Te Riro Anga no Iehova​—E Aroa Ua

“No te Atu rai tatou.”​—ROMA 14:⁠8.

1, 2. (a) Eaa te tikaanga ngateitei tei rauka ia tatou? (e) Eaa te au uianga ta tatou ka akamanako?

E TIKAANGA ngateitei tei orongaia ki te iti tangata o Iseraela i te akakite anga a Iehova kia ratou e: “Ka riro ïa kotou ei apinga akaperepere maata naku, i te au tangata ravarai ra.” (Exo. 19:⁠5) I teia tuatau, e akangateiteianga katoa no te au mema o te putuputuanga Kerititiano kia riro no Iehova. (1 Pete. 2:9; Apo. 7:​9, 14, 15) E tikaanga ngateitei te reira te ka puapingaia tatou e tuatau ua atu.

² Kapiti mai ki te tikaanga ngateitei, e apainga katoa kia riro no Iehova. Penei ka manako tetai pae e: ‘Ka rauka ainei iaku i te rave i ta Iehova e tapapa maira iaku kia rave? E ua ake e topa au ki roto i te ara, ka kopae ainei aia iaku? Te riro anga no Iehova, ka akangere ainei te reira iaku i te turanga rangatira?’ Ka tau kia akamanakoia taua au mea ra. Te mea mua ra, e uianga ke atu tetai ka tau kia akamanako meitakiia: Eaa ua ai te au puapinga o te riro anga no Iehova?

Te Riro Anga no Iehova Taki Atu ki te Mataora

3. Akapeea ta Rahaba ikianga kia tavini ia Iehova i riro ei ei puapinga nona?

³ E puapingaia ana ainei te au tangata tei riro no Iehova, mei to ratou turanga? Akamanako ana i te turanga o Rahaba, e vaine akaturi e noo ra i Ieriko i taito. Kare e ekoko anga e kua utuutuia aia kia rave i te akamorianga viivii o te au atua o Kanaana. Inara, i tona rongo anga no runga i te au autuanga ta Iehova i oronga ki to Iseraela, kua kite aia i reira e ko Iehova te Atua mou. No reira kare aia i moumou ana i tona oraanga kia paruru i te au tangata ikiia no te  Atua, e kua tuku i tona oraanga ki roto i to ratou rima. Te karanga ra te Pipiria e: “Koia katoa oki te vaine akaturi ra ko Rahaba, kare aina aia i akatikaia i te angaanga, ka āriki ei aia i nga tutaka ra, e tuku atura oki na tetai mataara ke?” (Iako. 2:25) Akamanako ana i te au puapinga tei rauka iaia i te riro anga aia ei tuanga no te iti tangata viivii kore o te Atua, e iti tangata tei apiiia e te Ture a te Atua no runga i te aroa e te tuatua tau. Mei teaa ra tona rekareka e kua akaruke aia i tona oraanga o mua ana! Kua akaipoipo aia i tetai tangata ngati Iseraela e kua utuutu i tana tamaiti, ko Boaza, kia riro mai ei tangata meitaki tikai no te Atua.​—Iosu. 6:25; Ruta 2:​4-12; Mata. 1:5, 6.

4. Akapeea ta Ruta ikianga kia tavini ia Iehova i riro ei ei puapinga nona?

⁴ Kua iki katoa a Ruta o Moabi kia tavini ia Iehova. I tona meangiti anga, penei kua akamori ana aia ia Kemosa e tetai atu au atua ke o Moabi, inara kua apiiia aia no runga i te Atua mou, ko Iehova, e kua akaipoipo aia i tetai tangata ngati Iseraela tei puakapa mai ki roto i tona enua. (E tatau ia Ruta 1:​1-6.) I muri mai, ia Ruta e tona taokete ko Orapa e aru ra i to raua metua vaine ongai ko Naomi ki Betelehema, kua raurau atu a Naomi i te nga vaine mapu kia oki ki to raua kainga. Kare i te mea mama no raua kia noo i Iseraela. Ko Orapa ra, ‘kua oki akenei ki tona au tangata ra, e ki tona au atua,’ kare ra a Ruta i oki ana. Kua taangaanga aia i tona akarongo e kua kite e noai aia. Kua karanga atu aia kia Naomi e: “Auraka koe e tuatua raurau mai kiaku e akaruke ia koe, e kia oki au i toku nei aru anga atu ia koe: i te ngai taau e aere ra, e aere katoa ïa au; e te ngai taau e noo ra, e noo katoa ïa au ko toou iti-tangata, ko toku katoa ïa iti-tangata; e toou ra Atua, ko toku ïa Atua.” (Ruta 1:​15, 16) No tana ikianga kia tavini ia Iehova, kua puapingaia a Ruta mei te Ture a te Atua, tei akataka i tetai akanoonooanga no te au vaine takaua, te putaua e te aronga enua kore. I raro ake i te tauturu a Iehova, kua rauka iaia te mataora, te paruruanga, e te turanga ponuiaau.

