Kuba Seluhlangotsini LwaJehova—Ngumusa Lomkhulu
Kuba Seluhlangotsini LwaJehova—Ngumusa Lomkhulu
“SibaJehova.”—ROM. 14:8. NW
1, 2. (a) Nguliphi lilungelo lesinalo? (b) Ngumiphi imibuto lesitawucoca ngayo?
CABANGA ngelilungelo leliligugu lelaniketwa sive sema-Israyeli ngesikhatsi Jehova atsi kuso: “Niyawuba ligugu lami emkhatsini wato tonkhe tive.” (Eks. 19:5) Lamuhla, emalunga elibandla lebuKhristu anelilungelo lekuba seluhlangotsini lwaJehova. (1 Phet. 2:9; Semb. 7:9, 14, 15) Lelilungelo lingasizuzisa kuze kube phakadze.
2 Ngephandle kwekuba ligugu, kuba seluhlangotsini lwaJehova kuphindze kukwente utive ubophekile. Labanye bangatibuta: ‘Ngitawukhona yini kwenta loko Jehova lalindzele kutsi ngikwente? Nangabe kwenteka ngona, utangilahla yini? Kuba seluhlangotsini lwaJehova kutangemuka yini inkhululeko?’ Kucabanga ngalendlela kubaluleke kakhulu. Noko-ke, kwekucala, kunalomunye umbuto lodzinga kucatjangelwa: Tiyini tinzuzo tekuba sekuhlangotsini lwaJehova?
Kuba Seluhlangotsini LwaJehova Kuletsa Injabulo
3. Kukhetsa kwaRahabi kukhonta Jehova kwamzuzisa njani?
3 Bantfu labaseluhlangotsini lwaJehova bayazuza yini ngaloko? Ase ucabange ngendzaba yaRahabi, ingwadla leyayihlala eJerikho lasendvulo. Abekhuliswe ngendlela yekutsi angene-shi emikhubeni lengcolile nasekukhonteni bonkulunkulu bemaKhenani. Noko, nakeva kutsi Jehova usite ema-Israyeli aphumelela etimphini, wacaphela kutsi Jehova unguNkulunkulu weliciniso. Ngako wafaka kuphila kwakhe engotini kute nje asindzise bantfu baNkulunkulu labakhetsile, futsi ngekwenta kanjalo wabeka likusasa lakhe etandleni tabo. LiBhayibheli litsi: “Kanjalo-ke naRahabi, ingwadla, akazange yini emukelwe nguNkulunkulu kutsi ulungile ngemisebenti yekwemukela titfunywa wabuye watikhipha ngalenye indlela?” (Jak. 2:25) Cabanga ngetinzuzo latitfola ngalesikhatsi aba yincenye yetikhonti taNkulunkulu letimkhonta ngalokuhlantekile, bantfu labafundziswa nguMtsetfo waNkulunkulu ekuboniseni lutsandvo nekulunga. Wajabula kakhulu ngekutsi wayishiya phasi indlela labephila ngayo ekucaleni! Wabese ushada nendvodza yaka-Israyeli, futsi wakhulisa indvodzana yakhe lenguBowazi, leyaba sikhonti saNkulunkulu lesihamba embili.—Josh. 6:25; Ruthe 2:4-12; Mat. 1:5, 6.
