Amutondezye Kuti Muli Basikutobela Kristo Beni-Beni
Amutondezye Kuti Muli Basikutobela Kristo Beni-Beni
“Musamu umwi aumwi mubotu ulazyala micelo mibotu, alimwi musamu uusampukide ulazyala micelo mibi.”—MT. 7:17.
1, 2. Ino mbuti basikumutobela Kristo beni-beni mbobandeene abakubeja, ikapati mazuba aano aamamanino?
JESU wakaamba kuti aabo ibalicengeezya kuti balamubelekela baya kwaandaanizyigwa kuli basikumutobela beni-beni kwiinda mumicelo yabo, nkokuti kwiinda munjiisyo zyabo ambobalilemeka. (Mt. 7:15-17, 20) Masimpe, bantu balayungwa azyintu nzyobabala, kumvwa naa kubona. (Mt. 15:18, 19) Aabo bayiisyigwa zyakubeja balazyala “micelo mibi,” pele aabo ibayiisyigwa kasimpe ka Leza balazyala “micelo mibotu.”
2 Micelo eeyi yobilo ilalibonya mazuba aano aamamanino. (Amubale Daniele 12:3, 10.) Banakristo bakubeja tabamuzyi kabotu Leza alimwi ikanji-kanji, bukombi bwabo mbwakuupaupa, pele aabo ibamuzyi kabotu balamukomba Leza “mumuuya amubwini.” (Joh. 4:24; 2 Tim. 3:1-5) Balasoleka kucita mbubonya mbwaakali kucita Kristo. Pele ino mbuti swebo kutugama? Nomulanga-langa zitondezyo zya Banakristo bakasimpe zyosanwe, amulibuzye kuti: ‘Sena mbondililemeka anzyondiyiisya zileendelana ancolyaamba Jwi lya Leza? Sena bukkale bwangu bupa kuti bantu bali amyoyo mibotu bakayande kasimpe?
Kamupona Kweelana Ancolyaamba Jwi lya Leza
3. Ino ncinzi cimukkomanisya Jehova, alimwi ino eeci caamba nzi ku Banakristo bakasimpe?
3 Jesu wakati: “Boonse bandaambila kuti, Mwami, mwami, teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu.” (Mt. 7:21) Masimpe, tatweelede kwaamba buyo kuti tuli Banakristo, pele tweelede kucita nzyayanda Jehova kutegwa tumukkomanisye. Kuli basikumutobela Kristo beni-beni, eeci caamba kuti mubuumi bwabo boonse, nkokuti mbobaabona mali, mulimo wakumubili, zyakulikondelezya, zilengwa zyanyika, kusekelela mapobwe, kukwatana alimwi ambobapona abantu bamwi, beelede kucita ncayanda Leza. Pele Banakristo bakubeja batobela nzila zyanyika eeyo yainda kubija mazuba aano aamamanino.—Int. 92:7.
4, 5. Ino mbuti mbotukonzya kubelesya majwi aa Jehova mubuumi bwesu aali kuli Malaki 3:18?
4 Aboobo, musinsimi Malaki wakalemba kuti: “Alimwi bayoobona lwaandaano akati kabaluleme ababi, aakati kabaabo babelekela Leza abaabo batamubelekeli.” (Malk. 3:18, BT) Nomuyeeya majwi aaya, amulibuzye kuti: ‘Sena ndilaakulilemeka mbuli bantu banyika naa pe? Sena ndilaakucita zyintu nzyobacita beenzuma mbondiiya limwi naa mbondibeleka limwi, naa ndilaakutobela njiisyo zyamu Bbaibbele akubaambila makani aakumuuya ikuti kwayandika?’ (Amubale 1 Petro 3:16.) Masimpe tatweelede kulipa kaleza-leza, pele tweelede kwiindana abantu batamuyandi alimwi batamubelekeli Jehova.
5 Ikuti mwabona kuti muyandika kucinca bukkale bwanu, inga camugwasya kwaapailila makani aayo akulomba kuti muyume kumuuya. Kutegwa mucite boobo mweelede kubala Bbaibbele, kupaila alimwi akujanika kumiswaangano. Ikuti kamubelesya nzyomwiiya mu Jwi lya Leza, muya kuzyala “micelo mibotu,” kubikkilizya ‘amicelo yamilomo iilumba izyina lya Leza.’—Heb. 13:15.
