Cheqaq cristiano kasqanchista rikuchisun

“Llapa allin sach’aqa allin rurukunatan rurun, mana allin sach’akunan ichaqa mana allin rurukunata rurun.” (MAT. 7:17.)

1, 2. ¿Imapin cheqaq cristianokuna reqsisqa kanku, astawanqa kay tukukuy p’unchaykunapi?

JESUSMI rimarqan cheqaq cristianokuna llulla profetakunamanta ruwasqankupi yachachisqankupiwan reqsisqa kanankumanta (Mat. 7:15-17, 20). Runakunaqa imachus yuyayninkupi sonqonkupi kashan chaytan ruwanku (Mat. 15:18, 19). Arí, religionkunaq llulla yachachikuyninkuta yachaqkunaqa ‘mana allin rurukunatan rurunku’, cheqaq yachachikuykunata yachaqkunan ichaqa ‘allin rurukunata rurunku’.

² Kay tukukuy p’unchaykunapin aswan sut’ita chayqa reparakun (leey Daniel 12:3, 10). Llulla cristianokunaqa pantasqantan Kamaqninchismanta yachachinku, runaq qhawarinallanpaqtaq yupaychankupas, cheqaq cristianokunan ichaqa Diosta ‘espiritupi cheqaq-kaypiwan yupaychanku’ kallpachakunkutaq Cristota qatikunankupaq (Juan 4:24; 2 Tim. 3:1-5). Ichaqa, ¿imanisunmantaq sapankanchismanta? Kay estudiopin qhawarisunchis imakunapis Jesuspa cheqaq qatikuqninkuna kasqanchista reqsichikusunman chayta, phisqamanta yachasunchis. Yachasqanchisman hina tapukusun: “¿Diospa munasqanman hinachu imatapas ruwani, Bibliaq nisqanman hinachu yachachini? ¿Imayna kawsasqaywan yanapanichu huk runakunata cheqaq kayta yachanankupaq? nispa.

Bibliaq nisqanman hina kawsasun

3. ¿Iman Jehová Diosta kusichin, chayrayku imatan cristiano ruwanan?

³ Jesusmi nirqan: “Manan llapa ‘¡Señor! ¡Señor!’ niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa”, nispa (Mat. 7:21). Jehová Diospa sonqontaqa kusichin manan Jesuspa qatikuqninmi kani niyllachu, aswanpas chayta ruwaywan rikuchiymi. Cheqaq cristianoqa Diospa munayninman hinan kawsan tukuy ima ruwasqanpi, qolqe tariypi, llank’anapi, kusirikuypi, costumbrekunapi, casarakuypi, amigokuna maskhaypipas. Cristianoman tukuqkunan ichaqa imatapas ruwanku piensankupas kay millay pachapi runakunaq ruwayninman hinalla (Sal. 92:7).

4, 5. ¿Imaynatan kawsayninchispi yanapawanchis Malaquías 3:18 textoq nisqan?

⁴ Profeta Malaquiaspas qelqarqanmi: “Hinaqtinmi qankunaqa wakmanta reparankichis allin runaq millay runaq imaynachus kasqanta, pichus ñoqata serviq, pitaqchus ñoqata mana serviq kasqantapas”, nispa (Mal. 3:18). Chay simikunapi yuyaymanasun tapukusuntaq: “¿Kay pachapi runakuna hinachu kani, icha kallpachakunichu hukniray kanaypaq? ¿Tukuy atisqaytachu ruwani escuelapi compañeroykuna llank’anaypipas allinta qhawariwanankupaq? Icha, ¿allin cristiano hinachu comportakuni, rimanay kaqtintaq sut’ita willani Bibliaq nisqanman hina kawsasqayta?” (leey 1 Pedro 3:16.) Manan santo hinachu qhawarichikuyta munanchis, ichaqa reparakunanmi Diosta mana munakuq mana serviq runakunamanta hukniray kasqanchis.

