Montre ki ou en vre disip Kris
Montre ki ou en vre disip Kris
“En bon pye fri i raport bon fri e en move pye fri i raport move fri.”—MAT. 7:17.
1, 2. Ki mannyer bann vre disip Kris i diferan avek bann ki pretann zot Kretyen, sirtou la ki nou pe viv dan letan lafen?
ZEZI ti dir ki bann ki pe pretann servi li pou diferan avek son bann vre disip par zot fri, lansennyman ek kondwit. (Mat. 7:15-17, 20) Imen i sirman ganny enfliyanse par sa ki zot les antre dan zot lespri ek leker. (Mat. 15:18, 19) Sa bann ki nouri zot avek bann mansonz i raport “move fri,” tandis ki bann ki ganny ansennyen laverite spirityel i raport “bon fri.”
2 Sa de kalite fri in vin klerman evidan dan sa letan lafen ki nou pe viv. (Lir Danyel 12:3, 10. *) Sa bann ki pretann zot Kretyen i annan en move pwennvi lo Bondye e zot souvan demontre en devosyon ipokrit pour Li, tandis ki bann ki annan disernman spirityel i ador Bondye “an-espri e an verite.” (Zan 4:24; 2 Tim. 3:1-5) Zot fer bokou zefor pour demontre bann kalite parey Kris. Me ki nou pou dir lo nou personnelman? Anmezir ki ou konsider sa senk mark ki idantifye bann vre Kretyen, demann ou lekor: ‘Eski mon kondwit e sa ki mon ansennyen i vreman annakor avek Parol Bondye? Eski mon fer laverite atiran pour sa bann ki pe rod laverite?’
Viv annakor avek Parol Bondye
3. Kwa ki fer plezir Zeova e ki sa i enplike pour bann vre Kretyen?
3 Zezi ti dir: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel.” (Mat. 7:21) Wi, i pa sa ki dir i Kretyen ki fer plezir Zeova me sa ki pratik vre ladorasyon. Pour bann vre disip Kris, sa i enplik tou laspe zot lavi, enkli zot latitid anver larzan, travay, divertisman, koutim ek selebrasyon sa lemonn, maryaz e zot relasyon avek lezot. Me bann dimoun ki pretann zot Kretyen i adopte fason panse ek latitid sa lemonn, ki pe vin pli pir dan sa bann dernyen zour.—Ps. 92:7.
4, 5. Ki mannyer nou kapab aplik parol Zeova ki trouve dan Malaki 3:18 dan nou lavi?
4 An armoni avek sa ki nou’n fek vwar anler, profet Malaki ti ekrir: “Zot pou vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.” (Mal. 3:18) Anmezir ki ou reflesir lo sa bann parol, demann ou lekor: ‘Eski mon parey bann dimoun dan sa lemonn oubyen eski mon montre ki mon diferan? Eski mon touzour fer bokou zefor pour ki mon bann koleg, swa kot lekol oubyen dan travay i aksepte mwan, ouswa eski mon reste atase avek bann prensip Labib e menm defann mon krwayans?’ (Lir 1 Pyer 3:16.) Byensir, nou pa anvi donn lenpresyon ki nou tro zis, me nou devret montre ki nou diferan avek bann ki pa kontan e pa servi Zeova.
5 Si ou vwar ki ou bezwen amelyor ou kondwit, akoz ou pa priy lo sa size e rod lafors par etidye Labib regilyerman, priye e asiste renyon? Pli ou aplik Parol Bondye dan ou lavi pli ou pou raport “bon fri,” e sa i enkli ‘loue . . . non Bondye par ou labous.’—Ebr. 13:15.
Pres konsernan Rwayonm Bondye
6, 7. An rapor avek mesaz Rwayonm, ki diferans nou kapab vwar ant bann vre Kretyen ek bann ki pretann zot Kretyen?
6 Zezi ti dir: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.” (Lik 4:43) Akoz Rwayonm Bondye ti tenm prensipal minister Zezi? Zezi ti konnen ki i Lerwa sa Rwayonm e ansanm avek son bann frer swazir ki ti pou ganny resisite, zot ti pou met en lafen avek sours bann maler limanite setadir pese ek Dyab. (Rom. 5:12; Rev. 20:10) Alor i ti demann son bann disip pour pres konsernan sa Rwayonm ziska lafen sa sistenm. (Mat. 24:14) Bann dimoun ki pretann ki zot disip Kris pa partisip dan sa travay, anfet zot pa kapab fer li. Akoz? Pour omwen trwa rezon: Premyerman, zot pa kapab pres sa ki zot pa konpran. Dezyenmman, laplipar zot napa limilite ek kouraz ki en dimoun i bezwen annan pour fer fas avek sikannri ek lopozisyon ki nou gannyen ler nou pe pres sa mesaz Rwayonm avek lezot. (Mat. 24:9; 1 Pyer 2:23) Trwazyenmman, bann ki pretann zot Kretyen napa lespri sen Bondye.—Zan 14:16, 17.
