Maʼ guca stiʼ Jiobá laanu purtiʼ nachaʼhuiʼ
Maʼ guca stiʼ Jiobá laanu purtiʼ nachaʼhuiʼ
«Sti [Jiobá] laanu.» (ROM. 14:8)
1, 2. 1) Xi ndaayaʼ nápanu. 2) Xi guendarinabadiidxaʼ zadúʼyanu primeru.
JIOBÁ gudxi ca israelita: «Zeeda gácatu guidxi stinneʼ ni nabé risaca lade guiráʼ ca guidxi ni nuu» (Éxo. 19:5). ¡Pabiáʼ naroʼbaʼ ndaayaʼ ca! Ca dxi stinu riʼ, laaca ti ndaayaʼ nga gaca stiʼ Dios guiráʼ ca binni ni nuu ndaaniʼ xquidxi (1 Ped. 2:9; Apo. 7:9, 14, 15). Qué ziuu dxi gusaana de cueendunu ni galán ra gaca stibe laanu.
2 Ti ndaayaʼ nga gaca stiʼ Dios laanu, peru laaca nuu xi caquiiñeʼ gúninu. Nga runi, zándaca chuʼ tu guinabadiidxaʼ laca laa: «Ñee zanda guneʼ guiráʼ ni canabaʼ Jiobá naa la? Pa chuʼ dxi guchee, ñee zudxiidéchebe naa la? Ñee dxandíʼ nga maʼ qué zanda guneʼ stale cosa pa gudieeʼ naa Jiobá la?». Nabé risaca nga guiénenu cani gunabadiidxanu ca. Peru primeru naquiiñeʼ guidúʼyanu xi zabeendunu pa gudiʼnu laanu Jiobá.
Riuʼnu nayecheʼ ora gudiʼnu laanu Jiobá
3. Xi ndaayaʼ gucuaa Rahab ra biʼniʼ ni na Jiobá.
3 Dxandíʼ nga ribeendú binni ni galán ora gudii laa Jiobá la? ¡Dxandíʼ pue! Guiníʼ íquenu de Rahab, ti gunaa de Jericó ni guyuuné tutiica hombre. Zándaca dxi biniisibe biiyabe modo biʼniʼ ca cananeu que cosa dxabaʼ ora maʼ cayuni adorarcaʼ ca bidóʼ sticaʼ. Neca zaqué biniisibe, bidiibe cuenta Jiobá ngue gucané ca israelita que para gunda biʼniʼ ganarcaʼ guiráʼ ra gudíndecaʼ ne laaca biénebe laa nga Dios ni dxandíʼ. Ngue runi, guluube xquendanabánibe ra naxoo pur guidxi ni gulí Dios ne biyúbibe modo gacané guidxi que laabe. Biblia na: «Chiqué uca [Rahab] ti gunaa dxabaʼ, peru bichagalú be ca xpinni Dios ni biseenda Josué xquidxi be, ne biluíʼ be laaca sti neza che ca ti qué igaa caʼ. Ñee, cadi pur ni biʼni be que bixhá Dios stonda be la?» (Sant. 2:25). Stale nga ndaayaʼ ni gucuaabe dxi beeda gácabe de guidxi Israel, ti guidxi ni guca nayá pur Ley bidii Dios laacaʼ ra biziidicaʼ naquiiñeʼ gannaxhiicaʼ binni ne gúnicaʼ ni jneza. ¡Ne nánnanu guyuube nayecheʼ ra bisaanabe guiráʼ ni bíʼnibe dxiqué! Laabe bichaganabe ti israelita ne gúpabe ti xiiñibe ni biree láʼ Boaz, ti hombre ni biʼniʼ ni na Dios ni nabé binibiáʼ binni (Jos. 6:25; Rut 2:4-12; Mat. 1:5, 6).
