Ia Faamaonia o Oe o se Soo Moni o Keriso

‘O laau lelei uma e fua mai ai o fua lelei, a o laau pala uma, e fua mai ai o fua leaga.’—MATA. 7:17.

1, 2. E faapefea ona ese soo moni o Keriso mai i Kerisiano pepelo, aemaise lava i lenei taimi o le iʻuga?

NA FETALAI Iesu o le a iloa le eseesega o ona soo moni ma i latou e talapepelo mai o loo auauna iā te ia, e ala i o latou fua—o a latou aʻoaʻoga ma amioga. (Mata. 7:15-17, 20) Ioe, e mautinoa e aafia tagata i mea o loo i o latou mafaufau ma loto. (Mata. 15:18, 19) O i latou e faalogo i aʻoaʻoga pepelo, e latou te fuaina mai “fua leaga,” a o ē e aʻoaʻoina i upu moni faaleagaga, e latou te fuaina mai “fua lelei.”

² Ua matuā manino ona faaalia mai ia ituaiga fua e lua, i lenei taimi o le iʻuga. (Faitau le Tanielu 12:3, 10.) E sesē manatu o Kerisiano pepelo e faatatau i le Atua ma e masani ona faatagāfai lo latou faamaoni iā te ia, ae o i latou ua iai le malamalamaga faaleagaga, e tapuaʻi atu i le Atua “i le agaga ma le upu moni.” (Ioa. 4:24; 2 Timo. 3:1-5) E latou te taumafai e faaalia atu uiga e pei o uiga o Keriso. Ae faapefea i tatou taʻitoʻatasi? A o e iloiloina faailoga e lima o loo mulimuli mai, e mātaulia ai le faa-Kerisiano moni, ia fesili ifo iā te oe lava: ‘Po o ōgatusa ma le Afioga a le Atua aʻu amio ma mea o loo oʻu aʻoaʻoina atu i isi? Po o avea aʻu amio ma mea o loo oʻu aʻoaʻoina atu, ma itu e tosina mai ai i le upu moni i latou o loo saʻilia?’

Ola e Tusa ai ma le Afioga a le Atua

3. O le ā e faafiafiaina ai Ieova, ma o le a e aofia ai i lenei mea mo Kerisiano moni?

³ Na fetalai Iesu: “E lē ulu atu i le malo o le lagi i latou uma o ē fai mai iā te aʻu, ‘Le Alii e, le Alii e,’ ae na o lē na te faia le finagalo o loʻu Tamā o i le lagi.” (Mata. 7:21) Ioe, e lē faafiafiaina Ieova i le faapea atu o se tasi o ia o se Kerisiano, ae o le faia o mea e ao ona fai e se Kerisiano. I soo moni o Keriso, e aafia ai o latou olaga atoa, e aofia ai la latou vaaiga i tupe, galuega totogi, faafiafiaga, tū ma aganuu ma aso faamanatu a le lalolagi, faaipoipoga, ma le vafealoaʻi ma isi tagata. Peitaʻi, o Kerisiano pepelo, ua aafia i latou i mafaufauga ma ala o le lalolagi, ia ua matuā faateleina le leaga i nei aso e gata ai.—Sala. 92:7.

4, 5. E faapefea ona tatou faatatauina i o tatou olaga fetalaiga a Ieova o i le Malaki 3:18?

⁴ Na tusi le perofeta o Malaki e faapea: “O le a outou toe iloa ai lava le eseesega o le tagata amiotonu ma le tagata amioleaga, o le eseesega foʻi o lē o loo auauna i le Atua ma lē e lē o auauna iā te ia.” (Mala. 3:18) A o e manatunatu i na upu, ia fesili ifo iā te oe lava: ‘Po o pei aʻu o tagata o le lalolagi, po o iloa aʻu o sē e ese? Po o oʻu taumafai e fai mea e mananaʻo ai tagata e matou te aʻoʻoga pe faigaluega faatasi, po o oʻu tausisi i mataupu silisili o le Tusi Paia, ma faamatala atu pe afai e talafeagai?’ (Faitau le 1 Peteru 3:16.) E moni e tatou te lē mananaʻo e foliga atu e faafiaamiotonu, peitaʻi e ao ona matilatila atu e ese i tatou mai i ē e lē alolofa ma auauna iā Ieova.

