Pamatud-i nga Ikaw Tinuod nga Sumusunod ni Kristo
Pamatud-i nga Ikaw Tinuod nga Sumusunod ni Kristo
“Ang matag maayong kahoy mamungag maayong bunga, apan ang matag daot nga kahoy mamungag walay pulos nga bunga.”—MAT. 7:17.
1, 2. Unsay kalainan tali sa tinuod nga mga sumusunod ni Kristo ug sa mini nga mga Kristohanon, ilabina niining panahon sa kataposan?
SI Jesus miingon nga kadtong nag-angkong mga Kristohanon mailhan gikan sa iyang tinuod nga mga sumusunod pinaagi sa ilang mga bunga—ang ilang pagtulon-an ug panggawi. (Mat. 7:15-17, 20) Sa pagkatinuod, ang mga tawo maimpluwensiyahan gayod sa kon unsay ilang ipasulod sa ilang hunahuna ug kasingkasing. (Mat. 15:18, 19) Kadtong natudloan sa bakak nga mga pagtulon-an mamungag “walay pulos nga bunga,” samtang kadtong natudloan sa kamatuoran mamungag “maayong bunga.”
2 Kining duha ka matang sa bunga mas nadayag niining panahon sa kataposan. (Basaha ang Daniel 12:3, 10.) Ang mini nga mga Kristohanon dunay sayop nga pagtuo bahin sa Diyos ug sagad sinalingkapaw ang ilang debosyon kaniya, samtang kadtong dunay espirituwal nga pagsabot nagsimba sa Diyos “sa espiritu ug sa kamatuoran.” (Juan 4:24; 2 Tim. 3:1-5) Sila naningkamot sa pagpasundayag sa samag-Kristong mga hiyas. Apan komosta man kita ingong indibiduwal? Samtang imong konsiderahon ang lima ka ilhanan sa matuod nga Kristiyanidad, pangutan-a ang imong kaugalingon: ‘Ang ako bang panggawi ug ang mga pagtulon-an nga akong gisunod nahiuyon sa Pulong sa Diyos? Gihimo ba nakong madanihon ang kamatuoran alang niadtong nagapangita niana?’
Pagkinabuhi nga Nahiuyon sa Pulong sa Diyos
3. Unsay makapahimuot kang Jehova, ug unsay nalangkit niini alang sa matuod nga mga Kristohanon?
3 “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit,” miingon si Jesus, “kondili ang usa nga nagabuhat sa kabubut-on sa akong Amahan nga anaa sa mga langit.” (Mat. 7:21) Oo, dili ang pag-angkon nga Kristohanon ang makapahimuot kang Jehova kondili ang pagkinabuhi ingong Kristohanon. Alang sa tinuod nga mga sumusunod ni Kristo, nalangkit niana ang ilang tibuok nga paagi sa kinabuhi, nga naglakip sa ilang tinamdan sa salapi, trabaho, kalingawan, kalibotanong mga kostumbre ug selebrasyon, kaminyoon ug sa ubang tawhanong mga relasyon. Apan, ang mini nga mga Kristohanon nagsagop sa panghunahuna ug paagi sa kalibotan, nga misamot pagkadili-diyosnon niining kataposang mga adlaw.—Sal. 92:7.
4, 5. Sa unsang paagi atong mapadapat sa atong kinabuhi ang gipamulong ni Jehova sa Malaquias 3:18?
4 Sa susama, si manalagnang Malaquias misulat: “Kamo makakita gayod pag-usab sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.” (Mal. 3:18) Samtang namalandong ka niana, pangutan-a ang imong kaugalingon: ‘Sama ba ako sa mga tawo sa kalibotan, o lahi ba ako kanila? Kanunay ba akong naningkamot nga mahisama sa akong mga kauban diha sa eskuylahan o sa trabahoan, o hugot ba akong nagsunod sa mga prinsipyo sa Bibliya, nga andam pa ganing mosulti sa akong baroganan?’ (Basaha ang 1 Pedro 3:16.) Siyempre, dili nato gusto nga isipong nagpakamatarong-sa-kaugalingon, apan angay natong ipakita nga kita lahi niadtong wala mahigugma ug mag-alagad kang Jehova.
