Tibonise Ungumlandzeli WaKhristu Sibili

“Sihlahla lesimnandzi sitsela titselo letimnandzi, kantsi sihlahla lesibi sitsela titselo letimbi.”—MAT. 7:17.

1, 2. Balandzeli baKhristu beliciniso bahlukaniswa njani kulabo bemanga, ikakhulukati kulamalanga ekugcina?

 JESU watsi baphrofethimbumbulu labatsi bakhonta yena, kutawuba nemehluko emkhatsini wabo kanye nebafundzi bakhe, ngetitselo tabo—timfundziso tabo kanye nekutiphatsa kwabo. (Mat. 7:15-17, 20) Kuliciniso kutsi bantfu bahuhwa nguloko labakucabangako naloko lokusuka enhlitiyweni. (Mat. 15:18, 19) Labo labafundziswa emanga batsela titselo ‘letimbi’ bese kutsi labo labafundziswa emaciniso akamoya batsela “titselo letimnandzi.”

² Tinhlobo letimbili tetitselo tibonakala ngalokusebaleni kulesikhatsi semalanga ekugcina. (Fundza Danyela 12:3, 10.) EmaKhristu emanga anembono longasiwo ngaNkulunkulu futsi anesimo sekutentisa mayelana nekutinikela kuye, kodvwa labo labanelwati lolujulile ngetintfo takamoya bakhonta Nkulunkulu ‘ngemoya nangeliciniso.’ (Joh. 4:24; 2 Thim. 3:1-5) Betama kubonakalisa timfanelo tebuKhristu. Kodvwa kutsiwani ngatsi? Njengobe utawufundza ngetindlela letisihlanu tekubona buKhristu beliciniso, tibute: ‘Kutiphatsa kwami kanye naloko lengikufundzisa labanye kuyavumelana yini neliVi laNkulunkulu? Kutiphatsa kwami kanye nemfundziso yami, kwenta liciniso lijabulise yini kulabo labalifunako?’

Phila NgeliVi LaNkulunkulu

3. Yini lejabulisa Jehova, futsi loku kuhlanganisani kumaKhristu eliciniso?

³ Jesu watsi: “Akusibo bonkhe labatsi kimi: ‘Nkhosi, Nkhosi,’ labayawungena embusweni welizulu, kodvwa ngulabo labenta intsandvo yaBabe losezulwini.” (Mat. 7:21) Akusiko kusho ngemlomo kutsi siyakholwa lokujabulisa Jehova, kodvwa kwenta loko emaKhristu lokufanele akwente. Kubalandzeli baKhristu loku kufaka ekhatsi indlela yabo yekuphila, lokuhlanganisa simo sabo sengcondvo mayelana nemali, umsebenti wekutiphilisa, kutijabulisa, emasiko nemikhosi yelive, umshado kanye nebuhlobo betfu nalabanye bantfu. Ngakulolunye luhlangotsi, emaKhristu emanga, wona acabanga aphindze ente tintfo ngendlela yalelive, lelichubeke langena-shi ekwenteni titfo letiphambene nekulunga ikakhulukati kulamalanga ekugcina.—Hla. 92:7.

4, 5. Singawasebentisa njani emavi aJehova latfolakala kuMalakhi 3:18 ekuphileni kwetfu?

⁴ Mayelana naloku, umphrofethi Malakhi wabhala: “Niyawuphindze niwubone kahle umehluko emkhatsini walabalungile nalababi, ngisho emkhatsini walabo labakhonta Nkulunkulu nalabo labangamkhonti.” (Mal. 3:18) Njengobe ucabanga ngalamavi, tibute: ‘Ngifanana nebantfu balelive yini, nobe ngehlukile? Nginemkhuba wekulwela kutihlanganisa nalabangakholwa yini, kungaba ngusesikolweni, nobe emsebentini, nome, ngiyetama yini kubambelela etimisweni teliBhayibheli, ngikhulume ngato lapho kufanele?’ (Fundza 1 Phetro 3:16.) Kuliciniso kutsi asifuni kubonakala shengatsi sincono kulabanye, kodvwa kufanele sehluke kulabo labangamtsandzi Jehova nalabangamkhonti.

