Kwon Juõn Dri Kalor Emol an Kraist

“Wijki emõn otemjej rej jebar im emõn leir; a wijki enana e jebar im enana leen.”​—MATU 7:​17.

1, 2. Ewi wãwen dri kalor ro remol an Kraist rej oktõk jen ro rewan, elaptata ilo ien kein eliktata?

 JISÕS ear kalikar bwe armij renaj maroñ kile dri Kristian ro rewan ikijen leer, melelen katak im kõmõn ko air. (Matu 7:​15-​17, 20) Emol, men ko armij ro rej likit ilo lemnok ko air im burueir renaj jelet ir. (Matu 15:18, 19) Ro rej bõk katak ko rewan rej jebar ‘leen ko renana,’ ak ro rej katak kin mol eo rej jebar ‘leen ko remõn.’

² Leen ko ruo rar jino alikarlok ilo ien kein eliktata. (Riit Daniel 12:​3, 10, UBS.) Dri Kristian ro rewan rej bõk juõn lemnok ejjab mol kin Anij im ekkã an jab mol air kwalok karkarin Kristian, bõtab ro emulõl air melele kin Baibel eo rej kabuñ ñõn Anij “ilo jitõb im ilo mol.” (Jon 4:​24; 2 Tim. 3:​1-5) Rej kate ir ñõn kwalok karkar ko karkarin Kristian. Ak ta kin kij mõke? Ñe kwoj etale kakõle ko lailim kakõlen Kristian ro remol, kwon kajitõkin yuk mõke: ‘Wãwen mwiliõ im men ko ij katakin ro jet rej ke errã iben Nan eo an Anij? Ij ke kõmõn bwe mol eo en menin kareelel ñõn ro rej bukote?’

Mour Ekkar ñõn Nan eo an Anij

3. Ta eo ej kabuñburuen Jeova, im men in ej kitibuj ta ñõn dri Kristian ro remol?

³ Jisõs ear ba, “Jab otemjej rej ba ñõn Iõ, Iroij, Iroij, re naj dreloñtok ilo ailiñ in lõñ; a eo ej kõmõnmõn ankil an Jema ej ber i lõñ.” (Matu 7:​21) Aet, Jeova ej buñburuen ñe juõn ej kõmõni men ko me juõn dri Kristian ej aikwij kõmõni im jab baj ilo nan wõt. Ñõn dri kalor ro remol an Kraist, men in ej kitibuj aolepen wãwen air mour, ekoba lemnok eo air kin jããn, jerbal, menin kamõnõnõ ko, mõnit ko im kwojkwoj ko an lõl, im mour in mare im kin kõtan ko jet iben armij ro. Bõtab, dri Kristian ro rewan rej bõk lemnok im wãwen ko an lõl, me elaplok air nana ilo ran kein eliktata.​—Sam 92:7.

4, 5. Ewi wãwen jemaroñ jerbale nan ko an Jeova ilo Malkai 3:​18 ilo mour eo ar?

⁴ Eñin unin, dri kanan Malkai ear je: “Ro droõ renaj bar lo ta eo enaj walok ñõn ro ri wãnik, ro rej jerbal ñõn iõ, im ta eo enaj walok ñõn ro ri nana, ro rejjab jerbal ñõn iõ.” (Mal. 3:​18, UBS) Ilo am kalomõnlokjen kin nan kein, kwon kajitõkin yuk mõke: ‘Ij ke einwõt armij ro ilo lõl in ak ij oktõk jen ir? Ij ke kajeoñ in einwõt armij ro ij kõmao ibeir ilo jikin jikuul ak jerbal, ak ij ke jutõk bin kin nan in kaiñi ko ilo Baibel im konono kaki ilo ien ko rebellok?’ (Riit 1 Piter 3:​16.) Emol, jejjab kõnan kowãnik kij mõke, ak jej aikwij kalikar ar oktõk jen ro rejjab yokwe im korijer ñõn Jeova.

⁵ Elañe kwoj kile bwe eor wãwen ko ibõm kwoj aikwij kakõmõnmõnlok, etke kwojjab jar kin men in im kakajurlok mour in jitõb eo am ikijen am keini am katak Baibel, jar, im ber ilo ien kwelok ko? Ñe elaplok am jerbale Nan eo an Anij, enaj laplok am jebar ‘leen ko remõn,’ ekoba ‘leen tier ko rej kwalok kin etan Anij.’​—Hib. 13:15.