7 De lot kote bann vre disip Kris i konnen ki si sa Rwayonm Bondye e ki i pou akonplir. Deplis, avek led lespri sen Zeova, zot pres konsernan sa Rwayonm dan lemonn antye e sa i montre ki lentere Rwayonm i keksoz pli enportan dan zot lavi. (Zeka. 4:6) Eski ou pe regilyerman partisip dan sa travay? Eski ou pe esey fer serten amelyorasyon konman en proklanmater Rwayonm, petet par partisip plis dan minister oubyen par vin pli efikas dan sa travay? Serten proklanmater in esey amelyor kalite zot minister par byen servi Labib. Zapot Pol ki ti annan labitid servi Labib pour rezonn avek lezot ti ekrir: “Parol Bondye i vivan e i annan pisans.”—Ebr. 4:12; Akt 17:2, 3.
8, 9. (a) Ki leksperyans ki montre ki i vreman enportan pour servi Labib dan nou minister? (b) Ki mannyer nou kapab vin pli kalipa pour servi Parol Bondye?
8 Ler en frer ti pe pres portanport, i ti lir Danyel 2:44 avek en msye Katolik e i ti eksplik li ki mannyer Rwayonm Bondye pou anmenn lape ek sekirite. Sa zonm ti reponn: “Mon vreman apresye ki ou’n servi Labib e montre mwan sa ki sa verse i dir olye ki zis sit li avek mwan.” Ler en frer ti lir en verse Labib avek en madanm dan larelizyon Ortodoks Grek, sa madanm ti demann detrwa bon kestyon. Dan sa ka osi, sa frer avek son madanm ti reponn par servi Labib. Pli tar sa madanm ti dir: “Eski ou konnen akoz mon ti pare pour koz avek zot? Akoz zot in vin devan mon laport avek Labib e zot in lir sa ki ladan.”
9 Byensir nou bann piblikasyon i enportan e devret ganny ofer dan predikasyon. Me Labib i nou zouti prensipal. Alor, si i pa ou labitid pour servi li regilyerman dan ou minister, akoz ou pa fer li ou lobzektif? Petet ou kapab swazir detrwa verse enportan ki eksplik konsernan Rwayonm Bondye e ki mannyer i pou rezourd bann problenm spesifik ki konsern bann dimoun dan ou rezyon. Apre prepar ou pour lir sa bann verse ler ou pe pres portanport.
Nou fyer pour port non Bondye
10, 11. Ki diferans i annan ant Zezi ek bann ki pretann zot son disip an rapor avek non Bondye?
10 “Se sa ki Zeova i deklare, ‘zot mon bann temwen, e mwan, mon Bondye.’” (Iza. 43:12) Zezi Kri sa Temwen Zeova pli enportan, ti konsider li konman en loner pour port non Bondye e fer lezot konn sa non. (Lir Egzod 3:15 *; Zan 17:6; Ebre 2:12, NW. *) Lefet ki Zezi ti anons non son Papa, i ti ganny apele “temwen fidel.”—Rev. 1:5; Mat. 6:9.
11 De lot kote, en kantite parmi sa bann ki pretann ki zot reprezant Bondye ek son Garson in demontre en latitid ki anmenn laont lo non Bondye e zot in menm tir son non dan zot tradiksyon Labib. En lord ki ti ganny donnen resaman avek bann levek Katolik i reflekte sa menm leta lespri. Sa lord ti dir ki “non Bondye dan laform tetragram YHWH pa devret ganny servi oubyen prononse” pandan ladorasyon. * Pa sa i en move rezonnman!
12. Ki mannyer relasyon ant Zeova ek son bann serviter ti vin pli evidan an 1931?
12 Parey Kris ek sa gro “nyaz temwen” ki ti viv avan li, bann vre Kretyen i fyer pour servi non Bondye. (Ebr. 12:1) Anfet dan lannen 1931, sa relasyon ant Zeova ek son bann serviter ti vin pli evidan ler zot ti aksepte sa non Temwen Zeova. (Lir Izai 43:10-12. *) Alor, dan en fason vreman spesyal, bann disip Kris ti vin en “pep pour . . . non [Bondye.]”—Akt 15:14, 17.
