Wilombole bu Mulondi wa Binebine wa Kidishitu

“Mutyi munengele upanga binengele, ino mutyi mukobakane nao upanga bikobakane.”—MAT. 7:17.

1, 2. Lelo balondi ba bine ba Kidishitu i beshile namani na ba bubela, kupityidila mu kino kitatyi kya ku mfulo?

 YESU wānene amba boba betela bya bubela amba bamwingidilanga bakeshila na balondi bandi ba bine kupityila ku bipa byabo—bufundiji ne mwiendelejo wabo. (Mat. 7:15-17, 20) Na bubine, bantu kebabudilwepo kuludikwa na byobya byobatweja mu milangwe ne mu mityima yabo. (Mat. 15:18, 19) Boba bafundijibwa bya bubela bapanga bipa “bikobakane,” papo boba bafundijibwa bubinebine bapa bipa “binengele.”

² Ino miswelo ibidi ya bipa i mimweke patōka mu kino kitatyi kya ku mfulo. (Tanga Danyele 12:3, 10.) Bene Kidishitu ba bubela badi na mumweno munyengakane padi Leza ne divule badi na bwine Leza bwa buzanzangi, ino boba badi na mumweno wa ku mushipiditu batōtanga Leza “mu mushipiditu ne binebinepo.” (Yoa. 4:24; 2 Tem. 3:1-5) Bekankilanga’ko kulombola ngikadilo ya Kidishitu. Le batwe netu umo ne umo? Kitatyi kyobandaula biyukeno bitano bilonda’ko biyukanya Bwine Kidishitu bwa bine, wiipangule amba: ‘Lelo mwiendelejo ne bufundiji bwami bikwatañene na Kinenwa kya Leza? Lelo mwekejanga amba bubinebine i buyampe ku meso a boba bebukimba?’

Londa Kinenwa kya Leza mu Būmi

3. Lelo i kika kisangajanga Yehova, ne kino kilomba bika ku Bene Kidishitu ba bine?

³ Yesu wānene amba: “Ke bonsololopo bantu bakuntela’mba; Mfumwami! Mfumwami! bakatwele umbulopwe bwa mūlu, ehe, poso enka wakulonga kiswa-mutyima wa Tata udi mūlu.” (Mat. 7:21) Bine ke kwitelapo bu Mwine Kidishitu kusangaja Yehova, ino i kumwekeja’bo mu bilongwa. Ku balondi ba bine ba Kidishitu, Bwine Kidishitu butala būmi bwabo bonso, kubadila’mo ne muswelo obamona lupeto, twaji, kwipwija mukose, bibidiji ne mafetyi a ino ntanda, busongi, ne mwa kwikadila na bantu. Ino Bene Kidishitu ba bubela, balondanga milangwe ne mashinda a ntanda, avudija kubulwa bwine Leza mu ano mafuku a ku mfulo.—Mit. 92:7.

4, 5. Lelo tukengidija namani mu būmi bwetu binenwa bya Yehova bidi mu Malaki 3:18?

⁴ Pa uno mwanda, mupolofeto Malaki wāsonekele amba: “Muketola ne kusansanya mubukata mwa boloke ne bapupakane, mubukata mwa yewa wingidila Leza ne yewa wampikwa kumwingidila.” (Mal. 3:18) Polangulukila pa bino binenwa, wiipangule amba: ‘Lelo ne mwiifwane na ino ntanda’ni, nansha ne mwishile nayo? Lelo noñanga bukomo bwa kwifwana balunda nami ba ino ntanda, pondi ku masomo ne ku kaji’ni, nansha ndamatanga ku misoñanya ya mu Bible ne kwisamba’yo ponso pokifwaninwe?’ (Tanga 1 Petelo 3:16.) Bine ketusakangapo kwimwekeja bu boloke, ino tufwaninwe kwishila na boba bapela kuswa Yehova nansha kumwingidila.

