Runguy Rok Jehovah Ma Kad Manged Girdien

“Mmil fadad ngak Somol.”​—ROM. 14:8.

1, 2. (a) Mang e tow’ath ni bay rodad? (b) Mang boch e deer ni gad ra weliy e fulweg riy?

 RIB fel’ e re tow’ath ney ni ke ognag Jehovah ko nam nu Israel u nap’an ni gaar ngorad: “Bay mpired ni gimed e girdi’ ni kug mel’egmed ni ngam manged girdieg.” (Ex. 19:5) Ngiyal’ ney e ki tow’athnag Jehovah girdien e ulung ni Kristiano ni rayog ni ngar manged girdien. (1 Pet. 2:9; Rev. 7:9, 14, 15) Re tow’ath ney e rayog ni nge yib angin ngodad ni manemus.

² Gathi kemus ni nge yog e re tow’ath ney ngodad, ya faanra nge mil fadad ngak Jehovah ma bay ban’en ni thingar da rin’ed. Boch e girdi’ e sana yad ma lemnag: ‘Rayog ni nggu rin’ e n’en ni baadag Jehovah ni nggu rin’, fa? Ra digeyeg ni faanra kug denen, fa? Faanra nge mil fag ngak Jehovah ma aram e dabkiyog ni nggu rin’ e tin ni gu baadag ni nggu rin’?’ Ba ga’ fan ni ngad nanged e fulweg ko pi deer ney. Ma som’on e ku baaray reb e deer nrib fel’ ni ngad nanged e fulweg riy: Mang boch i fel’ngin nra yib ngodad ni faanra ngad manged girdien Jehovah?

Ra ni Felfelan’ ni Faanra ni Mang Girdien Jehovah

3. Mang angin ni yib ngak Rahab u nap’an ni dugliy ni nge pigpig ngak Jehovah?

³ Ma yib angin nib fel’ ko girdi’ ni kar manged girdien Jehovah, fa? Mu lemnag Rahab, be’ ni i par u Jericho kakrom ni ma pi’ ir ni chuway’. Ba mutrug ni i liyor ngak boch e Got nu Kanaan. Machane, nap’an ni rung’ag murung’agen rogon ni be ayuweg Jehovah piyu Israel, ma aram me mich u wan’ ni Jehovah e ir e bin riyul’ e Got. Ere ke pag fan e yafas rok ni nge ayuweg e girdi’ rok Got ya manang ni yad ra ayuweg. Be gaar e Bible: “Rahab ni ma pi’ ir nchuway’, e michan’ rok ngak Got e ta’ Rahab nde un ngak e piin nli’rad ngar m’ad, ni piin nda ur folgad rok Got, ni fan e fek fa gali damit nga tafen nge ayuwegrow.” (Heb. 11:31) Rayog ni ngam guy ni ke yib angin nib fel’ ngak Rahab u nap’an ni ke mang reb i girdien Got ni yad e girdi’ ni kan fil ngorad e Motochiyel rok Got u rogon e t’ufeg nge mat’aw. Ere kari felfelan’ ni ke digey e ngongol ni i rin’ kafram. Ke leengiy be’ nu Israel ma ke mang  chitiningin Boaz ni be’ nib fel’ u owchen Got.​—Josh. 6:25; Ruth 2:4-12; Matt. 1:5, 6.