4. Xi guleendú Rut ra gudixhe ique guni ni na Jiobá.
4 Sti gunaa ni gudixhe ique guni adorar Jiobá nga Rut, ti moabita. Dxi gúcabe jma nahuiiniʼ zándaca biʼniʼ adorarbe dios ni láʼ Kemós ne xcaadxi dios ni gupa ca binni de Moab. Peru beeda gunibiaʼbe Dios ni dxandíʼ ne bichaganabe ti israelita ni yendeza ndaaniʼ xquídxibe para guilá (biindaʼ Rut 1:1-6). Despué, laabe ne Orpá xconcúñabe beeda guiaanacabe viuda ne yenándacabe suégracabe Noemí dxi bibiguetaʼ Belén. Neza zécabe que gudxi Noemí laacabe guibiguétacabe xquídxicabe, purtiʼ zaca nagana para laacabe guibánicabe ndaaniʼ guidxi Israel. Bicaadiaga Orpá laabe ne bibiguetaʼ xquidxi ne ra nuu ca dios stiʼ. Peru Rut qué ñuni casi biʼniʼ Orpá, sínuque bíʼnibe ni maʼ biziidibe ne zaqué bisihuínnibe nánnabe tu racaláʼdxibe gaca stiʼ laabe. Ngue runi gúdxibe Noemí: «Cadi guinabuʼ naa gusaanaʼ lii, ne guixeleʼ de lii; purtiʼ naa ziaaʼ ra tiica cheluʼ, ne ra tiica tiidiluʼ gueelaʼ zadideniáʼ lii. Xquídxiluʼ zaca xquidxeʼ ne Dios stiluʼ zaca Dios stinneʼ» (Rut 1:15, 16). Cumu gudixhe íquebe gúnibe ni na Jiobá la? laaca gucuaabe ndaayaʼ pur Ley gudixhe Dios para ca gunaa maʼ guti xheelaʼ, ca binni pobre ne para cani qué gapa nin ti ndaa layú. Jiobá gupa Rut, ngue runi bibánibe nayecheʼ ne gastiʼ ñaadxaʼ laabe.
5. Xi huadúʼyanu de ca xpinni Cristu ni maʼ ziné stale iza de cayuni ni na Jiobá.
5 Zándaca runibiaʼnu ca xpinni Cristu ni maʼ ziné stale iza de cayuni ni na Jiobá. Xiñee qué guinabadiidxanu laacabe xi ndaayaʼ huacaacabe dede dxi bidiicabe laacabe Jiobá. Ra gúninu nga, zadúʼyanu neca guiranu rápanu guendanagana, nuu stale cosa ni rusihuinni dxandíʼ ni na hombre bicaa salmo riʼ: «¡Nayecheʼ nga riuu ti guidxi ora nápacaʼ Jiobá casi Dios sticaʼ!» (Sal. 144:15).
Cadi nagana cani canabaʼ Jiobá laanu
6. Xiñee cadi naquiiñeʼ guiníʼ íquenu qué zanda gúninu guiráʼ ni canabaʼ Jiobá laanu.
6 Zándaca chuʼ tu guiníʼ ique pa zanda guni guiráʼ ni canabaʼ Jiobá laa. Ne nuu tu laa zándaca guidxibi gudii laa Dios purtiʼ nanna naquiiñeʼ guni ni nabe, ni na ca ley stibe ne guiníʼ pur laabe. Zacá bizaaca Moisés, ti hombre ni guníʼ ique qué zanda chitidxi ca israelita ne faraón de Egipto ni gudxi Dios laa. Peru cadi nagana diʼ guiráʼ ni canabaʼ Jiobá laabe que. Ne laaca guníʼ Jiobá zacané laabe ti gánnabe xi gúnibe (biindaʼ Éxodo 3:11 ne 4:1, 10, 13-15). Bidii Moisés lugar gucané Jiobá laa ne pur ngue biéchebe ra bíʼnibe ni na. Ca dxi stinu riʼ, laaca riene Jiobá laanu. Nánnabe binni ruchee laanu ne racaláʼdxibe gacanebe laanu (Sal. 103:14). Cadi nagana diʼ nga gúninu ni nabe casi xpinni Cristu, sínuque riguixhedxini ladxidoʼno, ne racaneni laanu gusiéchenu ladxidoʼbe ne gusihuínninu nadxiinu binni. Rihuinni dxandíʼ cayaca ni na ca diidxaʼ guníʼ Xiiñibe: «Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni [...]. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mat. 11:28, 29).