⁵ Sichus imapipas cambianaykiraq kashan chayqa, Jehová Diospa yanapayninta mañakuy, hinaspa espiritualpi kallpachakuy Bibliata estudiaspa mañakuspa, llapa huñunakuykunaman rispa ima. Bibliapi yachachikuykunata kasukusun chayqa, aswantan kawsayninchispi “allin rurukunata” rikuchisun, chaymanta huknin ruwaymi ‘Diospa sutinta sut’ita siminchiswan rimaypas’ (Heb. 13:15).

 Diospa Reinonmanta predicasun

6, 7. ¿Imapin reqsichikullankutaq cheqaq cristianokuna yanqa cristianokunamanta?

⁶ Jesusmi nirqan: “Huk llaqtakunamanpas Diospa qhapaqsuyunmanta [‘reinonmanta’, NM] allin willakuykunataqa willamunaymi, chaypaqmi Diosqa kachamuwarqan”, nispa (Luc. 4:43). ¿Imaraykun Diospa Reinonmanta astawanqa predicarqan? Payqa yacharqanmi chay gobiernopi Rey kananta, hinaspa akllasqa cristianokunawan kay pachapi ñak’ariykunata paqarichiq Satanasta huchatawan chinkachinanta (Rom. 5:12; Apo. 20:10). Chaymi qatikuqninkunata kamachirqan p’uchukay chayamunankama Reinomanta predicamunankupaq (Mat. 24:14). Yanqa cristianokunaqa manan predicankuchu nitaq chay ruwaytapas atinkuchu. ¿Imarayku? Ñawpaqpi, manan rimayta atinkuchu mana entiendesqankumanta. Iskaypi, mana huch’uyaykukuqmi kanku, manataqmi aguantankuchu predicaqtinku hark’akuykuna kaqtin k’amikuykunatapas (Mat. 24:9; 1 Ped. 2:23). Kinsapi, Jehová Diospa santo espiritunpa yanapaynintan mana chaskinkuchu (Juan 14:16, 17).

⁷ Cristoq qatikuqninkunan ichaqa allinta entiendenku Diospa Reinon ima kasqanta, imakuna apamunantapas. Chaymi kawsayninkupi ñawpaqman chay reinota churanku, pachantinpitaq chaymanta santo espirituq yanapayninwan predicanku (Zac. 4:6). ¿Imanisunmantaq sapankanchismanta? ¿Hunt’ashanchischu predicay llank’ayninchista? ¿Aswantachu tiempota hap’inchis predicananchispaq otaq kallpachakunchischu aswan allinta predicananchispaq? ‘Diospa Siminqa kawsaq, atiyniyoqtaq’ chayqa, ¿Kallpachakunchischu aswan allinta Bibliawan yachachinapaq? Chayta ruwasun chayqa, apóstol Pablomanmi rikch’akusun, payqa Bibliawanmi uyariqninkunata yuyaymanachiq (Heb. 4:12; Hech. 17:2, 3).

8, 9. a) ¿Ima ejemplokunan rikuchin predicasqanchispi Bibliatapuni leenapaq? b) ¿Imatan ruwasunman Bibliawan aswan allinta predicanapaq?

⁸ Wasin wasinta predicashaspan huk iñiqmasinchis católico runaman leesqa Daniel 2:44 textota, hinaspa willasqa Diospa Reinon thak kawsay apamunanmanta. Chaymi chay wiraqocha nisqa: “Agradecekuykin mana imatachus Bibliaq yachachisqallantachu willawasqaykimanta, aswanpas Bibliamantapuni leewasqaykimanta”, nispa. Huk iñiqmasinchistaq esposanwan predicashaspa, Bibliata leesqa Ortodoxa Griega religionniyoq señoraman. Paymi imaymanamanta tapukusqa, chaymi paymanpas Bibliawan kutichisqaku. Qhepamanmi chay señora nisqa: “¿Repararqankichischu imarayku uyariraykichis chayta? Bibliayoqmi hamusqankichis hinaspa chaymanta leewarqankichis”, nispa.

