Jehová Dios munaptinmi paypaq kanchik
Jehová Dios munaptinmi paypaq kanchik
“[Diosninchikpam] kanchik.” (ROM. 14:8.)
1, 2. a) ¿Pipaq kananchikpaqmi favorecesqa kanchik? b) ¿Ima tapuykunamantam yachasun?
JEHOVÁ DIOSMI israelitakunaman prometerqa: “Qamkunamá kankichik wakin runakunamanta akllakusqay runaykuna”, nispa (Exo. 19:5). ¡Mayna allinmi chayqa karqa! Kunanpas Jehová Diosta serviqkunaqa paypaqñam kanchik (1 Ped. 2:9; Apo. 7:9, 14, 15). Chayqa wiñaypaqmi yanapawasunchik.
2 Diospaq kaspanchikqa rurananchiktam cumplinanchik. Chaymi wakinkuqa tapukunmanku: “¿Cumplisaqchu Diospa tukuy mañawasqanwan? ¿Favorecewanqaraqchu huchallikuruptiy? ¿Libreraqchu kasaq Diospaqña kaspayqa?”, nispa. Allinmi kanqa kaykunamanta yachayqa. Ichaqa, puntatam yachananchik kayna tapuymanta: ¿imaynatam yanapawasun Diospaq kasqanchik?
Diospaq kayqa kusichiwanchikmi
3. ¿Imakunapim yanaparqa Rahabta Jehová Diosta servisqan?
3 ¿Cheqaptachu yanapawasun Jehová Diospaq kasqanchik? ¡Arí yanapawasunmi! Rahabmanta rimasun, payqa Jerico llaqtapim chuchumika karqa hinaspa Canaan lawpi taytachakuna yupaychasqankuman hina uywasqa karqa. Chayna kaspanpas, yacharurqam Jehová Diospa yanapakuyninwan israelitakuna vencesqankuta hinaspa paylla cheqap Dios kasqantapas. Chaymi Diospa akllasqan llaqtarayku vidanta peligropi churarqa, hinaspam amparasqa kananpaq yanapakuyta maskarqa. Bibliaqa ninmi: “Rahab sutiyoq chuchumika warmim llaqtan wateqaq enemigonkunata pakaykurqa hinaspam yanapaykurqa ayqekunankupaq, chaynapim allin rurasqanwan mana huchayoqpaqña chaskisqa karqa”, nispa (Sant. 2:25). Chuya nacion Israelman hukllawakuyninqa ancha allinmi karqa, paykunatam Dios yachachirqa kuyanakunankupaq hinaspa allin ruranankupaq. ¡Maynatachá kusikurqa manaña ñawpaqta hina kawsaspanqa! Israelitawan casarakuptinmi Booz sutiyoq wawan karqa, payqa Diospa ancha reqsisqa serviqninmi karqa (Jos. 6:25; Rut 2:4-12; Mat. 1:5, 6).
4. ¿Imaynatam Rutta yanaparqa Jehová Diosta servinanpaq akllakusqan?
4 Moab nacionniyoq Rutpas Jehová Diostam yupaycharqa. Sipas kaspanqa yaqapaschá Moab lawpi Quemos nisqa taytachata chaynataq huk taytachakunatapas yupaycharqa. Ichaqa cheqap Diostam reqsirurqa hinaspanmi nacionninman riq israelitawan casarakurqa (leey Rut 1:1-6). Chaymantañam Rutqa llumchuymasin Orfawan viudaña karqaku hinaspam suegran Noemiyta Belenman kutiptin riysirqaku. Richkaptinkum Noemiyqa llumchuyninkunata nirqa llaqtanman kutinankupaq, payqa yacharqam Israel nacionpi sasachakunankuta. Orfam kasukuspan ‘kutikurqa llaqtanman hinaspa diosninkunaman’. Rutmi ichaqa, iñisqanman hina rurarqa hinaspam qawachirqa pipaq kay munasqanta. Chaymi Noemiyta nirqa: “Ama ruegawaychu qanmanta rakikuspa kutikunaypaq. Maymi risqaykimanmi ñoqapas risaq, maymi yachasqaykipim ñoqapas yachasaq [. . .], Diosnikipas ñoqapa Diosniymi kanqa”, nispa (Rut 1:15, 16). Chaynata tanteasqanraykum favorecesqa karqa viudakunapa, wakchakunapa hinaspa mana chakrayoq runakunapa allinninpaq Diospa kamachisqanwan. Imaynam wallpapas chiwchinkunata rapranwan pakaykun chaynatam Jehová Dios amparaykurqa.
5. ¿Imamantam cuentata qokunchik tukuy sonqonkuwan Dios serviq cristianokunamanta?