7. Xiñee nánnanu zacané Jiobá laanu gúninu ni canábabe laanu.
7 Pa guinábanu Jiobá gacané laanu la? zudiibe laanu stipa ne zaguube gana laanu. Zacá nga bizaaca Jeremías, ti hombre ni huaxiéʼ randa riníʼ. Dxi bidii Dios laabe dxiiñaʼ de quixhenabe, guniʼbe: «¡Ay Jiobá, Señor ni jma Nandxóʼ! Biiyaʼ, naa qué gánnadiaʼ guinieeʼ, purtiʼ nahuiineruáʼ». Ne despué guniʼbe: «Maʼ qué zanieruáʼ pur laabe» (Jer. 1:6; 20:9). Peru gunda guniʼbe ca diidxaʼ ni qué ñuulaʼdxiʼ ca binni que nucaadiágacaʼ pur cuarenta iza. Xiñee gunda bíʼnibe yaʼ. Purtiʼ guluu Jiobá gana laabe. Ne gudixhedxí ladxidoʼbe ne ca diidxaʼ riʼ: «Naa nuaaniáʼ lii para gulaʼyaʼ lii» (Jer. 1:8, 19; 15:20).
8. Ximodo rusihuínninu runi crenu zacané Jiobá laanu.
8 Ca dxi riʼ, laaca rudii Jiobá stipa laanu cásica bíʼnibe ne Moisés ne Jeremías ti ganda gúninu dxiiñaʼ ni naquiiñeʼ guni ti xpinni Cristu. Ni naquiiñeʼ gúninu nga chinándanu ca conseju riʼ: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Pro. 3:5, 6). Ximodo rusihuínninu runi crenu zacané Jiobá laanu yaʼ. Ra gúninu ni na Stiidxabe ne xquídxibe, purtiʼ laacani nga riquiiñebe para gábibe laanu xi naquiiñeʼ gúninu. Pa gudiʼnu lugar gacanebe laanu la? gastiʼ qué zucueeza laanu de gúninu ni nabe.
Jiobá cayapa cada tobi de ca xpinni
9, 10. Ximodo nga cusiene Salmo 91 zacané Jiobá laanu.
9 Nuu tu laa ridxibi gudii laa Dios purtiʼ riníʼ ique zándaca gueeda guchee ne maʼ qué gusisaca Jiobá laa ne maʼ qué chuuláʼdxibe ni guni. Peru cadi naquiiñeʼ guiníʼ íquenu zacá, purtiʼ laabe cudiibe guiráʼ ni caquiiñeʼ ca xpínnibe ti cadi guixélecaʼ de laabe. Guidúʼyanu ximodo cusiene Salmo 91 ni guninu ca.
10 «Tutiica cueza lugar ra nagaʼchiʼ stiʼ Ni Nuu Jma Luguiáʼ la? qué zaca gastiʼ, purtiʼ casi ora ñuube xaʼnaʼ bandáʼ stiʼ ni jma napa poder. Dxandipeʼ zabeʼ Jiobá: “Lii nga ti lugar ra zanda guilaʼyaʼ, ti lugar ni nadipaʼ para naa, Dios stinneʼ ni runeʼ cré de guidubi ladxiduáʼ”. Purtiʼ laapebe zulabe lii de lu trampa stiʼ ni rinaazeʼ maniʼ ripapa.» (Sal. 91:1-3.) Textu ca na zapa Dios guiráʼ cani nadxii laa ne cani guni cré zacanebe laa (biindaʼ Salmo 91:9, 14). Peru ñee cusihuinni ca diidxaʼ ca zápabe ca xpínnibe para cadi gacanacaʼ la? Dxandíʼ, dxiqué guyuu chupa chonna binni ni gúpabe. Stale biaje bíʼnibe ni para gulabe ca familia ra beeda Mesías. Peru laaca bidiibe lugar guseguyoo ca xpinni Binidxabaʼ stale de ca xpínnibe, guninacaʼ ne guuticaʼ laacabe (Heb. 11:34-39). Zanda guininu gúpabe guiráʼ ca binni riʼ ra bidiibe stipa laacaʼ ti ganda guni huantarcaʼ ne para cadi gucheenecaʼ laabe. Nga runi zanda guininu Salmo 91 cusiene zacané Jiobá laanu para cadi guixélenu de laa.