4. Kukhetsa kwaRuthe kukhonta Jehova kwamzuzisa njani?
4 Ruthe wakaMowabi naye wakhetsa kukhonta Jehova. Aseyintfombatana, kungenteka kutsi abekhonta Khemoshi kanye nalabanye bonkulunkulu bakaMowabi, kodvwa kamuva wamati Nkulunkulu weliciniso, Jehova. Wase ushada nendvodza yaka-Israyeli lebeyite eveni lakubo kute itfole sivikelo. (Fundza Ruthe 1:1-6.) Kamuva njengobe Ruthe nemlamu wakhe, Opha, bebahamba neninatala wabo, Nawomi, balibhekise eBhetlehema, Nawomi wabacela kutsi bancandzeke babuyele emakhaya. Kwakungeke kube lula ngabo kusheshe batayele ka-Israyeli. Opha ‘wahamba wabuyela kubantfu bakubo,’ kodvwa Ruthe akancandzekanga. Wakhombisa kukholwa kwakhe futsi bekati kutsi ngubani lafuna kuba ngewakhe. Watjela Nawomi: “Ngicela kutsi ungangincengi kutsi ngikushiye. Ngiyekele, ngihambe nawe. Lapho uya khona, nami ngitakuya khona; lapho uyawuhlala khona, nami ngiyawuhlala khona. Sive sakini, kuyawuba sive sami; naNkulunkulu wakho kube nguNkulunkulu wami.” (Ruthe 1:15, 16) Ngesizatfu sekutsi wakhetsa kukhonta Jehova, Ruthe wazuza eMtsetfweni waNkulunkulu lowawunakekela kakhulu bafelokati, labahluphekile kanye nalabo labebete indzawo yekuhlala. Ngekuba seluhlangotsini lwaJehova watfola injabulo, sivikelo kanye nekulondzeka.
5. Yini loyicaphelako ngebantfu labakhonta Jehova ngekwetsembeka?
5 Kusenekwentaka uyabati labatsite lokutsite ngemuva kwekuba sebatinikele kuJehova bamkhonta ngekwetsembeka emashumi eminyaka. Babute kutsi bazuzeni ekukhonteni kwabo Jehova. Nobe nje kute lote tinkinga ekhatsi kwabo, bufakazi benjabulo lebanayo busekela emavi emhlabeleli latsi: “Sibusisiwe leso sive Nkulunkulu waso lekunguSimakadze [Jehova]!”—Hla 144:15.
Jehova Wemukela Loko Lesingakwenta
6. Kungani kungafanele sesabe kutsi angeke sikhone kwenta loko Jehova lakulindzele kitsi?
6 Kusenekwenteka uke watibuta kutsi vele utawukwati yini kwenta loko Jehova lakulindzele kutsi ukwente. Kulula kutiva ukhatsatekile ngesizatfu sekutsi utawuba yinceku yaNkulunkulu, uphile ngemitsetfo yakhe futsi ukhulume ngelibito lakhe. Sibonelo saloku kutsi Mosi wativa angelutfo ngalesikhatsi atfunywa kutsi ayokhuluma nesive saka-Israyeli nasenkhosini yaseGibhithe. Kodvwa loko akusho kutsi Nkulunkulu abenike Mosi umsebenti langeke awukhone. Jehova ‘wamtjela loko kwakufanele akwente.’ (Fundza Eksodusi 3:11; 4:1, 10, 13-15.) Njengobe Mosi alwemukela lusito laniketwa lona, wayitfola injabulo yekuyenta ngalokugcwele intsandvo yaNkulunkulu. Natsi ngendlela lefananako, Jehova angasicabangela ngaloko lalindzele kutsi sikwente. Uyakucaphela kungapheleli kwetfu, futsi ufuna kusisita. (Hla. 103:14) Kukhonta Nkulunkulu njengemlandzeli waJesu kuyacabula kunekutsi kube ngumtfwalo, ngobe imphilo lenjalo ilusito kulabanye futsi yenta inhlitiyo yaJehova ijabule. Jesu watsi: “Wotani kimi, . . . Ngitaniphumuta. Bekani lijoka lami etikwenu, nifundze kimi, ngobe mine ngimnene, ngitfobekile ngenhlitiyo.”—Mat. 11:28, 29.
7. Ungaciniseka njani kutsi Jehova utakusita wente loko lalindzele kutsi ukwente?
7 Jehova ngaso sonkhe sikhatsi utasiniketa sikhutsato lesisidzingako kuphela nje nangabe setsembele kuye kute asiphe emandla. Nasi sibonelo: Jeremiya ngekwemvelo abengasiso sikhulumi lesinhle. Kungako lapho Jehova amkhetsa kutsi abe ngumphrofethi, watsi: “Awu, Nkhosi Simakadze [Jehova], mine angikwati kukhuluma; ngisengumntfwana.” Kamuva waze watsi: “Ngeke ngisakhuluma egameni lakhe.” (Jer. 1:6; 20:9) Kodvwa ngesikhutsato lasitfola kuJehova, wakwati kushumayela iminyaka lengu-40 kubantfu labebangafuni nhlobo kuva ngaNkulunkulu. Jehova wachubeka amcinisa ngalamavi: “Mine nginawe, futsi ngiyawukuphephisa.”—Jer. 1:8, 19; 15:20.