5 Reqsinchikchá achka wataña tukuy sonqonkuwan Diosta serviq cristianokunata. Tapuchwanmi Diosman qokusqanku tiempomanta ima bendicionkuna chaskisqankuta. Tukuy pasasqankumanta yachaspam cuentata qokusun sasachakuyninku kaptinpas Bibliapi kayna nisqan cheqap kasqanmanta: “¡Mayna kusisqam Tayta Dios yupaychaq runakunaqa!” (Sal. 144:15).
Atisqallanchiktam Diosqa mañawanchik
6. ¿Imanasqataq mana piensanachu Diospa mañawasqanchik mana cumpliy atina kasqanta?
6 Yaqapaschá kaynata tapukunki: “¿Atisaqchu Diospa mañawasqanwan cumpliyta?”, nispa. Ichapas sasa rikchakuwachwan Diosta serviyqa, kamachikuyninkunata haykapipas kasukuyqa hinaspa paymanta willakuypas. Chaynam pasarqa Moisesta, israelitakunaman hinaspa Egiptopi faraonman Diosmanta willakunan kaptin. Diosmi ichaqa ruray atisqallanta mañarqa. Yanapananpaqpas kaynatam prometerqa: ‘Yachachisqaykim imam rimanaykita’, nispa (leey Exodo 3:11 hinaspa 4:1, 10, 13-15). Moisesqa yanapakuynintam chaskirqa, chaymi kusisqa karqa Diospa munayninta ruraspa. Kunanpas Jehová Diosqa entiendewanchikmi. Pantaq kasqanchikta yachaspanmi yanapawasun (Sal. 103:14). Jesuspa qatiqnin kayqa kusichiwanchikmi manam llasaq qepi hinachu, Diospa sonqontam kusichinchik hinaspapas runamasinchik kuyasqanchiktam qawachinchik. Cuentatam qokunchik Jesuspa kayna nisqan cheqap kasqanmanta: “Hamuychik ñoqaman [. . .], ñoqam samachisqaykichik. Llasawaqniy yugoyta apaspayá ñoqamanta yachaychik, ñoqaqa kani llampu sonqo humillakuqmi” (Mat. 11:28, 29).
7. ¿Imanasqam seguro kachwan mañawasqanchikta cumplinapaq Dios yanapawananchikmanta?
7 Diosman asuykuspaqa kallpanchasqam tarikusun. Chaynam Jeremiasta pasarqa, payqa sasachakuqmi rimananpaq. Diosmanta willakunanpaq nombraptinmi nirqa: “¡Ay Señor Diosnilláy, ancha warmaraqmi kallani! Manaraq rimaypas yachaqmi kallani”, nispa. Chaymantapas nirqam Diospa ‘sutinpi manaña rimananta’ (Jer. 1:6; 20:9). Ichaqa 40 watam willakurqa runakunapa mana uyariy munasqanta. ¿Imaynatam chayta rurarqa? Jehová Dios kallpanchaptinmi. Diosqa kaynatam prometerqa: “Qanwanmi kachkani libranaypaqpas”, nispa (Jer. 1:8, 19; 15:20).
8. ¿Imaynatam qawachinchik Diospi confiasqanchikta?
8 Moisestawan Jeremiasta hinam Diosqa kunanpas kallpanchawanchik payta serviypi rurayninchikkunata cumplinapaq. Yanapawananchikpaqqa kasukunanchikmi Bibliapa kayna nisqanta: “Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy Tayta Diosta. Paymi munasqanman hina kawsachisunki” (Pro. 3:5, 6). ¿Imaynatam Diospi confiasqanchikta qawachinchik? Palabranwan hinaspa llaqtanwan niwasqanchikta kasukuspam. Paywan yanapachikuspaqa haykapipas kasukusunmi.
Jehová Diosqa serviqninkunatam sapakamata cuidan
9, 10. ¿Imayna amparasqa kanamantam prometen Salmo 91?
9 Wakinkuqa manchakunkum Diosman qokuyta, piensankum huchallikuruptinku Dios manaña chaskinanta. Ichaqa manam chaynaqa pasawananchikchu, payqa tukuytam qowanchik paywan amistadninchik allin kananpaq. Yachasun imaynatam chayna kasqanta Salmo 91 qawachisqanmanta.
10 ‘Alto-altopi kaqpa pakaykusqan [lugarpim], Tukuy Atiyniyoqpa llantuykusqanmi Tayta Diosta nini: “Pakakuna wasi hinam qamqa kanki. Amparakuna wasi hinam qamqa kanki. Diosnilláy, ñoqaqa qampim confiakusaq, nispa”. Pakasqa toqllamantam payqa libraykusunki’ (Sal. 91:1-3). Qawasqanchikman hinaqa Diosmi prometen kuyaqninkunatawan paypi confiaqkunata amparananpaq (leey Salmo 91:9, 14). ¿Serviqninkunata mana imapas pasananmanta amparananmantachu chaywanqa nichkanchik? Ñawpaq tiempopim wakinpiqa chaynata rurarqa, Jesuspa ñawpa abuelonkuna mana wañurunankupaq. Ichaqa saqerqam wakin serviqninkuna Diablopa runankunawan presochasqa, ñakarichisqa hinaspa wañuchisqa kanankuta (Heb. 11:34-39). Chayna kaptinpas ampararqam aguantanankupaq kallpata qospan, chaynapi hinalla kasukunankupaq. Chaymi Salmo 91 nisqanqa prometewachkanchik iñiyninchikpi amparasqa kanamanta.
