Pagmaliw a Kien nen Jehova​—Sakey ya Agnaparaan a Kaabigan

“Kien itayo nen Jehova.”​—ROMA 14:8, NW.

1, 2. (a) Anto so pribilehyo tayo? (b) Antoray tepet a pantongtongan tayo?

AGAYLAN mablin pribilehyo so inyopresi ed nasyon na Israel sanen oniay imbaga nen Jehova ed sikara: “Sikayo ed satan so pabpablien ko a pinagka-kayamanan ko a manuna nen saray amin a totoo.” (Exo. 19:5) Ontan met natan, saray membro na Kristianon kongregasyon et walaan na pribilehyon magmaliw a kien nen Jehova. (1 Ped. 2:9; Apo. 7:9, 14, 15) Pribilehyo itan a pakagunggonaan tayo ed andi-anggaan.

² Aliwa labat a sakey a pribilehyo so pagmaliw a kien nen Jehova noagta sakey met a responsabilidad. Balet oniay pampapagaan na arum: ‘Nagawaan ko kasi iray iilaloan nen Jehova ed siak? No bilang ta mankasalanan ak, kasin ipulisay to ak? Kasin naandi lay kawayangan ko no kien ak la nen Jehova?’ Manepeg labat a pantongtongan tayo iratan. Balet, antis na satan et wala ni sananey a tepet a kaukolan tayon imanoen: Antoray gunggona ed pagmaliw a kien nen Jehova?

Panlapuay Liket so Pagmaliw a Kien nen Jehova

3. Panon ya agunggonaan si Rahab ed desisyon ton manlingkor ed si Jehova?

³ Talaga ta’n nagunggonaan iray totoo a kien  nen Jehova? Nengnengen tayo pay agawa nensaman ed si Rahab, sakey a balangkantis a taga Jerico. Seguradon abangonan toy marutak a panagdayew ed dirios diad Canaan. Balet, sanen abalitaan to iray impanalo na Israel diad tulong nen Jehova, amoria to a si Jehova so tuan Dios. Kanian inrisga toy bilay to pian protektaan so totoo na Dios tan impia toy bilay to’d sikara. Oniay ibabaga na Biblia: “Si Rahab a milalawanan agkasi apatunong lapu ed saray gawa to, nen inawat to so saray imbaki tan pinapaway to’ra ed sananey a dalan?” (Sant. 2:25) Nonoten pa labat iray bendisyon ed sikato sanen nagmaliw a kabiangan na totoon malinis so panagdayew da’d Dios, totoon diad panamegley na Ganggan na Dios et abangatan nipaakar ed inkamaaro tan inkahustisya. Seguradon agaylay liket to ta binenegan to lay datin kabibilay to! Sikatoy akiasawa ed sakey ya Israelita tan imbangat toy anak ton Boaz pian magmaliw a matakot ed Dios.​—Jos. 6:25; Rut 2:4-12; Mat. 1:5, 6.

4. Panon ya akagunggonaan nen Rut so desisyon ton manlingkor ed si Jehova?

⁴ Si Rut a taga Moab so sakey nin nandesisyon a manlingkor ed si Jehova. Sanen kalangweran to ni, nayarin sikatoy nandayew ed si Chemos tan arum niran dirios ed Moab. Balet naamtaan to a si Jehova so tuan Dios, tan sikatoy akiasawa ed sakey ya Israelitan nanayam ed dalin da. (Basaen so Rut 1:1-6.) Diad saginonor, sanen paarap la ed Betlehem si Noemi, kaibay duaran manugang to a si Rut tan Orpa, sikaray dinagdag ton ompawil la’d lugar da. Aliwan mainomay ed sikara so panayam ed Israel. Kanian “pinmawil [si Orpa] ed baley to, tan diad dios to,” balet si Rut et andi. Sikatoy kinmiwas base ed pananisia to tan amta to no siopay labay ton makankien ed sikato. Oniay kuan to ed si Noemi: “Agmo kerewen ed siak a paulyan ta ka, tan ompawil ak a manlapu ed itutumbok ed sika; ta anggan iner a laen mo, onla ak; tan iner a tundaan mo, ontunda ak; say baley mo sikato so baley ko tan say Dios mo, Dios ko.” (Rut 1:15, 16) Lapud desisyon nen Rut a manlingkor ed si Jehova, sikatoy agunggonaan ed Ganggan na Dios, a mangiiter na nikaduman probisyon parad saray balo, mairap-bilay, tan andiay dalin. Diad panangasikaso nen Jehova, sikatoy awalaan na liket, proteksion, tan inkaligen.

