Amamane Jë Laka, Itre Nyipi Hlue I Keriso Nyipunie
Troa Xome La Ita Ne Thup Celë e 15 Maac Me Wiike Cili
Amamane Jë Laka, Itre Nyipi Hlue I Keriso Nyipunie
“Ame la nöjei sinöe ka loi, kola wa loi; nge ame la sinöe ka ngazo kola wa ngazo.”—MAT. 7:17.
1, 2. Nemene la eisapengönene la itre nyipi hlue i Keriso memine la itre Keresiano ka hmi thoi ngöne la itre hnedrai së, ene la hneijin ne la pun?
HNEI Iesu hna qaja ka hape, tro ha mama jëne la itre wen, la eisapengönene la itre Keresiano ka hmi thoi me itre nyipi Keresiano; kola qaja lo itre ini hnei angatr hna hamën memine lo aqane ujë i angatr. (Mat. 7:15-17, 20) Eje hi laka troa hetre thangane pala hi la itre ewekë ka lapaane la mekune me hni ne la itre atr, ngöne la itre aqane ujë i angatr. (Mat. 15:18, 19) Ame la itre atr ka kapa la itre ini ka thoi, tre, “ngazo” la aqane wa wene i angatr, ngo ame pe la itre ka inine la nyipici ngöne la götrane la ua, tre, ka “loi” hi la aqane wa wene angatr.
2 Mama hnyawa ha la lue pengöne wene cili ngöne la hneijine së, ene la hneijin ne la pun. (E jë la Daniela 12:3, 10.) Ame la itre Keresiano ka hmi thoi, tre, tria kö la mekuna i angatr göi Akötresie, nge ka hetre thoi ngön la aqane hmi angatre koi Nyidrë. Ngo ame pena ha la itre nyipi Keresiano ka hetrenyi la trotrohnin ngöne la götrane la ua, tre, angatr a hmi koi Akötresie “ngöne la [“ua,”MN] me nyipici.” (Ioane 4:24; 2 Tim. 3:1-5) Angatr a catre thele troa eëne la itre thiina ne la Keresiano. Ngo hapeue fe easë isa ala caas? Ame la easa troa wange cahu faifi lao hatren ka amamane la aqane hmi ne la nyipi Keresiano, tre isa hnyingëne thele jë së, ka hape: ‘Ka ihmeku hnyawa kö la aqane ujëng, itre ini hnenge hna hamën, memine la hna qaja hnene la Wesi Ula i Akötresie? Tune kaa fe göne la meleng, kolo kö lai a upe la itre atr troa pi atre la nyipici?’
Itre Ka Trongëne La Wesi Ula i Akötresie
3. Nemene la ka amadrinë Iehova, nge kolo lai a hapeu kowe la itre nyipi Keresiano?
3 Hnei Iesu hna qaja, ka hape: “Tha angat’ asë kö angete qeje ni, ka hape, Joxue, joxue, ka troa lö kowe la baselaia ne hnengödrai; ngo loi la ate kuca la hanengë i Angakaka e hnengödrai.” (Mat. 7:21) Nyipici, thaa eje kö la troa qaja, ka hape ketre Keresiano së, la ka troa amadrinë Iehova, ngo ene pe la troa kuca la hnëqa ne la Keresiano. Kolo lai a hape, nyipi ewekë troa mama ngöne la nöjei götran ne la mele ne la itre Keresiano laka, itre nyipi hlue i Keriso angatr; kola qaja la aqane huliwane la mani, me huliwa i maseta, me itre nyine iamadrinë, me itre hna majemine kuca hnene la fen, me itre feet me faipoipo, me itre xaa huliwa ka ketr la aqane imelekeu së memine la itre atr. Ngo ame la itre Keresiano ka hmi thoi, tre, angatr a xome la aqane mekun memine la itre jën ne la fene celë, ngöne laka nyimutre catr la itre atr ka icilekeu memine la hmi ngöne la itre drai tixenuë celë.—Sal. 92:7.
4, 5. Tro sa trongëne tune kaa ngöne la mele së, la itre trenge ewekë i Iehova ngöne Malaki 3:18?
