Fa so mo yeke tâ disciple ti Christ

“Nzoni keke kue ayeke lë nzoni lê ti keke. Me nga sioni keke kue ayeke lë sioni lê ti keke.”​—MAT. 7:17.

1, 2. Tongana nyen atâ disciple ti Christ ayeke nde na adisciple ti wataka, mbilimbili na alango ti nda ni so?

 JÉSUS atene a yeke na lege ti alengo ti aChrétien ti wataka si a yeke bâ kangbi so ayeke na popo ti ala na atâ Chrétien, so ti tene fango ye ti ala na sarango ye ti ala (Mat. 7:15-17, 20). Biani, kite ayeke pëpe so ye so azo ayeke yôro na yâ ti li ti ala nga na bê ti ala si ayeke sara ngangu na ndo ti ala (Mat. 15:18, 19). Ala so awara fango ye ti mvene alë “sioni lê ti keke”, me ala so a fa na ala tâ tënë so alondo na Nzapa alë “nzoni lê ti keke”.

² A yeke na alango ti nda ni so la mara ti alengo ti keke use so asigigi polele. (Diko Daniel 12:3, 10.) A-Chrétien ti wataka ayeke na mbeni bango ndo so aba bango na ndo ti Nzapa, na mingi ni ala ayeke sara ye mo bâ mo tene ala gbu tënë ti Nzapa ngangu ti handa na lê ti azo; me ala so ayeke bâ ye nzoni na lege ti yingo avoro Nzapa “na yingo nga na tâ tënë.” (Jean 4:24; 2 Tim. 3:1-5). Ala sara ngangu ti sara ye tongana ti Christ. Me ti e oko oko ayeke tongana nyen? Tongana mo yeke bâ aye oku so a hinga na atâ Chrétien so e yeke gue ti sara tënë na ndo ni, hunda tere ti mo: ‘Sarango ye ti mbi na fango ye ti mbi ague oko na Mbeti ti Nzapa? Sarango ye ti mbi na fango ye ti mbi asara si tâ tënë agbu bê ti azo so ayeke gi ni?’

Ala sara ye ague oko na Mbeti ti Nzapa

3. Ye wa anzere na Jéhovah? Ye so aye ti tene nyen teti atâ Chrétien?

³ Jésus atene: “A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti royaume ti yayu. Me zo so asara ye so bê ti Babâ ti mbi so ayeke na yayu aye si ayeke lï ande.” (Mat. 7:21). Biani, a yeke gi na tenengo na yanga so e yeke ti Christ la anzere na Jéhovah pëpe, me a yeke ti sara ye so a hunda na aChrétien ti sara. Ti atâ disciple ti Christ, ye so andu fini ti ala kue, bango ndo ti ala na ndo ti nginza, kua ti mitele, angia, angobo na amatanga ti dunia so, a ndu nga mariage na songo so ala yeke na ni na amba ti ala. Me, dutingo ti aChrétien ti wataka ague oko na bibe nga na sarango ye ti dunia so, so ague guengo na li ni na mbeni lege so ake Nzapa na alango ti nda ni so.​—Ps. 92:8.

4, 5. Tongana nyen e lingbi ti sara ye alingbi na tënë ti Jéhovah so ayeke na Malachie 3:18?

⁴ Ni la, prophète Malachie atene: “Fade i kiri i bâ zo ti mbilimbili nde na zo ti sioni nde, lo so asara kusala ti Nzapa nde na lo so asara kusala ti Lo pëpe nde.” (Mal. 3:18). Tongana mo yeke gbu li ti mo na ndo ti atënë so, hunda tere ti mo: ‘Mbi yeke tongana azo ti dunia so wala mbi yeke ti mbi nde? Mbi yeke sara lakue ngangu ti lingbi na akamarade ti mbi atâa na ekole wala na place ti kua? wala mbi yeke gbu lakue akpengba-ndia ti Bible ngangu même tongana lege azi na mbi ti fa tënë?’ (Diko 1 Pierre 3:16.) Biani, e ye pëpe ti fa so e la e yeke azo so ayeke mbilimbili mingi, me a lingbi e duti nde na azo so aye Jéhovah pëpe na asara na lo pëpe.

