Iumi Kamap Pipol Bilong Jehovah Bikos Hem Kaen Tumas Long Iumi
Iumi Kamap Pipol Bilong Jehovah Bikos Hem Kaen Tumas Long Iumi
“Iumi bilong Jehovah.”—ROM. 14:8.
1, 2. (a) Wanem privilege nao iumi garem? (b) Wanem nao olketa kwestin wea iumi bae storyim?
OLKETA Israelite kasem nambawan privilege taem Jehovah sei long olketa: “Iufala nomoa bae spesol pipol bilong mi.” (Ex. 19:5) Iumi long kongregeson tu kasem nambawan privilege for kamap pipol bilong Jehovah. (1 Pet. 2:9; Rev. 7:9, 14, 15) Hem privilege wea savve mekem iumi kasem gud samting for olowe.
2 Nomata hem privilege for kamap pipol bilong Jehovah, iumi mas duim samting tu. Maet samfala ting olsem: ‘Waswe, bae mi savve duim olketa samting wea Jehovah laekem mi for duim? Sapos mi sin, waswe, bae Jehovah les long mi nao? Sapos mi worshipim Jehovah, waswe, bae mi no free nao?’ Hem gud for iumi ting raonem olketa samting olsem. Bat tingim diswan firstaem: Wanem gud samting nao iumi kasem from iumi worshipim Jehovah?
Iumi Bae Hapi Taem Iumi Worshipim Jehovah
3. Wanem gud samting nao Rahab kasem from hem chus for worshipim Jehovah?
3 Waswe, pipol bilong Jehovah kasem gud samting from olketa worshipim hem? Tingim Rahab, wanfala jury woman wea stap long Jericho bifor. Luk olsem taem hem smol yet, hem duim olketa rabis samting wea join witim wei for worshipim olketa god bilong Canaan. Nomata olsem, taem hem herem Jehovah duim olketa nambawan samting for sevem olketa Israelite, hem luksavve Jehovah hem tru God. Rahab duim samting for protectim pipol bilong God nomata hem savve maet hem bae dae. Hem trustim pipol bilong God for lukaftarem hem. Bible sei: “Disfala jury woman Rahab hem helpem tufala man bilong God and hem kaen long tufala. Hem talem tufala for ranawe long difren road. Dastawe God sei hem raeteous.” (Jas. 2:25) Tingim olketa gud samting wea hem kasem taem hem joinim pipol wea worshipim trufala God. Pipol hia followim Law bilong God wea helpem olketa for showimaot love and duim stret samting. Rahab mas hapi tumas taem hem changem wei bilong hem! Hem maritim wanfala Israelite man and hem lanem boy bilong hem Boaz for faithful long God.—Josh. 6:25; Ruth 2:4-12; Matt. 1:5, 6.
4. Wanem gud samting nao Ruth kasem from hem chus for worshipim Jehovah?
4 Ruth wea kam from Moab tu chus for worshipim Jehovah. Maet taem hem smol gele, hem worshipim Chemosh and olketa nara god bilong Moab. Bat gogo hem savve long trufala God, Jehovah. Hem maritim wanfala Israelite wea kam stap long ples bilong hem. (Readim Ruth 1:1-6.) Taem Ruth and sista-in-law bilong hem Orpah gogo witim Naomi for go long Bethlehem, Naomi talem tufala for go bak long hom bilong tufala. Hem bae no isi for tufala stap long Israel. So Orpah go bak long pipol bilong hem and start for worshipim olketa god bilong hem moa. Bat Ruth no duim datwan. Ruth savve hu nao hem laek for followim and hem duim samting followim faith wea hem garem. Hem talem Naomi: “Plis, iu no talem mi for lusim iu. Mi laekem tumas for kam witim iu. Plis, iu no stopem mi. Ples wea iu bae go long hem, bae mi go long hem tu. Ples wea iu bae stap long hem, bae mi stap long hem tu. Pipol bilong iu bae pipol bilong mi tu, and God bilong iu bae God bilong mi tu.” (Ruth 1:15, 16) From Ruth chus for worshipim Jehovah, hem kasem gud samting from Law bilong God. Datfala Law helpem olketa widow, olketa wea poor, and olketa wea no garem eni pis land. From Jehovah protectim Ruth, hem hapi and stap gud.
