pa tõe n bilgi. (Heb. 11:34-39) La nin-kãensã paama raood n tõog toogo, bala a Zeova kogla b tẽebã tɩ b tõog n kell n sak-a. Dẽnd d tõe n yeelame tɩ Yɩɩl Sõamyã 91 soabã sẽn gomd koglg ning Wẽnnaam sẽn pʋlemd a nin-buiidã yellã yaa b tẽebã koglgo.
11. Wẽnnaam ‘Sẽn-ka-to zĩ-soalgdgã’ yaa bõe, la ãnd dãmb n paamd koglg be?
11 Woto wilgdame tɩ Yɩɩl-gʋlsdã sẽn boond-a soab tɩ ‘Sẽn-ka-to soabã zĩ-soalgdgã’ pa zĩig sɩd-sɩd ye. Yaa bũmb nins a Zeova sẽn maand a nebã tẽeb koglg yĩngã. A sẽn maand woto wã kɩtame tɩ ned bɩ bũmb pa tõe n paam neb nins sẽn tũud-a ne pʋ-peelmã tẽeb n komse, pa rẽ bɩ n kɩt tɩ b pa le nong-a ye. (Yɩɩl 15:1, 2; 121:5) Yɩɩl-gʋlsdã sẽn yeel tɩ yaa zĩig sẽn solgã, yaa tɩ ned sẽn pa tẽed Wẽnnaam pa tõe n paam kogl-kãng ye. A Zeova kogenda neb nins sẽn sɩd teeg-b yẽ n yetẽ t’a yaa b ‘pãng zĩig la b Wẽnnaam b sẽn delldã’ zĩ-soalgdg kãng pʋgẽ. D sã n kell n pa be, d pa tar bʋʋm n na n maan rabeem tɩ loog noore, d sẽn yɛɛsd tɩ d na n wa lʋɩ a Sʋɩtãan b sẽn bool tɩ “sẽn bẽt-a tãoogã” bẽdg pʋgẽ n kong Wẽnnaam lohorem yĩng ye.
12. Yel-bʋs n tõe n sãam zood ning d sẽn tar ne Wẽnnaamã?
12 Yel-bʋs n dat n sãam tõnd ne Wẽnnaam zoodã? Yɩɩl-gʋlsdã sõdga kẽere. Wala makre, a sõdga “bã-loangdg sẽn gõod lik pʋgẽ, . . . ne sãoong sẽn sãamd wĩnto-sʋka.” (Yɩɩl 91:5, 6) Sẽn bẽt-a “tãoogã” paama neb wʋsg ne soog-m-mengã ratem. (2 Kor. 11:3) A bẽda kẽer me ne rat-tɩ-loogã, wuk-m-mengã, la laogã nonglmã n paame. A tudgda sãnda me ne ninsaalb tagsgo. Wala makre, b sẽn sagend tẽng-n-biisã tɩ b segd n sak n ki b tẽngã yĩngã, b sẽn zãmsd nebã tɩ ãndũniyã bũmba fãa wa n bee woto balã, la ziri tũudmã zãmsg toɛy-toɛya. (Kol. 2:8) A belga neb kẽer me ne yoobã tʋʋm-beed toor-toor n paame. Yel-kãensã fãa sẽn yaa wa bã-wẽnsã sãama neb milyõ rãmb tẽebo, n kɩt tɩ b pa le nong Wẽnnaam ye.—Karm-y Yɩɩl Sõamyã 91:7-10; Mat. 24:12.
