Kakʼtik ta ilel ti jaʼutik melel yajtsʼaklom Cristoe
Kakʼtik ta ilel ti jaʼutik melel yajtsʼaklom Cristoe
«Scotol li lequil teʼetique lec sat chacʼ. Yan li chopol teʼetique chopol sat chacʼ.» (MAT. 7:17)
1, 2. ¿Kʼusi jelel-o li melel yajtsʼaklomtak Jesuse, mas to ti kuxulutik xa ta slajebal kʼakʼale?
LI Jesuse laj yal ti chvinaj ta yabtel xchiʼuk ti kʼuyelan chchanubtasvan ti jelel li melel yajtsʼaklomtak ta stojolal li buchʼu maʼuke (Mat. 7:15-17, 20). Mu kʼusi stakʼ jpastik, yuʼun ti kʼusi ch-och ta snopben xchiʼuk ta yoʼonton li jun krixchanoe jaʼ te chvinaj li ta kʼusitik tspase (Mat. 15:18, 19). Jaʼ yuʼun, ti buchʼu chchan jutbil kʼopetik ta relijionetike «chopol sat chacʼ», yan li buchʼu chchanik kʼusi melele «lec sat chacʼ».
2 Li avi ti kuxulutik xa ta slajeb kʼakʼale mas xa xvinaj ti jelel tajeke (kʼelo Daniel 12:3, 10). Li buchʼu maʼuk melel yajtsʼaklom Cristoe oy kʼusi mu jechuk tsnopik ta sventa li Jpasvaneje xchiʼuk altik ti chichʼik ta mukʼ yilele, pe li buchʼutik xojtikinik lek Diose «ta espiritu xchiʼuk ta melel chichʼik ta mukʼ» xchiʼuk chakʼik persa chchanbeik stalelal li Cristoe (Juan 4:24, NM; 2 Tim. 3:1-5). Pe ¿kʼusi xuʼ xkaltik ta jujuntal li voʼotike? Li ta xchanobil liʼe ta jkʼeltik voʼtos kʼusi jelelik-o li melel yajtsʼaklomtak Jesuse. Xi jakʼbe jbatik kʼalal yakal ta jkʼeltik batele: «¿Mi jech jtalelal kʼuchaʼal tskʼan Diose xchiʼuk mi jaʼ noʼox chkakʼ ta chanel li kʼusi chal Vivliae? ¿Mi chnopajik-o tal ta mantal li buchʼutik oy ta yoʼontonik li kʼusi melel ta skoj ti kʼuyelan kuxulune?».
Jechuk kuxikutik kʼuchaʼal chal Vivliae
3. ¿Kʼusi ti xmuyubaj-o yoʼonton Jeovae, xchiʼuk kʼusi skʼan spas li yajtsʼaklom Cristo ta sventa taje?
3 Xi pʼijubtasvan li Jesuse: «Oy ep bochʼotic jech ta xalic: “Cajval, Cajval”, xiyuticun, pero mu scotoluc ch-ochic yoʼ bu chventainvan li Diose. Jaʼ noʼox ch-ochic li bochʼotic tspasic cʼusi tscʼan yoʼnton li Jtot te oy ta vinajele» (Mat. 7:21). Jaʼ jech: maʼuk xmuyubaj-o Jeova kʼalal oy buchʼu chal ti jaʼ yajtsʼaklom Cristoe, moʼoj, jaʼ ti buchʼu chakʼ ta ilel ta yabteltake. Li melel yajtsʼaklom Cristoe jaʼ jech tspas ta sjunul xkuxlejal li kʼusi chal melel mantale, jech kʼuchaʼal ta sventa takʼin, abtelal, chʼayob oʼontonal, li kʼusitik nopem xaʼiik xchiʼuk li kʼusitik tspasbeik skʼinal ta balumile, li ta sventa nupunel xchiʼuk ta sventa amigoile. Pe jaʼuk li buchʼu jaʼ noʼox chal ti jaʼ yajtsʼaklom Cristoe, jaʼ me jech yelan snopben xchiʼuk stalelal kʼuchaʼal li balumil ti yantik sok batele (Sal. 92:7).