11. Xii nga «lugar ra nagaʼchiʼ stiʼ Ni Nuu Jma Luguiáʼ», ne tu rapa Jiobá lugar ca.
11 Yanna, xii nga «lugar ra nagaʼchiʼ stiʼ Ni Nuu Jma Luguiáʼ» ni bizeeteʼ hombre bicaa salmo que yaʼ. Zeeda gácani ti lugar ra cayapa Dios guiráʼ ca binni ni guni invitarbe ti cadi guixélecaʼ de laabe, ne rápabe laacaʼ de ca binni o cosa ni gusirá fe sticaʼ ne ni gucueeza laacaʼ de guni adorarcaʼ laabe (Sal. 15:1, 2; 121:5). Xiñee «nagaʼchiʼ» lugar ca yaʼ. Purtiʼ qué zanda guidxela ca binni ni cadi cayuni ni na Jiobá lugar ca, ne laabe ricaabe ca binni si ni gabi laabe: «Lii nga [...] Dios stinneʼ ni runeʼ cré de guidubi ladxiduáʼ». Dxandíʼ, qué zadxíbinu ca trampa stiʼ Binidxabaʼ, purtiʼ laga nuunu lugar ca, zaguu Jiobá ndaayaʼ laanu ne zacanebe laanu cadi guiábanu lúcani.
12. Xii nga ca cosa ni zándaca guxheleʼ laanu de Jiobá.
12 Xii nga ca cosa ni zándaca guxheleʼ laanu de Jiobá yaʼ. Chupa chonna de laacani nga ca cosa ni zeeda gaca casi «guendahuará ni nuu lu gueelacahui» ne ni «runitilú ca cosa stiʼ binni ridxíʼ» (Sal. 91:5, 6). Lu guidxilayú nabáninu riʼ, «ni rinaazeʼ maniʼ ripapa» ca ruyubi modo gucaa stale binni gacalaʼdxiʼ puru para laasi ne guirutiʼ gabi laacaʼ xi gúnicaʼ (2 Cor. 11:3). Ne laaca rucaabe stale binni gachelú gapa guiráʼ ni gacalaʼdxiʼ, guni cré laca laa ne gacalaʼdxiʼ gapa bidxichi. Ne laaca riguítebe stale binni para guiníʼ íquecaʼ jma risaca xquídxicaʼ que xcaadxi, guni crecaʼ zeeda binni de maniʼ ne chinándacaʼ ni na religión ni rusiidiʼ ni cadi dxandíʼ (Col. 2:8). Ne laaca riguítebe stale binni para chúʼnecaʼ ni cadi xheelacaʼ. Binidxabaʼ caquiiñeʼ ca cosa ca para gucaa millón de binni gusaana de gannaxhiicaʼ Dios (biindaʼ Salmo 91:7-10; Mat. 24:12).