8. Sikhombisa njani kutsi siyametsemba Jehova?
8 Njengobe Jehova akhona kucinisa Mosi naJeremiya, natsi angasisita sente loko lakulindzele kumaKhristu lamuhla. Intfo lehamba embili kwetsembela kuNkulunkulu. LiBhayibheli litsi: “Tsemba Simakadze [Jehova] ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” (Taga 3:5, 6) Sikhombisa kutsi siyametsemba Jehova ngekwemukela lusito lasiniketa lona ngeliVi lakhe nangelibandla. Nangabe sivumela kutsi Jehova acondzise tinyatselo tetfu ekuphileni, kute lokutasivimba kutsi sihlale setsembekile.
Jehova Unakekela Umuntfu Nemuntfu
9, 10. Tihlabelelo 91 tisetsembisa luphi luhlobo lwesivikelo?
9 Basacabanga ngekutinikela kuJehova, kusenekwenteka labanye bayatibuta ngengoti labangahle bawele kuyo yekona, bese baba bantfu labangafaneleki kuJehova futsi abalahle. Kuyajabulisa kutsi, Jehova usiniketa lonkhe lusito lesiludzingako kute sivikele buhlobo betfu lobuligugu naye. Asesibone kutsi loku kuchazwa njani encwadzini yetiHlabelelo 91.
10 Umhlabeleli ucala ngekutsi: “Lowo lohlala ekusitsekeni kuLosetikwako Konkhe ukhosele ekhwapheni laSomandla. Angasho kuSimakadze atsi: ‘Wena usiphephelo sami nenqaba yami, unguNkulunkulu wami lengetsembele kuye.’ Nguye-ke Simakadze lotakwephula elugibeni lwebacuphi.” (Hla. 91:1-3) Caphela kutsi Nkulunkulu wetsembisa kuvikela labo labamtsandzako nalabametsembako. (Fundza Tihlabelelo 91:9, 14.) Abekhuluma ngaluphi luhlobo lwesivikelo? Jehova esikhatsini lesendlulile wavikela tikhonti takhe ngalokucondzile kute ente kutsi luhla lwelutalo lwaMesiya lungaphatamiseki. Nobe kunjalo, emadvodza lamanyenti latsembekile aboshwa, ahlushwa, futsi lamanye awo abulawa ngekutsi abehlaselwa nguSathane futsi afuna kuwenta angetsembeki kuNkulunkulu. (Heb. 11:34-39) Atfola sibindzi sekubeketela ngobe Jehova wawavikela etingotini letatingawenta ephule bucotfo kuye. Ngako-ke, Tihlabelelo 91 timane tisikhombisa kutsi Jehova angasivikela ngakamoya.
11. Iyini ‘indzawo lesitsekile yaLosetikwako Konkhe,’ futsi bobani Nkulunkulu labavikelako kuyo?
11 ‘Indzawo lesitsekile yaLosetikwako Konkhe’ umhlabeleli lakhuluma ngayo imane nje iyindzawo lengumfanekiso lesivikelo sakamoya. Labo labahlala naNkulunkulu kuyo njengetivakashi takhe, bavikelekile kunobe ngabe nguyiphi intfo nobe umuntfu longasongela kukholwa kwabo kanye nelutsandvo lwabo ngaNkulunkulu. (Hla. 15:1, 2; 121:5) Iyindzawo lesekusitsekeni ngobe labo labangakholwa ngeke bakwati kuyibona. Kule ndzawo Jehova uvikela bantfu labatsi: ‘Wena unguNkulunkulu wami lengimetsembako.’ Nangabe sihlala kule ndzawo yesiphephelo, akudzingeki sikhatsateke ngekutsi sitawulahlekelwa ngumusa waNkulunkulu sibanjwe sitsiyo saSathane, ‘umcuphi.’