4 Hanawange la hna cinyihane hnene la perofeta, ene Malaki, kola hape: “Tro hmaca nyipunie a isa wangate hmekune la ate ka meköti me ate ka ngazo, nge ate nyi hlue i Akötesie me ate tha nyi hlue i nyidë.” (Mal. 3:18) Pane mekune jë epuni la itre trenge ewekë celë, nge isa hnyingëne thele jë ka hape: ‘Hapeu, eni kö a ujë tune la itre atre ne fen, maine isapengönge kö me angatr? Hapeue ngöne la hna ini maine pena ngöne la hna huliwa i maseta, eni a thele troa kepe ni hnene la itre atr, maine pena eni a catr troa cilëgöline la itre trepene meköti ne la Tusi Hmitrötr, uti fe hë la troa qaja mekötine la itre mekune ne ej, ngöne la nyipi ijin?’ (E jë la 1 Peteru 3:16.) Eje hi laka, thaa easë kö a ajane troa pi nyi ka meköt, ngo loi e tro pala hi sa amamane laka, isapengöne kö së memine lo itre atr ka thaa hnimi Iehova kö, nge ka thaa hane kö nyihlue i Nyidrë.
5 Maine öhne hi epuni laka, hetre itre hnepe götran ne la mele i epun nyine troa saze, tune kaa matre tro epuni a thithi fë la jole cili, me thele ixatua jëne la hna inine pala hi la Tusi Hmitrötr, me thith me sine la itre icasikeu? Maine tro pala hi epuni a trongëne la hna ahnithe hnene la Wesi Ula i Akötresie, haawe, tro hë epuni a wa wene ka “loi,” tune la “wene la ite ukeineqe . . . kola olene kowe la atesiwa i [Akötresie].”—Heb. 13:15.
Itretre Cainöjëne La Baselaia i Akötresie
6, 7. Nemene la eisapengönene la itre nyipi Keresiano memine la itre Keresiano ka hmi thoi, ngöne la götrane la huliwa ne cainöjëne la maca ne la Baselaia?
6 Hnei Iesu hna qaja, ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena; ke hna upi ni thatraqane lai.” (Luka 4:43) Pine nemen matre ame la mekune ka sisitria hnei Iesu hna ithanatane ngöne la huliwa ne cainöj, tre, ene la Baselaia i Akötresie? Atrehmekune hi Iesu, ka hape, nyidrëti la ka troa Joxu ne la Baselaia cili, me ce musi memine la itre trejine me nyidrë hna iën, ene lo itre hna troa amelene hmaca; nge troa ce hnei angatr elany matre troa lepe apaatrene la qaan la itre akötr e cailo fen, ene la ngazo me Diabolo. (Rom. 5:12; Hna ama. 20:10) Qa ngöne lai, hnei nyidrëti hna upe la itre hlue i nyidrë troa cainöjëne la Baselaia cili uti hë la kola nyipune la fene ka ngazo celë. (Mat. 24:14) Ame la itre atr ka uune fë, ka hape, itre hlue i Keriso angatr, tre, thaa angatre fe kö a hane xome la huliwa cili, ke thaa ijiji angatre kö. Pine nemen? Könitre lao kepin matre thaa ijiji angatre kö troa xome la huliwa cili: Ame la hnapan, tre, hnene laka, thatreine kö tro angatr a cainöjëne la hnei angatre hna thaa trotrohnine kö. Ame la hnaaluen, tre, hnene laka paatre kö thene la itre xan e angatr la hni ka ipië me trenge catr matre troa cile kowe la ihnyimasai me icilekeu ka xulu qa ngöne la hna tro fë la maca ne Baselaia kowe la itre atr ka lapa ezi angatr. (Mat. 24:9; 1 Pet. 2:23) Nge ame la hnaakönin, tre, hnene laka, paatre kö la Ua i Akötresie thene la itre Keresiano ka hmi thoi.—Ioane 14:16, 17.
7 Ngo ame kö la itre nyipi hlue i Keriso, tre, trotrohnine hi angatr la pengöne la Baselaia i Akötresie memine la hnene ej hna troa eatrën. Ketre, angatr a amë panën ngöne la mele i angatr, la itre huliwa ne la Baselaia cili, nge kolo mina fe a xatua angatr hnene la Uati Hmitrötre i Iehova troa cainöjëne la Baselaia cili e cailo fen asë. (Zaka. 4:6) Hapeu, epuni kö a hane catre ixatua ngöne la huliwa cili? Epuni kö a thele matre maca la aqane cainöjëne epuni la maca ne Baselaia, maine jë hnene la hna nue la traeme i epun kowe la huliwa cili maine hnene la hna thele pena troa atreine xome hnyawa la huliwa cili? Hnene la itre xan hna akökötrene la atreine i angatr troa cainöj, hnene la hna thele troa maca ngöne la aqane huliwane angatr la Tusi Hmitrötr. “Ke mele la wesi ula i Akötesie, me men,” celë hi la hna cinyihane hnei Paulo aposetolo, ketre atr ka majemine xome la Itre Hna Cinyihan, matre troa thele ewekë.—Heb. 4:12; Ite Hu. 17:2, 3.
