Ni Lusungu Lukuru Kuŵa ŵa Yehova

“Tili ŵa Yehova.”—ROM. 14:8.

1, 2. (a) Kasi tili na mwaŵi wuli? (b) Kasi tidumbiskanenge mafumbo wuli?

YEHOVA wakaŵacindika comene Ŵaisrayeli apo wakaŵaphalira kuti: “Timuŵenge usambazi wane wapadera pacanya pa ŵanthu wose.” (Ex. 19:5) Mazuŵa ghano napo, Ŵakhristu ŵali na mwaŵi wa kuŵa ŵa Yehova. (1 Pet. 2:9; Uvu. 7:9, 14, 15) Cifukwa ca mwaŵi uwu, tingasanga candulo kwamuyirayira.

² Padera pa kuŵa na mwaŵi, kuŵa ŵa Yehova ni mulimo. Ŵanyake ŵangajifumba kuti: ‘Kasi ningacita ivyo Yehova wakukhumba? Usange ningacita kwananga, kasi waninyanyarenge yayi? Kasi niŵavyenge wanangwa cifukwa ca kuŵa wa Yehova?’ Nchamahara kujifumba mafumbo agha. Kweni fumbo linyake ilo tikwenera kulighanaghanira ndakuti: ‘Kasi kuŵa wa Yehova kuli na vyandulo wuli?’

Tikuŵa Ŵakukondwa Cifukwa ca Kuŵa ŵa Yehova

3. Kasi Rahabi wakasanga candulo wuli cifukwa ca kusankha kuteŵetera Yehova?

³ Kasi ŵanthu ŵakwandula cifukwa ca kuŵa ŵa Yehova? Awonani ivyo vikacitikira Rahabi, muzaghali uyo wakakhalanga mu Yeriko. Mwambura kukayika, kufuma pa wanici wake wakasopanga ŵaciuta ŵaunyankhasi ŵa mu Kenani. Kweni wati wapulika kuti Yehova wawovwira Ŵaisrayeli kuthereska mitundu yinyake, wakamanya kuti Yehova ni Ciuta waunenesko. Ntheura, wakajipeleka kucita  vinthu ivyo vikatenge vimuŵikenge mu suzgo mwakuti waponoske ŵanthu ŵa Ciuta. Baibolo likuti: “Asi Rahabi, mwanakazi muzaghali, wakapimika murunji na milimo, wakati wapokelera makora mathenga na kughawezgera kwawo na nthowa yinyake?” (Yak. 2:25) Aghanaghanirani vitumbiko ivyo wakasanga cifukwa ca kupimika kuŵa yumoza wa ŵanthu ŵatuŵa ŵa Ciuta, ŵanthu awo ŵakasambizgikanga Dango la Ciuta mu nthowa yacitemwa ndiposo urunji. Wakwenera kuti wakaŵa wakukondwa comene cifukwa ca kuleka nkharo iyo wakaŵa nayo pakwamba. Wakatengwa kwa Muisrayeli ndipo wakababa mwana musepuka, Bowazi uyo wakazakateŵetera Ciuta mwakugomezgeka.—Josh. 6:25; Ruth 2:4-12; Mat. 1:5, 6.

4. Kasi Rute wakandula wuli cifukwa ca kusankha kuteŵetera Yehova?

⁴ Rute wa ku Moabu nayo wakasankha kuteŵetera Yehova. Apo wakaŵa msungwana, wakwenera kuti wakasopanga Kemosh na ŵaciuta ŵanyake ŵa Ŵamoabu, kweni wati wamanya Yehova, Ciuta waunenesko, wakatengwa kwa Muisrayeli uyo wakapanjwa mu caru ca Moabu. (Ŵazgani Ruth 1:1-6.) Apo Naomi, uyo wakaŵa nyinawovyara wa Rute na Orpa wakaweleranga kukwake ku Betelehemu pamoza na ŵakamwana ŵake, pa nthowa wakaphalira ŵakamwana ŵake kuti ŵawelere. Naomi wakamanya kuti ŵakamwana aŵa ŵangakasuzgika ku Israyeli. Ntheura Orpa ‘wakawelera ku ŵanthu ŵakwake na ku ŵaciuta ŵake,’ kweni Rute wakawelera yayi, wakacita mwakuyana na cipulikano cake, wakakhumbanga kuŵa yumoza wa ŵanthu ŵa Ciuta. Iyo wakaphalira Naomi kuti: “Mungandikoserezganga kuti ndimusideni, panji kuleka kumulondezgani; pakuti kose uko mukuya nane nditindiyeko, uko mwamugona nane ndamugona papo; ŵanthu ŵanyinu nane mbanthu ŵanyane, ndipo Ciuta winu ndi Ciuta wane.” (Ruth 1:15, 16) Cifukwa cakuti wakasankha kuteŵetera Yehova, Rute wakandula na Dango la Ciuta, ilo likalangura Ŵaisrayeli kuti ŵapwelelerenge vyokoro, ŵakavu na ŵanthu awo ŵakaŵavya malo. Ntheura Rute wakakondwa cifukwa cakuti Yehova wakamuvikilira.

