Ikuba Bantu ba Jehova Ncoolwe Cipati

“Tuli bakwe Mwami.”—ROM. 14:8.

1, 2. (a) Ino ncoolwe nzincotujisi?? (b) Ino mibuzyo nzi njotutiilange-lange?

BANA Israyeli bakapegwa coolwe citaliboteli Jehova naakabaambila kuti: “Muyooyandika mumeso aangu kwiinda bamasi boonse.” (Kul. 19:5) Mazuba aano, ibantu bali mumbungano ya Banakristo abalo bali acoolwe cakuba bantu ba Jehova. (1 Pet. 2:9; Ciy. 7:9, 14, 15) Eeci coolwe ncotujisi, cilakonzya kutugwasya lyoonse.

² Nokuba boobo ikuba bantu ba Jehova citupa mukuli. Ibamwi inga balibuzya kuti: ‘Sena ndiyakucikonzya kucita zyoonse Jehova nzyayanda kuti ndicite? Ikuti ndikabisye, sena uyakundikaka? Sena kuba muntu wa Jehova kuya kundipa kuti kanditaangulukide? Mibuzyo iili boobu ilayandika kwiibikkila maano. Pele kuli mubuzyo umwi ngotweelede kusaanguna kulanga-langa wakuti: Ino kuba muntu wa Jehova cigwasya buti?

Kuba Muntu wa Jehova Kulakkomanisya

3. Ino mbuti Rahabu mbwaakagwasyigwa akaambo kakusala kubelekela Leza?

³ Sena bantu ba Jehova kuli bubotu mbobajana? Amubone makani aa Rahabu, imukaintu muvwuule iwakali kukkala mucisi ca Jeriko yansiku. Cakutadooneka, wakali kukomba baleza baku Kanana. Nokuba boobo, naakamvwa Jehova mbwaakali kugwasya bana Israyeli kuti bazunde masi aambi, wakazyiba kuti Jehova ngu Leza wakasimpe. Aboobo wakalibikka muntenda akaambo kakuti wakasisa bantu ba Leza ibasalidwe, mpoonya wakazyi kulongezyegwa kumbele. Ibbaibbele lyaamba  kuti: “Alakwe Rahabi sibwaamu sa teewakalulamikwa kumilimo awo naakasamausya batumwa akubapilula kunzila imbi?” (Jak. 2:25) Amuyeeye buyo mbwaakagwasyigwa naakaba akati kabantu ba Leza basalala, ibantu bakayiisyigwa a Mulawo wa Leza ibakali kumvwana akucita zyintu munzila iiluleme. Eelyo kaka cakamukkomanisya kapati kuleka micito yakwe yakaindi! Wakakwatwa kumuna Israyeli akuzyala mwana, Boazi, iwakazyi kuba muntu wa Leza.—Jos. 6:25; Rut. 2:4-12; Mt. 1:5, 6.

4. Ino Rute wakagwasyigwa buti akaambo kakusala kubelekela Jehova?

⁴ Rute waku Moabu awalo wakasala kubelekela Jehova. Naakacili mwana, ndiza wakali kukomba Kemosi abaleza bambi baku Moabu, pele wakazikumuzyiba Leza wakasimpe Jehova alimwi wakakwatwa kumuna Israyeli iwakali kutija nkondo iwakakkala mucisi oomu. (Amubale Rute 1:1-6.) Kumbele aamazuba, Rute amukwasyinyina Olipa nibakali kuyanda kucilila ba Naomi banyinazyala ku Betelehemu ba Naomi bakabaambila bamakaintu aaba kuti bapiluke kwabo, akaambo kakuti ciya kubakatazya kukkala mu Israyeli. Olipa “wapiluka kulibanyina akumizimu yakwe,” pele Rute tanaakapiluka pe. Wakacita kweelana alusyomo lwakwe alimwi wakatondezya ngwaakali kusyoma. Wakaambila Naomi kuti: “Utandisungilizyi kukusia nanka kuleka kukutobela, nkaambo kufumbwa nkoya yebo ndaya ambebo, nkoyookala yebo njookala ambebo. Bantu bako bayooba bantu bangu, a-Leza wako uyooba Leza wangu.” (Ruth 1:15, 16) Akaambo kakuti wakasala kubelekela Jehova, Rute wakagwasyigwa a Mulawo wa Leza, wakali kwaamba mbobakonzya kugwasyigwa bamukabafwu, ibacete abantu ibatakajisi kwakukkala. Kuli Jehova, wakalikkomene alimwi wakali kwabilidwe.