8, 9. (a) Nemene la itre hna melën ka amamane la enyipiewekëne la troa huliwane la Tusi Hmitrötr ngöne la huliwa ne cainöj? (b) Nemene la nyine tro sa kuca matre tro sa atreine huliwane la Wesi Ula i Akötresie?
8 Hnene la ketre trejin trahmanyi hna e la tusi Daniela 2:44 kowe la ketre Katolik, ngöne la ketre ijine angeic a cainöj ngöne itre hnalapa trootro; hnei angeice fe hna qeje pengöne koi nyidrë la aqane tro la Baselaia i Akötresieti elanyi a xulu fë la ketre mele ka tingeting me ka xetietë. Önine la trahmanyi e sa, ka hape: “Eni a pane olen atraqatre koi nyipë hnene laka, thaa hnei nyipëti kö hna e gufane koi ni la xötr, ngo hnei nyipëti pe hna fe la Tusi Hmitrötr matre troa amamane koi ni la hna qaja hnene la xötre cili.” Thupene la hna e la ketre xötr hnene la ketre trejine trahmany kowe la ketre föe ka sine la hmi Eglise orthodoxe grecque, traqa pi hi koi eahlo la itre xaa hnyinge ka lolo. Ame mina fe ngöne la ijine cili, hnene la trejine trahmanyi memine la föe i nyidrë, hna xome la Tusi Hmitrötr matre troa sa koi eahlo. Kolo pë hë a qaja hnene la föe e thupen, ka hape: “Atre hi epon la kepin matre eni a drei epon me porotrike me epon? Hnene hi laka hnei epon hna xom la Tusi Hmitrötr me e koi ni.”
9 Eje hi laka, ka nyipi ewekë la itre itusi së, nge loi e tro sa tro fë itre ej ngöne la hna cainöj. Ngo Tusi Hmitrötr la pane itus nyine tro sa xom. Haawe, maine thaa hnei epuni kö hna majemine huliwane la Tusi Hmitrötr ngöne la epuni a cainöj, tre, maine jë celë hi ketre ewekë nyine tro epuni a thele troa eatrën! Maine jë tro epuni a iëne la itre xaa xötr ka sisitria ka qeje pengöne la Baselaia i Akötresie, memine la aqane tro ej a nyinyine la itre jol ka akötrëne la itre atrene la teritoare së. Thupene lai, hnëkë jë troa e koi angatr la itre xötre cili ngöne la epuni a troa cainöje ngöne itre hnalapa trootro.
Itre Ka Thaa Hmahma Kö Troa Tro Fë La Ëje i Akötresie
10, 11. Nemene la eisapengönene la aqane xome Iesu la ëje i Akötresie, memine la aqane huliwane la ëje i Nyidrë hnene la itre ka uune fë ka hape, itretre xötrethenge Iesu angatr?
10 Öni Iehova, ka hape: “Nyipunie la itete anyipici ni laka ini hi la Akötesie.” (Is. 43:12) Iesu Keriso lo pane Atre Anyipicine i Iehova, nge hnei nyidrëti hna goeëne la hnëqa ne troa tro fë me ahlemune la ëje i Akötresie ceitu me ketre manathithi ka tru hna hamëne koi nyidrë. (E jë la Esodo 3:15; Ioane 17:6; Heberu 2:12.) Easa trotrohnine la kepin matre kola hë Iesu, ka hape, “ate anyipicine ka nyipici,” hnene laka hnei nyidrëti pala hi hna tro fë la ëje ne la Tretretro i nyidrë.—Hna ama. 1:5; Mat. 6:9.
11 Drei la eisapengönene memine la itre atr ka uune fë, ka hape, itre ka nyi trenge ewekë i Akötresieti angatr me Iesu Hupuna i Nyidrë, ngo ka thaa metrötrëne pe la ëje i Akötresie, ke paatre hë la ëje i Akötresie qa ngöne la itre Tusi Hmitrötre i angatr; hnei angatre hna xometrij ej. Hetre hna hnyipi amekötine kowe la itre peen katolik nge ka amamane hnyawa la aqane thaa metrötrëne angatr la ëje i Akötresie; kola qaja, ka hape, “ame la ëje i Akötresie, lo hna cinyihane ka hape, YHWH, tre, thaa tro pi kö a qaja” ngöne la kola hmi. * Drei la ketre aqane mekune ka tria catr!