⁵ Nangabe ubona kutsi kukhona lapho kudzingeka ulungise khona, ungathandaza ngalendzaba. Utawutfola emandla ngekutsi ufundze liBhayibheli njalo, uthandaze futsi uye nasemihlanganweni. Ngalesikhatsi liVi laNkulunkulu ulisebentisa njalo ekuphileni kwakho, nawe utawutsela “titselo letimnandzi,” letifaka ekhatsi ‘titselo temlomo letivuma libito [laNkulunkulu].’—Heb. 13:15.

 Shumayela NgeMbuso WaNkulunkulu

6, 7. Mayelana nemlayeto weMbuso, ngumuphi umehluko lokhona emkhatsini wemaKhristu eliciniso newemanga?

⁶ Jesu watsi: “Kufanele ngishumayele liVangeli ngembuso waNkulunkulu nakulamanye emadolobha, ngobe Nkulunkulu ungitfume kwenta kona loko.” (Luk. 4:43) Kungani Jesu enta uMbuso waNkulunkulu waba sihloko semsebenti wakhe wekushumayela? Kungobe bekati kutsi yena njengeNkhosi yalowoMbuso, kanye nalabo labavuswe ngemoya, batawukucedza konkhe loko lokubangela lusizi kubantfu—sono kanye naDeveli. (Rom. 5:12; Semb. 20:10) Ngako wayala balandzeli bakhe kutsi bashumayele ngalowoMbuso kuze kufike tikhatsi tekuphela. (Mat. 24:14) Bantfu labatikhohlisako batsi babalandzeli baKhristu, abahlanganyeli kulomsebenti—ecinisweni, angeke bawente. Kungani? Kungenca yetizatfu letintsatfu: Sekucala, angeke bashumayele ngentfo labangayicondzi. Sesibili, linyenti labo alikatfobeki futsi alinaso sibindzi lesidzingekako kute likwati kumelana nekuhlekwa kanye nekuphikiswa lokuba ngumphumela wekucoca ngemlayeto weMbuso nabomakhelwane. (Mat. 24:9; 1 Phet. 2:23) Kantsi sesitsatfu, emaKhristu emanga ete umoya waNkulunkulu.—Joh. 14:16, 17.

⁷ Ngakulolunye luhlangotsi, balandzeli baKhristu beliciniso bona bayacondza kutsi uyini uMbuso waNkulunkulu naloko lotawukwenta. Ngetulu kwaloko, uMbuso waNkulunkulu uta kucala ekuphileni kwabo, bashumayela ngawo emhlabeni wonkhe ngelusito lwemoya waNkulunkulu. (Zak. 4:6) Uyahlanganyela yini kulomsebenti ngalokugcwele? Uyetama yini kutfutfuka njengemshumayeli weMbuso, ngekutsi ucitse sikhatsi lesinyenti kulomsebenti, nobe ufundzise ngendlela lephumelelako? Labanye betame kutfutfukisa emakhono abo kulomsebenti, ngekutsi basebentise liBhayibheli kakhudlwana kuwo. Umphostoli Pawula lowakwenta umkhuba kufundza imiBhalo, wabhala watsi: “Livi laNkulunkulu liphilile, linemandla.”—Heb. 4:12; Imis. 17:2, 3.

8, 9. (a) Ngutiphi tibonelo letibonisa kubaluleka kwekusebentisa liBhayibheli emsebenti wetfu wekushumayela? (b) Yini lengasisita setayelane neliVi laNkulunkulu?

⁸ Lomunye umzalwane abesemsebentini wekushumayela emtini ngemuti, wafundzela lenye indvodza lengumKatolika umbhalo waDanyela 2:44, wabese uyayichazela kutsi loMbuso waNkulunkulu utakuletsa njani kuthula nekulondzeka. Lendvodza yatsi: “Ngiyajabula ngekutsi uvule liBhayibheli futsi wangikhombisa loko lelikushoko, kunekumane ungitjele nje ngemlomo.” Umzalwane lotsite naye wafundzela lomunye lomsikati longumGriki lobekanetinkholelo leticinile enkholweni yakhe umbhalo, lona lomsikati wabese ubuta imibuto leminyenti lemihle kakhulu. Nakulesimo, lomzalwane akanye nemkakhe, baphendvula lona lomsika basebentisa liBhayibheli. Ngekuhamba kwesikhatsi lona lomsikati watsi: “Niyati yini kutsi kungani benginesifiso sekukhuluma nani? Kungesizatfu sekutsi nite ekhaya lami niphetse liBhayibheli, futsi nalifundza.”