4, 5. ¿Kʼuxi chvinaj ta jkuxlejaltik li kʼusi chal Malaquías 3:18?
4 Xi onoʼox la stsʼiba li j-alkʼop Malaquiase: «Chlic avotquinic ti mu coʼoluc chquil li bochʼotic lec, xchiʼuc li bochʼotic chopolique; xchiʼuc ti mu coʼoluc chquil li bochʼotic yichʼojicun ta mucʼ xchiʼuc li bochʼotic muʼyuc yichʼojicun ta muqʼue» (Mal. 3:18). Jnopbetik skʼoplal taje xchiʼuk xi jakʼbe jbatike: «¿Mi ta jkʼan te jkʼoplal li ta balumile o mi chkakʼ persa ti jelelukune? ¿Mi chkakʼ tajek persa ti akʼo xchʼamikun li jchiʼiltak ta chanun o ta abtele? ¿O mi tukʼ chkakʼ jba xchiʼuk mi ta jchapbe skʼoplal li beiltaseletik ta Vivlia mi jech skʼan chkile?» (kʼelo 1 Pedro 3:16). Melel onoʼox ti mu jkʼantik ti tukʼ xa tajek chkaʼi jbatike, pe skʼan xvinaj ti jelelutik ta stojolal li buchʼutik mu skʼanik Jeova xchiʼuk ti muʼyuk chtunik ta stojolale.
5 Mi skʼan xa lekubtas atalelal chavaʼie kʼanbo koltael li Jeovae, chano li Vivliae, paso orasion xchiʼuk batan ta stekel tsobajeletik sventa xa tsatsub ta mantal. Mi mas chavakʼ ta akuxlejal li sKʼop Diose, mas me jamal xvinaj ta akuxlejal ti «lec sat chacʼ» li kʼusi cha pase, ti te smakoj «ti chlocʼ ta quetic» ta stojolal krixchanoetik li sbi Diose (Heb. 13:15).
Kakʼtik ta ojtikinel li Ajvalilal yuʼun Diose
6, 7. ¿Kʼusi jelelik-o xtok li melel yajtsʼaklomtak Cristo xchiʼuk li buchʼutik maʼuke?
6 Xi laj yal li Jesuse: «Ta persa chibat ta yantic lumetic, yuʼun chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale» (Luc. 4:43). ¿Kʼu yuʼun jaʼ laj yalbe skʼoplal li Ajvalilal yuʼun Dios kʼalal la xchol mantale? Yuʼun snaʼoj ti jaʼ ch-och ta Ajvalil li ta ajvalilal taje, chkoltaat yuʼun li buchʼutik tʼujbil chbatik ta vinajel ti chaʼkuxiemik xaʼoxe, ti jaʼ tslajes skotol li kʼusi chakʼbe svokol krixchanoetike: li Satanás xchiʼuk li mulile (Rom. 5:12; Apo. 20:10). Jaʼ yuʼun laj yalbe yajtsʼaklomtak ti akʼo xcholbeik skʼoplal li Ajvalilal jaʼ to mi tal li slajeb kʼusitike (Mat. 24:14, Ch). Li buchʼutik tskuy sbaik ta yajtsʼaklom Cristoe muʼyuk tspasik li abtelal taje xchiʼuk mi jaʼuk onoʼox spas yuʼunik. ¿Kʼu yuʼun? Kalbetik oxibuk srasonal. Baʼyel, mu x-al batel yuʼunik li kʼusi mu xaʼibeik smelolale. Xchibal, yuʼun jaʼ mas ep ti muʼyuk bikʼit yakʼoj sbaike xchiʼuk ti chʼabal stsatsal yoʼontonik sventa xkuch yuʼunik li pʼajel xchiʼuk li loʼiltael ta skoj chol mantale (Mat. 24:9; 1 Ped. 2:23). Li yoxibal srasonale jaʼ ti chʼabal ta stojolalik li xchʼul espiritu Jeovae (Juan 14:16, 17).