4. Mang angin ni ke yib ngak Ruth ni bochan e ke dugliy ni nge pigpig ngak Jehovah?

⁴ Ruth ni be’ nu Moab e ki dugliy ni nge pigpig ngak Jehovah. Nap’an ni kab buliyel, ma sana i liyor ngak reb e got ni Chemosh nge ku boch e got nu Moab, machane ke fil murung’agen e bin riyul’ e Got ni Jehovah, ma aram me leengiy be’ nu Israel ni yib i par nga Moab. (Mu beeg e Ruth 1:1-6.) Boch nga tomuren me un Ruth nge Orpa ngak Naomi ni nga ranod nga Bethlehem, ma aram me yog Naomi ngorow ni ngar sulow ko nam rorow, ya de mom ngorow ni ngar parew u Israel. Ma aram me sul Orpa ko “girdi’ rok nge birok e kan,” machane Ruth e de sul. Ke rin’ e tin ni ke mich u wan’ ya manang ni Jehovah e nge pigpig ngak. Ke gaar ngak Naomi: “Dab mu wenig ngog ni nggu pagem; ma dab mu guy rogon ni nge dab ku gu un ngom! Ya demtrug e gin’en ni ga ra yan ngay, ma gu ra un ngom; ma demtrug e gin’en ni ga ra par riy, ma gu ra un riy ko par. Girdi’ rom e bayi mang girdieg; ma Got rom e bayi mang Got rog.” (Ruth 1:15, 16) Bochan ni ke dugliy ni nge pigpig ngak Jehovah, ke yib angin e Motochiyel rok Got ngak, ni ngan ayuweg e piin ni ppin ni ke yim’ e pumoon rorad nge piin nib gafgow nge piin ni dariy e binaw rorad. Bochan e ayuw rok Jehovah, ma ke felfelan’ ma ke par nib pagan’.

5. Mang e kam nang u murung’agen e girdi’ nib yul’yul’ ni ma pigpig ngak Jehovah?

⁵ Sana ga manang boch e girdi’ ni kar ognaged yad ngak Jehovah ma yad be pigpig ngak ni ke yan boor e duw. Mu fithrad ko mang angin ni ke yib ngorad ko pigpig ni yad be tay ngak Jehovah. Dariy be’ ni dariy e magawon rok, machane riyul’ e thin ko ani yoloy e psalm ni gaar: “Nge felan’ e re nam nib mich u wan’rad e re n’ey; nge felan’ e pi girdi’ ni Got rorad e Somol [“Jehovah,” NW]!”​—Ps. 144:15.

Manang Jehovah e Tin Rayog Rodad

6. Mang fan ni dabda lemnaged ni dabiyog ni ngad rin’ed e tin ke yog Jehovah ni ngad rin’ed?

⁶ Sana ra maruwar u wan’um ko rayog ni ngam rin’ e tin ni ke yog Jehovah fa dabiyog. Mom ni ngam lemnag ni dabiyog ni ngam pigpig ngak Got, ma ga fol rok. Bod rogon Moses ni ke lemnag ni dabiyog rok ni nge non ngak piyu Israel nge pilung nu Egypt u nap’an ni l’og Got. Machane, de lemnag Got ni nge rin’ Moses ban’en ni dabiyog rok. Ke ‘yog Jehovah ngak e n’en ni nge rin’.’ (Mu beeg e Exodus 3:11; 4:1, 10, 13-15.) Nap’an ni ke fol Moses ma ke felfelan’ ni ke rin’ e tin nib m’agan’ Got ngay. Ere manang Jehovah e tin rayog ni ngad rin’ed. Manang ni dawor da flontgad ma baadag ni nge ayuwegdad. (Ps. 103:14) Be’ ni ma folwok rok Jesus ma be pigpig ngak Got e ra felfelan’ ma gathi nge kireban’ ni bochan e ra fel’ rogon boch e girdi’ ko n’en ni ke rin’ me felan’nag gum’irchaen Jehovah. Ke gaar Jesus: “Mired ngog, . . . mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan.”​—Matt. 11:28, 29.

7. Mang fan ni rayog ni nge pagan’um ni ra ayuwegem Jehovah ko tin ni ke yog ni ngam rin’?

 ⁷ Rayog ni nge pi’ Jehovah gelngidad ni faanra pagan’dad ngak. Bod rogon Jeremiah ni de salap ko welthin. Arfan ni nap’an ni yog Jehovah ngak ni nge mang reb e profet Rok me yog ngak ni gaar: “Somol ni Got, da gu nang rogon e welthin; ya kaygi gel fanag bitir.” Ma ki yog ni gaar: “Dab kug lemnag Somol ma dab kug weliy e thin rok ngak e girdi’.” (Jer. 1:6; 20:9) Machane, bochan e ayuw ni pi’ Jehovah ngak, ma ke yog rok Jeremiah ni nge machibnag fare thin ni dabun e girdi’ ni ngar rung’aged ni 40 e duw. Ki micheg Jehovah ngak ni gaar: “Bay gu un ngom nguug yoror rom ngam par ndabi buch ban’en rom.”​—Jer. 1:8, 19; 15:20.