Y sẽn tõe n kogl zood ning y sẽn tar ne Wẽnnaamã to-to
13. Wãn to la a Zeova kogend-d ne yɛl nins sẽn tõe n sãam d tẽebã?
13 Wãn to la a Zeova kogend a nin-buiidã ne yɛl nins sẽn tõe n sãam b tẽebã? Yɩɩl Sõamyã 91 soabã yeta woto: “Bãmb kõta b malɛk rãmbã noor tɩ b gũ foom f soayã fãa zutu.” (Yɩɩl 91:11) Tõnd sã n wa moond koe-noogã, malɛgsã sẽn be saasẽ wã wilgd-d-la sore, la b kogend-do. (Wil. 14:6) Malɛgsã sõngrã toor sẽn ka be, kãsem dãmbã modgdame tɩ b sẽn zãmsd tõnd bũmb ninsã zemsd ne sɩd koɛɛgã sẽn be Biiblã pʋgẽ wã tɩ kogend-d ne tagsa sẽn yaa ziri, n tõe n menes-do. Sẽn paase, b tõe n sõnga kiris-ned ning fãa sẽn tar yel-manesem sẽn pa zemse, n maood n dat n base. (Tɩt 1:9; 1 Pɩɛ. 5:2) “Tʋm-tʋmd sẽn tũud sɩd la sẽn tar yamã” kõt-d-la sagl-sõma me sẽn kogend-d ne ziri buud toor-toore, la sẽn sõngd-d tɩ d gind yoobo, laogã nonglem, ziirã baoobo, la yɛl a taab sẽn sãamd tẽebo. (Mat. 24:45) Bõe n sõng yãmb tɩ y tõog n mao ne yel-kãensã?
14. Wãn to la d tõe n paam koglg ning Wẽnnaam sẽn kõtã?
14 Bõe la d segd n maan n tõog n kell n pa Wẽnnaam “zĩ-soalgdgã” pʋgẽ, n paam t’a kogend d tẽebã? D segd n maana wa d sẽn maand to-to n kogend d mens ne agsɩdã rãmbã, bi-beesã wall ne bãasã. D segd n gũusda wakat fãa. Rẽ n so tɩ d segd n tũud sagls nins a Zeova sẽn tũnugd ne d sɛbã, tigissã la tigis-kãsemsã n kõt-dã, la d tũud kãsem dãmbã saglse. Sẽn paase, d sẽn be ne d tẽed-n-taasã n yãt b zʋg-sõma toor-toorã, sõngd-d lame. Sɩd me, b tũud-n-taarã kɩtdame tɩ d lebgd yam dãmba.—Yel. 13:20; Karm-y 1 Pɩɛɛr 4:10.
15. Bõe yĩng tɩ y tõe n kɩs sɩd t’a Zeova tõe n kogl-y-la ne bũmb ning fãa sẽn tõe n kɩt tɩ y bas-a?
15 A Zeova tõe n kogl-d-la ne bũmb ning fãa sẽn tõe n kɩt tɩ d bas a tũubu. D yam pa segd n yo ne rẽ ye. (Rom 8:38, 39) Tũudum taoor dãmb la politikã nanambs kẽer namsa Wẽnnaam nin-buiidã hal n kʋ kẽere, la b raabã yaa kɩt tɩ d bas d Wẽnnaamã tũubu. La a Zeova kogenda a nin-buiidã. A sɩd pidsa a pʋlengã. A ra pʋlem-b-la woto: “Zab-teed nins fãa neb sẽn maand n na n zab ne foomã ka na n tõog ye.”—Ezai 54:17.
Ãnda n kõt tõnd paam-m-meng hakɩka?
16. Bõe yĩng tɩ dũniyã pa kõt ned paam-m-menga?
16 Rẽ yĩnga d sã n lebg a Zeova rẽnda, rat n yeelame tɩ d pa le so d meng baa bilf bɩ? Pa woto abada! Yaa d sẽn na n yaa dũniyã rẽnd la d pa so d mense, bala dũniyã neb zãaga b mens ne a Zeova, n sakd a Sʋɩtãan sẽn yaa wẽnem soab sẽn kẽesd neb yembd pʋgẽ wã. (Zã 14:30) Wala makre, a tũnugda ne a dũniyã ligd-baoodbã sigls n kẽesd nebã yembdo. (Ges-y Wilgr 13:16, 17.) Yel-wẽnã me belgda nebã tɩ b lebgd a yembse. (Zã 8:34; Heb. 3:13) Woto yĩnga, baa sẽn pa tẽed-b Wẽnnaamã sẽn sagend nebã tɩ b kɩɩs a Zeova noyã n vɩɩmd wa b sẽn dat tɩ rẽ la b so b mensã, ned sã n sake, pa na n kaoos la a mik t’a lebga vɩ-yook yamb ye.—Rom 1:24-32.