7 Jech xtok, li melel yajtsʼaklomtak Cristoe snabeik lek smelolal kʼusi jaʼ li Ajvalilal yuʼun Diose xchiʼuk ti kʼusi chkʼot ta pasel yuʼune. Jaʼ yuʼun, jaʼ chakʼ baʼyel ta xkuxlejalik xchiʼuk chalik batel ta spʼejel Balumil koliyal ti chkoltaatik yuʼun chʼul espiritue (Zac. 4:6). ¿Kʼusi xuʼ xkaltik li ta jtojolaltike? ¿Mi ta jcholilantik li mantale? ¿Mi yakal ta jchʼakbetik mas yorail xchiʼuk mi yantik xi jtojob batel? «Li scʼop Diose cuxul, oy stsatsal», jech oxal, ¿mi yakal chkakʼtik persa ta stunesel lek li Vivliae? Yakal me ta jchanbetik stalelal Pablo mi jech ta jpastike, yuʼun nopem onoʼox xaʼi tstunes kʼalal la xchiʼin ta loʼil li buchʼutik ch-aʼibat kʼusi chale (Heb. 4:12; Hech. 17:2, 3).
8, 9. 1) ¿Kʼusi kʼotem ta pasel ti jaʼ chakʼ kiltik ti tsots skʼoplal skʼan jtunestik Vivlia kʼalal ta jcholtik mantale? 2) ¿Kʼuxi xuʼ jchantik mas stunesel li Vivliae?
8 Kʼalal yakal chchol mantal ta naetik jun ermanoe, la skʼelbe Daniel 2:44 jun jkatoliko vinik, vaʼun la xchapbe smelolal ti Ajvalilal yuʼun Diose jaʼ chakʼ melel jun oʼontonal xchiʼuk ti chʼabaluk xa xiʼele. Xi la stakʼ li vinike: «Kolaval chakalbe ti maʼuk noʼox la avalbun li kʼusi chal Vivliae, moʼoj, yuʼun tukʼ la kʼelbun tal ta Vivlia». Yan ermano xtok ti yakal chchol mantal xchiʼuk yajnile la skʼelbe jun teksto jun ants ti te chaʼi mantal ta Iglesia Ortodoxa Griega. Ep kʼusitik la sjakʼ li antse, li ermanoetike ta Vivlia la stakʼik jech kʼuchaʼal la spas li ermano ti laj xa kalbetik skʼoplale. Xi laj yal ta mas jelavel li antse: «¿Mi xa naʼik kʼu yuʼun ti la jchikinta li kʼusi chavalike? Jaʼ ta skoj ti avichʼojik tal Vivliae xchiʼuk ti jaʼ te la kʼelbikun tale».
9 Melel onoʼox ti toj tsots yabtel tspas li jvuntike, jech oxal skʼan xkakʼtik, pe li kabtejebtik ti mas tsots skʼoplale jaʼ li Vivliae. ¿Mi nopem xavaʼi cha tunes ta chol mantal? ¿Kʼu yuʼun mu xavakʼ ta avoʼonton jech xa pas mi muʼyuk jech yakalot spasele? Yikʼaluk van jaʼ xa tʼuj li tekstoetik ti chalbe skʼoplal Ajvalilal yuʼun Diose xchiʼuk ti kʼuxi chchapaj yuʼun li vokoliletik ti mas chat-o yoʼonton krixchanoetik bu cha chol mantale xchiʼuk ti xa kʼel mi stakʼ chavil kʼalal cha chol mantal ta naetike.