Kamukambauka Bwami bwa Leza
6, 7. Caboola kumulumbe wa Bwami, ino nkwiindana nzi kuliko akati ka Banakristo bakasimpe abakubeja?
6 Jesu wakati: “Ndileelede kwiikambaukila minzi imwi Makani Mabotu aa-Bwami bwa-Leza, nkaambo nkonkuko nkwendakatuminwa.” (Lk. 4:43) Ino nkaambo nzi Jesu ncaakabikkila maano kapati ku Bwami bwa Leza naakali kukambauka? Wakalizyi kuti walo mbwali Mwami wa Bwami oobo antoomwe abanabokwabo bananike ibaya kubusyigwa, baya kumanizya zyintu eezyo zipa kuti bantu kabapenga, nkokuti icibi a Diabolosi. (Rom. 5:12; Ciy. 20:10) Aboobo, wakaambila basikumutobela kuti beelede kukambauka Bwami oobo kusikila kumamanino aabweende oobu bwazyintu. (Mt. 24:14) Bantu ibalicengeezya kuti mbasikutobela Kristo tabaubeleki mulimo ooyu—alimwi buya tabakonzyi kuubeleka. Ino nkaambo nzi? Akaambo katwaambo ootu totatwe: Kakusaanguna, tabakonzyi kukambauka cintu ncobatazyi kabotu. Kaambo kabili, ibanji tabalicesyi alimwi bamwi balayoowa. Aboobo nobasampaulwa akukazyigwa tabakonzyi kuzumanana kukambaukila basimukobonyina mulumbe wa Bwami. (Mt. 24:9; 1 Pet. 2:23) Mpoonya kaambo katatu nkakuti Banakristo bakubeja tabajisi muuya wa Leza.—Joh. 14:16, 17.
7 Kulubazu lumwi, basikumutobela Kristo bakasimpe balibuzyi kabotu Bwami bwa Leza alimwi ancobuya kucita. Alimwi muzyintu zyoonse nzyobacita mubuumi bwabo babikka Bwami bwa Leza kumbele alimwi balakambauka makani aa Bwami oobu munyika yoonse kwiinda mukugwasyigwa amuuya wa Jehova. (Zek. 4:6) Sena mulatola lubazu lyoonse mumulimo ooyu? Sena mulasoleka kuba mukambausi wa Bwami ucibwene kuyiisya, ambweni kwiinda mukubeleka ciindi cilamfwu mumulimo wakukambauka naa kwiinda mukubelesya nzila ziindene-indene zyabukambausi? Bamwi bacita kabotu mumulimo wakukambauka akaambo kakuti balalibelesya kabotu Bbaibbele. Mwaapostolo Paulo iwakali acilengwa cakubandika abantu kwiinda mukubelesya Magwalo wakalemba kuti: “Ijwi lya-Leza lili abuumi, lili anguzu.”—Heb. 4:12; Inc. 17:2, 3.
8, 9. (a) Ino ncinzi cakacitika icitondezya mbokuyandika kubelesya Bbaibbele notuli mumulimo wakukambauka? (b) Ino mbuti mbotukonzya kulibelesya kabotu Ijwi lya Leza?
8 Naakali mumulimo wakuŋanda aŋanda, imukwesu umwi wakabala lugwalo lwa Daniele 2:44 kumusankwa umwi wakucikombelo ca Katolika akupandulula Bwami bwa Leza mbobuya kuleta luumuno anyika. Imusankwa ooyu wakati: “Ndalumba kapati kuti mwandibalila Bbaibbele akundipanduluda ncolyaamba muciindi cakwiile kundaambila buyo amulomo.” Imukwesu uumbi naakabala lugwalo kumukaintu wacikombelo ca Greek Orthodox, imukaintu ooyo wakamubuzya mibuzyo minji ikutondezya kuti wakali kuyanda kwiiya. Nociba ciindi eeci, mukwesu ooyu antoomwe amukaintu wakwe, bakaingula kwiinda mukubelesya Bbaibbele. Nikwakainda mazuba, mukaintu ooyu wakati: “Sena mulicizyi cakandipa kuti ndibandike andinywe? Nkaambo nimwakandiswaya kuŋanda mwakandibalila Bbaibbele.”