5. Eaa taau i kite mai no runga i te au tangata e tavini akarongo mou ra ia Iehova?

⁵ Penei kua kite koe i tetai aronga tei tavini akarongo mou ana ia Iehova no te raungauru mataiti i muri ake i to ratou akatapuanga ia ratou uaorai kiaia. E ui kia ratou e i akapeea ratou i puapinga ai mei te tavini anga iaia. Noatu e e manamanata ana te katoatoa, te turuturu meitaki ra te akapapuanga i te tuatua a te tata taramo e: “E mataora te iti tangata ko Iehova to ratou Atua!”​—Sala. 144:15, NW.

Au Tapapaanga Tau a Iehova

6. Eaa ra tatou ka kore ei e mataku e penei ko te kore e rauka ia tatou i te rave i ta Iehova e tapapa maira ia tatou kia rave?

⁶ Penei kua akamanako ana koe me ka rauka ia koe i te rave i ta Iehova e tapapa maira ia koe kia rave. E mama ua kia manako apiapi no runga i te riro anga ei tavini no te Atua, te akono i tana ture, e te tuatua anga i roto i tona ingoa. Ei akaraanga, kare a Mose e manako ana e kua tukatau aia i te tonoia anga aia kia tuatua ki te ngati Iseraela e ki te ariki o Aiphiti. Inara kare ta te Atua i tapapa mei ia Mose i te mea tau kore. Na Iehova i ‘akakite kiaia i tana ka rave.’ (E tatau ia Exodo 3:11; 4:​1, 10, 13-15.) I te mea e kua ariki a Mose i te tauturu tei orongaia kiaia, kua kite aia i te rekareka i  te akatupu anga i te anoano o te Atua. Mei te reira rai, e tu tau to Iehova no tana e tapapa maira ia tatou. Te marama maira aia i to tatou tu apa ua, e te inangaro ra aia i te tauturu ia tatou. (Sala. 103:14) Te tavini anga i te Atua ei pipi na Iesu, e akamaroiroianga te reira e kare i te akaapiapi no te mea ko taua tu oraanga ra ka riro ei puapinga no etai ke e ka akarekareka i te ngakau o Iehova. Kua akakite a Iesu e: “E aere mai kotou kiaku nei, . . . naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku.”​—Mata. 11:​28, 29.

7. Eaa koe ka irinaki ei e ka tauturu a Iehova ia koe kia rave i tana e tapapa maira ia koe?

⁷ Ka oronga ua mai a Iehova i te akamaroiroianga te ka anoanoia e tatou, me irinaki ua rai tatou ki runga iaia no te maroiroi. Ei akaraanga, te taka ua ra e kare i te mea natura no Ieremia kia tuatua ma te mataku kore. No reira, i te ikianga a Iehova iaia kia riro mai ei peroveta Nona, kua na ko atu a Ieremia e: “Aue! e taku Atu e Iehova e! i na, kare au i kite i te tuatua: e tamaiti ua oki au nei.” I muri mai kua karanga katoa aia e: “Kare au e tuatua akaou i tona ra ingoa.” (Iere. 1:6; 20:⁠9) Tera ra, ma te akamaroiroianga a Iehova, kua rauka ia Ieremia i te tutu aere i tetai karere reka koreia no tetai 40 mataiti. Kua taokioki ua rai a Iehova i te akapapu anga iaia ki teia au tuatua e: “Ko au tei vaitata ia koe ei akaora ia koe, e e ora koe iaku.”​—Iere. 1:8, 19; 15:⁠20.