⁹ Ecinisweni, tincwadzi tetfu tibaluleke kakhulu futsi kufanele sitinikete bantfu emsebentini wekushumayela. Nobe kunjalo, liBhayibheli ngiyo incwadzi leyinhloko lesifundzisa ngayo. Ngako-ke, nangabe bewungalisebentisi ngaso sonkhe sikhatsi nawushumayela, kungani ungakwenti umgomo wakho kulisebentisa njalo? Mhlawumbe ungakhetsa imibhalo lembalwa lechaza kahle kutsi uyini uMbuso waNkulunkulu, nekutsi utawuticatulula njani tinkinga letihlupha bantfu endzaweni yakini. Ngako-ke, yilungiselele kuyifundza nawushumayela emtini ngemuti.

Memetela Libito LaNkulunkulu Ngenjabulo

10, 11. Macondzana nekusetjentiswa kwelibito laNkulunkulu, ngumuphi umehluko lokhona emkhatsini waJesu nalabo labatibita ngekutsi babalandzeli bakhe?

¹⁰ Jehova utsi: “Nine niboFakazi bami kutsi mine nginguNkulunkulu.” (Isa. 43:12) Fakazi waJehova lomkhulu kunabo bonkhe, Jesu Khristu, wakutsatsa njengelilungelo kumemetela libito laNkulunkulu nekulenta latiwe. (Fundza Eksodusi 3:15; Johane 17:6; Hebheru 2:12.) Ecinisweni, ngesizatfu sekutsi Jesu abeshumayela ngelibito laBabe wakhe, abebitwa ngekutsi ‘nguFakazi Lowetsembekile.’—Semb. 1:5; Mat. 6:9.

¹¹ Ngalokwehlukile, labo labatsi bamelela  Nkulunkulu kanye neNdvodzana yakhe balihlazile libito laNkulunkulu, baze balikhipha nasemaBhayibhelini abo. Sibonisa simo lesifananako, sicondziso samuva lesiya kubabhishobhi bemaKatolika satsi “libito laNkulunkulu lelibhalwa ngekutsi YHWH nge-tetragrammaton akufanele lisetjentiswe nobe kukhulunywe ngalo” lapho kukhontwa. a Lena yindlela yekucabanga lengakalungi.

12. Nga-1931, yini leyaticacisa ngalokukhanya bha tinceku taJehova?

¹² Alingisa Khristu kanye ‘nesicumbi lesikhulu sabofakazi’ labalandzelwa nguye, emaKhristu eliciniso ayajabula ngekusebentisa libito laNkulunkulu. (Heb. 12:1) Ecinisweni, ngemnyaka wa-1931 tinceku taJehova tabonakala ngalokusebaleni ngekutsi temukele ligama lelitsi boFakazi BaJehova. (Fundza Isaya 43:10-12.) Ngaleso sizatfu, balandzeli baKhristu beliciniso baba ‘bantfu lababitwa ngelibito [laNkulunkulu].’—Imis. 15:14, 17.

13. Singaphila njani ngekuvumelana nelibito laNkulunkulu lesibitwa ngalo?

¹³ Singenta njani kute siciniseke kutsi senta loko lokufanele kwentiwe bantfu lababitwa ngelibito laNkulunkulu? Kufanele ngekwetsembeka sifakazele Nkulunkulu. Pawula wabhala: ‘Wonkhe umuntfu lobita libito laJehova, uyawusindziswa. Kodvwa bangalibita kanjani libito laloyo lebangakholwanga nguye? Bangamkholwa njani lebangazange beve ngaye? Bangeva njani nakute lobashumayelako? Bangashumayela njani bangakatfunywa?’ (Rom. 10:13-15, NW.) Ngekuhlakanipha, kufanele sitivete ebaleni timfundziso temanga letihlambalata uMdali wetfu, letifaka ekhatsi imfundziso yesihogo semlilo, leyenta shengatsi Nkulunkulu wetfu lonelutsandvo unemikhuba yelunya njengaDeveli.—Jer. 7:31;1 Joh. 4:8; catsanisa naMakho 9:17-27.