5. Antoy naoobserbaan yo ed saray matoor a manlilingkor ed si Jehova?

⁵ Nayarin walaray kabat yon agagi a kayari ran indedikay inkasikara ed si Jehova et matoor iran manlilingkor ed sikato ed loob na pigaran dekada. Tepetan yo ra no panon ya akagunggona ed sikara so panlilingkor ed sikato. Anggaman walaray problema, dakel so ebidensya a tua so imbaga na salmista: “Mainawa [“maliket,” NW] so totoo a say Dios da et si Jehova.”​—Sal. 144:15.

Makatunongan Iray Iilaloan nen Jehova

6. Akin ya agtayo natatakot ya ompan agtayo nagawaan iray iilaloan nen Jehova ed sikatayo?

⁶ Nayari palagin nononoten yo no kasin nagawaan yo iray iilaloan nen Jehova ed sikayo. Ompan liknaen yon mairap so pagmaliw a lingkor na Dios, pambilay unong ed ganggan to, tan pangipulong ed ngaran to. Bilang alimbawa, si  Moises, sanen sikatoy imbakin mitongtong ed saray Israelita tan ed ari na Ehipto, inisip ton agto sarag itan. Balet makatunongan so Dios ed no antoy iilaloan to ed si Moises. Diad tua et ‘sikatoy imbangat nen Jehova ed gawaen to.’ (Basaen so Exodo 3:11; 4:1, 10, 13-15.) Lapud inawat nen Moises so tulong, nanliketan toy impanumpal ed linawa na Dios. Ontan met natan, makatunongan si Jehova ed no antoy iilaloan to ed sikatayo. Natatalosan to ya aliwa itayon perpekto, tan labay to itayon tulongan. (Sal. 103:14) Imbes a nabelatan, nainawaan itayo no manlingkor tayo ed Dios bilang patumbok nen Jesus, lapud say ontan a kabibilay et mangunggona ed arum tan mamaliket ed si Jehova. Oniay inkuan nen Jesus: “Dago kayo’d siak, . . . et ikdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak.”​—Mat. 11:28, 29.

7. Akin a makapanmatalek ka a tulongan ka nen Jehova pian nagawaay iilaloan to ed sika?

⁷ Lawas ya iter nen Jehova so panamaseseg a nakaukolan tayo, daput no patulongan itayo ed sikato. Say alimbawa ed saya et si Jeremias, a sipor lan mabaing. Sanen tinuro nen Jehova a magmaliw a propeta To, oniay imbaga nen Jeremias: “O Katawan a Jehova! Nia, agko amta so mansalita; ta ugaw ak.” Diad saginonor, kuan to ni ingen ya: ‘Agak la mansalita dia ed ngaran to.’ (Jer. 1:6; 20:9) Ingen, lapud panamaseseg nen Jehova, ayarian nen Jeremias ya ipulong diad loob na 40 taon so mensahen aglabalabay a dengelen na totoo. Oniay aminpigan impaseguro nen Jehova ed sikato: “Wala ak ed sika a mangilaban ed sika tan mangiyagel ed sika.”​—Jer. 1:8, 19; 15:20.