11. ¿Imataq ‘alto-altopi kaqpa pakaykusqan’ lugarqa hinaspa pikunatam chaypi pakaykun?
11 ¿Imataq ‘alto-altopi kaqpa pakaykusqan’ lugarqa? Manam huk sitiochu, aswanqa rimachkanmi runakunamanta otaq imamantapas iñiyninchiktawan servisqanchikta Dios waqaychananmanta (Sal. 15:1, 2; 121:5). ¿Imanasqataq nin ‘alto-altopi pakaykusqa’ lugar kasqanta? Mana iñiqkuna mana tariyta atisqankuraykum, chaypiqa chaskin: “Diosnilláy, ñoqaqa qampim confiakusaq” niqkunallatam. ‘Alto-altopi kaqpa pakaykusqan’ kanapaq kallpanchakuspaqa manam llumpaytaqa preocupakunachu Satanaspa ‘toqllankunapi’ wichiykunamanta hinaspa Diospa favorninta yanqacharuymantaqa.
12. ¿Imakunawanmi Dioswan amistadninchikta yanqacharuchwan?
12 ¿Imakunawanmi Dioswan amistadninchikta yanqacharuchwan? Wakinqa kanman ‘tutapi puriq onqoyman’ hinaspa ‘rupaypi wañuchiq pesteman’ rikchakuqmi (Sal. 91:5, 6). Satanasmi kunanqa achkallataña urmachichkan kikillankupi piensaspa munasqankuta ruranankupaq (2 Cor. 11:3). Achkatam pantachin qollqella kuyanankupaq, hatunchakunankupaq hinaspa kapuqniyoq kayllapi afanakunankupaq. Pantachintaqmi nacionninkuta kuyanankupaq, imapas kikillanmanta rikurimusqanta creenankupaq hinaspa pantasqa religionkunawanpas (Col. 2:8). Chaymantapas mana yupay atina runakunatam huchapakunankupaq urmachin. Kaykunam onqoykuna otaq pestekuna hina, chaymi millonnintin runakunapa Dios kuyasqankuta chiriyarachin (leey Salmo 91:7-10; Mat. 24:12).
Imaynatam Dios kuyasqanchikta waqaychana
13. ¿Imaynatam Jehová Diosqa waqaychawanchik iñiyninchikpi allin kanapaq?
13 ¿Imaynatam Diosqa kay peligrokunamanta waqaychawanchik? Salmos qellqaqmi nirqa: “Qamraykum angelninkunata kamachinqa mayta riptikipas waqaychasunaykipaq”, nispa (Sal. 91:11). Arí, angelkunam yanapawanchik hinaspa amparawanchik Diosmanta allin noticiata willakunanchikpaq (Apo. 14:6). Chaynataq, Diosqa ancianokunawanmi cuidawanchik, paykunam Bibliapa nisqanman hina congregacionpi yachachinku, chaynapim yanapawanchik yanqa yachachikuykunawan mana pantarunanchikpaq. Wakinkunatapas yanapankum mana allinkunata saqenankupaq (Tito 1:9; 1 Ped. 5:2). Chaymantapas, ‘allin yuyayniyoq confianza sirvientewanmi’ iñiyninchikpi allin kanapaq yachachiwanchik, chaynapi imapas kikillanmanta rikurimun nisqankuta mana creenapaq hinaspa huchapakuypi, kapuqniyoq kaypi chaynataq huk mana allinninchikpaq kaqkunapi mana urmanapaq (Mat. 24:45). Tapukuy: “¿Imakunam yanapawarqa chaykunapi mana urmarunaypaq?”, nispa.
14. ¿Imatam rurananchik Jehová Dios amparawananchikpaq?
14 ¿Imatam rurananchik ‘alto-altopi kaqpa pakaykusqan’ kanapaq? ¡Cuidakunanchikmi! Mana onqorunapaq, mana suwarachikunapaq otaq imapas mana pasaruwananchikpaq cuidakusqanchikman hina. Iñiyninchikpi allin kanapaqqa kasukunam: qellqakunapi, huñunakuykunapi hinaspa asambleakunapi Diospa niwasqanchikta. Ancianokunawanpas yanapachikunam, chaynataq iñiqmasinchikkunapa sumaq kayninkunamantapas yachana. ¡Maynatam Diospa llaqtanqa yanapawanchik yachaywan ruranapaq! (Pro. 13:20; leey 1 Pedro 4:10.)