5. Long tingting bilong iu, olketa wea faithful for worshipim Jehovah olketa hao?
5 Maet iu savve long samfala wea dedicate long Jehovah and gohed faithful long hem for staka year. Askem olketa for storyim gud samting wea olketa kasem from olketa worshipim God. Nomata iumi evriwan kasem olketa problem, olketa samting wea happen showimaot disfala toktok bilong man wea raetem psalm hem tru tumas. Hem sei: “Pipol wea God bilong olketa hem Jehovah, olketa hapi!”—Ps. 144:15.
Jehovah Askem Nomoa Wanem Iumi Fit for Duim
6. Why nao iumi mas no tingse iumi no fit for duim wanem Jehovah askem?
6 Maet samfala taem iu ting, waswe, bae mi fit for duim wanem Jehovah askem? Maet iu tingse bae hem no isi for worshipim God, followim law bilong hem, and toktok for hem. Tingim Moses. Hem tingse hem no fit for go story long olketa Israelite and king bilong Egypt. Bat God no askem Moses for duim samting wea hem no fit for duim. Jehovah ‘teachim hem wanem for duim.’ (Readim Exodus 3:11; 4:1, 10, 13-15.) Moses followim wanem hem lanem and hem hapi from hem duim wanem God laekem. Jehovah olsem long iumi tu. Hem askem nomoa wanem iumi fit for duim. Hem savve iumi no perfect and hem laek helpem iumi. (Ps. 103:14) Taem iumi worshipim God long wei for followim Jesus, datwan savve strongim iumi bikos iumi helpem narawan and iumi mekem Jehovah hapi. Jesus sei: “Kam long mi, . . . mekem mi savve strongim iufala. Iufala waka witim mi and lane from mi, bikos mi no savve raf and mi hambol.”—Matt. 11:28, 29.
7. Hao nao iu savve Jehovah bae helpem iu for duim wanem hem askem?
7 Jehovah bae evritaem strongim iumi sapos iumi gohed trustim hem for helpem iumi. Tingim Jeremiah. Hem no man for toktok tumas. So taem Jehovah askem hem for kamap profet bilong Hem, Jeremiah sei: “Bat Lord Jehovah, mi young tumas and mi no savve story gud!” Long narataem hem sei tu: “Bae mi no talem eni samting moa long nem bilong [God].” (Jer. 1:6; 20:9) Bat Jehovah strongim Jeremiah and for 40 year hem preachim message wea pipol no laek herem. Staka taem Jehovah sei long hem: “Mi stap witim iu for helpem iu and sevem iu.”—Jer. 1:8, 19; 15:20.
8. Wanem nao bae showimaot iumi trustim Jehovah?
8 Jehovah strongim Moses and Jeremiah and hem savve helpem iumi tu for duim wanem hem askem. Hem barava important for iumi trustim God. Bible sei: “Trustim Jehovah long full heart bilong iu and no long savve bilong iuseleva. Tingim hem long evri samting wea iu duim, and hem nao bae showim iu stretfala wei for iu followim.” (Prov. 3:5, 6) Iumi showimaot iumi trustim Jehovah taem iumi followim wanem Bible talem and wanem iumi lanem long kongregeson. No eni samting bae stopem iumi for faithful long Jehovah sapos iumi letem hem for leadim iumi.
Jehovah Lukaftarem Pipol Bilong Hem Wanwan
9, 10. Long wanem wei nao God promis for protectim iumi wea Psalm 91 storyim?
9 Taem samfala tingting for dedicate long Jehovah, maet olketa ting nogud bae olketa sin gogo olketa no worshipim Jehovah and hem bae no hapi long olketa. Bat iumi hapi tumas Jehovah givim iumi evri samting wea iumi needim for gohed fren witim hem. Bae iumi lukim diswan long Psalm 91.