8. Panon tayon nipatnag a manmamatalek itayo ed si Jehova?

⁸ Singa ed impamabiskeg nen Jehova ed si Moises tan si Jeremias, natulongan to itayo met iran Kristiano natan pian nagawaan tayo iray iilaloan to. Ingen ta nakaukolan so panmatalek ed sikato. Ibabaga na Biblia: “Manmatalek ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.” (Uli. 3:5, 6) Ipapatnag tayon manmamatalek tayo ed si Jehova no aawaten tayoy tulong to panamegley na Salita to tan panamegley na kongregasyon. No paiwanwan itayo ed si Jehova legan na pambibilay tayo, seguradon makapanmatoor itayo ed sikato.

Aasikasoen nen Jehova so Balang Sakey a Lingkor To

9, 10. Anton klase na proteksion so isisipan na koma-91 a Salmo?

⁹ Sano nononoten na arum no kasin idedika ray inkasikara ed si Jehova, ompano pampapagaan day makagawa na kasalanan, magmaliw ya anggapoy kana, tan ipulisay ira nen Jehova. Maong ta angiter si Jehova na proteksion a nakaukolan tayo pian nasalimbengan so mablin relasyon tayo ed sikato. Nengnengen tayo pa no panon itan a nibalikas diad koma-91 a Salmo.

¹⁰ Oniay gapo na satan a salmo: “Say manayam ed maamot a pasen na Sankatageyan mansiansia ed silong na sirum na Makapanyarin-amin. Salitaen ko so nipaakar ed Jehova, Sikato so salimbeng ko tan kiagelan ko; Dios ko, dia ed sikato so panmatalkan ko. Andi duaruwa ya iliktar to ka ed patit na manangalot.” (Sal. 91:1-3) Imanoen ya insipan na Dios a salimbengan to iramay mangaaro tan manmamatalek ed sikato. (Basaen so Salmo 91:9, 14.) Anton klase na salimbeng so tutukoyen to? Nensaman, inliktar nen Jehova so bilay na arum ed saray lingkor to. Say sakey a rason et pian protektaan so linya na kapolian a panlapuan na Mesias. Balet, dakel ed saray matoor a lingkor so nipriso, pinairap, tan maruksan pinatey lapud getma nen Satanas a deraley katooran da ed Dios. (Heb. 11:34-39) Sikaray awalaan na pakpel a mansungdo lapud sinalimbengan ira nen Jehova diad espiritual a paraan pian makapansiansia iran matoor. Kanian, natalosan tayo a say koma-91 a Salmo et sipan nipaakar ed espiritual a proteksion.

11. Anto so “maamot a pasen na Sankatageyan,” tan sioparay sasalimbengan na Dios ditan?

¹¹ Sirin, say “maamot a pasen na Sankatageyan” ya asalambit ed satan a salmo et simboliko a pasen, salanti, espiritual a proteksion. Saramay  sangkaili na Dios a manaayam ed satan a pasen et protektado ed antokaman tan siopaman a manasalin maneral ed katooran tan panangaro ra ed Dios. (Sal. 15:1, 2; 121:5) Sekreto itan a pasen lapud ag-itan natebek na saray agmananisia. Ditan et sasalimbengan nen Jehova iray totoon singa oniay ibabaga ra: ‘Sika so Dios ko a panmatalkan ko.’ No mansiansia itayo ed satan a pasen na salimbengan, agtayo masyadon papagaan ya ompan napatitan itayo nen Satanas, say “manangalot,” tan naandi so panangabobon na Dios ed sikatayo.