Ta sjunul koʼontontik kichʼojbetik li sbi Diose
10, 11. ¿Kʼusi jelel-o stalelal Jesús ta sventa sbi Dios ta stojolal li buchʼutik chalik ti jaʼik yajtsʼaklomtake?
10 Xi li Jeovae: «Muʼyuc yan dios [avuʼunik], jaʼ yuʼun voʼoxuc testigooxuc cuʼun» (Isa. 43:12). ¿Buchʼu jaʼ li bankilal yajrextiko Jeovae? Ta melel, jaʼ li Jesucristoe. Jaʼ jun lekilal laj yaʼi ti yichʼojbe sbi sTote xchiʼuk ti chakʼ ta ojtikinele (kʼelo Éxodo 3:15, Juan 17:6 xchiʼuk Hebreos 2:12, NM). Xi chbiiltasat yuʼun li Vivliae: «Li tuqʼuil testigoe».
11 Pe li buchʼutik chalik ti biiltasbilik ta yajkʼopojel Jesús xchiʼuk Jeovae toj kʼexlal sba ti kʼuyelan stalelal ta stojolal li sbi Diose xchiʼuk stupʼoj lokʼel li ta sVivliaike. Jech ta melel, achʼ to xi laj yichʼik mantal li ovispoetike: «Li sBi Dios ta tetragrammaton YHWH mu stakʼ tunesel xchiʼuk mu stakʼ alel [kʼalal chichʼ ichʼel ta mukʼ Diose]». * ¡Toj chopol xa noʼox ti kʼuyelan tsnopike!
12. ¿Kʼusi la spasik ta 1931 li melel yajtsʼaklomtak Cristo sventa xnopajik mas xkaltik li ta sbi Diose?
12 Li yajtsʼaklomtak Cristo avie ta sjunul yoʼonton tstunesbeik li sbi Diose, jech kʼuchaʼal la spas Jesús xchiʼuk li «epal testigoetic» ta voʼnee (Heb. 12:1). Jaʼ jech ta melel, yuʼun li ta 1931 nopajik mas ta stojolal xkaltik li biil taje, yuʼun laj yakʼ sbaik ta ojtikinel kʼuchaʼal «yajrextikotak Jeova» (kʼelo Isaías 43:10-12). Jaʼ jech toj tsots skʼoplal kʼotik ta jun jteklum ti yichʼojbe sbi Diose (Hech. 15:14, 17, NM).
13. ¿Kʼuxi xuʼ jech xi jkuxi kʼuchaʼal li biil yakʼojbutik Diose?
13 ¿Kʼuxi xuʼ jnaʼtik ta melel ti jech chi jkuxi kʼuchaʼal li biil ti stuk noʼoxe? Li kʼusi baʼyel skʼan jpastike jaʼ ti xkalbetik batel skʼoplal li Diose. Xi la stsʼiba li Pabloe: «“Scotol li bochʼotic tscʼanbeic vocol Cajvaltique [«li Jeovae», NM] jaʼ ta xcolic”, xi tsʼibabil. Pero ¿cʼu xʼelan xuʼ tscʼanbeic vocol me muʼyuc xchʼunojique? ¿Cʼu xʼelan xuʼ chchʼunic me muʼyuc yaʼyojbeic scʼoplale? ¿Cʼu xʼelan xuʼ chaʼibeic scʼoplal me muʼyuc bochʼo chcholbat yaʼyique? ¿Cʼu xʼelan xuʼ yuʼun chbat xcholic me mu tacbilicuc batele?» (Rom. 10:13-15). Jech xtok, skʼan ta sjunul koʼontontik jamal xkaltik —pe oyuk jpʼijiltik— ti mu lekuk li chanubtaseletik chalik ti tsokbeik skʼoplal Jpasvaneje, jech kʼuchaʼal ta sventa li kʼatinbake, ti chalik ti xkoʼolaj la xchopolil yoʼonton kʼuchaʼal Diablo li jkʼanvanej Diose (Jer. 7:31; 1 Juan 4:8; koʼoltaso xchiʼuk Marcos 9:17-27).