⁵ Pe afai e te iloa e manaʻomia ona faaleleia au amio, aiseā e lē tatalo atu ai ma saʻili mo le malosi faaleagaga, e ala i le suʻesuʻeina e lē aunoa o le Tusi Paia, tatalo ma auai i sauniga? O le tele e te faatatauina ai le Afioga a le Atua, o le tele foʻi lenā o le a e fuaina mai ai “fua lelei,” e aofia ai “le fua o laugutu, e faailoa atu ai i tagata lona suafa,” o Ieova.—Epe. 13:15.

 Talaʻi Atu le Malo o le Atua

6, 7. Pe a fua i le feʻau o le Malo, o le ā le eseesega o Kerisiano moni ma Kerisiano pepelo?

⁶ Na fetalai Iesu: “E tatau ona ou folafola le tala lelei o le malo o le Atua i isi foʻi aai, auā o le mea lea na auina mai ai aʻu.” (Luka 4:43) Aiseā na avea ai le Malo o le Atua ma autū o le talaʻiga a Iesu? Talu ai na ia iloa, i le avea ai ma Tupu o lenā Malo, faatasi ai ma ona uso faauuina i le agaga ua toetutū aʻe, o le a latou faamutaina pogai autū o puapuaga o tagata—le agasala ma le Tiapolo. (Roma 5:12; Faaa. 20:10) O lea na ia faatonuina ai ona soo ia folafola atu lenā Malo seʻia oo i le iʻuga o lenei faiga o mea a le lalolagi. (Mata. 24:14) E lē o faia lenei galuega e tagata o loo tau ina faapea mai o i latou o soo o Keriso, ma e latou te lē mafai lava ona faia. Aiseā? A itiiti mai e tolu māfuaaga: Muamua, e lē mafai ona latou talaʻia atu le mea e latou te lē o malamalama i ai. Lua, e lē o iai le lotomaulalo ma le lototele i le toʻatele o i latou e feagai ai ma tauemuga ma teteega, lea e ono oo mai ona o le talaʻiina atu o le feʻau o le Malo i isi. (Mata. 24:9; 1 Pete. 2:23) Ma lona tolu, e lē o iai le agaga paia o le Atua i Kerisiano pepelo.—Ioa. 14:16, 17.

⁷ Peitaʻi o soo moni o Keriso, e latou te iloa le uiga o le Malo o le Atua ma mea o le a faataunuuina e lea Malo. E lē gata i lea, e faamuamua i o latou olaga mea e fesootaʻi ma lenā Malo, ma faalauiloa atu i le lalolagi aoao, e ala i le fesoasoani a le agaga o Ieova. (Saka. 4:6) Po o faia e lē aunoa sou sao i lenei galuega? Po o e taumafai e faaleleia lou tulaga o se tagata talaʻi o le Malo, atonu e ala i le faateleina o le taimi i le talaʻiga pe taumafai foʻi ia taulau manuia i le faiva? Ua taumafai nisi e faaleleia la latou faiva e ala i le lelei ona faaaogā o le Tusi Paia. Na tusi Paulo, o lē na masani ona fetufaaʻi ma tagata i le Tusi Paia e faapea: “O loo ola le afioga a le Atua ma e matuā malosi foʻi.”—Epe. 4:12; Galu. 17:2, 3.

8, 9. (a) O ā ni mea na tutupu e faaalia ai le tāua o le faaaogā o le Tusi Paia i le faiva? (e) E faapefea ona tatou tomai atili i le faaaogāina o le Afioga a le Atua?

⁸ Ina ua auai i le galuega mai lea fale i le fale, na faitau atu e se uso le Tanielu 2:44 i se tamāloa Katoliko, ma faamatala atu o le a aumaia e le Malo o le Atua le filemu ma le saogalemu moni. Na faapea mai le tamāloa: “Ou te matuā talisapaia lou faitauina mai o le Tusi Paia ma faailoa mai iā te aʻu le tala a le mau, nai lo le tau ina taʻu mai o le mau.” Ina ua faitau atu e se uso se mau i se fafine o le lotu Eleni, na tele ni fesili lelei na lāgā e le fafine. Sa taliina foʻi e le uso ma lana avā mai i le Tusi Paia ana fesili. Mulimuli ane na faapea mai le fafine: “Pe e te lua iloa le māfuaaga na ou fiafia ai e tatou te talanoa? Na lua ō mai i loʻu fale ma le Tusi Paia, ma na lua faitauina mai.”