14. Bative njani labanye nabafundza ngelibito laNkulunkulu?

¹⁴ Uyajabula yini ngekufakaza ngelibito laBabe wetfu wasezulwini? Uyabasita yini labanye kutsi balati? Lomunye lomsikati eParis, eFrance, weva kutsi boFakazi BaJehova bayalati libito laNkulunkulu, ngako wacela lomunye Fakazi lahlangana naye kutsi amtjengise lona eBhayibhelini. Nakafundza Tihlabelelo 83:18, wajabula kakhulu. Wacala kufundza liBhayibheli, sikhuluma nje nyalo ungulomunye wabodzadze wetfu labatsembekile, futsi ukhonta kulelinye live. Lomunye make longumKatolika lohlala e-Australia, wabona libito laNkulunkulu eBhayibhelini kwekucala ngca, wakhala tinyembeti tenjabulo. Sikhuluma nje, nyalo sewube lihlahlandlela lelivamile iminyaka leminyenti. Muva nje eJamaica, boFakazi labatsite bakhombise lomunye lomsikati libito laNkulunkulu eBhayibhelini, naye wabatsela ngetinyembeti tenjabulo. Ngako-ke, jabula ngekufakaza ngelibito laNkulunkulu, lingisa Jesu ngekwenta lelobito leliligugu latiwe bantfu bonkhe.

“Ningalitsandzi Live”

15, 16. EmaKhristu eliciniso alibheka njani live, futsi ngumiphi imibuto lokufanele sitibute yona?

¹⁵ “Ningalitsandzi live netintfo letiseveni. Nangabe umuntfu atsandza live, lutsandvo lwaBabe alukho kuye.” (1 Joh. 2:15) Live kanye netinkhanuko tenyama letikulo, kumelene ngalokuphelele naJehova nemoya wakhe longcwele. Nobe kunjalo, balandzeli baKhristu beliciniso bakubalekela ngalokuphelele kuba yincenye yalelive. Loku kusho kutsi abalitsandzi ngalokusuka enhlitinyweni. Bakhumbula emavi emphostoli Jakobe latsi: “Anati yini kutsi kutsandzana nelive kubutsa kuNkulunkulu?”—Jak. 4:4.

¹⁶ Kungaba matima kulalela lamavi aJakobe ikakhulukati kunali live lelisiletsela tilingo lesingeke sikhone ngisho nekutibala. (2 Thim. 4:10) Jesu waze wathandazela balandzeli bakhe watsi: “Angiceli kutsi ubasuse eveni, kodvwa ngicela kutsi ubalondvolote bangatfunjwa nguLomubi. Njengobe nami ngingesiye walelive, nabo abasibo balelive.” (Joh. 17:15, 16) Tibute: ‘Ngilwela kungabi yincenye yelive yini? Labanye bayati yini kutsi ngiyibheka njani imikhosi kanye nemasiko langakasekelwa embhalweni kuhlanganise nalawo langasuki kumahedeni kodvwa lawubonisa ebaleni umoya welive?’—2 Khor. 6:17; 1 Phet. 4:3, 4.

17. Yini leyenta labo labanetinhlitiyo leticotfo kutsi babe seluhlangotsini lwaJehova?

 ¹⁷ Kuliciniso kutsi kukholelwa kwetfu ngalokucinile etimfundzisweni teliBhayibheli angeke kusente sitsandvwe live, kodvwa kungavusa umndlandla kulabo labanetinhlitiyo leticotfo. Ecinisweni, nangabe labatsite labambalwa bacaphela kutsi kukholwa kwetfu kucinile emiBhalweni futsi kufaka ekhatsi nendlela lesiphila ngayo, bangavele nabo bavume kulabagcotjiwe batsi: “Asihambisane nani, ngobe sivile kutsi Nkulunkulu unani.”—Zak. 8:23.