5. Kasi ni vinthu wuli ivyo mwawona vyakukhwaskana na ŵanthu awo ŵakuteŵetera Yehova mwakugomezgeka?

⁵ Mukwenera kuti mukumanya ŵanji awo ŵali kujipatulira kwa Yehova ndipo ŵaŵa ŵakuteŵetera mwakugomezgeka kwa vilimika vinandi. Ŵafumbani umo ŵandulira cifukwa ca kuteŵetera Yehova. Nangauli palije munthu uyo wangati walije masuzgo, kweni pali ukaboni wakukwana uwo ukukhozgera mazgu gha wamasalmo ghakuti: “Mbamwaŵi awo Ciuta wawo ndi Yehova!”—Sal. 144:15.

Yehova Wakukhumba Kuti Ticitenge Ivyo Tingafiska

6. Cifukwa wuli tikwenera kopa yayi kuti tingatondeka kufiska ivyo Yehova wakukhumba?

⁶ Namwe mukwenera kuti mukakayikanga usange mungafiska vinthu ivyo Yehova wakukhumba kuti mucitenge. Nchipusu kughanaghana kuti mungafiska yayi kuteŵetera Ciuta,  kulondezga malango ghake na kuyowoya mu zina lake. Mwaciyelezgero, apo Yehova wakamutuma kuti wakayowoye na Ŵaisrayeli ndiposo themba la Eguputo, Mozesi wakawona kuti wangafiska yayi. Kweni Ciuta wakamanya kuti Mozesi wafiskenge ivyo wamutuma. Yehova ‘wakamusambizga ivyo wakeneranga kucita.’ (Ŵazgani Exodus 3:11; 4:1, 10, 13-15.) Ntheura Mozesi wakafiska khumbo la Ciuta cifukwa wakazomera kusambizgika na iyo. Yehova wakukhumba kuti ticitenge vinthu ivyo tingafiska. Wakumanya kuti ndise ŵambura kufikapo ndipo ngwakunweka kutovwira. (Sal. 103:14) Pakuŵa ŵalondezgi ŵa Yesu tikusamphuskika pakuteŵetera Ciuta, cifukwa ni mulimo uwo ukovwira ŵanji ndipo ukukondweska Yehova. Yesu wakati: “Zani kwa ine, . . . ndipo nimusamphuskaninge. Jitolerani joko lane ndipo sambirani kwa ine, pakuti nili wakuzika na wakujiyuyura mu mtima.”—Mat. 11:28, 29.

7. Cifukwa wuli mungaŵa na cigomezgo cakuti Yehova wamovwiraninge kucita ivyo wakukhumba?

⁷ Yehova watikhozgenge nyengo zose, cikuru tikuthemba iyo kuti watipe nkhongono. Mwaciyelezgero, mwakawiro Yeremiya wakwenera kuti wakayowoyanga mwacikanga yayi. Ntheura apo Yehova wakamuphalira kuti waŵe nchimi yake, iyo wakati: “Awe, Fumu Yehova! Wonani, ningamanya kuyowoya cara, cifukwa ndili mwana pera.” Pakati pajumpha nyengo, wakayowoyaso kuti: ‘Niyowoyengeso mu zina lake’ cara. (Yer. 1:6; 20:9) Ndipouli, Yehova wakamukhwimiska ndipo wakapharazga kwa vilimika 40 nangauli ŵanthu ŵakawukhumbanga yayi uthenga uwu. Yehova wakamukhwimiska kanandi waka na mazgu ghakuti: “Ine ndili nawe kukuponoska na kukuthaska.”—Yer. 1:8, 19; 15:20.