⁹ E moni e tāua a tatou lomiga, ma e tatau ona ofo atu i le talaʻiga. Peitaʻi, o la tatou lomiga autū, o le Tusi Paia. O lea la, pe afai e lē o masani ona e faaaogāina e lē aunoa le Tusi Paia i lau faiva, o se mea lelei le fai loa ma ou sini le faia faapea. Atonu e mafai ona e filifilia ni nai mau autū e faamatala atu ai le Malo o le Atua, ma le auala o le a foʻia ai e lea Malo faafitauli o loo popole ai tagata o lou vaipanoa. Ma ia nofosauni e faitau atu na mau a o e talaʻi mai i lea fale i lea fale.

 Mitamita i le Tauaveina o le Suafa o le Atua

10, 11. E tusa ai o le faaaogāina o le suafa o le Atua, o le ā le eseesega o Iesu ma tagata e faapea mai o i latou o ona soo?

¹⁰ “ʻO outou o aʻu molimau, ma o aʻu o le Atua,’ ua fetalai mai ai Ieova.” (Isa. 43:12) Na manatu le Molimau sili a Ieova, o Iesu Keriso, o se faaeaga le tauaveina o le suafa o le Atua ma faalauiloa atu. (Faitau le Esoto 3:15; Ioane 17:6; Eperu 2:12.) O lea la, talu ai na faalauiloa atu e Iesu le suafa o lona Tamā, na taʻua ai o ia o “le Molimau Faamaoni.”—Faaa. 1:5; Mata. 6:9.

¹¹ Ae o le toʻatele o ē ua faapea mai o ni sui o le Atua ma lona Alo, ua latou faaalia ni uiga e faalumaina ai le suafa o le Atua, ma ua iʻu foʻi ina aveesea lea suafa mai i le Tusi Paia. Na faaalia lea lava uiga i se tusi na avatu i epikopo Katoliko e faapea, i taimi o tapuaʻiga, “e lē faatagaina ona faaaogā pe taʻua le suafa o le Atua lea e faia aʻe i le tetakalamatone, po o le YHWH.” * Pagā le leaga o lenei manatu!

12. Na faapefea ona atili ai ona iloa auauna a Ieova o ni ona tagata, i le tausaga e 1931?

¹² I le faaaʻoaʻo atu iā Keriso ma le “vaega e toʻatele o molimau” o ē na muamua atu iā te ia, o loo mitamita Kerisiano moni e faaaogā le suafa o le Atua. (Epe. 12:1) I le tausaga e 1931, na atili ai ona iloa auauna a le Atua o ni tagata o Ieova, ina ua latou taliaina le igoa o Molimau a Ieova. (Faitau le Isaia 43:10-12.) O lea la, na avea ai soo moni o Keriso ma ‘tagata ua valaauina i le suafa o le Atua,’ i se uiga faapitoa.—Galu. 15:14, 17.

13. E faapefea ona tatou ola e tusa ai ma lo tatou igoa mai i le Atua?

¹³ E faapefea ona tatou ola e tusa ai ma lo tatou igoa tāua mai i le Atua? O se tasi o auala, o lo tatou molimau atu lea e uiga i le Atua. Na tusi Paulo e faapea: “E faaolaina i latou uma o ē e valaau i le suafa o Ieova. Ae e faapefea ona latou valaau atu iā te ia o lē latou te lē o faatuatua i ai? E faapefea ona latou faatuatua iā te ia o lē latou te lē o faalogo i ai? E faapefea foʻi ona latou faalogo pe a leai se tasi e talaʻi atu? E faapefea ona latou talaʻi atu pe afai e leʻi aauina atu i latou?” (Roma 10:13-15) E ao foʻi ona tatou faailoa atu ma le agalelei aʻoaʻoga sesē a lotu, ia o loo faalumaina ai Lē na faia i tatou, e pei o le aʻoaʻoga i le afi i seoli, lea ua tuuaʻia ai le Atua alofa e faapea e na te faaalia uiga sauā o le Tiapolo.—Iere. 7:31; 1 Ioa. 4:8; faatusatusa i le Mareko 9:17-27.