Kwalok Nan kin Ailiñ eo an Anij

6, 7. Ikijen ennan eo kin Ailiñ eo, ta oktõk eo jemaroñ loe ikõtan dri Kristian ro remol im ro rewan?

⁶ Jisõs ear ba: “In kwalok nan emõn an ailiñ in Anij ñõn jikin kwelok ko jet; bwe ar jilkintok  Iõ kin men in.” (Luk 4:​43) Etke Jisõs ear kõmõn bwe Ailiñ eo an Anij en unin tel eo elap ilo jerbal in kwalok nan eo an? Ear jela bwe ñe enaj jerbal einwõt Kiñ eo an Ailiñ in, iben dri kabit ro jein im jãtin me rar jerkakbiji, renaj bõktok jemlokõn unjen abañ ko an armij, melelen jerawiwi im Devil eo. (Rom 5:​12; Rev. 20:10) Kin men in, ear kakien dri kalor ro an bwe ren kwalok kin Ailiñ in mae ien enaj itok jemlokõn jukjuk im ber in. (Matu 24:14) Armij ro me rej baj ba bwe rej dri kalor ro an Kraist, rejjab bõk kwonair ilo jerbal in. Ilo mol, eor jilu un ko rejjab maroñ kõmõne jerbal in: Ken kajuõn, rejjab maroñ kwalok nan kin men eo rejjab melele kake. Ken karuo, enañin aolepeir ejelok karkar ko rej aikwiji einwõt etã buru im beran bwe ren maroñ anjo ion kajirere im jumae ko me remaroñ iioni kin air kwalok ennan eo kin Ailiñ eo ñõn armij ro. (Matu 24:9; 1 Pit. 2:​23) Im ken kajilu, jitõb eo an Anij ejjab ber iben dri Kristian ro rewan.​—Jon 14:16, 17.

⁷ Ak ikijen dri kalor ro remol an Kraist, rej melele kin ta in Ailiñ eo an Anij im ta eo enaj kõtõbrõke. Bareinwõt, rej kõmõn bwe men ko an Ailiñ eo ren moktata ilo mour eo air, im kin jibõñ eo jen jitõb eo an Anij, rej keañ kake ibelakin lõl. (Zek. 4:6, UBS) Kwoj ekkeini ke am bõk kwonam ilo jerbal in? Kwoj ke kajeoñ in kakõmõnmõnlok wãwen am jerbal einwõt juõn dri kwalok kin Ailiñ eo, bwelen ilo am kalaplok ijo kwonam ak ilo am kõmõn bwe en bolemen wãwen am kõmõne jerbal in? Jet rar kajeoñ in kakõmõnmõnlok wãwen air kwalok nan ikijen air kalaplok air kajerbale Baibel eo. Dri jilik Paul, eo ekkã an kar kajerbal Jeje ko ñõn kamol men ko ear ba, ear je, “Nan in Anij ej mour im jerbal wõt.”​—Hib. 4:​12; Jerb. 17:​2, 3.

8, 9. (a) Ta jet ian bwebwenato ko rej kwalok kin aurõkin ar kajerbale Baibel eo ilo ar jerbal in kwalok nan? (b) Ewi wãwen jemaroñ kõmõn bwe en bolemen wãwen ar kajerbale Nan eo an Anij?

⁸ Ke juõn brother ear kwalok nan jen im ñõn im, ear iion juõn eman me ej juõn Catholic im ear riiti eon eo ilo Daniel 2:44 im kemeleleik e kin wãwen Ailiñ eo an Anij enaj bõktok jokõne im ainemõn eo emol. Eman eo ear ba: “Ij kamolol yuk kin am kar kebellok Baibel eo am im riiti ñõn iõ im jab baj ba wõt ta eo ej ba.” Ke bar juõn brother ear riiti juõn eon ñõn juõn kõra me eoktõk kabuñ eo an, kõra in ear kwalok an itoklimo ilo an bõkmantak elõñ kajitõk ko. Brother in im lio belen rar bareinwõt kajerbal Baibel eo ñõn uaki kajitõk ko an kõra in. Tokelik, kõra eo ear ba: “Kwojela ke etke iar mõnõnõ in bwebwenato ibõm? Kinke kwar itok ñõn mweo imõ ilo am jibwe Baibel eo, im kwar riit jene.”