8. Kasi tikulongora wuli kuti tikugomezga Yehova?

⁸ Nga umo Yehova wakakhwimiskira Mozesi na Yeremiya, wangatovwiraso kuti ticitenge ivyo wakukhumba, cikuru tikumugomezga. Baibolo likuti: “Tamira mwa Yehova na mtima wako wose, ungeghamanga ku umanyi wako wekha. Mu mendero ghako ghose umuzomere Iye, ndipo tiwanyoroskenge nthowa zako.” (Zinth. 3:5, 6) Tikulongora kuti tikugomezga Yehova para tikugwiliskira nchito wovwiri uwo wakutipa kwizira mu Mazgu ghake na mpingo. Usange tikuzomerezga Yehova kuti watilongozgenge, palije ico cingatitondeska kuti tiŵe ŵakugomezgeka kwa iyo.

Yehova Wakupwelelera Ŵanthu Ŵake, Waliyose Payekha

9, 10. Kasi Salmo 91 likulayizga za civikiliro wuli?

⁹ Ŵanji para ŵakughanaghana kuti ŵajipatulire kwa Yehova, panyake ŵakopa kuti nyengo zinyake ŵazamucita kwananga na kuŵa ŵambura kwenelera ndipo Yehova wazamuŵapata. Cakukondweska nchakuti Yehova wakutipa vinthu vyose vyakukhumbikwa kuti tivikilire ubwezi withu na iyo. Tiyeni tiwone umo Salmo 91 likulongosolera vinthu ivi.

¹⁰ Salmo ili likwamba na mazgu ghakuti: “Uyo wakukhala mu cakubisamamo ca Wapacanyapose, na kukhalilira mu mfwiri wa Mwenenkhongonozose, tiwanene kwa Yehova, kuti, ‘Ndimwe ciphokwero cane na linga lane; ndimwe Ciuta wane, mweneuyo nkhudinganyamo.’ Pakuti ndiye tiwakuthaske ku cipingo ca muthyezi.” (Sal. 91:1-3) Wonani kuti Ciuta walayizga kuti wavikilirenge awo ŵakumutemwa na awo ŵakumugomezga. (Ŵazgani Salmo 91:9, 14.) Kasi wakang’anamuranga civikiliro wuli? Yehova wakavikilira ŵateŵeti ŵake ŵakale ku nyifwa, nyengo zinyake wakacitanga ivi kuti wasungilire mzere wa ŵanthu uwo mukababikira Mesiya uyo ŵakamulindiliranga. Kweni pakaŵa ŵanthu ŵanyake ŵakugomezgeka awo ŵakakakika, kutambuzgika na kukomeka kuti ŵaleke kugomezgeka kwa Ciuta. (Heb. 11:34-39) Ŵakazizipizga cifukwa cakuti Yehova wakaŵavikiliranga mwauzimu, mwakuti ŵalutilire kuŵa ŵakugomezgeka. Ntheura, Salmo 91 ni layizgo la civikiliro cauzimu.

11. Kasi “cakubisamamo ca Wapacanyapose” nchivici, ndipo mbanjani awo Ciuta wakuŵavikilira mu cakubisamamo ici?

¹¹ “Cakubisamamo ca Wapacanyapose” ico wamasalmo wakayowoya ni malo ghakuyelezgera waka agho tingasangako civikiliro cauzimu.  Awo ŵakukhala na Ciuta mu malo agha mbakuvikilirika ku munthu panji cilicose ico cingatimbanizga cipulikano ndiposo ubwezi wawo na Ciuta. (Sal. 15:1, 2; 121:5) Ni malo ghakubisika cifukwa ŵanthu awo ŵalije cipulikano ŵangaghawona yayi. Mu malo agha, Yehova wakuvikilira ŵanthu awo ŵakuyowoya kuti: “Ndimwe Ciuta wane, mweneuyo nkhudinganyamo.” Para tikulutilira kukhala mu malo agha, tikwenera kwenjerwa yayi kuti ubwezi withu na Ciuta utimbanizgikenge mwa kuwira mu cipingo ca Satana uyo ni “muthyezi.”