9 Masimpe, mabbuku eesu alayandika kapati alimwi tweelede kwaabelesya mumulimo wakukambauka. Pele Ibbaibbele ndebbuku lipati ndyotubelesya. Aboobo ikuti naa timwali kulibelesya-belesya mumulimo wakukambauka, inga cabota kuti mutalike lino kulibelesya. Ambweni inga mwasala magwalo ajisi twaambo tupandulula Bwami bwa Leza alimwi ambobuya kumana mapenzi ngobajisi bantu ooko nkomukkala. Mwamana inga mwalibambila kwaabala nomukambauka kuŋanda aŋanda.
Kamukkomana Kuti Mwiitwa Azyina lya Leza
10, 11. Caboola kukubelesya zyina lya Leza, ino nkwiindana kuli buti kuliko akati kabasikumutobela Jesu beni-beni abaabo balyaamba buyo kuti balamutobela?
10 “Ndinywe bakamboni bangu, mbwaamba Jehova. Ndime Leza.” (Is. 43:12) Kamboni wa Jehova imupati, Jesu Kristo, wakabona kuti ncoolwe cipati kwiitwa azyina lya Leza alimwi akulizyibya kubantu bamwi. (Amubale Kulonga 3:15; Johane 17:6; Ba-Hebrayo 2:12.) Akaambo kakuti Jesu wakali kukambauka zyina lya Bausyi, wakali kwiitwa kuti “kamboni uusyomeka.”—Ciy. 1:5; Mt. 6:9.
11 Mukwiimpana, ibantu banji ibalyaamba kuti baiminina Leza a Mwanaakwe tabalilemeki zyina lya Leza, alimwi bakaligusya muma Bbaibbele aabo. Ikutondezya muuya ngumunya ooyu, beendelezi bacikombelo ca Katolika bakaamba kuti “izyina lya Leza ilijisi mabala one aakuti YHWH talyeelede kubelesyegwa naa kwaambwa” mukukomba. * Mizeezo eeyi taili kabotu.
12. Mumwaka wa 1931, ino mbuti babelesi ba Jehova mbobakalizyibya kuti mbantu ba Jehova?
12 Banakristo beni-beni balalibelesya zyina lya Leza mbubonya mbwaakali kucita Kristo alimwi ‘amakamu makamu aabakamboni’ bakaindi. (Heb. 12:1) Nkakaambo kaako mumwaka wa 1931 babelesi ba Leza bakalizyibya kuti mbantu ba Jehova kwiinda mukulizumina zyina lyakuti Bakamboni ba Jehova. (Amubale Isaya 43:10-12.) Aboobo munzila eeyo, basikumutobela Kristo beni-beni bakaba bantu “baitwa ezina lya [Leza].”—Inc. 15:14, 17.
13. Ino mbuti mbotukonzya kupona kweelana azyina ndyaakatupa Leza?
13 Ino mbuti swebo kutugama mbotukonzya kutondezya kuti tuli bantu azyina lya Leza? Cakusaanguna, tweelede kusyomeka mumulimo wakukambauka zyina lya Leza? Paulo wakalemba kuti: “Umwi aumwi uulilila izina lya-Mwami ulafutuka. Pele bamulilile buti ngubatana kusyoma? Alimwi bamusyome buti ngubatana kumvwa? Alimwi, bamvwe buti nikutakwe sikukambauka? Alimwi, bantu bakambauke buti, batatumwa?” (Rom. 10:13-15) Alimwi, tweelede kuzibikka antangalala nzibayiisya bazikombelo zyakubeja eezyo zisampaula Mulengi wesu, mbuli njiisyo yamulilo wahelo, yalo iipa bantu kubona kuti Leza ngusilunya kaali Diabolosi nguuli boobo.—Jer. 7:31; 1 Joh. 4:8; amweezyanisye Marko 9:17-27.