12. Nemene la ka traqa ngöne lo macatre 1931 matre mama hnyawa pi la itre ka nyihlue i Iehova hnyawa?
12 Itre nyipi Keresiano a nyitipu Keriso memine la “itete anyipicine” ka ala nyim ka xötrethenge nyidrë, ngöne la angatr a xome hnyawa la ëje i Akötresie cememine la madrin. (Heb. 12:1) Ngo qaane lo macatre 1931, kolo ha mama hnyawa laka, itre nyipi hlue i Iehova angatr, pine laka hna ati ëje i angatr ka hape, Itretre Anyipicine i Iehova. (E jë la Isaia 43:10-12.) Qaane ju hi la ijine cili, ketre nöje ka ketre pengöne hë la itre nyipi hlue i Keriso, pine la “hna ati ëjene qa ngöne la ëje [i Akötresie.]”—Ite Hu. 15:14, 17.
13. Tro sa kuca tune kaa matre tro sa tro thenge la hna ati ëje së?
13 Tro sa kuca tune kaa matre tro sa tro thenge la hna ati ëje së? Ame la hnapan, nyipi ewekë tro sa anyipici Akötresie cememine la nyipici. Hnei Paulo hna cinyihan, ka hape: “Tro ha mele angat’ asë angete hëne la atesiwa i Iehova”. [Ngo] tro angate a hë nyidëti tune ka lo tha hnei angate hna lapaune kow? Nge tro angat’ a lapaune tune ka koi nyidë lo hnei angate hna tha deng? Nge tro angat’ a denge tune ka nge pëkö ate cainöj? Nge tro angat’ a cainöje tune ka e tha hna upe kö?” (Rom. 10:13-15) Ketre, loi e tro mina fe sa qaja amamane cememine la thiina ka menyik, la itre ini ka thoi ka jele ngazone la Atre Xupi së, tune la ini hna hape, hetre ifereno; ketre ini lai ka upe la itre atr troa mekune ka hape, ame la Akötresieti ka ihnim, tre, ka hane fe Nyidrëti iakötrë tui Diabolo.—Iere. 7:31; 1 Ioane 4:8; aceitunëne jë me Mareko 9:17-27.
14. Hnene la itre xaa atr hna ujë tune kaa ngöne la angatr a atre la sipu ëje i Akötresie?
14 Hapeu, madrine kö epuni troa xome la ëje ne la Tretretro i epun e koho hnengödrai? Epuni kö a xatuane la itre atr troa hane atre la ëje cili ka hmitrötr? Hnene la ketre föe ka mele e Faras hna drei mejen, ka hape, ame la Itretre Anyipicine i Iehova, tre, atre hi angatr la ëje i Akötresie; celë hi kepin matre hnei eahlo hna sipone kowe la ketre Atre Anyipicin troa amamane koi eahlo la ëje cili ngöne la sipu Tusi Hmitrötre i eahlo. Ame la eahlo a e la Salamo 83:18, tre, ketri eahlo ju hi. Haawe, eahlo a nyiqaane inine jë la Tusi Hmitrötr, nge ame hë enehila, tre, ketre trejine föe hë ka mele nyipici nge ka nyihlue ngöne la ketre nöj. Ame la ketre föe ne Osetralia ka sine la hmi Katolik, tre, hnei eahlo hna treij ngöne la eahlo a xötrei öhne la ëje i Akötresie hnine la Tusi Hmitrötr. Nyimutre hë enehila la itre macatre ne xome eahlo la huliwa ne pionie lapa. Ame pena e Jamaik, tre, hnene la Itretre Anyipicine i Iehova hna amamane kowe la ketre föe, la ëje i Akötresie ngöne la sipu Tusi Hmitrötre i eahlo; kola xölaxöla la trenge timidra i eahlo hnei madrin. Haawe, thaa tro kö sa xou troa xome la ëje i Akötresie, me nyitipu Iesu ene la troa anyipicine kowe la nöjei atr asë la ëje cili ka sisitria.