⁵ Shi ubamone amba kudi pofwaninwe kwilumbulula, lelo ubulwe’po kulombela pa uno mwanda ne kukimba bukomo bwa ku mushipiditu na kwifunda Bible nyeke, kulombela, ne kutanwa ku kupwila? Kinenwa kya Leza pokyenda kitwela munda mobe, po pene nobe ukapa bipa “binengele,” kubadila’mo ne “bipa bya milomo ya kwitabija ku dijina [dya Leza].”—Bah. 13:15.

 Sapula Bulopwe bwa Leza

6, 7. Pa mwanda utala musapu wa Bulopwe, i kwishila’ka kudi pa bukata bwa Bene Kidishitu ba bine ne ba bubela?

⁶ Yesu wānene amba: “I kiñendelemo nsapwile myanda-miyampe ya bulopwe bwa Leza mu bibundi bikwabo namo, ke-kintu i akyo kyonka kyo natalwilwa.” (Luka 4:43) Mwanda waka Yesu wātongele Bulopwe bwa Leza bu mutwe wa mwanda mu busapudi bwandi? Wādi uyukile amba byadi Mulopwe wa buno Bulopwe, pamo ne banababo ba ku mushipiditu basangulwe bakafundula nsulo mine ya masusu a bantu—ke bubi ne Dyabola kadi. (Loma 5:12; Kus. 20:10) O mwanda wāsoñenye balondi bandi basapule buno Bulopwe kufika ne ku mfulo ya ino ngikadilo ya bintu ya dyalelo. (Mat. 24:14) Bantu betela bitupu bu balondi ba Kidishitu kebengilangapo uno mwingilo—kadi, kebabwanya’opo. Mwanda waka? I pa bubinga busatu: Bubajinji, kebabwanyapo kusapula bintu byokemvwanijepo. Bwa bubidi, bavule i babulwe kwityepeja ne bukankamane bwa kunekenya tufutululo ne lwana bitambanga mu kusapwila bakwabo musapu wa Bulopwe. (Mat. 24:9; 1 Pet. 2:23) Bwa busatu, Bene Kidishitu ba bubela kebadipo na mushipiditu wa Leza.—Yoa. 14:16, 17.

⁷ Ku mutamba mukwabo, balondi ba bine ba Kidishitu bemvwanije Bulopwe bwa Leza i bika ne bine byobukalonga. Kadi, batūdile tumweno twa Bulopwe pa kifuko kibajinji mu būmi bwabo, bebusapula ntanda yonso na bukwashi bwa mushipiditu wa Yehova. (Zek. 4:6) Lelo wingilanga uno mwingilo kitatyi ne kitatyi? Le wilumbululanga mu mwingilo obe wa bu musapudi wa Bulopwe, padi na kuvudija kitatyi kyopityija mu mwingilo nansha na kwingila’o senene kutabuka? Bamo bapimine kulumbulula mwingidilo wabo na kwingidija Bible biyampe. Mutumibwa Polo wādi na kibidiji kya kulangulukila pa bisonekwa, wālembele amba: “Mwanda wa Leza i wa būmi ne bukomo.”—Bah. 4:12; Bil. 17:2, 3.

8, 9. (a) I myanda’ka mimweke ilombola mvubu ya kwingidija Bible mu mwingilo wetu? (b) I muswelo’ka otukokeja kwikala na bwino bwa kwingidija Kinenwa kya Leza?

⁸ Tutu umo paadi mu busapudi bwa ku njibo ne njibo, wātangīle Mwine Katolika umo kisonekwa kya Danyele 2:44 ne kumushintulwila muswelo ukaleta Bulopwe bwa Leza ndoe ne mutyima-ntenke wa binebine. Uno muntu walondolwele amba: “Bine nasangala powaputula Bible ne kunombola binena bisonekwa pa kyaba kya kunena’byo’tu ku kanwa.” Tutu umo paatangīle mwana-mukaji Mwine Orthodoxe wa mu Ngidiki kisonekwa, uno mwana-mukaji waipangwile bipangujo biyampe bivule. Pano napo, tutu ne mukajandi balondolwele kupityila ku Bible. Kupwa, mwana-mukaji wanena amba: “Uyukile mwanda waka naitabija kwisamba nenu? Mwanda mubaiya na Bible ku njibo yami, ne kutanga’ye.”