⁵ Tongana mo bâ so a lingbi mo gbian ambeni ye na yâ ti sarango ye ti mo, a yeke nzoni mo sambela na ndo ti tënë ni na mo hunda Nzapa ti mû na mo ngangu na lege ti mandango Bible, na lege ti sambela nga na guengo na abungbi. Tongana mo yeke sara ye lakue alingbi na Mbeti ti Nzapa, fade mo yeke lë “nzoni lê ti keke” mingi, na mo yeke lë nga “lengo ti yanga  so ayeke fa iri ti [Nzapa] na lê ti azo dandara.”​—aHéb. 13:15.

Ala fa tënë ti Royaume ti Nzapa

6, 7. Na ndo ti tënë ti fango tënë ti Royaume, kangbi wa a lingbi ti bâ na popo ti atâ Chrétien na aChrétien ti wataka?

⁶ Jésus atene: “A lingbi mbi fa nga nzoni tënë ti royaume ti Nzapa na ambeni gbata nde, ngbanga ti so a yeke ndali ni si a tokua mbi.” (Luc 4:43). Ngbanga ti nyen Jésus amû tënë ti Royaume ti Nzapa tongana mama-tene ti fango tënë ti lo? Lo hinga so lo la lo yeke Gbia ti Royaume ni, na lo na aita ti lo so a soro ala ti gue na yayu na so a zingo ala, a yeke zi ande aye so ayeke na gunda ti pasi ti azo: siokpari na Zabolo (aRom. 5:12; Apoc. 20:10). Tongaso, lo mû yanga na adisciple ti lo ti fa tënë ti Royaume so juska na hunzingo ti aye ti ngoi so (Mat. 24:14). Azo so atene gi na yanga atene ani yeke adisciple ti Christ asara kusala so pëpe: ti tâ tënë ni, ala lingbi ti sara ni pëpe. Ngbanga ti nyen? Ngbanga ti araison ota: Oko ni, ala lingbi pëpe ti fa ye so ala hinga pëpe. Use ni, mingi ti ala ayeke na tâ be-ti-molenge pëpe nga ala yeke azo ti mbeto, tongaso ala lingbi pëpe ti luti na gbele hengo ndo na kangango lege so alingbi ti si tongana ala fa tënë ti Royaume na azo so ayeke nduru na ala (Mat. 24:9; 1 Pi. 2:23). Na ota ni, aChrétien ti wataka ayeke na yingo ti Nzapa pëpe.​—Jean 14:16, 17.

⁷ Na mbage, atâ disciple ti Christ ahinga ye so ayeke Royaume ti Nzapa na ye so Royaume ni ayeke sara ande. Na ndo ni, ala zia akusala ti Royaume ni na kozo ndo na yâ ti fini ti ala, ala fa tënë ni na ndo ti sese kue na lege ti maboko so yingo ti Jéhovah amû na ala (Zach. 4:6). Mo yeke sara kusala so lakue? Mo yeke gi ti ga nzoni wafango tënë ti Royaume, peut-être na mungo ngoi mingi ti fa tënë wala ti sara ni na anzoni kode? Ambeni atara ti maï akode ti fango tënë ti ala na sarango kusala nzoni na Bible. Bazengele Paul so amanke ka pëpe ti pika patara na azo na ndo ti Mbeti ti Nzapa atene: “Tënë ti Nzapa ayeke na fini na ayeke na ngangu ti sara ye.”​—aHéb. 4:12; Kus. 17:2, 3.

8, 9. (a) Aye wa so asi afa nene ti sarango kusala na Bible na fango tënë? (b) Tongana nyen e lingbi ti ga azo so asara kusala nzoni mingi na Bible?

⁸ Na fango tënë da na da, mbeni ita-koli adiko Daniel 2:44 na mbeni koli so asara Eglize Catholique, na lo fa na lo tongana nyen Royaume ti Nzapa ayeke ga ande na tâ siriri na nzoni duti. Koli ni atene: “A nzere na mbi so mo zi Bible na mo fa na mbi ye so versê ni atene ahon ti tene mo tene na mbi gi na yanga.” Na ngoi so mbeni ita-koli adiko mbeni versê na mbeni wali so asara Eglize Orthodoxe ti Grèce, na pekoni wali ni ahunda atënë mingi so afa so tënë ni agbu bê ti lo. Ge nga kue, ita-koli ni na wali ti lo akiri tënë na lege ti Bible. Na pekoni wali ni atene: “Mo hinga ndani so mbi yeda ti sara lisoro na mo? Mo ga na yanga-da ti mbi na Bible, na mo diko ni na mbi.”