8. Uw rogon ni gad ra dag nib pagan’dad ngak Jehovah?

⁸ Ra ayuwegdad Jehovah ni ngad rin’ed e tin ni ke finey ni nge rin’ e pi Kristiano e ngiyal’ ney ni bod rogon ni ke ayuweg Moses nge Jeremiah. Ere rib ga’ fan ni ngad pagedan’dad ngak Got. Be gaar e Bible: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.” (Prov. 3:5, 6) Gad ma dag nib pagan’dad ngak Jehovah u nap’an ni gad ra fanay e ayuw ni ma pi’ ngodad ko Thin rok nge ulung rok. Faan gad ra pag Jehovah ni nge pow’iy e yafas rodad, ma rayog ni ngad pared ni gad ba yul’yul’ ngak.

Ma Ayuweg Jehovah e Girdi’ Rok

9, 10. Ba miti mang ayuw e be micheg e Psalm 91?

⁹ Piin ni yad be lemnag ni ngar ognaged yad ngak Jehovah, e sana boch i yad e ma magarnag ir ya ri denen min tharbog ko ulung ma ra pagrad Jehovah. Machane gad manang ni ke pi’ Jehovah boor ban’en ngodad ni rayog ni nge ayuwegdad nge fel’ e tha’ u thildad. Ngad guyed ko uw rogon ni weliy e Psalm 91.

¹⁰ Ke yog e re psalm nem ni gaar: “En nra par ko fa gin nib mith ko en Th’abi Tolang e ra toffan nga fon. Bay gu gaar ngak Jehovah ‘Gur e manab rog ma gur gelngig ma gur e Got rog ma ra pagan’ug ngom.’ Ya ir e ra chuwegem ko wup rok fa en ma kol e arche’.” (Ps. 91:1-3, NW) Ere kam nang ni ke micheg Got nra ayuweg e piin nib t’uf Got rorad nge piin ni ma pagan’rad ngak. (Mu beeg e Psalm 91:9, 14.) Ere miti mang e ayuw e ra pi’? Kakrom e i ayuweg e yafas ko pi tapigpig rok ya nge ayuweg e yafas rok girdien fare tabinaw nra yib owchen fare Messiah riy. Boor e piin nib yul’yul’ e nni kalbusnagrad ma boch e un gafgownagrad ma boch e ni li’rad, gubin e pi n’ey ni buch rorad e Satan e be guy rogon ni nge taleg e pigpig ni yad be tay ngak Got. (Heb. 11:34-39) Kar nanged rogon ni ngar k’adedan’rad ni bochan e be ayuweg Jehovah e michan’ rorad ko n’en nra kirebnag e yul’yul’ ni yad be tay. Ere gad ra nang ko Psalm 91 ni ke micheg Got nra ayuweg e michan’ rodad ni ngad pared ni gad ba yul’yul’ ngak.

11. Mang “fa gin nib mith ko en Th’abi Tolang,” ma mini’ e ma ayuweg Got u rom?

¹¹ “Fa gin nib mith ko en Th’abi Tolang” ni weliy e en ni yoloy e psalm e be yip’ fan e ayuw ni ma pi’ Jehovah ni fan ko michan’. Piin ni yad ra par rok Jehovah e ra ayuwegrad ni dabi buch ban’en rorad ma dabi magawonnag be’ e michan’ nge t’ufeg rorad ngak Got. (Ps. 15:1, 2; 121:5) Rayog ni nga nog ni bang nib mith ni bochan e piin ni dawori mich Got u wan’rad e ba mo’maw’ ni ngar nanged fan e ayuw ni ma pi’ Jehovah. U roy e ba tamilang ni ma ayuweg Jehovah e girdi’ ni yad ma yog ni yad ma gaar: ‘Ma gur e Got rog ma ra pagan’ug ngom.’ Ere faanra da nabgad ko fa gin nib mith ma rayog ni nge pagan’dad nra ayuwegdad Jehovah ni dabda awgad ko wup rok Satan ni ir “fa en ma kol e arche’.”