12. Kasi ni vinthu wuli ivyo vingatimbanizga ubwezi withu na Ciuta?

¹² Kasi ni vinthu wuli ivyo vingatimbanizga ubwezi withu na Ciuta? Wamasalmo wakazunura vinthu vinandi, ndipo vinyake mwa vinthu ivi ni “nthenda iyo yikuŵenda mu mdima, . . . [na] pharaniko ilo likuparanya na muhanya.” (Sal. 91:5, 6) “Muthyezi” uyu, wakora ŵanandi na cipingo ca mzimu wa ukajilange. (2 Kor. 11:3) Ŵanyake ŵakukoleka na cipingo ca umbunu, kujitemwa na kutemwa comene vinthu vyakuthupi. Ŵanji ŵapuluskika na cisopa cautesi, cisambizgo cakuti vinthu vikalengeka yayi kweni vikazgoka kufuma ku vinthu vinyake ndiposo kutemwa comene caru cawo. (Kol. 2:8) Ŵanandi ŵakoleka na cipingo ca kugonana kwambura kuzomerezgeka. Vipingo ivi, ivyo vili nga ni nthenda yakwambukira vyacitiska kuti ŵanthu mamiliyoni ghanandi ŵaleke kutemwa Ciuta.—Ŵazgani Salmo 91:7-10; Mat. 24:12.

Umo Mungacitira Kuti Mulutilire Kutemwa Ciuta

13. Kasi Yehova wakutivikilira wuli ku vinthu ivyo vingatimbanizga umoyo withu wauzimu?

¹³ Kasi Yehova wakuvikilira wuli ŵanthu ŵake ku vinthu ivyo vingatimbanizga umoyo wawo wauzimu? Salmo likuti: “Tiwalangulire ŵangelo ŵake kukusunga mu nthowa zako zose.” (Sal. 91:11) Ŵangelo ŵakutilongozga na kutivikilira mwakuti tipharazgenge makani ghawemi. (Uvu. 14:6) Padera pa ŵangelo, ŵalara nawo ŵakutivikilira ku visambizgo vyautesi mwa kutisambizga vinthu vyakufuma mu Malemba. Ŵangawovwira mbali panji mudumbu waliyose uyo wakuyezgayezga kuleka kaghanaghaniro ka caru. (Tito 1:9; 1 Pet. 5:2) “Muzga wakugomezgeka na wakucenjera” nayo wakutipa cakurya cauzimu, ico cikutivikilira ku makhumbiro ghaheni, kupenja comene usambazi na kumanyikwa na ku cisambizgo cakuti vinthu vikalengeka na Ciuta yayi kweni vikacita kuzgoka. (Mat. 24:45) Nchivici camovwirani kuti muvikilirike ku vinthu ivi?

14. Kasi tikwenera kucitaci kuti Ciuta wativikilire?

¹⁴ Kasi tingacita wuli kuti tilutilire kukhala mu “cakubisamamo” ca Ciuta? Nga ni umo tikucitira nyengo zose pakujivikilira ku ngozi, ŵankhungu panji matenda ndimo tikwenera kucitiraso kuti tijivikilire ku vinthu ivyo vingananga umoyo withu wauzimu. Ntheura, nyengo zose tikwenera kulondezga ulongozgi uwo Yehova wakutipa kwizira mu mabuku ghithu, maungano gha mpingo na ghakurughakuru ndiposo wakufuma ku ŵalara. Nakuti tikusanga  candulo para tikuwona mikhaliro iyo ŵabali na ŵadumbu ŵithu ŵakulongora. Mbunenesko nadi, tikuŵa ŵamahara para tikuwungana pamoza na mpingo.—Zinth. 13:20; ŵazgani 1 Petrosi 4:10.

15. Cifukwa wuli tili na cigomezgo cose kuti Yehova wativikilirenge ku cilicose ico cingatimbanizga ubwezi withu na iyo?

¹⁵ Tikukayika yayi kuti Yehova wativikilirenge ku cilicose ico cingatimbanizga ubwezi withu na iyo. (Rom. 8:38, 39) Wakuvikilira mpingo ku ŵacisopa ndiposo ŵandyali awo kanandi cilato cawo nkhutikoma yayi, kweni kutipatura kwa Ciuta withu mutuŵa. Ivyo Yehova wali kutilayizga vyawoneka kuti ni vyaunenesko. Iyo wakuti: “Palije homwa ilo lafulikira iwe tilisakate.”—Yes. 54:17.

Ni Njani Wakutipa Wanangwa?