⁹ Shako, mabuku etu adi na mvubu ne tufwaninwe kupāna’o mu busapudi. Ino Bible, kyo kingidilwa kyetu kinekine. Nanshi shi kudipo na kibidiji kya kwingidija’ye kitatyi ne kitatyi mu busapudi, ubulwe’po kwitungila kino kitungo? Padi ukokeja kutonga bisonekwa bikatampe bishintulula Bulopwe bwa Leza ne mobukapwila makambakano kampanda alwa na bantu bakujokolokele.

Sangela Kutelelwa pa Dijina dya Leza

10, 11. Lelo i kwishila’ka kudi pa bukata bwa Yesu ne bavule betela bu bamulonda mu kwingidija dijina dya Leza?

¹⁰ “Mwi batumoni bami, e mwanenena Yehova namino, amba ami ne Leza.” (Is. 43:12) Yesu Kidishitu, Kamoni mwinemwine wa Yehova, wādi umwene amba i dyese dikatampe kutelelwa pa dijina dya Leza ne kwidiyukanya. (Tanga Divilu 3:15; Yoano 17:6; Bahebelu 2:12.) Na bubine, Yesu wāityilwe bu “kamoni ka binebine” mwanda wādi usapula dijina dya Shandi.—Kus. 1:5; Mat. 6:9.

¹¹ Ino, bavule betela bu batumwe na Leza ne wandi Mwana kebalēmekelepo dijina dya Leza, batalulanga’dyo ne mu malamuni abo a Bible. Pa kumwekeja uno mushipiditu, panopano  baeveke ba mu Katolika bapelwe musoñanya unena amba “dijina dya Leza ditelelwe na masomo aná YHWH kedifwaninwepo kutelwa monka” mu butōtyi. * Bine uno mulangwe, i mubi’po kashā!

12. I muswelo’ka watelelwe bininge bengidi ba Yehova pa dijina dyandi mu mwaka wa 1931?

¹² Na kulonda kimfwa kya Kidishitu ne kya “kibumbo kikatakata . . . kya tumoni” twāmubadikidile, Bene Kidishitu ba bine basangelanga kwingidija dijina dya Leza. (Bah. 12:1) Na bubine, mu mwaka wa 1931, bengidi ba Leza batelelwe bininge pa dijina dya Yehova pobaitabije kwitwa bu Batumoni ba Yehova. (Tanga Isaya 43:10-12.) Nanshi, mu buluji bwa pa bula, balondi ba bine ba Kidishitu baikele ke bantu “bāinikwa ku dijina [dya Leza].”—Bil. 15:14, 17.

13. I muswelo’ka otukekala na būmi bukwatañene na dijina dyotupelwe na Leza?

¹³ I muswelo’ka otukekala na būmi bukwatañene na dijina dyetu dya pa bula? Kintu kimo bidi, tufwaninwe kusapula bukamoni bwa Leza na kikōkeji. Polo wāsonekele amba: “Bonso bakwita pa dijina dya Yehova bakapandanga. Le penepo kadi, bakamwita namani, boba bampikwa kwitabija mudi aye? Le kadi bakētabija mudi aye namani, boba bampikwa kumwivwana? Lelo bakevwana namani, musapudi mpika? Lelo kadi, bakasapula namani, bakubulwa kutumibwa?” (Loma 10:13-15) Kadi tufwaninwe kubepulula na bunwa bubela bwa bipwilo bubepelwa Umpangi wetu, pamo bwa lufundijo lwa kalunganyembo ka mudilo, lumwekeja Leza wa buswe bu udi na ngikadilo ya kasusu ya Satana.—Yel. 7:31; 1 Yoa. 4:8; dingakanya Mako 9:17-27.