Modo gápanu laanu para cadi gusaana de gannaxhiinu Dios
13. Ximodo racané Jiobá laanu para cadi guiábanu lu ca trampa stiʼ Binidxabaʼ.
13 Ximodo racané Jiobá laanu para cadi guiábanu lu ca trampa stiʼ Binidxabaʼ. Hombre bicaa salmo que guníʼ: «Zuni mandarbe ca ángel stibe gápacaʼ lii guiráʼ ladu cheluʼ» (Sal. 91:11). Ca ángel ca racanecaʼ laanu gánnanu xi gúninu ne rápacaʼ laanu ti ganda gucheechenu ca diidxaʼ nacubi ne galán stiʼ Dios (Apo. 14:6). Dios laaca riquiiñeʼ ca binnigola ca para gapa laanu, ne laacabe rinándacabe ni na stiidxabe ora gusiidicabe ndaaniʼ ca neza binni ridagulisaa ne zacá racanécabe laanu para cadi chuʼ tuuxa binni quite laanu pur cani rusiidicaʼ. Ne pa gúʼyacabe tuuxa xpinni Cristu cayuni stipa pur gusaana modo runi binni ni qué runibiáʼ Dios la? racanécabe laa (Tito 1:9; 1 Ped. 5:2). Jiobá laaca gudixhe chuʼ «ti mozo ni nuu xpiaaniʼ ne ni runi jneza» para gusiidiʼ laanu ti ganda gápanu laanu de ca trampa casi ni rusiidiʼ binni ora riníʼ ziúpanu de maniʼ. Zaqueca para cadi chúʼnenu tuuxa ni cadi xheelanu, para cadi guicá íquenu gápanu bidxichi ne gunibiáʼ stale binni laanu ne para gusaana de guiníʼ íquenu gápanu xcaadxi cosa ni zanda guniná laanu (Mat. 24:45). Gunabadiidxaʼ laca lii: «Xi huayacané naa ganda gudxieeluáʼ ca guendanagana casi ca nga yaʼ».
14. Xi caquiiñeʼ gúninu para gapa Jiobá laanu.
14 Xi caquiiñeʼ gúninu para cadi guireʼnu «lugar ra nagaʼchiʼ stiʼ Ni Nuu Jma Luguiáʼ» yaʼ. Caquiiñeʼ guyúbinu modo gápanu laanu, cásica rúninu para cadi guizaacanu xiixa, guireecabe lunu o gaca huaranu. Para cadi guiábanu lu ca trampa stiʼ Binidxabaʼ la? caquiiñeʼ gudiʼnu lugar gabi Jiobá laanu xi gúninu ne para nga riquiiñebe ca libru ne revista, ca guendaridagulisaa ni rápanu guiráʼ semana ne ca guendaridagulisaa roʼ. Laaca caquiiñeʼ guinábanu conseju ca binnigola ca ne guizíʼdinu de xcaadxi xpinni Cristu ne de ca guenda sticaʼ. ¡Nabé racané neza binni ridagulisaa laanu para gúninu ni jneza! (Pro. 13:20; biindaʼ 1 Pedro 4:10.)
15. Ximodo nánnanu zanda gapa Jiobá laanu de intiica guendanagana ni gucaa laanu guchéʼnenu laabe.
15 Nanna dxíchinu zanda gapa Jiobá laanu de intiica guendanagana ni gucaa laanu guchéʼnenu laabe ne guni nga maʼ qué chuuláʼdxibe ni gúninu (Rom. 8:38, 39). Casi guiráʼ ni huayuni ca religión ne ca políticu para gucaalucaʼ neza binni ridagulisaa. Ne stale biaje ni racalaʼdxisícabe nga guxhálecabe laanu de Dios ne cadi para guuticabe laanu. Peru cayapa Jiobá laanu ne qué rusaanabe de gúnibe ni na ca diidxaʼ riʼ: «Guiibaʼ gúnicabe para gucaalúcabe lii [...] qué zabeendunedícabe ni gastiʼ» (Isa. 54:17).