14. Ino bantu bamwi balimvwa buti nobalizyiba zyina lya Leza?
14 Sena mulikkomene kwiitwa azyina lya Bauso bakujulu? Sena mulaakubagwasya bantu kuti balizyibe izyina eelyo lisetekene? Mukaintu umwi mudolopo lya Paris, mucisi ca France, wakamvwa kuti Bakamboni ba Jehova balilizyi zyina lya Leza, aboobo naakaswaanganya Kamboni umwi wakamubuzya kuti amutondezye izyina eelyo mu Bbaibbele lyakwe. Naakabala Intembauzyo 83:18, wakakkomana kapati. Wakatalika kwiiya Bbaibbele mpoonya wakabbapatizyigwa alimwi lino ubelekela kucisi cimbi. Imukaintu umwi wacikombelo ca Katolika wakucisi ca Australia naakabona zyina lya Leza mu Bbaibbele ciindi cakusaanguna, wakalila kukkomana kwalo. Lino kwainda myaka minji kabeleka mulimo wabupainiya bwaciindi coonse. Caino-ino, Bakamboni bakucisi ca Jamaica nobakatondezya mukaintu umwi izyina lya Leza mu Bbaibbele lyakwe, awalo wakalila kukkomana kwalo. Aboobo amukkomane kuti mwiitwa azyina lya Leza. Alimwi mbubonya mbwaakacita Jesu, amubaambile bantu boonse zyina eeli libotu kapati.
“Mutayandi Nyika”
15, 16. Ino Banakristo bakasimpe baibona buti nyika, alimwi ino mibuzyo nzi njotweelede kulibuzya?
15 “Mutayandi nyika, neziba zintu zyamunyika. Kuti muntu wayanda nyika, luyando lwa-Taata taluli mulinguwe.” (1 Joh. 2:15) Inyika mbyaabi ilamukazya Jehova amuuya wakwe uusalala. Aboobo, muciindi buyo cakutatola lubazu muzyintu zyanyika, basikumutobela Kristo beni-beni balizisulide zyintu eezyo. Cibapa kucita boobo ncakuti balaazyi majwi ngaakalemba sikwiiya Jakobo aakuti: “Kutangana buzwalani anyika, nkokulwana a-Leza.”—Jak. 4:4.
16 Cilakonzya kutukatazya kutobela majwi a Jakobo akaambo kakuti kuli masunko manji aatusikila munyika eeyi. (2 Tim. 4:10) Aboobo, Jesu wakapailila basikumutobela kuti: “Nsikumbili kuti ubagwisye munyika, pele kuti ubavune kulooyo mubi. Tabali banyika mbuli mbwentali wenyika amebo.” (Joh. 17:15, 16) Amulibuzye kuti: ‘Sena zyintu nzindicita zilatondezya kuti tandili wanyika? Sena beenzuma balizyi kuti tandisekeleli mapobwe azilengwa zitazumizyidwe mu Magwalo naa zitondezya muuya wanyika?’—2 Kor. 6:17; 1 Pet. 4:3, 4.
17. Ino ncinzi cikonzya kupa kuti babombe myoyo basale kweenda a Jehova?
17 Masimpe, bantu banyika tabakonzyi kukkomana nobabona kuti tutobela ncolyaamba Bbaibbele, nokuba boobo ibabombe myoyo balakonzya kukkomana kwiiya Bbaibbele. Inzya, bantu bali boobu nobabona kuti nzyotusyoma zizwa mu Magwalo akuti tulazitobela lyoonse, balakonzya kwaambila bananike kuti: “Atweende anywebo, nkaambo twamvwa kuti Leza mpali akati kanu.”—Zek. 8:23.
Amutondezye Luyando Lwini-lwini lwa Bunakristo
18. Ino kuyanda Jehova abeenzuma caamba nzi?
18 Jesu wakati: “Yanda Leza Jehova wako amoyo wako woonse, amoya wako woonse, amumiyeeyo yako yoonse” akuti, “yanda mweenzinyoko mbuli mboliyanda omwini.” (Mt. 22:37, 39) Luyando lwaambwa aawa (lwa a·gaʹpe mu Chigiliki) lujatikizya mbobalilemeka anzyobacita bantu alimwi lulatondezyegwa kwiinda mukutobela njiisyo. Nokuba boobo, luzwa ansi amoyo alimwi lupa kuti muntu kakkomana kukkala abantu. (1 Pet. 1:22) Zyintu nzyaamba akucita muntu uli boobu ziliindene kapati anzyacita ooyo uuliyanda.—Amubale 1 Ba-Korinto 13:4-7.