⁹ Huk qelqanchiskunapas kusaña runakunaq yachananpaq chaypas, Bibliawanmi astawanqa predicanchis. ¿Bibliawanpunichu predicanki? Mana chayqa, ¿kallpachakuwaqchu chayta ruwanaykipaq? Yaqapaschá akllawaq Reinomanta willaq textokunata, imaynatachus chay Reino territorioykipi runakunaq llakikuyninta allichanqa chaymantapas, hinaspa leewaq wasin wasinta predicaspa.

Diospa sutinta ancha allinpaq hap’inchis

10, 11. ¿Imapin hukniray Jesús Diospa sutinta imayna qhawarisqan, Jesuspa yanqa qatikuqninkunaq qhawarisqanwan?

¹⁰ “Qankunan testigoykuna kankichis, maypachamantapas  [‘Jehová’, NM] Diospuni kasqaymanta.” (Isa. 43:12.) ¿Pitaq Jehová Diospa principal testigon? Jesucriston. Payqa anchatapunin taytanpa sutinta respetarqan, reqsichirqantaq hukkunaman (leey Éxodo 3:15; Hebreos 2:12). Chaymi Biblia sutichan: ‘Hunt’aq testigo’, nispa (Apo. 1:5; Mat. 6:9).

¹¹ Jesusta, Taytantawan yanqalla qatikuqkunaqa yaqa llapankun Diospa sutinta mana allinpaqchu qhawarinku, chaymi Bibliankumantapas horqopunku. Chaymantapas qaynallan católica religionpi obispokuna chaskinku kay willakuyta: “[Culto apakushaqtinqa] manan Diospa sutintaqa rimakunanchu kay tetragrammaton YHWH nisqanman hina”, nispa. * ¡Imaynataq chaytari ninkuman!

12. ¿Imatan 1931 watapi cheqaq cristianokuna ruwarqanku Diospa sutinta allinpaq hap’isqankurayku?

¹² Jesuspa ejemplonta qatikuspa hinallataq “ancha askha” testigokunata qatikuspan, kay tiempopi cristianokunaqa Diospa sutinta ancha allinpaq hap’isqankurayku rimarqanku (Heb. 12:1). Chaymi 1931 watapi decidirqanku “testigos de Jehová” sutita churakunankupaq (leey Isaías 43:10-12). Chhaynapin Diospa ‘sutinpaq runakuna’ kapurqanku (Hech. 15:14, 17, MR).

13. ¿Imaynatan kawsananchis Diospa sutinta apasqanchisman hina?

¹³ ¿Imaynatan yachasunman Diospa sutinta apasqanchisman hinachu kawsashanchis chayta? Ñawpaqtaqa Diosmanta willaspan. Pablon qelqarqan: “‘Pipas Jehová Diospa sutinta waqyakuqqa qespichisqan kanqa’, nispa. Ichaqa, ¿imaynatan mañakunkuman paypi mana iñispankuqa? ¿Imaynatan paypi iñinkuman paymanta willakuyta mana uyarishaspaqa?” (Rom. 10:13-15). Ichaqa sut’intan respetowan rimananchis Kamaqninchismanta mana allinta rimaqtinkuqa, ejemplopaq infiernomanta rimaqtinku; chay yachachikuyqa Diostan qhawarichin mana khuyapayakuq millay Diosta hina, aswanpas chhayna millayqa Saqran (Jer. 7:31; 1 Juan 4:8; tupachiy Marcos 9:17-27).

14. ¿Imaynatan sientekurqanku wakin runakuna Diospa sutinta yachaspanku?