14. ¿Kʼu yelan laj yaʼi sbaik junantik krixchanoetik kʼalal la xchanik kʼusi sbi li Diose?
14 ¿Mi ta sjunul avoʼonton avichʼojbe li sbi Diose xchiʼuk ti chaval echʼele? Oy xa jutuk skʼakʼalile, oy jun ants ta París ti kʼot ta xchikin ti snabeik sbi Dios li yajrextikotak Jeovae. Jaʼ yuʼun laj yalbe jun yajrextiko Jeova ti akʼo x-akʼbat yil ta Vivliae. Jun yoʼonton laj yaʼi ti kʼalal la skʼel ta Salmo 83:18 xchiʼuk la xchʼam jun chanubtasel ta Vivlia, li avi une jaʼ xa jun tukʼil yajtsʼaklom Cristo ti chtun ta namal balumile. Jech xtok, jun jkatoliko ants ta Australia ti la xchan ta Vivlia kʼusi sbi Diose okʼ ta muyubajel ek. Kʼot ta yoʼonton li mantale, vaʼun oy xa sjayibal jabil yakal chtun ta prekursora regular. Achʼtik toe, li ermanoetik ta Jamaicae laj yakʼbeik yil sbi Jeova ta sVivlia stuk jun ants, jaʼ jech okʼ ek. Ta melel, oy ep srasonal kuʼuntik sventa ta sjunuluk koʼontontik kichʼojtik li kʼupil sba biil taje xchiʼuk ti chkaltik batel ta buyuk noʼox jech kʼuchaʼal la spas Jesuse.
«Mu me xbat avoʼntonic yuʼun li cʼusi sventa banamile»
15, 16. 1) ¿Kʼu yelan chkiltik balumil li yajtsʼaklomutik Cristoe? 2) ¿Kʼusi skʼan jakʼbe jbatik ta jujuntal?
15 Xi chal li Vivliae: «Mu me xbat avoʼntonic yuʼun li cʼusi sventa banamile xchiʼuc li cʼusitic chopol oy ta banamile. Li bochʼo jaʼ batem yoʼnton ta sventa banamile, jaʼ muʼyuc scʼanoj o li Jtotic Diose» (1 Juan 2:15). Jech ta melel, li balumile xchiʼuk ti jaʼ noʼox tsaʼ li kʼusi tskʼan stuke skontrainojik li Jeova xchiʼuk xchʼul espiritue. Li melel yajtsʼaklomtak Cristoe maʼuk noʼox chakʼik persa ti mu skap sbaik ta sventa balumile, moʼoj, yuʼun tsots chakʼik persa sventa tspʼajik, yuʼun snaʼojik «ti yajcontra Dios chijcʼot me jaʼ ta jcʼantic cʼusi sventa banamile» jech kʼuchaʼal laj yal yajtsʼaklom Cristo Santiagoe (Sant. 4:4).
16 Tsots chkakʼtik persa sventa jchʼuntik li tojobtasel laj yal Santiago ta skoj ti toj echʼ xa noʼox sujel ta mulil avie (2 Tim. 4:10). Jaʼ yuʼun xi la spas orasion ta stojolal yajtsʼaklomtak li Jesuse: «Mu jaʼuc ta jcʼanbot ti acʼo avicʼ loqʼuel liʼ ta banamile. Jaʼ noʼox ta jcʼanbot ti acʼo achabibun yuʼun jech mu stsalatic yuʼun li pucuje. Yuʼun muʼyuquic xa ta sventa banamil, jech chac cʼu chaʼal muʼyucun ta sventa banamil li vuʼune» (Juan 17:15, 16). Xi jakʼbe jbatike: «¿Mi tsots chkakʼ kipal yoʼ chʼakalun ta stojolal li balumile? ¿Mi snaʼik kʼusi ta jnop ta sventa kʼinetik li buchʼutik xkojtikine, li kʼusitik nopem xaʼiik spasel krixchanoetik ti maʼukik yajtunel Diose o ta skoj li kʼusi tskʼan espiritu yuʼun balumile?» (2 Cor. 6:17; 1 Ped. 4:3, 4).