5 Kon duna kay angayng bag-ohon sa imong panggawi, nganong dili kana iampo ug maningkamot nga molig-on sa espirituwal pinaagi sa regular nga pagtuon sa Bibliya, pag-ampo, ug pagtambong sa mga tigom? Samtang nagpadapat ka sa Pulong sa Diyos, mas mamunga kag “maayong bunga,” lakip ‘sa bunga sa mga ngabil nga naghimog pagpahayag sa dayag sa ngalan sa Diyos.’—Heb. 13:15.
Isangyaw ang Gingharian sa Diyos
6, 7. Maylabot sa mensahe sa Gingharian, unsay kalainan tali sa matuod ug mini nga mga Kristohanon?
6 Si Jesus miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:43) Nganong ang Gingharian sa Diyos maoy pangunang tema sa ministeryo ni Jesus? Siya nahibalo nga ingong Hari niana nga Gingharian, uban sa iyang nabanhaw nga inanak-sa-espiritung mga igsoon, siya mismo ang motapos sa tinubdan sa kaalaotan sa katawhan—ang sala ug ang Yawa. (Roma 5:12; Pin. 20:10) Busa, iyang gisugo ang iyang mga sumusunod sa pagsangyaw sa maong Gingharian hangtod sa kataposan niining sistema sa mga butang. (Mat. 24:14) Kadtong nag-angkon lang nga mga sumusunod ni Kristo wala makigbahin niining buluhatona—sa pagkatinuod, dili nila kini mahimo. Ngano man? Labing menos sa tulo ka rason: Una, sila dili makasangyaw bahin sa wala nila masabti. Ikaduha, kadaghanan kanila dili mapainubsanon ug walay kaisog sa pag-atubang sa pagbiaybiay ug pagsupak nga mahimong motungha sa dihang isangyaw nila ang mensahe sa Gingharian ngadto sa uban. (Mat. 24:9; 1 Ped. 2:23) Ug ikatulo, ang mini nga mga Kristohanon wala makabaton sa espiritu sa Diyos.—Juan 14:16, 17.
7 Sa laing bahin, ang tinuod nga mga sumusunod ni Kristo nakasabot kon unsa ang Gingharian sa Diyos ug unsay malampos niini. Dugang pa, panguna sa ilang kinabuhi ang intereses sa Gingharian, nga nagsangyaw niana sa tibuok kalibotan, uban sa tabang sa espiritu ni Jehova. (Zac. 4:6) Regular ka bang nakigbahin niining buluhatona? Naningkamot ka bang mouswag ingong magmamantala sa Gingharian, tingali pinaagi sa paggugol ug dugang panahon diha sa ministeryo o sa pagkahimong mas epektibo niini? Ang uban naningkamot sa pagpauswag sa kalidad sa ilang ministeryo pinaagi sa epektibong paggamit sa Bibliya. “Ang pulong sa Diyos buhi ug gamhanan,” misulat si apostol Pablo, kinsa kanunayng nangatarongan pinaagi sa Kasulatan.—Heb. 4:12; Buh. 17:2, 3.
8, 9. (a) Unsang mga kasinatian ang nagpakita sa pagkahinungdanon sa paggamit sa Bibliya diha sa atong ministeryo? (b) Sa unsang paagi kita mahimong mas hanas sa paggamit sa Pulong sa Diyos?
8 Sa dihang namalaybalay ang usa ka brader, iyang gibasa ang Daniel 2:44 ngadto sa usa ka tawong Katoliko ug iyang gipatin-aw kon sa unsang paagi ang Gingharian sa Diyos magpatunghag tinuod nga kalinaw ug kasegurohan. Ang tawo miingon: “Nalipay gyod ko nga imo kanang gipakita diha sa Bibliya inay nga isulti lamang kana kanako.” Sa dihang ang usa ka brader mibasag teksto ngadto sa usa ka Gregong Ortodokso nga babaye, misukna kinig daghang pangutana. Ang brader ug ang iyang asawa nagtubag sa mga pangutana gamit gihapon ang Bibliya. Dayon, ang babaye miingon: “Nahibalo ba mo kon nganong nakig-estorya ko ninyo? Nagdala man god mog Bibliya ug nagbasa niana kanako.”