14. Lelo bamo baivwene namani pobayukile dijina dya bunka dya Leza?

¹⁴ Lelo usangelanga kutelelwa pa dijina dya Tata wa mūlu? Lelo ukwashanga bakwabo bayuke dino dijina dijila? Mwana-mukaji umo wa mu Paris, mu Franse, waivwene amba Batumoni ba Yehova bayukile dijina dya Leza, penepa, waipangula Kamoni mukwabo waetene nandi amulombole’dyo mu Bible wandi. Paatangile’dyo mu Mitōto 83:18, watengelwe bininge. Washilula kwifunda Bible, ne panenwa pano, ke kaka wingila na kikōkeji mu ntanda mikwabo. Mwana-mukaji umo Mwine Katolika ushikatanga mu Ostrali pa kumona dijina dya Leza mu Bible musunsa wandi umbajinji, ne impolo ya nsangaji yamusūma. Pano ke myaka mivule yaingila bu pania wa lonso. Kepaijije, Batumoni ba mu Jamaike balombwele mwana-mukaji umo patanwa dijina dya Leza mu Bible wandi, nandi impolo ya nsangaji yamusūma. Nanshi, sangela kutelelwa pa dijina dya Leza kadi, iula Yesu na kuyukanya ku bonso dino dijina dilēme.

“Kemukisanswa Panopantanda”

15, 16. Lelo Bene Kidishitu ba bine bamonanga ntanda namani, ne i bipangujo’ka byotufwaninwe kwiipangula?

¹⁵ “Kemukisanswa panopantanda, nansha byapanopantanda bīne. Shi muntu usenswe panopantanda, nankyo lusa lwa Tata keludipo mudi aye, mhm.” (1 Yoa. 2:15) Ntanda ne mushipiditu wayo wa bungitu ilwanga na Yehova ne mushipiditu sandu wandi. O mwanda balondi ba bine ba Kidishitu bejibanga kwikuja mu bya ntanda. Kadi bashikilwe’yo na mutyima umo, mwanda bayukile’nka na mwānenene mwanā bwanga Yakoba amba, “uswile bulunda na bya panopantanda, nabya wepe aye mwine mushikwa kudi aye Leza.”—Yak. 4:4.

¹⁶ Kikokeja kukoleja pa kulonda binenwa bya Yakoba mu ino ntanda ya byongo kebibadika. (2 Tem. 4:10) O mwanda Yesu wālombele pangala pa balondi bandi amba: “Nkilombelepo na’mba: Wibafundule panopantanda; ehe, nanshi na’mba: Wibalamininepo ku buno bubi. Kebadipo bwa bapano-pantanda, ehe, monka mo nkīkadile amiwa bu-wapanopantanda.” (Yoa. 17:15, 16) Wiipangule amba: ‘Le neelelanga’ko kuleka kwikala wa ino ntanda? Lelo bantu bayukile mwimanino wami pa mafetyi ne bibidiji byampikwa kukwatañana na bisonekwa ne byobya kebitambilepo ku Bajentaila inoko bimwekeja mushipiditu wa ntanda?’—2 Kod. 6:17; 1 Pet. 4:3, 4.

17. Lelo i bika bikatonona bantu ba mityima myoloke bekale ku mutamba wa Yehova?

 ¹⁷ Kuyuka’ko yuka’mba mwikadila wetu wimanine pa Bible keukalengejapo twitabijibwe na ntanda, inoko bantu ba mityima myoloke bakasaka kuyuka bivule. Na bubine, bano bantu pobamona amba lwitabijo lwetu i lwimanije pototo mu Bisonekwa ne mu mwiendelejo wetu onso wa umbūmi, bakokeja kwitaba na kunena bashingwe māni amba: “Batwe tukenda nenu, mwanda tubaivwana’mba Leza udi nenu pamo.”—Zek. 8:23.