10 Datfala psalm start olsem: “Man wea stap long sef ples bilong Barava Haefala God bae stap anda long shadow bilong Olmaeti. Mi bae sei long Jehovah: ‘Iu nao sef ples and iu nao strongim mi. Iu nao God bilong mi wea mi trustim.’ Hem nao bae sevem iu from trap bilong man for kasholem bird.” (Ps. 91:1-3) Disfala scripture showimaot God promis for protectim pipol wea lovem hem and trustim hem. (Readim Psalm 91:9, 14.) Long wanem wei nao bae hem duim diswan? Long bifor, Jehovah protectim samfala wakaman bilong hem long physical wei. Hem duim olsem for protectim laen wea Messiah bae born kam long hem. Nomata olsem, staka narawan wea faithful stap long prison, pipol killim olketa nogud, and killim olketa dae. Satan hem bihaenem olketa nogud samting hia for mekem olketa no faithful long God. (Heb. 11:34-39) Bat olketa gohed faithful long Jehovah and no givap bikos hem no letem eni samting spoelem wei wea olketa fren witim hem. So Psalm 91 hem promis bilong God for protectim iumi long spiritual wei.
11. Wanem nao “sef ples bilong Barava Haefala God”? Hu nao God protectim long ples hia?
11 So disfala “sef ples bilong Barava Haefala God” hem tokpiksa ples wea God protectim iumi long spiritual wei. Pipol wea fren witim God stap long disfala ples and no eni samting savve spoelem faith and love wea olketa garem for God. (Ps. 15:1, 2; 121:5) Pipol wea no biliv long God no savve long disfala ples. Long ples hia, Jehovah protectim pipol wea sei: ‘Iu nao God bilong mifala wea mifala trustim.’ Sapos iumi gohed stap long disfala sef ples, bae iumi no wari tumas bikos iumi gohed fren gud witim God and Satan datfala “man for kasholem bird” no savve trapim iumi.
12. Wanem nao samfala samting wea savve spoelem wei wea iumi fren witim God?
12 Wanem nao samfala samting wea savve spoelem wei wea iumi fren witim God? Man wea raetem psalm storyim staka samting, wea samfala nao hem “nogud sik wea kasem staka man” and “samting wea killim dae staka man.” (Ps. 91:5, 6) “Man for kasholem bird” trapim staka pipol wea laek for followim tingting bilong olketa seleva nomoa. (2 Cor. 11:3) Hem trapim olketa narawan taem hem mekem olketa for greedy, praod, and laek kasem staka material samting. Hem mekem samfala narawan for mekhae long kantri bilong olketa seleva, bilivim teaching bilong evolution, and followim false religion. (Col. 2:8) And hem trapim staka moa for durong. Olketa samting hia wea olsem nogud sik hem mekem staka million pipol for no lovem God nao.—Readim Psalm 91:7-10; Matt. 24:12.
No Letem Eni Samting Spoelem Wei wea Iu Lovem God
13. Wanem nao Jehovah duim for protectim iumi from olketa samting wea savve spoelem wei wea iumi fren witim hem?
13 Wanem nao Jehovah duim for protectim pipol bilong hem from olketa nogud samting hia? Datfala psalm hem sei tu: “[God] bae talem olketa angel bilong hem for protectim iu long evri ples wea iu go long hem.” (Ps. 91:11) Olketa angel leadim iumi and protectim iumi mekem iumi savve preachim gud nius. (Rev. 14:6) Olketa elder long kongregeson tu protectim iumi. Olketa iusim Bible for teachim iumi and datwan protectim iumi from olketa laea teaching. Olketa savve helpem man wea trae for lusim olketa nogud wei bilong world. (Titus 1:9; 1 Pet. 5:2) Nara samting tu, “wakaman wea faithful and wise” givim spiritual kaikai wea protectim iumi from teaching bilong evolution, wei for laek durong, kasem staka material samting and bignem, and staka nara samting moa wea savve spoelem iumi. (Matt. 24:45) Wanem nao iu duim mekem olketa samting hia no spoelem iu?
14. Wanem nao iumi mas duim mekem God protectim iumi?
14 Wanem nao iumi mas duim mekem iumi gohed stap long “sef ples” bilong God? From iumi mas protectim iumiseleva from olketa nogud samting olsem accident, olketa criminal, or sik, iumi mas gohed protectim iumiseleva from olketa samting wea savve spoelem wei wea iumi fren witim God. Dastawe iumi mas evritaem followim wanem Jehovah talem wea iumi readim long olketa buk bilong iumi and wea iumi herem long olketa meeting and assembly. Iumi savve askem advaes from olketa elder tu. And iumi kasem gud samting from olketa gudfala wei wea olketa Christian brata and sista showimaot! Tru tumas, taem iumi evritaem kaban witim olketa long kongregeson, datwan savve helpem iumi for garem gudfala tingting.—Prov. 13:20; readim 1 Peter 4:10.