17. ¿Kʼusi chtijbat-o yoʼontonik ta saʼel Jeova li krixchanoetike?
17 Melel onoʼox ti mu lekuk chilik li kʼusi ta jpastike; pe li krixchanoetik ti oy ta yoʼontonik mantale tskʼan tsnaʼik kʼu yuʼun. Ep chakʼik venta ti ta Vivlia lokʼem li xchʼunel koʼontontike xchiʼuk ti te chvinaj ta skotol kʼusi ta jpastike, jaʼ yuʼun tskʼan chchanik mas li kʼusitik melel chakʼik ta chanel li buchʼutik tʼujbil chbatik ta vinajele. Xi chalbeik xkaltike: «Ta xbat jchiʼinotcutic ec, yuʼun laj caʼicutic ti te oy ta atojolic li Diose» (Zac. 8:23).
Kakʼtik ta ilel li melel kʼanelal yuʼun yajtsʼaklomtak Cristoe
18. ¿Kʼu yelan li kʼanelal skʼan xkakʼtik ta ilel ta stojolal Jeova xchiʼuk ta stojolal jchiʼiltaktike?
18 Xi laj yal li Jesuse: «Cʼano me ta scotol avoʼnton li Dios avuʼune, xchiʼuc ta scotol achʼulel, xchiʼuc ta scotol ajol». Laje xi to laj yale: «Cʼano me achiʼil jech chac cʼu chaʼal cʼux ta avoʼnton abecʼtal atuc» (Mat. 22:37, 39). Li kʼanelale (ti agápe sbi ta griego kʼope) ventainbil yuʼun beiltaseletik, skʼan jech pasel xchiʼuk ti jaʼ jech smelolale. Pe te tsakal skʼoplal kʼusi chkaʼi tajek ta koʼontontik xtok. Ta melel, xuʼ jun yutsil xchiʼuk ti ta sjunul koʼontontik chlokʼe (1 Ped. 1:22). Mu xkoʼolaj ta jyalel li saʼel kʼusi ta jkʼan jtuktike, taje chvinaj ta jkʼopojeltik xchiʼuk li kʼusi ta jpas ta sjunul koʼontontike (kʼelo 1 Corintios 13:4-7).
19, 20. Alo kʼusi kʼotem ta pasel ti jaʼ chakʼ ta ilel ti toj tsots yip li kʼanelal yuʼun yajtsʼaklomtak Cristoe.
19 Ta skoj ti jaʼ yabtel chʼul espiritu li kʼanelal taje jaʼ yuʼun spas yuʼunik yajtsʼaklomtak Cristo li kʼusi mu spas yuʼun yantike, jech kʼuchaʼal ti muʼyuk tspʼaj sbaik ta skoj stsʼunbalik, ta skoj stalelal xkuxlejalik xchiʼuk ta sventa politika (kʼelo Juan 13:34, 35; Gál. 5:22). Jaʼ yuʼun chtijbat yoʼonton li manxo krixchanoetik kʼalal jech chilik kʼanelal taje. Jech kʼuchaʼal liʼe, jun judio kerem ta Israel ti sba to velta ay ta tsobajele toj labal to laj yil ti jmoj chichʼik ta muk Jeova li ermanoetik ti jaʼik judioetik xchiʼuk j-arabeetike. Jaʼ yuʼun la xchʼam jun chanubtasel ta Vivlia xchiʼuk lik batuk ta tsobajeletik. ¿Mi jech jkʼanojtik ta sjunul koʼontontik kermanotaktik kʼuchaʼal taje? ¿Mi chkakʼtik lek venta li buchʼutik achʼ to chkʼot ta Salon sventa Tsobobbail sventa ta sjunul koʼontontik ta jchʼamtike, ti buuk lumal likemik tal, ti kʼusiuk kolor sbekʼtalik xchiʼuk ti kʼuk yelan oyik ta takʼine?