12. Ngutiphi tingoti letisongela buhlobo betfu naNkulunkulu?
12 Ngutiphi tingoti letisongela buhlobo betfu lobuligugu naNkulunkulu? Umhlabeleli ubhale ngetingoti letinyenti, emkhatsini wato ukhuluma ‘ngengoti lenkhulu levumbuka ebumnyameni, namashayacotfule wesifo lobhubhisako emini.’ (Hla. 91:5, 6) ‘Umcuphi’ utsiye bantfu labanyenti ngesifiso sebugovu sekufuna kutibusa. (2 Khor. 11:3) Ubamba labanye ngekutsi akhutsate bugovu, kutikhukhumeta kanye nekufuna umcebo. Labanye ubadukisa ngekutsi abente balwele emave akubo, ngemfundziso yekutigucukela kwemvelo kanye nangenkholo yemanga. (Khol. 2:8) Katsi labanye ubabambe ngekutsi abente bawele elugibeni lekulalana ngalokungekho emtsetfweni. Tintfo letiyingoti letifanana naleti tibangele kutsi tigidzi tebantfu tilahlekelwe lutsandvo lwato ngaNkulunkulu.—Fundza Tihlabelelo 91:7-10; Mat. 24:12.
Indlela Yekuvikela Lutsandvo Lwakho NgaNkulunkulu
13. Jehova usivikela njani etingotini letisisongelako ngakamoya?
13 Jehova ubavikela njani bantfu bakhe kuletingoti? Umhlabeleli utsi: “Ngobe Nkulunkulu uyawuyala tingilosi takhe ngawe tikulondvolote ekuhambeni kwakho konkhe.” (Hla. 91:11) Tingilosi tiyasicondzisa tiphindze tisivikele kute sikwati kushumayela ngelivangeli lembuso. (Semb. 14:6) Ngetulu kwaloko lokwentiwa tingilosi, labadzala labangemaKhristu ngekubambelela eVini nabafundzisa, bayasivikela ekudukisweni timfundziso temanga. Banganiketa umuntfu ngamunye lowehlulekako kulwisana nenkinga yekuncoba imikhuba yalelive lusito laludzingako. (Thit. 1:9; 1 Phet. 5:2) “Sisebenti lesetsembekile nalesihlakaniphile” naso sisinika kudla kwakamoya lokusivikelako etimfundzisweni letinjengekutigucukela kwemvelo, esifisweni sekutiphatsa lokubi, esifisweni sekufuna umcebo, ludvumo, ngisho nakuletinye tifiso letinyenti letiyingoti. (Mat. 24:45) Yini wena lekusitile kutsi ukwati kumelana naletinye taletingoti?
14. Singalusebentisa njani lusito Nkulunkulu lasiniketa lona kute sivikeleke?
14 Yini lokudzingeka siyente kute sihlale ‘endzaweni lesitsekile’ yaNkulunkulu yesivikelo? Njengobe kufanele ngaso sonkhe sikhatsi sihlale sitivikela etingotini, ebugebengwini kanye nasekutfoleni tifo letitsatselwanako, ngendlela lefananako, kufanele sitivikele njalo etingotini takamoya. Ngaso sonkhe sikhatsi kufanele sisebentise ticondziso Jehova lasiniketa tona etincwadzini tetfu, emihlanganweni yelibandla kanye nasemihlanganweni lemikhulu. Kufanele sifune seluleko kulabadzala. Asizuzi yini etimfanelweni letinyenti letiboniswa bazalwane nabodzadze wetfu labangemaKhristu? Impela, kutihlanganisa nelibandla kusenta sihlakaniphe.—Taga 13:20; fundza 1 Phetro 4:10.
15. Kungani ungaciniseka kutsi Jehova angakuvikela kunome ngabe yini lengabangela kutsi ulahlekelwe kwemukelwa nguye?
15 Asinaso sizatfu sekungabata kutsi Jehova angasivikela kunome ngabe yini lengabangela kutsi silahlekelwe kwemukelwa nguye. (Rom. 8:38, 39) Ulivikele libandla enkholweni yemanga kanye nasetitseni tembusave letingafuni kusibulala kodvwa umgomo wato, kusehlukanisa naNkulunkulu wetfu longcwele. Setsembiso saJehova sibe liciniso: “Kute sikhali lesilolelwa kulwa nawe lesiyawuphumelela.”—Isa. 54:17.