⁹ Biani, a lingbi e bâ ambeti ti e na nene ni na e mû na azo na fango tënë. Me, Bible ayeke kozo ye so e yeke sara na kusala. Tongaso, tongana mo yeke sara ka kusala na Bible mingi pëpe na fango tënë, zia na gbele ti mo ti sara ni. Peut-être mo lingbi ti soro ambeni kota versê ti Bible so afa ye so a iri ni Royaume ti Nzapa, na tongana nyen Royaume ni ayeke leke ande akpale so azo ti ndo so mo yeke dä ayeke gi bê ti ala na ndo ni. Na pekoni leke tere ti mo ti diko aversê ni tongana mo yeke fa tënë da na da.

Ala sara pëpe kamene ti iri ti Nzapa so ayeke na ndo ti ala

10, 11. Na ndo ti tënë ti sarango kusala na iri ti Nzapa, kangbi wa ayeke na popo ti Jésus na azo mingi so atene ani mû peko ti lo?

¹⁰ “L’Éternel atene, I yeke atémoin ti Mbi, Mbi yeke Nzapa.” (És. 43:12). Kota Témoin ti Jéhovah, Jésus Christ, abâ so a yeke kota pasa ti tene iri ti Nzapa ayeke na ndo ti lo na ti sara si azo ahinga ni. (Diko Exode 3:15; Jean 17:6; aHébreu 2:12.) Biani, teti so Jésus afa iri ti Babâ ti lo, a iri lo “Témoin so ayeke be-ta-zo”.​—Apoc. 1:5; Mat. 6:9.

¹¹ Azo mingi so atene ani sara kusala na iri ti Nzapa na Molenge ti lo asara kamene ti iri ti Nzapa, ala zi ni même na yâ ti aBible ti ala. Ti  gue oko na mara bibe so, mbeni yanga so a mû ade ti ninga pëpe na akota bua ti Eglize Catholique atene: “A lingbi a sara kusala pëpe na iri ti Nzapa so a sara ni na gere-mbeti osio YHWH, na a lingbi a di ni pëpe” na ngoi ti vorongo Nzapa. * So sioni bibe!

12. Tongana nyen a hinga awakua ti Jéhovah tongana azo ti lo na ngu 1931?

¹² Na mungo tapande ti Christ na ti “atémoin mingi mingi” so aga kozoni na lo, atâ Chrétien asara kusala na iri ti Nzapa na kamene pëpe (aHéb. 12:1). Biani, na ngu 1931, a hinga awakua ti Nzapa tongana azo ti Jéhovah na lege so ala yeda ti mû iri ti aTémoin ti Jéhovah. (Diko Ésaïe 43:10-12.) Tongaso, na mbeni lege so ayeke tâ nde, adisciple ti Christ aga “azo so a di iri ti [Nzapa] na ndo ti ala.”​—Kus. 15:14, 17.

13. Tongana nyen e lingbi ti sara ye ague oko na iri so Nzapa amû na e?

¹³ E lingbi ti hinga tongana nyen so e yeke sara ye so a hunda na azo so a di iri ti Nzapa na ndo ti ala? Kozoni kue, a lingbi e fa tënë ti témoin na iri ti Nzapa tâ na lege ni. Paul atene: “Fade a yeke sö zo kue so airi ndo na Jéhovah na iri ti lo.” Paul atene: “Me fade ala yeke iri ndo na lo tongana nyen tongana ala mä na bê na lo pëpe? Na ala yeke mä na bê na lo tongana nyen tongana ala mä tënë na ndo ti lo pëpe? Nga, ala yeke mä tënë ni tongana nyen tongana zo ti fa tënë ni ayeke dä pëpe? Na ala yeke fa tënë ni tongana nyen tongana a tokua ala pëpe?” (aRom. 10:13-15). Use ni, na lege ti kode, a lingbi e fa na gigi atënë ti mvene so abungbi ti vorongo Nzapa ti wataka abi na ndo ti Wasarango e, atënë tongana tënë ti enfer, so afa biani Nzapa ti ndoye tongana sioni zo, andâ a yeke Zabolo la ayeke sioni zo.​—Jér. 7:31; 1 Jean 4:8; bâ Marc 9:17-27.

