Showimaot Iu Trufala Follower Bilong Christ
Showimaot Iu Trufala Follower Bilong Christ
“Evri gudfala tree bae garem gudfala frut, bat evri nogud tree bae garem rabis frut.”—MATT. 7:17.
1, 2. Wanem nao showimaot olketa tru Christian difren from olketa false Christian?
JESUS sei olketa false Christian bae garem frut wea difren from olketa tru Christian. Frut hia nao hem wanem olketa teachim and wei bilong olketa. (Matt. 7:15-17, 20) Pipol savve duim samting followim wanem olketa lanem and samting wea stap long tingting bilong olketa. (Matt. 15:18, 19) Pipol wea lanem olketa laea teaching bae garem “rabis frut,” bat pipol wea lanem olketa trufala teaching bae garem “gudfala frut.”
2 Hem isi for luksavve long rabis frut and gudfala frut distaem. (Readim Daniel 12:3, 10.) Olketa false Christian no garem stretfala tingting abaotem God and olketa laea for worshipim hem. Bat olketa tru Christian worshipim God “followim holy spirit and followim samting wea tru.” (John 4:24; 2 Tim. 3:1-5) Olketa waka hard for showimaot olketa wei bilong Christ. Bat waswe long iumi wanwan? Taem iu ting raonem faevfala samting wea showimaot hu nao olketa trufala Christian, tingim olketa kwestin hia: ‘Waswe, wei bilong mi and wanem mi teachim long narawan hem followim wanem Bible talem? Waswe, wei bilong mi and wanem mi teachim mekem pipol for laek savve long truth?’
Followim Wanem Bible Talem
3. Wanem nao Jehovah hapi long hem, and diswan minim olketa tru Christian mas hao?
3 Jesus sei: “No evriwan wea sei long mi, ‘Lord, Lord,’ bae go insaed long kingdom bilong God bat man wea duim wanem Dadi bilong mi long heven laekem nao, bae go insaed.” (Matt. 7:21) Jehovah no hapi long man wea talem nomoa hem wanfala Christian bat hem hapi long man wea duim samting wea showimaot hem Christian. Evri samting wea olketa tru Christian duim long laef bilong olketa showimaot diswan, olsem tingting bilong olketa abaotem nara pipol, selen, waka, hapitaem, olketa kastom and celebration long world, and marit. Bat olketa false Christian followim tingting and wei bilong pipol long world wea barava nogud distaem.—Ps. 92:7.
4, 5. Hao nao iumi wanwan savve followim toktok bilong Jehovah long Malachi 3:18?
4 Profet Malachi sei: “Iufala bae luksavve man wea raeteous hem difren from man wea no raeteous. Iufala bae luksavve man wea worshipim God hem difren from man wea no worshipim hem.” (Mal. 3:18) Ting raonem scripture hia and tingim diswan: ‘Waswe, wei bilong mi olsem pipol long world or mi difren from olketa? Waswe, mi trae for olsem pipol wea mi waka witim or skul witim, or waswe, mi strong for followim wanem Bible talem and no fraet for storyim wanem mi bilivim long olketa?’ (Readim 1 Peter 3:16.) Hem tru, iumi no laek mekem iumiseleva luk olsem iumi nao raeteous, bat iumi mas difren from pipol wea no lovem and no worshipim Jehovah.
5 Sapos iu luksavve iu need for changem samfala wei bilong iu, hem gud for prea long Jehovah abaotem diswan. Samting wea bae helpem iu tu hem for evritaem studyim Bible, prea, and go long olketa meeting. Sapos iu evritaem followim wanem Bible talem, bae iu garem staka “gudfala frut,” wea wanfala nao hem ‘for talem pipol abaotem nem bilong God.’—Heb. 13:15.
Preach Abaotem Kingdom Bilong God
6, 7. Wanem nao tingting bilong olketa false Christian and tru Christian abaotem Kingdom message?