14. Na faapefea ona tali mai nisi ina ua latou iloa le suafa o le Atua?

¹⁴ Po o e mitamita e tauave le suafa o lou Tamā o i le lagi? Po o e fesoasoani atu i isi ia latou iloa lenā suafa paia? Na faalogo se fafine i Pale, i Falani, e iloa e Molimau a Ieova le suafa o le Atua, o lea na ia fesili ai i le isi Molimau a Ieova na la feiloaʻi, ia faailoa atu lenā suafa mai i lana Tusi Paia. Ina ua faitauina e le fafine le Salamo 83:18, na telē se aafiaga iā te ia. Sa amata ona ia suʻesuʻeina le Tusi Paia, ma i le taimi nei ua avea ma tuafafine faamaoni o loo talaʻi i se isi atunuu. Ina ua faatoʻā vaaia e se fafine Katoliko i Ausetalia le suafa o le Atua i le Tusi Paia, sa tagi o ia ona o le fiafia. I le taimi nei, ua tele tausaga talu ona paeonia sauatoa o ia. Talu ai nei foʻi, ina ua faaali atu e Molimau i Iamaika le suafa o le Atua i se fafine i lana lava Tusi Paia, sa tagi foʻi o ia ona o le fiafia. O lea la, ia mitamita e tauave le suafa o le Atua, ma faaaʻoaʻo iā Iesu e ala i le faalauiloa atu o lenā suafa tautele.

“Aua le Manaʻo i le Lalolagi”

15, 16. O le ā le vaaiga a Kerisiano i le lalolagi, ma o ā fesili e ao ona tatou fesili ifo ai iā i tatou lava?

¹⁵ “Aua le manaʻo i le lalolagi po o mea o iai i le lalolagi. Afai e manaʻo se tasi i le lalolagi, e lē o i totonu iā te ia le alofa o le Tamā.” (1 Ioa. 2:15) Ua tetee le lalolagi ma lona agaga iā Ieova ma lona agaga paia. O lea la, e lē lava le tau ina lē avea soo moni o Keriso ma tagata o le lalolagi. E latou te teena le lalolagi i o latou  loto, ona latou te manatua upu na tusia e le soo o Iakopo, “o le faauō atu i le lalolagi ua fai ai tagata ma fili o le Atua.”—Iako. 4:4.

¹⁶ O se luʻi le usitaia o upu a Iakopo i lenei lalolagi ua tumu i faaosoosoga. (2 Timo. 4:10) O lea na tatalo ai Iesu mo ona soo e faapea: “Ou te talosaga atu iā te oe, e aua neʻi aveesea i latou mai le lalolagi, a ia leoleo iā i latou ona o lē ua leaga. E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioa. 17:15, 16) Ia fesili ifo iā te oe lava: ‘Po o oʻu taumafai malosi ia lē avea ma tagata o lenei lalolagi? Po o iloa e isi ou te lē lagolagoina aso faamanatu ma tū e lē faale-Tusi Paia, atoa ai ma aso faamanatu ma tū e lē faapaupau le amataga, ae o loo atagia mai ai le agaga o le lalolagi?’—2 Kori. 6:17; 1 Pete. 4:3, 4.

17. O le ā e ono uunaʻia ai ē lotofaamaoni ina ia liliu atu iā Ieova?

¹⁷ E mautinoa o le a lē fiafia mai le lalolagi iā i tatou ona o lo tatou lagolagoina o le Tusi Paia, ae e ono faatupu ai le fia iloa o tagata lotofaamaoni. O lea la, pe a iloa e na tagata o o tatou talitonuga e faavae mausalī mai i le Tusi Paia ma e aofia ai o tatou olaga atoa, o le iʻuga, e latou te ono tali mai i le pei o loo faapea atu i le ʻaufaauuina: “E matou te ō ma outou, auā ua matou faalogo o loo iā te outou le Atua.”—Saka. 8:23.

Ia Faaalia le Alofa Moni Faa-Kerisiano

18. O le ā e aofia ai i le faaalia o le alofa mo Ieova ma o tatou tuaoi?

¹⁸ Na fetalai Iesu: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa” ma “ia e alofa atu i lou tuaoi e pei o oe lava iā te oe.” (Mata. 22:37, 39) O lenā alofa (a·gaʹpe i le faa-Eleni) e faavae aʻe i tiute tauave, tapulaa, ma uiga talafeagai, ae o le tele o taimi e aofia ai foʻi ma faalogona loloto. E mafai ona māfana ma malosi. (1 Pete. 1:22) E matuā tuufaafeagai lava ma le manatu faapito, auā o lea alofa e faaalia i upu ma gaoioiga lē manatu faapito.—Faitau le 1 Korinito 13:4-7.