Ikala na Buswe bwa Bine bwa Bwine Kidishitu

18. Lelo pa kulombola’mba tuswele Yehova ne mukwetu tusakilwa kulonga bika ne bika?

¹⁸ Yesu wānene amba: “Ukasanswa Yehova Leza obe, ne mutyima obe onso, ne muya obe onso, ne manwa obe onso” kadi “ukasanswa mukwenu na abe mwine.” (Mat. 22:37, 39) Buno buswe (a·gaʹpe mu Kingidiki) i buswe bwa mwikadilo bwimanine pa kitungo, musoñanya, pa kintu kitabijibwe, ino mubadilwanga divule ne mwiivwanino. Bukokeja kwikala bwa kyanga kadi bukomo. (1 Pet. 1:22) I bwishile kulampe na kwisakila, mwanda abo bumwekanga mu binenwa ne bilongwa bya kuta bakwabo mutyima.—Tanga 1 Kodinda 13:4-7.

19, 20. Sekununa myanda mimweke ilombola mwikadile buswe bwa Bwine Kidishitu na bukomo.

¹⁹ Buswe byo butamba ku Mushipiditu sandu wa Leza, bukwashanga Bene Kidishitu ba bine balonge byobya bikomenwa kulonga bakwabo, kimfwa kunekenya makambakano a kwishila kwa lukoba, kwa bibidiji, ne bijika bya kipolitike. (Tanga Yoano 13:34, 35; Ngat. 5:22) Nansha kebinenangapo bantu badi bwa mikōko, bateñwanga bininge kitatyi kyobamona buswe bwa uno muswelo. Kimfwa, mu Isalela nsongwalume umo Mwine Yudea pa kwenda kukapwila musunsa wandi umbajinji, watulumukile pa kumona banabetu Bene Yudea ne Balabu batōta Yehova umbumo. Ku mfulo, washilula kupwila nyeke ne kwitabija kifundwa kya Bible. Le nobe ulombolanga buswe butamba ku mutyima bwa uno muswelo ku banabenu? Kadi le witungile kitungo kya kulubula na nsangaji bapya baya ku Njibo ya Bulopwe, kwampikwa kubanga muzo wabo, lukoba lwabo, nansha ludingo lwabo?

²⁰ Batwe Bene Kidishitu ba bine, tuloñanga bukomo bwa kulombola buswe ku bonso. Mu Salvador, nkasampe umo musapudi wadi wifunda Bible na lolo umo wa myaka 87 wadi ulamete ku kipwilo kyandi kya Katolika. Difuku dimo, uno lolo wabela misongo mikatampe ne kutwela ku lupitalo. Kitatyi kyaajokele kwinjibo, Batumoni badi bakamutala ne kumupaila byakudya. Balongele namino kintu kya kweji mutuntulu. Kekwadipo nansha umo wa mu kipwilo kya uno lolo wadi umupempula. Byafula namani? Wasumbwile bankishi bandi, watamba mu kyabo kipwilo, ne kushilula monka kwifunda Bible. Bine, buswe bwa Bwine Kidishitu budi na bukomo! Bukokeja kutenga mityima kutabuka ne binenwa bine.

21. Lelo i muswelo’ka otukokeja kwilongolwela būmi bwetu bwa kumeso?

²¹ Panopano ponka, Yesu usa kunena bonso betela bya bubela bu bamwingidila’mba: “Ami nkimuyūkilepo, mfundukei papo bānwe bakulonga bubi.” (Mat. 7:23) Nanshi, tupei kipa kitumbija Tata ne Mwana. Yesu wānene amba: “Wakwivwana īno myanda yami walongelapo monka, nankyo nkamudingakenya pamo na muntu wañeni washimikile njibo yandi pa dibwe.” (Mat. 7:24) I bine, shi twilombole bu balondi ba binebine ba Kidishitu, nabya tuketabijibwa na Leza, kadi tukelongolwela būmi bwetu bwa kumeso, na abo bushimikwe pa dibwe!

[Kunshi kwa dyani]

Lelo Ubavuluka?

• Lelo balondi ba bine ba Kidishitu i beshile namani na ba bubela?

• Tela “bipa” biyukanya Bene Kidishitu ba bine.

• Pa bitala kupa kipa kya Bwine Kidishitu, le i bitungo’ka byokokeja kwitungila?

[Bipangujo bya Kifundwa]