14. Na ngoi so ambeni zo ahinga iri ti Nzapa, nyen la ala sara na pekoni?

¹⁴ A nzere na mo so iri ti Babâ ti mo so ayeke na yayu ayeke na ndo ti mo? Mo mû maboko na ambeni zo ti hinga iri so ayeke nzoni-kue so? Mbeni wali na gbata ti Paris, na France, amä so aTémoin ti Jéhovah ahinga iri ti Nzapa, tongaso lo hunda na ita-wali so lo tingbi na lo ti fa na lo iri so na yâ ti Bible ti lo. Tongana wali ni adiko Psaume 83:19, a sara ngangu mingi na ndo ti lo. Lo to nda ti manda Bible, na laso lo yeke mbeni ita-wali so ayeke be-ta-zo so asara kusala ti Nzapa na mbeni kodoro nde. Tongana mbeni wali so asara Eglize Catholique na kodoro ti Australie abâ iri ti Nzapa ti kozoni na yâ ti Bible, ngia asi bê ti lo na asara si lo toto. Teti angu mingi fadeso, lo yeke wafango tënë ti ngoi kue. Ade ti ninga mingi pëpe, na kodoro ti Jamaïque, aTémoin ti Jéhovah afa na mbeni wali iri ti Nzapa na yâ ti Bible ti lo wani, lo nga kue ngia asi bê ti lo na asara si lo toto. Tongaso, duti na ngia so iri ti Nzapa ayeke na ndo ti mo, na tongana ti so Jésus asara lani, sara nga si azo kue ahinga kota iri so.

“Ala ndoye dunia so pëpe”

15, 16. Atâ Chrétien abâ dunia so tongana nyen? Ahundango tënë wa a lingbi e hunda tere ti e na ni?

¹⁵ “Ala ndoye dunia so pëpe wala aye so ayeke na yâ ti dunia so. Tongana mbeni zo andoye dunia so, ndoye ti Babâ ni ayeke na yâ ti lo pëpe”. (1 Jean 2:15). Dunia so na asarango ye ti lo ague nde na Jéhovah nga na yingo vulu ti Lo. Ni la atâ disciple ti Christ ake gi ti mû mbage ti ala na dunia ni pëpe. Ala ke ni na bê ti ala kue, teti, tongana ti so disciple Jacques atene, ala hinga so “zo so aye ti ga kamarade ti dunia so ayeke sara tere ti lo wato ti Nzapa.”​—Jacq. 4:4.

¹⁶ Na yâ ti mbeni dunia so aye ti handango zo ahon ndo ni, a lingbi ti duti ngangu ti mä wango so Jacques amû (2 Tim. 4:10). Tongaso, Jésus asambela ndali ti adisciple ti lo: “Mbi hunda mo ti zi ala na yâ ti dunia so pëpe, me ti bâ ndo na ndo ti ala ngbanga ti Zo ti sioni. Ala yeke ti dunia so pëpe legeoko tongana ti so mbi yeke ti dunia so pëpe.” (Jean 17:15, 16). Hunda tere ti mo: ‘Mbi yeke sara ngangu ti ga ti dunia so pëpe? Amatanga na angobo so Mbeti ti Nzapa ake nga na ambeni so alondo na apaïen pëpe me so afa na gigi yingo ti dunia so, azo  ahinga so mbi yeke mû mbage ti mbi dä pëpe?’​—2 aCor. 6:17; 1 Pi. 4:3, 4.

17. Ye wa alingbi ti pusu azo so ayeke na nzara ti voro Nzapa ti ga ti sara na Jéhovah?

¹⁷ A yeke tâ tënë so ye so e manda na yâ ti Bible ayeke sara pëpe si dunia so abâ e na nzoni lê, me a lingbi ti gboto lê ti azo so ayeke tâ na nzara ti voro Nzapa. Ni la, tongana mara ti azo tongaso abâ so mabe ti e aluti ngangu na ndo ti Mbeti ti Nzapa na andu fini ti e kue, ala lingbi ti yeda mo bâ mo tene ala yeke tene na aChrétien so a soro ala ti gue na yayu: “Fade e gue na mo, teti e mä so Nzapa ayeke na i.”​—Zach. 8:23.