6 Jesus sei: “Mi mas talemaot gud nius abaotem kingdom bilong God long olketa nara taon tu, bikos hem nao why God sendem mi kam.” (Luke 4:43) Why nao main samting wea Jesus preach abaotem hem Kingdom bilong God? Jesus savve hem bae King bilong datfala Kingdom, and hem witim olketa anointed Christian bae finisim sin and Satan wea spoelem olketa man. (Rom. 5:12; Rev. 20:10) Dastawe Jesus talem olketa wea followim hem for preach abaotem Kingdom go kasem taem world hem finis. (Matt. 24:14) Olketa false Christian no duim disfala waka, and olketa no fit for duim tu. Why nao olsem? Firstfala samting nao, hem hard for olketa preach abaotem samting wea olketa no minim. Mek-tu samting, staka long olketa praod and olketa fraet for preach abaotem Kingdom bikos pipol savve againstim and tok spoelem olketa wea duim datwan. (Matt. 24:9; 1 Pet. 2:23) Mek-thri samting, God no givim holy spirit long olketa false Christian.—John 14:16, 17.
7 Bat olketa tru Christian savve wanem nao Kingdom bilong God and wanem datfala Kingdom bae duim. Kingdom hem first samting long laef bilong olketa, and Jehovah givim holy spirit bilong hem for helpem olketa preach abaotem datwan evriwea long world. (Zech. 4:6) Waswe, iu savve go preach evritaem? Waswe, iu trae hard for kamap gud long preaching waka, olsem for duim samfala hour moa or for barava duim gud ministry bilong iu? Samfala mekem ministry bilong olketa kamap gud taem olketa iusim Bible evritaem. Aposol Paul evritaem iusim olketa Holy Raeting for story witim pipol. Hem sei: “Toktok bilong God hem laef and garem paoa.”—Heb. 4:12; Acts 17:2, 3.
8, 9. (a) Storyim olketa experience wea showimaot why hem gud for iusim Bible long ministry. (b) Wanem nao iumi savve duim mekem iumi iusim Bible evritaem?
8 Taem wanfala brata preach long haos tu haos, hem readim Daniel 2:44 long wanfala man bilong Catholic and hem storyim wanem Kingdom bilong God bae duim for mekem pipol garem peace and stap sef. Man hia sei: “Mi barava hapi bikos iu showim mi datfala scripture long Bible and iu no storyim nomoa.” Nara brata readim wanfala scripture long wanfala woman long Greek Orthodox church and woman hia askem staka gud kwestin wea showimaot hem interest. Brata hia witim waef bilong hem iusim Bible tu for ansarem olketa kwestin bilong hem. Gogo woman hia sei: “Waswe, iu savve why nao mi hapi for story witim iu? Hem bikos taem iu kam long haos bilong mi, iu tekem kam Bible and iu readim long mi.”
9 Hem tru, iumi shud offerim olketa buk bilong iumi taem iumi preach, bat main buk wea iumi mas iusim nao hem Bible. So sapos iu no iusim Bible staka taem long ministry, hem gud for iu iusim. Maet iu savve tingim samfala main scripture wea storyim Kingdom bilong God and wanem datfala Kingdom bae duim for stretem olketa problem wea pipol kasem long ples bilong iu. Then taem iu preach long haos tu haos, readim olketa scripture hia.
No Shame for Garem Nem Bilong God
10, 11. Wanem nao tingting bilong Jesus abaotem nem bilong God, and hao nao datwan hem difren from olketa false Christian?
10 “Jehovah hem sei, ‘Iufala nao olketa witness bilong mi and mi nao God.’ ” (Isa. 43:12) Nambawan witness bilong Jehovah nao hem Jesus Christ. Hem hapi for stand for God and for talem pipol abaotem nem bilong God. (Readim Exodus 3:15; John 17:6; Hebrews 2:12.) Jesus talem pipol abaotem nem bilong Dadi bilong hem dastawe Jesus garem title, “Faithful Witness.”—Rev. 1:5; Matt. 6:9.
11 Bat staka pipol wea sei olketa stand for God and Son bilong hem, olketa nating tinghae long nem bilong God. Olketa aotem nem hia from Bible bilong olketa tu. Wanfala leta wea olketa bishop bilong Catholic kasem no longtaem go nomoa hem sei taem olketa worship, olketa “mas no talem or raetem tetragrammaton YHWH for nem bilong God.” * Tingting bilong olketa hem barava nogud!