5. Ino ncinzi ncomwaiya kubantu ibabelekela Jehova cakusyomeka?

⁵ Ndiza kuli mbomuzyi ibakalyaaba kaindi kuli Jehova ibacimubelekela aino. Amubabuzye mbobagwasyigwa akaambo kakumubelekela. Nokuba kuti kunyina muntu uutajisi mapenzi, kuli bumboni bunji butondezya kuti majwi aasintembauzyo ngamasimpe aakuti: “Bali acoolwe bantu bajisi Jehova kuba Leza wabo!”—Int. 144:15.

Jehova Ulangila Buyo Nzyomukonzya Kacita

6. Ino nkaambo nzi ncotuteelede kuyoowa kuti tatukacikonzyi kucita nzyayanda Jehova?

⁶ Ndiza mwakali kuyeeya naa muya kucikonzya kucita zyoonse nzyaakali kuyanda kuti mucite Jehova. Tacikatazyi kuyeeya kuti inga twaalilwa kuba mubelesi wa Leza, kutobela milawo yakwe alimwi akwaambila bamwi zyina lyakwe. Mucikozyanyo, Musa wakali kuyeeya kuti uyakwaalilwa kuzyaamba zyakatumwa kwaambila bana Israyeli amwami wa Egepita. Pele Leza wakalizyi kuti Musa uyakucikonzya. Jehova ‘wakamuyiisya  cakucita.’ (Amubale Kulonga 3:11; 4:1, 10, 13-15.) Akaambo kakuti Musa wakazumina kugwasyigwa, wakalibonena mbocigwasya kucita kuyanda kwa Leza. Mbubwenya buyo, Jehova ulangila buyo kuti tucite nzyotukonzya kucita. Ulizyi mbotulezya alimwi ulayanda kutugwasya. (Int. 103:14) Kubelekela Leza katuli basikumutobela Jesu kulakkomanisya alimwi kulakatalusya akaambo kakuti tugwasya bantu akukkomanisya Jehova. Jesu wakati: “Amuboole kulindime, . . . ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo.”—Mt. 11:28, 29.

7. Ino nkaambo nzi ncomukonzya kusyomena kuti Jehova uyakumugwasya kucita nzyayanda kuti mucite?

⁷ Jehova uyakuzumanana kutugwasya akutuyumya ikuti katumusyoma lyoonse. Mucikozyanyo, Jeremiya wakali kuyoowa kwaambaula. Aboobo, Jehova naakamutuma kuti abe musinsimi wakwe, Jeremiya wakati: “Akaka Mwami Jehova! Mebo nsikonzyi kukambauka, nkaambo ncili mwanikenike.” Alimwi kumbele wakazi kwaamba kuti: “Nsikooyooamba limbi muzina lyakwe.” (Jer. 1:6; 20:9) Nokuba boobo, akaambo kakuti Jehova wakamugwasya Jeremiya wakacikonzya kukambauka kwamyaka iili 40, imulumbe ngobatakali kuyanda kumvwa bantu. Cakwiinduluka-induluka Jehova wakali kumusyomezya amajwi aakuti: “Ndi ayebo, nzookuvuna.”—Jer. 1:8, 19; 15:20.