Ala fa tâ ndoye ti aChrétien

18. Ti ndoye Jéhovah na ti ndoye mba ti e aye ti tene nyen?

¹⁸ Jésus atene: “Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue”, na “mo ndoye mba ti mo tongana mo wani.” (Mat. 22:37, 39). Ndoye so (so a iri ni agapê na yanga ti Grec) ayeke mbeni ndoye so ahunda ti sara kusala, mbeni ndoye so aluti na ndo ti akpengba-ndia nga na nzoni tambela, me mingi ni a ndu aye so agbu bê ti zo ngangu. A yeke ndoye so alondo na bê (1 Pi. 1:22). A yeke ti lo nde mingi na bibe ti kion, teti a yeke wara bibe ti kion pëpe na yâ ti atënë nga na asarango ye ti lo.​—Diko 1 aCorinthien 13:4-7.

19, 20. Fa ambeni ye so asi so afa tongana nyen ndoye ti aChrétien ayeke ngangu.

¹⁹ Teti so a yeke yingo vulu ti Nzapa si ayeke sara si zo aduti na ndoye, ndoye amû lege na atâ Chrétien ti sara ye so ambeni zo alingbi ti sara pëpe, ti hon ndo ti aye so ayeke kanga lege na azo tongana tënë ti mara, angobo ti sarango ye ti azo, na atënë ti poroso. (Diko Jean 13:34, 35; aGal. 5:22.) Mara ti ndoye so alingbi gi ti gbu bê ti azo so ayeke tongana angasangbaga tongana ala bâ ni. Na tapande, na ngoi so mbeni maseka-koli so ayeke Juif na kodoro ti Israël ague na kozo bungbi ti lo, bê ti lo apika ti bâ so aita Juif na aita Arabe avoro Jéhovah ndo oko. Ye ti pekoni ayeke so, lo to nda ti gue na abungbi lakue lakue na lo yeda ti manda Bible. Mo yeke fa mara ti tâ ndoye tongaso na mbage ti aita ti mo? Mo yeke sara ngangu ti yamba na ngia afini zo kue so ayeke ga na Da ti Royaume atâa kodoro ti ala, nzoroko ti poro ti tere ti ala wala kamba ti kua ti ala ayeke nde?

²⁰ E so e yeke atâ Chrétien, e sara ngangu ti fa ndoye na mbage ti azo kue. Na kodoro ti El Salvador, mbeni ita-wali so ade maseka ayeke manda Bible na mbeni wali so asara Eglize Catholique, so ngu ti lo ayeke 87 na so aye Eglize ti lo mingi. Mbeni lâ, wali ni atï kobela ngangu na a gbanzi lo na hôpital. Tongana lo kiri na yanga-da, wafango tënë ni ague abâ lo na lo ga na lo kobe. Lo sara ye so teti nze oko. Zo oko ti Eglize ti wali ni aga ti bâ lo pëpe. Ye ti pekoni ayeke nyen? Wali so abi a-image kue so lo yeke na ni, lo sû mbeti ti fa so lo sigigi na yâ ti Eglize ni awe, na lo kiri lo manda Bible ti lo. Biani, ndoye ti aChrétien ayeke ngangu! A lingbi ti ndu bê ahon gi sarango tënë na zo na yanga.

21. Tongana nyen e lingbi ti sara si gigi ti e ti kekereke aduti nzoni?

²¹ Azo kue so atene mvene atene ani yeke sara na Jésus, na yâ ti kete ngoi fade Jésus ayeke tene na ala: “Mbi hinga ala lâ oko pëpe! ala hon yongoro kâ na tere ti mbi, ala azo so akpe ndia pëpe.” (Mat. 7:23). Tongaso, zia e lë alengo so amû gonda na Babâ nga na Molenge ni. Jésus atene: “Zo kue so amä atënë ti mbi so, na lo sara ye alingbi na ni, a yeke haka lo ande na zo so ayeke sara ye na ndara so aleke da ti lo na ndo ti kota tênë.” (Mat. 7:24). Biani, tongana e fa so e yeke atâ disciple ti Christ, fade Nzapa ayeke yeda na e, na fade gigi ti e ti kekereke ayeke duti nzoni, mo bâ mo tene ayeke na ndo ti tênë!

[Kete tënë na gbe ni]

Mo dabe ti mo na ni?

• Atâ disciple ti Christ aduti nde na adisciple ti wataka tongana nyen?

• Fa ambeni ‘lengo’ so amû lege ti hinga na atâ Chrétien.

• Tongana mo yeke lë alengo ti aChrétien, ye wa mo lingbi ti zia na gbele mo ti si dä?

[Ahundango tënë ti manda na ye]