8. Akapeea tatou i te akaari anga e te irinaki ra tatou ia Iehova?

⁸ Mei ia Iehova rai i akamaroiroi ei ia Mose raua ko Ieremia, ka rauka iaia i te tauturu ia tatou kia rave i tana e tapapa maira i te au Kerititiano i teia tuatau. Ko te mea maata, koia oki kia irinaki ki runga i te Atua. Te na ko maira te Pipiria e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Mase. 3:5, 6) Te akaari ra tatou e te irinaki ra tatou ia Iehova me ariki tatou uaorai i te tauturu tana e oronga maira na roto i tana Tuatua e te putuputuanga. Me tuku tatou na Iehova e arataki ia tatou i roto i te oraanga, kare rava e apinga e rauka i te arai ia tatou kia vai akarongo mou kiaia.

Akaperepere a Iehova i Tona Iti Tangata ei Aronga Takitai

9, 10. Eaa te tu o te paruruanga ta Salamo 91 e taputou maira?

⁹ Te akamanako anga no runga i ta ratou ikianga kia akatapu ia ratou uaorai kia Iehova, penei kua manako tetai pae no runga i te kino ka tupu me ara ratou, me kare ratou e tau, e me kopaeia mai e Iehova. Te mea mataora ra, te oronga maira a Iehova i te paruruanga ta tatou e anoano ra ei paruru i to tatou pirianga akaperepere kiaia. Ka akara tatou e i akapeea te reira i te akakiteia mai anga i roto ia Salamo 91.

¹⁰ Te akamata ra taua taramo ra e: “Ko tei noo i raro ake i te tapoki o Tei Teitei ra, ka moe aia i raro ake i te Mana katoatoa ra. Te tuatua nei au kia Iehova, Ko koe toku akapuanga, e toku pinanga; taku Atua, e taku i irinaki nei. Nana tika rai koe e akaora i te ereere a te kimi manu ra.” (Sala. 91:​1-3) Ka akara ana e te taputou maira te Atua i te paruru i te aronga tei inangaro e tei irinaki iaia. (E tatau ia Salamo 91:9, 14.) Eaa te tu o te paruruanga tana e tuatua ra? Kua paruru a Iehova i tetai au tavini nona i taito i te pae kopapa​—i roto i tetai au turanga, ei akaora i te papaanga tupuna e taki atura ki te Mesia tei taputouia. Tera ra, e maata te au tane akarongo mou tei akamouauriia, tei tamamaeia, e tei tamateia e te au angaanga kino a Satani ei taruri ke i to ratou akarongo ki te Atua. (Ebe. 11:​34-39) Kua kite ratou i te tu ngakau toa tei anoanoia kia akakoromaki, no te mea kua paruru a Iehova ia ratou mei te kino te ka takore i to ratou tu tiratiratu. No reira, te tau ra kia maramaia te Salamo 91 ei taputou no te paruruanga i te pae vaerua.

11. Eaa “te tapoki o Tei Teitei ra,” e koai ta te Atua e paruru ra i roto i reira?

¹¹ “Te tapoki o Tei Teitei ra” tei taikuia e te tata taramo, e ngai akatutu no te paruruanga pae vaerua. I roto i reira, ko te aronga e puakapa ra e te Atua ei au manuiri nana, ka ora mai mei tetai ua atu mea e tetai ua atu tangata te ka takino i to ratou akarongo e to ratou inangaro no te Atua. (Sala. 15:1, 2; 121:⁠5) E ngai muna te reira no te mea kare te aronga irinaki kore e kite ana i te reira ngai. I konei, te paruru ra a Iehova i te au tangata e karanga ra e: ‘Ko koe taku  Atua, e taku e irinaki nei.’ Me noo tamou tatou i roto i teia ngai akaruruanga, kare tatou e manamanata puapinga kore ua e ka ngere tatou i ta te Atua akaperepereanga me topa tatou ki roto i te ereere a Satani, “te kimi manu.”

12. Eaa te au kino te ka riro ei takino i to tatou pirianga ki te Atua?

¹² Eaa te au kino te ka riro ei takino i to tatou pirianga akaperepere ki te Atua? E maata te au kino ta te tata taramo e taiku maira, ko “te maki-mate e aere ua i te poiri ra; . . . [e] te pou e pou ei i te avatea ra.” (Sala. 91:5, 6) E maata te aronga ta “te kimi manu” i marei ki te anoano nui kia irinaki te tangata ia ratou uaorai. (2 Kori. 11:⁠3) Ka marei aia i etai atu na te akatupu anga i te noinoi, te ngakau parau e te inangaro maata i te apinga pae kopapa. Ko etai, ka akavare aia ia ratou ki te au apiianga a te tangata mei te akaepaepaanga enua, te apiianga o te mea tupu ua mai, e te akonoanga pikikaa. (Kolo. 2:⁠8) E e maata tei akavareia ki roto i te puereere o te pirianga ainga tei tureia. Kua riro teia au kino mei te maki mate te tu ei akangere i te mirioni ua atu i to ratou inangaro no te Atua.​—E tatau ia Salamo 91:​7-10; Mata. 24:⁠12.