“The Ajane Kö Nyipunie Kowe La Fen”
15, 16. Tune kaa la aqane goeëne la fen hnene la itre nyipi Keresiano, nge nemene la itre mekun nyine tro sa hnyingëne thel?
15 “The ajane kö nyipunie kowe la fen, memine fe la ite ewekë e celë fen. Maine kete ate a ajane la fen, pëkö aja koi Tetetro e kuhu hni angeic.” (1 Ioane 2:15) Fen me itre aja ne ej a icilekeu me Iehova memine la Uati Hmitrötre i Nyidrë. Qa ngöne lai, kola thupëne hnene la itre nyipi Keresiano matre thaa tro kö angatr a hane sine la fen, ngo hetre ketre ewekë kö hnei angatr hna kuca. Angatre fe a lepe trij qaa kuhu hni angatr la aja kowe la fen, ke atre hnyawa hi angatr la hna cinyihane hnei Iakobo ketre hlue i Iesu, ka hape, “ithupëjia me Akötesie la kola nyi sine ne la fene hnengödrai.”—Iako. 4:4.
16 Maine jë troa jole koi së troa trongëne la itre trenge ewekë i Iakobo, ke nyimutre la itre aqane iaö ka eje e celë fen. (2 Tim. 4:10) Celë hi kepin matre hnei Iesu hna thithi thatraqane la itretre drei nyidrë, ka hape: “Tha sipo cilieti kö ni, mate tro cilieti a thei angate qa la fen, ngo mate tro cilieti a thupë angate ene la ngazo. Tha itete fene kö angat, nge tunge tha ate fene kö.” (Ioane 17:15, 16) Haawe, isa hnyinge jë së ka hape: ‘Hapeu, eni kö a catre troa iananyi memine la fen? Atre kö la itre xaa atr la mekunang göne la itre feet me itre hna majemine kuca, ngo thaa hna nyitrepene kö hnei Tusi Hmitrötr? Nge tune kaa fe göne la itre hna majemine kuca ka thaa xulu kö qa thene la itre hmi ka thoi, ngo ka sajuëne hnyawa pe la ua me aja ne la fen?’—2 Kor. 6:17; 1 Pet. 4:3, 4.
17. Nemene la ka troa aijijëne la itre atr ka hni ka menyik troa ce me Iehova?
17 Nyipici laka maine tro sa mele thenge la hna qaja hnene la Tusi Hmitrötr, eje hi lai laka, thaa tro kö la fen a kepe së; ngo ame pe, tre, celë hi lai ka troa upe la itre atr ka hni ka menyik troa pi atrepengöne la kepine matre easa mele tune lai. Nyipici, ame la itre xaa atr, tre, angatr a goeën laka ka cile huti hnyawa la lapaune së hnene la Itre Hna Cinyihan, nge ketre, mama hnyawa hi ngöne la mele së ka pexej laka, easa trongëne la hna qaja hnene la Tusi Hmitrötr; qa ngöne lai, maine jë tro hë angatr a hane ithanata tune lo itre ka qaja kowe lo ketre hna iën, ka hape: “Tro huni a ce tro me nyipunie, ke ate hë huni laka thei nyipunie la Akötesie.”—Zaka. 8:23.
Amamane Jë La Nyipi Ihnimi Ne La Keresiano
18. Kola hapeue la troa hnimi Iehova memine la atre lapa easenyi së?
18 Hnei Iesu hna qaja, ka hape: “Tro eö a aja Akötesi ’ö hnene la hni ’ö ka pexej, me u i ’ö ka pexej, me mekune i ’ö ka pexej,” nge öni nyidrëti fe, ka hape, “Tro eö a hnime la ate lapa eashenyi ’ö tui eö hi.” (Mat. 22:37, 39) Ame la ihnimi cili (hna hape, a·gaʹpe ngöne la qene Heleni), tre, eje a mama thene la atr ka kuca la loi, kola qaja la atr ka lolo thiina nge ka nyipine la hnëqa hna ahnithe koi angeic, nge hna nyitrepene la ihnimi cili hnene la itre trepene meköt. Ngo ame pe, tre, thaa ka uqa hnine kö ej. Ketre ihnimi lai ka catrehnin nge ka iakeukawany. (1 Pet. 1:22) Ka isazikeu catre la ihnimi cili memine la pi tru, pine laka mama kö ngöne la aqane ujë ne la atr me ngöne la itre trenge ewekë i angeic ka hape, ka pi tru angeic.—E jë la 1 Korinito 13:4-7.