19, 20. Amwaambe zyintu zyakacitika izitondezya mbolugwasya luyando lwa Banakristo.
19 Akaambo kakuti muuya uusalala wa Leza nguupa kuti muntu abe aluyando, Banakristo bakasimpe balacita zyintu nzyobatakonzyi kucita bantu bamwi, mbuli kutasalana mubala, kutacita zyintu zitali kabotu akuzwaangana akaambo katwaambo twacisi. (Amubale Johane 13:34, 35; Gal. 5:22) Babombe myoyo balakulwaizyigwa nobabona bantu bayandana ncobeni. Mucikozyanyo, musankwa umwi mu Juda wakucisi ca Israel naakaunka kumuswaangano wa Banakristo ciindi cakusaanguna, wakagambwa kubona bakwesu bama Juda aba Arabu kabamukomba Jehova antoomwe. Eeci cakamupa kuti lyoonse kajanika kumiswaangano alimwi wakazumina kwiiya Bbaibbele. Sena andinywe mbomubayanda bakwesu oobu? Alimwi sena mulaakubatambula amaanza obilo ibapya baboola ku Ŋanda ya Bwami, kakunyina kulanga cisi nkobazyila, musyobo naa mulimo ngobacita?
20 Mbotuli Banakristo, tulabayanda bantu boonse. Kucisi ca El Salvador, mucizyi umwi uucili mwana wakali kwiiya Bbaibbele abacembele ibakali kukomba ku Katolika ibali amyaka iili 87 ibakali basungu mucikombelo cabo. Bumwi buzuba, bacembele aaba bakaciswa kapati cakuti bakajatwa kucibbadela. Nobakazwa mucibbadela, Bakamboni bakali kubaswaya akubatolela zyakulya. Bakali kucita oobu mwezi woonse. Kunyina wakabaswaya kuzwa kucikombelo cabo. Ino ncinzi cakacitika? Bakaisowa mituni akucileka kuunka kucikombelo cabo mpoonya bakatalika alimwi kwiiya Bbaibbele. Masimpe, luyando lwa Banakristo luli anguzu. Bantu balakkomana kapati notubayanda munzila eeyi ikutali kwaamba buyo amulomo.
21. Ino mbuti mbotukonzya kuba abuumi bubotu?
21 Ino-ino Jesu uyakwaambila boonse ibalyaamba kuti balamutobela kuti: “Nsimuzi pe, amuzwe kulindime inywe nubamucita zibi.” (Mt. 7:23) Aboobo atutondezye micelo iimulemeka Taata a Mwanaakwe. Jesu wakati: “Umwi aumwi uuswiilila majwi aangu aya akwaacita uzookozyanisigwa amuntu uucenjede iwakayaka iŋanda yakwe atala amwala.” (Mt. 7:24) Inzya, ikuti twatondezya kuti tuli basikutobela Kristo beni-beni, Leza uyakutulongezya alimwi buumi bwesu buya kubota, mbuli ŋanda yakayakilwa abbwe.
Bupanduluzi buyungizidwe
^ munc. 11 Mumabbuku amwi aaba Katolika aalembedwe mumwaambo wa Chingisi kubikkilizya a Bbaibbele lya The Jerusalem Bible, izyina lya Leza lilembedwe kuti “Yahweh.”
Sena Muciyeeyede?
• Ino mbuti basikumutobela Kristo beni-beni mbobaindene abakubeja?
• Amwaambe “micelo” imwi iitondezya kuti Mbanakristo beni-beni.
• Kutegwa mutondezye micelo ya Banakristo, ino zyintu nzi nzyomukonzya kucita?
[Mibuzyo yaciiyo]
[Cifwanikiso icili apeeji 13]
Sena muli acilengwa cakubelesya Bbaibbele lyoonse nomukambauka?
[Cifwanikiso icili apeeji 15]
Sena beenzyinyoko balizyi kuti tamusekeleli mapobwe aatamukomanisyi Leza?