12. Mang boch ban’en ni rayog ni nge kirebnag e tha’ u thildad Jehovah?

¹² Mang e ma kirebnag e tha’ u thildad Got? En ni yoloy e psalm e ke weliy boch ban’en nra kirebnagey, ni aram e “pi liliy ni yima riya’ riy ni ma og ngak e girdi’ nnep’, ara pi kireb ni ma thang e fan ko girdi’ ni rran.” (Ps. 91:5, 6) “Fa en ma kol e arche’” e ke bannag boor e girdi’ ni ngar lemnaged ni ke mus ni yad e ngar lemnaged yad. (2 Kor. 11:3) Ku ma bannag e girdi’ ni ngar chogowgad, ma ra ufgad, ma nge yoor e chugum rorad. Ku ma bannag boor e girdi’ ni ngar  liyorgad ko nam rorad, ma ra lemnaged ni sum e girdi’ ko gamanman, nge machib ni googsur ko pi yurba’ i teliw. (Kol. 2:8) Ma ki bannag boor e girdi’ kar uned ko ngongol ni darngal. Gubin e pi n’ey ni be fanay e ke bannag bokum milyon e  girdi’ ngay ni nge dabki t’uf Got rorad.​—Mu beeg e Psalm 91:7-10; Matt. 24:12.

Rogon ni Ngam Ayuweg e T’ufeg Rom Ngak Got

13. Uw rogon ni ma ayuwegdad Jehovah ko pi n’en ni rayog ni nge kirebnag e michan’ rodad?

¹³ Uw rogon ni ma ayuweg Jehovah e girdi’ rok ni nge dabi kireb e michan’ rorad? Be gaar e psalm: “Ra pi’ Got e pi engel rok nguur matanagiyed gur, ma yad be yoror rom ko gin’en ni ga be yan riy i yan.” (Ps. 91:11) Ma pow’iydad me ayuwegdad e pi engel ya nge yog ni da machibnaged fare thin nib fel’. (Rev. 14:6) Maku arrogon e piin piilal ni Kristiano ni yad ma fol ko Thin rok Got e yad ma ayuwegdad ni nge dabi kirebnagdad e pi machib ni googsur. Ku rayog ni ngar pied e ayuw ni nge ayuweg e girdi’ nge dabi t’uf e tin nu fayleng rorad. (Titus 1:9; 1 Pet. 5:2) Maku arrogon “fare tapigpig nib yul’yul’ mab gonop” ni yad ma pi’ e thin rok Got ni nge ayuweg e girdi’ ni ngar digeyed e machib ni sum e girdi’ ko gamanman, ma ra siyeged e ngongol ko darngal, nge lem ni nge yoor e chugum ma nog e sorok ngorad nge ku boch ban’en nra kirebnagey. (Matt. 24:45) Mang e ke ayuwegem ni ngam digey e pi n’ey nra kirebnagey?

14. Uw rogon ni rayog ni ngad fanayed e pi n’en ni ma pi’ Got ni nge ayuwegdad?

¹⁴ Mang e thingar da rin’ed ni ngad pared ko “fa gin nib mith” rok Got nra ayuwegdad? Bod rogon ni gad ma kol ayuwngidad ko pi n’en ni rayog ni nge buch ko yafas rodad, ni bod rogon ni gad ma guy rogon ni nge dabi yib e m’ar ngodad, maku gad ma ayuwegdad ko girdi’ nib kireb, maku gad be guy rogon ni dabi kireb e michan’ rodad. Arfan, ni thingar da fanayed e pi n’en ni ma pi’ Jehovah ni bay ko pi babyor rodad nge pi n’en ni yima fil u nap’an e pi muulung. Gad ma guy e piin piilal ni ngar ayuweged gadad. Maku ma fel’ rogodad ko pi n’en nib fel’ ni ma dag e piin walagdad u lan e ulung. Faanra ud chaggad ngak pi walagdad ma rayog e gonop ngodad.​—Prov. 13:20; mu beeg e 1 Peter 4:10.

15. Mang fan ni rayog ni nge pagan’um ni rayog ni nge ayuwegdad Jehovah ni dariy ban’en nra kirebnag e tha’ u thildad?

¹⁵ Dariy e maruwar riy nra ayuwegdad Jehovah ni nge dabi kireb e tha’ u thildad. (Rom. 8:38, 39) Ma ayuweg e ulung rok ko togopuluw ni ma yib ko pi yurba’ e teliw nge pi am ni yad ma guy rogon ni nge dabkud liyorgad ngak Got. Ke micheg Jehovah ni gaar: “Dariy ba talin e cham nni ngongliy nra maad’ad ngom.”​—Isa. 54:17.