13. Ki mannyer nou kapab viv annakor avek sa non ki Bondye in donn nou?
13 Personnelman, ki mannyer nou kapab viv annakor avek sa non inik ki nou’n gannyen? Premyerman, nou devret fidelman rann temwannyaz lo Bondye. Zapot Pol ti ekrir: “Tou sa ki envok non Senyer pou ganny sove. Me ki mannyer zot pou envok li si zot pa krwar dan li? E ki mannyer zot pou krwar dan li san ki zot in tann koz lo li? E ki mannyer zot pou tann koz lo li si personn pa anons li? E ki mannyer en dimoun pou anons li si napa personn ki’n ganny anvoye?” (Rom. 10:13-15) Nou devret osi devwal avek respe en bon zizman bann mansonz relizye ki’n sali nou Kreater, tel parey sa lansennyman lo lanfer dife, ki an realite fer sa Bondye lanmour pas konman sa enn ki responsab pour fason kriyel ki Dyab i azir.—Zer. 7:31; 1 Zan 4:8; konpar Mark 9:17-27.
14. Ler serten i aprann konsernan non Bondye, ki mannyer zot reakte?
14 Eski ou fyer pour port non ou Papa ki dan lesyel? Eski ou ed lezot pour konn sa non sen? En madanm sorti Pari, Lafrans, ti’n tande ki Temwen Zeova ti konn non Bondye, alor i ti demann en Temwen ki i ti zwenn pour montre li sa non dan son Labib. Ler i ti lir Psonm 83:18 sa ti fer en gran lefe lo li. I ti konmans etidye Labib e aprezan i en ser fidel ki pe servi dan en lot pei. Ler en madanm Katolik ki pe reste Lostrali ti vwar non Bondye dan Labib pour premye fwa, i ti plere avek lakontantman. I fer plizyer lannen aprezan depi ki i en pionye ordiner. Tou resaman Zamaik, en Temwen ti montre en madanm non Bondye dan son prop Labib, e li osi i ti plere avek lakontantman. Alor nou devret fyer pour port non Bondye e fer konnen sa non presye avek tou dimoun parey Zezi ti fer.
“Pa bezwen kontan lemonn”
15, 16. Ki mannyer bann vre Kretyen i vwar sa lemonn e ki kestyon nou devret demann nou lekor?
15 “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li.” (1 Zan 2:15) Sa lemonn ek son leta lespri ki pa spirityel i opoz Zeova ek son lespri sen. Alor, bann vre disip Kris pa zis evite form parti lemonn. Zot refize kontan sa lemonn akoz parey disip Zak ti ekrir, zot konnen ki “lanmour pour lemonn i fer vin lennmi Bondye.”—Zak 4:4.
16 Dan sa lemonn kot i annan en kantite tantasyon i kapab difisil pour swiv sa konsey ki Zak ti donnen. (2 Tim. 4:10) I pour sa rezon ki Zezi ti priy pour son bann disip an dizan: “Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (Zan 17:15, 16) Demann ou lekor: ‘Eski mon fer zefor pour pa form parti lemonn? Eski lezot i konn mon pwennvi lo bann selebrasyon ek koutim ki pa baze lo Labib ensi ki bann koutim ki pa sorti dan lorizin payen me ki klerman reflekte lespri sa lemonn?’—2 Kor. 6:17; 1 Pyer 4:3, 4.
17. Kwa ki kapab pous bann dimoun avek leker senser pour pran pozisyon pour Zeova?
17 I vre ki sa pwennvi ki nou annan baze lo Labib pa pou fer nou ganny laprouvasyon sa lemonn, me i kapab fer bann dimoun ki annan leker senser anvi konn plis lo Labib. Vreman, ler dimoun i remarke ki nou lafwa i solidman baze lo Lekritir e ki sa i enplik tou laspe nou lavi, zot kapab azir dan en fason e dir avek bann Kretyen swazir: “Nou pou al avek zot, akoz nou’n antann ki Bondye i avek zot.”—Zeka. 8:23.
Demontre vre lanmour Kretyen
18. Ki i enplike pour demontre lanmour pour Zeova ek nou prosen?
18 Zezi ti dir: “Kontan Senyer ou Bondye avek tou ou leker, avek tou ou lam, e avek tou ou lespri” e “kontan ou prosen parey ou kontan ou prop lekor.” (Mat. 22:37, 39) Lanmour (a·gaʹpe an Grek) i en lanmour ki baze lo sa ki byen moralman, ki pran an konsiderasyon prensip, sa ki en dimoun i devret fer e sa ki apropriye pour fer, me i souvan enplik annan en gran santiman. I kapab tousan e profon. (1 Pyer 1:22) I tou lekontrer avek legoizm, akoz sa lanmour i ganny demontre avek en leta lespri sakrifis an parol e an aksyon.—Lir 1 Korentyen 13:4-7.