⁹ Emol bwe buk ko ar raurõk im jej aikwij lito litak ilo jerbal in kwalok nan. Bõtab, Baibel eo ej aikwij men eo elaptata ar kajerbale. Inem elañe ekkã am jab kajerbale ñe kwoj kwalok nan, kwomaroñ kõmõn bwe en am mejenkajik ñõn keini am kajerbale. Bwelen kwomaroñ kãlet jet eon ko rekkar me rej kemelele kin ta in Ailiñ eo an Anij im kin wãwen an naj namejelan abañ ko me rej kainebataik  armij ro ilo bukwon eo am. Inem kwon pojõk in riiti eon kein ñe kwoj kwalok nan jen im ñõn im.

Kwon Mõnõnõ in Jutõk kin Etan Anij

10, 11. Ikijen kajerbal ãt eo etan Anij, ewi wãwen Jisõs ej oktõk jen ro me rej ba rej lor e?

¹⁰ “Kom dri kennan ro Aõ, Jeova e ba, im Ña Anij.” (Ais. 43:12) Jisõs Kraist, dri Kennan eo elap an Jeova, ear watõk bwe ej juõn jerammõn elap ñõn jutõk kin etan Anij im kwalok kake ñõn ro jet. (Riit Exodus 3:​15; Jon 17:6; Dri Hibru 2:​12.) Ilo mol, kin an kar Jisõs keañ kin etan Jemen, kar naetan “Dri Kennan etiljek.”​—Rev. 1:5; Matu 6:9.

¹¹ Ilo okõtõn men in, elõñ ro rej ba bwe rej jutõk kin etan Anij im Nejin rar jab kwalok air koutiej ãt eo ekwojarjar, im joñõn air kar jab koutieje rar joloke jen Baibel ko air. Juõn wãwen einlok wõt in kar walok ilo ran kein ke kar jiroñ dri tel ro reutiej an kabuñ in Catholic, bwe ilo ien air kabuñ “ejjab melim ñõn air kajerbal ak ba ãt eo etan Anij me kar je ilo wãwen in YHWH.” * Lemnok rõt in elap an bwir!

12. Ilo yiõ eo 1931, ewi wãwen ear laplok an alikar bwe dri korijer ro an Jeova rar korijer ñõn e?

¹² Dri Kristian ro remol rej kajeoñwe Kraist im kõro elap in dri kennan ro me rar mour mokta jen e, ilo air mõnõnõ in kajerbal ãt eo etan Anij. (Hib. 12:1) Ilo mol, ilo yiõ eo 1931, ke dri korijer ro an Anij rar bõk ãt eo Dri Kennan ro an Jeova, ear laplok an alikar bwe rej korijer ñõn Jeova. (Riit Aiseia 43:10-12.) Kin men in, ilo juõn wãwen ejejuan, kar bõk dri Kristian ro remol an Kraist jen ailiñ ko “kin etan [Anij].”​—Jerb. 15:14, 17.

13. Ewi wãwen jemaroñ mour ekkar ñõn ãt eo Anij ear letok ñõn kij?

¹³ Ewi wãwen jemaroñ mour ekkar ñõn ãt eo jej bõke? Juõn wãwen ej ilo ar tiljek in kwalok nan kin Anij. Paul ear je, “Ro otemjej rej kir etan Iroij re naj mour. Inem ekijkan air naj kir ñõn Eo r’ar jab liki E? im ekijkan air naj liki Eo r’ar jab roñ kin E? im ekijkan air naj roñ ñe ejelok dri kwalok? Im ekijkan air naj kwalok, elañe jab jilkinlok ir?” (Rom 10:13-​15) Bareinwõt, ilo juõn wãwen ejoij jej aikwij kajedmatmat katak ko rejjab mol an kabuñ ko me rej kananaik dri Kõmõnmõn eo ar, einwõt ikijen katak eo bwe armij rej iñtan ilo juõn jikin kijeek, me ilo mol ej kwalok bwe eor iben Anij eo eyokwe karkar ko relej karkarin Devil eo.​—Jerm. 7:​31, UBS; 1 Jon 4:8; keiri Mark 9:​17-​27.