Bonisa Lutsandvo LwebuKhristu

18. Yini lefaka ekhatsi lutsandvo ngaJehova nabomakhelwane betfu?

¹⁸ Jesu watsi: “Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” Wachubeka watsi: “Ubotsandza makhelwane wakho njengobe utitsandza wena.” (Mat. 22:37, 39) Lolotsandvo (ngesiGriki a·gaʹpe) lutsandvo lolucotfo lolufaka ekhatsi timiso, kutiva ubophekile, kanye netento temusa, kodvwa ngalokuvamile libuye lifake ekhatsi kuba nemiva lenemandla. Lungaba lutsandvo lolujabulisako nalolunemandla. (1 Phet. 1:22) Lwehluke kakhulu etentweni tebugovu, ngobe lona luboniswa ngemavi nangetento.—Fundza 1 Khorinte 13:4-7.

19, 20. Ase usho lokuhlangenwe nako lokukhombisa emandla elutsandvo lwebuKhristu.

¹⁹ Njengobe lutsandvo lusitselo semoya longcwele waNkulunkulu, lwenta emaKhristu eliciniso kutsi ente tintfo letingeke tentiwe ngunome ngubani, njengekuncoba kubandlululana ngebuhlanga, kuhlukahlukana kwemasiko netembusave. (Fundza Johane 13:34, 35; Gal. 5:22) Labo labanjengetimvu, bayajabula ngekubona lutsandvo lolunjalo. Nasi sibonelo: Indvodza lengumJuda ka-Israyeli yatsi nayiya emhlanganweni wemaKhristu kwekucala ngca, yamangala nayibona emaJuda nema-Arab akhonta Jehova kanye kanye. Loko kwaphumela ekutseni icale kuya njalo emhlanganweni futsi yacala kufundzelwa liBhayibheli. Uyalukhombisa yini lutsandvo lolunjalo lolusuka enhlitiyweni kulamanye emaKhristu? Uyakwenta yini umgomo wakho kwemukela ngetandla letimhlophe labasha labafikako eHholweni lenu leMbuso, kungakhatsaliseki kutsi babuya kulamanye emave, banelibala lesikhumba lelingafani nelakho, nobe baphasi?

²⁰ NjengemaKhristu eliciniso, silwela kubonisa lutsandvo kubo bonkhe bantfu. E-El Salvador, umemeteli losasemusha abefundza liBhayibheli nalomunye lomsikati loneminyaka lengu-87 budzala, lobekatinikele ngalokugcwele enkholweni yakhe yemaKatolika. Ngalelinye lilanga, lona lomsikati wagula kakhulu futsi wangeniswa esibhedlela. Nasekabuyele ekhaya asaluleme, boFakazi beta kutewumhlola kute baciniseke kutsi unako yini kudla. Loku kwachubeka kwenteka cishe inyanga yonkhe. Kute ngisho namunye esontfweni lalona lomsikati lamvakashela. Waba yini umphumela? Lona lomsikati walahla tonkhe tithico takhe, wesula esontfweni futsi waphindze wacalisa kufundzelwa liBhayibheli. Yebo, lutsandvo lwebuKhristu lunemandla! Lungayifinyelela inhlitiyo kwendlula loko lesingakusho ngemavi emlomo.

21. Singalicinisa njani likusasa letfu?

²¹ Masinyane, Jesu utawutsi kubo bonkhe labenta shengatsi bayamkhonta, “Angizange nginati. Sukani kimi, nine benti balokubi!” (Mat. 7:23) Ngako-ke, shengatsi singatsela titselo letidvumisa Babe kanye neNdvodzana. Jesu watsi: “Wonkhe umuntfu lova lamavi ami awente, ufanana nendvodza lehlakaniphile, leyakha indlu yayo etikwelidvwala.” (Mat. 7:24) Nangabe sitibonisa sibalandzeli baKhristu sibili, sitawemukelwa nguNkulunkulu, futsi likusasa letfu liyoba ngulelicinile, njengekungatsi lisekelwe edvwaleni.

[Umbhalo longentasi]

Usakhumbula Yini?

• Balandzeli baKhristu beliciniso behluke njani kubemanga?

• Shano “titselo” letikhombisa emaKhristu eliciniso.

• Nawufuna kutsela titselo tebuKhristu, ngumiphi imigomo lokufanele utibekele yona?

[Imibuto Yesihloko Lesifundvwako]