8. Ino mbuti mbotutondezya kuti tulamusyoma Jehova?

⁸ Mbubwenya mbuli Jehova mbwaakagwasya Musa a Jeremiya, ulakonzya kutugwasya kucita nzyalangila kuti Banakristo kabacita mazuba aano. Ciyandika kapati nkumusyoma Leza. Ibbaibbele lyaamba kuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, Nkabela uyooenzya myeendelo yako.” (Tus. 3:5, 6) Tulatondezya kuti tulamusyoma Jehova notubala Jwi lyakwe anotujanika kumiswaangano yambungano. Ikuti twazumina kusololelwa a Jehova mubuumi bwesu boonse, taaku cikonzya kutulesya kusyomeka.

Jehova Ulababikkila Maano Bantu Bakwe Aumwi Kumugama

9, 10. Ino nkukwabililwa kuli buti ikwaambwa ku Intembauzyo 91

⁹ Nobayeeya kulyaaba kuli Jehova, bamwi bayeeya kuti ambweni balakonzya kubisya naa kuti tabeeleli kuba babelesi bakwe akuti Jehova uyakubakaka. Pele cilakkomanisya kuzyiba kuti Jehova ulatukwabilila kuzyintu zikonzya kunyonganya cilongwe cesu anguwe. Atubone kaambo aaka mbokaambwa ku Intembauzyo 91.

¹⁰ Sintembauzyo utalika aamajwi aakuti: “Oyo uukede muciyubilo ca-Mupatikampatila ulakala mucenzule ca-Singuzuzyoonse. Ndaamba aa-Jehova kuti, Macijilo aangu, ndilinga lyangu, ngu-Leza wangu ngonsyoma. Nkaambo ulakuvuna mukakole kasikuteya.” (Int. 91:1-3) Leza waamba kuti ulabakwabilila aabo ibamuyanda akumusyoma. (Amubale Intembauzyo 91:9, 14.) Ino nkukwabila kuli buti nkwaakali kwaamba? Jehova wakabakwabilila babelesi bakwe bamwi nkaambo mumwaakali kuya kuzyalilwa Mesiya wakasyomezyegwa. Nokuba boobo, bantu bamwi basyomeka bakaangwa, bapenzyegwa akujaigwa calunya kutegwa baleke kusyomeka kuli Leza. (Heb. 11:34-39) Bakacikonzya kuliyumya akaambo kakuti Jehova wakabakwabilila kutegwa bataleki kusyomeka. Aboobo, Intembauzyo 91 ilakonzya kuti yaamba kukwabililwa kumuuya.

11. Ino “ciyubilo ca-Mupatikampatila” ncinzi, alimwi ino nguni ngwakwabilila Leza oomu?

¹¹ Aboobo “ciyubilo ca-Mupatikampatila” ncaamba sintembauzyo mbusena bwacikozyanyo bwakuyubila ibwakumuuya. Mubusena oobu, aabo ibakkala a Leza balikwabilidwe kuzyintu zyoonse alimwi akubantu  boonse ibayanda kunyonganya lusyomo lwabo ambobamuyanda Leza. (Int. 15:1, 2; 121:5) Nciyubilo nkaambo kakuti bantu batasyomi tabakonzyi kubuzyiba busena oobu. Oomu, Jehova ukwabilila bantu boonse ibaamba kuti: ‘Nduwe Leza wangu ngonsyoma.’ Ikuti twazumanana kukkala mubusena oobu, tatweelede kulibilika kuti tulaleka kumvwana a Leza kwiinda mukuwida mukakole ka Saatani “sikuteya.”