19, 20. Rakont serten leksperyans ki montre ki lanmour Kretyen i annan pwisans.
19 Vi ki lespri sen Bondye ki fer nou devlop lanmour, sa i permet bann vre Kretyen pour sirmont bann baryer rasyal, kiltirel e politik. (Lir Zan 13:34, 35; Gal. 5:22) Bann dimoun ki resanble bann mouton zot vreman touse ler zot vwar sa kalite lanmour. Par egzanp, ler en zenn onm Zwif Izrael ti asiste Renyon pour premye fwa, i ti etonnen pour vwar bann frer Zwif ek Arab pe ador Zeova kotakot. An rezilta sa i ti konmans asiste bann renyon regilyerman e i ti aksepte en letid Labib. Eski ou demontre lanmour senser anver ou bann frer ek ser? Eski ou fer zefor pour byen akeyir bann dimoun ki vin kot Lasal Rwayonm pour premye fwa, san gete ki zot nasyonalite, ki kouler lapo zot annan oubyen rode ki zot nivo sosyal?
20 Konman bann vre Kretyen, nou fer zefor pour demontre lanmour anver tou dimoun. En zenn proklanmater El Salvador ti konmans en letid avek en madanm Katolik ki annan 87 an e ki ti byen atase avek son legliz. En zour, sa madanm ti tonm gravman malad e ganny admet lopital. Ler i ti retourn kot li, sa Temwen ti al vwar li e fer sir ki i ti annan manze. I ti fer sa pour apepre en mwan. Napa en dimoun dan son legliz ki ti vin vwar li. Ki ti arive finalman? I ti zet tou son bann zimaz, kit son legliz e rekonmans etidye Labib. Wi, lanmour Kretyen i annan pwisans! I kapab tous leker bann dimoun plis ki bann parol ki nou dir zot.
21. Ki mannyer nou kapab fer ki nou lavenir i sir?
21 Byento, Zezi pou dir avek tou bann ki pretann pe servi li: “Mon pa’n zanmen konn zot. Sorti la, zot ki pratik lemal!” (Mat. 7:23) Alors annou raport bann fri ki onor tou le de Papa ek Garson. Zezi ti dir: “Tou sa ki ekout mon bann parol e met zot an pratik i [pou] parey en zonm saz ki konstri son lakaz lo ros.” (Mat. 7:24) Wi, si nou montre ki nou bann vre disip Kris, nou pou resevwar faver Bondye e nou pou annan en lavenir ki sir, enn ki son fondasyon in ganny konstrir lo ros!
[Not anba lo paz]
^ par. 2 Danyel 12:3, 10: “Bann ki annan bon zizman pou briye konman lalimyer dan latmosfer; e bann ki pe anmenn bokou ver ladrwatir, parey zetwal, pour en letan endefini, wi pour touzour.” “Bokou pou lav zot e fer zot vin blan, e zot pou ganny rafinen. Bann ki mesan pou sirman mal azir, e okenn dimoun mesan pa pou konpran; me bann ki annan bon zizman pou konpran.”
^ par. 10 Egzod 3:15: “Ankor enn fwa Bondye ti dir Moiz: ‘Dir bann Izraelit, “Zeova Bondye zot zanset, Bondye Abraam, Bondye Izaak ek Bondye Zakob, in anvoy mwan kot zot.” Sa i mon non pour en letan endefini, e sa i mon memoryal pour zenerasyon apre zenerasyon.’”
^ par. 10 Ebre 2:12: “I ti dir: ‘Mon anvi annons ou non avek mon bann frer; parmi kongregasyon mon anvi loue ou atraver bann kantik.’”
^ par. 11 Serten piblikasyon modern parey The Jerusalem Bible ki ganny pibliye an Angle par legliz Katolik i tradwir sa tetragram konman “Yahweh.”
^ par. 12 Izai 43:10-12: “‘Zot mon bann temwen, wi mon serviter ki mon’n swazir, pour ki zot konn mwan e annan lafwa dan mwan, e ki zot konpran ki mon pa’n sanze. Avan mwan ti napa okenn Bondye, e apre mwan pou napa. Mwan, mon Zeova e napa okenn sover apard mwan.’ Se sa ki Zeova i deklare, ‘Mwan, mon’n revele e mon’n sove e mon’n fer tande, letan ti napa okenn bondye etranze parmi zot. Alor zot mon bann temwen, e mwan, mon Bondye.’”
Eski ou rapel?
• Ki mannyer bann disip Kris i diferan avek bann ki pretann zot son disip?
• Nonm serten “fri” ki idantifye bann vre Kretyen?
• Ki lobzektif ou kapab fikse ler ou pe devlop fri lespri?
[Kestyon]