17. Paam-m-meng bʋg buud la a Zeova kõt tõndo?
17 D sã n kell n teeg a Zeova ne d sũy fãa, a na n pʋd n wa fãag-d-la ne bũmb nins fãa sẽn tõe n sãam d tẽebã wall d vɩɩmã. Tõnd yellã sẽn yaa to-to wã wõnda ned sẽn na n bẽed bãag sẽn namsd-a, tɩ b segd n wopeer-a, t’a tɩ kos logtor sẽn mi woperasɩõ maaneg sõma t’a tɩp-a. Tõnd fãa sẽn dog ne yel-wẽndã, yaa wa bãag sẽn namsd-do. Yaa d sẽn na n tik Kiristã maoongã zug n sak n dɩk d mens n kõ a Zeova bala, la d tõe n wa paam d mens ne yel-wẽndã biisi, n vɩɩmd wakat sẽn kõn sa. (Zã 3:36) D sã n paam kibay sẽn wilgd tɩ logtorã mii a tʋʋmdã sõma, d na n talla bas-yard ne-a n paase. Woto me, d sã n bãngd a Zeova n paasdẽ, d na n kɩs-a-la sɩd n paase. Rẽ n so tɩ d ket n wɩngd ne Wẽnnaam Gomdã zãmsg neere, bala yaa rẽ n kɩtd tɩ d nong Wẽnnaam wʋsgo, n pa le maand rabeem d sẽn yaa a rẽndã yĩng ye.—1 Zã 4:18.
18. Bõe la sẽn sakd-b n lebgd a Zeova rẽndã paamda?
18 A Zeova yeta ned kam fãa t’a yãk a sẽn date. A Gomdã yeta woto: ‘Bɩ y yãk vɩɩm tɩ yãmb ne y yagensã tõe n vɩɩmde. La y nong Zusoab a Wẽnnaam.’ (Tõo. 30:19, 20) A ratame tɩ d yãk yam n maan a raabã n wilg tɩ d nong-a lame. D sã n lebg Wẽnnaam ning d sẽn nongã rẽnda, pa rat n yeel tɩ d pa le tõe n maan d yam ye. Pʋd n na n kɩtame tɩ d paam sũ-noog wakat fãa yĩnga.
19. Bõe yĩng tɩ d yetẽ tɩ yaa Wẽnnaam nimbãan-zoeerã yĩng n kɩt tɩ d tõe n paam n lebg a rẽnda?
19 Tõnd sẽn yaa koangdbã yĩnga, d ra pa tõe n paam n yɩ Wẽnnaam sẽn zems zãngã rẽnd ye. Yaa Wẽnnaam nimbãan-zoeerã yĩng n kɩt t’a sak tɩ d tõe n yɩ a rẽnda. (2 Tɩm. 1:9) Rẽ n so t’a Poll yeel woto: “Tõnd sã n vɩ, tõnd vɩɩ Zusoabã yĩnga; la tõnd sã n ki, tõnd kiida Zusoabã yĩnga. Woto yĩnga, tõnd sã n vɩ wall tõnd sã n ki, tõnd yaa Zusoabã rẽnda.” (Rom 14:8) D sã n yãk yam n lebg a Zeova rẽndã, d pa na n tol n wa maan d bãngẽ ye.
Y na n leokame tɩ bõe?
• D sã n lebg a Zeova rẽnda, nafa bʋs la d paamda?
• Bõe n kɩt tɩ d tõe n maan bũmb nins Wẽnnaam sẽn datã?
• Bõe la a Zeova maand n kogend a nin-buiidã?
[Zãmsgã sogsgã]
[Foto, seb-neng 15]
Sok-y neb a taab n ges b sẽn sak n lebg a Zeova rẽndã sẽn naf-b to-to
[Foto, seb-neng 16]
Yɛl kẽer a Zeova sẽn tũnugd ne n kogend tõnd la bʋse?