12. Ino mapenzi nzi akonzya kunyonganya cilongwe cesu a Leza?

¹² Ino ncinzi cikonzya kunyonganya cilongwe cesu a Leza? Sintembauzyo waamba zyintu zili mbozibede, kubikkilizya “bulwazi bweenda mumudima, . . . [alimwi a]lunyonyooko lusaala ciindi cakalangabwaseme.” (Int. 91:5, 6) “Sikuteya” wajata bantu banji mukakole kakuyanda kulyeendelezya. (2 Kor. 11:3) Ulacita oobo kwiinda mukukulwaizya bantu kuba balyato, kulisumpula akuyandisya lubono. Alimwi bamwi ubapa kayandisya cisi cabo, njiisyo yakusanduka kwazyintu alimwi abukombi bwakubeja. (Kol. 2:8) Amana bamwi balajatwa mukakole kabwaamu. Imapenzi akumuuya aali boobu apa kuti tuulunzuma twabantu baleke kumuyanda Leza.—Amubale Intembauzyo 91:7-10; Mt. 24:12.

Mbotukonzya Kuzumanana Kumuyanda Leza

13. Ino Jehova utukwabilila buti kumapenzi aakumuuya?

¹³ Ino Jehova ubakwabilila buti bantu bakwe kumapenzi akumuuya? Sintembauzyo waamba kuti: “Ulalailila baangelo bakwe aanduwe, kuti bakubambe munzila zyako zyoonse.” (Int. 91:11) Bangelo bakujulu balatusololela akutukwabilila kutegwa tukambauke makani mabotu. (Ciy. 14:6) Kunze kwabangelo, kuli baalu Banakristo ibatukwabilila kwiinda mukutuyiisya makani aamu Magwalo kutegwa tutayungwi anjiisyo zyakubeja. Balakonzya kugwasya muntu uuli woonse uukatazyigwa azyintu zyanyika. (Tit. 1:9; 1 Pet. 5:2) Alimwi “muzike musyomesi uucenjede” ulatubambila cakulya cakumuuya citugwasya kuti tutayungwi anjiisyo yakusanduka kwazyintu, bwaamu, kuyandisya lubono alimwi azyintu zimwi buyo zibyaabi. (Mt. 24:45) Ino nywebo ncinzi camugwasya kuliyumya muzyintu zibyaabi eezyi?

14. Ino mbuti mbotukonzya kukwabililwa a Leza?

¹⁴ Ino ncinzi ncotweelede kucita kutegwa tuzumanane kukkala “muciyubilo” ca Leza? Mbubwenya mbotuyandika kuzumanana kulikwabilila kuntenda, zigwebenga naa kumalwazi tweelede kuzumanana kulikwabilila kumapenzi aakumuuya. Aboobo, lyoonse tweelede kwaatobela malailile ngatupa Jehova ngotubala mumabbuku aamba zyamu Bbaibbele alimwi akujanika lyoonse kumiswaangano yambungano amiswaangano mipati. Tweelede kubalomba baalu kuti batugwasye. Alimwi tulagwasyigwa azyintu zibotu nzyobacita bakwesu abacizyi Banakristo.  Masimpe, kuyanzana ambungano nkotucita kulatugwasya kuba basongo.—Tus. 13:20; amubale 1 Petro 4:10.

15. Ino nkaambo nzi ncomukonzya kuba masimpe kuti Jehova ulakonzya kumukwabilila kucintu cili coonse icikonzya kupa kuti muleke kumvwana anguwe?

¹⁵ Tatukonzyi kudooneka kuti Jehova ulakonzya kutukwabilila kuzyintu zyoonse zikonzya kupa kuti tuleke kumvwana anguwe. (Rom. 8:38, 39) Waikwabilila mbungano yakwe kubukombi bwakubeja akutwaambo twacisi zyalo ziyanda kututantamuna kuli Leza wesu uusetekene. Kusyomezya kwa Jehova kwaba kwamasimpe ikwakuti: “Taakwe cilwisyo niciba comwe cibumbwa kukulwisya nduwe cikonzya kujana coolwe.”—Is. 54:17.

Ino Nguni Uutupa Lwaanguluko?