Mini’ e Ma Pithigdad ko Magawon?

16. Mang fan ni dabiyog ni nge chuweg e re fayleng ney e magawon rodad?

¹⁶ Faanra ke mil fadad ngak Jehovah ma aram e ra yoor e magawon rodad, fa? Danga’, machane ra yoor e magawon rodad ni faanra mil fadad ko re fayleng ney. Gathi Jehovah e be gagiyegnag e re fayleng ney, ya Satan ni fare got nib kireb e ir e be gagiyegnag e girdi’ nu roy u fayleng. (John 14:30) Ere bod rogon e re m’ag rok Satan ney ni be fanay e magawon ko salpiy ni nge gafgownag e girdi’. (Mu taareb rogonnag ko Revelation 13:16, 17.) Denen e ku be gagiyegnag e girdi’. (John 8:34; Heb. 3:13) Ere yugu aram rogon ni ma micheg e girdi’ nra mon’og e yafas e ngiyal’ ney ma ireram ban’en nib thil ko n’en ni be yog Jehovah. En ra motoyil ko thin ni be yog e girdi’ e yad ra pirieg ni kar manged sib ko denen ma ke kireb e ngongol rorad.​—Rom. 1:24-32.

17. Uw rogon nra chuweg Jehovah e magawon rodad?

¹⁷ Gad manang ni Jehovah e ra chuwegdad ko urngin ban’en ni rayog ni nge kirebnagdad ni faanra pagan’dad ngak. Rayog ni ngan taareb  rogonnag ngak be’ ni ke pag fan e yafas rok nga pa’ reb e togta ya nge ayuweg ko m’ar rok. Gad gubin ni gad ra yim’ ya ke af e denen ngodad. Machane faanra pagan’dad ngak Jehovah u daken e biyul ni pi’ Kristus ma rayog ni ngad athapeged nra chuw e denen rodad ma rayog ni ngad pared ni manemus boch nga m’on. (John 3:36) Ere bod rogon ni rayog ni nge pagan’dad ngak fare togta ni faan gad ra nang rogon e maruwel rok nib fel’, ere ku rayog ni nge pagan’dad ngak Jehovah ni faanra yoor ban’en ni gad ra fil u murung’agen. Ere thingar da ululgad i fil e Thin rok Got nib fel’ rogon ni bochan e rayog ni nge ayuwegdad ni ngad t’ufeged ma dabda rusgad ni ngad manged girdien.​—1 John 4:18.

18. Mang angin nra yib ko girdi’ ni kar manged girdien Jehovah?

¹⁸ Ke pi’ Jehovah mat’awun e girdi’ ni ngar mel’eged e yafas. Be gaar e Bible: “Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak, ni fan e gimed nge piin ni owchemed e nge yog ni mpired nib n’uw nap’med.” (Deut. 30:19, 20) Baadag ni ngad daged e t’ufeg ngak ni aram e nge puf rogodad ni ngad pigpiggad ngak. Faan gad ra mang girdien Got ma rib mutrug ni gad ra felfelan’ ma gathi nge yoornag e magawon rodad.

19. Mang fan ni rayog ni ngad manged girdien Got?

¹⁹ Susun ni dabiyog ni ngad manged girdien Got ni bochan e bay e denen rodad. Machane bochan e runguy rok Got ma rayog ni ngad manged girdien. (2 Tim. 1:9) Ke gaar Paul: “Faanra ud pired ni gadad ba fos ma fan ngak Somol, ma gadad ra yim’ ma ngad m’ad ni fan ngak Somol. Demtrug ko gadad ba fos ara gadad ba yam’ machane mmil fadad ngak Somol.” (Rom. 14:8) Dabda kalgadngan’dad ni faanra kad mel’eged ni ngad manged girdien Jehovah.

Uw Rogon ni Ga Ra Fulweg?

• Mang boch i angin nra yib ni faanra mang be’ girdien Got?

• Mang fan ni rayog ni ngad rin’ed e  n’en ni ke yog Jehovah ni ngad rin’ed?

• Uw rogon ni ma ayuweg Jehovah e pi  tapigpig rok?

[Study Questions]

[Picture on page 14]

Mu fith boch e girdi’ ko uw rogon ni ke yib angin ngorad ni kar manged girdien Jehovah