12. Long 1931, wanem nao happen wea mekem pipol barava luksavve long pipol bilong Jehovah?
12 Olketa tru Christian distaem hapi for talem pipol abaotem nem bilong God. Olketa followim example bilong Christ and “big sekson bilong olketa witness” wea laef taem Jesus no kam yet long earth. (Heb. 12:1) Long 1931, taem pipol bilong God tekem datfala nem Olketa Jehovah’s Witness, pipol luksavve God bilong olketa nao Jehovah. (Readim Isaiah 43:10-12.) So olketa trufala follower bilong Christ kamap pipol “wea garem nem bilong [God].”—Acts 15:14, 17.
13. Wanem nao iumi savve duim for showimaot iumi tinghae long nem wea God givim long iumi?
13 From iumi pipol wea garem nem bilong God, wanem nao iumi savve duim for showimaot iumi tinghae long datfala nem? Wanfala samting nao, iumi mas gohed preach abaotem God. Paul sei: “Eniwan wea prea long Jehovah for helpem hem, bae hem sev. Bat hao nao bae olketa prea long God sapos olketa no garem faith long hem? Hao nao bae olketa garem faith long hem sapos olketa no savve long hem? Hao nao bae olketa savve long hem sapos no eniwan kam preach long olketa? Hao nao bae olketa go preach sapos no eniwan sendem olketa go?” (Rom. 10:13-15) Nara samting tu, from pipol tok spoelem and laea abaotem Jehovah, iumi savve story gud long olketa and minim trufala teaching long olketa. Wanfala laea teaching hem hellfire wea mekem hem luk olsem God garem rabis wei olsem Satan.—Jer. 7:31; 1 John 4:8; markem witim Mark 9:17-27.
14. Wanem nao samfala pipol duim taem olketa savve long nem bilong God?
14 Waswe, iu hapi for garem nem bilong Dadi bilong iu long heven? Waswe, iu helpem olketa narawan for savve long datfala holy nem? Wanfala woman long Paris, long France, hem herem Olketa Jehovah’s Witness savve long nem bilong God. So taem hem meetim wanfala Witness hem askem hem for showim datfala nem long Bible bilong hem. Taem hem readim Psalm 83:18, datwan barava kasem heart bilong hem. Hem studyim Bible and distaem hem wanfala faithful sista wea preachim gud nius long nara kantri. Taem wanfala woman bilong Catholic wea stap long Australia hem firstaem lukim nem bilong God long Bible, hem krae bikos hem hapi fogud. Kam kasem distaem, hem pioneer for staka year finis. No longtaem go nomoa, samfala Witness long Jamaica showim nem bilong God long Bible bilong wanfala woman. Woman hia tu krae bikos hem hapi. So no shame for garem nem bilong God, bat followim example bilong Jesus for story abaotem nem bilong God long evriwan.
“No Lovem World”
15, 16. Wanem nao tingting bilong olketa tru Christian abaotem world? Olketa wanem kwestin nao hem gud for iumi tingim?
15 “No lovem world or olketa samting long world. Sapos man lovem world, hem no lovem Dadi long heven.” (1 John 2:15) World and olketa samting wea man laekem hem againstim Jehovah and nating followim holy spirit bilong hem. Dastawe olketa tru follower bilong Christ no olsem pipol long world. Olketa heitim world bikos olketa savve long disfala toktok bilong disaepol James: “Man wea followim world hem enemy bilong God.”—Jas. 4:4.
16 Hem no isi for followim toktok bilong James bikos world iusim enikaen samting for switim iumi. (2 Tim. 4:10) Dastawe Jesus prea olsem for olketa disaepol: “Mi no askem iu for tekem olketa from disfala world, bat mi askem iu for lukaftarem olketa mekem Satan no spoelem olketa. Olketa no olsem pipol long world, olsem mi tu no olsem pipol long world.” (John 17:15, 16) Hem gud for tingim olketa kwestin hia: ‘Waswe, mi waka hard for no olsem pipol long world? Waswe, pipol savve mi no keepim olketa celebration and kastom wea againstim Bible, and tu, olketa celebration and kastom wea followim tingting bilong pipol long world?’—2 Cor. 6:17; 1 Pet. 4:3, 4.
17. Wanem nao savve mekem pipol wea hambol for worshipim Jehovah?
17 Hem tru, pipol long world bae no hapi taem iumi followim wanem Bible talem, bat wei bilong iumi savve mekem pipol wea hambol for laek savve long truth. Tru tumas, taem pipol hia luksavve iumi garem strongfala faith long God and evri samting wea iumi duim showimaot datwan, maet datwan mekem olketa sei long olketa anointed Christian: “Mifala bae go witim iufala, from mifala herem finis God hem stap witim iufala.”—Zech. 8:23.