19, 20. Qaja jë la itre xaa hna melën ka amamane la emenen la ihnimi Keresiano.
19 Pine laka, ketre wene ne la Ua i Akötresieti la ihnim, haawe atreine hi la itre Keresiano troa kuca la hna thatreine kuca hnene la itre xan; ka tune la troa elë hune la iwangatrehmekunyi atr, memine la itre mekun ka isa ijene la itre nöj ka isapengöne kö la aqane mel, memine fe la troa elë hune la itre xaa mekun ka xulu qa ngöne la politik nge ka thë la aqane ce mele la itre atr hnine la itre nöj. (E jë la Ioane 13:34, 35; Gal. 5:22) Kola ketr la hni ne la itre atr ka ceitu me itre mamoe hnene la aqane ihnimi cili. Drei la ketre ceitun, ame la kola xötrei sine la ketre icasikeu ne Keresiano hnene la ketre thöth ne Iudra, tre, sesëkötre jë kö angeic la angeic a goeëne laka, kola cengöne hmi koi Iehova hnene la itre trejine ne Iudra me Arab. Ame hë la thangane lai, tre, thaa cile hë angeic troa sine la itre icasikeu, me inine la Tusi Hmitrötr. Hapeu, epuni kö a hane hnime tune lai la itre trejine me epun? Nge epuni kö a thele troa kapa hnyawa la itre atr ka xötrei traqa ngöne la Uma Ne Baselaia i epun, ngacama isapengöne ju hë la nöje i epun, me han ne ngönetrei, maine aqane mele pena?
20 Pine laka itre nyipi Keresiano së, haawe, catre pi së troa hnime la nöjei atr asë. Ame ngöne la ketre nöj hna hape, El Salvador, tre hnene la ketre nekö jajinyi ka cainöj, hna ini Tusi Hmitrötr memine la ketre qatre föe ka catre sine la hmi Katolik nge ka 87 lao macatre. Ame ngöne la ketre drai, tre, hna traqa la meci koi eahlo, ame hna upi eahlo ju a tro pital. Ame la eahlo a bëeke hmaca koi hnalapa, tre, hnene la Itretre Anyipicine hna hë eahlo me xatua eahlo matre troa hetre xeni pala hi ngöne la hnalapa. Traqa koi caa treu ne angatr a ujë tune lai. Pëkö ketre sine hmi eahlo ka hane traqa troa wai eahlo. Nemene hë la thangane lai? Hnei eahlo hna trij asë la itre iatr, me lö pi qa ngöne la hmi eahlo, me sisedrëne la ini Tusi Hmitrötre i eahlo. Nyipici, hetre emenen la ihnimi Keresiano! Isapengöne kö la easa cainöjëne la ihnim, memine la easa melën, ke canga tro hi lai a ketr la hni ne la itre atr.
21. Nemene la nyine tro sa kuca matre troa cile huti la mele së elany?
21 Easenyi hë tro Iesu a qaja kowe la itre ka uune fë, ka hape, itre Keresiano angatr la trenge ewekë celë kola hape: “Tha ‘te nyipunieti kö ni; iananyipi me ini, nyipunie angete kuca la ngazo.” (Mat. 7:23) Qa ngöne lai, loi e tro sa catre troa eëne la itre thiina ka atrune la Tretretro memine la Hupuna. Öni Iesu, ka hape: “Ame la ate denge la nöjei tenge ewekënge celë, me kuca it’ ej, tro ni a acei tunë angeice me ate inamacan, lo ate acile la uma i angeice hune la etë.” (Mat. 7:24) Nyipici, maine tro sa amamane hnyawa, ka hape, itre nyipi hlue i Keriso së, haawe, tro ha kepe së hnei Akötresie nge tro ha cile huti la mele së elany, kösë hna acile hune la etë!
[Ithueamacany]
^ Hetrenyi enehila la itre xaa itus ne la itre Katolik qene Papale, ka ujëne la itre mataitusi cili, ka hape, “Yahweh,” tune la Tusi Hmitrötr hna hape, The Jerusalem Bible.
Mekune Kö Nyipunie?
• Nemene la eisapengönene la itre nyipi hlue i Keriso memine la itre ka hmi thoi?
• Qaja jë la itre xaa “wene” ka qaja amamane la pengöne la itre nyipi Keresiano.
• Nemene la hnei epuni hna thele troa eatrën, ngöne la epuni a eëne la itre wene ne la Keresiano?
[Thying]