16. Cifukwa wuli caru cingatipa wanangwa yayi?

¹⁶ Kasi tikuŵavya wanangwa cifukwa cakuti tili ŵa Yehova? Yayi. Tingaŵavya wanangwa para tingaŵa ŵa caru. Caru cili kutali na Yehova ndipo cikuwusika na ciuta wankhaza, uyo wakuzgora ŵanthu kuŵa ŵazga. (Yoh. 14:30) Mwaciyelezgero, mgonezi wa Satana ukupoka ŵanthu wanangwa cifukwa ca suzgo la ndalama. (Yaniskani na Uvumbuzi 13:16, 17.) Ŵanthu ŵanyake ŵakupusikika ndipo ŵakukoleka uzga na kwananga. (Yoh. 8:34; Heb. 3:13) Nangauli ŵanthu ŵambura kusopa ŵangalayizga wanangwa para ŵakukhuŵilizga umoyo uwo ukukolerana yayi na visambizgo vya Yehova, waliyose uyo wakupulikira wakuzgoka muzga wa kwananga na wa maulamphalampha ghacikhozga soni.—Rom. 1:24-32.

17. Kasi Yehova watifwaturenge ku vici?

¹⁷ Yehova watifwaturenge ku cilicose ico cingatipweteka mwauzimu usange tajipeleka kwa iyo. Vili nga ni umo vikuŵira para munthu wakulwara nthenda yakofya iyo yikukhumbikwira opareshoni. Munthu uyu, wakuŵika cigomezgo cake cose mwa dokotara uyo wakumanya makora mulimo wake, mweneuyo wangamovwira kuti wacire. Tose tikulwara nthenda yakofya. Nthenda iyi nkhwananga uko tili kuhara. Tikugomezga kuti tifwatukenge ku masuzgo agho ghali kwiza cifukwa ca kwananga na kuzakaŵa ŵamoyo kwamuyirayira, pekha para tajipeleka kwa Yehova na kupulikana mu sembe yakuwombora ya Khristu. (Yoh. 3:36) Nga umo cigomezgo cithu mwa dokotara cikukulira para tikupulika umo wakucitira makora mulimo wake, ntheura pera cigomezgo cithu mwa Yehova cikukura comene para tikulutilira kusambira za iyo. Ntheura, tikulutilira kusambira Mazgu gha Ciuta cifukwa ghakutovwira kuti timutemwenge ndipo tiwopenge yayi kuŵa ŵake.—1 Yoh. 4:18.

18. Nchivici cikucitikira ŵanthu awo mba Yehova?

¹⁸ Yehova wakupeleka wanangwa ku ŵanthu wose kuti ŵasankhenge ivyo ŵakukhumba. Baibolo likuti: “Sorani umoyo mwakuti mose, imwe na ŵana ŵinu, mughume, kuti mutemwe Yehova Ciuta winu.” (Dute. 30:19, 20) Wakukhumba kuti tisankhe tekha kumuteŵetera, kulongora kuti tikumutemwa. Pakuti tili ŵa Ciuta uyo tikumutemwa, tili ŵazga yayi, kweni tikuŵa ŵakukondwa nyengo zose.

19. Cifukwa wuli ni lusungu lukuru kuŵa ŵa Yehova?

¹⁹ Pakuti ndise ŵakwananga tili ŵakwenelera yayi kuŵa ŵanthu ŵa Ciuta uyo ngwakufikapo. Kweni lusungu lwake lukuru ndilo lwawovwira kuti tiŵe ŵake. (2 Tim. 1:9) Lekani Paulosi wakalemba kuti: “Pose paŵiri, usange tili ŵamoyo, tili ŵamoyo kuti ticindike Yehova, ndipo usange tikufwa, tikufwira kucindika Yehova. Ntheura, pose paŵiri, usange tili ŵamoyo ndiposo usange tafwa, tili ŵa Yehova.” (Rom. 14:8) Tizamudandawurapo yayi cifukwa ca kusankha kuŵa ŵa Yehova.

Kasi Mungazgora Wuli?

• Kasi tikusanga vyandulo wuli cifukwa ca kuŵa ŵa Yehova?

• Cifukwa wuli tikufiska ivyo Ciuta wakukhumba?

• Kasi Yehova wakuŵavikilira wuli ŵateŵeti ŵake?

[Mafumbo]

[Vithuzithuzi pa peji 8]

Fumbani ŵanji umo ŵasangira candulo cifukwa ca kuŵa ŵa Yehova

[Cithuzithuzi pa peji 10]

Kasi Yehova wakutivikilira mu nthowa wuli?