15. Why nao iu trustim Jehovah savve protectim iu from eni samting wea savve mekem iu no faithful?
15 Iumi trustim Jehovah savve protectim iumi from eni samting wea savve mekem iumi no faithful long hem. (Rom. 8:38, 39) Hem protectim kongregeson from olketa bigman bilong gavman and religion wea laek mekem iumi for no worshipim holy God bilong iumi. Disfala promis bilong Jehovah barava kamap tru: “Olketa samting wea pipol iusim for faetem iu bae iusles nomoa.”—Isa. 54:17.
Hu Nao Mekem Iumi Free?
16. Why nao world no savve mekem iumi free?
16 Sapos iumi worshipim Jehovah, waswe, bae iumi no free nao? Nomoa. Sapos iumi followim world nao bae iumi no free. Pipol long world no fren witim Jehovah bat god wea raf tumas nao rulim olketa. Hem mekem olketa followim wanem hemseleva laekem. (John 14:30) Wanfala samting wea world bilong Satan duim nao hem mekem wei for kasem selen no isi and datwan mekem pipol no free. (Markem witim Revelation 13:16, 17.) Sin tu savve mekem pipol kamap slave. (John 8:34; Heb. 3:13) Pipol long world sei laef bilong iu bae gud tumas and iu bae free sapos iu no followim olketa teaching bilong Jehovah. Bat man wea followim pipol olsem bae kwiktaem kamap slave long sin and laef bilong hem bae nogud tumas.—Rom. 1:24-32.
17. Jehovah savve mekem iumi kamap free from wanem?
17 Sapos iumi trustim Jehovah, hem nao savve mekem iumi free from evri nogud samting. Iumi olsem man wea trustim wanfala gud doctor for operatim iumi mekem iumi no dae long wanfala nogud sik. Nogud sik wea mekem iumi evriwan savve dae nao hem sin. Bat sapos iumi trustim Jehovah and garem faith long sakrifaes bilong Christ, datwan nao savve mekem iumi kamap free from sin and kasem laef olowe. (John 3:36) Taem iumi herem staka gud story abaotem datfala doctor, bae iumi trustim hem. Long sem wei tu, taem iumi gohed for lane abaotem Jehovah, iumi bae trustim hem. Dastawe iumi mas gohed for studyim Bible bikos datwan bae helpem iumi for lovem hem and no fraet for worshipim hem.—1 John 4:18.
18. Wanem nao olketa wea worshipim Jehovah bae kasem?
18 Jehovah letem evriwan for disaedem samting seleva. Bible sei: “Iufala mas chusim laef mekem iufala and olketa pikinini bilong iufala savve gohed laef. And iufala mas lovem God bilong iufala Jehovah.” (Deut. 30:19, 20) God laekem iumiseleva nao chus for worshipim hem bikos iumi lovem hem. Taem iumi worshipim God wea iumi lovem, iumi bae kamap free and hapi.
19. Why nao iumi sei Jehovah kaen tumas long pipol bilong hem?
19 From iumi sin, iumi no fit for kamap pipol bilong God bikos hem perfect. Bat God kaen tumas long iumi dastawe iumi savve kamap pipol bilong hem. (2 Tim. 1:9) Paul sei: “Sapos iumi laef, iumi laef for Jehovah, and sapos iumi dae, iumi dae for Jehovah. So sapos iumi laef or sapos iumi dae, iumi bilong Jehovah.” (Rom. 14:8) Bae iumi nating sorre sapos iumi chus for worshipim Jehovah.
Wanem Nao Ansa Bilong Iu?
• Wanem gud samting nao iumi kasem from iumi worshipim Jehovah?
• Why nao iumi fit for duim wanem God askem?
• Wanem nao Jehovah duim for protectim pipol bilong hem?
[Olketa Study Kwestin]
[Olketa piksa long page 8]
Askem narawan for storyim gud samting wea hem kasem from hem worshipim Jehovah
[Piksa long page 10]
Wanem nao samfala wei wea Jehovah protectim iumi?