12. Antoray makaderal ed relasyon tayo ed Dios?

¹² Antoray makaderal ed mablin relasyon tayo ed Dios? Walaray pigaran bengatla a sinalambit na salmista, a singa say “salot a manaakar ed kabilungetan, [tan] kabagbag a manderal no pegley-agew.” (Sal. 91:5, 6) Dakel so apatitan na “manangalot” panamegley na sinisiblet a pilalek ya agmanpasakop. (2 Cor. 11:3) Saray arum et akalotan ton magmaliw a maagum, mapaatagey, tan materyalistiko. Apalikdo toy arum ni ed panmoria nipaakar ed nasyonalismo, ebolusyon, tan palson relihyon. (Col. 2:8) Tan amayamay so atukso to ed agmanepeg iran seksual a relasyon. Sarayan salot a makaderal ed espiritualidad so sengegan a binmetel so panangaro na dakel a totoo ed Dios.​—Basaen so Salmo 91:7-10; Mat. 24:12.

Salimbengan so Panangarom ed Dios

13. Panon itayon sasalimbengan nen Jehova ed saray makaderal ed espiritualidad tayo?

¹³ Panon a sasalimbengan nen Jehova so totoo to ed sarayan bengatlan makaderal ed espiritualidad? Oniay ipapaseguro na salmo: “Sikato iter to ed saray angheles to so pangomponi ra ed sika, tan mangapiger [odino manbantay] ed sika ed saray amin a dalan mo.” (Sal. 91:11) Iwawanwan tan sasalimbengan itayo na saray anghel ta pian nipulong tayo so maong a balita. (Apo. 14:6) Nilikud ni’d saray anghel, wadtan iray Kristianon mamatatken a manutumbok a maong ed Kasulatan diad panagbangat da, pian ag-itayo napalikdo na palson panagkatunongan. Makapangitarya ira na tulong ed anggan siopa a manggugunaet ya agnaimpluensyaan ed ug-ugali na mundo. (Tito 1:9; 1 Ped. 5:2) Ontan met, mangitatarya so “matoor tan makabat ya aripen” na espiritual a tagano a manalimbeng ed sikatayo ed bangat na ebolusyon, pananagyat na imoral iran pilalek, panggunaet ya onyaman tan onsikat, tan dakel niran makapuy a pilalek tan impluensya. (Mat. 24:45) Anto so akatulong ed sika pian natalonaan iray pigara ed saratan a kapeligroan?

14. Antoy gawaen tayo pian mantultuloy itayon nasalimbengan na Dios?

¹⁴ Antoy kaukolan tayon gawaen pian mansiansia itayon nasalimbengan ed “maamot a pasen” na Dios? No panon a lawas tayon aalwaran so inkasikatayo ed pisikal a kapeligroan a singa saray kriminal, aksidente, odino sakit, ontan met, kaukolan a mantultuloy tayon alwaran so inkasikatayo ed saray espiritual a kapeligroan. Kanian, nepeg a regular itayon paiwanwan ed si Jehova panamegley na saray publikasyon tayo tan diad saray aral tan asamblea. Kekerewen  tayo met so simbawa na mamatatken. Tan nagugunggonaan itayo ed nanduruman kualidad ya ipapanengneng na agagi tayo. On, makakatulong ed sikatayo so pililimog ed saray kakongregasyon tayo pian magmaliw a makabat.​—Uli. 13:20; basaen so 1 Pedro 4:10.

15. Akin a matalek itayo a nasalimbengan itayo nen Jehova ed antokaman a makapangekal na panangabobon to?

¹⁵ Kombinsido itayo a nasalimbengan itayo nen Jehova ed antokaman a makapangekal na panangabobon to. (Roma 8:38, 39) Sinalimbengan toy kongregasyon manlapud saray kakabusol a maimpluensya ed relihyon tan politika, a kaslakan lan say getma ra et aliwan pian pateyen itayo, noagta pian isian itayo ed masanton Dios tayo. Talagan tua so sipan nen Jehova: “Anggapo so ayura ya agawa a sumpa ed sika ya onaligwas naani.”​—Isa. 54:17.

Siopay Mangiiter na Kawayangan Tayo?