Paruruanga i Toou Inangaro no te Atua

13. Akapeea a Iehova me paruru ia tatou mei te au kino te ka riro ei takino i to tatou turanga pae vaerua?

¹³ Akapeea ana a Iehova me paruru i tona iti tangata mei teia au kino pae vaerua? Te na ko maira te taramo e: “Ka ikuiku oki aia i tana au angela ia koe, ei tiaki ia koe i toou au aerenga katoa ra.” (Sala. 91:11) Te arataki ra e te paruru ra te au angera o te rangi ia tatou kia rauka ia tatou te tutu aere i te tuatua meitaki. (Apo. 14:⁠6) Kapiti mai ki te au angera, ka riro te aronga pakari Kerititiano ei paruru ia tatou na roto i te mou piri anga ki te au Tuatua Tapu i roto i ta ratou apiianga, kia kore tatou e akavareia e te au manako pikikaa. Ka rauka ia ratou te oronga tataki tai i te tauturu ki tetai ua atu e kite ra i te tu ngata kia autu i te au tu o teianei ao. (Tito 1:9; 1 Pete. 5:⁠2) Pera katoa, te oronga maira “te tavini akono meitaki e te pakari” i te kai pae vaerua ei paruru ia tatou mei te apiianga o te au mea tupu ua mai, te timataanga o te au anoano tika kore o te ainga, te aruaru anga i te au apinganui e te turanga papanunui, e tetai atu au anoano e te au akakeuanga kino. (Mata. 24:45) Eaa te mea tei tauturu ia koe kia patoi atu i etai o taua au kino ra?

14. Ka akapeea tatou me taangaanga i te paruruanga ta te Atua e oronga maira?

¹⁴ Eaa ta tatou ka tau kia rave kia noo tamou ki raro i to te Atua ngai “tapoki” no te paruruanga? Mei ia tatou rai e paruru ua ana ia tatou uaorai mei te au kino i te pae kopapa, mei te au u anga poitirere, te aronga apa i te ture, me kore i te au maki, kia pera katoa tatou i te paruru ua anga ia tatou uaorai mei te au kino i te pae vaerua. No reira, ka anoanoia tatou kia taangaanga putuputu i te au aratakianga ta Iehova e oronga maira kia tatou, i roto i ta tatou au puka e i ko i te au uipaanga putuputuanga e te au akaputuputuanga. Kia pati tatou i te tauturu a te aronga pakari. E kare ainei tatou e puapingaia ana mei te au tu tukeke tei akaariia mai e to tatou au tungane e te au tuaine Kerititiano? Tika rai, ka riro to tatou kapitianga ki te putuputuanga,  ei tauturu ia tatou kia rauka te pakari.​—Mase. 13:20; tatau ia 1 Petero 4:⁠10.

15. Eaa ra koe ka tau ei kia irinaki e ka rauka ia Iehova i te paruru ia koe mei tetai ua atu mea te ka akangere ia koe i tana akaperepereanga?

¹⁵ Kare e tumu kia ekoko tatou e ka rauka ia Iehova i te paruru ia tatou mei tetai ua atu mea, te ka akangere ia tatou i tana akaperepereanga. (Roma 8:​38, 39) Kua paruru aia i te putuputuanga mei te au enemi ririnui o te akonoanga e te poritiki, tei akakoro kare e kia tamate ia tatou, mari ra kia akatakake mai ia tatou mei to tatou Atua tapu. Kua tika te taputou a Iehova e: “Te taoonga ra noou i angaiaʼi ra, kare ïa e manuia.”​—Isa. 54:⁠17.

Naai e Oronga Mai i to Tatou Turanga Rangatira?