Tuu nga dxandíʼ zacané laanu gácanu libre
16. Xi zazaaca pa gúninu guiráʼ ni gacaláʼdxinu casi runi binni guidxilayú.
16 Ñee maʼ qué zanda gúninu stale cosa pa gudiʼnu laanu Jiobá la? Coʼ. Jma nagueenda zusaananu de gúninu ni chuuláʼdxinu pa gúninu casi runi binni guidxilayú, purtiʼ laacaʼ nuucaʼ zitu de Jiobá ne cayúnicaʼ ni na Binidxabaʼ, ti dios malu ni qué riaʼ binni (Juan 14:30). Xi riquiiñeʼ Binidxabaʼ para gapa binni casi ti esclavu yaʼ. Tobi de laacani nga ora raca nagana para binni gapa ni guibaniné (zanda gúʼndaluʼ Apocalipsis 13:16, 17). Ne laaca rucaabe binni guiníʼ ique gastiʼ naca guchee (Juan 8:34; Heb. 3:13). Ca binni ni qué runi ni jneza riniʼcaʼ zanda gúninu guiráʼ ni gacaláʼdxinu pa qué guibáninu casi modo na Jiobá. Peru guiráʼ cani rucaadiaga laacabe reeda gácacaʼ esclavu, purtiʼ nin qué rindaa riábacaʼ lu naʼ guendaruchee ne ra ridiʼdiʼ dxi jmaruʼ si rinitilucaʼ (Rom. 1:24-32).
17. Xidé zulá Jiobá laanu.
17 Peru pa gudiʼnu xquendanabáninu Jiobá la? zulabe laanu de intiica cosa ni zanda guniná laanu. Cásica ti doctor ni nabé nanna guni operar, zanda gusianda ti guendahuará nabé malu, zacaca zanda gusianda Jiobá laanu de ti cosa ni nabé cayuniná laanu: guendaruchee ni biaananenu. Pa chuʼnu lu naʼ Jiobá o gudiʼnu laanu laabe pur rini bixhii Cristu, zanda gacané nga laanu para cadi guniná guiráʼ ni bisaanané guendaruchee ca laanu ne guicaanu guendanabani ni qué zaluxe (Juan 3:36). Ora guidúʼyanu ximodo runi ti doctor dxiiñaʼ, chaahuiʼ chaahuiʼ runi crenu zusiándabe laanu, zaqueca riniisi fe stinu ora guizíʼdinu jma de Jiobá. Nga runi, ti razón ni nápanu para guiduʼndaʼ chaahuinu Biblia nga gánnanu zacaneni laanu gunibiaʼnu Dios ne gannaxhiinu laa jma, nga nga ni zacané laanu cadi guidxíbinu gudiʼnu laanu laabe (1 Juan 4:18).
18. Xi zabeendú guiráʼ cani gudii laa Jiobá.
18 Jiobá cudii lugar laanu cuinu xi gacaláʼdxinu gúninu. Nga runi, Stiidxabe cayabi cada tobi de laanu: «Nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jiobá Dios stiluʼ» (Deu. 30:19, 20). Laabe racaláʼdxibe guiale de laanu cuinu gúninu ni nabe ne zacá gusihuínninu nadxiinu laabe. Nga runi, zanda guininu ra gudiʼnu laanu Dios ni nadxiinu cadi rácasinu libre, sínuque laaca qué rusaana de chuʼnu nayecheʼ.
19. Xiñee cadi naquiiñeʼ ñaca stiʼ Jiobá laanu.
19 Cumu binni ruchee laanu la? cadi naquiiñeʼ ñaca stiʼ Dios laanu, purtiʼ laa qué ruchee. Gunda beeda gaca stibe laanu purtiʼ nacháʼhuibe (2 Tim. 1:9). Pablu bicaa: «Pa nabani nu la? nabani nu para [Jiobá], ne pa gati nu la? zati nu para [Jiobá]. Nga runi pa ibani nu o pa gati nu, sti [Jiobá] laanu» (Rom. 14:8). Nanna dxíchinu qué ziuu dxi guiníʼ íquenu cadi jneza nga bíninu bidiʼnu laanu Jiobá.
Xi nicábiluʼ
• Xi guiráʼ ribeendú binni ora gudii laa Jiobá.
• Xiñee zanda gúninu guiráʼ ni canabaʼ Jiobá laanu.
• Ximodo rapa Jiobá ca xpinni.
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 8]
Gunabadiidxaʼ ca xpinni Cristu xi huabeenducaʼ pur bidiicaʼ laacaʼ Jiobá
[Dibuju/foto ni zeeda lu yaza 10]
Gunáʼ nga chupa chonna modo rapa Jiobá laanu