9 Tinuod, hinungdanon ang atong literatura ug angay kanang itanyag diha sa kanataran. Apan, ang Bibliya maoy atong pangunang galamiton. Busa kon wala ka pa maanad sa paggamit sa Bibliya diha sa imong ministeryo, nganong dili himoong tumong ang paggamit kanunay niana? Tingali makapili kag pipila ka teksto nga magpatin-aw kon unsa ang Gingharian sa Diyos ug sa unsang paagi kini magsulbad sa mga suliran nga gikabalak-an sa mga tawo diha sa inyong teritoryo. Dayon gamita kana sa imong pagsangyaw.
Isipang Kadungganan ang Pagdala sa Ngalan sa Diyos
10, 11. Maylabot sa paggamit sa ngalan sa Diyos, unsay kalainan tali ni Jesus ug niadtong nag-angkong nagsunod kaniya?
10 “‘Kamo mao ang akong mga saksi,’ mao ang giingon ni Jehova, ‘ug ako mao ang Diyos.’” (Isa. 43:12) Giisip sa pangunang Saksi ni Jehova, si Jesu-Kristo, nga usa ka kadungganan ang pagdala sa ngalan sa Diyos ug ang pagmantala niana. (Basaha ang Exodo 3:15; Juan 17:6; Hebreohanon 2:12.) Gani, tungod kay gimantala ni Jesus ang ngalan sa iyang Amahan, siya gitawag nga “Matinumanong Saksi.”—Pin. 1:5; Mat. 6:9.
11 Sa kasukwahi, daghan sa nag-angkong naghawas sa Diyos ug sa iyang Anak walay pagtahod sa balaang ngalan, nga wala gani maglakip niana sa ilang mga hubad sa Bibliya. Nagpakita ug susamang tinamdan, ang usa ka direktiba nga giluwatan dili pa dugay alang sa Katolikong mga obispo nag-ingon nga “ang ngalan sa Diyos sa pormang tetragrammaton nga YHWH dili gamiton o litokon” panahon sa pagsimba. * Pagkasayop gayod niana nga panghunahuna!
12. Sa unsang paagi ang mga alagad sa Diyos labaw pa nga nailhang nalangkit kang Jehova niadtong 1931?
12 Agig pagsundog kang Kristo ug sa dakong “panganod sa mga saksi” sa karaang panahon, giisip sa matuod nga mga Kristohanon nga usa ka kadungganan ang paggamit sa ngalan sa Diyos. (Heb. 12:1) Gani, niadtong 1931, ang mga alagad sa Diyos labaw pa nga nailhang nalangkit kang Jehova pinaagi sa pagdawat sa ngalang mga Saksi ni Jehova. (Basaha ang Isaias 43:10-12.) Busa, sa talagsaon kaayong diwa, ang matuod nga mga sumusunod ni Kristo nahimong ‘katawhan nga ginatawag sa ngalan sa Diyos.’—Buh. 15:14, 17.
13. Sa unsang paagi kita magkinabuhi ingong katawhan nga nagdala sa ngalan sa Diyos?
13 Sa unsang paagi kita magkinabuhi ingong katawhan nga nagdala sa ngalan sa Diyos? Una sa tanan, kinahanglan nga kita matinumanong magpamatuod bahin sa Diyos. “Ang matag usa nga magatawag sa ngalan ni Jehova maluwas,” misulat si Pablo. “Apan, unsaon nila pagtawag kaniya kinsa wala sila magbutang ug pagtuo? Unsaon, sa baylo, pagbutang nila ug pagtuo kaniya kinsa wala nila madunggi? Unsaon, sa baylo, nila pagkadungog kon walay magwali? Unsaon, sa baylo, nila pagwali gawas kon sila gipadala?” (Roma 10:13-15) Lain pa, angay natong iyagyag sa mataktikanhong paagi ang bakak nga mga pagtulon-an nga nagpasipala sa atong Maglalalang, sama sa doktrina sa impiyerno, nga nagpaila hinuon kaniya ingong mapintas inay Diyos sa gugma.—Jer. 7:31; 1 Juan 4:8; itandi ang Marcos 9:17-27.