¹⁴ ¿Kusikunkichu Diospa sutin apasqaykimanta, hukkunaman willanaykipaqpas kallpachakunkichu? Unay tiempoñan huk warmi, París hatun llaqtapi uyarisqa Testigokuna Diospa sutin yachasqankuta. Chaymi paykunawan tupaspa hina huknin iñiqmasinchista Bibliapi Diospa sutinta qhawachinanpaq nisqa, Salmo 83:18 textota leepuqtintaq anchata kusikusqa, hinaspa Biblia estudiayta munasqa, kunanqa tukuy sonqon Diosta servishan huk nacionpi. Chhaynallataqmi, Australiamanta católica religionniyoq señora Bibliapi yachasqa Diospa sutinta, chaymi kusikuymanta waqasqaraq. Biblia estudiaytan qallarisqa, kunantaq askha wataña precursora regular hina servishan. Qaynallan Jamaica nacionmanta iñiqmasinchiskuna huk warmiman Biblianpi qhawachisqaku Jehová sutita, paypas kusikuymantan waqasqa. Chaykunan rikuchiwanchis tukuy sonqomanta Diospa sumaq sutinta apananchispaq, Jesús hina maypi tarikuspapas willananchispaq.

“Ama kay pachata munakuychischu”

15, 16. a) ¿Imaynatan cristianokuna kay pachata qhawarinchis? b) ¿Imakunatan sapankanchis tapukunanchis?

¹⁵ Biblian nin: “Ama kay pachata munakuychischu, amallataq chaypi kaqkunatapas munakuychischu. Pipas kay pachapi kaqkunata munakuqqa manan Yayata munakunchu”, nispa (1 Juan 2:15). Kay pachapas, chaypi allinnillankuta maskhaq runakunapas Jehová Diospa, santo espiritunpa contranpin kashanku. Cheqaq cristianokunaqa manan kay pachapi millay ruwaykunaman chaqrukuyllamantachu cuidakunku, chaypi ima kaqkunatapas manan munapayankuchu, yachankun Santiagoq nisqan hina, “kay pacha kaqkunaman k’askakuqqa Diospa awqan kasqanta” (Sant. 4:4).

¹⁶ Kay p’unchaykunapiqa tukuy imaymana tentacionkunan kashan, chaymi sasapuni Santiagoq yuyaychasqanta kasukuyqa (2 Tim. 4:10). Chaymi Jesuspas discipulunkunapaq mañakurqan:  “Manan kay pachamanta paykunata horqonaykipaqchu mañakuyki, aswanpas saqramanta paykunata waqaychanaykipaqmi. Manan kay pachamantachu kanku, ñoqapas manallataqmi kay pachamantachu kani”, nispa (Juan 17:15, 16). Kaykunata tapukusun: “¿Kallpachakushanichu kay pachamanta t’aqasqa kanaypaq? ¿Yachanchu reqsisqaykuna pantasqa yachachikuymanta paqarimuq fiestakunata, costumbrekunata imayna qhawarisqayta?”, nispa (2 Cor. 6:17; 1 Ped. 4:3, 4).

17. ¿Iman yanapanman runakuna Jehová Diosta maskhanankupaq?

¹⁷ Hukniray kasqanchistaqa askhan mana entiendenkuchu, ichaqa chayta qhawarispan llamp’u sonqo runakuna yachayta munanku. Askhan reparanku iñiyninchispas ima ruwasqanchispas Bibliaq nisqanman hina kasqanta, chayraykun akllasqa cristianokunaq cheqaq yachachisqanta qatikuyta munanku. Chaymi ninku: “Ñoqaykun uyariyku qankunawan Dios kashasqanta, chayrayku pusakapuwayku, nispanku” (Zac. 8:23).

Cheqaq munakuyniyoq kasqanchista rikuchisun

18. ¿Imaynan munakuyninchis kanan Jehová Diospaq runamasinchispaqpas?

¹⁸ Jesusmi nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan”, chaymantataq nirqan: “Runamasiykitan qan kikiykita hina munakunki”, nispa (Mat. 22:37, 39). Kay munakuyqa (griego rimaypi agápe) Diospa kamachikuyninkunata kasukuspa, allin ruway kasqanrayku munakuymi. Chaymantapas tukuy sonqowan munakuymi (1 Ped. 1:22). Chay munakuyqa manan allinnillantachu maskhan, aswanpas ruwaypin rikukun (leey 1 Corintios 13:4-7).