15. ¿Imaynatam yachanchik mana allinkunamanta Jehová Dios amparawananchikta?
15 Jehová Diosqa atiyniyoqmi lliw mana allinkunamanta amparawananchikpaq (Rom. 8:38, 39). Ejemplopaq, piensasun atiyniyoq religionkunawan gobiernokuna contranchikpi tukuy rurasqankupi. Yaqa llapanpiqa imatapas ruraqku manam wañuchiwananchikpaqchu aswanqa Jehová Diosmanta karunchawananchikpaqmi. Diosmi ichaqa sapa kuti amparawarqanchik kayna promesanta cumplispan: “Manam pipas [. . .] atirqachu wañuchisunaykipaq arma rurayta” (Isa. 54:17).
¿Pitaq libreyachiwanchikman?
16. ¿Imanasqataq kay pachapi kaqkunaqa mana libreyachiwachwanchu?
16 ¿Manañachu libre kasun Diospaqña kaspaqa? Manam chaynachu. Aswanmi mana librechu kachwan kay pachallapaq kaspanchikqa, mana allin ruraqkunaqa Diosmanta karunchasqa hinaspa runakuna ñakarichiq Satanaspa makinpim kachkan (Juan 14:30). ¿Imakunatam servichikun runakuna makinpi kananpaq? Hukninqa kanman qollqewan sasachasqanmi (tupachiy Apocalipsis 13:16, 17). Engañantaqmi huchawanpas (Juan 8:34; Heb. 3:13). Chaymi libre kananchikpaq kay pachapi kaqkunapa prometewasqanchikqa yanqa. Diospa nisqanpa contranpi rurasqanku kaptinmi pipas paykuna hina kaspaqa huchapa sirvienten kanqa hinaspa mana allinpi tukunqa (Rom. 1:24-32).
17. ¿Imamantam Diosqa librawanchikman?
17 Jehová Diosman vidanchikta qoptinchikqa mana allinkunamantam librawasun. Imaynam allin doctorpas sasa hampiy atina onqoymanta hampiwanchikman chaynam Jehová Diospas huchamanta librawanchikman. Huchamantaqa librakusun hinaspa wiñay kawsaytaqa tarisun Diospa makinpi vidanchikta churaspallam otaq Jesuspa wañusqanrayku Payman qokuspallam (Juan 3:36). Imaynam doctorpa hampisqanmanta yachaspa astawan confianchik, chaynam Diosmanta astawan yachaspanchikpas aswan iñiyniyoq kasun. Chaymi Bibliataqa allinta estudiananchik Diosta reqsinapaq hinaspa astawan kuyanapaq, chay ruraymi yanapawasun paypaq kayta mana manchakunapaq (1 Juan 4:18).
18. ¿Imatam tarinqaku Diospaqña kaqkunaqa?
18 Jehová Diosqa imatapas akllakunanchikpaqmi saqewanchik. Chaymi Palabranpi sapakamaman niwanchik: ‘[Diosta kuyaspayá] qamkunapas hinaspa miraynikichikkunapas kawsakunaykichikpaq akllakuychik’, nispa (Deu. 30:19, 20). Payqa munanmi servinapaq sapakama tanteakunanchikta, chaynatam qawachisun kuyasqanchikta. Diospaqña kaspaqa hinallam libre kasun hinaspapas wiñaypaq kusikuytam tarisun.
19. ¿Imanasqataq Diospaq kaytaqa mana merecenchikchu?
19 Huchayoq kasqanchikraykum mana pantaq Diospaq kaytaqa mana merecenchikchu. Paypaq kaytaqa atinchik favorninta chaskispallam (2 Tim. 1:9). Pablom Jehová Diospaq kasqanchikmanta qellqarqa: “Kawsaspanchikqa Señorninchikpaqmi kawsachkanchik, wañukuspanchikqa Señorninchikpaqtaqmi wañukusun. Chaynaqa wañuspapas kawsaspapas Señorninchikpam kanchik”, nispa (Rom. 14:8). Segurom kachwan, vidanchikta qospanchikqa manam haykapipas ñakakusunchu.
¿Imatam niwaq?
• ¿Imakunapim yanapawanchik Diospaq kasqanchikqa?
• ¿Imanasqataq atichwan Diospa mañawasqanchikwan cumpliyta?
• ¿Imaynatam Diosqa serviqninkunata amparan?
[Kay yachachikuypa tapukuyninkuna]
[8 kaq paginapi dibujokuna]
Iñiqmasikikunata tapuy Diospaq kasqankumanta ima bendicionkuna chaskisqankuta
[10 kaq paginapi dibujo]
¿Imaynatam Jehová Dios amparawanchik?