16. Eaa i kore ei e rauka i to teianei ao kia oronga mai i te turanga rangatira no tatou?

¹⁶ Ko te riro anga no Iehova, ka akangere ainei te reira ia tatou i te turanga rangatira? Kare, ko te riro anga no teianei ao te ka akangere ia tatou i te turanga rangatira. Kua takake roa mai to teianei ao mei ia Iehova e te akatereia ra e te atua kino tei akatuikaa i te au tangata. (Ioa. 14:30) Ei akaraanga, te taangaanga ra te akatereanga a Satani i te au taomianga o te akatereanga o te pae puapinga, kia akangere i te tangata i to ratou turanga rangatira. (Akaaite ia Apokalupo 13:​16, 17.) E mana pikikaa katoa to te ara i te akatuikaa i te tangata. (Ioa. 8:34; Ebe. 3:13) No reira, noatu te taputou maira te aronga irinaki kore i te turanga rangatira me turuturu ratou i tetai tu oraanga te patoi ra i te au apiianga a Iehova, ko tetai ua atu te ka akarongo kia ratou, kare e roaia ka kite e kua akatuikaaia ratou ki tetai tu oraanga rave ara e te viivii.​—Roma 1:​24-32.

17. Eaa te turanga rangatira ta Iehova e oronga maira no tatou?

¹⁷ I tetai tua ra, ka akarangatira a Iehova ia tatou mei te au mea te ka akakino ia tatou me irinaki tatou iaia kia akono ia tatou. I roto i tetai au tu, kua aite rai to tatou turanga mei te tangata tei tuku i tona oraanga ki roto i te rima o tetai taote karape i te vavai, te ka rauka i te rapakau iaia mei tetai maki te ka takino i tona oraanga. Tei raro tatou pouroa i tetai turanga e takino ra i to tatou oraanga​—ko te ara tei iri mai ki runga ia tatou. Me irinaki ua tatou e ka akono mai a Iehova ia tatou, tei akatumuia ki runga i te atinga o Karaiti, e rauka ai ia tatou te manakonakoanga kia matara mai mei te au tu kino o te ara e kia ora e tuatau ua atu. (Ioa. 3:36) Mei to tatou irinakianga rai i roto i te taote vavai e maata ua maira no te mea, kua kite tatou i tona rongo, ka maata atu rai to tatou irinakianga i roto ia Iehova ia tatou e apii ua atura no runga iaia. No reira, ka apii meitaki ua atu rai tatou i te Tuatua a te Atua no te mea, ka tauturu te reira ia tatou kia inangaro iaia i roto i te tu te ka akakore i te mataku no te riro anga nona.​—1 Ioa. 4:⁠18.

18. Eaa te ka tupu no te aronga tei riro no Iehova?

¹⁸ Te oronga maira a Iehova i te tikaanga no te tangata pouroa kia iki. Te akakite maira Tana Tuatua e: “Ka rave i te ora, kia ora koe e toou katoa uanga: Kia inangaro oki koe i to Atua ra ia Iehova.” (Deu. 30:​19, 20) Te inangaro maira aia ia tatou kia akaari i to tatou inangaro nona na te rave anga i ta tatou uaorai ikianga kia tavini iaia. Kare te reira e akangere ia tatou i te turanga rangatira, papu ra e ko te riro anga no te Atua ta tatou e inangaro nei, te ka akatupu i te mataora kia tatou.

19. Eaa ra te riro anga no Iehova ka karangaia ai e e aroa ua?

¹⁹ Ei aronga ara, kare tatou e tau kia riro no te Atua ara kore. Na te aroa ua o te Atua e rauka ai teia. (2 Timo. 1:⁠9) No reira, kua tata a Paulo e: “Te ora nei tatou, i ora ïa tatou ei akatupu i ta te Atu; e te mate nei tatou, i mate ïa tatou ei akatupu i ta te Atu: e teianei, te ora nei tatou, e te mate nei oki, no te Atu rai tatou.” (Roma 14:⁠8) Papu, e kare rava tatou e tataraara no tei iki kia riro no Iehova.

Akapeea Koe me Pau?

• Eaa ua ai te au puapinga o te riro anga no Iehova?

• Eaa ra i rauka ai ia tatou i te rave i ta te Atua e tapapa maira ia tatou kia rave?

• Akapeea ana a Iehova me oronga mai i te paruruanga no tona au tavini?

[Au Uianga Apii]

[Tutu i te kapi 8]

E ui ki etai atu e i akapeea ratou i puapinga ai mei te riro anga no Iehova

[Tutu i te kapi 10]

Eaa tetai au mataara e oronga mai ana a Iehova i te paruruanga?