Showimaot Christian Love
18. Wanem nao showimaot iumi lovem Jehovah and lovem narawan?
18 Jesus sei: “Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu.” Hem sei tu: “Iu mas lovem narawan long sem wei wea iu lovem iuseleva.” (Matt. 22:37, 39) Man wea garem datfala love (long Greek languis hem a·gaʹpe) hem duim stret samting, hem luksavve long wanem hem mas duim, hem followim olketa Bible principle, and hem garem stretfala wei. Man hia hem barava lovem and tingim narawan. (1 Pet. 1:22) Hem barava difren from man wea selfish bikos samting wea hem talem and duim showimaot hem tingim narawan.—Readim 1 Corinthians 13:4-7.
19, 20. Storyim samfala experience wea showimaot Christian love mekem man for duim samting.
19 From holy spirit bilong God hem mekem man showimaot love, hem savve mekem olketa tru Christian duim samting wea nara pipol no savve duim. Olketa lovem pipol wea garem difren kala skin, kastom, and wea kam from nara kantri. (Readim John 13:34, 35; Gal. 5:22) Taem pipol wea hambol lukim iumi showimaot kaen love olsem, diswan mekem olketa for laek duim samting. Long firstaem wea wanfala young Jew man long Israel go long meeting, hem sapraes tumas for lukim olketa Jew brata and Arab brata worshipim Jehovah tugeta. Gogo hem go long meeting evritaem and studyim Bible. Waswe, iu tu showimaot iu barava lovem olketa Christian brata bilong iu? And waswe, iu traem best for welkamim olketa niu wan wea kam long Kingdom Hall, nomata olketa kam from difren kantri, garem difren kala skin, or sapos olketa rich or poor?
20 Iumi olketa tru Christian waka hard for lovem evriwan. Long El Salvador, wanfala young sista hem studyim Bible witim wanfala woman bilong Catholic wea hem 87 year. Woman hia hem strong long lotu bilong hem. Wantaem datfala woman hem sik big and hem admit long hospital. Taem hem go bak long haos bilong hem, samfala sista go visitim hem and tekem go kaikai for hem. Olketa duim olsem for samting olsem wanfala month. No eniwan from church bilong hem go visitim hem. So wanem nao disfala woman duim? Hem torowem evri image bilong hem and hem stop nao for go long church bilong hem. Then hem start for studyim Bible moa. Tru tumas, gud samting savve kamaot from wei for showimaot Christian love! Love wea iumi showimaot savve kasem heart bilong pipol winim wei for iumi preach long olketa nomoa.
21. Wanem nao iumi savve duim for garem gudfala future?
21 Klosap nao Jesus bae sei long olketa false Christian: “Mi nating savve long iufala! Iufala go from mi bikos iufala olketa man for duim olketa nogud samting.” (Matt. 7:23) So duim samting wea mekhae long Dadi bilong iumi and Son bilong hem. Jesus sei: “Evriwan wea herem toktok bilong mi and followim datwan bae olsem wanfala man wea garem gudfala tingting wea wakem haos bilong hem antap long ston.” (Matt. 7:24) Tru tumas, sapos iumi showimaot iumi olketa trufala follower bilong Christ, God bae hapi long iumi and iumi bae garem gudfala future olsem man wea wakem haos antap long ston!
[Footnote]
^ par. 11 Samfala buk bilong Catholic church distaem wea olketa raetem long English, olketa transleitim tetragrammaton, “Yahweh.” Wanfala nao hem The Jerusalem Bible.
Waswe, Iu Tingim Yet?
• Wanem nao showimaot olketa tru Christian difren from olketa false Christian?
• Wanem nao samfala “frut” wea showimaot man hem tru Christian?
• Wanem nao olketa samting wea iu savve duim for showimaot iu wanfala tru Christian?
[Olketa Study Kwestin]
[Piksa long page 13]
Waswe, iu iusim Bible evritaem long ministry?
[Piksa long page 15]
Waswe, pipol savve iu no keepim olketa celebration and kastom wea againstim Bible?