14. Sa pagkahibalo sa personal nga ngalan sa Diyos, unsay sanong sa pipila?
14 Giisip ba nimo nga kadungganan ang pagdala sa ngalan sa imong langitnong Amahan? Nagtabang ka ba sa uban nga mahibalo nianang balaang ngalan? Nasayran sa usa ka babaye sa Paris, Pransiya nga ang mga Saksi ni Jehova nahibalo sa ngalan sa Diyos. Busa sa dihang nakahibalag siyag Saksi, iya kining gihangyo nga ipakita kaniya ang maong ngalan sa iyang Bibliya. Human niya mabasa ang Salmo 83:18, dako kaayo kinig epekto kaniya. Siya nagsugod pagtuon sa Bibliya ug karon usa na ka matinumanong sister nga nag-alagad sa laing nasod. Sa dihang unang nakita sa usa ka Katolikong babaye sa Australia ang ngalan sa Diyos diha sa Bibliya, nakahilak siya sa kalipay. Sa pagkakaron, siya nag-alagad ingong regular payunir sulod na sa daghang katuigan. Ning bag-o pa didto sa Jamaica, sa dihang gipakita sa mga Saksi ngadto sa usa ka babaye ang ngalan sa Diyos diha sa iyang kaugalingong Bibliya, siya usab nakahilak sa kalipay. Busa, agig pagsundog kang Jesus, isipang kadungganan ang pagdala sa bililhong ngalan sa Diyos ug ang pagpahayag niana ngadto sa tanan.
“Ayaw Ninyo Higugmaa ang Kalibotan”
15, 16. Unsay panglantaw sa matuod nga mga Kristohanon sa kalibotan, ug unsang mga pangutana ang angay natong isukna sa atong kaugalingon?
15 “Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya.” (1 Juan 2:15) Ang kalibotan ug ang unodnong tinamdan niini nagsupak kang Jehova ug sa iyang balaang espiritu. Busa, ang tinuod nga mga sumusunod ni Kristo dili lang kay molikay nga mahimong bahin sa kalibotan. Hinunoa, dili gayod nila kana higugmaon, kay nahibalo sila sa gisulat ni Santiago, nga “ang pagpakighigala sa kalibotan maoy pagpakig-away sa Diyos.”—Sant. 4:4.
16 Dili sayon ang pagsunod sa giingon ni Santiago ilabina nga ang kalibotan puno sa tentasyon. (2 Tim. 4:10) Busa si Jesus miampo alang sa iyang mga sumusunod: “Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan.” (Juan 17:15, 16) Suknaa ang imong kaugalingon: ‘Naningkamot ba ako nga dili mahimong bahin sa kalibotan? Nahibalo ba ang uban sa akong baroganan maylabot sa dili-kasulatanhong mga selebrasyon ug kostumbre maingon man niadtong tingali walay paganong sinugdanan apan dayag nga nagbanaag sa espiritu sa kalibotan?’—2 Cor. 6:17; 1 Ped. 4:3, 4.
17. Sa unsang paagi ang mga matinud-anog kasingkasing mahimong matukmod sa pagdapig kang Jehova?
17 Tino gayod nga dili dawaton sa kalibotan ang atong Kasulatanhong baroganan, apan mahimong mapukaw niini ang interes sa mga matinud-anog kasingkasing. Sa pagkatinuod, sa dihang ilang makita nga ang atong pagtuo lig-ong gipasukad sa Kasulatan ug nalangkit niana ang atong tibuok nga paagi sa kinabuhi, sa diwa, sila moingon sa mga dinihogan: “Mouban kami kaninyo, kay kami nakadungog nga ang Diyos nagauban kaninyo.”—Zac. 8:23.
Ipakita ang Tinuod nga Kristohanong Gugma
18. Unsay nalangkit sa paghigugma kang Jehova ug sa atong silingan?
18 Si Jesus miingon: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan” ug “higugmaon mo ang imong silingan sama sa imong kaugalingon.” (Mat. 22:37, 39) Kana nga gugma (a·gaʹpe sa Grego) gipasukad sa prinsipyo nga naglangkit ug obligasyon, moralidad, ug maayong panggawi, apan sagad naglakip ug kusganong emosyon. Kana mahimong mainiton ug kinasingkasing nga pagbati. (1 Ped. 1:22) Sukwahi gayod kana sa kahakog, sanglit mabanaag man kana pinaagi sa dili-mahakogong mga pulong ug buhat.—Basaha ang 1 Corinto 13:4-7.