16. Ino nkaambo nzi nyika ncoitakonzyi kutupa lwaanguluko?

¹⁶ Sena kuba bantu ba Jehova inga kwatupa kuti katutaanguluki? Peepe, kuba bantu banyika nkokutupa kuti katutaanguluki. Nyika ilizandukide kuli Jehova alimwi ilelwa a leza silunya walo uupa kuti bantu babe bazike. (Joh. 14:30) Mucikozyanyo, nyika ya Saatani ipa kuti bantu kababa abuyumu-yumu bwakujana mali cakuti tacibapi lwaanguluko. (Amweezyanisye Ciyubunuzyo 13:16, 17.) Acalo cibi cilaanguzu zyakubikka bantu mubuzike. (Joh. 8:34; Heb. 3:13) Aboobo nokuba kuti bantu batasyomi basyomezya kuti kuyakuba lwaanguluko nobacita zyintu ziteendelani anjiisyo zya Jehova, aabo boonse ibabatobela tabalilemeki alimwi balabisya.—Rom. 1:24-32.

17. Ino Jehova upa lwaanguluko luli buti?

¹⁷ Kulubazu lumwi, Jehova uyakuzigusya zyintu zyoonse zitupenzya ikuti naa twazumanana kuba kuli nguwe. Aabona, ibuumi bwesu inga twabukozyanya amuntu uusyoma mumusilisi kuti ulakonzya kumusilika kubulwazi buyanda kumujaya. Toonse tulaciswa bulwazi bujaya—cibi ncotwakakona. Lilikke ikuti twamusyoma Jehova, kwiinda mucinunuzyo ca Kristo, tulakonzya kuba alusyomo lwakuti tuya kufutuka kuzyintu ziboola acibi akupona buumi butamani. (Joh. 3:36) Mbubwenya mbuli mbotukonzya kusyoma musilisi uujisi mpuwo mbotu, tuna kumusyoma Jehova ikuti naa twazumanana kumwiiya. Aboobo, tulazumanana kwiiya Jwi lya Leza akaambo kakuti liya kutugwasya kuti tumuyande kapati cakuti tatukonzyi kuyoowa kuba bantu bakwe.—1 Joh. 4:18.

18. Ino ncinzi cikonzya kucitika kuli baabo ibaba bantu ba Jehova?

¹⁸ Jehova upa bantu boonse kuti balisalile nzyobayanda kucita. Ijwi lyakwe lyaamba kuti: “Amusale buumi, kuti mupone, nywebo abana banu. Amuyandisye Jehova Leza wanu.” (Dt. 30:19, 20) Uyanda kuti katutondezya kuti tulamuyanda kwiinda mukumubelekela cakuliyandila. Ikuba bantu ba Leza kulakkomanisya kapati alimwi citupa kwaanguluka.

19. Ino nkaambo nzi ncotukonzya kwaamba kuti nduzyalo lwa Jehova kuba bantu bakwe?

¹⁹ Mbotuli basizibi, tatweeleli kuba bantu ba Leza uusetekene. Nduzyalo buyo lwa Leza lutupa kuti tube bantu bakwe. (2 Tim. 1:9) Aboobo, Paulo wakalemba kuti: “Twapona, ngu-Mwami ngutuponena, alimwi twafwa, ngu-Mwami ngutufwida. Aboobo, nitupona nitufwa tuli bakwe Mwami.” (Rom. 14:8) Masimpe, tatukatyompwi akaambo kakusala kuba bantu ba Jehova.

Ino Inga Mwaingula Buti?

• Ino kuba bantu ba Jehova citugwasya buti?

• Ino ncinzi citugwasya kucita ncayanda Leza?

• Ino mbuti Jehova mbwakwabilila babelesi bakwe?

[Mibuzyo yaciiyo]

[Zifwanikiso izili apeeji 8]

Amubabuzye bamwi mbobagwasyigwa akaambo kakuba bantu ba Jehova

[Cifwanikiso icili apeeji 10]

Ino mbuti Jehova mbwatukwabilila?