16. Akin ya agniiter ed sikatayo na mundo so kawayangan?

¹⁶ Kasin naandi kawayangan tayo no kien itayo la nen Jehova? Say katuaan to, no say mundo so akankien ed sikatayo, naandi laingen so kawayangan tayo. Nisian so mundo ed si Jehova tan uuleyan na maruksan dios a mangaaripen ed totoo. (Juan 14:30) Singa bilang, uusaren na sistema nen Satanas so desdes lapud kairapay bilay pian naandi so kawayangan na totoo. (Ikompara so Apocalipsis 13:16, 17.) Wala met so pakayari na kasalanan a mamalikdo pian naaripen iray totoo. (Juan 8:34; Heb. 3:13) Kanian anggaman ilalagyat na saray agmananisia so kabibilay a sumlang ed saray bangat nen Jehova pian nawalaay kawayangan, siopaman ya ondengel ed sikara et naaripen a tampol na kasalanan tan mabanday a kabibilay.​—Roma 1:24-32.

17. Anton kawayangan so iyoopresi nen Jehova ed sikatayo?

¹⁷ Diad kasunian to, no ipia tayoy inkasikatayo ed si Jehova, ekalen toy amin a makapasakit ed sikatayo. Walay pipadpara na situasyon tayo ed sakey a toon impia toy bilay to ed maong a doktor pian onabig ed graben sakit to. Amin tayo et nibagan mansasakit lapud atawir tayon kasalanan. Say alenleneg a paraan pian makablos itayo ed saray epekto na kasalanan tan manbilay na andi-angga et say pangimatalek tayoy inkasikatayo ed si Jehova base ed dondon bagat nen Kristo. (Juan 3:36) No panon ya ombabaleg so kompiyansa tayo ed doktor lapud nakakabatan tayoy inkadunong to, ombaleg met so panagmatalek tayo ed si Jehova no sikatoy tuloy-tuloy tayon nakabat. Kanian, itultuloy tayon aralen a maong so Salitay Dios ta makatulong itan a sikatoy naaro tayo, diad ontan et agtayo pampagaay pagmaliw a kien to.​—1 Juan 4:18.

18. Antoy pagmaliwan na saramay kien nen Jehova?

¹⁸ Iiter nen Jehova ed amin a totoo so kawayangan a manpili. Oniay ibabaga na Salita to: ‘Pilim so bilay pian manbilay ka, sika tan say kapolian mo, panamegley na pangaro ed Jehova a Dios mo.’ (Deu. 30:19, 20) Labay to ya ipanengneng tayo so panangaro tayo ed sikato diad pandesisyon tayon mismo a manserbi ed sikato. Imbes a naandi kawayangan tayo, seguradon magmaliw itayon maliket tan mansiansian ontan no kien itayo na Dios ya aaroen tayo.

19. Akin a nibagan agnaparaan a kaabigan so pagmaliw a kien nen Jehova?

¹⁹ Ag-itayo makanepegan a magmaliw a kien na ayadyarin Dios ta makasalanan itayo. Balet, posible itan lapud agnaparaan a kaabigan to. (2 Tim. 1:9) Kanian, oniay insulat nen Pablo: “No manbibilay itayo, manbibilay itayo ya onkana ed Katawan; et no ompatey itayo, ompatey itayo ya onkana ed Katawan. Kanian, mabilay itayo man odino ompatey itayo, kien itayo na Katawan.” (Roma 14:8) Seguradon agtayon balot pagbabawian so desisyon tayon magmaliw a kien nen Jehova.

Antoy Ebat Mo?

• Antoray gunggona no kien itayo nen Jehova?

• Akin a nayarian tayon gawaen iray iilaloan na Dios ed sikatayo?

• Panon a sasalimbengan nen Jehova iray lingkor to?

[Tepetepet Parad Panagaral]

[Saray litrato ed pahina 8]

Tepetan yo ray arum no panon ya akagunggona ed sikara so impagmaliw dan kien nen Jehova

[Litrato ed pahina 10]

Diad antoran dalan a mangitatarya si Jehova na salimbeng?