20 Li melel yajtsʼaklomutik Cristoe ta jkʼantik stekel li krixchanoetike. Li ta El Salvadore oy jun jkatoliko ants ti 87 xa sjabilale, taje ch-akʼbat toʼox chanubtasel ta Vivlia yuʼun jun ermana, pe mu skʼan xikta li srelijione. Oy jun velta ti tsots ipaje xchiʼuk ti paj kʼuk sjalil ta ospitale. Kʼalal albat yuʼun doktor ti xuʼ xa xlokʼ li ta ospitale, jun u la svulaʼanik li ermanoetike xchiʼuk laj yichʼbeik batel sveʼel. Pe muʼyuk bu x-ay vulaʼanatuk yuʼun li buchʼutik ta srelijione, jaʼ yuʼun la slokʼes stekel li santotake, lokʼ li ta srelijione xchiʼuk la xchaʼtam li chanubtasel ta Vivliae. ¡Toj echʼ xa noʼox tsots yip li kʼanelal yuʼunik yajtsʼaklomtak Cristoe! Chkʼot kʼalal to ta yutil oʼontonal, jaʼ mu sta ti kʼalal naka noʼox chkaltike.
21. ¿Kʼusi skʼan jpastik sventa jpat lek koʼontontik ta sventa li kʼusi chtal ta jelavele?
21 Poʼot xa me xi ch-albatik yuʼun Jesús li buchʼutik skuyoj sba ta yajtsʼaklomtak Cristoe: «Me jutuc muʼyuc bu laj cotquinoxuc. Vocʼo abaic ta jtojol; yuʼun jaʼ laj apasic li cʼusi chopole» (Mat. 7:23). Mu jechuk ta jkʼan jtalelaltik kʼuchaʼal li stukike, yuʼun li voʼotike jaʼ ta jkʼan ta jpastik li kʼusi ta jkʼupil kʼoptatik-o li Jeova xchiʼuk xNichʼone. Oy lek ta joltik li kʼusi laj yal Cristo liʼe: «Li bochʼo ta xaʼay cʼusi chcale, me ta xchʼune, jaʼ coʼol jech chac cʼu chaʼal jun bijil vinic la spas sna ta ba ton» (Mat. 7:24). Jaʼ yuʼun chaʼa, mi chkakʼtik ta ilel ta jkuxlejaltik ti jaʼutik melel yajtsʼaklomtak Cristoe lek me chilutik li Diose xchiʼuk ta me jpat lek koʼontontik yuʼun li kʼusi chtal ta jelavele, jech kʼuchaʼal jpʼej na ti vaʼanbil ta ba tone.
[Tsʼib ta yok vun]
^ Ep vunetik yuʼun jkatolikoetik avie «Yahvé» xi tsjelubtasik ta español li Tetragrámaton, jech kʼuchaʼal li Biblia de Jerusalén Latinoamericana.
¿Mi xvul ta ajol?
• ¿Kʼusi jelelik-o li melel yajtsʼaklomtak Cristo xchiʼuk li buchʼu maʼuke?
• Alo kʼusi jelel-o «sat» o yabtelik li melel yajtsʼaklomtak Cristoe.
• ¿Kʼusi jtosukal li ta sat o yabtel yajtsʼaklom Cristo ti xuʼ xlekub mas kuʼuntike?
[Sjakʼobiltak sventa xchanobil]
[Lokʼol ta pajina 13]
¿Mi nopem xkaʼitik stunesel Vivlia li ta chol mantale?
[Lokʼol ta pajina 15]
¿Mi snaʼoj yantik ti muʼyuk ta jpas li kʼinetik ti muʼyuk lek chil Diose?