19, 20. Pag-asoy ug pipila ka kasinatian nga nagpakita sa gahom sa Kristohanong gugma.
19 Sanglit ang gugma maoy bunga sa balaang espiritu sa Diyos, mahimo sa matuod nga mga Kristohanon ang dili mahimo sa uban, sama pananglit sa pagbuntog sa pagpihigpihig sa rasa, kultura, ug politika. (Basaha ang Juan 13:34, 35; Gal. 5:22) Ang mga maaghop madani gayod sa dihang ilang makita kanang matanga sa gugma. Pananglitan, sa dihang mitambong sa tigom sa unang higayon ang usa ka Hudiyong batan-on sa Israel, nahingangha siya nga makita ang mga Hudiyo ug Arabo nga mga igsoon nga magkauban sa pagsimba kang Jehova. Ingong resulta, siya nagtambongan na sa mga tigom ug midawat ug pagtuon sa Bibliya. Nagpakita ka bag tiunay nga gugma sa imong mga igsoon? Ug naningkamot ka ba nga mainitong maabiabi ang bag-ong nanambong sa inyong Kingdom Hall, bisan unsa pay ilang nasyonalidad, rasa, o kahimtang sa katilingban?
20 Ingong matuod nga mga Kristohanon, kita naningkamot sa pagpakitag gugma sa tanan. Sa El Salvador, usa ka batan-ong magmamantala nagdumalag pagtuon sa Bibliya sa usa ka 87-anyos nga Katolikong babaye kinsa debotado sa iyang relihiyon. Usa ka adlaw niana, ang babaye grabeng nasakit ug naospital. Sa dihang nakauli na siya sa iyang balay, giduaw siya sa mga Saksi ug gitagan-ag pagkaon. Gihimo nila kini sulod sa mga usa ka bulan. Walay usa gikan sa iyang simbahan ang miduaw kaniya. Unsay resulta? Gilabay niya ang iyang mga imahen, unya siya mibulag sa iyang simbahan ug nagpadayon sa pagtuon sa Bibliya. Oo, gamhanan gayod ang Kristohanong gugma! Makatandog kini sa kasingkasing labaw pa kay sa mahimo sa mga pulong.
21. Unsay atong himoon aron segurado ang atong kaugmaon?
21 Sa dili madugay, si Jesus moingon ngadto sa tanan nga nag-angkong nag-alagad kaniya: “Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” (Mat. 7:23) Busa, magpatungha kitag mga bunga nga magpasidungog sa Amahan ug sa Anak. “Ang matag usa nga magapatalinghog niining akong mga pulong ug magabuhat niini,” miingon si Jesus, “mahisama sa usa ka tawong maalamon, nga nagtukod sa iyang balay ibabaw sa dakong-bato.” (Mat. 7:24) Oo, kon atong pamatud-an nga kita tinuod nga mga sumusunod ni Kristo, atong madawat ang pag-uyon sa Diyos, ug segurado ang atong kaugmaon, nga samag natukod diha sa bato!
[Footnote]
^ par. 11 Ang ubang Katolikong Iningles nga mga publikasyon karong adlawa, lakip ang The Jerusalem Bible, naghubad sa tetragrammaton nga “Yahweh.”
Nahinumdom Ka Ba?
• Sa unsang paagi mailhan ang tinuod nga mga sumusunod ni Kristo gikan sa mini nga mga Kristohanon?
• Paghatag ug pipila ka “mga bunga” nga magpaila sa matuod nga mga Kristohanon.
• Sa pagpatunghag Kristohanong mga bunga, unsay imong mga tumong?
[Mga Pangutana sa Pagtuon]
[Hulagway sa panid 13]
Naandan ba nimo ang paggamit sa Bibliya diha sa imong ministeryo?
[Hulagway sa panid 15]
Nahibalo ba ang uban sa imong baroganan maylabot sa dili-kasulatanhong mga selebrasyon?