14. Ewi wãwen jet rar emakõt ke rar jela kin etan Anij?

¹⁴ Kwoj ke mõnõnõ in jutõk kin ãt eo etan Jemeruij ilõñ? Kwoj ke jibõñ ro jet ñõn jela kin ãt eo etan ekwojarjar? Juõn kõra ilo Paris, ilo ailiñ in France, ear roñ bwe Dri Kennan ro an Jeova rejela kin etan Anij, inem ke ear iion juõn iair, ear kajitõk iben ñõn kwalok tu ia eo ãt eo etan Anij ej ber ie ilo Baibel eo an. Ke kõra eo ear riiti Sam 83:18, men in ear lap an kamakõt buruen. Ear jino katak Baibel eo im kiõ ej juõn ian ro jeer im jãter etiljek im ej jerbal ilo bar juõn ailiñ. Ilo Australia, ke juõn kõra in Catholic ej kab lo etan Anij ilo Baibel eo, ear jõñ kin an lukkun lõñliñ. Iomin elõñ yiõ ko kiõ, ej jerbal einwõt juõn regular pioneer. Ilo ien ko rej kab motlok, ke jet dri kwalok ro ilo Jamaica rar kwalok etan Anij ñõn juõn kõra ilo Baibel eo an, e bareinwõt ear jõñ kin an lukkun lõñliñ. Inem ilo am kajeoñwe Jisõs, kwon mõnõnõ in jutõk kin etan Anij im kõmõn bwe aolep ren jela kin ãt in etan eaurõk.

“Komin Jab Yokwe Lõl”

15, 16. Ewi wãwen dri Kristian ro remol rej watõk lõl in, im ta kajitõk ko jej aikwij kajitõkin kij mõke?

¹⁵ “Komin jab yokwe lõl ak men ko ilo lõl. Elañe jabrewõt armij ej yokwe lõl, yokwe Jemer e jab ilo e.” (1 Jon 2:​15) Lõl in im mõm  an kõniek rej nae Jeova im jitõb kwojarjar eo an. Kin men in, dri kalor ro remol an Kraist rejjab kejbãrok wõt bwe ren jab mõtõn lõl, ak rej bareinwõt karmijeteike, ilo air lemnok kin ta eo dri jilik Jemes ear je, “eo ej jeraik lõl in ej kijdrate Anij.”​—Jem. 4:4, UBS.

¹⁶ Emaroñ bin ñõn bokake nan kein an Jemes kinke jej mour ilo juõn lõl me elõñ menin kabo ko ie. (2 Tim. 4:10) Kin men in, Jisõs ear jar kin dri kalor ro an: “I jab jar bwe Kwon bõk ir jen lõl, a bwe Kwon kejbãrok ir jen eo enana. Re jab jen lõl, einwõt Ña I jab jen lõl.” (Jon 17:15, 16) Kwon kajitõkin yuk mõke: ‘Ij ke kate iõ bwe in jab mõtõn lõl? Ro jet rejela ke bwe ijjab bõk kwonaõ ilo kwojkwoj im mõnit ko me rejjab berber ion Baibel eo im bareinwõt ilo men ko me rejjab mõntin dri pegan ro ak rej kwalok jitõbõn lõl in?’​—2 Kor. 6:​17; 1 Pit. 4:​3, 4.

17. Ta eo emaroñ kamakõt ro emol burueir ñõn rejetake Jeova?

¹⁷ Emol, ar jutõk bin kin tõmak eo ar me ej berber ion Baibel eo ejamin kõmõn bwe lõl in en buñburuen iber, ak emaroñ kaitoklimoen ro emol burueir. Aet, ñe rein rej kile bwe tõmak eo ar ej berber ion Baibel eo im ej kitibuj aolepen wãwen ar mour, remaroñ uak ilo juõn wãwen ej einwõt ñe rej ba ñõn dri kabit ro: “Kim kõnan iwõj ibbemi kinke kimar roñ ke Anij ej bed ibbemi.”​—Zek. 8:​23, UBS.

Kwalok Yokwe eo Emol an Kristian

18. Ar yokwe Jeova im ro dri turid ej kitibuj ta?

¹⁸ Jisõs ear ba: “Kwon yokwe Iroij am Anij kin aolepen buruõm im kin aolepen am, im kin am lemnok otemjej” im “kwon yokwe dri turõm im einwõt kwe.” (Matu 22:37, 39) Yokwe in (a·gaʹpe ilo kajin Grik) ej berber ion men eo ejime me ej kitibuj an juõn armij lemnok kin erro ko an, im an kwalok mwil emõn. Bõtab, ekkã an kitibuj juõn iñjake ekajur. (1 Pit. 1:​22) Yokwe in ej okõtõn kibbon, kinke wãwen konono im kõmõn ko an juõn eo eor yokwe iben ej kwalok bwe ej lemnok kin ro jet.​—Riit 1 Dri Korint 13:​4-7.