19, 20. Faamatala mai ni mea na tutupu e faaalia ai le telē o le aafiaga o le alofa faa-Kerisiano.

¹⁹ Talu ai o le alofa o se vala o le fua o le agaga paia o le Atua, e mafai la ona faamalosia ai Kerisiano moni e faia mea e lē mafai ona faia e isi, e pei o le manumalo i papupuni o le faailogalanu, aganuu, ma faiga faapolotiki.  (Faitau le Ioane 13:34, 35; Kala. 5:22) E matuā ootia ai lagona o ē e pei o ni mamoe pe a latou vaaia lea alofa. O se faataʻitaʻiga, ina ua auai mo le uluaʻi taimi se tauleʻaleʻa Iutaia i Isaraelu i se sauniga faa-Kerisiano, sa maofa o ia i le vaai atu o tapuaʻi faatasi iā Ieova uso Iutaia ma uso Arapi. O le iʻuga, sa auai o ia e lē aunoa i sauniga ma faia sana suʻesuʻega faale-Tusi Paia. Po o e faaalia lenā alofa mai le loto i ou uso ma tuafāfine? Pe e te taumafai e faatalofa atu ma le māfana i ē fou o loo iai i lo outou Maota mo Sauniga, e tusa lava po o le ā lo latou atunuu, lanu, po o le tulaga?

²⁰ Talu ai o ni Kerisiano moni, e tatou te taumafai e faaalia atu le alofa i tagata uma. Sa suʻesuʻe e se tuafafine talavou i El Salvador le Tusi Paia ma se tinā matua ua 87 ona tausaga, e lotu Katoliko ma e toʻaga i le lotu. I se tasi aso, na maʻi tigāina le tinā matua ma taofia i le falemaʻi. Ina ua toe teʻa mai i tua i le fale, na asiasi atu tuafāfine ma avatu meataumafa mo ia. Pe tusa o se masina o faia faapea. E leai se isi o lana lotu na asiasi atu iā te ia. O le ā le iʻuga? Na ia lafoaʻi ana faatusa, faamavae mai i lana lotu, ma toe amata lana suʻesuʻega faale-Tusi Paia. Ioe, e telē se aafiaga o le alofa faa-Kerisiano! E sili atu ona pāʻia ai loto o tagata i lo le tau ina talaʻi atu i ai.

21. E faapefea ona tatou faamausalīina lo tatou faamoemoe i le lumanaʻi?

²¹ Ua toe o se aga ona fetalai atu lea o Iesu i ē uma ua faapea mai ma le pepelo o loo auauna iā te ia: “Ou te leʻi iloa lava outou. Inā ō ese ia iā te aʻu, o outou o ē faia mea leaga.” (Mata. 7:23) O lea la, seʻi o tatou fuaina atu fua e faamamaluina ai le Tamā ma le Alo. Na fetalai Iesu: “O i latou uma e faalogo i aʻu upu ma faia, ua faatusaina i latou i le tagata faautauta, ua na fausia lona fale i luga o le papa.” (Mata. 7:24) Ioe, afai e faamaonia o i tatou o ni soo moni o Keriso, o le a tatou maua le finagalo malie o le Atua, ma o le a mausalī lo tatou faamoemoe i le lumanaʻi, e pei ua fausia i luga o le papa!

[Faamatalaga pito i lalo]

Pe E te Manatua?

• E faapefea ona ese soo moni o Keriso mai i soo pepelo?

• Taʻu mai nisi o “fua” e iloa ai Kerisiano moni.

• O ā sini e mafai ona e faataatia ina ia fuaina mai ai fua faa-Kerisiano?

[Fesili mo le Suʻesuʻega]

[Ata i le itulau 13]

Po o masani ona e faaaogā e lē aunoa le Tusi Paia i lau faiva?

[Ata i le itulau 15]

Po o iloa e isi e te lē lagolagoina aso faamanatu e lē faale-Tusi Paia?