Ngubani Losinika Inkhululeko?
16. Kungani live lingeke lisinike inkhululeko?
16 Kuba seluhlangotsini lwaJehova kutasemuka yini inkhululeko? Cha, angeke. Ngalokwehlukile, kuba yincenye yelive ngiko lokungasemuka inkhululeko. Lelive lehlukanisiwe naJehova futsi libuswa ngunkulunkulu lonelunya logcilata bantfu. (Joh. 14:30) Sibonelo saloko kutsi simiso saSathane sisebentisa kucindzeteleka ngetemnotfo kute semuke bantfu inkhululeko. (Catsanisa neSembulo 13:16, 17.) Sono naso sinemandla ekugcilata bantfu. (Joh. 8:34; Heb. 3:13) Ngako-ke, ngisho nobe labo labangakholwa betsembisa inkhululeko ngalesikhatsi bakhutsata indlela yekutiphatsa lephambene netimfundziso taJehova, nome ngabe ngubani lobalalelako angatitfola sekasigcila sesono kanye nesemphilo lengajabulisi.—Rom. 1:24-32.
17. Nguyiphi inkhululeko Jehova lasinika yona?
17 Kulolunye luhlangotsi, Jehova utasikhulula kunome ngabe yini lengasilimata nangabe setsembela kuye ngalokuphelele. Simo setfu sifanana nesemuntfu lowetsembele kudokotela lonelikhono longamsindzisa esimeni lesisongela kuphila kwakhe. Sonkhe sisesimeni lesisongela kuphila kwetfu—sono lesasizuza njengelifa. Yingci nje nangabe setsembela kuJehova, ngesisekelo semhlatjelo waKhristu singakwati kulwisana nemiphumela yesono futsi siphile phakadze. (Joh. 3:36) Njengobe litsemba letfu ngalodokotela lingakhula nasiva ngebantfu labelaphile, nangendlela lefananako litsemba letfu ngaJehova litawukhula nangabe sichubeka sifundza ngaye. Ngaso sonkhe sikhatsi sifundza liVi laNkulunkulu ngekunakisisa ngobe loko kutasisita kusente simtsandze ngendlela letasenta singakwesabi kuba seluhlangotsini lwakhe.—1 Johane 4:18.
18. Utawuba yini umphumela kulabo labakhetse kuba seluhlangotsini lwaJehova?
18 Jehova unika bonkhe bantfu inkhululeko yekutikhetsela. LiVi lakhe litsi: “Khetsani kuphila, kuze niphile nine kanye nebantfwabenu, kuze nitsandze Simakadze [Jehova] . . . wenu.” (Dut. 30:19, 20) Jehova ufuna sibonise lutsandvo kuye ngekutsi sikhetse kukhonta yena. Kunekutsi kusemuke inkhululeko, kuba seluhlangotsini lwaNkulunkulu lesimtsandzako ngalokucinisekile kutasiletsela injabulo.
19. Kungani kuba seluhlangotsini lwaJehova kungumusa lomkhulu?
19 Njengobe sitoni, asikufanelekeli kuba seluhlangotsini lwaNkulunkulu lophelele. Kodvwa ngemusa waNkulunkulu lomkhulu siyakwati kuba seluhlangotsini lwakhe. (2 Thim. 1:9) Ngako, Pawula watsi: “Nasiphila, siphilela iNkhosi [Jehova], nome sifa sifela iNkhosi, ngako-ke nome siphila nome sifa sibeNkhosi.” (Rom. 14:8) Ngalokucinisekile angeke sitisole ngekutsi sikhetse kuba seluhlangotsini lwaJehova.
Ungaphendvula Njani?
• Ngutiphi tinzuzo tekuba seluhlangotsini lwaJehova?
• Yini lesenta sikwati kwenta loko Nkulunkulu lakulindzele kitsi?
• Jehova utivikela njani tikhonti takhe?
[Imibuto Yesihloko Lesifundvwako]
[Titfombe ekhasini 15]
Buta labanye kutsi baye bazuza njani ngekuba seluhlangotsini lwaJehova
[Sitfombe ekhasini 16]
Ngutiphi tindlela Jehova lasivikela ngato?