19, 20. Willay experienciakunata imaynan munakuy atiyniyoq kasqanmanta.

¹⁹ Munakuyqa santo espirituq rurunmi, chaymi cheqaq cristianokunaqa huk runakunaq mana ruway atisqankuta ruwanku, sumaqtan kawsanku huk razamanta kaqkunawan, huk llaqtayokunawan, huk clase gobiernoyoq kaqkunawanpas (leey Juan 13:34, 35; Gál. 5:22). Chayta rikuspan llamp’u sonqo runakunaqa anchata kusikunku. Yachasunchis Israel llaqtapi  tiyaq huk judío waynamanta, paymi chayllaraq huk huñunakuyman risqa, hinaspan anchata admirakusqa judío, árabe runakuna wawqe-panantin hina Jehová Dios yupaychasqankuta rikuspa. Chayta rikuspan Biblia estudiayta qallarisqa huñunakuykunaman riytapas. ¿Ñoqanchispas chhayna munakuywanchu iñiqmasinchiskunata tratanchis? ¿Kallpachakunchischu chayllaraq huñunakuyman hamuqkunata sumaqta chaskinapaq, may llaqtamantaña, wakchaña qhapaqña kanku chaypas?

²⁰ Cheqaq cristianokunaqa kallpachakunchismi lliw runata munakuywan tratananchispaq. El Salvador nacionpin huk señora católica 87 watanpi huk sipas Testigowan Bibliata estudiashasqa, ichaqa mana iglesianta saqenanpaq decidikusqachu. Huk p’unchaymi sinchita onqosqa chaymi hospitalpi kamusqa. Chaymanta lloqsimuqtintaq iñiqmasinchiskuna huk killa entero telefonopi waqyasqaku, hinaspa mikhunan mana pisinanpaq allichasqaku. Ichaqa, manan pipas parroquianmanta visitaq risqachu, chaymi imagenninkunata orqonanpaq decidikusqa, religionninta saqepunanpaq ima, hinaspa kaqmanta Biblia estudiayta qallarisqa. ¡May atiyniyoqmi munakuyqa! Runakunaq sonqonmanmi chayan.

21. ¿Imatan ruwananchis hamuq tiempopaq suyakuyninchis seguro kananpaq?

²¹ Pisi tiempollamantan llulla cristianokunata Jesús ninqa: “Manapunin reqsiykichischu, qayllaymanta anchhuriychis mana allin ruwaqkuna”, nispa (Mat. 7:23). Paykuna hina kananchismantaqa, ñoqanchispin wiñachinchis Yayata Churitawan munakuyta. Jesuspa kay nisqantan yuyarina: “Pipas uyariwaspan nisqaykunata hunt’aq runataqa qaqa patapi wasinta ruwaq yuyayniyoq runawanmi rikch’anachisaq” (Mat. 7:24). Chhaynaqa, kawsayninchispi Cristoq cheqaq discipulonkuna kasqanchista rikuchisun chayqa, Jehová Diospa allin qhawarisqanmi kasunchis, hamuq tiempopaq suyakuyninchistaq qaqa patapi cimentasqa wasi hina kanqa.

[Uranpi willakuy]

¿Yuyashankichu?

• ¿Imapin hukniray kanku Jesuspa cheqaq qatikuqninkuna yanqa qatikuqninkunamanta?

• Willay ima ‘rurukuna’ rikuchisqankupi cheqaq cristianokuna hukniray kasqankuta

• ¿Ima ruwaykunapin allinyasunman?

[Tapuykuna]

[13 paginapi foto]

¿Bibliawanpunichu predicanki?

[15 paginapi foto]

¿Yachankuchu hukkuna Bibliaq contranpi kaq fiestakuna mana ruwasqayta?