19, 20. Kwalok jet bwebwenato ko me rej kwalok bwe yokwe eo an dri Kristian ro elap an kajur.

¹⁹ Kinke yokwe ej leen jitõb kwojarjar eo an Anij, ej kamaroñ dri Kristian ro remol ñõn kõmõni men ko me ro jet rejjab maroñ, einwõt ñõn anjo ion abañ ko kin okõtõn kilin armij  ro, mõnit ko, im kien ko. (Riit Jon 13:34, 35; Gal. 5:​22) Ñe ro rej einwõt s̃ip rej lo ar kwalok yokwe rõt in, men in elap an jelet ir. Ñõn wanjoñok, ke juõn dri Ju ilo Israel ear jino kobalok ilo juõn ian kwelok ko an Kristian, ear lukkun bwilõñ ke ear lo an dri tõmak ro me rej dri Ju im dri Arab kabuñ iben dron ñõn Jeova. Tokjen men in, ear jino keini an ber ilo ien kwelok ko im ear mõnõnõ in katak Baibel eo. Kwoj ke kwalok yokwe rõt in ñõn ro jeõm im jãtõm? Im kwoj ke kate yuk ñõn karuwaineneik ro rekãl ilo Imõn Kwelok eo, jekron ailiñ ta eo air, unokan kiliir, ak joñõn utiejiir?

²⁰ Einwõt dri Kristian ro remol, jej kate kij ñõn kwalok yokwe ñõn aolep. Ilo ailiñ in El Salvador, juõn dri kwalok jodrikdrik ear katak Baibel iben juõn lilap in Catholic, eo ej 87 an yiõ me ear jab kõnan ilok jen kabuñ eo an. Juõn ran, lilap in ear lukkun nañinmij im ear aikwij ber ilo aujpitõl. Ke ear jeblak ñõn mweo imõn, jet ian ro jeer im jãter rar lolok e im bõklok kijen mõña iomin juõn aliñ. Ak ejelok juõn jen kabuñ eo an lilap in ear lolok e. Ta tokjen eo ear walok? Ear jolok ekjõp ko an im etan jen kabuñ eo an, im ear bar jino an katak Baibel. Emol, yokwe eo an dri Kristian ro elap an kajur! Emaroñ laplok an kamakõt buruen armij ro jen ar baj kwalok nan ñõn ir.

21. Ewi wãwen jemaroñ kõmõn bwe ilju eo ar en ber ñõn indrio?

²¹ Mõtõn jidrik, Jisõs enaj ba ñõn aolep ro rej riõp im ba bwe rej korijer ñõn e: “I ar jaje kom: komin ilok jen Iõ, kom rej kõmõn nana.” (Matu 7:​23) Kin men in, jen jebar leen ko me rej bõktok nebar ñõn Jemeruij ilõñ im Nejin. Jisõs ear ba: “Jabrewõt eo ej roñjaki nan kein Aõ, im kõmõnmõni, naj kajeoñwe ir einwõt armij eo e jelalokjen, im ej kalek mweo imõn ion bar.” (Matu 7:​24) Aet, elañe jej kalikar bwe jej dri kalor ro remol an Kraist, jenaj bõk buñburu eo an Anij, im juõn ilju eo enaj ber ñõn indrio!

[Kamelele eo itulals]

Kwoj ke Kememej?

• Ewi wãwen dri kalor ro remol an Kraist reoktõk jen ro rewan?

• Kwalok jet “leen” ko me rej kalikar wõn dri Kristian ro remol.

• Ta jet ian mejenkajik ko kwomaroñ likiti ñõn kwalok leen Kristian?

[Kajitõk ko ñan katak]

[Kamelele in juõn pija ilo peij 13]

Kwoj ke keini am kajerbale Baibel eo ñe kwoj jerbal in kwalok nan?

[Kamelele in juõn pija ilo peij 15]

Ro jet rejela ke bwe kwojjab bõk kwonam ilo kwojkwoj ko me rejjab berber ion Baibel eo?